I Akakoromaki Marie a Iobu​—Ka Rauka ia Tatou!

“I na oki, te karanga nei tatou e, kua meitaki te aronga i tamou marie i te akakoromaki.”​—IAKOBO 5:11.

1. Eaa ta tetai Kerititiano ruaine i tuatua no tona au timataanga?

‘TE ARUARU nei te Tiaporo iaku! Te aite ra toku manako ngakau mei to Iobu ra!’ Ma taua au tuatua ra ta A. H. Macmillan akakite anga i tona au manako ngakau ki tetai oa piri vaitata i te opati maata o te Au Kite o Iehova ra. Kua akaoti te Taeake Macmillan i tana angaanga i te enua nei i te 89 ona mataiti ia Aukute 26, 1966 ra. Kua kite aia e ko te tutaki no te rave angaanga tiratiratu a te aronga Kerititiano akatainuia mei iaia ra e “aru oki ta ratou angaanga ia ratou.” (Apokalupo 14:13) E tika oki, ka rave ua atu ratou i te angaanga a Iehova na te tuakaou anga ki te oraanga mate kore ki te rangi ra. Kua rekareka tona au oa e kua rauka i te Taeake Macmillan taua tutaki ra. Inara, i tona nga mataiti akaopeanga ki runga i te enua nei, kua tu aia i te au timataanga tuke tuke, kapiti katoa te au manamanata no te oraanga maki tei akariro ra kia maata atu tona kite i ta Satani au timataanga kia aati i tona tiratiratu ki te Atua.

2, 3. Koai a Iobu ra?

² I te tuatua anga te Taeake Macmillan e kua manako ngakau aia mei ia Iobu rai, te taiku ra aia ki tetai tangata tei akakoromaki marie ana i te au timataanga maata no te akarongo. Kua noo a Iobu ki “te enua ra ko Uza,” penei i te pae tokerau o Arapia. E uanga no te tamaiti a Noa koia a Sema, e tangata akamori aia ia Iehova ra. I te akara anga kua tupu to Iobu au timataanga i te tuatau i rotopu i te matenga o Iosepha e te tuatau i akapapu ei a Mose i tona uaorai tu tiratiratu. I taua tuatau ra kare tetai tangata ke i runga i te enua nei i aite atu kia Iobu i te tu akono i te Atua ra. Kua manako a Iehova ia Iobu ei tangata apa kore, tiratiratu, ei tangata mataku i te Atua ra.​—Iobu 1:1, 8.

³ Ei tangata “maata rava atura aia, i to te itinga o te rā katoa ra,” e manganui to Iobu au tavini, e ko tana au manu ora e 11,500 katoa. Inara ko te au apinga vaerua te au mea puapinga maata atu kiaia. Mei te au metua akono i te Atua ra i teia tuatau nei, penei kua apii a Iobu i tana nga tamaroa e itu e nga tamaine e toru no runga ia Iehova. Noatu rai i muri ake i to ratou kore anga e noo mai i tona kainga, kua akono aia ei taunga ngutuare tangata na te orongaanga i te au atinga no ratou, mei te mea e kua rave ratou i te ara.​—Iobu 1:2-5.

4. (a) Eaa ra i tau ei kia akamanako te au Kerititiano takinga kinoia ra i te tangata ko Iobu? (e) No runga ia Iobu, eaa te au uianga te ka akamanakoia e tatou?

⁴ Ko Iobu tetai te ka tau te au Kerititiano takinga kinoia ra kia akamanako atu ei akamaroiroi ia ratou uaorai no te tamou marie i te akakoromaki. “I na oki,” ta te pipi ko Iakobo i tata, “te karanga nei tatou e, kua meitaki te aronga i tamou marie i te akakoromaki. Kua kite kotou i te akakoromaki o Iobu ra, e kua kite oki kotou i ta [Iehova] i rave i te openga ra; e kua ki [a Iehova] i te aroa e te takinga-meitaki maata.” (Iakobo 5:11) Mei ia Iobu rai, te anoano ra te au pipi akatainuia a Iesu e te “urupu maata” o teia tuatau nei i te tamou marie i te akakoromaki kia autu i te akono anga atu i te au timataanga o te akarongo. (Apokalupo 7:1-9) No reira, eaa te au timataanga ta Iobu i akakoromaki marie? Eaa ra i tupu ei te reira? E akapeea tatou e puapingaiaʼi mei te au mea i tupu ra kiaia?

Tetai Maro Anga Veravera

5. Tei kite koreia ra e Iobu, eaa te tupu ra ki te rangi?

⁵ Kare a Iobu i kite, e maro anga maata tetai te ka akatuia mai i te rangi ra. I tetai ra “kia aere mai te au tamariki a te Atua e akakite ia ratou uaorai kia Iehova.” (Iobu 1:6) I reira te Tamaiti anau tai a te Atua ra, koia te Logo. (Ioane 1:1-3) I reira katoa oki te au angera tuatua tika e te “tamariki [angera akarongo kore] a te Atua ra.” (Genese 6:1-3) I reira a Satani, no te mea kare tona uriia mai anga mei te rangi e raveia kia tae roa ki muri ake i te akanoo angaia te Patireia i te 1914. (Apokalupo 12:1-12) I to Iobu ra tuatau, kua akatu mai a Satani i tetai maro anga veravera. Kua vaitata aia i te akatupu i te ekoko anga no te tika o to Iehova ra ngateitei i rungao i Tana au mea ora ravarai.

6. Eaa ta Satani i tauta i te rave, e akapeea tana akakino anga ia Iehova ra?

⁶ “Mei ea mai koe?” ta Iehova i ui atu. Kua pau maira Satani: “Mei te oriori anga i te enua nei, e te aaere ua anga i reira.” (Iobu 1:7) No te kimi aia i tetai tangata ei apuku nana. (1 Petero 5:8, 9) Na te aatianga i te tu tiratiratu o te aronga tataki tai te tavini ra ia Iehova, ka tauta a Satani i te akapapu e kare e tangata e akarongo meitaki i te Atua ra no te aroa. I te tuatuaanga i taua maro anga ra, kua ui atura Iehova kia Satani: “Kua akamaara ainei koe i toku tavini ia Iobu, kare oki ona e aite i runga i te enua nei, e tangata apa kore e te tiratiratu, i te mataku anga i te Atua, e te akaruke anga i te kino?” (Iobu 1:8) Kua aravei atu a Iobu i te au turanga tu-Atua tei akamanako atu i tona au tu apa ua. (Salamo 103:10-14) Inara kua pau viviki atura Satani: “E mataku oko kore ua ainei a Iobu i te Atua? Kare ainei tei koropiniia aia e koe, e tona ra are, e tana katoa ra au mea ravarai e pini ua ake? kua akameitaki koe i ta tona rima i rave ra, e kua maata tana apinga i te enua nei.” (Iobu 1:9, 10) Kua tuatua akakino atura te Tiaporo ia Iehova na te taikuanga e kare e tangata e aroa e e akamori Iaia no Tona tu mari ra te tutaki ra Aia i te au mea ora kia tavini atu Iaia. Kua akakite a Satani e te tavini ra a Iobu i te Atua no te noinoi apinga, kare e no te aroa.

Kua Maro Atura a Satani!

7. Na teea mataara ta te Tiaporo ra akaaoanga i te Atua, e akapeea ta Iehova ra pau anga atu?

⁷ Kua tuatua atura Satani: “Ka akatika ua atura koe i to rima i tenana, ka rave atu ei i tana e kia ope rava, kare aia e kore i te akakino ia koe ki mua i to mata.” Ka akapeea ta te Atua ra pau anga ki te reira akaaoanga akakino? “I na,” i na Iehova ei, “ko tana katoa ra, tei to rima ïa, auraka ra to rima e rave ua atu iaia uaorai.” I tuatua ana te Tiaporo e kua akameitakiia ta Iobu au apinga katoa, kua tupu kia tini, e kua paruruia. Ka akatika ua te Atua kia mamae a Iobu, inara auraka tona kopapa kia arapakiia atu. I te manako anga ketaketa kia rave ua atu i te kino, kua aere atura Satani mei te akaputuputu anga.​—Iobu 1:11, 12.

8. (a) Eaa te ngere anga i te au apinga tei tupu kia Iobu ra? (e) Eaa te tuatua mou tikai no “te ai a te Atua” ra?

⁸ Kare i roa ana, kua akamata te rave kino Satani ra. Kua oronga atu tetai tavini o Iobu i teia nuti kino kiaia: “Te arote ra te au puakatoro, e te kaikai ra te au asini i vaitatao ia ratou: Kua noni ua maira te ngati Seba ia ratou, e kua apai keia; e kua taia e ratou te au tavini ki te mata koke ra.” (Iobu 1:13-15) Kua apai keia te paruru tei takapini i te au apinga a Iobu ra. I muri ua akera, kua tuku tikaia maira te mana temoni, e kua ripoti maira tetai atu tavini: “Kua topa maira te ai a te Atua no te rangi mai, ka atura te au mamoe, e te au tavini, e kua pou iora ratou.” (Iobu 1:16) Mei teaa ra te tu tiaporo i te reira i te akariro e i te akara anga na te Atua taua tumatetenga ra ki runga i tona uaorai tavini! I te mea e no te rangi maira te uira, ka ngoie ua te akaapa anga ia Iehova, inara ko taua ai ra no te temoni tona tumu anga mai.

9. Akapeea te akatupu anga a te kino i te pae o te apinga ki runga i to Iobu pirianga ma te Atua ra?

⁹ I ta Satani rave ua atu anga i te takinga kinoanga, kua ripotiia maira e tetai atu tavini e kua noniia e te au Kaledea te au kamera a Iobu e kua ta atu i te katoa anga o te au tavini. (Iobu 1:17) Noatu rai e kua tupu te takino anga i te au apinga a Iobu ra, kare teia i akakore atu i tona pirianga ma te Atua. Ka rauka ainei ia koe i te akakoromaki marie i te ngere maata o te apinga ma te kore e aati i toou tiratiratu kia Iehova?

Kua Rokoia Maira e Tetai Tumatetenga Maata Atu

10, 11. (a) Eaa tei tupu ki nga tamariki okotai ngauru a Iobu ra? (e) I muri ake i te matenga tumatetenga o nga tamariki a Iobu, i akapeea tona manako no Iehova?

¹⁰ Kare te Tiaporo i akaoti ake i te takinga kino ia Iobu. Kua ripoti akaou maira tetai atu tavini: “Te kaikai ra to au tamariki tamaroa, e to au tamaine, e te inu ra i te wina, i roto i te are o to ratou tuakana: E i na, ko te matangi viviki maira na runga mai i te medebara, mou maira i nga poo e a o te are ra, inga iora ki runga i taua au tangata ou ra, e mate iora ratou; e ko au anake uaorai tei ora mai nei e akakite kia koe.” (Iobu 1:18, 19) Penei ka tuatua te aronga kare i kite i te tika e ko taua tumatetenga tei tupu maira na te matangi ‘e angaanga ia na te Atua.’ Inara, kua akatuki atura te mana temoni i tetai ngai paruparu tikai o te manako ngakau o Iobu.

¹¹ I te mamae anga te ngakau, ‘kua aeae a Iobu i tona kakau, e kua varu i tona upoko, e kua akainga iora ki raro i te one, e kua akamori.’ Inara, e akarongo atu ki tana au tuatua. “Na Iehova i oronga mai, e na Iehova i rave mai; kia akameitakiia te ingoa o Iehova.” Te kapiti katoa maira te tataanga: “Kare a Iobu i araia i taua au mea katoa nei, e kare oki i akaapa i te Atua.” (Iobu 1:20-22) Kua ruti akaou a Satani. Akapeea me ka kite tatou i te tangi anga e te mamae ngakau ei au tavini no te Atua? Na te akamori anga noinoi kore kia Iehova e te irinaki iaia ka rauka ia tatou te akakoromaki marie ei aronga tamou i te tu tiratiratu, mei ta Iobu i rave ra. Ka rauka i te aronga tei akatainuia ra e pera katoa to ratou au oa tei manakonako ra kia noo ki te enua nei, te pumaana e te maroiroi mei teia tataanga no to Iobu ra akakoromaki marie anga.

Kua Veravera Atu Taua Maro Anga

12, 13. I tetai atu akaputuputu anga ki te rangi, eaa ta Satani i pati, e akapeea ta te Atua ra pauanga atu?

¹² Kare i roa kua akapapa akaou a Iehova i tetai atu akaputuputu anga ki roto i te au paepae i te rangi ra. Kua riro mai a Iobu ei tangata tamariki kore, ei tangata putaua, mei te mea rai e na te Atua i papa, inara kare i takake tona tiratiratu. Tera ra, kare a Satani i akatika e ko tana au akaapa anga i te Atua e ia Iobu e pikikaa ua. I teianei kua vaitata ‘te au tamariki a te Atua ra’ i te akarongorongo atu i te taumaro anga e te pau taumaro anga ia Iehova e akapapa atura i te Tiaporo kia apai mai i taua maro anga ra kia tae ki te akaoti anga.

¹³ I te patianga ia Satani kia tuatua, kua ui atura Iehova: “Mei ea mai koe?” Te pauanga? “Mei te oriori anga i te enua nei, e te aaere ua anga i reira.” Kua akaariu akaou atura Iehova i te manako anga ki tona tavini apa kore, tu tika, e te mataku anga i te Atua kia Iobu, tei vai tamou ra i te tu ngaueue kore i tona tiratiratu. Kua pau maira te Tiaporo: “Ei kiri no te kiri, e riro oki ta te tangata katoa ra ei oko i tona ora. Kia akatika ua atura koe i to rima i tenana, ka rave atu ei i tona ivi e tona kiko, kare aia e kore i te akakino ia koe ki mua i to mata.” E kua karanga atura i te Atua: “I na, tei to rima ïa aia; auraka ra koe e rave i tona ora.” (Iobu 2:2-6) I te akakiteanga e kare ake rai a Iehova i akakore atu i tana au paruru katoa, kua taiku atura Satani kia akatikaia atu te rima ki te ivi e te kiko o Iobu ra. Kare te Tiaporo e akatikaia kia tamate atu ia Iobu; inara kua kite a Satani e ka mamae aia i te maki o te kopapa e ka akariro te reira kia akara anga e te mamae ra aia i te akautunga mei ko mai i te Atua ra no te au ara muna ra.

14. Eaa ta Satani ra papa anga ia Iobu, e eaa ra i kore ei i rauka i tetai tangata i te akaora iaia?

¹⁴ I te akaruke anga i taua akaputuputu anga ra, kua akamata atura Satani ma te rekareka i te rave i te kino. Kua papa atura aia ia Iobu ki “te ee mamae, mei tona tapuae e tae ua atu ki tona take upoko.” Mei teaa ra te tu kino ta Iobu i akakoromaki marie iaia e noo ra i roto i te reu ai e te raraku anga iaia uaorai i tetai vaanga kapu karaea! (Iobu 2:7, 8) Kare e rauka i tetai taote tangata nei i te apai mai i te ora kia meitaki teia maki mamae kino, viivii, e te taakaakaanga, no te mea na te mana Satani i akatupu i te reira. Na Iehova anake ua e raukaʼi i te rapakau ia Iobu. Me ko koe tetai tavini o te Atua te makiia ra, auraka e ngaropoina e ka rauka i te Atua i te tauturu ia koe kia akakoromaki marie e ka rauka iaia te oronga atu kia koe i te oraanga ki roto i tetai ao ou kare e maki.​—Salamo 41:1-3; Isaia 33:24.

15. Eaa ta te vaine a Iobu i raurau atu iaia kia rave, e eaa tana pau anga?

¹⁵ I te openga ra, kua tuatua atu te vaine a Iobu: “Te tāpu ua nei koe i taau [“tiratiratu,” NW] ka akakino atu i te Atua, ka mate atu ei.” Te “tiratiratu” te akataka maira i te akamori anga apa kore, e penei kua tuatua aviri ua aia kia akakino atu a Iobu i te Atua ra. Inara kua pau atura aia: “Te tuatua nei koe mei tetai o te au vaine neneva e tuatua ra. E āriki ainei tatou i te meitaki mei ko mai i te Atua, e auraka tatou e āriki katoa i te kino?” Noatu rai ko teia ravenga a Satani kare i tupu, no te mea kua tuatuaia mai kia tatou: “Kare rai te vaa o Iobu i ara i teia katoa nei au mea.” (Iobu 2:9, 10) Penei ka tuatua mai etai au mema patoi o te ngutuare tangata e te akaroiroi neneva ua ra tatou ia tatou uaorai i te au angaanga Kerititiano e ka raurau mai ia tatou kia akaruke i te Atua ra ko Iehova. Mei ia Iobu rai, ka rauka ia tatou i te akakoromaki marie i te reira timataanga no te mea e aroa to tatou ia Iehova e te anoano ra i te akapaapaa i tona ingoa tapu.​—Salamo 145:1, 2; Ebera 13:15.

E Toru Aronga Akameamea Pikikaa Ua

16. Koai ma tei aere maira, tei manakoia ra e kia akapumaana atu ia Iobu, inara i akapeea ta Satani akono anga ia ratou ra?

¹⁶ I roto i tei riro maira e ko tetai atu ravenga Satani, kua aere mai e toru “nga oa,” tei manakoia ra e kia akapumaana atu ia Iobu. Ko Eliphaza tetai, penei e uanga no Aberahama na roto mai ia Esau. I te mea e na Eliphaza i akamata te tuatuaanga, kare e ekoko anga e koia tei pakari roa atu i o ratou ra. I reira, katoa oki, a Biladada, e uanga no te ngati Sua, tetai tamaroa a Aberahama na Ketura. Ko te toru o taua nga tangata ra ko Zophara, tei kapikiia ia Naama ei akataka i tona kopu tangata me kare i tona ngai noo anga, penei i te pae tokerau o te opunga ra o Arapia. (Iobu 2:11; Genese 25:1, 2; 36:4, 11) Mei te aronga te tamata ra kia akaruke te Au Kite o Iehova i te Atua i teia tuatau nei, kua rave aratakiia teia aronga toko toru e Satani i te tauta anga kia akatika a Iobu e kua apa aia ki te au akaapa anga pikikaa ra e kia aati oki i tona tu tiratiratu.

17. Eaa ta aua nga tangata e toru i aere atura i te rave, e eaa ta ratou kare i rave no nga ra e itu e nga po e itu katoa ra?

¹⁷ Kua akaari mai teia aronga toko toru i tetai akakite anga maata o te tangi na te aueanga, te aeaeanga i to ratou au kakau, e te titirianga i te one pueu ki runga i to ratou au upoko. Inara kua noonoo ua atu ratou i reira ma Iobu e itu ra e itu po kare e tuatuaanga i tetai tuatua akapumaana! (Iobu 2:12, 13; Luka 18:10-14) Ko teia aronga e toru e akameamea pikikaa ua kua ngere takiri i te pae vaerua e kare a ratou tuatua akapumaanaanga no Iehova e tana au taputou oki. Inara, kua akakite mai ratou i te au manako tarevake e kua akapapa kia tuku atu i te reira ki runga ia Iobu i muri ua ake i ta ratou peu akaari anga pikikaa i te mamae ngakau. Ko tetai mea meitaki kia manakoia, i mua ua ake i te openga o taua itu ra noo muteki ra, kua noo maira te tangata ou ko Eliu i te ngai vaitata ua kia raukaʼi i te akarongorongo mai.

18. Eaa ra a Iobu i kimi ei i te au i roto i te mate?

¹⁸ I te openga kua akaoti maira Iobu i taua muteki anga ra. I te kore anga e akapumaana mei ko mai i taua nga tangata e toru tei aere maira kiaia, kua akakino iora aia i tona ra i anau ei e kua kimi tona manako eaa ra tona oraanga kino i akaroaiaʼi. Kua kimi aia i te au i roto i te mate, kare ua aia i manako e ka rauka akaou iaia te rekareka tikai i mua ake ka mate ei aia ra, i te mea e i teianei kare ua ana apinga, e tu tangi ua, e te maki kino. Inara kare te Atua i tuku kia mate atu a Iobu ra.​—Iobu 3:1-26.

Kua Maro Atura Nga Tangata Akaapa ia Iobu

19. I teea au tu ta Eliphaza akaapa pikikaa anga ia Iobu ra?

¹⁹ Ko Eliphaza tei tuatua mua i taua nga tuatua anga e toru ra no te taumaro anga tei timata maata atura i to Iobu tiratiratu. I tana tuatua anga mua, kua ui a Eliphaza: “Kiea te aronga tuatua-tika i te tipu ke angaia?” Kua taopenga aia e kua rave a Iobu i tetai apinga kino i tupu mai ei ta te Atua ra akautunga. (Iobu, nga pene 4, 5) I te rua o tana tuatua anga, kua akaapa atura Eliphaza i to Iobu tu pakari e kua ui atura: “Eaa taau i kite, e ko matou o nei te kite kore?” Te taiku atura Eliphaza i te manako e te tauta ra a Iobu i te akaari e e teitei atu aia i te Mana Katoatoa ra. I te akaoti anga i te rua o tana maro anga, kua akataka atura aia e kua apa a Iobu i te patoi i te akonoanga mou, i te tutaki, e te akavare anga. (Iobu, pene 15) I tana tuatua anga openga, kua akaapa pikikaa atura Eliphaza ia Iobu i te au rave kino e manganui​—te morimori, te kore e oronga i te kai e te vai i te aronga e kaki ra, e te takinga kino anga i te au vaine takaua e te aronga matiroeroe.​—Iobu, pene 22.

20. Eaa te tu o ta Biladada maro anga ki runga ia Iobu ra?

²⁰ I te rave anga i te tuanga rua o te tuatua anga i te toru tuanga o te taumaro anga ra, kua aru ua atu a Biladada i te tumu manako tei akanooia maira e Eliphaza. E poto mai ta Biladada nga tuatua anga inara e maata te kakatianga. Kua akaapa katoa aia i te au tamariki a Iobu i te raveanga tarevake e no reira kua tau kia mate. Ma te manakoanga tarevake ra, kua taiku mai aia i teia akatutu anga: Mei te raupo e te mauku ka mae e ka mate ma te kore e vai, mei te reira katoa “te aronga ravarai i akangaropoina i te Atua.” E tika te reira tuatua anga, inara kare te reira i tau kia Iobu. (Iobu, pene 8) Kua akataka mai a Biladada i to Iobu ra au mamae anga mei tei tupu ra ki te aronga rave kino. (Iobu, pene 18) I te toru o tana tuatua anga poto ua ra, kua taumaro maira Biladada e ko te tangata “e iroiro” e “e toke,” e no reira e mea viivii ki mua i te Atua.​—Iobu, pene 25; akaaite ia NW.

21. Eaa ta Saphira i akaapa atu ia Iobu ra?

²¹ Ko Zophara te toru o te tangata tei tuatua ra i roto i te taumaro anga. I te maata anga o te taime, ko tona manako kua aru i to Eliphaza raua ko Biladada. Kua akaapa a Zophara ia Iobu no te rave kino e kua raurau atu iaia kia akaruke i tana au ravenga ara. (Iobu, nga pene 11, 20) I muri ake i te rua o tana tuanga tuatua kua akaoti aia i te tuatuaanga. Kare ana apinga ei kapiti atu ki te toru o te tuanga. Inara, i taua taumaro anga roa ra, kua pau maroiroi atura Iobu i aua nga tangata i akaapa mai iaia ra. Ei akatauanga, i tetai ngai kua tuatua aia e: “E aronga akapumaana manamanata anake kotou na. Ka ope ainei te au tuatua tarevakaua?”​—Iobu 16:2, 3.

Ka Rauka ia Tatou te Akakoromaki Marie

22, 23. (a) Mei tei tupu ia Iobu ra, penei ka akapeea te Tiaporo i te tamataanga kia aati i to tatou tiratiratu ki te Atua ra ko Iehova? (e) Noatu rai e kua akakoromaki marie a Iobu i te au timataanga tuke tuke, penei eaa ta tatou ka ui no runga i tona tu akono?

²² Mei ia Iobu rai, penei ka aro atu tatou e tere atu i te okotai timataanga i te taime okotai ra, e penei ka taangaanga a Satani i te tu akakore i te maroiroi me kare i etai atu au tu i tana au tauta anga kia aati i to tatou tiratiratu. Penei ka tamata aia kia patoi atu tatou ia Iehova me te tupu maira kia tatou te au taitaia no te pae o te puapinga. Me ka mate tetai ta tatou i akaperepere ra me kare ka tupu mai kia tatou te maki, penei ka tamata a Satani kia akavare ia tatou kia akaapa atu i te Atua ra. Mei nga oa o Iobu rai, penei ka akaapa pikikaa ua mai tetai ia tatou. Mei ta te Taeake Macmillan i akakite maira, penei ‘te aruaru ra’ Satani ia tatou, inara ka rauka ia tatou te akakoromaki marie.

²³ Mei ta tatou rai i kite mai ana, kua akakoromaki marie a Iobu i tona au timataanga tuke tuke ra. Inara, i rauka ua ainei iaia te akakoromakianga marie? I tupu ainei kiaia tetai ngakau paruparu? E akara tatou e me kua ngere tikai a Iobu i te manakonako anga katoa ra.

Akapeea Koe me Pau?

◻ Eaa te maro anga maata ta Satani i akatu mai i te tuatau ia Iobu ra?

◻ Na teea tu to Iobu ra timata angaia kia tae roa ki te kotinga mamao ra?

◻ Eaa ta “nga oa” e toru o Iobu i akaapa atura iaia?

◻ Mei ia Iobu rai, ka akapeea a Satani i te tauta anga kia aati i to tatou tiratiratu kia Iehova ra?

[Tutu i te kapi 10]

Ko A. H. Macmillan