Eaa i Roaʼi no te Akaoti i te Maro Anga?

I ETAI 6,000 mataiti i topa akenei, kare to te Atua tu ngateitei rava i riro ana ei maro anga. Te akaoti anga tana au angaanga umere o te anga anga, “Akara akera te Atua i te au mea katoa tana i anga, e i na, te meitaki roa ra.” (Genese 1:31) No reira kua tomo atu aia ki roto i tetai tuatau “akaangaroi anga” roa; kare i te mea e kua roiroi aia i te pae kopapa. Mari ra, kua akaangaroi aia mei te tu ra e kua akamutu aia i tana angaanga anga i runga nei i te enua, te papu anga e kua manuia e te ki katoa tana akakoroanga meitaki no runga i teia.​—Genese 2:1-3, NW; Isaia 55:11.

Eaa te reira akakoroanga? Kua tuku a Iehova i te nga tokorua ki roto i tetai ngai tei kapikiia e ko te aua o Edene. Ta raua angaanga tikai ko te akono i to raua kainga parataito, kapitiia te au tu oraanga o te animara tukeke. Pera katoa, kia anau e kia akono raua i te tamariki. I roto i te au tuatau i to raua kopu tangata e maata maira kua tau e kia akatotoa raua i te Parataito ki te ope o te enua te akarongo anga i te akauenga a te Atua kia ‘akavi i te enua.’ I reira, e riro mai ei te enua ei kainga manea, tei akakiia ki tetai kopu tangata mataora ma te, taokotaiia te tavinianga i to ratou Metua i te rangi. Te reira ta te Atua akakoroanga i te akamataanga.​—Genese 1:27, 28; 2:8, 15, 20-22.

Ka kapiti ainei a Adamu raua ko Eva i te akatupuanga i teia akakoroanga maata ki te openga? Tei runga te reira i to raua taokotai tamouanga ki te reira na te akarongoanga i Tei Anga ra. Kare to raua akarongo i te mea ta matapoia e te manako kore ua. Kua orongaia kia raua te anoano ma te tu rangatira i te mea kua inangaro te Atua ia raua kia tavini iaia ma te ngakau ariki. Ei akamaara anga kitea mataia o tona tika anga ngateitei rava, kua oronga aia i tetai timata anga ngoie ua kia raua. Ka kai raua i tetai ua atu au mea tei orongaia i roto i te aua mari ra okotai. Te vaira tetai ua rakau ta te Atua i tuatua: “I te rā e kai ei koe i to reira, ka mate ïa koe.”​—Genese 2:16, 17.

Te akakite maira teia tuatua kia tatou e kare a Adamu raua ko Eva i angaia kia tangata metua e mate atura. Ka tupu ua te mate me ka akarongo kore raua i teia akauenga ngoie ua. Naringa a Adamu raua ko Eva i vai tamou ua i te akarongo i te Atua, kua ora mai rai raua e tae mai ki teia tuatau ei nga metua o tetai kopu tangata apa kore i teianei ao katoa.​—Akara i te kaveinga tei akakiteia ia Salamo 37:29.

Inara, tetai o ta te Atua angera tei angaia, i teia nei mai kua kapikiia tona ingoa ko Satani, kua aviri aia i ta te Atua tu tutaraanga. Kua raurau aia ia Eva kia kai i te ua tei akakoreia, te tuatua kikite anga e na te kore anga e irinaki ki te tu ngateitei rava o te Atua, e meitaki atu ia aia. Inara to Satani manako tikai, ko te anoano kia riro mai ei atua no te kopu tangata tei tamanakoia o te au tangata nei.​—Genese 3:1-5; Mataio 4:8, 9; Ioane 8:44.

I te mea kua oronga mai Iehova i te au mea ravarai i anoanoia ki te nga tokorua mua, e tau kia mou a Eva i tona tu ngateitei rava e te kopae i ta Satani tuatua pikikaa. Ma te kino tikai, kua aere ua atu aia i te aati i ta te Atua ture. I muri mai, kua iki a Adamu no te piri atu ki tana vaine i roto i tana kaveinga tau kore. No reira te manako o nga tokorua i to raua uaorai anoano, pera katoa a Satani, kua patoi ratou i te Atua, i reira i tupu mai ei te maro anga o te tu ngateitei rava i te rangi.​—Genese 3:6.

Te Tuatau Anoanoia no te Akaoti i te au Maro Anga Puapinga

Penei kua anoanoia kia takoreia te aronga patoitoi e toru i reira rai. Inara kare ia e akaoti ma te taopenga i te au uianga tei tupu mai mei to ratou patoitoi anga. Ka rauka ainei i te tangata i te tutara iaia uaorai ma te manuia takake mai mei te Atua? E tika ainei no te Atua kia taumaro i te kauraro anga ki tona tu ngateitei rava? Te tamanako anga i te tu akono o te nga tokorua mua, ka iki ainei tetai ua atu tangata ma te karapii kore i te tavini i te Atua i to ratou uaorai anoano ma te tu rangatira​—noatu e me timataia e Satani? (Iobu 1:7-11; 2:4) Ka pou te tuatau no te pau i teia au uianga. Pera katoa ka pou te tuatau no te aro atu i te tuke o te reira patoitoi anga mua e te akatupu i te akakoroanga o te Atua te akariro anga i te enua ei parataito tei akakiia e tetai iti tangata ara kore. Te tapapa nei rai tatou i te tukuanga openga o teia au maro anga.

Ma te rotai ki tana ture, kua kopae mai te Atua iaia mei ia Adamu raua ko Eva te akameitaki anga no te noo anga e tuatau ua atu. Kare raua i tau akaou kia kapiti ki roto i te akatupu anga o tana akakoroanga maata. Inara, i mua ake ka mate ei ratou, kua akatikaia raua kia anau e kia akono i te uanga. E tikai, kare a Adamu raua ko Eva e oronga akaou i te oraanga ara kore e te oraora ki ta raua uanga. (Roma 5:12) Inara noatu e e au uki ara kore tei anauia mai i muri ake e kua tau kia mate, e maata te tuatau no te au tangata e manganui no te akaari e te tu ra ratou kiea no runga i te maro anga maata o te tu ngateitei rava.

Akatikaanga i te Maro Anga

Akapeea te Atua i te akatika anga i te au mea no runga i tona tu ngateitei rava? I tetai tu ra, te au uianga tei tupu mai i Edene ra kua pauia i teianei. E tauatini ua atu te au mataiti o te tuatua enua o te tangata nei tei akaari mai i te tika ma te mamae tikai e e pikikaa ta Satani akavare anga e e meitaki rava atu a Eva me ka noo ua aia ma te irinaki kore ki te Atua. Te tutara anga a te tangata tei kopae i te Atua kua riro ia ei poka anga tamou. Mei ta te Puka Tapu e tuatua ra: “Te tutara ra tetai tangata ki rungao i tetai, ei mate nona uaorai.”​—Koheleta 8:9.

I tetai tua, e manganui te au mea tei papaia i te au mataiti i aereia mai mei te ara anga a Adamu raua ko Eva. E manganui te au tangata tei akaari i tetai piri anga motu kore ki to Iehova tu ngateitei rava, te akaraanga puapinga rava atu koia “te Tamaiti a te tangata nei,” ko Iesu Mesia uaorai. (Mataio 20:18; Ebera 11:1–​12:3) Te aronga tei aru i te au ture a te Atua e te akatika i tona tu ngateitei rava kua kite e ko teia tikai te mataara meitaki rava atu. Kua kite ratou i te tuatua o te maseli: “Na Iehova te meitaki i apingaʼi te apinga, kare oki e kapiti katoaia mai te kino i te reira.” (Maseli 10:22) Te maata atu, akameitaki tikai ki te ravenga o te tuakaouanga, kare e roa atu ana ka kapiti mai ratou ki te akatupu anga i te akakoroanga maata a te Atua.​—Ioane 5:28, 29.

Kare a Iehova i akangaropoina ake i tana akakoroanga mua. Te aronga e kopae ra i tona tu ngateitei rava kare ia e akatikaia kia tutara ki runga nei i te enua no te tuatau e aereia maira, e te akamatakite maira te Puka Tapu e kare e roa atu ana ka rave te Atua te patoi ia ratou. Ka tatau tatou: “Kua akakiteia mai oki te riri o te Atua mei te rangi mai, i te au akono kore katoa i te Atua.” (Roma 1:18) Teia akaari anga i to te Atua riri e aere maira, ta te Puka Tapu e kapiki ra ko Aramakito, ka akaari ia ma te tapupu kore e te ora tikai ra aia. Te aronga tei ariki i tona tu ngateitei rava te ka ora i teia raveanga. “Na te aronga tiratiratu oki e noo i te enua, e te aronga apa kore te ka akatinamouia ki reira; Ka tipu keia ra te aronga kino i te enua nei, e te aronga rave ara ra, ka kiriti tumuia ïa.”​—Maseli 2:21, 22.

Te Maro Anga Maata e Koe

Te tamanako anga i teia au angaanga tika, tatakitai pouroa ia tatou​—mei ia Adamu rai e Eva—​kia rave i tetai ikianga na tatou. Ka tauta ainei tatou i te noo ma te irinaki kore ki te Atua? Me kore ka kauraro ainei tatou ki tona tu ngateitei rava? E akamaara, ko teia te maro anga puapinga rava atu ta tatou e aro atu nei i teia tuatau. E ko tetai atu au maro anga, e puapinga rai ia, inara tei runga ua te reira i toou oraanga i teianei. Ko teia ra no runga i te oraanga mutu kore. Taau pauanga ka tuku ka akatuke te reira i toou tuatau ope kore ki mua.

Akapeea i reira e raukaʼi ia koe te akaari e te ariki ra koe i to te Atua tu ngateitei rava? Na te apii aruaru anga i tana Tuatua, ko te Puka Tapu, e te kimianga no te akarongo i tona anoano ma te taokotai anga ki tetai atu au Kerititiano mou. (Zephania 2:2, 3) Me ka rave koe i te reira, ka rauka ia koe te manakonakoanga mataora o te kiteanga i te tupuanga o ta te Atua akakoroanga maata. Ka kite koe i te tika anga tikai o teia taputou manea: “E roa poto ake, e kare ua te tangata kino ra, . . . Kareka te aronga maru ra, ka noo ia i te enua, e ka rekareka ratou i te maata o te au ra.” (Salamo 37:10, 11) Mei teaa te manea no te katoatoa i te kauraro anga ki to te Atua tu ngateitei rava! Mei teaa ra ei tumu ririnui no te manako pakari tikai i teia mea puapinga rava atu!