Tutaki o Iobu​—E Tumu no te Manakonako Anga

“Akameitaki roa akerā Iehova i to Iobu openga i to tona muatangana.”​—IOBU 42:12.

1. Eaa ta Iehova e rave nei no tona au tangata, noatu rai me ka akaparuparu maata mai te au timataanga ia ratou ra?

KO IEHOVA “tei tutaki mai i te aronga i kimi tikai iaia.” (Ebera 11:6) Te akakeu katoa ra aia i tona au tangata akamori kia akakitekite maroiroi, noatu rai me kua akariro te au timataanga ia ratou kia apikepike mei te aronga mate rai. (Iobu 26:5; Apokalupo 11:3, 7, 11) Kua tika te reira i te tu o Iobu i mamae ra. Noatu e kua akakinoia e nga tangata akapumaana pikikaa e toru ra, kare aia i akamutekiia e te mataku i te tangata. Kareka ra, kua akakitekite ua aia ma te mataku kore.

2. Noatu rai e kua mamae ratou i te takinga kino anga e te tu ngata, akapeea to te Au Kite o Iehova ra aere mai anga ki vao i to ratou au timataanga?

² E manganui te Au Kite o Iehova i teia tuatau kua mamae i taua tu takinga kino anga maata ra e te tu ngata e kua riro ratou kia vaitata i te mate. (2 Korinetia 11:23) Inara, mei ia Iobu rai, kua akaari ratou i te aroa no te Atua e kua rave i te tuatua tika. (Ezekiela 14:14, 20) Kua ora katoa mai ratou i to ratou au timataanga e kua manako papu i te akamareka atu ia Iehova ra, kua akamaroiroiia kia akakitekite ma te mataku kore, e kua ki i te manakonako anga tika tikai.

Kua Oronga Iobu i te Akakitekite Anga Mataku Kore

3. Eaa te tu o te akakite anga ta Iobu i oronga i tana tuatua anga openga ra?

³ I tana tuatua openga, kua oronga a Iobu i tetai akakitekite anga maata atu i tana i rave i mua ana. Kua akamuteki rava aia i tona nga tangata akapumaana pikikaa. Ma te aviri kakati anga, kua na ko atura aia: “Ko te tauturu naau i te tangata paruparu e.” (Iobu 26:2) Kua akateitei atura Iobu ia Iehova, tei akauta ra tona mana i te enua ki runga i te kore i te reva ra e kua kou i te vai i roto i te tumurangi ki runga ake i te enua nei. (Iobu 26:7-9) Inara, kua tuatua ua a Iobu e ko taua au mea umere ra ‘ko tetai pae ua ia o to Iehova ra au aerenga.’​—Iobu 26:14.

4. Eaa ta Iobu i tuatua no te tiratiratu, e eaa i raukaʼi iaia i te tuatua nona uaorai na te reira tu?

⁴ No te papu i tona apa kore, kua karanga a Iobu: “E mate ua atu au, kare rai au e pa i te tuatua-tika naku ra.” (Iobu 27:5) Kia tuke i te au akaapa anga tei tuatuaia nona ra, kare aia i rave i tetai apinga tei tau ra kia tupu te au apinga i rokoia aia ra. Kua kite a Iobu e kare a Iehova e akarongo mai i te au pure a te aronga akaruke i te akarongo mou ra mari ra ka tutaki aia i te aronga e tamou ra i te tiratiratu. Penei ka tau teia kia akamaaraara mai ia tatou e kare e roa atu ana ka uriia atu e te uriia o Aramakito te aronga rave kino mei to ratou ngai mana, e kare ratou e ora i te rima akapou o te Atua ra. Kia tae roa ki te reira ra, ka aaere te au tangata o Iehova i roto i to ratou tiratiratu.​—Iobu 27:11-23.

5. Akapeea ta Iobu akataka anga i te pakari mou ra?

⁵ E tamanako ana i nga tangata pakari no teianei ao e toru ra i te akarongorongo anga i ta Iobu akakite anga e ko te tangata ka taangaanga i tona tu karape kia kitea te auro, e te ario, e etai atu au apinga o te enua e i roto i te tai. Kua karanga aia, “kua maata oki to te pakari meitaki i to te penini.” (Iobu 28:18) Kare oki i rauka i aua nga tangata akapumaana pikikaa ia Iobu ra i te oko i te pakari mou. Ko tona tumu ko Tei Anga mai i te matangi, te ua, te uira, e te mangungu. E tika rava, ‘ko te mataku tapu ia Iehova ra, ko te pakari ïa, e te akaruke i te kino ra, ko te kite ïa.’​—Iobu 28:28.

6. Eaa ra a Iobu i tuatuaʼi no tona oraanga mua ra?

⁶ Noatu rai tona au mamaeanga, kare a Iobu i akamutu i te tavinianga ia Iehova. Kare aia i ariu ke atu mei tei Teitei Rava, kua anoano teia tangata tiratiratu i tona tu mua ana kia vai “ei te muna a te Atua.” (Iobu 29:4) Kare a Iobu i akateitei i tana taiku anga i tona ‘akaora anga i te aronga takinga kinoia, te akakakau anga iaia uaorai ma te tuatua-tika, e metua tikai ki te aronga putaua.’ (Iobu 29:12-16) Kareka ra, kua taiku aia i te au tumu tikai o tona oraanga ei tavini tiratiratu no Iehova ra. Kua patu ainei koe i tetai tu oraanga meitaki mei te reira ra? Inara, te akaari atea katoa maira Iobu i te pikikaa o te au akaapa anga tei tuatuaia ra e nga tangata akameamea pikikaa e toru ra.

7. Eaa to Iobu tu ei peretana i mua ana?

⁷ Kua kataia a Iobu e te au tangata ou ‘kare ra to ratou au metua e tau iaia kia akanooia i roto i te au puakaaoa o tana anana ra.’ Kua aviriia aia e kua tutuaia atura. Noatu e kua takinga kino ravaia aia, kare a Iobu i akamanakoia atu. (Iobu 30:1, 10, 30) No tona akamori tikai ia Iehova, inara e akava ngakau ma tona e kua rauka iaia te tuatua: “E akateiaa aia iaku ki roto i te arite tikai, kia kite te Atua i te pikikaa kore noku ra.” (Iobu 31:6) Kare a Iobu i te tangata akaturi me kare i te tangata manako i te au ravenga kino, e kare aia i kore i te tauturu i tei ngere ra. Noatu rai e tangata apinganui aia, kare ra aia i irinaki i te au apinga. Pera katoa oki, kare a Iobu i rave i te akamori itoro na te akamori anga i te au apinga ora kore mei te marama rai. (Iobu 31:26-28) I te irinakianga i te Atua ra, kua akanoo aia i te akatauanga meitaki ei tangata tamou marie i te tiratiratu. Noatu rai tona au mamaeanga katoatoa e te kapiti anga mai o nga tangata akapumaana pikikaa ra, kua akono a Iobu i tetai paruru anga karape e kua oronga i tetai akakitekite anga meitaki roa. I te tae anga tana au tuatua ki te openga, kua akara atura aia ki te Atua ei Akava nona e ei Tutaki iaia ra.​—Iobu 31:5-40.

Kua Tuatua a Eliu

8. Koai a Eliu, e i akapeea aia i te akaari anga i te akangateitei e te maroiroi?

⁸ I te pae maira ko tetai tangata ou ko Eliu, e uanga na te tamaiti a Nahora ko Buza e no reira e kopu tangata no te oa o Iehova koia a Aberahama. (Isaia 41:8) Kua akaari maira Eliu i te akangateitei anga i te aronga ruaine na te akarongoanga atu i nga tua e rua o taua taumaro anga ra. Inara, kua tuatua maroiroi ua aia i te au tumu tei tarevake ratou. Ei akatauanga, kua mura atura tona riri kia Iobu “no te mea kua akatika aia iaia uaorai kare te Atua.” E maata oki to Eliu riri i nga tangata akapumaana pikikaa ra. I te akara anga i ta ratou au tuatua kua akateitei i te Atua inara kua akakino tikai iaia na te turuanga i to Satani tua o taua maroanga ra. Kua ‘ki i te tuatua’ e kua akakeuia e te vaerua tapu, e kite a Eliu no Iehova tei kore i akara i te tu o te tangata ra.​—Iobu 32:2, 18, 21.

9. I akapeea ta Eliu taiku anga i te manako no te akaora anga no Iobu ra?

⁹ Kua maata atu to Iobu manako ma te akatika anga iaia uaorai i tona manako no te Atua. Ko te tika ra, kua maro atu aia i te Atua. Inara, i te vaitata anga to Iobu ra meta i te mate, kua akakiteia mai tetai manako akaora anga. Naea ra? Kua akakeuia a Eliu kia tuatua e kua akaperepere mai a Iehova ia Iobu ma teia tuatua anga: “E akaora iaia auraka kia tae ki te vaarua: kua kiteia e au te tapokiangaara. E maata oki te poria o tona ra kopapa i to te tamariki ra: e oki aia ki te au rā o tona ou anga ra.”​—Iobu 33:24, 25.

10. Eaa te atea no te timata anga ia Iobu, inara eaa ta tatou ka papu i te manako anga ia 1 Korinetia 10:13?

¹⁰ Kua tuatua akatikatika atura Eliu ia Iobu no te tuatuaanga e kare a te tangata nei e puapinga i te akono i te Atua na te tamouanga i te tiratiratu. Kua na ko atura Eliu: “Kia atea ke atu te tuatua kino i te Atua; e te ara i te Mana katoatoa. E tutaki atu oki aia i ta te tangata ra angaanga.” Kua rave tau kore a Iobu i tana akaketaketaanga i tona uaorai tuatua tika, inara kua rave aia i te reira ma te kore i rava te pakari e te kite oonu. Kua tuatua katoa atu a Eliu: “Kia timata tikaia ta Iobu e ope rava akera, koia i akatika mai i te tuatua a te au tangata kino.” (Iobu 34:10, 11, 35, 36) Mei te reira katoa, ka rauka to tatou akarongo e te tiratiratu kia akapapuia me ‘timata tikaia tatou e ope rava akera’ na roto i tetai au mataara. Inara, kare to tatou Metua i te rangi ra e tuku ia tatou kia timataia kia tere atu i te ka rauka ia tatou i te akakoromaki.​—1 Korinetia 10:13.

11. Me timata pakariia, eaa ta tatou ka tau kia maaraara?

¹¹ I ta Eliu ra tuatua ua anga, kua akaari akaou mai aia e kua maata roa ta Iobu ra akaketaketa anga i tona uaorai tuatua tika. Ka tau kia akaariuia atu te manako ki runga i Tei Anga Meitaki mai ia tatou. (Iobu 35:2, 6, 10) “Kare [te Atua] e akaora i te aronga kino: e tuku maira aia i te tika ki te [“aronga takinga kinoia,” NW],” ta Eliu i tuatua mai. (Iobu 36:6) Kare e rauka i tetai i te akaapa i ta te Atua mataara e ka tuatuaʼi e kua rave aia i te tuatua tika kore. E maata atu tona teitei i ta tatou ka kite, e ko tona au mataiti e openga kore kia kimiia. (Iobu 36:22-26) Me timata pakariia, kia maara e e tuatua tika to tatou Atua mutu kore e ka tutaki mai ia tatou no ta tatou au angaanga tiratiratu tei apai mai i te akapaapaa anga kiaia ra.

12. Eaa te akakiteia maira i ta Eliu au tuatua openga no ta te Atua akavaanga ki runga i te aronga rave kino ra?

¹² Ia Eliu e tuatua ra, te akamata maira tetai uriia. I te vaitata anga mai te reira, kua akamata tona ngakau i te rererere e te ruketekete. Kua tuatua aia i te au mea maata ta Iehova i rave e kua karanga: “E akarongo mai koe i teia, e Iobu; ka noo marie ana, e akamaaraara i te au angaanga taka ke a te Atua.” Mei ia Iobu rai, ka tau tatou kia akamanako atu i ta te Atua ra au angaanga umere e te tapunui matakuia ra. “I te Mana katoatoa ra, kare i kitea e tatou kia kimi,” ta Eliu i tuatua mai. “Tei maata i te mana, e te tuatua-tau, te maata ua atura te tuatua-tika nana: kare aia e takinga kino. E teianei, kia mataku te tangata iaia e tikaʼi.” (Iobu 37:1, 14, 23, 24) Te akamaaraara maira ta Eliu au tuatua openga ia tatou e me akono te Atua i tana akavaanga te vaitata nei ki runga i te aronga rave kino, kare aia e akameangiti i te tuatua tau e te tuatua tika e ka akaora aia i te aronga e mataku ra iaia ei aronga akamori tapu iaia. Mei teaa ra te meitaki kia piri atu ki taua aronga tamou marie i te tiratiratu tei akatika ra e ko Iehova tei Ngateitei i te Ao Katoa e Pini Ua Ake! E akakoromaki marie mei ta Iobu i rave ra, e auraka e tuku kia kika ke atu te Tiaporo ia koe mei toou ngai akameitakiia i roto i teia aronga tini mataora nei.

Kua Pau Atura Iehova ia Iobu

13, 14. (a) No runga i teaa ta Iehova ra i akamata i te uiui kia Iobu? (e) Eaa te au tumu te ka kiteia mai mei etai atu au uianga ta te Atua ra i ui atu kia Iobu?

¹³ Mei teaa ra te poitirere o Iobu i to Iehova ra tuatua anga mai kiaia na roto i te puaioio! Na te Atua taua uriia ra, kare mei te matangi maata ra ta Satani i taangaanga kia inga te are e kia mate nga tamariki a Iobu ra. Kua muteki ua a Iobu i ta te Atua ui anga: “Iea koe iaku i akatumu i te enua nei? . . . E naai i tuku i te toka kapeutara? Ka imene katoatoaʼi te au etu popongi, e kua maeva ua te au tamariki a te Atua i te rekareka?” (Iobu 38:4, 6, 7) Kua oronga atura Iehova i tetai uianga i muri ake i tetai no runga i te tai, tona kakau tumurangi, te maiata, te au ngutupa o te mate, te marama e te poiri, e te au pupu etu ra. Kare i rauka ia Iobu i te tuatua atu i te ui angaia: “Te kite ra ainei koe i te au ture o te rangi?”​—Iobu 38:33.

¹⁴ Kua akakite maira etai atu au uianga e i mua ake ka angaiaʼi te tangata e ka orongaiaʼi te tutara anga ki rungao i te au ika, te au manu o te reva, te au puaka, e te au mea totoro aere, te oronga ra te Atua i te kai na ratou​—kare e tauturu a te tangata e kare oki e akaue anga. Kua taiku maira etai atu au uianga a Iehova i te au mea ora mei te puakatoro taetaevao, te renanima, e te oroenua. Kua uiia atura kia Iobu: “E naau ainei i akaue i te aeto i rere ei ki runga ra, ka angaʼi tona koanga ki runga take ra?” (Iobu 39:27) Kare rava ia! E tamanako ana i ta Iobu i rave i ta te Atua ra uianga kiaia: “E tika ainei i tei māro mai ki te Mana katoatoa kia apii mai iaia?” Kare ra i te mea poitirere e kua tuatua a Iobu: “I na e viivii toku! e akapeea atu au ia koe? E tapoki ana au i toku vaa ki toku rima.” (Iobu 40:2, 4) I te mea e tika ua ana a Iehova, me ka timataia tatou kia akaapa atu iaia ra, ka tau tatou ‘kia tapoki i to tatou vaa ki to tatou rima.’ Kua akamaata katoa ta te Atua au uianga i tona tu teitei rava, te tapunui, e te ririnui, mei tei akaariia maira i te au mea angaia ra.

Behemota e Leviatana

15. Kua akamanakoia te Behemota e ko teea manu, e eaa etai o tona au tu ra?

¹⁵ I muri akera kua taiku mai a Iehova i te Behemota, te akamanakoia ra e e ipopotamu (hippopotamus) ia. (Iobu 40:15-24) E mea umere no tona maatamaata, te teiaa maata, e te ketaketa o tona pakiri, ko teia manu kai rakau rikiriki ‘te kai ra i te ngangaere.’ Ko te au tumu o tona mana e te ririnui tei roto i tona taukupu e te nga uaua o tona kopu. Ko nga ivi o tona nga vaevae e maroiroi ei tau ki te “nga potonga veo pakari.” Kare te Behemota e rapurapu me puke ua mai te vai mari ra ka ngoie ua iaia te kau atu i te tae anga vai.

16. (a) Te tau ra te akataka anga i te Leviatana ki teea mea ora, e eaa etai au tika no runga i te reira? (e) Te akakite maira te ririnui o te Behemota e te Leviatana i teaa no te akatupu anga i te au angaanga i roto i te angaanga a Iehova ra?

¹⁶ Kua ui katoa te Atua kia Iobu: “E rauka ainei Leviatana ia koe kia ii ki te matau? e tika ainei ia koe kia taomi i tona arero ki raro ki te taura?” Te tau ra te akataka anga no Leviatana ki te karakataera (crocodile). (Iobu 41:1-34) Kare aia e papau i tetai koreromotu no te au ma tetai ua atu, e kare e tangata pakari i manako kore e kia akariri atu i teia manu. Kare aia e oro i te au kakao, e “te kata ra aia i te ruru anga i te korare.” Kua akariro te Leviatana riri ra i te moana kia pupu mei te pani manongi ra. No te tika e e maata roa atu te ririnui o te Leviatana e te Behemota i to Iobu ra kua tauturu i te taakaaka iaia ra. Ka tau katoa oki tatou kia akatika taakaaka ua e kare o tatou mana i roto ia tatou uaorai. Ka anoano ra tatou i te pakari e te ririnui no ko mai i te Atua ra ei kopae atu i nga nio o Satani, te Ovi ra, e ei akatupu i ta tatou tuanga i roto i ta Iehova ra angaanga.​—Philipi 4:13; Apokalupo 12:9.

17. (a) I akapeea ta Iobu ‘akara anga i te Atua’? (e) Eaa tei akapapuia maira e te au uianga tei kore ra i rauka ia Iobu i te pau, e akapeea te reira i te tauturu anga ia tatou?

¹⁷ I te taakaaka takiri angaia, kua akatika a Iobu e kua tarevake tona manako e kua akatika e kua tuatua ua aia ma te kite kore. Inara, kua akakite ana aia i te akarongo “e akara rai au i te Atua.” (Iobu 19:25-27) Akapeea te reira e tupu ei, i te mea e kare rava tetai tangata e ora kia akara atu ia Iehova? (Exodo 33:20) Te tika ra, kua kite a Iobu i te akakite anga i te mana tu-Atua, kua akarongo atu i te tuatua a te Atua ra, e kua akatueraia te mata o tona ngakau kia kite i te tuatua mou no runga ia Iehova ra. E no reira ‘kua akaviivii a Iobu iaia uaorai e kua tataraara i raro i te one-pueu e te reu.’ (Iobu 42:1-6) Te au uianga e manganui tei kore i rauka iaia i te pau kua akapapu i to te Atua ra tu teitei rava e kua akaari maira i te meangiti ua o te tangata nei, noatu rai e ko tetai mei ia Iobu ra te tiratiratu kia Iehova ra. Na teia e tauturu ia tatou kia kite e auraka to tatou au manako e tukuia ki runga ake i te akatapu anga i te ingoa o Iehova e te akatika anga i tona ngateitei ra. (Mataio 6:9, 10) Ko te manako maata no tatou kia akatinamou i te tiratiratu kia Iehova e te akangateiteianga i tona ingoa.

18. Eaa tei tau ra kia raveia e nga tangata akapumaana pikikaa ia Iobu ra?

¹⁸ Inara, akapeea, nga tangata akapumaana pikikaa tei manako ra e tuatua tika ratou uaorai? Ka rauka tika ua ia Iehova i te tamate atu ia Eliphaza, ia Biladada, e Zophara no tei kore e tuatua i te tuatua mou nona ra, mei ta Iobu i rave ra. “Ka rave kotou i nga puakatoro e itu ra, e nga mamoe toa oki e itu, na kotou, ka aere atu ei ki toku tavini ra kia Iobu,” ta te Atua ia i tuatua atu, “ka apai ei i tetai atinga karakaratio na kotou; e na taku tavini na Iobu e pure ia kotou.” Kua taakaaka aua nga tangata e toru ra ia ratou uaorai e kua rave i te reira. Na Iobu tei tamou marie i te tiratiratu ra e pure no ratou, e kua kite a Iehova e kua tau tana pure kia arikiia. (Iobu 42:7-9) Inara ka akapeea te vaine a Iobu, tei raurau ra iaia kia akakino atu i te Atua e ka mate atu ei? I te akara anga kua akaongiia mai aia kia Iobu no to te Atua ra aroa ua.

Na te Au Tutaki Taputouia i Oronga Mai te Manakonako Anga no Tatou

19. No runga ia Iobu, i akapeea ta Iehova akaari anga i Tona tu teitei rava ki runga ake i te Tiaporo ra?

¹⁹ I te oti ua anga to Iobu ra manamanata no tona au mamaeanga e kua akaoraia ki te angaanga na te Atua ra, kua taui a Iehova i te au apinga nona ra. I muri ake i to Iobu pure anga no nga tangata e toru ra, ‘kua ruri ke akerā te Atua i taua tu eketumu nona ra’ e kua oronga atu ‘e tataki rua maira tana apinga i to muatangana ra.’ Kua akaari atura Iehova i Tona tu teitei rava atu ki rungao i te Tiaporo na te ruri ke anga i te rima akamaki o Satani e te rapakauanga temeio ia Iobu ra. Kua opara katoa te Atua i te nuku temoni ki muri e kua akamou atu ia ratou ki reira na te paruru akaouanga ia Iobu ma Tona puakapa angera ra.​—Iobu 42:10; Salamo 34:7.

20. Na roto i teea au mataara ta Iehova ra tutaki anga e te akameitaki anga ia Iobu?

²⁰ Kua aere ua maira te au tungane, te au tuaine o Iobu e tona au taeake i mua ana kia kaikai kapipiti ma ia katoa ra, e kua tangi kiaia, e kua akapumaana atu iaia no te tumatetenga tei tukuia e Iehova ra kia tupu kiaia. Kua oronga mai ratou tataki tai i te moni na Iobu e tetai tapea auro. Kua akameitaki a Iehova i te openga o Iobu kia maata atu i tona akamataanga, e kua rauka mai iaia e 14,000 mamoe, e 6,000 kamera, e 1,000 puakatoro takiruaia, e 1,000 atini ua. E toko itu akaou katoa oki a Iobu au tamaroa e toru au tamaine, ko te numero rai o tana i muatangana ra. Ko tana nga tamaine​—ko Iemima, ko Kezia, e ko Kerene-apuka—​ko nga vaine manea roa atu i te enua ra, e kua oronga atura Iobu i tetai tuanga na ratou i roto i to ratou au tungane ra. (Iobu 42:11-15) Pera katoa oki, kua ora ua atu a Iobu i muri akera e 140 mataiti e kite atura aia e a uki o tona au uanga. Kua akaoti akera te tataanga: “Mate marie iora Iobu, kua ruaine e kua merengo i tona au puke ra.” (Iobu 42:16, 17, NW) Ko te totoa anga kia roa tona oraanga e angaanga temeio ia na te Atua ra ko Iehova.

21. Akapeea tatou i te tauturu angaia e te tataanga Tuatua Tapu no runga ia Iobu ra, e eaa ta tatou ka tau kia tauta i te rave?

²¹ Te akariro maira te tataanga Tuatua Tapu no runga ia Iobu kia maata atu to tatou kite i te au ravenga a Satani e te tauturu katoa maira ia tatou kia kite e akapeea te pirianga o te tiratiratu o te tangata ki te ngateitei o te ao katoa e pini ua ake. Mei ia Iobu rai, pouroa te aronga aroa i te Atua ra ka timata katoaia. Inara ka rauka ia tatou kia akakoromaki marie mei ta Iobu i rave ra. Kua aere mai aia mei roto i tona au timataanga ma te akarongo e te manakonako anga, e e manganui tana au tutaki. Ei au tavini no Iehova i teia tuatau nei, e akarongo mou to tatou e te manakonako anga. E mei teaa ra te manakonako anga meitaki ta Tei Tutaki Maata i akanoo mai ki mua ia tatou tataki tai! Na te tamouanga i te manako i te tutaki no te rangi ra ka tauturu i te aronga tei akatainuia ra kia tavini tiratiratu i te Atua no te toenga o to ratou oraanga ki runga i te enua nei. E manganui o te aronga e manakonako anga to ratou kia noo ki te enua nei kare rava e mate, inara ko te aronga te ka mate ka tutakiia ma tetai tuakaou anga i roto i te Parataito i te enua nei, ma Iobu katoa oki. Ma taua manakonako anga tikai i roto i te ngakau e te manako, e akapapu atu te katoatoa te aroa ra i te Atua e e pikikaa a Satani na te mouanga ngaueue kore ki runga i to Iehova ra tua ei aronga tamou marie i te tiratiratu e ei aronga turu maroiroi i tona ngateitei i te ao katoa e pini ua ake.

Akapeea Koe me Pau?

◻ Eaa etai tumu tei taikuia maira e Iobu i tana pauanga openga ki tona nga tangata akapumaana pikikaa ra?

◻ Akapeea ta Eliu akapapu anga e e kite aia no Iehova tei kore i akara i te tu o te tangata ra?

◻ Eaa etai au uianga a Iehova kia Iobu ra, e eaa te tupu anga mei te reira?

◻ Akapeea koe i te puapinga angaia mei te tataanga Tuatua Tapu no runga ia Iobu ra?

[Au Tutu i te kapi 18]

Kua tauturu ta Iehova ra au tuatua no Behemota e Leviatana kia taakaaka atu a Iobu