“E Unuunumou Mai Koe Iaku, e te Atua”

“E unuunumou mai koe iaku, e te Atua kia kite oki koe i toku ngakau. . . . E arataki koe iaku i te arataa e tika i te vai marie anga.”​—SALAMO 139:23, 24.

1. Akapeea ta Iehova ra akono i tona au tavini?

POUROA tatou te rekareka ra kia riro na tetai te kite ra e akono mai ia tatou, tetai te manako maira i to tatou au turanga, tetai te ka tauturu mai me ka topa tatou ki tetai tarevake ra, tetai te ka kore e pati mai kia rave tatou kia tere atu i te ka rauka ia tatou kia rave. Te akono ra te Atua ko Iehova i te reira mataara ki tona au tavini. Te tuatua ra ia Salamo 103:14 e: “Kua kite oki aia i to tatou tu; te manako ra aia e, e one tatou nei.” Te oronga maira a Iesu Karaiti, koia tei akaata apa kore maira i tona Metua, i te pati anga pumaana: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou [mea kare, “Aere mai kiaku ra i raro ake i taku amo,” tata anga i raro ake, NW], e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou [meta]. Te maru nei taku amo, e te māmā nei taku apainga.”​—Mataio 11:28-30.

2. E akakite mai i te tuke anga to Iehova ra manako i to te au tangata no runga (a) ia Iesu Karaiti, e te (e) te au pipi a Karaiti ra.

² E putuputu te tuke roa ta Iehova ra akara anga i tona au tavini i ta te akara anga a te au tangata ra. Te akara ra aia i te au tumu na tetai turanga tuke e ka akamanako i te au tu kare ra etai ke i kite ana. I to Iesu Karaiti aaere anga i te enua nei, kua “akavaavaaia aia, e kua kopaeia e te tangata.” Ko te aronga kare o ratou akarongo iaia ei te Mesia, “kare aia i manako meitakiia.” (Isaia 53:3; Luka 23:18-21) Inara, i roto i to te Atua nga mata, koia ta “[te Atua] tamaiti akaperepere,” koia ta te Metua i tuatua ra: “Kua mareka rava au ia koe.” (Luka 3:22; 1 Petero 2:4) I roto i te au pipi a Iesu Karaiti e au tangata etai te akavaavaaia ra no te mea e putaua ratou i te pae apinga e te maata ra te akakoromaki i te tu kino. Inara, i nga mata o Iehova raua ko tana Tamaiti, e apinganui taua aronga tangata ra. (Roma 8:35-39; Apokalupo 2:9) Eaa ra i tuke ei te manako anga?

3. (a) Eaa to Iehova ra manako no te au tangata i putuputu ei te tuke rava i to te au tangata ra? (e) Eaa i puapinga maataʼi no tatou kia akara matatio i to tatou tu ei peretana i roto ra?

³ Te pau maira Ieremia 11:20 e ko: “Iehova . . . tei kimi matatio i [nga mape], e te ngakau.” Te kite ra aia i roto ia tatou, pera katoa to tatou au tu ei tangata te ngaro ke ra i nga mata o etai ke ra. I tana kimi matatio anga, te tuku ra aia i te akaketaketa anga maata ki te au tu e te au turanga e puapinga maata ki te pirianga meitaki kiaia ra, ko tei puapinga tamou maata ra kia tatou. E akapapuanga kia tatou te kiteanga i te reira; e akapumaana katoa oki. I te mea te akara maira Iehova i to roto ia tatou, e mea puapinga maata no tatou kia akara matatio e eaa to roto ia tatou me ka tau tatou ei tu tangata tana ka anoano ki roto i tona ao ou. Na tana Tuatua e tauturu ia tatou kia rave i taua kimi matatio anga ra.​—Ebera 4:12, 13.

E Meitaki to te Atua ra Au Manako!

4. (a) Na teaa i akakeu i te tata taramo kia tuatua e e oko maata to te Atua au manako kiaia? (e) Eaa ra i tau ei oki kia oko maata katoa kia tatou nei?

⁴ I muri ake i te tamanakoanga i te atea e te oonu o to te Atua ra kite i tona au tavini, e pera katoa to te Atua ra kite maata i te oronga i te tauturu te anoanoia ra no ratou, kua tata te tata taramo ko Davida e: “Ko te meitaki o to au manako iaku nei!” (Salamo 139:17a) Ko taua au manako, te akakiteia maira i tana Tuatua tataia ra, e teitei rava atu i etai ua atu apinga na te tangata nei, noatu i peea te akara anga meitaki to ratou au manako. (Isaia 55:8, 9) Te tauturu ra te au manako o te Atua ia tatou kia arataki atu i to tatou manako ki te au mea puapinga tikai i te oraanga e kia maroiroi i te rave i tana angaanga. (Philipi 1:9-11) Te akaari maira ratou kia tatou e akapeea te akara anga i te au mea kia tau ki ta te Atua ra mataara. Te tauturu ra ratou ia tatou kia tiratiratu ia tatou uaorai, kia tiratiratu i te akatika anga kia tatou uaorai i to tatou tu tikai ei peretana i to tatou ngakau. Te rekareka ra ainei koe kia rave i te reira?

5. (a) Eaa ta te Tuatua a te Atua e raurau maira ia tatou kia “maata taau tapapa anga”? (e) Akapeea tatou e puapingaʼi i te tataanga Puka Tapu no Kaina ra? (ng) Noatu rai e kare tatou i raro ake i te Ture a Mose, eaa ta te reira tauturu ia tatou kia kite e na teaa e marekai a Iehova?

⁵ Te maata ra te manako o te au tangata i to ratou tu akara anga o vao ua, inara te ako maira te Au Tuatua Tapu ia tatou: “I te au mea katoa taau ka tapapa ra, kia maata taau tapapa anga i to ngakau.” (Maseli 4:23) Na te au apiianga e na te au akaraanga, te tauturu maira te Puka Tapu ia tatou kia rave i te reira. Te akakite maira te reira kia tatou e kua rave a Kaina i te orongaanga atinga ki te Atua ra, i roto ra i tona ngakau te pupu ra aia i te riri, e te makitakita, i tona taeake ia Abela. E te raurau maira te reira ia tatou kia kore e aite atu kiaia ra. (Genese 4:3-5; 1 Ioane 3:11, 12) Kua tata mai ia i te umuumu anga no te akarongo i te Ture a Mose ra. Inara te akaketaketa katoa maira te reira e ko te umuumuanga maata o te Ture ra e ko te aronga akamori ia Iehova ka tau kia inangaro ratou iaia ma to ratou ngakau katoa, te manako katoa, te meta katoa, e te ririnui katoa; e kua akakite mai e ko te aru mai te puapinga ko te akauenga kia aroa atu i to ratou tangata tupu mei ia ratou uaorai.​—Deuteronomi 5:32, 33; Mareko 12:28-31.

6. I te akono anga ia Maseli 3:1, eaa nga uianga tau na tatou kia ui ia tatou uaorai?

⁶ Ia Maseli 3:1, te raurauia maira tatou e kare kia akono anake ua i te au akauenga a te Atua ra mari ra kia papu tikai e ko te akarongo e akakite anga i te apinga tikai i roto i to tatou ngakau. Ka tau tatou tataki tai kia ui ia tatou uaorai, ‘Ko te tika ainei te reira no toku akarongo ki te au umuumuanga a te Atua ra?’ Me ka kite tatou i etai tumu no te akakeu anga ia tatou me kare te manakoanga e kare i rava​—e kare tetai i o tatou e tau kia tuatua e e apa kore tatou—​ka tau tatou kia ui, ‘Eaa taku e rave ana kia meitaki mai ei te turanga?’​—Maseli 20:9; 1 Ioane 1:8.

7. (a) Akapeea e tauturu ei ia tatou ta Iesu akaapa anga i te au Pharisea ia Mataio 15:3-9 ra kia paruru i to tatou ngakau? (e) Eaa te au turanga penei ka umuumuia tatou kia akono maroiroi i te ako i to tatou manako e te ngakau katoa oki?

⁷ I te akameamea anga te au Pharisea ngati Iuda ra e te akangateitei ra ratou i te Atua i te tuatau te rave kikite ra i tetai ravenga akakeuia ei meitaki no ratou uaorai, kua tuatua akaapa atura Iesu ia ratou ei pikikaa e kua akakite atu e puapinga kore ta ratou akamorianga. (Mataio 15:3-9) Kua akamatakite katoa a Iesu e e marekaʼi te Atua, tei kite ra i te ngakau, kare e rava ua te akono i tetai oraanga ko vao ua kia akara anga meitaki, ma te manakoanga kia rauka te mareka anga aroa, te rave tamou katoa ra tatou i te au manako tau kore. Penei ka tau tatou kia akono i etai ravenga pakari ei ako kia meitaki to tatou manako e te ngakau. (Maseli 23:12; Mataio 5:27-29) Te anoano katoaia ra te reira ako me no ta tatou angaanga no te oraanga, ta tatou au akakoroanga no te apiianga, me kare no ta tatou ikianga tamataora, te riro atura tatou kia aru i teianei ao, kua tuku ua i te reira kia anga ia tatou kia tau ki tona au turanga. Auraka rava e ngaropoina ia tatou e te akakite maira te pipi ko Iakobo e mei te “au akaturi vaine” te aronga te manako ra no te Atua ratou, inara te anoano ra ei oa ratou no teianei ao. No teaa ra? No te mea “te vai ua nei rai to te ao ravarai i raro ake i taua vaerua kino ra.”​—Iakobo 4:4; 1 Ioane 2:15-17; 5:19.

8. E ki ei te puapinga no to te Atua au manako oko maata maira, eaa ta tatou ka tau kia rave?

⁸ E raukai kia ki i te puapinga o te manako no ko mai i te Atua ra no runga i teia e etai atu tumu katoa, ka tau tatou kia akataka i tetai tuatau no te tatau anga i te reira me kare kia akarongorongo atu i te reira. E tere atu i tera, ka tau katoa kia apii i te reira, kia tuatua no runga i te reira, e kia tamanako marie i te reira. E manganui te aronga tatau i Te Punanga Tiaki te aere putuputu ra ki te au uipaanga o te Au Kite o Iehova, te ngai e uriuri manakoia ra te Puka Tapu. Te taporoporo marie ra ratou i te tuatau mei etai atu au angaanga kia raukai te rave i te reira. (Ephesia 5:15-17) E ko te ka rauka maira ia ratou no te reira e maata ua atu te puapinga i to te apinganui kopapa ra. Kare aina te reira i toou manako?

9. Eaa tetai papaki te aere ra ki te au uipaanga Kerititiano i tupu viviki atu ei i etai ke ra?

⁹ Inara, ko tetai papaki te aere ra ki teia au uipaanga e viviki atu te tupuanga i te pae vaerua i to etai ke ra. Te akono ra ratou i te tuatua mou kia ki atu ki roto i to ratou oraanga. Na teaa i tupu ei te reira? E putuputu, ko te tumu maata no to ratou uaorai inangaro maroiroi i te apii. Te ariki ra ratou e kare ko te manga anake te mea e orai tatou; ko te kaikai vaerua e puapinga katoa ia mei te kaikaianga putuputu no te kopapa ra. (Mataio 4:4; Ebera 5:14) E no reira kua tamata ratou kia akapou i tetai manga tuatau i te au ra tataki tai no te tatauanga i te Puka Tapu me kare te au puka akamarama i te reira. Kua teateamamao ratou no te au uipaanga a te putuputuanga, ma te apiianga i te au apii ki mua atu e te akara anga i te au irava tuatua tapu. E maata atu ta ratou e rave ana i te tatau ua anga i te au apinga o roto i reira; kua tamanako marie ratou i te reira. Ko ta ratou akaraanga no te apii te kapiti ra i te manako anga tikai i te ka tupu i ta ratou apiianga tei tau no to ratou uaorai oraanga. I te tupu anga to ratou tu i te pae vaerua, ka riro to ratou manako mei to te tata taramo iaia i tata ra: “Te maata rava nei toku inangaro i taau ra ture! . . . E mea vavaria taau ra au tuatua-akakite.”​—Salamo 1:1-3; 119:97, 129.

10. (a) Eaa te roa o te tuatau e puapingaʼi kia rave tamou i te apii i te Tuatua a te Atua? (e) Akapeea te Au Tuatua Tapu i te akaari mai anga i te reira?

¹⁰ Noatu me kua apii ana tatou i te Tuatua a te Atua no te tai mataiti, 5 mataiti, me kare 50 mataiti, kare ia e riro ei mea ta okioki ua​—kare me te oko maata ra to te Atua au manako kia tatou. Noatu rai eaa te maata ta tatou i apii ana mei te Au Tuatua Tapu ra, e maata atu te vai ra kare tatou i kite ake. “E te Atua e! te maata roa anga kia tatauia e!” ta Davida i tuatua. “Kia tatauia e au ra, e maata ïa te reira i te one taatai.” E teitei roa atu te tare anga i to te Atua au manako i ta tatou e kite ana. Naringa tatou e tare ana i to te Atua au manako i te au ra katoa ka varea e te moe i te rave anga i te reira, i te ara anga tatou i te popongi, e maata atu i te toenga kia akamanako atura. No reira, kua tataia ra e Davida e: “Kia ara au ra, te vaitata ua rai au ia koe!” (Salamo 139:17, 18) No te tuatau e tuatau ua atu ka vai ra e maata atu na tatou kia apii no runga ia Iehova e tona au arataa. Kare rava tatou e tae ki te openga e kite ei tatou i te katoatoa rava.​—Roma 11:33.

Makitakitaanga i ta Iehova e Makitakita Ra

11. Eaa ra i puapinga maataʼi kare kia kite anake i te au manako o te Atua mari ra kia akakite katoa i tona manako ngakau?

¹¹ Ko ta tatou apii i te Tuatua a te Atua ra kare ia no tetai manako anga kia akaki i to tatou upoko i te au tumu tika anake ua. Ia tatou e tuku ra i te reira kia tomo ki roto i to tatou ngakau, ka akamata katoa tatou tei tua i to te Atua ra au manako. Mei teaa ra te puapinga o te reira! Me ka kore tatou e akatupu i te reira au manako, penei eaa te ka tupu? Noatu e e rauka ia tatou i te tuatua akaou i te au tuatua o te Puka Tapu, penei, ka manako inangaro ua tatou i te mea kare ra e akatikaia, me kare penei ka manako tatou e e apainga teiaa te umuumuia ra. E tika rai e noatu te makitakita ra tatou i te mea tarevake, ka riro ia ei kukumi anga na tatou no to tatou tu tangata apa ua nei. (Roma 7:15) Inara me ka kore tatou e tauta pakari kia apai mai i to tatou tu i roto ra kia tau ki te mea tika ra, ka rauka ainei ia tatou kia manakonako e kia akamareka ia Iehova, “tei timata i te ngakau”?​—Maseli 17:3.

12. E akapeea te puapinga o te aroa tau i te Atua e te makitakita tau i te Atua oki?

¹² Te makitakita tau i te Atua ra e paruru anga ririnui ia i te raveanga tarevake, mei te inangaro tau i te Atua ra te akariro ra i te raveanga i te tika ei mea mareka anga. (1 Ioane 5:3) E putuputu te Au Tuatua Tapu i te raurau mai ia tatou kia tatanu i te inangaro e te rikarika. “Ko kotou, tei inangaro ia Iehova, kia rikarika i te kino ra.” (Salamo 97:10) “Kia rikarika i te kino; kia kapiti atu ki te meitaki.” (Roma 12:9) Te rave ra ainei tatou i te reira?

13. (a) Eaa te pure a Davida no runga i te akapouanga i te aronga kino ra te akatika katoa ra tatou? (e) Mei tei akakiteia maira i ta Davida pure, koai ma te aronga kino tana i pure ki te Atua ra kia akapou atu?

¹³ Kua akakite meitaki maira Iehova i tana akakoroanga kia kiriti tumuia te aronga rave kino i te enua nei e kia rave mai i tetai enua ou te vai tika anga o te tuatua tika ra. (Salamo 37:10, 11; 2 Petero 3:13) Te tapapa atu nei te aronga inangaro i te tuatau no te tuatua tika kia tae mai. Te rotai ra to ratou manako ki to te tata taramo ko Davida, tei pure ra e: “Ka mate tika rai te aronga kino ia koe, e te Atua; e teianei ka aere ke kotou iaku nei, e te au tangata toto e. Ko tei māro mai ia koe ma te tuatua kino; ko toou ra au enemi, tei akateitei puapinga kore ua ia ratou uaorai.” (Salamo 139:19, 20) Kare a Davida uaorai i manako nana e ta i taua aronga rave kino ra. Kua pure aia kia aere mai te akautunga mei te rima o Iehova ra. (Deuteronomi 32:35; Ebera 10:30) Kare teia aronga i te au tangata tei akariri ua ia Davida uaorai na tetai mataara. Kua akono tau kore ratou i te Atua, ma te tuatua anga puapinga kore i tona ingoa ra. (Exodo 20:7) Na te tu tiratiratu kore, kua manako ratou e te tavini ra kiaia, inara te taiku ra ratou i tona ingoa ei akatupu i ta ratou uaorai au ravenga. Kare o Davida inangaro i te aronga tei iki ra ei enemi ratou no te Atua.

14. E aronga rave kino ainei etai te ka tau kia tauturuia? Me koia ia, ka akapeea ia?

¹⁴ E au pirioni ua atu au tangata kare e kite ana ia Iehova. E manganui i o ratou no te kite kore te rave ra i te au apinga te akaariia maira i te Tuatua a te Atua e e kikino anake. Me ka rave ua atu ratou i te reira mataara, ka riro ko ratou etai ki roto i te aronga te ka mate a te mate maata. Inara, kare a Iehova e mareka kia mate te tangata kino ra, kare katoa oki tatou. (Ezekiela 33:11) Me ka tika i te tuatau te vai nei, e tauta tatou i te tauturu i taua aronga tangata ra kia apii e kia akono i ta Iehova ra au mataara. Inara ka peea me ka akaari mai tetai papaki tangata i te makitakita maata no Iehova?

15. (a) Koai ma te aronga ta te tata taramo i manako ra e e au “enemi tikai”? (e) Akapeea e raukai ia tatou i teia tuatau nei te akaari e te “makitakita” ra tatou i te aronga meameaau ia Iehova ra?

¹⁵ Kua tuatua te tata taramo no ratou e: “Kare ainei tei riri au i te aronga i riri mai ia koe, e Iehova? e te atata nei au i te aronga i tu mai e māro ia koe? E makitakita maata toku ia ratou, e makitakita maata roa; e enemi tikai ïa ratou noku.” (Salamo 139:21, 22) No to ratou makitakita maata ia Iehova i akarai a Davida ma te tu rikarika. Kua kapitiia atu te au aronga akaruke i te akarongo ki roto i te aronga te akaari ra i to ratou makitakita ia Iehova na te maro anga iaia ra. Ko te akono anga ei aronga akaruke i te akarongo e meameaau tikai ia ia Iehova. Ko tetai aronga akaruke i te akarongo e te akameamea ra e te kite ra ratou i te Atua, inara te kopae ke ra ratou i te au apiianga me kare au akauenga tei akanooia ra ki roto i tana Tuatua. Ko etai te karanga ra e te irinaki ra ratou i te Puka Tapu, inara te kopae ke ra ratou i ta Iehova ra akaaerenga e te tauta ra i te arai i tana angaanga. Me ka iki akakoro ratou i taua rave anga kino ra i muri ake i te kiteanga i te tika, me riro anake te kino kia tomo oonu ki roto ia ratou e kua riro ei tuanga no ratou ra, ei reira ka tau te Kerititiano kia makitakita (i roto i te Akamarama anga Puka Tapu o teia tuatua) i te aronga tei akapiri takiri atura ia ratou uaorai ki te kino. Ka kapiti atu te au Kerititiano mou ki to Iehova ra manako no taua aronga akaruke i te akarongo ra; kare ratou e kimikimi i te au manako o te aronga akaruke i te akarongo. Ei tuke anga, “te atata” nei ratou i taua aronga tei akariro ra ia ratou uaorai ei enemi no te Atua ra, inara ka akaruke atu ratou na Iehova e rave te tutaki i te kino.​—Iobu 13:16; Roma 12:19; 2 Ioane 9, 10.

Me Unuunumou Mai te Atua ia Tatou

16. (a) Eaa ra a Davida i anoano ei kia unuunumou mai a Iehova iaia ra? (e) Eaa te tu o to tatou ngakau te tau ra tatou kia pati ki te Atua kia tauturu ia tatou kia kite?

¹⁶ Kare a Davida i anoano kia aite atu aia ki te aronga rave kino na tetai ua atu mataara. E manganui te au tangata te tauta ra kia uuna i to ratou uaorai tu i roto ra, inara kua pure taakaaka a Davida: “E unuunumou mai koe iaku, e te Atua, kia kite oki koe i toku ngakau; e timata mai iaku, e kia kite koe i toku manako: E akara mai i te aerenga kino e vai nei i roto iaku nei, e e arataki koe iaku i te arataa e tika i te vai marie anga te meitaki ra.” (Salamo 139:23, 24) I te taikuanga i tona ngakau, kare a Davida i tuatua ana no te mero kopapa. Kia rotai ki te aiteanga akatutuia mai o taua tuatua ra, te taiku ra aia i tona tu i roto ra, te tangata o roto ra. Ka tau katoa oki tatou kia anoano kia unuunumou mai te Atua i to tatou ngakau kia kite me e au inangaro tau kore, e au anoano, e manako ngakau, e au akakoroanga, e au manako, me kare e au akakeuanga tarevake to tatou. (Salamo 26:2) Te pati maira Iehova ia tatou: “O mai na to ngakau kiaku nei, e taku tamaiti e; e akara marie oki to mata i toku nei au arataa.”​—Maseli 23:26.

17. (a) Eiaa e kia tapoki atu i to tatou au manako apiapi ra, eaa ra te mea tau na tatou kia rave? (e) E mea tau ainei e kia poitirere tatou me ka kitea te au manako tarevake i to tatou ngakau, e eaa ta tatou ka tau kia rave no te reira?

¹⁷ Me te vaira etai manako akamamae, akaapiapi i roto ia tatou no etai au inangaro tarevake me kare akakeu anga tarevake e me no etai tu akono tarevake no tatou, e mea tika i reira kia anoano tatou ia Iehova kia tauturu ia tatou i te takore atu i te reira. Kare ko te tuatuaanga “e aerenga kino e vai nei,” kua taiku maira te urianga a Moffatt i te tuatua anga “tetai arataa tarevake”; te karanga ra The New English Bible: “Tetai ua atu arataa te ka akamii ia koe [koia, te Atua].” Penei kare tatou uaorai e kite meitaki i o tatou au manako akaapiapi e no reira kare e kite ka akapeea me akakite i to tatou manamanata ki te Atua, inara te kite ra aia i to tatou tu. (Roma 8:26, 27) Kare e tau kia poitirere tatou me te vaira etai manako kikino i roto i to tatou ngakau; inara kare tatou e tau kia kimi kotoe anga. (Genese 8:21) E mea tau kia kimi tatou i ta te Atua ra tauturu kia kiriti tumu takiri atu ia ratou. Me te inangaro tika ra tatou ia Iehova e tona au arataa, ka rauka ia tatou i te aravei atu iaia no taua tauturu ra ma te irinaki anga e “e maata te Atua i to tatou ngakau, e kua kite aia i te au mea katoa nei.”​—1 Ioane 3:19-21.

18. (a) Akapeea ta Iehova arataki anga ia tatou i te mataara no te tuatau mutu kore ua atu? (e) Me ka aru tamou tatou i ta Iehova arataki anga, eaa te akameitaki anga pumaana ka manakonako atu tatou kia rauka mai?

¹⁸ Kia rotai ki te pure a te tata taramo e ka arataki a Iehova iaia i te arataa o te tuatau mutu kore, ka arataki rai a Iehova i tona au tavini taakaaka, e te akarongo oki. Ka arataki aia ia ratou kare na te arataa anake te ka riro ei oraanga roa no te mea kare ratou e tipu viviki keia no te raveanga kino mari ra na te arataa te ka taki atu ki te ora mutu kore. Ka akatinamou mai aia kia tatou tei anoanoia te puapinga o te tarangaara o to Iesu atinga ra. Na roto i tana Tuatua e tana akaaerenga ka oronga mai aia i te apiianga puapinga maata kia raukai ia tatou i te rave i tona anoano. Te akaketaketa mai ra aia kia tatou i te puapinga o te akarongoanga i tana tauturu kia riro tatou i te tu o te peretana i roto ra mei ta tatou e manako ra tatou i te tu o vao ua. (Salamo 86:11) Te akamaroiroi maira aia ia tatou ma te manakonako o te erata apa kore ua, ki roto i tetai ao ou no te tuatua tika, ma te oraanga e tuatau ua atu kia taangaangaia ei tavini atu iaia, i te Atua mou anake ra. Me ka rave tamou tatou i te akarongo tiratiratu ki tana arataki anga, ka riro ra aia, kia tuatua kia tatou, mei tana i tuatua ki tana Tamaiti e: “Kua mareka rava au ia koe.”​—Luka 3:22; Ioane 6:27; Iakobo 1:12.

Eaa Taau Pauanga?

◻ Eaa te manako o Iehova no tana au tavini i putuputu ei te tuke rava i to te au tangata ra?

◻ Eaa te ka tauturu ia tatou kia kite e eaa ta te Atua ka kite me ka akara matatio aia i to tatou ngakau?

◻ Eaa te tu apii te ka tauturu ia tatou kia kite i te au tumu tika e kia paruru oki i to tatou ngakau?

◻ Eaa ra i puapingaʼi kare kia kite anake e eaa ta te Atua e tuatua maira mari ra kia piri katoa oki ki tona au manako ngakau ra?

◻ Eaa tatou tataki tai i tau ei kia pure: “E unuunumou mai koe iaku, e te Atua, kia kite oki koe i toku ngakau”?

[Tutu i te kapi 16]

I te apiianga, e tauta kia riro mai to te Atua manako e tona manako ngakau noou uaorai

[Tutu i te kapi 18]

Te au manako o Iehova ra “e maata ia te reira i te one taatai”

[Akameitakianga]

Pictorial Archive (Near Eastern History) Est.