RUNANGA PUKA I RUNGA I TE INITANETI Punanga Tiaki
Punanga Tiaki
RUNANGA PUKA I RUNGA I TE INITANETI
Reo Rarotonga
  • PIPIRIA
  • AU PUKA
  • AU UIPAANGA
  • w23 Tiunu kapi 8-13
  • Kia Vai Papa Ua no to Iehova Rā

Kare e vitio.

Akakoromaki mai kare te vitio e angaanga.

  • Kia Vai Papa Ua no to Iehova Rā
  • Te Punanga Tiaki Akakiteanga i te Patireia o Iehova (Tuanga Apii—2023
  • Tumu Tuatua
  • Tetai Atu Manako
  • AKAPEEA TO IEHOVA RĀ ME TAE MAI?
  • KOAI MĀ KARE E ORA I TO IEHOVA RĀ?
  • EAA TA TATOU KA RAVE KIA AKAPAPA NO TO IEHOVA RĀ?
  • “AKARA MATARIKI MARIE I TE AU MEA KATOA RA”
  • Kia Vai Papa Ua no te Ra o Iehova!
    Te Punanga Tiaki—Akakiteanga i te Patireia o Iehova—1991
  • “Kia Kore to Kotou Ngakau e Ngaueue Vave”!
    Te Punanga Tiaki Akakiteanga i te Patireia o Iehova—2013
  • Ka Paruru a Iehova ia Koe—Akapeea?
    Te Punanga Tiaki Akakiteanga i te Patireia o Iehova (Tuanga Apii)—2021
  • “Ka Ara”!
    Te Punanga Tiaki Akakiteanga i te Patireia o Iehova—2003
Tetai Atu
Te Punanga Tiaki Akakiteanga i te Patireia o Iehova (Tuanga Apii—2023
w23 Tiunu kapi 8-13

ATIKARA APII 26

Kia Vai Papa Ua no to Iehova Rā

“E aere maira [to Iehova rā] mei te keia i te po.”—1 TESA. 5:2.

IMENE 143 Tauta, e Āra ma te Tatari

I ROTO I TEIA APIIa

1. Eaa ta tatou ka rave kia ora atu i to Iehova rā?

ME TUATUA te Pipiria no “to Iehova rā,” te akakite ra te reira i te tuatau me takore a Iehova i tona au enemi e ka akaora i tona iti tangata. I tetai au taime kua akautunga a Iehova i te tangata i mua ana. (Isa. 13:1, 6; Eze. 13:5; Zepha. 1:8) I to tatou tuatau, ka akamata “to Iehova rā” me takoreia a Babulonia Maata e ka akamutu te reira ki te tamaki o Aramagido. Kia ora atu i te reira “rā,” ka anoanoia tatou kia akapapa i teianei. Kua apii a Iesu e ka anoanoia tatou kia akapapa no te “mate maata” e kia ‘vai papa ua’ no te reira.—Mata. 24:21; Luka 12:40.

2. Eaa tatou ka puapinga ai mei ia 1 Tesalonia?

2 I roto i tana reta akauruia ki te au Tesalonia, kua taangaanga te apotetoro ko Paulo i tetai au akatutuanga ei tauturu i te au Kerititiano kia vai papa ua no to Iehova rā maata o te akavaanga. Kua kite a Paulo kare to Iehova rā e tae mai i te reira tuatau. (2 Tesa. 2:1-3) Noatu rai, kua akamaroiroi aia i tona au taeake kia akapapa no te reira rā mei te mea e ka tae mai apopo, e ka tau katoa teia akoanga no tatou. Ka uriuri tatou i tana akamārama anga: (1) akapeea to Iehova rā me tae mai, (2) koai mā kare e ora i te reira rā, e te (3) akapeea tatou me akapapa e ora ai.

AKAPEEA TO IEHOVA RĀ ME TAE MAI?

Tutu: 1. Tata te apotetoro ko Paulo ki runga i te pokaikai tuatua. 2. Keikeia te keia i te po i te tangata e moe ra.

Ka puapingaia tatou mei te akatutuanga ta te apotetoro ko Paulo i tata i roto ia 1 Tesalonia (Akara i te parakarapa 3)

3. Akapeea to Iehova rā me tae mai mei te keia i te po? (Akara katoa i te tutu.)

3 “Mei te keia i te po.” (1 Tesa. 5:2) Ko teia te mea mua o te akatutuanga e toru ei akamārama i te tae anga mai to Iehova rā. E rave viviki ana te au keia i ta ratou angaanga i roto i te poiri e kare te tangata e kite mai. Ka tupu viviki katoa to Iehova rā, e ka poitirere te maata anga o te tangata. E ka poitirere katoa te au Kerititiano mou me tupu viviki te reira. Inara kare tatou e mate.

4. Mei teaa te tu o to Iehova rā mei te mamae o te vaine anau?

4 “Mei te vaine nui kia rokoia e te mamae ra.” (1 Tesa. 5:3) Kare e rauka i tetai mama nui te tamanako i te taime tikai e anau ei aia. Kua papu iaia e ka tupu te reira. Me tupu te reira, papu ka viviki, ka mamae, e kare e rauka i te tāpū. Pera rai, kare tatou i kite i te rā e te ora me akamata to Iehova rā. Noatu ra, kua papu ia tatou e te aere maira te reira e ka viviki ta te Atua akavaanga ki rungao i te aronga kino e kare e rauka ia ratou te oro.

5. Mei teaa te tu o te mate maata mei te rā ou?

5 Mei te rā ou. Kua taiku akaou te toru o ta Paulo akatutuanga i te au keia e keia ra i te po. Inara kua taiku a Paulo i teianei i to Iehova rā mei te rā ou. (1 Tesa. 5:4) Me rave te au keia i ta ratou angaanga i te po ka ngaropoina ia ratou te ora. No te mārama o tetai rā ou, penei ka mou ratou e kua kiteaia. Pera rai te mate maata, mei te au keia, ka mou te aronga tei noo ua ki roto i te poiri ma ta ratou angaanga tei akamareka kore i te Atua. Tuke tatou, kua vai papa ua tatou na te kopae anga i te au peu tei akamareka kore ia Iehova e ka rave i “te au mea meitaki ravarai, e te tuatua-tika, e te tuatua-mou.” (Ephe. 5:8-12) E oti kua taangaanga a Paulo e rua akatutuanga ei akatutu i te aronga kare e ora.

KOAI MĀ KARE E ORA I TO IEHOVA RĀ?

6. Mei teaa te tu kua varea te maata anga e te moe? (1 Tesalonia 5:6, 7)

6 “Ko tei moe ra.” (E tatau ia 1 Tesalonia 5:6, 7.) Kua akaaite a Paulo i te aronga kare e ora i to Iehova rā ki te aronga kua varea e te moe. Kare ratou e kite ana i te ora e aere ua ra. E kare ratou e kite i te au tupuanga puapinga e kia ariu atu ki te reira. E maata te tangata i teia tuatau kua varea e te moe i te pae vaerua. (Roma 11:8) Kare ratou e kite ana e te noo nei tatou i “te au rā openga” e te aere maira te mate maata. Penei ka akakeu te au tupuanga maata i teianei ao i tetai pae kia reka i te karere o te Patireia. Inara, ka oki te maata anga ki te moe, kare e vai ara ua. Te manako ra tetai pae e e mamao te rā akavaanga. (2 Pete. 3:3, 4) Inara, kua kite tatou e te rapurapu nei teia rā e kia vai ara ua tatou.

7. Akapeea te aronga te aro atura i to te Atua riri mei te aronga kona kava te tu?

7 Ko tei “akakona ra.” Kua akaaite te apotetoro i te aronga te aro atura i to te Atua riri mei te aronga kona kava. E marie te aronga kona kava i te ariu ki te au mea e tupu ra, e ka puapinga kore ta ratou ikianga. Kare katoa te aronga kino e ariu ki te au akamatakiteanga a te Atua. Ka iki ratou i te ara ki te mate. Inara kua akakiteia ki te au Kerititiano kia matakite e kia akamanako meitaki. (1 Tesa. 5:6) Kua akatutu tetai tangata apii Pipiria i teia tu akamanako meitaki “ei tu maru, papu te manako te akara e kia akamanako meitaki i te au mea kia rauka te ikianga meitaki.” Eaa tatou ka noo maru ei e kia papu? Kare i reira tatou e o ki roto i te au manamanata o te tangata e te poritiki. Ka maroia tatou kia iki i tetai tua me vaitata mai to Iehova rā. Noatu ra, kare tatou e taitaia akapeea tatou me ariu atu. Ka tauturu to te Atua vaerua ia tatou kia noo maru ma te manako papu kia rauka te au ikianga pakari.—Luka 12:11, 12.

EAA TA TATOU KA RAVE KIA AKAPAPA NO TO IEHOVA RĀ?

Aao tetai vaeau Roma i te rakei katoa, te tu anga i te pae i te puakapa. I muri ake iaia e au vaeau kare o ratou rakei, te inuinu ra e te tamataora ra.

Noo kite kore ua te maata anga o te tangata, ka vai papa ua tatou no to Iehova rā na te aao anga i te tapoki umauma o te akarongo e te aroa e te pare o te manakonakoanga (Akara i te parakarapa 8, 12)

8. Akapeea a 1 Tesalonia 5:8 te akatutu anga mai i te au tu te ka tauturu ia tatou kia vai ara ua e kia matakite? (Akara katoa i te tutu.)

8 “Ma te tapoki-umauma ra . . . e te . . . pare.” Kua akaaite a Paulo ia tatou ki te au vaeau matakite e kua papa no te tamaki. (E tatau ia 1 Tesalonia 5:8.) Ka anoanoia tetai vaeau kia vai papa ua no te tamaki. Pera rai tatou. Ka vai papa ua tatou no to Iehova rā na te aaoanga i tetai tapoki umauma o te akarongo e te aroa e tetai pare manakonakoanga. Ka tauturu maata teia au tu ia tatou.

9. Akapeea te akarongo me paruru ia tatou?

9 Kua paruru te tapoki umauma i te pukuatu o tetai vaeau. Ka paruru te akarongo e te aroa i to tatou ngakau. Ka tauturu teia ia tatou kia tavini ua i te Atua e kia aru ia Iesu. Te akapapu maira te akarongo e ka tutaki a Iehova ia tatou no tei kimi iaia ma te ngakau katoa. (Ebe. 11:6) Ka akakeu te reira ia tatou kia vai tiratiratu ki to tatou Arataki, ko Iesu, noatu me ka akakoromaki tatou i te au manamanata. Ka akamatutu tatou i te akarongo kia akakoromaki i te au manamanata na te apii anga i te au akaraanga o te au taeake o teia tuatau tei vai tiratiratu noatu te takinokino anga e te turanga kino o te moni. E ka kopae tatou i te ereere o te noinoi apinganui na te aru anga i te aronga tei akamāmā i to ratou oraanga kia tuku i te au inangaro o te Patireia na mua.b

10. Akapeea te aroa no te Atua e te tangata tupu me tauturu ia tatou kia akakoromaki?

10 E puapinga katoa te aroa kia vai ara ua e kia matakite. (Mata. 22:37-39) Ka tauturu te aroa no te Atua ia tatou kia akakoromaki i te tutu aere noatu te manamanata. (2 Timo. 1:7, 8) No te mea ka aroa katoa tatou i te aronga kare o ratou akarongo, ka tutu aere ua tatou te kimi ia ratou, pera te tutu aere na runga i te tereponi e te tata reta. Kare tatou e tuku i te au penei ka taui to tatou tangata tupu e ka rave i te meitaki.—Eze. 18:27, 28.

11. Akapeea te aroa no te au taeake me tauturu ia tatou? (1 Tesalonia 5:11)

11 To tatou aroa no te tangata tupu ka kapiti mai te au taeake Kerititiano. Ka akaari tatou i teia aroa me “akapumaana [tatou] tetai ki tetai, i te akatupu i te meitaki tetai ki tetai.” (E tatau ia 1 Tesalonia 5:11.) Mei te au vaeau i roto i te tamaki, ka akamaroiroi tatou i tetai e tetai. E tika, penei ka takino tetai vaeau i tetai i roto i te tamaki, inara kare rava aia e rave i te reira ma te akakoro. Kare katoa tatou e tamamae i to tatou au taeake e te au tuaine ma te tutaki i te kino ki te kino. (1 Tesa. 5:13, 15) Ka aroa katoa tatou na te akangateitei anga i te au taeake te arataki ra i te putuputuanga. (1 Tesa. 5:12) Te tata anga a Paulo i tana reta, koi akamata ua akera te putuputuanga Tesalonia. E kare te aronga akaaere i te aronga karape e kua rave katoa ratou i te tarevake. Noatu ra, kua tau ratou kia akangateiteiia. I te mate maata e vaitata maira, ka anoanoia tatou kia irinaki maata atu ki runga i te aronga pakari no te arataki anga. Penei kare e rauka i te opati maata e te opati Betela i te aravei mai ia tatou; no reira, e mea puapinga kia aroa e te akangateitei i te aronga pakari i teianei. Noatu eaa te tu, kia matakite tatou, eiaa e akamou ki runga i to ratou tarevake, mari ra e akamou ki runga ia Iehova e Karaiti e arataki ra i teia au tangata tiratiratu.

12. Akapeea to tatou manakonakoanga me paruru i to tatou manako?

12 Mei te pare tei paruru i te katu o tetai vaeau, ka paruru to tatou manakonakoanga i to tatou manako. Ma te manakonakoanga matutu, ka kite tatou e puapinga kore ta teianei ao ka oronga mai. (Phili. 3:8) Ka tauturu to tatou manakonakoanga kia vai maru tatou e te papu. Kua tika teia kia Wallace e Laurinda, tei tavini i Aperika. I roto i te toru epetoma, kua takake atu tetai o to raua nga metua. No te maki COVID-19, kare e rauka ia raua i te oki kia akara i to raua nga pamiri. Tata a Wallace: “Kua tauturu te tuakaouanga iaku kia akamanako ia raua, kare i to raua au rā openga, mari ra to raua au rā mua i roto i te ao ou. Kua akamaru teia manakonakoanga iaku me tupu te maromaroa e te mii kiaku.”

13. Eaa ta tatou ka rave kia rauka te vaerua tapu?

13 “Auraka e tinai i te vaerua ra.” (1 Tesa. 5:19) Kua akaaite a Paulo i te vaerua tapu ki tetai aʼi i roto ia tatou. Me rauka ia tatou te vaerua o te Atua, ka maroiroi tatou ma te aruaru kia rave i te mea tau e kia maroiroi atu i te angaanga na Iehova. (Roma 12:11) Eaa ta tatou ka rave kia rauka te vaerua tapu? Ka pure tatou no te reira, apii i te tuatua akauruia a te Atua, e ka taokotai atu ki tana akaaerenga tei aratakiia e tona vaerua? Na te rave anga i te reira, ka tauturu ia tatou kia taangaanga i te ‘ua o te vaerua.’—Gala. 5:22, 23.

Tutu: 1. Tatau te taeake i te Pipiria. 2. Tutu aere taua taeake raua ko tana vaine.

Ui kia koe, ‘Te akaari ra ainei taku e rave ra e te inangaro ra au kia rauka ua te vaerua o te Atua?’ (Akara i te parakarapa 14)

14. Eaa ta tatou ka anoanoia kia kopae kia rauka ua rai te vaerua o te Atua? (Akara katoa i te tutu.)

14 Me oronga mai te Atua i tona vaerua tapu, kia matakite tatou “auraka e tinai i te vaerua ra.” Ka oronga mai te Atua i tona vaerua ki te aronga anake e manako ma e te tu ma to ratou. Kare aia e oronga mai i tona vaerua me te vaira to tatou au manako tau kore e te rave ra i te reira. (1 Tesa. 4:7, 8) Kia rauka ua rai te vaerua tapu, “auraka [tatou] e akono kino atu i te totou anga ra.” (1 Tesa. 5:20) Te “totou anga” ko te au karere te reira tei orongaia mai e te vaerua o te Atua, kapiti mai te karere no to Iehova rā e to tatou tuatau rapurapuia. Kare tatou e manako e kare rava a Aramagido e tupu i to tatou tuatau. Mari ra, ka akarapurapu tatou i te reira—te akamanako meitaki anga—na te rave anga i te tu tau e kia maroiroi i “te akono i te Atua” i te au ra.—2 Pete. 3:11, 12.

“AKARA MATARIKI MARIE I TE AU MEA KATOA RA”

15. Akapeea tatou e kore ei e akavareia e te au tuatua pikikaa e te au akakiteanga pikikaa a te au temoni? (1 Tesalonia 5:21)

15 A te tuatau ki mua, ka kapiki te aronga patoi i te Atua: “E au, e kare e kino.” (1 Tesa. 5:3) Ka ki te enua i te au pikikaa tei akauruia e te au temoni, te akavare anga i te maata anga o te tangata. (Apo. 16:13, 14) Akapeea tatou? Kare tatou e akavareia me “akara matariki marie [tatou] i te au mea katoa ra.” (E tatau ia 1 Tesalonia 5:21.) Te tuatua Ereni “akara matariki marie” kua taangaangaia me akaraia te au apinga metera puapinga. No reira, kia matakite tatou i ta tatou e akarongo ra e e tatau ra me e tika te reira. E puapinga te reira ki te au tangata Tesalonia, e e puapinga atu te reira no tatou i te mate maata e vaitata maira. Kare tatou e āriki ua i ta tetai pae e karanga ra, ka taangaanga tatou i to tatou manako kia akaaite i ta tatou e tatau ra me kore e akarongo ra ki ta te Pipiria e te akaaerenga a Iehova e karanga ra. Na te rave anga i te reira, kare tatou e akavareia e tetai ua atu pikikaa a te au temoni me kore akavare anga.—Mase. 14:15; 1 Timo. 4:1.

16. Eaa to tatou manakonakoanga papu, e eaa ta tatou ka rave?

16 Ei pupu, ka ora atu te au tavini o te Atua i te mate maata. Inara, kare tatou tataki tai i kite eaa te ka tupu apopo. (Iako. 4:14) Noatu ra, me ka ora atu tatou i te mate maata e me ka mate i mua ake i te reira, ka tutakiia tatou ki te ora mutu kore me vai tiratiratu tatou. Ka aru te aronga akatainuia ia Karaiti ki te rangi. Ka noo te au mamoe ke atu i te enua parataito nei. Kia akamou ua tatou ki runga i to tatou manakonakoanga meitaki e kia vai papa ua no to Iehova rā!

AKAPEEA KOE ME PAU?

  • Akapeea to Iehova rā me tae mai?

  • Koai mā ka ora atu i to Iehova rā?

  • Eaa ta tatou ka rave kia akapapa no to Iehova rā?

IMENE 150 Kimi i te Atua Toou Akaora

a I roto ia 1 Tesalonia pene 5, ka kite tatou i te au akatutuanga e te au akaaiteanga te ka apii ia tatou no te rā o Iehova. Eaa te reira “rā,” e akapeea te reira me tae mai? Koai mā ka ora? Koai mā kare e ora? Akapeea tatou me akapapa no te reira? Ka akara matatio tatou i te tuatua a te apotetoro ko Paulo e ka pau i te au uianga.

b Akara i te tuanga “Kua Oronga Puareinga Ratou ia Ratou Uaorai.”

    Au Puka Reo Rarotonga (1983-2025)
    Akaruke
    Aere ki Roto
    • Reo Rarotonga
    • Akaari ki Etai Ke
    • Taau e Inangaro
    • Copyright © 2025 Watch Tower Bible and Tract Society of Pennsylvania
    • Ture no te Taangaanga Anga i te Web Site
    • Ture Akamanaia
    • Privacy Settings
    • JW.ORG
    • Aere ki Roto
    Akaari ki Etai Ke