Au Tumu Kia Irinaki i te Pipiria
4. Tu Tika Taineti
E maata tikai ta te taineti i akatupu i teia au tuatau nei. Ei tupuanga, kua monoia te au apiianga takere e te au apiianga ou. Tei arikiia ei tikaanga i te taime mua kua manakoia e e tua maani ua i teianei. E tata putuputu akaouia ana te au puka taineti.
KARE te Pipiria i te puka taineti. Inara, me tae mai ana ki te au mea taineti, e puapinga tikai te Pipiria, no runga i ta te reira i akakite mai e tei kare i akakite mai.
Au manako kare i tau i te taineti.
E manganui te au irinakianga tarevake tei arikiia i roto i te au tuatau taito. Te au akamanakoanga no runga i te enua, te kapiti maira i te manako e e paraaraa te reira ki te irinakianga katoa e te turuia ra te reira e te au mea me kore te au apinga kite meitakiia. I mua rava ake i to te taineti kite mai anga i te totoaanga e te kopaeanga i te au maki, kua rave te au taote i tetai au angaanga puapinga kore tikai e i tetai au taime kua akatupu i te mate. Inara i roto i to te reira 1,100 au pene e tere atu, kare rava te Pipiria i akamaroiroi ana i tetai au angaanga kino me kore i tetai ua atu manako kare i tau ana ki te taineti.
Au tuatua taineti tau.
Mei tetai 3,500 mataiti i topa, kua akakite mai te Pipiria e te akauta ra te enua “ki runga i te kore.” (Iobu 26:7) I roto i te varu anere mataiti M.T.N., kua taiku taka meitaki tikai a Isaia ki “te punupunu o te enua nei.” (Isaia 40:22, NW) Tetai enua punupunu e akauta ra i runga i te kare ma te kore e apinga akara mataia me kore e apinga tikai e pange ra i te reira—kare ainei tera akatakaanga e tangianga umere ou ana?
Tataia mei te mataiti 1500 M.T.N., te vai ra te au ture tau i roto i te Ture a Mose (tei kitea i roto i te puka mua e rima o te Pipiria) no runga i te akatakakeanga i te aronga maki, te akonoanga i te au kopapa mate, e te akaateaanga i te repo.—Levitiku 13:1-5; Numero 19:1-13; Deuteronomi 23:13, 14.
I te taangaanga anga i te au teretikopu ririnui, kua taopenga te aronga taineti e kua “tupu” poitirere ua mai te ao katoa e pini ua ake. Kare te aronga taineti pouroa e mareka ana i te au akamanakoanga no runga i te reira akamaramaanga. Kua karanga tetai poropeta e: “I te akaraanga, me e akamataanga to te ao katoa e pini ua ake, te anoanoia ra tetai akakeuanga mua; no te mea koai ia e akamanako atu ana i te reira tupuanga ma te kore e akakeuanga tau?” Inara, i mua ake i maaniia ai te au teretikopu, te akakite taka meitaki ua maira te irava mua tikai o te Pipiria e: “I muatangana ra, kua anga iora te Atua i te rangi e te enua.”—Genese 1:1.
I mua rava atu i to te reira tuatau, kua akakite tika mai te Pipiria e e punupunu te enua e te akauta ra “ki runga i te kore”
Noatu e e puka taito te reira e te uriuri ra i te au tumu manako e manganui, kare e au tarevake i te pae taineti i kiteaia i roto i te Pipiria. Kare ainei i te mea tau e kia akamanako tatou i te reira puka?a
a No tetai au akaraanga akaou no te tu tika taineti o te Pipiria, e akara i te kapi 18-21 o te poroutia A Book for All People, neneiia e te Au Kite o Iehova.