E Tu Ua Mai e E Akara i te Ora a Iehova!
“E akamou ua kotou, e tu ua mai kotou, e e akara i te ora a Iehova.” —2 PARALEIPOMENO 20:17.
1, 2. Eaa ra te tamakianga e vaitata maira na “Goga i te enua o Magoga” i tupuanga maata atu ei i to te tumatetenga o te tamatakuanga i te pa enua?
KUA akatakaia te tamatakuanga e etai e e tamakianga i te ao katoa, e i te au ngai tangata katoa. Tei maramaia, ka tau kia akamanako pakariia taua raveanga takinga kino ra. I tetai tua, ko tetai atu tupuanga maata atu koia oki ko tetai tamakianga, kare e manakoia ana e te au tangata ravarai. Eaa te reira?
2 Ko te tamakianga na “Goga i te enua o Magoga,” no te reira te akakite maira te Pipiria i roto ia Ezekiela pene 38. E tuatua ua ainei kia karanga no runga i teia tamakianga e e tupuanga maata atu ia i te takinga kino o tetai tamatakuanga i te pa enua? Kare rava, e maata roa atu ia ta Goga tamakianga ki rungao i te au kavamani a te tangata nei. Te tamaki ra te reira i te kavamani o te Atua i te rangi ra! Inara, kare mei te au tangata rai, e iti ua to ratou tu manuia i te autuanga i te au tamakianga o to ratou akatereanga, kua rauka meitaki i Tei Anga i te akono atu i ta Goga tamaki kino.
E Tamakianga i to te Atua Kavamani
3. Eaa tei patiia ki te au arataki o te ao kia rave mei te 1914 mai, e akapeea ratou i te ariu anga mai?
3 Kua tupu ua ana te maroanga i rotopu i to te Atua Ariki e tutara ra i teianei e to Satani akatereanga kino mei te tuatau mai i akanooia ei te Patireia o te Atua i te rangi ra i te 1914. I taua taime ra, kua akakiteia ki te au tutara tangata kia kauraro ki to te Atua Tutara ikiia. Inara kua patoi ratou i te akapera, mei tei totouia mai: “Te tu ra te ui ariki o te enua nei ki runga, e te kapiti katoa ra te ui rangatira e māro ia Iehova, e tana i akatainu ra, Te na ko ra, Tatou e momotu i ta raua tapeka e taka ke atu, e akaruke takiri tatou i ta raua au taura ia tatou nei.” (Salamo 2:1-3) Te patoianga i te tutaraanga o te Patireia ka kiteaia tona take i te tuatau e tamakiia ei a Goga o Magoga.
4, 5. Akapeea te au tangata i te tamaki anga i to te Atua kavamani kitea koreia i te rangi?
4 Penei ka umere tatou e ka akapeea te au tangata i te tamaki anga atu i tetai kavamani kitea koreia i te rangi. Ko teia kavamani, te akakite maira te Pipiria, e ka o atu te “aronga ra okotai anere e a ngauru e a ara i te tausani, i okoia no roto i teianei ao,” e pera katoa “te Punua-mamoe,” ko Iesu Karaiti. (Apokalupo 14:1, 3; Ioane 1:29) I te mea e no te rangi, kua tuatuaia te kavamani ou e ko te “rangi ou,” e kua tapaia te aronga i raro i te reira e ko te “enua ou.” (Isaia 65:17; 2 Petero 3:13) Ko te maata anga o te 144,000 tutara kapiti atu ma Karaiti kua akaoti ke ana ma te tiratiratu i to ratou oraanga i te enua nei. Kua akapapu ratou i to ratou tu tau tikai no te akono atu i ta ratou au tukuanga angaanga ou i te tavinianga ki runga i te rangi.
5 Inara, e toenga ua to te 144,000 e vai nei ki runga i te enua. I te maata anga o te 15,000,000 aronga tei tae atu ki te akamaaraanga i te Kaikaianga Aiai a te Atu i te 2002, e 8,760 ua tei akakite i to ratou manakonakoanga e kua ikiia no teia tukuanga angaanga i te rangi ra. Ko tetai ua atu ka tamaki atu i te toenga o te au mema o te Patireia te tamaki atura i to te Atua Patireia.—Apokalupo 12:17.
Akaoti te Ariki i Tana Upokotu Anga
6. Eaa to Iehova e to Karaiti manako no te patoianga ki tona iti tangata?
6 Kua totouia mai to Iehova manako no te patoianga i tona Patireia akanooia: “Ko tei noo ki runga i te au rangi ra te ka kata mai; ka taitoitoia ratou e te Atu. Ei reira aia e tuatua mai ei kia ratou i tona riri, e tumatetenga roa akera ratou iaia i tona riri maata, Te na ko maira aia, Kua akatainu ra au i taku ariki i runga i toku maunga tapu ra, i Ziona.” (Salamo 2:4-6) Kua tae te tuatau no Karaiti i teianei, i raro i ta Iehova aratakianga, kia “upokotu atu e kia upokotu atu rai.” (Apokalupo 6:2) Akapeea a Iehova i te manakoanga no te patoianga tei akatikaia ki tona iti tangata i te tuatau o te upokotu openga? Kua akatanoia atu kiaia e tona Ariki e tutara ra. ‘Ko tei akatukia atu oki ia kotou ra, kua akatukia ïa toku koringo mata,’ i na Iehova ei. (Zekaria 2:8) E mei ta Iesu i tuatua pakari e te manako ra aia i ta te tangata e rave ra me kare tei kore i rave ki tona au taeake akatainuia e tei raveia ra me kare tei kore i raveia kiaia.—Mataio 25:40, 45.
7. Eaa te au tumu i kite ei te aronga o te “aronga maata rava,” tei akatakaia mai ia Apokalupo 7:9, i to Goga riri?
7 E tika, ko te aronga e turu maroiroi ra i te toenga o te aronga akatainuia ka kite katoa i to Goga riri. Ko teia au mema no te “enua ou” o te Atua e e “aronga maata rava” no “te pa enua ravarai, e te au kopu ravarai, e te au iti-tangata ravarai, e te au reo katoa oki.” (Apokalupo 7:9) Te tuatuaia ra no ratou i te “tu ua anga ki mua i te terono, e ki mua i te Punua-mamoe, ma te kakau teatea i te kakau anga.” Kua rauka i reira ia ratou tetai turanga arikiia ki mua i te Atua e Iesu Karaiti. Te apai aerenga i te “kikau nu tamara i to ratou rima,” kua akapaapaa ratou ia Iehova e ko te Ngateitei tikai o te ao katoa e pini ua ake, ko tona taoonga tutaraanga te akakiteia ra na roto i te tutaraanga a tona Ariki akateronoia, ko Iesu Karaiti, “te Punua-mamoe a te Atua.”—Ioane 1:29, 36.
8. Eaa ta Goga tamakianga ka akakeu ia Karaiti kia rave, e eaa te tupuanga?
8 Ka akatupu ta Goga tamakianga e kia rave angaanga te Ariki akateronoia o te Atua e te rave i te tamaki ia Aramakito. (Apokalupo 16:14, 16) Ko te aronga tei patoi i te akatika i to Iehova mana ngateitei ka mamae i te akapouanga. I tetai tua, ko te aronga tei akakoromaki i te mamae no to ratou tu tiratiratu ki te Patireia o te Atua, ka kite atu i te akamaruanga mutu kore. No runga i teia, kua tata te apotetoro ko Paulo: “Ei akakite anga i te tuatua-tau tikai a te Atua, e kia karangaia kotou e aronga tau i te basileia o te Atua, no reira kotou i mate ei: E mea tika ïa i te Atua kia tutaki i te aronga i mate ei kotou na i te mate: Kareka ia kotou i tei takinga-kinoia ra, ko te ora ïa tana e tuku mai no tatou katoa nei, kia mama mai te Atu ra ko Iesu mei te rangi mai, ma tana au angela mana katoa ra, Ma te ai mura ra, i te tuku anga mai i te mate i te aronga kare i kite i te Atua, e tei kore i akarongo i te evangelia o to tatou Atu o Iesu Mesia.”—2 Tesalonia 1:5-8.
9, 10. (a) Akapeea a Iehova i te tuku anga e kia autu a Iuda ki rungao i tona enemi? (e) Eaa ta te au Kerititiano i teia tuatau ka tau kia rave mou atu rai?
9 I te mate maata e aere maira, ka taopenga ia kia Aramakito, ka tamaki atu a Karaiti i te au kino ravarai. Inara kare tana au pipi e anoanoia i te tamaki atu, e pera katoa kare teia i anoanoia no te au tangata o nga kopu e rua o te patireia o Iuda i te au tauatini mataiti i topa akenei. Na Iehova te tamakianga, e nana i tuku i te autuanga. Te tatau ra te rekoti: “Kua tuku a Iehova i te kotipu e rave i te tamariki a Amona, e ia Moabi, e i te maunga ra i Seira, tei aere mai e tamaki ia Iuda; e kua ta ia ratou uaorai. Kua tamaki atura te tamariki a Amona e Moabi i to te maunga ra to Seira, e ta e kia pou takiri rava ratou: e pou akera to te maunga ra to Seira, kua tupae ua atura i te tainga ia ratou uaorai. E tae atura to Iuda ki te punanga tiaki anga i te medebara, kua akara atura ratou i taua aronga maata ra, e i na, e aronga kopapa mate anake i topaia ki runga i te one, kare rava i ora.”—2 Paraleipomeno 20:22-24.
10 Kua tano tikai ki ta Iehova i totou ra: “Kare kotou e tamaki i tenana.” (2 Paraleipomeno 20:17) Kua akanoo teia i te tu akaraanga no te au Kerititiano kia aru me aere mai a Iesu Karaiti i te “upoko atu e kia upokotu atu rai.” I taua taime rai, ka tamaki ua atu ratou i te kino, kare ma te au apinga tamaki, ma te au apinga pae vaerua ra. Kua rave iora ratou e ‘kia mate ra te kino ia ratou i te meitaki.’—Roma 6:13; 12:17-21; 13:12; 2 Korinetia 10:3-5.
Naai e Arataki i ta Goga Tamakianga?
11. (a) Eaa te au rima rave ta Goga ka taangaanga no te akono atu i tana tamakianga? (e) Eaa te kapiti maira ki roto i te vai araara anga i te pae vaerua?
11 Kua akatakaia mai a Goga o Magoga e ko Satani te Tiaporo i roto i tona turanga tau kore mei te 1914 maira. Ei vaerua, kare e rauka iaia i te rave tika atu i tana tamakianga, inara ka taangaanga aia i te au rima rave tangata kia rave i tona au anoano. Koai ma teia au rima rave tangata? Kare te Pipiria i akataka tikai mai kia tatou i te reira, inara te oronga maira te reira kia tatou i tetai au akakiteanga te ka tauturu ia tatou kia akataka e koai ma ratou. I te au tupuanga o te ao e akatupu ra i te au totou Pipiria, ka kite marie tatou i tetai tutu taka meitaki atu. E kopae ana to Iehova iti tangata i te tamanakoanga inara te vai araara ua ra i te pae vaerua, te kite anga tikai i te au tupuanga i te pae poritiki e te akonoanga te tau ra ki te tupuanga o te totou Pipiria.
12, 13. Akapeea te peroveta ko Daniela i te totouanga i te tamakianga openga ki rungao i to te Atua iti tangata?
12 Te akakite maata maira te peroveta ko Daniela no runga i tetai tamaki anga openga i rotopu i to te Atua iti tangata, te tataanga: “E aere ei aia [te ariki o te apatokerau] ma te riri maata kia pou, e kia ngaro rava atu te tangata e manganui. E tatangi oki aia i te puakapa o tona are ariki ki rotopu i nga tai ra ki runga i te maunga tapu kakā ra.”—Daniela 11:44, 45.
13 I roto i te aerenga manako o te Pipiria, te “ngai tai ra” ko te Tai Maata ia, me kore ko Metiterenia, e ko “te maunga tapu” ko Ziona, no te reira te tuatua ra a Iehova: “Kua akatainu ra au i taku ariki i runga i toku maunga tapu ra, i Ziona.” (Salamo 2:6; Iosua 1:4) Ko teia, i te pae vaerua, te enua “ki rotopu i nga tai ra ki runga i te maunga tapu” te komono maira i te au enua ruperupe i te pae vaerua o te au Kerititiano akatainuia. Kare ratou i akatakaia e ko tetai o te au tangata tikai tei akatakake mei te Atua, e te tapapa atu nei ratou i te tutara atu anga ma Iesu Karaiti ki roto i te Patireia i te rangi ra. Te taka meitaki ra, ka riro te au tavini akatainuia o te Atua, e pera to ratou au taeake tiratiratu o te aronga maata rava, ei takete na te ariki o te apatokerau me akamata aia i tana tamaki anga kino i te akatupuanga i ta Daniela totou.—Isaia 57:20; Ebera 12:22; Apokalupo 14:1.
Akapeea to te Atua Au Tavini i te Ariu Anga Atu?
14. Eaa nga apinga e toru ka rave te iti tangata o te Atua me tamakiia atu?
14 Eaa te ka tapapaia no te au tavini o te Atua kia rave me tamakiia atu ratou? Akaou, ko tei raveia e to te Atua pa enua i te tuatau o Iehosaphata e akanoo mai i te akaraanga. Ka akara ana e kua akaueia tona iti tangata kia rave e toru apinga: (1) e akamou ua kotou, (2) e tu ua mai, e (3) akara i te ora a Iehova. Ka akapeea to te Atua iti tangata i te angaanga anga ma te rotai ki teia au tuatua?—2 Paraleipomeno 20:17.
15. Eaa te aiteanga no te iti tangata o Iehova kia akamou i to ratou turanga?
15 E akamou ua kotou: Ma te kore e ngaueue, ka mou ua atu to te Atua iti tangata i to ratou turanga ei aronga turuturu maroiroi i te Patireia o te Atua. Ka akono tamou ua atu ratou i to ratou turanga neutara ei Kerititiano. Ka ‘maroiroi [ratou], auraka e ngaueue’ i roto i ta ratou angaanga tiratiratu kia Iehova e ka rave ua atu i te ngai tangata i te akapaapaa ia Iehova no tona aroa takinga meitaki. (1 Korinetia 15:58; Salamo 118:28, 29) Kare te taomianga i teianei me kore a te tuatau ki mua e akakeukeu ia ratou mei to ratou turanga ariki tu-Atua.
16. Na roto i teea turanga ka tu ua ei te au tavini o Iehova?
16 E tu ua mai: Kare te au tavini o Iehova e tauta i te akaora ia ratou uaorai mari ra ka tuku i to ratou irinakianga pu tikai ki roto ia Iehova. Koia anake ka rauka i te akaora i tona au tavini ki vao i teia ao marikonga kore, e kua taputou mai aia i te rave i te reira. (Isaia 43:10, 11; 54:15; Aue o Ieremia 3:26) Ka kapiti mai ki roto i te irinakianga ia Iehova te aerenga akara mataia i teia tuatau tana e taangaanga meitaki ra no etai ngauruanga mataiti kia rave i tana au akakoroanga. Kare mei mua ana, ka anoanoia te au Kerititiano mou kia tuku i to ratou irinaki ki roto i te au taeake akamori tei akamanaia e Iehova e tona Ariki tutara kia akono i te aratakianga. Ka arataki teia au tangata tiratiratu i to te Atua iti tangata. Kopaeanga i ta ratou ikuikuanga ka taopenga ki roto i te tumatetenga.—Mataio 24:45-47; Ebera 13:7, 17.
17. Eaa ra te tavini tiratiratu o te Atua ka akara ei i te ora a Iehova?
17 E akara i te ora a Iehova: Ko te ora te tutaki anga no te aronga tei mou i to ratou turanga tiratiratu ei Kerititiano e tei irinaki ki roto ia Iehova no te ora. E tae ei ki te ora openga—i te ka rauka ia ratou—ka akakite ratou i te taeanga mai o te ra akavaanga o Iehova. Kia kite te au mea angaia e ko Iehova te Atua mou e e au tavini tiratiratu tona i te enua nei. Kare rava e anoanoia kia taroaroaia te maroanga no runga i te tu tika tikai o to Iehova mana ngateitei.—Ezekiela 33:33; 36:23.
18, 19. (a) Akapeea te imene autuanga i roto ia Exodo pene 15 i te akaataanga mai i te au manako ngakau o te aronga te ka ora atu i ta Goga tamakianga? (e) Eaa tei tau no te iti tangata o te Atua kia rave i teianei?
18 Ma te maroiroi akaouia, ka tomo atu te iti tangata o te Atua ki roto i te ao ou, te maroiroi ra i te imene i te imene autuanga, mei to Iseraela taito ra i muri mai i te akaora angaia ratou na roto i te Tai Muramura. Ma te ariki mutu kore ia Iehova no tana paruruanga, ei aronga tataki tai me kare ei pupu, ka akakite ratou ma te reo maata i te au tuatua i topa: “E peʼe au ia Iehova, kua teitei roa oki aia. . . . E toā Iehova i te tamaki: ko Iehova tona ingoa. . . . na to rima katau, e Iehova, i akaparuparu i te enemi. Kua uritumuia e koe tei māro mai ia koe, i te maata o toou ra mana; kua tuku atura koe i toou riri, pou iora ratou mei te teita ra. . . . Kua akatika iora koe i toou rima katau, e apukuia iora ratou e te enua nei. E arataki rai koe i te au tangata nei ma to takinga meitaki, i tei akaoraia e koe ra; e arataki rai koe ia ratou ki toou ra nooanga tapu i to ririnui. . . . Ko ratou taau e apai ki roto, e naau ratou e akamou i te maunga i nooia e koe ra, i te ngai i akonoia e koe, e Iehova, ei nooanga noou ra, i te ngai-tapu, e te Atu, ta toou rima i akamou ra. Ei ia Iehova te au e tuatau e tuatau ua atu.”—Exodo 15:1-19.
19 Teianei ma te manakonakoanga o te ora mutu kore e kitea taka meitakiia ra i to mua ana, mei teaa ra te tuatau tau no te au tavini o te Atua kia akaari i ta ratou akamorianga kia Iehova e kia akaou i to ratou aruaruanga kia tavini iaia e ko to ratou Ariki mutu kore!—1 Paraleipomeno 29:11-13.
Ka Rauka Ainei ia Koe i te Akataka?
• Eaa ra ta Goga tamaki ka akatanoia atu ei ki te aronga akatainuia e te mamoe ke atu?
• Akapeea te iti tangata o te Atua i te akamou anga i to ratou turanga?
• Eaa te aiteanga e kia tu ua mai?
• Akapeea to te Atua iti tangata i te akara anga i te ora a Iehova?
[Tutu i te kapi 18]
Kua tuku a Iehova e kia autu a Iehosaphata e tona iti tangata, kare ratou e anoanoia i te tamaki atu
[Tutu i te kapi 20]
Rave kapipiti te aronga akatainuia e te mamoe ke atu i te turu i to Iehova mana ngateitei
[Tutu i te kapi 22]
Mei ia Iseraela taito ra, kare e roaia atu ka imene te iti tangata o te Atua i te imene autuanga