Auraka e Roiroi i te Takinga Meitaki

“Auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu.”​—GALATIA 6:9.

1, 2. (a) Eaa ra i umuumuiai te akakoromaki anga kia raukai te tavini i te Atua? (e) I akapeea ta Aberahama akaari anga i te akakoromaki anga, e na teaa i tauturu iaia kia rave i te reira?

EI Au Kite o Iehova, te mareka ra tatou i te raveanga i te anoano o te Atua. Te kite katoa ra tatou i te akaangaroi anga i te raveanga i te “amo” no te akono ei pipi. (Mataio 11:29) Inara, kare i te mea ngoie ua te tavinianga ia Iehova raua ko Karaiti ra. Kua akataka meitaki mai te apotetoro ko Paulo i teia i tana raurau anga i tona au oa Kerititiano: “Ko te akakoromaki ra te tau ia kotou e, kia oti ia kotou te rave i ta te Atua i anoano ra, kia rauka ia kotou te tutaki i tuatuaia maira.” (Ebera 10:36) Te umuumuia ra te akakoromaki no te mea e akaaoanga te tavinianga i te Atua ra.

² E akakite anga tikai te oraanga o Aberahama ra i taua tika ra. E manganui te au tuatau kua aro atura aia i te au ikianga ngata e te au turanga pekapeka oki. Te ikuiku anga kia akaruke aia i te oraanga pumaana i Ura ra ko te akamataanga ua te reira. Kare i roa kua aro atu aia i te onge, te aronga riri i te pae mai iaia, kua vaitata te riro ke atu tana vaine, te tu riri mei etai kopu tangata, e te takino no te tamaki. E maata atu te au timataanga te aere maira. Inara kare a Aberahama i roiroi i te raveanga i tei meitaki ra. E meitaki teia me ka akamanako koe e kare iaia te Tuatua katoa a te Atua ra, mei ta tatou i teia tuatau nei. Inara, kare e ekoko anga kua kite aia i te totou mua, i ta te Atua i akakite maira: “Ka tuku oki au i te ke ia korua ko te vaine, e to uanga e tona uanga.” (Genese 3:15) I te mea ka na roto mai iaia te uanga ra, e mea matauia ka riro a Aberahama ei enemi no Satani ra. No te kiteanga i teianei tika kare e ekoko anga kua tauturu ia Aberahama kia akakoromaki rekareka ua i tona au timataanga.

3. (a) Eaa i tau ei te au tangata o Iehova kia tapapa atu i te au mate ra? (e) Eaa te akamaroiroi anga te orongaia maira kia tatou ia Galatia 6:9?

³ Ka tau katoa oki te au tangata o Iehova i teia tuatau kia tapapa atu i te au mate ra. (1 Petero 1:​6, 7) Ko te tika oki, kua akamatakite maira Apokalupo 12:17 kia tatou e ka ‘tamaki mai’ a Satani i te toenga o tei akatainuia ra. No to ratou pirianga vaitata ma te aronga akatainuia ra, ka riro katoa te “au mamoe ke” ei au takete no to Satani riri. (Ioane 10:16) I te pae atu i te patoianga penei ka aro atu te au Kerititiano i ta ratou angaanga orometua i te ngai tangata ra, penei ka tupu katoa kia ratou te au taomianga timataanga i to ratou au oraanga. Te akamaroiroi maira Paulo ia tatou: “Auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu.” (Galatia 6:9) Ae, noatu te akakoro ra Satani kia akapou i to tatou akarongo, ka tika tatou kia patoi atu iaia ma te akarongo turori kore. (1 Petero 5:​8, 9) Eaa te ka tupu mai mei to tatou aerenga tiratiratu? Te akataka maira Iakobo 1:​2, 3: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa; Kua kite oki kotou e, na taua timata anga i to kotou akarongo ra e akatupu i te akakoromaki.”

Tamaki Tika Atu na Mua

4. Akapeea ta Satani taangaanga i te au tamaki anga tika atu na mua i te tauta anga kia aati i te tiratiratu o te au tangata o te Atua ra?

⁴ Te akatutu tika maira te oraanga o Aberahama i te “au timataanga e manganui te tu ra” penei ka aro atu te Kerititiano i teia tuatau nei. Ei akatauanga, kua akono atura aia i te aru anga a te aronga mei Sinara maira. (Genese 14:​11-16) Kare i te mea poitirere, kua rave tamou marie maira Satani i te tamaki anga na mua atu na roto i te tu takinga kinoanga. Mei te openga mairai o te Tamaki II o te Ao, e au tatini ua atu au enua kua tuku i te au arai anga a te kavamani ki runga i te angaanga apiianga Kerititiano a te Au Kite o Iehova. Te akakite maira te 2001 Yearbook of Jehovah’s Witnesses i te ta kinoanga i te au Kerititiano i Angola ra i te akakoromaki anga i te au rima o te au enemi. Na te irinakianga ia Iehova, kua patoi ngaueue kore te au taeake o taua au enua ra kia akamutu! Kua akono ratou, kare na te raveanga i te ta ua me kare i te meameaau, mari ra na te rave pakari i te akakoromaki anga i te angaanga tutuanga ra.​—Mataio 24:14.

5. Penei akapeea te au mapu Kerititiano e riro ei ei takinga kinoanga i te apii ra?

⁵ Inara, kare te takinga kinoanga e kapiti ana i te ta anga i te au tuatau ravarai. Kua akameitakiia maira Aberahama i te openga ma nga tamaroa e rua​—ko Isemaela raua ko Isaaka. Akakite maira Genese 21:​8-12 kia tatou e i tetai atianga ‘kua kanga aviri’ a Isemaela ia Isaaka. I tana reta ki to Galatia ra, kua akakite a Paulo e e kino atu teia i te kanga tamariki ua, no te mea kua akataka aia e i takinga kino a Isemaela ia Isaaka ra! (Galatia 4:29) Te aviri anga na te au oa apii maira e te au tuatua na te aronga patoi ra ka tika ua kia karangaia e takinga kinoanga. Tetai Kerititiano ou tei tapaia ko Ryan te maara ra i te tamamae anga tei tupu kiaia mei tona au oa apii maira: “Te 15 miniti i runga i te pati ki te apii e te oki anga mai ki te kainga kua aite ki etai au ora iaku e tuatua aviriia maira. Kua tutungi mai ratou iaku ma te au kiripi pepa ta ratou i tutungi kia vera ma te apinga akaka i te avaava ra.” Te tumu no teia akonoanga kino? “No toku terenianga teokaratiki kua akariro iaku kia tuke mei etai atu aronga ou i te apii ra.” Tera ra, ma te turu anga a tona nga metua ra, kua rauka ia Ryan kia akakoromaki tiratiratu. Te aronga ou, kua akariro ainei te au tuatua akakino a to kotou au oa apii kia manako ngakau maroiroi kore kotou? Inara, auraka e unui ki muri e ka akamutu! Na te akakoromaki tiratiratuanga, ka kite koe i te tupu anga o te au tuatua a Iesu: “E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei.”​—Mataio 5:11.

Au Apiapi Anga i te Au Ra Ravarai

6. Eaa te au apinga te ka akakino i te au pirianga i roto i te au oa Kerititiano i teia tuatau nei?

⁶ Te maata anga o te au timataanga i teia tuatau nei te kapiti ra i te au apiapi anga matauia no te au ra ravarai. Kua akakoromaki a Aberahama uaorai i te au pekapeka tei tupu ra i rotopu i tana aronga tiaki puaka e ta tona nepeu ko Lota. (Genese 13:​5-7) I tetai tu aiteite i teia tuatau, te au tuke tuke o te au tangata e te au vareae rikiriki ua ka rauka kia akakino i te au pirianga e ka akakoko i te tu au o te putuputuanga. “Te vai ra oki te vareae, e te tauetono, tei reira katoa te oripu ua e te au tuatua kikino katoa ra.” (Iakobo 3:16) Mei teaa ra te puapinga maata no tatou kia kore e roiroi mari ra kia tuku i te au ki mua i te ngakau parau, mei ia Aberahama ra, e kia kimi i te meitaki no etai ke ra!​—1 Korinetia 13:5; Iakobo 3:17.

7. (a) Eaa ta tetai peretana ka tau kia rave me kua mamae aia i tetai oa Kerititiano ra? (e) Akapeea ta Aberahama ra akanoo anga i tetai akatauanga meitaki i te tamou marieanga i te pirianga meitaki ma etai ke atura?

⁷ Ka riro te tu ponuiaau ei akaaoanga me ka manako ngakau tatou e kua akono tau koreia mai tatou e tetai oa akarongo ra. Te tuatua ra Maseli 12:18: “Te tangata vaa karea ua ra, e tau ïa ki te koputaputa koke ra.” Te au tuatua manako kore ua, noatu me ka tuatua akakoro koreia, ka rauka kia akatupu i te mamae oonu. Ka maata atu oki te mamae me ka manako ngakau tatou e kua tuatua akakinoia mai tatou me kare kua urutoe kinoia. (Salamo 6:​6, 7) Inara kare tetai Kerititiano e tuku i te manako ngakau mamae kia akariro iaia kia roiroi! Me tei roto koe i taua turanga ra, e akono kia akatikatika i taua tumu ra na te tuatuaanga i roto i tetai tu takinga meitaki ra ki tei akariri maira. (Mataio 5:​23, 24; Ephesia 4:26) E akamanako kia akakore atu i te ara a taua tangata ra. (Kolosa 3:13) Na te koreanga e akamoupuku, ka akono tatou kia rauka te rapakau i to tatou uaorai au manako ngakau e to tatou pirianga ma to tatou taeake. Kare a Aberahama i akamoupuku i tetai ua atu tu tana i manako ngakau atu kia Lota. Eaa ra kua aere viviki atura Aberahama kia paruru atu ia Lota e tona pamiri!​—Genese 14:​12-16.

Au Timataanga na Tatou Uaorai i Apai Mai

8. (a) Akapeea tetai au Kerititiano me ‘ko mama rava ia ratou uaorai i te iriea e manganui’? (e) Eaa ra i raukai ia Aberahama tetai manako anga tau no te au apinga kopapa ra?

⁸ E tika ra, ko etai au timataanga na tatou uaorai i apai mai. Ei akatauanga, kua akaue atura Iesu i tana au pipi: “Auraka e akaputu i te apinga na kotou i teianei ao, i te ngai e pou ei i te uu, e te pe, i te ngai e tomoia, e e keiaiaʼi e te keia.” (Mataio 6:19) Inara, ko tetai papaki o te au taeake “kua ko mama rava ia ratou uaorai i te iriea e manganui” na te tukuanga i te inangaro apinga kopapa ki mua i te au apinga no te Patireia ra. (1 Timoteo 6:​9, 10) Kua mareka ua Aberahama kia tuku atinga i te au apinga akapumaana kia raukai te akamareka i te Atua ra. “No te akarongo i tuitarere ei aia i taua enua i tuatuaia maira, mei te mea e, e enua ke ra, i te noo ua anga i roto i te puakapa, ratou katoa ko Isaaka e Iakoba, ko nga tangata tuanga ïa ma ia katoa i tei tuatuaia maira: Te maara ra aia e e rauka te oire tumu mou, ko te akatu e te tutara o taua oire ra, ko te Atua ïa.” (Ebera 11:​9, 10) No to Aberahama akarongo i tetai “oire” i te tuatau ki mua, me kare tetai kavamani tu-Atua, kua tauturu iaia kia kore e irinaki ki runga i te au apinga kopapa nei. Kare ainei tatou i te pakari kia rave aiteite ki te reira?

9, 10. (a) Akapeea e raukai i te inangaro no te turanga maata kia akatupu i tetai timataanga? (e) Penei ka akapeea tetai taeake i te akono anga iaia uaorai ei “tei meangiti rava”?

⁹ E akamanako i tetai atu tu. Te oronga maira te Pipiria i teia arataki anga maroiroi: “Kia manako tetai iaia uaorai e, e tangata maata aia, e kare ua ana e puapinga, kua vavare aia iaia uaorai.” (Galatia 6:3) Pera katoa, te raurauia maira tatou e “auraka takiri e mea e raveia ma te taumāro, e te akanengonengo puapinga kore; ei ngakau akaaka ra.” (Philipi 2:3) Te apai maira tetai papaki i te au timataanga ki runga ia ratou uaorai na te kore anga e akono i teia akoanga. Na te akakeu anga i tetai inangaro no te turanga maata kare na te inangaro kia rave “angaanga meitaki,” ka riro kia mareka kore ratou e kia reka kore me kare e rauka ia ratou etai taoonga i roto i te putuputuanga ra.​—1 Timoteo 3:1.

¹⁰ Kua akanoo maira Aberahama i tetai akatauanga meitaki ‘kia kore e maata te manakoanga iaia uaorai, i tei tau ra.’ (Roma 12:3) I tona aravei anga ia Melekizedeka, kare a Aberahama i akono e mei te mea rai ko tona turanga akaperepereia ma te Atua ra kua akariro iaia kia teitei ake. E tuke rai, kua akakite aia i to Melekizedeka turanga teitei ei taunga na te tutakianga kiaia i tetai ngauruanga. (Ebera 7:​4-7) Ka tau katoa te au Kerititiano kia mareka ua kia akono ia ratou uaorai i ‘tei iti ra’ auraka kia pati i te turanga maata. (Luka 9:48) Me te akara anga ra e te arai ra te aronga arataki i roto i te putuputuanga ra i etai turanga mei ia koe, e rave i etai au akara matatio anga tiratiratu ia koe uaorai kia kite eaa te au tu meitaki ka rauka ia koe kia rave i toou tu tangata me kare te raveanga i te au apinga. Koi kore ei e reka kore no te au taoonga kare ra ia koe, e rave ki katoa i taau angaanga​—i te tika kia tauturu atu ia etai ke ra kia kite ia Iehova. Ae, “ka akamoraro ia kotou uaorai i raro ake i te rima mana o te Atua, kia akateitei aia ia kotou i te tuatau tikai.”​—1 Petero 5:6.

E Akarongo i te Au Mea Akara Koreia Ra

11, 12. (a) Penei eaa tetai papaki o te putuputuanga i ngere ei i to ratou tu rapurapu? (e) I akapeea a Aberahama i te akanoo anga i tetai akatauanga meitaki i te patuanga i tona oraanga ki runga i te akarongo i te au taputou a te Atua ra?

¹¹ Tetai atu timata anga penei ka kapiti mai te akara anga taroaroa o te openga o teianei akatereanga kino o te au mea nei. Kia tau ki ta 2 Petero 3:12, ka akono te au Kerititiano “i te tatari anga, e te rapurapu anga atu, kia tae mai taua rā o te Atua ra.” Inara, e manganui tei tatari i teia “rā” no etai mataiti, tetai papaki no te au raungauru ua atu mataiti. Ei tupu anga, kua maroiroi kore tetai papaki e kua ngere i te tu rapurapu.

¹² Pera katoa oki, e akamanako i te akatauanga a Aberahama. Kua patu aia i tona oraanga katoa ki runga i te akarongo i te au taputou a te Atua ra, noatu rai e kare e rauka kia tupu te katoa i te tuatau o tona oraanga ra. E tika, kua ora aia i te tupu akeanga tana tamaiti ko Isaaka ra. Inara e au anere ua atu mataiti i mua ake ka riro ei te anaunga a Aberahama kia aite “mei te etu o te rangi ra” me kare “mei te onetea i taatai ra.” (Genese 22:17) Inara, kare a Aberahama i riro kia reka kore me kare kia maroiroi kore. No reira kua tuatua te apotetoro ko Paulo no Aberahama e etai atu pateriareka ra: “I mate anake atura taua aronga ra ma te akarongo, kare rai i rauka tei tuatuaia maira, kua akara ra i taua au mea ra i te atea ke, e kua akarongo tikai, e kua āriki marie, kua aaki ua e, e tangata ke ke ratou e te tuitarere ua i teianei ao.”​—Ebera 11:13.

13. (a) Akapeea te au Kerititiano i teia tuatau nei i aite ei i “te tuitarere ua”? (e) Eaa a Iehova ka apai mai ei i te openga ki teia akatereanga o te au mea nei?

¹³ Me kua rauka ia Aberahama kia tuku i tona oraanga ki runga i te au taputou “te atea ke atura” te tupu anga, mei teaa ra te maata atu te tau no tatou i teia tuatau, ma te tupu anga o teianei au mea te vaitata mai nei! Mei ia Aberahama rai ka tika tatou kia manako ia tatou uaorai i “tuitarere ua” i roto i te akatereanga a Satani ra, ma te akakoreanga i te nooanga ki roto i te tu oraanga noinoi. E mea natura, ka inangaro tatou kia tae vave mai “te openga o te au mea ravarai nei,” kare e te vaitata ua ra. (1 Petero 4:7) Penei te mamae ra tatou mei te maki kopapa. Me kare i te au taomi anga moni te akateiaa ra ki runga ia tatou. Ka tika tatou kia maara, e ka apai mai a Iehova i te openga kare kia akaora ua ia tatou mei te au turanga mamae ra mari ra kia akatapu i tona uaorai ingoa. (Ezekiela 36:23; Mataio 6:​9, 10) Ka tae maira te openga, kare ra i te tuatau tau kia tatou, mari ra i te tuatau te ka tau meitaki ki ta Iehova au akakoro anga.

14. Akapeea te au Kerititiano i puapingai i to te Atua akakoromaki anga i teia tuatau nei?

¹⁴ Kia maara, katoa oki, e “kare ua te Atu i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava i anoano e kia mate atu tetai, kia rauka katoatoa ra te tataraara.” (2 Petero 3:9) E akamanako, “e akakoromaki maata ra tona [to te Atua] ia tatou”​—te au mema o te putuputuanga Kerititiano ra. Penei te umuumuia ra kia maata atu te tuatau no tetai papaki o tatou kia rave i te au tauianga e te au akatikatika anga “kia rokoia mai [tatou] e ia ma te au, ma te topata kore, e te apa kore.” (2 Petero 3:14) Kare ainei tatou e tau kia akameitaki, i reira, e kua akaari mai te Atua i te akakoromaki?

Kiteanga i te Rekareka Noatu Rai te Au Arairai Anga

15. Akapeea i raukai ia Iesu kia tamou i tona rekareka anga i te aro atu anga i te au timataanga, e akapeea te au Kerititiano i puapingai i te aruanga iaia i teia tuatau nei?

¹⁵ Te apii maira te oraanga o Aberahama i te au apiianga e manganui ki te au Kerititiano i teia tuatau. Kua akaari mai aia kare i te akarongo anake mari ra i te akakoromaki, te karape, te maroiroi, e te aroa noinoi kore. Kua oronga aia i te tuanga mua i tona oraanga ki te akamori anga ia Iehova ra. Inara, ka tika kia maaraia e ko te akatauanga meitaki roa no tatou kia aru kua akanooia mai e Iesu Karaiti ra. Kua aro katoa aia i te au timataanga e manganui, inara i roto i te reira katoa, kare aia i ngere i tona rekareka anga. No teaa ra? No te mea kua tamou marie aia i tona manako ki runga i te manakonako anga i mua ra. (Ebera 12:​2, 3) No reira kua pure a Paulo: “E teianei, kia akaarite mai te Atua nona te akakoromaki e te pumaana, i to kotou ngakau, tetai ki tetai kia tau i te anoano o te Mesia ra o Iesu.” (Roma 15:5) Ma te tu manako tika ra, ka kitea e tatou te rekareka anga noatu te au arairai anga ta Satani ka tuku mai ki mua ia tatou nei.

16. Eaa ta tatou ka rauka kia rave me ka akara anga maata rava to tatou au manamanata?

¹⁶ Me akara anga maata mai te au manamanata, e akamaara kia koe uaorai e mei tona aroa ia Aberahama ra, te aroa ra a Iehova ia koe. Te anoano ra aia ia koe kia autu. (Philipi 1:6) E tuku i toou irinaki anga ki katoa ki roto ia Iehova, ma te irinaki anga e “kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.” (1 Korinetia 10:13) E akatupu i te ravenga no te tatauanga i te Tuatua a te Atua ra i te au ra taki tai. (Salamo 1:2) E rave tamou marie i te pure, ma te patianga ia Iehova kia tauturu ia koe kia akakoromaki. (Philipi 4:6) E nana ‘e oronga mai i te Vaerua Tapu ki te aronga e pati atu iaia ra.’ (Luka 11:13) E akono i te au apinga tauturu ta Iehova i oronga maira kia akamatutu ia koe i te pae vaerua, mei ta tatou au puka akatumuia i te Pipiria. Pera katoa, e kimi i te turu anga a te taeake anga ra. (1 Petero 2:17) E aere tiratiratu ki te au uipaanga Kerititiano ra, no te mea ka rauka ia koe mei reira te akamaroiroi anga te umuumuia ra e raukai ia koe te akakoromaki anga. (Ebera 10:​24, 25) Kia rekareka i te irinaki anga e ka taki atu toou akakoromaki anga ki tetai turanga marekaia i nga mata o te Atua ra e ko toou tiratiratu anga ka akariro i tona ngakau kia rekareka!​—Maseli 27:11; Roma 5:​3-5.

17. Eaa te au Kerititiano i kore ei e roiroi i te ngereanga i te manakonako anga?

¹⁷ Kua aroaia Aberahama e te Atua ra ei “oa” nona. (Iakobo 2:23) Noatu rai, ko te oraanga o Aberahama e papaanga no te au timataanga e te au mate oki. No reira ka rauka katoa i te au Kerititiano kia manako atu e kare kia meangiti mai te au tupu anga i teia tuatau kino “o te openga nei.” Ko te tika, te akamatakite maira te Pipiria kia tatou e “te au tangata kikino e te aronga pikikaa ra, e tupu rai to ratou kino, e e maata atu.” (2 Timoteo 3:1,13) Auraka kia roiroi ua i te tu kino, kia kite ra e te au taomi anga ta tatou e aro atu nei te akapapu maira e te vaitata nei te openga o ta Satani ra akatereanga kino. Inara te akamaara maira Iesu kia tatou e “te tāpu tikai e tae ua atu ki te openga ra, ka ora ïa.” (Mataio 24:13) No reira, ‘auraka e akaroiroi i te raveanga i tei meitaki ra!” E aru ia Aberahama ra, e vai tamou ki roto i te aronga “i rauka tei tuatuaia maira i te akarongo e te akakoromaki.”​—Ebera 6:12.

Kua Kite Ainei Koe?

• Eaa te au tangata o Iehova i tau ei kia tapapa atu i te au timata anga e te au mate oki i teia tuatau nei?

• Penei na teea au tu ta Satani tamakianga mai na mua ra?

• Akapeea e raukai kia akakoreia atu te au pekapeka i roto i te au Kerititiano ra?

• Akapeea e raukai i te ngakau parau e te noinoi te akatupu i te au timataanga ra?

• Na roto i teea tu ta Aberahama akanoo anga i tetai akatauanga meitaki i te tatarianga i te tupu anga o ta te Atua ra au taputou?

[Tutu i te kapi 26]

E manganui te au mapu Kerititiano te takinga kinoia ra, na te aviri angaia e to ratou au oa apii

[Tutu i te kapi 29]

I to Aberahama tuatau e “atea ke atu,” te tupuanga o te au taputou a te Atua ra, inara kua patu aia i tona oraanga koropini ia ratou ra