Exodo

3 TIAKI aturā Mose i te mamoe a tona metua ongoai a Ietero taunga i Midiana ra: e kua taki atura aia i taua anana ra ki muri i te medebara, e tae atura ki te maunga o te Atua ra, ki Horeba.

2 Kua mama maira te Angela a Iehova kiaia i roto i te mura ai i rotopu i tetai pu ngangaere: e kua akara atura aia, e i na, te mura ua ra taua pu ngangaere i te ai, e kare taua pu ngangaere ra i pou.

3 Kua tuatua akerā Mose, E ariu atu na au, e akara i teianei apinga maata, i te mea i kore ei i ka taua pu ngangaere nei.

4 E kia akara mairā Iehova e, te ariu atura aia e akara, kua kapiki maira te Atua kiaia mei rotopu mai i taua pu ngangaere ra, kua tuatua maira, Mose, Mose. Kua karanga atura aia, Teia au.

5 Kua tuatua maira aia, Auraka koe e akavaitata mai i ko nei; ka kiriti to tamaka i to vaevae, ko te ngai oki taau e tu mai ana, e one tapu ïa.

6 E kua tuatua maira aia, Ko au te Atua o to metua na, te Atua o Aberahama, te Atua o Isaaka, e te Atua o Iakoba. Kua puroku iorā Mose i tona mata; i mataku oki aia kia akara atu i te Atua.

7 Kua tuatua mairā Iehova, Kua akara tikai au i te mate o toku iti-tangata i Aiphiti; e kua akarongo au i to ratou aue i to ratou au akaaiteite angaanga; kua kite oki au i to ratou mamae;

8 E i aere mai nei au ki raro nei e akaora ia ratou i te rima o to Aiphiti, e e arataki ke mai oki ia ratou i taua enua ra, ki tetai enua meitaki e te maata, e enua e taʼe a vai ua te u, e te meli; ki te ngai o te ngati Kanaana, e te ngati Heta, e te ngati Amori, e te Perizi, e te ngati Hevi, e te ngati Iebusi ra.

9 E teianei, i na, kua tae roa mai te aue o te tamariki a Iseraela ki ko nei iaku nei: e kua akara oki au i te tinai-mate anga ta to Aiphiti i tinai-mate ia ratou.

10 E aere mai koe, i tenana, e tono au ia koe kia Pharao ra, e naau e arataki mai i toku iti-tangata, i te tamariki a Iseraela, mei Aiphiti mai.

11 Kua karanga atura rā Mose ki te Atua, Koai oki au, ka tae ei au kia Pharao ra, e ka arataki mai ei au i te tamariki a Iseraela mei Aiphiti mai?

12 Kua tuatua maira aia, Ei vaitata katoa ïa au ia koe; e teia taau akairo, e kua tonokia koe e au: Kia ope te au tangata i te aratakiia mai e koe mei Aiphiti mai, ei runga tikai i teianei maunga kotou e akamori ei i te Atua.

13 Kua karanga aturā Mose ki te Atua, I na, kia tae au ki te tamariki a Iseraela ra, e kia karanga atu au kia ratou e, I tonokia mai au e te Atua o to kotou ai metua kia kotou nei; kia tuatua maira ratou kiaku e, Koai tona ingoa? e akapeea atu au kia ratou?

14 Kua tuatua maira te Atua kia Mose, TE VAI NEI AU, KO AU RAI E VAI NEI: e kua tuatua maira aia, Teia taau e karanga atu ki te tamariki a Iseraela, Na TE VAI NEI AU au i tono mai kia kotou nei.

15 Kua tuatua mairai oki te Atua kia Mose, E na ko atu koe ki te tamariki a Iseraela, Na te Atua o to kotou ai metua ra, ko Iehova, te Atua o Aberahama, te Atua o Isaaka, e te Atua o Iakoba, au i tono mai kia kotou nei: ko toku ïa ingoa e tuatau ua atu, e ko toku ïa akakite ki tera uki ki tera uki. 16 E aere koe, e akaputuputu i te aronga pakari o Iseraela ra, ka karanga atu ei kia ratou, Kua mama mai te Atua o to kotou ai metua ra ko Iehova kiaku, ko te Atua o Aberahama, no Isaaka, e no Iakoba ra, na ko maira, Ka tutaki tikai au ia kotou, e ta kotou rave kino angaia i Aiphiti:

17 E kua tuatua oki au e, E arataki au ia kotou mei roto mai i to kotou mate i Aiphiti ra, ki te enua o te ngati Kanaana, e te ngati Heta, e te ngati Amori, e te Perizi, e te ngati Hevi, e te ngati Iebusi, ki te enua e taʼe a vai ua te u e te meli ra.

18 E ka akarongo mai ratou i toou reo: e ka aere koe, ko koe e te aronga pakari o Iseraela, ki te ariki o Aiphiti ra, e na kotou e karanga atu kiaia e, Kua mama mai te Atua o te ngati Ebera ra, ko Iehova, kia matou nei: e teianei, teia ta matou tuatua kia koe, e tuku ake ana koe ia matou, kia aere ana ki te medebara, e kia po toru i te aerenga, kia apai matou e te atinga ki to matou Atua kia Iehova ra.

19 Kua kite ra au e, kare te ariki o Aiphiti e tuku ia kotou kia aere, ei rima ririnui ra.

20 E akatika ana au i toku rima, e ta ia Aiphiti i taku katoa nei au ravenga taka ke taku ka rave i rotopu iora: e i muri akera, e tuku ei aia ia kotou.

21 E ka kite aroaia mai taua aronga nei e to Aiphiti iaku: e kia aere kotou ra, kare ïa e aere ma te ngere:

22 Ka pati ra te au vaine katoa i tona uaorai tangata tupu, e i tei noo i tona ngutuare ra, i te apinga ario, e te apinga auro, e te kakau; ka tuku ei ki runga i ta kotou au tamariki tamaroa, e ki runga i ta kotou au tamaine; pou iora to Aiphiti ia kotou.