“Ka Ara”!

“Taku e karanga atu kia kotou nei, te karanga atu nei au ki te tangata ravarai, Ka ara.”​—MAREKO 13:37.

1, 2. (a) Eaa te apiianga ta tetai tangata i kite no te tiakianga i tana au apinga? (e) Mei ta Iesu akatutu anga no te keia ra, eaa ta tatou i kite no runga i te ara ua anga?

KUA akaputu a Juan i tana au apinga okomaata i te kainga. Kua vaio aia i te reira ki raro i tona roi​—i tana manakoanga ko te ngai meitaki roa i roto i te ngutuare. Inara, i tetai po, ia raua ko tana vaine e moe ra, kua tomo atu tetai keia ki roto i te pia moe anga. Te taka meitaki ra, kua kite te keia e teiea tikai te ngai ka akara. Kua apai maniania kore atura aia i te au apinga okomaata ravarai mei raro i te roi e te moni katoa ta Juan i vaio ki roto i tetai vairanga kaingakai i te pae i te roi. I tera mai popongi ra, kua kite a Juan e kua keiaia. Ka maara roa ia e ia te apiianga mamae tana i kite ra: Kare e rauka i tetai tangata e moe ra i te paruru i tana au apinga.

² Mei te reira katoa oki te tika i te pae vaerua. Kare e rauka ia tatou i te paruru i to tatou manakonakoanga e to tatou akarongo me varea tatou e te moe. No reira, ko ta Paulo akamaroiroi anga: “Auraka tatou e moe, mei tetai papaki ra, kia ara ra, e e akono meitaki.” (1 Tesalonia 5:6) Kia akaari e mei teaa te puapinga maata kia ara ua, kua taiku a Iesu i te akatutu anga no tetai keia. Kua akataka mai aia i te au tupuanga tei taki atu ki tona aerenga mai ei Akava, e i reira kua akamatakite maira aia: “Kia matakite oki, kare kotou i kite i te ora e tae mai ei to kotou Atu. Kua kite ra kotou e, naringa i kite te tangata kainga i te ora e tae mai ei te keia, kua tapapa aia, kare i akaruke ua i tona are kia vavaʼi uaia. E teianei kia vai teateamamao rai kotou, no te mea, ei te ora manako koreia e kotou, e tae mai ei te Tamaiti a te tangata.” (Mataio 24:42-44) Kare te keia e akakite mai na mua e aea aia e aere mai ei. Ka manakonako aia kia tae mai i te tuatau kare tetai e tapapa ana iaia. Mei te reira katoa, mei ta Iesu i tuatua maira, ka tae mai te openga o teianei akatereanga i ‘te ora manako koreia e tatou.’

“Kia Matakite; kia Mou Piri Tikai te Akarongo”

3. I akapeea ta Iesu, taangaanga anga i te akatutu anga no te au tavini tei tatari ra i to ratou pu kia oki mai mei te akaipoipoanga, i te akakite anga i te puapinga maata no te ara ua anga?

³ I te au tuatua tataia i te Evangeria a Luka, kua akaaite a Iesu i te au Kerititiano ki te au tavini e tapapa atura no te oki maianga o to ratou pu mei te akaipoipoanga. Ka tau ratou kia matakite kia ara ua ratou i tona tae anga mai, e kua papa i te turou atu iaia. I roto i tetai tu aiteite, kua tuatua a Iesu: “Ei te ora manako koreia e kotou na, e tae mai ei te Tamaiti a te tangata.” (Luka 12:40) Ko tetai papaki tei tavini ana ia Iehova no etai mataiti e manganui penei ka ngere i to ratou tu rapurapu no runga i te au tuatau e noo nei tatou. Penei e ka manako ratou e kare te openga e tae mai no tetai tuatau roa. Inara ka rauka i taua manakoanga kia taki atu ia tatou kia uri ke i to tatou manako mei te au mea vaerua e kia manako atu i te au akakoroanga apinga kopapa, te au apinga te ka akariro ia tatou kia varea moe i te pae vaerua.​—Luka 8:14; 21:34, 35.

4. Eaa te irinaki anga te ka akakeu ia tatou kia ara ua atu rai, e akapeea ta Iesu akaari anga i teia?

⁴ Ka rauka katoa ia tatou tetai apiianga mei ta Iesu akatutu anga. Noatu rai kare te au tavini i kite i te ora e tae mai ei to ratou pu, i te akara anga kua kite ratou e ko teea te po. Ka riro kia ngata te ara ua anga i taua po ra me i manako ratou e penei ka tae mai to ratou pu i tetai po ke atu. Inara kare, kua kite ratou e ko teea te po e tae mai ei aia, e na te reira i oronga mai kia ratou i te manako maroiroi kia ara ua. Na roto i te tu aiteite, kua akakite papu mai te totou Pipiria e te noo nei tatou i te tuatau o te openga; inara kare ratou i akakite mai kia tatou i te ra me kare te ora o te openga uaorai. (Mataio 24:36) No to tatou irinaki anga e te aere maira te openga te tauturu ra ia tatou kia ara ua, inara me te irinaki tika ra tatou e te vaitata maira te ra o Iehova, ka rauka ia tatou kia ketaketa roa atu te akakeu anga kia vai matakite i te tiaki anga.​—Zephania 1:14.

5. Akapeea e raukai ia tatou kia akono i ta Paulo akamaroiroi anga “kia matakite”?

⁵ I ta Paulo tataanga ki to Korinetia, kua raurau atu: “Kia matakite; kia mou piri tikai te akarongo.” (1 Korinetia 16:13) Ae, kia matakite te kapitiia ra ki to tatou mou piri tikai anga i te akarongo Kerititiano. Akapeea e raukai ia tatou kia matakite? Na te raukaanga kia oonu atu te kite i te Tuatua a te Atua ra. (2 Timoteo 3:14, 15) Ka tauturu te raveanga meitaki i te apii uaorai e te aere putuputuanga ki te uipaanga i te akamaroiroi i to tatou akarongo, e te tamou anga i to Iehova ra ki roto i te manako ko tetai tuanga puapinga maata ia o to tatou akarongo. No reira na to tatou manako akaouanga mei tetai taime ki tetai taime te akapapu anga Tuatua Tapu e te noo vaitata nei tatou ki te openga o teianei akatereanga ka tauturu ia tatou kia kore e ngaropoina i te au tuatua mou puapinga maata no runga i taua openga te aere maira.a E meitaki katoa oki kia akara i te au tupuanga i te ao nei te akatupu ra i te totou Pipiria. Kua tata tetai taeake i Tiamani: “I te au taime ravarai e akara ana au i te nuti​—te au tamaki, te au ngaruerue enua, te takino anga, e te akataero anga i to tatou paraneta​—te akakite ketaketa maira kiaku i te vaitata anga mai o te openga.”

6. Na teea tu ta Iesu akatutu anga i te riro anga kia ngere te matakite pae vaerua i te aerenga o te tuatau ra?

⁶ I roto ia Mareko pene 13, ka kitea e tatou tetai atu tataanga no ta Iesu akamaroiroi anga ki tana au pipi e kia matakite. Kia tau ki ta teianei pene, kua akaaite atura Iesu i to ratou turanga ki to te tangata tiaki ngutupa tei tatari ra ki tona pu kia oki mai mei te aerenga mamao. Kare te tangata tiaki ngutupa ra i kite i te ora e oki mai ei tona pu. Kia ara ua atu rai aia. Kua taiku a Iesu e a tuatau araanga penei e tae mai ei te pu ra. Ko te a o te araanga kua aere mai mei te ora toru i te popongi e iti ua atu te ra. I taua araanga openga ra, kua ngoie ua te tiaki ngutupa ra i te varea moe. Tei akakiteia, te akamanako ra te au vaeau i te ora i mua ake i te itinga ra i te tuatau meitaki e mou ei te enemi ma te poitirere. Mei te reira katoa, i teia ora openga nei, i te tu pae vaerua te moe tinainai ra to teianei ao takapini ia tatou, penei ka aro atu tatou i te tu ngata kia ara ua. (Roma 13:11, 12) No reira, i tana akatutu anga, kua raurau putuputu a Iesu: “E matakite . . . E tenana e ara kotou . . . E taku e karanga atu kia kotou nei, te karanga atu nei au ki te tangata ravarai, Ka ara.”​—Mareko 13:32-37.

7. Eaa te tu kino tikai te vai maira, e ma teia i te manako, eaa te akamaroiroi anga ta tatou e tatau putuputu ra i roto i te Pipiria?

⁷ E manganui te au taime i tana angaanga orometua e i muri ake i tona tuakaouanga, kua raurau mai a Iesu i te tu matakite. Ko te tika, e vaitata i te au taime ravarai i taiku ei te au Tuatua Tapu ki te tuatau o te openga o teianei akatereanga o te au mea nei, ka kitea e tatou te akamatakiteanga kia ara ua me kare kia matakite.b (Luka 12:38, 40; Apokalupo 3:2; 16:14-16) Te taka meitaki ra, ko te varea moe i te pae vaerua e mea kino tikai ia. Te umuumu nei tatou katoatoa i taua au akamatakiteanga ra!​—1 Korinetia 10:12; 1 Tesalonia 5:2, 6.

Nga Apotetoro e Toru Tei Kore e Rauka kia Ara

8. I te kainga i Getesemane, i akapeea te nga apotetoro e toru a Iesu ra akono anga i tana pati anga kia ara ua atu ratou?

⁸ Kia ara ua ka umuumuia kia tere atu i te au manako anga meitaki, mei ta tatou e kite ra i te akatauanga a Petero, a Iakobo, e Ioane. E nga tangata pae vaerua e toru teia tei aru tiratiratu ra ia Iesu e kua manako ngakau oonu i te inangaro iaia. Inara, i te po o Nisana 14, 33 T.N., kare e rauka ia ratou kia ara. I te akarukeanga i te pia i runga ra te ngai i akono ei ratou i te Pasa, kua aere kapiti atu nga apotetoro e toru ra ma Iesu ki te kainga i Getesemane. Kua tuatua a Iesu kia ratou i reira: “Kua pini rava toku vaerua i te mamae mate maata: e noo i ko nei, e ara tatou.” (Mataio 26:38) E toru taime i pure akatenga ei a Iesu ki tona Metua i te rangi ra, e e toru taime e kua oki atura aia ki tona nga oa, “rokoia maira, te moe ra ratou.”​—Mataio 26:40, 43, 45.

9. Penei, na teaa i akariro kia varea moe nga apotetoro ra?

⁹ Eaa ra eia nga tangata tiratiratu ra i akamareka kore ei ia Iesu i taua po ra? No te roiroi i te pae kopapa tetai tumu. Kua roa te ora, penei i muri ake i te turuaipo, e “kua teimaa oki to ratou mata” i te moe. (Mataio 26:43) Inara, kua tuatua a Iesu: “E ara, e e pure oki kia kore kotou e rokoia e te timataanga: kua tika oki i te vaerua, te parukaua nei ra te kopapa.”​—Mataio 26:41.

10, 11. (a) Noatu rai tona roiroi, na teaa i tauturu ia Iesu kia ara ua atu rai i te kainga i Getesemane ra? (e) Eaa ta tatou i kite mei tei tupu ra ki nga apotetoro e toru ra i ta Iesu ra pati anga kia ara ua atu rai ratou?

¹⁰ Kare e ekoko anga, e te roiroi katoa ra a Iesu i taua po puapinga maata ra. Inara, kare i topa i te moe, kua akapou aia i taua au atianga openga ra i te pure anga akatenga. I etai ra tokoiti i mua akera, kua raurau atu aia i tana au pipi kia pure, i te na ko anga: “E tenana, e ara kotou, e tamou tikai i te pure, kia tau ia kotou te ora i teianei au mea katoa e vaitata mai nei, e kia tu kotou ki mua i te aroaro o te Tamaiti a te tangata.” (Luka 21:36; Ephesia 6:18) Me ka akarongo tatou ki te akoanga a Iesu e ka aru oki i tana akatauanga meitaki i te tumu no te pure, ka tauturu ta tatou au pure kia Iehova ma te ngakau tae kia ara ua tatou i te pae vaerua.

¹¹ Ae, kua kite a Iesu​—kare ra tana au pipi i kite i taua taime ra​—e kare e roaia ka tapekaia aia e ka akaapaia kia mate. Ka itae tona au timataanga ki tetai tamamaeanga maata ki runga i te rakau tamamae anga. Kua akamatakite atu a Iesu i tana au apotetoro i teianei au mea, inara kare ratou i kite e eaa tana i tuatua atura. No reira, kua varea ratou e te moe iaia e ara ra i te pureanga. (Mareko 14:27-31; Luka 22:15-18) Mei tei tika no te au apotetoro ra, te paruparu katoa ra to tatou kopapa e te vaira te au apinga kare tatou i kite ake. Inara, me ka kore tatou e kite i te tu rapurapu o te au tuatau te ora nei tatou, ka rauka kia varea tatou e te moe i te tu pae vaerua. Na te matakite anake e raukai ia tatou kia ara ua.

E Toru Au Tu Puapinga Maata

12. Eaa nga tu e toru ta Paulo i kapiti atura no te tamou anga i te akono meitaki?

¹² Akapeea e raukai ia tatou te tamou marie i to tatou tu rapurapu? Kua kite tatou i te puapinga maata o te pure e te umuumu anga no te tamouanga ki roto i te manako i te ra o Iehova. Kapiti katoa, kua taiku mai a Paulo e toru au tu puapinga maata ta tatou ka tau kia tatanu. Kua tuatua aia: “Ko tatou ra, ko to te ao ra, ei akono meitaki to tatou, ma te tapoki umauma ra, ko te akarongo e te inangaro, i te kakau anga; e ma te manako ora ei pare.” (1 Tesalonia 5:8) E akamanako poto ua tatou i te tuanga o te akarongo, te manakonako, e te aroa i to tatou tamou marieanga kia ara i te pae vaerua.

13. Eaa te tuanga ta te akarongo ka akatupu i to tatou vai matakite anga?

¹³ Ka tika kia rauka ia tatou te akarongo ngaueue kore e te vai maira Iehova e “koia tei tutaki mai i te aronga i kimi tikai iaia.” (Ebera 11:6) I te akamata anga, te akatupu anga i te anere mataiti mua ra o ta Iesu ra totou no te openga kua akamaroiroi mai i to tatou akarongo i te tupuanga maata atu i to tatou tuatau nei. E na to tatou akarongo i tamou i to tatou manakonako anga no te ra o Iehova, i te papu anga e ko “[te orama totou] e tae tika mai ïa, e kare e tavarevare.”​—Habakuka 2:3.

14. Akapeea i puapinga maatai te manakonako anga kia ara tamou tatou?

¹⁴ Te aiteite ra to tatou manakonako anga tika ki tetai “tutau no te vaerua” te tauturu ra ia tatou kia akakoromaki i te au tu ngata noatu me ka tatari tatou no te tupuanga tikai o ta te Atua ra au taputou. (Ebera 6:18, 19) Tetai tuaine akatainuia i te vaerua ko Margaret e tere atu i te 90 mataiti kua papetitoia e tere atu i te 70 mataiti, kua akakite: “I te tuatau ka mate atu ei taku tane i te maki kaneta i te 1963, kua manako ngakau au e ka meitaki me rokona vivikiia mai e te openga. Inara i teianei kua kite au e te manako ua ra au iaku uaorai. Kare matou i kite i taua taime ra e eaa te akatotoa anga o te angaanga i te ao katoa nei. Noatu rai i teianei, te vaira e manganui te au ngai tei akatuera uaia akera te angaanga. No reira te mataora nei au e kua akono a Iehova i te akakoromaki anga.” Te akapapu maira te apotetoro ko Paulo kia tatou: “E na te akakoromaki e akatupu i te kite; e na te kite e akatupu i te tatari: Kare oki te tatari e taakama mai.”​—Roma 5:3-5.

15. Akapeea ra ta te aroa akakeu anga ia tatou noatu me te akaraanga e kua roa te tuatau i tatari ei tatou?

¹⁵ Ko te aroa Kerititiano tetai tu meitaki roa atu no te mea ko te tumu akakeu anga te reira i te au mea ravarai ta tatou ka rave. Te tavini ra tatou ia Iehova no te mea te inangaro ra tatou iaia, noatu eaa tana akapapaanga taime. No te aroa i te tangata tupu te akakeu ra ia tatou kia tutu aere i te evangeria o te Patireia, noatu eaa te roa to te Atua ra anoano kia rave tatou e e ia taime e oki akaou ei tatou ki taua ngutuare ra. Mei ta Paulo i tata ra, “te vai nei te akarongo, te manakonako, e te aroa, e toru ra; ko tei maata ra i taua toru nei, ko te aroa ïa.” (1 Korinetia 13:13) Na te aroa i tauturu ia tatou kia akakoromaki kia ara tamou. “[Te aroa] e manakonako i te au mea katoa, e akakoromaki i te au mea katoa. Kare ua te aroa e kore.”​—1 Korinetia 13:7, 8.

“E Mou Tikai i Tei Rauka ia Koe Na”

16. Kare e kia tuku ua i te rima ki raro, eaa te tu akono tau na tatou kia tatanu?

¹⁶ Te noo nei tatou i te tuatau puapinga maata te akamaaraara maira te au tupuanga i teianei ao kia tatou e tei te tuanga openga tatou o te tuatau openga. (2 Timoteo 3:1-5) Kare teianei i te tuatau no te akaparuparu anga mari ra ‘e mou tikai i tei rauka ia tatou na.’ (Apokalupo 3:11) Na te “matakite, ma te pure” e na te tatanuanga i te akarongo, te manakonako, e te aroa, ka akapapu tatou e te papa ra tatou uaorai no te ora timataanga ra. (1 Petero 4:7) E maata ta tatou kia rave i te angaanga a te Atu ra. Na te rave maataanga i te au angaanga no te akamori tau i te Atua ka tauturu ia tatou kia ara tikai.​—2 Petero 3:11.

17. (a) Eaa i kore ei te au maromaroa i tetai atianga e tau kia akamareka kore ia tatou? (Akara i te pia i te kapi 21.) (e) Akapeea e raukai ia tatou kia aru ia Iehova, e eaa te akameitaki anga te tatari maira i te aronga ka rave i te reira?

¹⁷ “Ko Iehova taku nei tuanga,” ta Ieremia i tata, “no reira au i irinaki atu ei iaia. Meitaki to Iehova kia ratou tei tapapa iaia ra, ki te vaerua i kimi iaia ra. Meitaki oki kia manakonako atu rai, e kia tiaki marie, i te ora na Iehova.” (Aue o Ieremia 3:24-26) E tuatau poto ua to tetai papaki o tatou i te tatarianga. Ko etai atu kua tatari no te au mataiti e manganui kia kite i te ora na Iehova. Inara, mei teaa te poto ua o teia tuatau tatarianga me akaaiteia atu ma te tuatau mutu kore ki mua! (2 Korinetia 4:16-18) E ia tatou e tatari nei no ta Iehova ra tuatau tau, ka rauka ia tatou kia tatanu i te au tu Kerititiano umuumuia ra e kia tauturu oki ia etai atu kia akono i to Iehova ra akakoromaki anga e kia takave atu i te tuatua mou. No reira, kia ara ua tatou katoatoa. E aru tatou ia Iehova e kia akakoromaki, ma te akameitaki anga no te manakonako tana i oronga mai kia tatou. E ia tatou ka vai tiratiratu te matakite, kia ngaueue kore tatou i te mou anga i te manakonakoanga no te ora mutu kore. Ei reira, teianei au taputou totouia maira e papu ei kia tatou: “[Na Iehova] koe e akateitei kia rauka ia koe te enua: e ka kite koe i te mate o te aronga kino ra.”​—Salamo 37:34.

[Au Tataanga Rikiriki i Raro]

Akapeea Koe me Pau?

• Akapeea e raukai ia tatou te akamaroiroi i to tatou irinaki anga e te vaitata nei te openga o teia akatereanga o te au mea?

• Eaa te ka kite mei nga akatauanga o Petero, Iakobo, e Ioane ra?

• Eaa nga tu e toru te ka tauturu ia tatou kia vai maroiroi i te pae vaerua?

• Eaa teia i riro ei ko te taime kia ‘mou tikai i tei rauka ia tatou na’?

[Pia/Tutu i te kapi 21]

“E Ao ra Tona to te Tapapa Marie.”​—Daniela 12:12

E tamanako ana i tetai tangata tiaki tei tarotokaka ra e te parani ra tetai tangata keia kia keia i te are tana e tiaki ra. Me poiri mai, ka akarongo matakite te tangata tiaki ra no tetai ua atu turituri penei ka akakite mai e te vaira te keia. E ora i muri ake i tetai ora ka akaputata i tona nga taringa e ka akatuera i tona nga mata. E mea ngoie ua kia kite e akapeea e akavareiai aia e tetai akakiteanga pikikaa​—te aruru matangi i roto i te au pu rakau me kare te topaanga tetai apinga i te ngiao.​—Luka 12:39, 40.

Ka tupu tetai apinga aiteite ki te aronga “i te tatari anga i to tatou Atu ia Iesu Mesia i te mama anga mai.” (1 Korinetia 1:7) Kua manako te au apotetoro e ‘ka akaoki mai a Iesu i te au kia Iseraela’ i muri ua ake i tona tuakaouanga. (Angaanga 1:6) E au mataiti i muri akera, kua akamaaraia atu ki te au Kerititiano i Tesalonia ra e ko te parutia o Iesu no tetai tuatau ki mua. (2 Tesalonia 2:3, 8) Inara, kare te au akakite anga pikikaa no te ra o Iehova i akariro i taua au pipi mua a Iesu ra kia akaruke i te arataa tei taki atura ki te ora.​—Mataio 7:13.

I to tatou tuatau nei, te mareka koreanga no etai akaraanga taroaroa i te taenga mai o te openga o teianei akatereanga o te au mea nei kare e tau kia akariro ia tatou kia akakore i to tatou tiaki anga. Penei ka akavareia tetai tangata tiaki matakite e tetai akakite anga pikikaa, inara ka ara ua atu aia. Ko tana angaanga te reira. Mei te reira katoa oki te au Kerititiano.

[Tutu i te kapi 18]

Te irinaki ra ainei koe e te vaitata mai nei te ra o Iehova?

[Au Tutu i te kapi 19]

Na te au uipaanga, te pure, e te au tu apiianga meitaki e tauturu ia tatou kia ara ua atu rai

[Tutu i te kapi 22]

Mei ia Margaret rai, kia akakoromaki ua tatou e kia ara ua atu rai