Au Uianga a te Aronga Tatau
Eaa te tupuanga tei tupu mai tei tataia ra ia Exodo 4:24-26, e noai oki te oraanga tei o atu ki roto i te kino?
Te aere atura a Mose i tona oki anga ki Aiphiti ma tana vaine, ko Zipora, e tana nga tamaroa, ko Geresoma raua ko Eliezera, i te tupu mai anga te tupuanga tei aru maira: “E tae akera ki te ngai moe anga i te arataa ra, kua aravei mairā Iehova iaia, e kua umuumu mai iaia e ta. Kua rave iorā Zipora i te toka koi, peritome iora i tana tamaiti ra, e kua titiri ki raro ki tona pae vaevae, e kua tuatua akera, E tane toto koe naku e. Tuku atura aia iaia kia aere: no te peritome oki i tuatuaʼi aia e, E tane toto.” (Exodo 4:20, 24-26) Noatu e kare e taka meitaki ana teia irava e kare e rauka i te akapapuia mai no runga i te aite anga o te reira, te oronga maira te au Tuatua Tapu i etai akamarama anga no teia au irava nei.
Kare te papaanga i akakite taka meitaki mai ana e noai tikai te oraanga tei o atu ki roto i te kino. Inara, ka rauka ia tatou i te taopenga tau tikai e kare e no Mose te reira oraanga, koi rauka ai iaia tetai akauenga tu-Atua kia arataki i to Iseraela mei Aiphiti mai. (Exodo 3:10) Kare e tano i te akara anga e i tona aere atu anga i te akatupu i taua tukuanga angaanga ra kare e no Mose te oraanga tei akakokoia mai e te angera a te Atua. No reira no tetai o tana nga tamaroa ia oraanga. Te ture tei orongaia i mua ana kia Aberahama ra no runga i te peritome te akakite ra e: “Te tane peritome koreia ra, ko tei kore i peritomeia te kiri i mua i tona ra kopapa, ka tipu keia taua tangata ra i tona iti-tangata ra; kua atikau aia i taku koreromotu nei i reira.” (Genese 17:14) I te akaraanga kare a Mose i rave ana i te peritome i tana tamaroa, e no reira kua akakokoia te oraanga o te tamaiti e te angera a Iehova.
Noai te vaevae i amiriia atu i te tipu anga a Zipora i te kiri o tana tamaiti i te tauta anga kia akatikatika atu i te au mea ra? Na te angera a Iehova tei riro te mana i te tamate atu i te tamaiti peritome koreia. E mea tau, i reira, i akakoro ei a Zipora i te kiri kia amiri atu i te vaevae o te angera, i te oronga atu anga i te reira kiaia ei akapapu anga e kua ariki aia i te koreromotu.
E tuatua tuke tikai ta Zipora tuatuaanga “e tane toto koe naku.” Eaa ta te reira e akakite maira no runga iaia? Na te ariki anga aia i te au umuumuanga no te koreromotu peritome ra, kua akakite a Zipora i tetai pirianga koreromotu kia Iehova. Kua akaari mai te Ture koreromotu tei orongaia ki to Iseraela i tetai pirianga koreromotu, e ka manakoia atu a Iehova ei tane e ko tetai ake pupu ei vaine ra. (Ieremia 31:32) No reira, i te tuatua anga kia Iehova (na roto i tana angera komono ra) ei “tane toto,” i te akara anga kua akakite a Zipora i tona uaorai kauraroanga ki te au tuatua no taua koreromotu ra. Mei te mea rai e kua ariki aia i tetai turanga o te vaine i roto i te koreromotu peritome, ma te Atua ra ko Iehova ei tane ra. Noatu rai eaa te tu, no tana angaanga akapapu anga i te akarongo anga ki te umuumuanga a te Atua, kare te oraanga o tana tamaiti e o atu akaou ki roto i te kino.