‘E Aaere Taokotai Ua Atu Ma Karaiti Katoa Ra’

“No reira, i te mea kua ariki kotou i te Atu ia Iesu Karaiti, e aaere taokotai ua atu ma ia katoa ra.”​—KOLOSA 2:6, NW.

1, 2. (a) Akapeea ta te Pipiria akataka anga i to Enoka oraanga no te tavini tiratiratu anga ia Iehova? (e) Akapeea ta Iehova tauturu anga ia tatou kia aaere ma ia katoa ra, mei ta Kolosa 2:6, 7 i akakite maira?

KUA akara ainei koe i tetai tamaiti meangiti i te aaereanga kapiti ma tona metua? Te aru ra taua tamaiti iti ra i te au raveanga ravarai a tona metua ra, te kaka ra tona mata i te mareka anga; te tauturu atura tona metua iaia, te kaka katoa ra oki tona mata ma te aroa e te mareka anga. Te tau ra oki, te taangaanga maira Iehova i taua akatutu anga ei akataka i tetai oraanga no te tavini anga tiratiratu kiaia. Ei akatauanga, te tuatua ra te Tuatua a te Atua e ko te tangata tiratiratu ko Enoka, ‘kua aaere oki raua ko te Atua.’​—Genese 5:24; 6:9.

² Mei tetai metua akamanako meitaki te ka tauturu i tana tamaiti ou ra kia aaere ma ia katoa ra, kua oronga maira Iehova i te tauturu meitaki roa no tatou. Kua tono mai aia i tana tamaiti anau tai ki te enua nei. I tona takainga ravarai i tona oraanga roa i aaere ei ki runga i te enua nei, kua akaata a Iesu Karaiti ma te apa kore i tona Metua i te rangi ra. (Ioane 14:9, 10; Ebera 1:3) No reira e tau ei kia aaere ma te Atua ra, ka umuumuia tatou kia aaere ma Iesu. Kua tata te apotetoro ko Paulo: “No reira, i te mea kua ariki kotou i te Atu ia Iesu Karaiti, e aaere taokotai ua atu ma ia katoa ra, kia akaia e kia patuia oki ki roto iaia e kia akatinamouia i te akarongo, mei tei apiiia atura kia kotou na, kia ki maringiringi ma te akarongo i te akameitaki anga.”​—Kolosa 2:6, 7, NW.

3. Kia tau ki ta Kolosa 2:6, 7, eaa ka raukaʼi ia tatou kia tuatua e e maata atu te umuumuia ra i te aaereanga taokotai ma Karaiti i to te papetito anga anake ra?

³ No to ratou anoano kia aaere taokotai ma Karaiti, e te tautaanga kia aru i tona au takainga apa kore ua ra kua papetitoia te aronga ngakau tiratiratu apiiia ra i te Pipiria. (Luka 3:21; Ebera 10:7-9) I te ao katoa, i te 1997 anake ua, e tere atu i te 375,000 tei rave i teia takainga puapinga maata​—ko tetai avereti e tere atu i te 1,000 i te ra taki tai. E tupu anga mareka tikai teia! Inara, te akaari maira ta Paulo au tuatua tei tataia ia Kolosa 2:6, 7 e e maata atu i te papetito anga anake te umuumuia ra i te aaere taokotaianga ma Karaiti ra. Te akataka maira te verepa Ereni tei uriia ra “e aaere ua atu” i tetai angaanga te ka tika kia rave tamou marieia, kia rave ua atu. Pera katoa oki, kua kapiti atu a Paulo e ko te aaereanga ma Karaiti ra ka o e a atu apinga: kia akaia ki roto ia Karaiti, kia patuia oki ki roto iaia, kia akatinamouia ki roto i te akarongo, kia ki maringiringi oki ma te akameitakianga. E akamanako tatou i taua takiota tuatua taki tai ra e kia kite e akapeea te reira i te tauturu anga ia tatou kia aaere taokotai ua atu ma Karaiti ra.

Kua ‘Akaia Ainei Koe ki Roto ia Karaiti’?

4. Eaa te aite anga e ‘kia akaia ki roto ia Karaiti’?

⁴ Te mea mua, kua tata a Paulo, ka umuumuia tatou ‘kia akaia ki roto ia Karaiti.’ (Akaaite ia Mataio 13:20, 21.) Akapeea ta tetai tangata rave anga kia riro kia akaia ki roto ia Karaiti? Tera oki, te ngaro ke atura te au aka o tetai ngangaere mei te akara anga mata, inara e puapinga maata to ratou ki te ngangaere ra​—te oronga atura i te akatinamou anga e te tuku atura ki te reira i te akamatutu anga. Mei te reira katoa, te akatupu ra ta Karaiti akaraanga e te apiianga i tei akara koreia e te mata ki roto ia tatou te mea mua, akariroanga kia tomo ki roto i to tatou manako e te ngakau. I reira ka akamatutu mai ratou e ka akamaroiroi mai ia tatou. Me tuku tatou ia ratou kia akatere i to tatou manakoanga, i ta tatou au angaanga, e ta tatou au iki anga, ka akakeuia tatou kia akatapu i to tatou oraanga kia Iehova.​—1 Petero 2:21.

5. Akapeea e raukaʼi ia tatou “kia kaki tikai” i te kai vaerua ra?

⁵ E inangaro to Iesu i te kite no ko mai i te Atua ra. Kua akaaite atu aia i te reira ki te kai. (Mataio 4:4) No reira, i roto i tana Tuatua i te Maunga ra, kua rave aia e 21 taiku anga no roto mai i nga puka ke ke e varu no te au Tuatua Tapu Epera. Kia aru i tana akara anga, ka tika tatou kia rave mei ta te apotetoro ko Petero i akamaroiroi maira​—“kia kaki tikai” i te kai vaerua “mei te tamariki anau ou.” (1 Petero 2:2) Me kaki tetai pepe anau ouia i te akamatutu anga, kare aia e akaruke ua mai i tetai ekoko anga no tona kakianga maata. Me kare tatou e manako ngakau akapera ana no te kai vaerua, te akamaroiroi maira ta Petero au tuatua ia tatou “kia kaki” i te reira. Akapeea ra? Penei ka tauturu te kaveinga te kitea ra ia Salamo 34:8: “Ka tongi ana kia kite i te meitaki o Iehova!” Me ka “tongi” putuputu tatou i te Tuatua a Iehova, koia te Pipiria, penei na te tatauanga i tetai tuanga o te reira i te ra taki tai, ka kite tatou e te akamatutu ra te reira i te pae vaerua e e meitaki oki. I muri akera, ka tupu to tatou kakianga no te reira.

6. Eaa ra ka puapinga maataʼi kia tamanako oonu ki runga i ta tatou e tatau ra?

⁶ Inara, e mea puapinga maata kia tamaru meitaki tatou i te kai ta tatou i tauru ra. No reira ka tau tatou kia akamaaraara i ta tatou i tatau ana. (Salamo 77:11, 12) Ei akatauanga, ia tatou e tatau ra i te puka Te Tangata Maata Rava Atu Tei Ora Ana, ka riro kia puapinga rava atu te pene taki tai ra me ka tapu tatou e ka ui kia tatou uaorai: ‘Eaa te tuanga o to Karaiti tu akatangata taku e kite nei i teia tataanga, e akapeea e raukaʼi iaku kia aru i te reira i toku uaorai oraanga?’ Na te akamaaraaraanga i te reira tu ka rauka ia tatou kia akono i ta tatou i kite. Ei reira, me ka aro atu i tetai iki anga, penei ka ui tatou ia tatou uaorai eaa ra ta Iesu ka rave. Me ka rave tatou i ta tatou iki anga kia tau atu, te oronga ra tatou i te akapapu anga no te riroanga tikai kia akaia ki roto ia Karaiti ra.

7. Eaa te manako tau na tatou no te akamatutu anga pakari i te pae vaerua ra?

⁷ Kua raurau katoa a Paulo ia tatou kia kai i “te kai pakari” koia te au tuatua mou oonu o te Tuatua a te Atua ra. (Ebera 5:14) Penei ko te tatauanga i te Pipiria katoa ta tatou ka akakoro na mua i roto i teianei tu. Te vai katoa ra etai au tumu akatakaia no te apii, mei te atinga oko o Karaiti ra, te au koreromotu tuke tuke ta Iehova i papau ma tona au tangata ra, me kare etai au tuatua totou i te Pipiria ra. E maata te au tumu te ka tauturu ia tatou kia tauru e kia tamaru i taua kai vaerua pakari ra. Eaa te akakoroanga no te tauruanga i taua kite ra? Kare ia, kia oronga mai kia tatau i tetai tumu no te akateiteianga, mari ra kia patu i to tatou inangaro ia Iehova e kia akavaitata atu ia tatou kiaia ra. (1 Korinetia 8:1; Iakobo 4:8) Me ka kaki tikai tatou i te tuku anga i teianei kite ki roto ia tatou, kia akono i te reira kia tatou uaorai, e kia taangaanga i te reira ei tauturu ia etai ke ra, ka aru tika tikai tatou ia Karaiti. Ka tauturu teia ia tatou kia aka tikaia ki roto iaia ra.

Te ‘Patuia ra Ainei Koe ki Roto ia Karaiti’?

8. Eaa te aite anga e kia ‘patuia ki roto ia Karaiti’?

⁸ No tetai atu tuanga o te aaereanga taokotaiia ma Karaiti, kua neke viviki atura Paulo mei tetai akatutu anga akaraia ki tetai atura​—mei tetai ngangaere ki tetai patuanga are. Me manako tatou no tetai patuanga i te are, ka manako ra tatou kare i te tango anake ra mari ra i te tuanga katoa oki te ka akatuia kia akaraia atu, na roto i te angaanga pakari ra. Mei te reira katoa, e maata te angaanga pakari ta tatou ka rave kia patu i te au tu e te au ravenga tei tau ra kia Karaiti. Kare taua angaanga pakari ra e kitea koreia, mei ta Paulo i tata kia Timoteo ra: “Kia kite te tangata katoa i te tupu anga o toou kite.” (1 Timoteo 4:15; Mataio 5:16) Eaa etai angaanga Kerititiano te ka patu ia tatou ki runga?

9. (a) E raukaʼi te aru anga ia Karaiti i ta tatou angaanga orometua, eaa etai akakoroanga tau na tatou kia akanoo? (e) Akapeea tatou i kite ei e te anoano ra Iehova kia rekareka tatou i ta tatou angaanga orometua?

⁹ Kua akaue mai a Iesu ia tatou kia tutu aere e kia apii i te tuatua meitaki. (Mataio 24:14; 28:19, 20) Kua akanoo mai aia i te akatauanga apa kore ua, na te akakitekiteanga mataku kore e te meitaki oki. Inara, kare e rauka ia tatou te rave kia aite te meitaki ki tana ra. Inara, kua akanoo mai te apotetoro ko Petero i teia akakoroanga no tatou: “Ka akatapu ra kotou i te [“Atu ra ia Karaiti,” NW] i to kotou ngakau; e kia tika ua rai ia kotou kia akakite atu ki te tangata ki te tangata katoa e ui mai ia kotou i te manako i roto ia kotou na, ma te maru e te kauraro marie atu.” (1 Petero 3:15) Me kare koe e manako ngakau e ka ‘tika ua rai ia koe kia akakite atu,’ auraka e taitaia. E akanoo i etai akakoroanga tau te ka tauturu ia koe kia aere marie atu ki taua turanga ra. Penei na te teateamamao anga i mua ake ka rauka ia koe kia akatuke tuke i taau oronga anga me kare kia kapiti atu i tetai tuatua tapu ki te reira. Penei ka akanoo koe i etai akakoroanga kia oronga kia maata atu te au puka apii Pipiria, kia rave kia maata atu te oki akaou anga, me kare kia akamata i tetai apii anga Pipiria. Kare te akaketaketa anga e tau kia tukuia ki runga i te tu maata anake ua​—mei to te au ora ra, te au puka orongaia, me kare te au apii​—mari ra ki runga i te tu meitaki. Te akanooanga i te au akakoroanga tau e te itaeanga kia rauka te rave ka tauturu ia tatou kia rekareka i te orongaanga ia tatou uaorai i te angaanga orometua. Ko ta Iehova ia e anoano maira​—no tatou kia tavini iaia “ma te rekareka.”​—Salamo 100:2; akaaite ia 2 Korinetia 9:7.

10. Eaa etai atu angaanga Kerititiano ka tau tatou kia rave, e akapeea te tauturu a te reira ia tatou?

¹⁰ E au angaanga katoa oki etai ta tatou e rave ra i roto i te putuputuanga te patu ra ia tatou ki roto ia Karaiti. Te mea puapinga maata rava ko te akaarianga i te aroa tetai i tetai, no te mea ko teia te akairo akatakaanga i te au Kerititiano mou. (Ioane 13:34, 35) Ia tatou e apii ra, e manganui o tatou te riro ra kia piri vaitata atu ki to tatou puapii, e tu natura ua te reira. Inara, ka rauka ainei ia tatou i teianei kia aru i ta Paulo ako anga “kia maora katoa” na te akamatau anga ki etai atu i roto i te putuputuanga ra? (2 Korinetia 6:13) Pera katoa te aronga pakari te umuumu ra i to tatou aroa e te ariki anga. Na te taokotaianga ma ratou katoa, i te kimianga e te arikianga i ta ratou ako anga no te au Tuatua Tapu, ka akariro tatou i ta ratou angaanga ngata kia ngoie mai. (Ebera 13:17) I taua tuatau rai, ka tauturu mai teia i te patu anga ia tatou ki roto ia Karaiti.

11. Eaa te manako tika no tatou no te papetito anga?

¹¹ Ko tetai atianga mareka tikai te papetito anga! Inara, kare tatou e tau kia manako e ka riro te au atianga ravarai o te oraanga i muri akera kia aite atu te marekaanga. Ko tetai tuanga maata i to tatou patu angaia ki roto ia Karaiti te kapiti ra i te ngai i rauka “na reira tatou i te aere na taua akairo rai.” (Philipi 3:16) Kare te aite anga o te reira ei oraanga maromaroa e te reka kore. Tera ua te aite anga kia aaere ki mua i roto i te aere anga tika​—koia oki, te patuanga i te au ravenga meitaki i te pae vaerua e te tamou marieanga i tera ra i tera ra, mei tetai mataiti ki tetai mataiti maira. Kia maara e, ko “te tāpu tikai e tae ua atu ki te openga ra, ka ora ïa.”​—Mataio 24:13.

Kua ‘Akatinamouia Ainei Koe i te Akarongo’?

12. Eaa te aite anga e “kia akatinamouia i te akarongo”?

¹² I te toru o nga takiota tuatua te akataka maira i ta tatou aaere taokotai anga ma Karaiti, kua raurau a Paulo ia tatou “kia akatinamouia i te akarongo.” Te tatau ra tetai urianga e, “kia akangaueue kore no runga i te akarongo,” no te tuatua Ereni ta Paulo i taiku ra ka rauka te akataka anga “kia ngaueue kore, kia papu, e kia kore e rauka kia tauiia i te ture.” Ia tatou ka tupu i te kite, kua orongaia mai kia tatou etai atu tumu kia kite e ko to tatou akarongo i te Atua ra ia Iehova te akanoo meitakiia ra e, ko te tika, kua akanoo tikaia i te ture. Kua riro te tupu anga kia tere atu to tatou tinamou. Kua riro kia ngata rava atu no te ao o Satani kia akaanga ke ia tatou. Te akamaara mai nei teia ia tatou i ta Paulo akamaroiroi anga kia “aere rai tatou ki mua i te pakari.” (Ebera 6:1) Te aere kapiti ra te pakari e te tinamou.

13, 14. (a) Eaa te akakokoanga tei aroia atura e te au Kerititiano o Kolosa i te anere mataiti mua ra ki to ratou tu tinamou? (e) Eaa tei akataitaia ra i te apotetoro ko Paulo?

¹³ Kua aro atu te au Kerititiano i Kolosa i te anere mataiti mua ra i te au akakokoanga i to ratou tu tinamou. Kua akamatakite atura Paulo: “E matakite ko te pou aea kotou i te tuatua pakari e te pikikaa puapinga kore a tetai tangata atu, i te tuatua ikuiku a te tangata nei, tei tau i te apiianga mua o teianei ao kare i ta te Mesia.” (Kolosa 2:8) Kare a Paulo i anoano i to Kolosa, tei riro ra ei au tangata i roto “i te basileia o tana Tamaiti akaperepere,” kia apai keia, kia akaanga keia mei to ratou tu akameitakiia i te pae vaerua. (Kolosa 1:13) Na teaa e akaanga ke? Kua tou atura Paulo ki “te tuatua pakari,” ko te taime okotai ua teia i taikuiaʼi teia tuatua i te Pipiria. Te tuatua ra ainei aia no te aronga apii Ereni, mei ia Plato raua ko Socrates ra? Noatu rai e kua akatupu raua i tetai akakokoanga ki te au Kerititiano mou, i taua tuatau ra, e atea ke atu te taangaanga anga i te “tuatua pakari” i reira. Kua taiku ua te reira i te au pupu e manganui e te au apii no te manako anga​—noatu ko to te au akonoanga. Ei akatauanga, te au ngati Iuda o te anere mataiti mua ra mei ia Josephus raua ko Philo kua tapa i ta raua akonoanga uaorai ei tetai tuatua pakari​—penei kia akatere atu ei i tona manako angaia.

¹⁴ Ko etai au tuatua pakari tei akataitaia ra ia Paulo no tetai tu akonoanga ia. I muri akera i roto i taua pene o tana reta rai ki to Kolosa, kua tuatua aia no te aronga tei apii ra, “Auraka e arapaki, auraka e tongi; auraka e akatukia,” te taiku ra i te au tuanga no te Ture a Mose tei akakoreia ra na te matenga o Karaiti. (Roma 10:4) Kapiti atu ma te au apiianga peikani, kua rave angaanga te au mana tei akakoko ra i te pae vaerua o te putuputuanga ra. (Kolosa 2:20-22) Kua akamatakite atu a Paulo i te tuatua pakari e tuanga ra no “te apiianga mua o teianei ao.” Ko taua apiianga pikikaa ra na te tangata nei te akamata anga.

15. Akapeea tatou me kopae i te akaanga keanga na te au manako tau kore i te tuatua tapu te putuputu ra te rokoia kia tatou?

¹⁵ Te akatupuanga i te au manako tangata e te au manakoanga kare i akatumuia ki runga i te Tuatua a te Atua ka rauka kia akatu mai i tetai akakokoanga ki te tu tinamou Kerititiano. Ka tika tatou i teia tuatau kia matakite i taua au akakokoanga ra. Kua raurau mai te apotetoro ko Ioane: “E aku au akaperepere e, auraka e akarongo atu i te au vaerua ravarai, e timata ra i taua au vaerua ra, kia kitea e, no ko mai aina i te Atua ra.” (1 Ioane 4:1) No reira me ka tauta tetai oa apii kia akairinaki ia koe e kua taito te au turanga o te Pipiria, me kare me ka tamata tetai o te aronga i te pae mai ia koe kia mana ki runga ia koe kia rave i tetai tu manako noinoi apinga, me kare me ka taomi kikite tetai oa angaanga ia koe kia aati i toou akava ngakau tereniia ra i te Pipiria, me kare noatu me ko tetai oa akarongo ka tuatua akakino i etai atu i roto i te putuputuanga tei akatumuia ra ki rungao i tona uaorai manako, auraka e ariki ua i tana i tuatua. E akataka ke atu i te au apinga kare ra i rotai ma te Tuatua a te Atua. Me rave tatou i te reira, ka akamou tatou i to tatou tu tinamou ia tatou e aaere taokotai ra ma Karaiti katoa.

“Kia Ki Maringiringi ma te Akarongo i te Akameitaki Anga”

16. Eaa te a o te tuanga no te aaereanga taokotai ma Karaiti, e penei eaa te uianga ta tatou ka ui?

¹⁶ Te a o te tuanga no te aaere taokotai ua atu ma Karaiti katoa ta Paulo i taiku mai kia riro tatou “kia ki maringiringi ma te akarongo i te akameitaki anga.” (Kolosa 2:7, NW) Te apai maira te tuatua “ki maringiringi” ki te manako i tetai kauvai te ki maringiringi ra i tona nga pae. Te akakite maira teia e no tatou ei au Kerititiano, ko ta tatou akameitakianga ka tau ei tetai apinga rave tamouia me kare ei tetai ravenga mou. Ka tau tatou taki tai kia ui, ‘Ko au ainei tetai te ki ra i te akameitaki anga?’

17. (a) Eaa ka tau ei kia tuatuaia e e maata ta tatou katoatoa ka tika kia akameitaki, noatu rai i te au tuatau ngata? (e) Eaa etai apinga orongaia mai e Iehova taau e manako maata ra kia akameitaki iaia?

¹⁷ E tika, te rava ra te tumu no tatou katoatoa kia ki maringiringi i te akameitaki anga ia Iehova i te au ra ravarai. Noatu rai i te au tuatau kikino ra, penei te vaira etai apinga te ka oronga mai i te au mareka anga. Ka akaari mai tetai oa i te aroa. Ka oronga mai tetai tei akaperepereia ra i te akatuki akapapu akaouanga. Tetai akaangaroi anga meitaki i te po te ka akamaroiroi mai. Tetai kaikai anga reka te ka akakore atu i te mate pongi. Tetai imene a te manu, te kata a tetai tamaiti, tetai rangi auika kanapanapa ra, tetai matangitangi akapumaana​—ko teia katoa e penei e tere atu te ka tupu mai kia tatou i tetai ra okotai. E ngoie ua ra kia kore e manako atu i taua au apinga orongaia maira. Kare ainei taua au apinga katoatoa ra i tau no tetai akameitaki anga? No ko mai ia Iehova ra te katoatoa, koia te Tumu o “te au mea memeitaki i o maiia ra, e te au mea tika ravarai.” (Iakobo 1:17) E kua oronga mai aia i te au apinga tei akariro ra ei au meangiti ua teia​—ko te ora uaorai tetai, ei akatauanga. (Salamo 36:9) Pera katoa oki, kua oronga mai aia kia tatou i tetai tika kia ora e tuatau ua atu. E raukaʼi te oronga mai i teianei apinga aroa, kua akono a Iehova i te atinga maata rava na te tonoanga mai i tana Tamaiti anau tai, “tana i akaperepere maata ra.”​—Maseli 8:30, NW; Ioane 3:16.

18. Akapeea tatou me akaari i te akameitaki anga kia Iehova?

¹⁸ Mei teaa ra te tika, i reira, te au tuatua a te tata taramo: “E mea meitaki te akameitaki ia Iehova.” (Salamo 92:1) Na tetai tu aiteite, kua akamaaraara atu a Paulo i te au Kerititiano i Tesalonia ra: “E akameitaki i te Atua i te au mea katoa ra.” (1 Tesalonia 5:18; Ephesia 5:20; Kolosa 3:15) Penei ka manako tatou taki tai kia maata atu te akameitaki anga. Kare e umuumuia ta tatou au pure ei au patianga anake ki te Atua no ta tatou au mea e anoano ra. Te meitaki ra te reira i to ratou ngai. Inara e tamanako ana i tetai oa tei tuatua anake ra kia koe me anoano aia i tetai apinga naau ra! No reira eaa oki ka kore ei e pure kia Iehova kia akameitaki ua iaia e kia akapaapaa oki iaia? Mei teaa ra te akamareka anga taua au pure ra iaia i tona akara anga mai ki raro nei ki runga i teianei ao akameitaki kore! Ko te rua o te puapinga koia oki penei ka tauturu taua au pure ra ia tatou kia akara atu i te au tu papu no te oraanga, te akamaaraanga ia tatou e akapeea to tatou akameitaki anga tika tikai.

19. Akapeea ta Paulo tuatua anga ia Kolosa 2:6, 7 ra i te akakite anga e kia aere tamou atu tatou kia meitaki i te aaereanga ma Karaiti ra?

¹⁹ Kare ainei i te mea meitaki e eaa te maata o te arataki anga pakari te ka rauka i roto i tetai irava okotai o te Tuatua a te Atua? Ta Paulo akoanga kia aaere tamou ma Karaiti ko tetai apinga ia ka tau tatou taki tai kia anoano kia tuku ki to tatou ngakau. E akatika tatou i reira kia ‘akaia ki roto ia Karaiti,’ “kia patuia ki rungao iaia,” “e kia akatinamouia i te akarongo,” e ‘kia ki maringiringi ma te akameitaki anga.’ Te puapinga maata ra taua akoanga ra ki te aronga ou ua te papetito angaia. Inara te orongaia maira kia tatou katoatoa. E akamanako i tetai aka te tupu atura ki raro e akapeea oki tetai are i te patu angaia ki runga kia teitei ake. Mei te reira katoa ta tatou aaere anga ma Karaiti kare e openga. Te maata ra te ngai no te tupu anga. Ka tauturu mai a Iehova ia tatou e ka akameitaki mai oki ia tatou, no te mea te anoano ra aia ia tatou kia aaere ua atu ma ia katoa e ma tana Tamaiti akaperepere ra e mutu kore ua atu.

Akapeea Koe me Pau?

◻ Eaa te o atura ki te aaereanga taokotai ma Karaiti?

◻ Eaa te aite anga e ‘kia akaia ki roto ia Karaiti’?

◻ Akapeea tatou me ‘patuia ki roto ia Karaiti’?

◻ Eaa ra i puapinga maataʼi “kia akatinamouia i te akarongo”?

◻ Eaa ta tatou au tumu no te ‘ki maringiringi anga i te akameitaki anga’?

[Tutu i te kapi 10]

Penei kare e akaraia te au aka o te rakau ra, inara te oronga maira ratou i te kai ki te rakau ra e te akatinamou ra i te reira kia kore e ngaueue