Iehova te Atua no te Akakoro Anga

“Ko taku oki i maara ra, ko te reira te ka tupu; e ko taku i akakoro ra, ko te reira te ka mou.”​—ISAIA 14:24.

1, 2. Eaa te tuatua a te aronga e manganui no te akakoro anga o te oraanga?

TE UI ra te au tangata i te au ngai katoatoa: “Eaa te akakoro anga o te oraanga?” Kua tuatua tetai tangata arataki poritiki no te pae Opunga Ra: “E maata atu te au tangata i to mua ana te ui ra, ‘Koai tatou? Eaa ta tatou akakoro anga?’” I te uianga a tetai nutipepa i te aronga ou e eaa te akakoro anga o te oraanga, ko te au pauanga noa ua nei e: “Kia rave i ta to ngakau i anoano.” “Te akono anga i te au atianga katoatoa kia ki takiri.” “Te akono anga i te oraanga tamataora e kia maata te apinga.” “Kia anau tamariki, e kia mataora e ka mate atu ei.” Ko te maata anga kua manako e ko teianei oraanga anake te vai maira. Kare e okotai tei tuatua no tetai akakoro anga roa ki te ora anga i runga i te enua nei.

² Kua tuatua tetai tangata apii i te apiianga a Confucius e: “Ko te aiteanga openga no te oraanga te kitea ra i to tatou ora anga ei tangata ua nei.” Kia tau ki te reira, ka anau uaia maira te au tangata, ka tauta no te 70 me kare 80 mataiti, ka mate atu ei e kare ua i reira, e tuatau ua atu. Kua tuatua tetai tangata taineti tei irinaki i te tupu ua anga e: “Penei ka inangaro tatou i tetai pauanga ‘teitei atu’​—inara kare e vai mai ana tetai.” No teianei aronga irinaki i te tupu ua anga, e tauta anga anake te oraanga kia ora, ko te mate ra te openga no te reira katoa. Te oronga maira te reira manakoanga i tetai manako puapinga kore no te oraanga.

3, 4. Eaa te tupu anga no te au tu o teianei ao ki runga i te manako anga o te aronga e manganui no te oraanga?

³ E manganui te ekoko ra e e akakoro anga to te oraanga ia ratou e akara ra i te oraanga tangata kua ki anake i te au pekapeka e manganui. I to tatou tuatau nei, te manakoia ra e kua tae te tangata ki te take o te kite i te akono maani apinga e te taineti, e vaitata i te okotai pirioni tangata i te ao katoa nei te maki kinoia ra me kare e rava ana te meitaki no te kopapa. E au mirioni ua atu te au tamariki te mate ra i te au mataiti tataki tai no te reira tumu. Kapiti katoa oki, i teia 20 anere mataiti e a taime te maata atu tei mate ra no te tamaki i to te a anere mataiti katoa i mua akera. Te rave kino, te ta ua, te kai tau kore i te apinga akakona, te ngaangaa te ngutuare tangata, te AIDS e etai atu maki kikino no te ainga tau kore maira​—ko te papaanga no te au tumu kino ra te tupu ra. Kare a te aronga arataki o teianei ao rapakau no teianei au manamanata.

⁴ I te manako anga no taua au tu nei, kua akakite maira tetai vaine eaa te irinaki anga o te aronga e manganui: “Kare e akakoro anga i te oraanga. Me te tupu nei teia au mea kikino, kare i reira e aiteanga meitaki no te oraanga.” Kua tuatua katoa maira tetai tangata ruaine: “No te ui ana au eaa au i tae mai ei ki konei no te maata anga o toku oraanga. Me e akakoro anga tetai, kare oku manako akaou anga.” E no reira i te mea kare te aronga tini i kite ana eaa te Atua i tuku uaʼi i te mamae, te au tu taitaia o teianei ao kua akariro ia ratou kia kore e manakonako tikai no te tuatau ki mua ra.

5. Eaa te au akonoanga o teianei ao i tapiri atu ei ki te manako oripu ua no runga i te akakoro anga no te oraanga?

⁵ Noatu rai ko te au arataki akonoanga te tataka ke ra, e te papu kore ra, i te akakoro anga no te oraanga. Kua tuatua tetai orometua i mua ana no te St. Paul’s Cathedral i London e: “I toku oraanga katoa kua tauta pakari au kia kitea te akakoro anga no te ora anga. . . . Kare i kitea e au.” E tika rai, e manganui te au orometua te apii ra e me mate te aronga meitaki ka aere ki te rangi e ko te aronga kino ka aere ki te ai era e tuatau ua atu. Inara te akaruke maira teia manako kia vairai te tangata i runga i te enua nei kia rave tamou i tona aerenga tamamaeia. E me ko ta te Atua akakoro anga kia noo te au tangata ki te rangi, eaa aia i kore ei i anga ia ratou ei au mea ora ki te rangi i te akamata anga, mei tana i rave i te au angera ra, e na reira e kore ei te au tangata e rokoia e te mamae anga maata? No reira ko te oripu ua anga te manako e eaa te akakoro anga no te oraanga ki runga i te enua nei me kare ko te kore e irinaki e e akakoro anga tetai kua riro ia ei mea matauia.

Te Atua no te Akakoro Anga

6, 7. Eaa ta te Puka Tapu akakite anga kia tatou no te Ngateitei o te Ao Katoa e Pini Ua Ake?

⁶ Inara, ko te puka maata roa te akatotoa anga i te tuatua enua, koia te Bibilia Tapu, te akakite maira kia tatou e ko Iehova, te Ngateitei o te ao katoa e pini ua ake, ko te Atua ia o te akakoro anga. Te akakite maira te reira kia tatou e e akakoro anga roa tana, ko te tika, e mutu kore ua atu, no te tangata nei ki runga i te enua. E me ka akakoro a Iehova i tetai apinga, ka tupu ia kare e kore. Mei te ua e akatupu maira i te ua, te tuatua ra te Atua, “koia katoa taku tuatua no roto i toku nei vaa; kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.” (Isaia 55:10, 11) Noatu eaa ta Iehova e tuatua ka tupu ra ia iaia, “ko te reira te ka mou.”​—Isaia 14:24.

⁷ Ka tau ra tatou tangata nei kia irinaki papu tikai e ka mou rai te Mana Katoatoa i tana au taputou, no te mea ko te Atua e “kore e tika kia pikikaa.” (Tito 1:2; Ebera 6:18) Me tuatua mai aia kia tatou e ka rave aia i tetai apinga, e akapapu anga tana tuatua e ka tupu te reira. Kua oti ra ia i reira. Te akakite maira aia: “Ko au oki te Atua, e kare atu; ko au te Atua, e kare atu e aite iaku nei: I te akakite anga i te openga mei te muatangana mairai, e mei te au tuatau mairai i te au mea e kare i tupu ra: i te na ko anga e, Ko taku te tuatua te ka mou, e tei inangaroia e au ra, ko taku ïa e rave . . . Kua tuatua oki au, e naku rai e akatupu; kua akakoro rai au, e naku ïa e rave.”​—Isaia 46:9-11.

8. Ka rauka ainei kia kitea e te aronga anoano tikai ma te ngakau tae kia kite i te Atua ra?

⁸ Pera katoa oki, “kare rava [a Iehova] i anoano e kia mate atu tetai, kia rauka katoatoa ra te tataraara.” (2 Petero 3:9) No teia tumu, kare aia e anoano kia kite kore tetai iaia. Kua tuatua tetai peroveta ko Azaria e: “Kia kimi kotou [i te Atua], ka kitea aia e kotou; kia akaruke ra kotou iaia, ka akaruke aia ia kotou.” (2 Paraleipomeno 15:1, 2) E no reira, ko te aronga tei anoano tikai ma te ngakau tae kia kite i te Atua e tona au akakoro anga ka papu te kite me ka tauta marie kia kimi iaia ra.

9, 10. (a) Eaa tei orongaia mai no te aronga te anoano ra kia kite i te Atua? (e) Eaa ta te kimi anga i te Tuatua a te Atua ka akatupu ia tatou kia rave?

⁹ Ka kimi i ea? No te aronga e kimi tikai i te Atua, kua oronga maira aia i tana Tuatua, koia te Puka Tapu. Na tona vaerua tapu, koia taua mana rave angaanga tana i taangaanga i te anga mai anga i te ao katoa e pini ua ake, kua akaue atura te Atua i te au tangata tiratiratu kia tata i te mea tau no tatou kia kite no tona au akakoro anga. Ei akatauanga, no runga i te totou Puka Tapu, kua tuatua te apotetoro ko Petero: “Kare oki to te inangaro o te tangata i tae mai ei te totou i taito ra; ko te au tangata tapu ra o te Atua tei tuatua i ta te Vaerua Tapu i tuku mai ia ratou ra.” (2 Petero 1:21) Mei te reira katoa oki, kua akakite mai te apotetoro ko Paulo: “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra. Kia apa kore te tangata o te Atua, ma te tau tikai i te au angaanga memeitaki katoa ra.”​—2 Timoteo 3:16, 17; 1 Tesalonia 2:13.

¹⁰ E tamanako ana e ka rauka i te Tuatua a te Atua te akariro ia tatou kia “tau tikai,” kare e i tetai tuanga ua me kare e tau kore ua. Ka akamaroiroi mai te reira i tetai kia kite papu e koai te Atua, eaa tona au akakoro anga, e eaa tona umuumu no tona au tavini. E mea tau rai kia manakonakoia te reira mei tetai puka na te Atua ra. E ko te reira anake ua te tumu e raukai ia tatou te kimi e rauka mai ei te kite tika i te Atua ra. (Maseli 2:1-5; Ioane 17:3) Na te raveanga i te reira, ka “kore tatou e tauriuriia, e akapeke aereia e te matangi ra, i tera tuatua i tera tuatua, mei te tamariki ra, i te ravenga a te tangata nei, e te pakari i te ravenga tini o te pikikaa ra.” (Ephesia 4:13, 14) Kua taiku maira te tata taramo i te manako tika: “E lamepa taau [ta te Atua] tuatua i toku nei vaevae, e turama no toku nei arataa.”​—Salamo 119:105.

Akakite Marie Anga

11. Akapeea ta Iehova ra akakite mai anga i tana au akakoro anga ki te au tangata nei?

¹¹ I te akamataanga mairai te ngutuare tangata ra, kua akakite a Iehova i tana akakoro anga no te enua nei e no te au tangata katoa oki i runga i te reira. (Genese 1:26-30) Inara i te kopae ke anga to tatou nga metua mua ra i to te Atua tu ngateitei, kua topa te au tangata ki roto i te poiri i te pae vaerua e ki te mate oki. (Roma 5:12) Tera ra, kua kite a Iehova e te vaira te aronga te ka anoano i te tavini kiaia. E no reira, mei roto mai i te au anere mataiti, kua akakite marie aia i tona akakoro anga ki tona au tavini tiratiratu. Ko tetai papaki o ratou tei tuatua atura aia ko Enoka (Genese 5:24; Iuda 14, 15), ko Noa (Genese 6:9, 13), ko Aberahama (Genese 12:1-3), e Mose (Exodo 31:18; 34:27, 28). Kua tata te peroveta a te Atua ko Amosa e: “Kare a te Atu ra a Iehova mea i rave, mari ra kia akakite i tana tuatua ngaro ki tona ra au tavini ki te au peroveta.”​—Amosa 3:7; Daniela 2:27, 28.

12. Akapeea ta Iesu akakite anga kia maata atu te marama ki runga i te au akakoro anga a te Atua ra?

¹² I to te Tamaiti a te Atua tuatau, koia a Iesu Karaiti, i runga i te enua nei i etai 4,000 mataiti i muri ake i te meameaau i Edene, e manganui te au tumu rikiriki no ta Iehova ra au akakoro anga tei akakiteia mai. E maata oki no runga i te akakoro anga a te Atua kia akanoo i tetai Patireia ki te rangi ei tutara ki runga ake i te enua nei. (Daniela 2:44) Kua akariro a Iesu i te reira Patireia ei tumu no tana tutuanga. (Mataio 4:17; 6:10) Kua apii aia e tana au pipi e i raro ake i taua Patireia ra, ka akatupuia ta te Atua ra akakoro anga mua no te enua nei e no te tangata katoa oki. Ka akariroia te enua ei parataito nooanga no te au tangata apa kore ua, te ka ora e tuatau ua atu. (Salamo 37:29; Mataio 5:5; Luka 23:43; 2 Petero 3:13; Apokalupo 21:4) Pera katoa oki, kua akakite maira a Iesu e tana au pipi eaa te ka tupu i taua ao ou ra na te au temeio ta te Atua i akamana ia ratou kia rave.​—Mataio 10:1, 8; 15:30, 31; Ioane 11:25-44.

13. No runga i ta te Atua ra akono anga ma te au tangata, eaa te taui anga tei akamataia ia Penetekote 33 T.N.?

¹³ Ia Penetekote 33 T.N., e 50 ra i muri ake i to Iesu akatuakaou anga, kua riringiia mai te vaerua o te Atua ki runga i te putuputuanga o te au pipi a Karaiti ra. Kua mono atu te reira i te Iseraela tiratiratu kore ra ei au tangata koreromotu no Iehova. (Mataio 21:43; 27:51; Angaanga 2:1-4) Ko te riringianga mai i te vaerua tapu i taua atianga ra ko tetai akapapu anga ia e, mei reira mairai, ka akakite te Atua i te au tuatua mou no tana au akakoro anga no roto i teianei rima rave ou. (Ephesia 3:10) I te anere mataiti mua o te T.N., kua akanooia te akatumu anga akaaerenga o te putuputuanga Kerititiano ra.​—1 Korinetia 12:27-31; Ephesia 4:11, 12.

14. Akapeea e raukai i te aronga kimi i te tuatua mou i te akataka i te putuputuanga Kerititiano mou ra?

¹⁴ I teia tuatau nei, te rauka ra i te aronga kimi i te tuatua mou te akataka i te putuputuanga Kerititiano mou na tona akakite anga tamou marie i te tu maata roa o te Atua, koia te aroa. (1 Ioane 4:8, 16) E tika oki, ko te aroa taeake te akairo akatakaanga no te akonoanga Kerititiano tika tikai. Kua karanga a Iesu: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” “Teia taku akauenga, kia aroa kotou ia kotou uaorai, mei iaku i aroa ia kotou.” (Ioane 13:35; 15:12) Kua akamaara atura Iesu i te aronga akarongo mai iaia ra: “Ko kotou toku oa, kia akono kotou i te au tuatua katoa taku i akaue atu ia kotou na.” (Ioane 15:14) E no reira ko te au tavini mou o te Atua ko te aronga tei akono i te ture o te aroa ra. Kare ra ratou e tuatua ua i te reira, no te mea ko “te akarongo kare e angaanga ra, e mea mate katoa ïa.”​—Iakobo 2:26.

Akamarama Anga

15. Eaa te ka rauka kia akapapuia no te au tavini o te Atua ra?

¹⁵ Kua totou mai a Iesu e ma te topaanga o te tuatau, ka maata atu te akamarama anga i te putuputuanga Kerititiano mou no runga i te au akakoro anga a te Atua ra. Kua taputou atu aia ki tana au pipi: “Na te Akapumaana ra, na te Vaerua Tapu, ko ta te Metua e tono mai ma toku ingoa, nana e apii mai ia kotou i te au mea katoa.” (Ioane 14:26) Kua karanga katoa a Iesu e: “I na, tei vaitata ua ra au ia kotou, e tae ua atu ki te openga o teianei ao.” (Mataio 28:20) E no reira, ko te akamarama anga no runga i te tuatua mou no te Atua ra e tana au akakoro anga ka tupu kia maata i roto i tona au tavini. Ae, “ko te arataa oki o te aronga tuatua-tika ra, e tau ïa ki te mārama kakā ra, ko tei tupu ua kakā anga e tae ua atu ki te avatea tikai ra.”​—Maseli 4:18.

16. Eaa ta to tatou marama anga i te pae vaerua e akakite maira kia tatou e teiea tatou i te pae o te au akakoro anga a te Atua ra?

¹⁶ I teia tuatau nei, kua kaka marama atu te marama i te pae vaerua i to mua ana, no te mea te ora nei tatou i te tuatau tupu anga te au totou Puka Tapu me kare te vaitata ra i te tupu. Te akaari maira te reira kia tatou e te noo nei tatou i “te tuatau openga” o teianei akatereanga kino o te au mea nei. Ko te tuatau teia i tapaia e ko “te openga o te akatereanga o te au mea nei”; ka aru mai te ao ou a te Atua i te reira. (2 Timoteo 3:1-5, 13; Mataio 24:3-13, NW) Mei tei totouia maira e Daniela e kare e roa atu ka rave te Patireia o te Atua i te rangi ra “e akapueurikiriki e e akapou i taua au basileia katoa ra [te vai nei], e ka vai rai te reira e tuatau ua atu.”​—Daniela 2:44.

17, 18. Eaa te au totou meitaki te akatupuia nei i teianei?

¹⁷ I roto i te au totou te tupu nei i teianei ko tei tataia ra i te Mataio 24:14 irava 14 o Mataio pene 24. I reira kua karanga a Iesu: “E tutu aereia te evangelia o te basileia nei, e kako rava ake te ao katoa nei, ei kite no te pa enua ravarai; ko te openga iora ïa i reira ra.” Takapini teianei ao, te raveia ra te tutuanga Patireia e te Au Kite o Iehova e au mirioni ua atu. E au anere ua atu tauatini te aronga te kapitiia atura kia ratou i te au mataiti tataki tai katoa ra. Te rotai ra te reira ma te totou ia Isaia 2:2, 3, te na ko ra e “kia tae ki te au rā openga ra” o teianei ao kino, ka aere mai te au tangata no te au enua e manganui ki te akamori anga mou ia Iehova, e ‘nana e apii mai ia ratou i tona au aerenga; e ka aere ratou na tona au arataa.’

¹⁸ Te aere kapiti maata mai nei teia aronga ou ki te akamori anga ia Iehova “mei te tumurangi,” mei ta Isaia pene 60, irava 8 i totou maira. Te kapiti maira te Isaia 60 irava 22 e: “E riro te mea ngiti okotai ei tausani; e ko tei mea ngiti poepoe ra, e riro ïa ei enua maroiroi: naku, na Iehova, e akarapurapu i te reira i tona tuatau.” Ko tera tuatau, te akaariia maira e te au tika akapapu e, ko teianei tikai ia. E ka tau te aronga ou kia irinaki e i te kapitianga ma te Au Kite o Iehova ra, kua piri atu ratou ki te putuputuanga Kerititiano mou ra.

19. Eaa tatou i tuatuaʼi e ko te aronga ou te kapiti maira ki te Au Kite o Iehova te aere maira ki te putuputuanga Kerititiano mou?

¹⁹ Eaa ka raukai ia tatou i te tuatua i teia ma te papu tikai? No te mea ko teia aronga ou, kapiti katoa ma te aronga e au mirioni ua atu kua o ke ana ki roto i te akaaerenga a Iehova ra, kua akatapuia to ratou au oraanga ki te Atua e te rave ra i tona anoano. Te kapiti ra te reira i te akono kia rotai ma te ture tu Atua no te aroa. Ei tumu akapapu anga i teia, kua tupaki teia aronga Kerititiano i “ta ratou au koke ei auri arote, e ta ratou au korare ra, ei tipi tope ïa . . . e kare oki ratou e apii akaou ana i te tamaki.” (Isaia 2:4) Pouroa te Au Kite o Iehova i te ao katoa nei kua rave i te reira no te mea te akono ra ratou i te aroa. Teia te aiteanga, kare rava ratou e rave i te au apinga tamaki ei tamaki atu tetai i tetai me kare i tetai ua atu tangata ke ra. I teia te tuke ra ratou​—kare mei to te au akonoanga o teianei ao nei. (Ioane 13:34, 35; 1 Ioane 3:10-12, 15) Kare ratou e o atu i te au ravenga tataka ke o te au pa enua, no te mea e taeake anga to ratou no te ao katoa nei tei akapiriia na te aroa, “ko taua tatua apa kore ua ra ïa.”​—Kolosa 3:14; Mataio 23:8; 1 Ioane 4:20, 21.

Kua Iki te Maata Anga Auraka kia Kite

20, 21. Eaa ra te maataanga o te au tangata i vai ei ki roto i te poiri i te pae vaerua? (2 Korinetia 4:4; 1 Ioane 5:19)

²⁰ I te kaka anga te marama i te pae vaerua i roto i te au tavini o te Atua ra, te eke atura te toenga atu o te au tangata o teianei ao ki roto i te poiri maata atu i te pae vaerua. Kare ratou i kite ia Iehova e tana au akakoro anga oki. Kua akataka maira te peroveta a te Atua ra i teianei tuatau i tana tuatua anga: “I na oki, e tapokiia oki te enua nei e te poiri, e te au tangata i te poiri tangotango ra.” (Isaia 60:2) Te tupu nei teia no te mea kare te au tangata e akakite mai ana i te manako ngakau tae tikai i te apiianga no te Atua, e kare katoa oki ratou e akaari ana i te anoano kia tamata i te akamareka iaia. Kua tuatua a Iesu e: “Teia taua akaapa ra, ko te mārama kua tae mai ki te ao nei, e i anoano akenei te tangata i te poiri, kare te mārama, no te mea te kino ua ra ta ratou tuatua. Ko te rave i te kino ra, kua makitakita anake ïa ki te mārama, kare oki e aere mai ki te mārama, ko te kitea aea tana tuatua.”​—Ioane 3:19, 20.

²¹ Ko taua aronga ra kare o ratou manako meitaki tikai i te kimi anga i te anoano o te Atua ra. Kareka ra, kua akatano ratou i to ratou oraanga kia rave i to ratou uaorai anoano. Na te kopae keanga i to te Atua ra anoano, kua tuku ratou ia ratou uaorai ki roto i tetai turanga kino, no te mea te akakite maira tana Tuatua: “Ko tei ariu ke, i tona taringa kia kore e kite i te ture, e riro tana pure ei mea viivii.” (Maseli 28:9) Ka apai ra ratou i te utunga no ta ratou mataara i iki kia rave. Kua tata te apotetoro ko Paulo: “Auraka e vavare; kare ua te Atua e vare: ko ta te tangata e ruru ra, ko tana ra ïa e kokoti.”​—Galatia 6:7.

22. Te aronga tini te anoano ra kia kite i te Atua te rave ra i teaa i teianei?

²² Inara, e aronga tini te inangaro ra kia kite i to te Atua ra anoano, te kimi ra iaia ma te ngakau tae tikai, e kua akavaitataia atu kiaia. “E akavaitata atu ki te Atua, e nana e akavaitata mai kia kotou na,” ko ta Iakobo 4:8 ia i tuatua. No taua tu tangata ra kua tuatua a Iesu: “Ko te akono i te tuatua-mou ra, ka tae mai ïa ki te mārama kia kitea meitakiia e, te tau ra tana tuatua ki te Atua.” (Ioane 3:21) Mei teaa ra te tuatau umere ki mua ta te Atua i akakoro no te aronga tei aere mai ki te marama! Ka uriuri manakoia te au tu mareka anga i ta tatou atikara te ka aru mai.

Akapeea Koe me Pau?

◻ Eaa te tuatua a te aronga e manganui no te akakoro anga o te oraanga?

◻ Akapeea ta Iehova akakite anga iaia uaorai ei Atua no te akakoro anga?

◻ Eaa te akamarama anga maata tei tupu i te anere mataiti mua o te T.N.?

◻ Akapeea te akataka anga i te putuputuanga Kerititiano mou i teia tuatau nei?