Kia Rekareka i te Kite no Iehova
“Ko tei akarongo i te tuatua a te Atua e kua akono atura, ko ratou tei meitaki roa!”—LUKA 11:28.
1. I naea a Iehova i akamatai i te komunikeiti ma te au tangata ra?
TE AROA ra Iehova i te au tangata e te manako oonu ra i to ratou meitaki. No reira, kare i te mea poitirere, e kua komunikeiti atu aia kia ratou. Kua akamataia teianei komunikeiti anga i te kainga i Edene ra. Kia tau ki ta Genese 3:8, i tetai atianga “i te maru aiai ra” kua akarongo akera Adamu raua ko Eva “i te reo o te Atua ra o Iehova.” Te manako ra tetai papaki e te akakite maira teia e e peu na Iehova kia komuniketi ma Adamu i teia taime, penei i te au ra ravarai. Noatu eaa te tu, te akataka maira te Pipiria e kua akataka te Atua i te tuatau kare kia ako anake i taua tangata mua ra mari ra kia apii katoa iaia eaa tana e umuumuia ra kia kite e raukai te rave i tana apainga.—Genese 1:28-30.
2. I akapeea nga tokorua mua ra i te tipu keanga ia raua uaorai mei te aratakianga a Iehova, e eaa oki te tupu anga?
2 Kua oronga Iehova i te oraanga no Adamu raua ko Eva, kia tutara ki rungao i te au animara, e kia mana ki runga i te enua katoa. E okotai ua mea i tureia—auraka raua e kai mei te rakau o te kite i te meitaki e te kino. No tei akavareia e Satani, kua akarongo kore a Adamu raua ko Eva i te akauenga a te Atua ra. (Genese 2:16, 17; 3:1-6) Kua iki raua kia rave takake, i te ikianga na raua uaorai eaa te tika e eaa te tarevake. I te raveanga i te reira, kua tipu neneva ua raua ia raua uaorai mei te arataki anga a Tei Anga aroa maira ia raua. E tumatetenga ra te tupuanga no raua e no ta raua anaunga kare ra i anauia ake. Kua ruaine a Adamu raua ko Eva e i te openga kua mate atu e kare e manakonako anga no tetai tuakaouanga. Kua akatuangaia ta raua anau i te ara e tona ra tupuanga, ko te mate ia.—Roma 5:12.
3. Eaa a Iehova i komunikeiti ei kia Kaina, e eaa ta Kaina pauanga?
3 Noatu rai te meameaau anga i Edene, kua rave ua atura Iehova i te komunikeiti anga ma tana au tangata i anga maira. Ko Kaina, koia te tama anau mua a Adamu raua ko Eva, tei roto i te kino i te riroanga kia topa i te ara. Kua akamatakite atura Iehova iaia e te aere atura aia no tetai taitaia e kua ako atura iaia kia “rave koe i te meitaki ra.” Kua kopae ke atu a Kaina i teianei akoanga aroa e kua ta atura i tona teina. (Genese 4:3-8) No reira, ko nga tangata mua e toru i runga i te enua ra kua kopae katoa i te arataki anga taka meitaki tei orongaia e tei oronga i te ora kia ratou, te Atua tei oronga i te ikuiku anga ki tona au tangata e puapingai ratou uaorai. (Isaia 48:17) Mei teaa ra te mareka koreanga o teia kia Iehova ra!
Kua Akakite Atura Iehova Iaia Uaorai ki te Au Tangata i Taito Ra
4. No runga i ta Adamu uanga, eaa ta Iehova i irinaki, e eaa te tuatua manakonakoanga tana i akakite atura ma te reira i roto i tona manako?
4 Noatu rai tei iaia te tika ravarai kia tipu ke atu i te komunikeiti anga ma te au tangata, kare a Iehova i rave i te reira. Kua papu iaia e ko tetai papaki o ta Adamu anaunga ra ka akarongo pakari atu i Tana arataki anga. I te akakiteanga i te akavaanga ki runga ia Adamu raua ko Eva, no tetai akatauanga, kua totou atura Iehova i te aerenga mai o tetai “anaunga” te ka tu atu e patoi i te Ovi, ia Satani te Tiaporo ra. A muri akera ka akaparuparu akakinoia te mimiti o Satani ra. (Genese 3:15) Teia totou ko tetai tuatua rekareka ia no te manakonako anga ki te aronga “tei akarongo i te tuatua a te Atua e kua akono atura.”—Luka 11:28.
5, 6. Na roto i teea au tu ta Iehova ra komunikeiti anga ma tona au tangata i mua ake i te anere mataiti mua T.N., e i akapeea ratou i puapingaiai e te reira?
5 Kua komunikeiti a Iehova i tona anoano ki te au pateriareka i taito ra, mei ia Noa, Aberahama, Isaaka, Iakoba, e Iobu rai. (Genese 6:13; Exodo 33:1; Iobu 38:1-3) I muri iora, na roto ia Mose kua akanoo aia i tetai papaanga ture katoa no te iti tangata o Iseraela. Kua puapingaia ratou i te Ture a Mose i te au tu e manganui. Na te akonoanga i te reira, kua akataka keia to Iseraela mei etai atu au iti tangata katoa ei au tangata taka ke na te Atua ra. Kua akapapu atura te Atua i to Iseraela e me ka akono ratou i te Ture, ka akameitaki aia ia ratou kare i te pae kopapa anake mari ra i te pae vaerua katoa, ma te akariro anga ia ratou ei kau taunga o te patireia, e ei iti tangata tapu oki. Kua oronga katoa mai te Ture i te papaanga tau no te kai e te tu akono tei akameitaki maira i te ora anga. Inara, kua akamatakite katoa maira Iehova i te au tumatetenga kikino te ka tupu mai no te akarongo kore anga.—Exodo 19:5, 6; Deuteronomi 28:1-68.
6 I muri iora, kua kapitiia mai etai atu au puka akauruia ki te papaanga Pipiria ra. Kua akakite mai te au tataanga tuatua enua i ta Iehova ra akonoanga ma to te au pa enua ra. Te akataka manea maira te au puka atu i tona au tu. Kua akakite mai te au puka totou i te rave anga i to Iehova ra anoano no te tuatau ki mua. Kua apii matakite te au tangata tiratiratu i taito ra e kua akono oki i teianei au tataanga akauruia ra. Kua tata tetai: “E lamepa taau tuatua i toku nei vaevae, e turama no toku nei arataa.” (Salamo 119:105) Ki te aronga te puareinga ra kia akarongo, kua oronga maira Iehova i te kite apiianga e te marama anga oki.
Kua Riro te Marama kia Kaka Mai
7. Noatu kua rave a Iesu i te au temeio, kua kite maataia aia no teaa ra, e eaa ra?
7 Kia tae mai ki te anere mataiti mua ra, kua kapitiia atu e te au pupu akonoanga ngati Iuda te au peu tangata ki te Ture ra. Kua tarevake te akataka anga i te Ture, e kare i riro ei tumu akamarama anga, kua riro ei apainga teiaa no taua au peu ra. (Mataio 23:2-4) Inara, i te 29 T.N., kua mama maira Iesu ei Mesia. Ko tana angaanga kare kia oronga anake i tona oraanga no te au tangata mari ra “e akakite i te tuatua-mou.” Noatu e kua rave aia i te au temeio, kua matau maataia e ko “te Orometua.” Kua aite tana apii anga ki tetai marama tei kaka maira na roto i te poiri pae vaerua tei tapokiia ra te au manako o te au tangata. Kua tuatua tika maira Iesu uaorai: “Ko au te mārama o teianei ao.”—Ioane 8:12; 11:28; 18:37.
8. Eaa te au puka akauruia tei tataia i te anere mataiti mua T.N., e i akapeea te au Kerititiano mua ra i puapingaiai mei ia ratou ra?
8 I muri iora kua kapitiia mai nga Evangeria, e a tataanga no to Iesu oraanga, e te puka o Angaanga, ko tetai tuatua enua no te akatotoa anga i te Akonoanga Kerititiano i muri ake i to Iesu matenga. Te vai katoa ra te au reta akauruia tei tataia e te au pipi a Iesu ra, e pera katoa i te puka totou o Apokalupo. Ko teia au tataanga, kapiti katoaia ma te au Tuatua Tapu Epera ra, kua oti takiri te papaanga o te Pipiria. Ma te tauturu a teianei akaputu anga te au puka akauruia, ka rauka i te au Kerititiano “kia kite kotou e te aronga tapu katoa ra, i te tipoto, e te tiroa, e te oonu, e te tetei” o te tuatua mou. (Ephesia 3:14-18) Ka rauka ia ratou “te ngakau o te Mesia.” (1 Korinetia 2:16) Inara, kare taua au Kerititiano mua ra i kite tikai i te au tu ravarai o ta Iehova ra au akakoroanga. Kua tata atu te apotetoro ki te au oa akarongo ra: “Teianei oki te kite makiri ua nei tatou, mei te mea e i na roto i te io.” (1 Korinetia 13:12) Ka akaata mai taua io ra i tetai papa anga inara kare te au apinga katoatoa ra. Te aere maira tetai akamarama anga ki katoa no te Tuatua a te Atua ra.
9. Eaa te marama anga tei tupu mai i “te tuatau openga ra”?
9 I teia tuatau te ora nei tatou i tetai tuatau te karangaia ra ko “taua tuatau openga ra” ko tetai tuatau akairoia e “kino maata.” (2 Timoteo 3:1) Kua akakite te peroveta ko Daniela e i teia tuatau “[ka] tupu atura te kite i te maata anga.” (Daniela 12:4) No reira, kua tauturu atura Iehova, koia te Komunikeiti Maata, i te aronga ngakau tiratiratu kia mou tika atu i te aiteanga o tana Tuatua. E manotini ua atu te au tangata i teianei te kite ra e kua akateronoia a Iesu Karaiti ki te au rangi kare ra e akaraia e te mata i te 1914. Kua kite katoa ratou e kare e roaia ka apai mai aia i te openga ki te au ravenga kikino katoatoa e ka taui ke i te enua ki roto i tetai parataito i te ao katoa. Ko teia tu puapinga maata o te evangeria o te Patireia te tutu aereia nei i teianei i te ao katoa.—Mataio 24:14.
10. I roto i te au anere mataiti katoa ra, i akapeea te tu akono a te au tangata ki te akoanga a Iehova ra?
10 Ae, i roto katoa i te tuatua enua kua komunikeiti a Iehova i tona anoano e te akakoroanga ki te au tangata i runga i te enua nei. Te akataka maira te tataanga Pipiria i te aronga e manganui tei akarongo ra, kua akono i te pakari tau i te Atua, e kua akameitakiia no te reira. Te akakite maira no etai atu tei kopae ke ra i ta te Atua akoanga aroa, na te aruanga i te aerenga akakino a Adamu raua ko Eva ra. Kua akatutu maira Iesu i teia turanga i tana tuatua anga no nga ara akatutu ua e rua. Te taki atura tetai ki te mate. E maata e te pararauare, te aereia atura e te aronga e manganui tei kopae ra i te Tuatua a te Atua. Ko tetai mataara te taki atura ki te ora mutu kore. Noatu e te piri ra te ara, ko te reira te arataa o te aronga tokoiti ua ake tei ariki ra i te Pipiria no tona tu, koia te Tuatua a te Atua, e te akono rotai ra ma te reira.—Mataio 7:13, 14.
Arikianga i Tei Rauka ia Tatou
11. To tatou kite anga e te irinaki anga i te Pipiria ra e akapapu anga i teaa?
11 Ko koe ainei tetai i roto i te aronga tei iki ra i te arataa ki te ora? Me koia ia, kare e ekoko anga ka anoano koe kia aaere na runga ua atu i te reira. Akapeea koe me rave i te reira? E akaata putuputu e e ariki oki ki runga i te au akameitakianga ta te kiteanga i te tuatua mou Pipiria i apai maira ki toou oraanga. Ko te tika e kua akarongo koe ki te tuatua meitaki e akakite anga te reira i te akameitakianga a te Atua. Kua akakite maira Iesu i teia i tana pure anga ki tona Metua i roto i teianei au tuatua: “E akameitaki au ia koe, e taku Metua, e te Atu no te rangi e te enua, i te mea ko koe i uuna ke atu i teianei au mea i te aronga pakari e te kite, e kua akakite mai ki te tamariki nei.” (Mataio 11:25) Te aronga tautai e te koi tero kua kite i te aiteanga o ta Iesu apiianga inara ko te au arataki apii teiteiia o te akonoanga kare i kite. Kua tuatua katoa a Iesu: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” (Ioane 6:44) Me kua kite koe i te Pipiria e kua irinaki koe e kua aru i tana au apiianga, e akakite anga teia e kua akatae mai Iehova ia koe. E tumu ia no te rekarekaanga.
12. Na roto i teea au tu ta te Pipiria ra oronga mai anga i te marama anga?
12 Tei roto i te Tuatua a te Atua ra te au tuatua mou tataraanga e te oronga maira i te marama anga. Te aronga tei akono ra kia tau ki te kite Pipiria ka akamataraia mai mei te au manako tarotokaka, te au apiianga pikikaa, e te kite kore te tutara nei ki runga i te oraanga o te au mirioni ua atu. Ei akatauanga, te kiteanga i te tuatua mou no te turanga o tei mate ra ka akamatara mai ia tatou mei tetai ua atu mataku anga e ka rauka i tei mate ra kia akakino ia tatou me kare e te tamamaeia ra ta tatou aronga akaperepere tei mate ra. (Ezekiela 18:4) Te kiteanga i te tuatua mou no te au angera rave kino ra ka tauturu ia tatou kia kopae ke i te au mate no te purepure ra. Te apiianga no te tuakaouanga e akapumaana anga ia ki te aronga tei taka ke ra te aronga akaperepereia i te mate. (Ioane 11:25) Te akaari maira te au totou Pipiria kia tatou e teiea tatou i te aerenga o te tuatau e te oronga maira i te irinaki anga kia tatou no ta te Atua ra au taputou no te tuatau ki mua. Te akamaroiroi katoa maira i to tatou manakonako no te oraanga e tuatau ua atu.
13. I akapeea ta te akarongoanga i te Tuatua a te Atua ra i te akapuapinga anga ia tatou i te pae kopapa?
13 Te apii maira te au kaveinga tau i te Atua i te Pipiria ra ia tatou kia akono na roto i tetai aerenga te ka apai mai i te au puapinga ki te kopapa. Ei akatauanga, ka apii ia tatou kia kopae ke i te au ravenga te ka akaviivii i to tatou au kopapa, mei te kai avaava e etai atu apinga akakona. Ka akakore atu tatou i te kai tau kore i te kava. (2 Korinetia 7:1) Te akonoanga i ta te Atua ra au ture akono tau ra ka riro ei paruru mei te au maki tupu mai i te ainga. (1 Korinetia 6:18) Na te akono anga i ta te Atua akoanga kia kopae ke i te inangaro i te moni, kare tatou e akapou i te au o to tatou manako, mei ta te aronga e manganui i rave ra, i te aruaru anga i te apinganui ra. (1 Timoteo 6:10) I roto i teea au aerenga i puapingaiai koe i te pae kopapa no te akonoanga i te Tuatua a te Atua i toou oraanga?
14. Eaa ta te vaerua tapu akamana anga i roto i to tatou au oraanga?
14 Me te akono ra tatou kia tau ki te Tuatua a te Atua, ka rauka ia tatou te vaerua tapu o Iehova. Ka tatanu tatou i tetai tu peretana mei to Karaiti rai, tei akatakaia e te au tu marekaia mei te aroa ua e te inangaro ra. (Ephesia 4:24, 32) Te akatupu katoa maira te vaerua o te Atua ki roto ia tatou i tona au ua—te inangaro, te rekareka, te au, te akakoromaki, te takinga meitaki, te meitaki, te pikikaa kore, te maru, e te akono meitaki. (Galatia 5:22, 23) Te akatupu ra teianei au tu i te mataora e te au pirianga tau ma etai atu, kapiti katoa i te au mema ngutuare tangata. Ka rauka ia tatou te maroiroi i roto roa te ka tauturu ia tatou kia aro atu i te tu ngata ma te mataku kore. Te kite ra ainei koe i te mana o te vaerua tapu ki runga i toou oraanga no te meitaki?
15. Ia tatou e akarotai ra i to tatou oraanga ma te anoano o te Atua ra, akapeea tatou i te puapinga anga?
15 Ia tatou e akarotai ra i to tatou oraanga ma te anoano o te Atua ka akamaroiroi tatou i to tatou pirianga kiaia. Ka tupu to tatou irinaki anga e te kite maira aia e te aroa maira oki ia tatou. Ka kite tatou na roto i te tupu anga e te turu maira aia ia tatou i te au tuatau ngata. (Salamo 18:8) Ka kite tatou e te akarongo tika maira aia i ta tatou au pure. (Salamo 65:2) Ka irinaki tatou ki tana arataki anga, ka papu e ka puapinga tatou i te reira. E tei ia tatou te manakonako anga meitaki e a te tuatau tau ka apai mai te Atua i tona aronga tiratiratu ki te tu apa kore ua e ka tuku ki runga ia ratou i tana apinga aroa no te roa anga mutu kore. (Roma 6:23) “E akavaitata atu ki te Atua, e nana e akavaitata mai kia kotou na,” ta te pipi ia ko Iakobo i tata. (Iakobo 4:8) Kua manako ngakau ainei koe e kua akamaroiroiia toou pirianga ma Iehova ra i to akavaitata anga kiaia ra?
Tetai Apinganui Kare e Rauka kia Akaaiteia
16. Eaa etai au taui anga ta tetai papaki o te au Kerititiano o te anere mataiti mua ra i akono?
16 Kua akamaaraara atura Paulo i te au Kerititiano akatainuia i te vaerua i te anere mataiti mua ra e ko tetai papaki o ratou i tetai tuatau ra e kanga, e akaturi, e aronga totoma, e keia, e noinoi apinga, e kona kava, e akakino, e te aru oki. (1 Korinetia 6:9-11) Kua akariro te tuatua mou o te Pipiria ia ratou kia rave i te au taui anga maata; “kua oreiia” ratou. E tauta kia tamanako eaa te tu o toou oraanga naringa kare te au tuatua mou tei akamatara mai ia koe taau apiianga mei te Pipiria maira. E tika tikai ra e apinganui te tuatua mou kare e rauka kia akaaiteia atu. Mei teaa ra to tatou mataora e kua komunikeiti mai a Iehova kia tatou!
17. Akapeea te angai angaia te Au Kite o Iehova i te pae vaerua i te au uipaanga Kerititiano ra?
17 Pera katoa, e tamanako i te au akameitakianga ta tatou i rauka i roto i to tatou akataeake anga tuke maata te pakiri! Te oronga maira “te tavini akono meitaki e te pakari” i te kai vaerua i te tuatau tau, kapiti katoa te au Pipiria, te au makatini, e etai atu puka i roto i te au reo tini ra. (Mataio 24:45-47) I te au uipaanga putuputuanga i te tuatau o te 2000 mataiti, kua akara akaou te Au Kite o Iehova i te au enua e manganui, i te au tumu teitei no roto mai i te au puka mamaata e varu o te au Tuatua Tapu Epera ra. Kua akamanako ratou ki runga i te au oraanga o te aronga e 40 o te Pipiria tei uriuriia i roto i te Insight on the Scriptures. Kua uriuri manako ratou e vaitata i te koata o te puka Te Tangata Maata Rava Atu Tei Ora Ana e vaitata oki te puka katoa Pay Attention to Daniel’s Prophecy! E toru ngauru ma ono atikara tua rua kua uriuri manakoia mei roto mai i te makatini Punanga Tiaki kapiti katoa te 52 atikara apiianga ra. Pera katoa, kua akamatutuia te au tangata o Iehova e te 12 itiu o te Our Kingdom Ministry e te au tuatua akoanga i te au epetoma no runga i te au tumu Pipiria tuke tuke. Mei teaa ra te apinganui no te kite pae vaerua tei orongaia maira!
18. Na roto i teea au tu te tauturu anga ia tatou i roto i te putuputuanga Kerititiano ra.
18 Takapini te ao katoa nei, e tere atu i te 91,000 putuputuanga te turu ra e te akamaroiroi ra na roto i te au uipaanga e te taokotai anga. Te rekareka katoa ra tatou i te turu anga a te au oa Kerititiano pakari te puareinga ra kia tauturu ia tatou i te pae vaerua. (Ephesia 4:11-13) Ae, kua puapinga maataia tatou na te raukaanga tetai kite no te tuatua mou ra. E mea rekareka ia kia kite e kia tavini atu oki ia Iehova. Mei teaa ra te tika o te au tuatua a te tata taramo tei tata ra: “E ao to te aronga, ko Iehova to ratou Atua!”—Salamo 144:15.
Maara Ainei ia Koe?
• Kua komunikeiti a Iehova kiaai ma i mua ake i te au tuatau Kerititiano?
• Akapeea i riro ei te marama pae vaerua kia kaka maata atu i te anere mataiti mua? e i teia tuatau?
• Eaa te au akameitakianga te aere maira mei te akonoanga kia tau ki te kite no Iehova ra?
• Eaa tatou ka rekarekai i to tatou kite i te Atua ra?
[Au Tutu i te kapi 8, 9]
Kua komunikeiti atura Iehova i tona anoano kia Mose, Noa, e Aberahama
[Tutu i te kapi 9]
I to tatou tuatau, kua akakaka mai a Iehova i te marama ki runga i tana Tuatua
[Au Tutu i te kapi 10]
E tamanako i te akameitakianga i rauka ia tatou i roto i to tatou akataeakeanga tuke maata te pakiri!