“Ko te Atua Oki te Aroa”

“Ko tei kore e aroa ra, kare ïa i kite i te Atua; ko te Atua oki te aroa.”​—1 IOANE 4:8.

1-3. (a) Eaa te akakite anga ta te Pipiria i karanga no runga i te tu aroa o Iehova, e na roto i teea mataara i takake ei teia akakite anga? (e) Eaa ra te Pipiria i karanga ei e “ko te Atua oki te aroa”?

E TEITEI tikai te au tu pouroa o Iehova, te tiama, e te tau tikai. Inara ko te mea akaperepere maata roa atu o te au tu katoatoa o Iehova ra ko te aroa. Kare atu e apinga ke te ka akavaitata ririnui atura ia tatou kia Iehova mei tona aroa ra. Ma te mataora, ko te aroa katoa tona tu maata. Akapeea tatou i te kite anga i te reira?

² Te karanga ra te Pipiria i tetai apinga no runga i te aroa e kare rava te reira e tuatua ana no runga i tetai atu au tu maata o Iehova. Kare te au Tuatua Tapu e karanga ana e ko te Atua te mana me kore ko te Atua te tuatua tau e me kare ko te Atua te pakari. Kua rauka iaia taua au tu ra, koia oki te tumu tikai no ratou, e kare e akaaiteia atu no runga i teia nga mea e toru. Inara, no runga i te aroa, te tuatua oonuia ra tetai apinga ia 1 Ioane 4:8: “Ko te Atua oki te aroa.” Ae, te vai oonu ra te aroa i roto ia Iehova. Ko tona tu tika me kore tu natura te reira. Tei matauia, penei ka manako tatou i te reira na teia tu: Te akariro ra to Iehova mana iaia kia angaanga. Te arataki ra tona tuatua tau e tona pakari i tana au tu akono anga. Inara, te akakeu ra to Iehova aroa iaia kia rave angaanga. E te vai ua ra tona aroa i roto i tana taangaanga anga i tetai atu o tona au tu.

³ Te tuatua putuputuia ra e ko Iehova tikai te tu o te aroa. No reira, me inangaro tatou i te apii no runga i te aroa, kia apii tatou no runga ia Iehova. No reira, ka akara matatio ana tatou i etai au tu o to Iehova aroa aiteite koreia.

Te Rave Anga Maata Roa Atu o te Aroa

4, 5. (a) Eaa te rave anga maata roa atu no te aroa i roto i te tuatua enua katoatoa ra? (e) Eaa ra ka rauka ai ia tatou i te tuatua e te taokotai ra a Iehova e tana Tamaiti na te pirianga ketaketa no te aroa tei akapiriia?

⁴ Kua akaari mai a Iehova i te aroa na roto i te au mataara e manganui, inara e tai ua rai tei maata roa atu i te katoatoa. Eaa te reira? Te tuku mai anga aia i tana Tamaiti kia mamae e kia mate no tatou. Ka rauka ia tatou i te tuatua ma te tika e ko teia te rave anga maata roa atu o te aroa i roto i te tuatua enua katoatoa. Eaa ra i rauka ai ia tatou i te tuatua i teia?

⁵ Te tapa ra te Pipiria ia Iesu ‘ko te tama mua o te au mea ravarai i angaia ra.’ (Kolosa 1:15) Ka akamanako ana​—kua vai ana ta Iehova Tamaiti i mua ake i te ao tikai e pini ua ake. Mei teaa te roa i te noo kapiti anga te Metua e te Tamaiti? Kua manako etai aronga taineti e 13 pirioni mataiti o te ao katoa e pini ua ake. Inara, noatu me te tika ra teia tamanako anga, kare e roa ana kia akatutu mai i te ora anga o te Tamaiti mua a Iehova! Eaa tana i rave i roto i te roa anga o taua tuatau? Kua angaanga mataora ua te Tamaiti ei “pu rave angaanga” no tona Metua. (Maseli 8:30, NW; Ioane 1:3) Kua angaanga kapipiti a Iehova raua ko tana Tamaiti i te akatupu anga mai i te au mea. Mei teaa te rekareka i to raua tuatau! Koai, i reira, ia tatou ka marama i te mana o tetai pirianga tei vai ana no etai tuatau roa? Te taka meitaki ra, e te taokotaiia ra te Atua ko Iehova e tana Tamaiti e te tatua ketaketa roa atu o te aroa tei akanooia.

6. I te papetito angaia, akapeea a Iehova i te akakite anga i tona manako ngakau no Tana Tamaiti?

⁶ Noatu rai, kua tuku mai a Iehova i tana Tamaiti ki te enua nei kia anauia mai ei pepe tangata. I te raveanga i te reira te aite anga kua tuku ua atu a Iehova no etai ngauru mataiti i tona pirianga vaitata ma tana Tamaiti akaperepere i te rangi ra. Ma te inangaro oonu, kua akara mai Aia mei te rangi ra ia Iesu e maata maira ei tangata tiama. Vaitata i te 30 mataiti, kua papetitoia a Iesu. I taua atianga ra kua tuatua mai te Metua mei te rangi ra: “Taku Tamaiti akaperepere teia, kua mareka rava au iaia.” (Mataio 3:17) I te kiteanga e kua rave tiratiratu a Iesu i te au mea ravarai tei totouia, te au mea ravarai tei patiia nona ra, kua mareka tikai tona Metua!​—Ioane 5:36; 17:4.

7, 8. (a) Eaa ta Iesu i na roto atu ia Nisana 14, 33 T.N., e akapeea tona Metua i te rangi i te akakino angaia? (e) Eaa ra a Iehova i akatika ai i tana Tamaiti kia mamae e kia mate?

⁷ Eaa, i reira, to Iehova manako ia Nisana 14, 33 T.N., ia Iesu i te pikikaa angaia e oti kua opuia e tetai urupu riri? I te akavaavaa angaia a Iesu, te tutua angaia, e te moto angaia? I te papa angaia aia, kua veruveru te kiko o tona mokotua? I te patiatia angaia aia, ma te nga rima e te nga vaevae, ki tetai poupou rakau e kua akarukeia kia tautau ki reira koi akakino atu ei te tangata iaia? Eaa to te Metua manako i te kapiki anga atu tana Tamaiti akaperepere kiaia no te mamae ra? Eaa to Iehova manako i te akaea openga anga a Iesu, e no te taime mua mei te akamata anga mai o te kapua anga, kua mate Tana Tamaiti akaperepere ra?​—Mataio 26:14-16, 46, 47, 56, 59, 67; 27:26, 38-44, 46; Ioane 19:1.

⁸ I te mea e manako ngakau to Iehova, te mamae tei tupu kiaia no te matenga o tana Tamaiti kare e rauka ia tatou i te tuatua. Ko te ka rauka i te tuatuaia ko te tumu i akatika ei a Iehova i te reira kia tupu. Eaa ra te Metua i tuku ua atu ei iaia kia kite i taua tu mamae ra? Te akakite maira a Iehova i tetai apinga meitaki kia tatou ia Ioane 3:16​—e irava Pipiria puapinga tikai e kua tapaia e ko te Evangeria meangiti ua. Te karanga ra e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” No reira ko to te Atua tumu ko teia: ko te aroa. Kare roa tetai aroa maata atu i akaariia ana.

To Iehova Akapapu Mai Anga i Tona Aroa kia Tatou

9. Eaa ra ta Satani e inangaro ra kia irinaki tatou no runga i to Iehova manako no tatou ra, inara eaa ra ta Iehova i akapapu mai kia tatou?

⁹ Inara, te mama maira tetai ui anga puapinga: Te aroa maira ainei te Atua ia tatou nei? Te akatika ra etai e te aroa maira te Atua i te au tangata ravarai, mei ta Ioane 3:16 e karanga ra. Inara te manako ra ratou, i te tika anga: ‘Kare rava te Atua e aroa mai iaku ei tangata tataki tai.’ Te tika anga e te inangaro ra a Satani te Tiaporo ia tatou kia irinaki e kare te Atua ko Iehova e aroa mai ana ia tatou e kare rai e akaperepere mai ana ia tatou. I tetai tua ra, e noatu e te manako ra tatou e kare e aroaia me kore e puapinga kore ua tatou, te akapapu maira a Iehova kia tatou e te manako puapinga maira aia i tona au tavini akarongo takitai.

10, 11. Akapeea ta Iesu akatutu anga o te au manu rikiriki i te akaari anga mai e puapinga to tatou i roto i nga mata o Iehova?

¹⁰ Ei akaraanga, e akamanako ana i te au tuatua a Iesu tei tataia ia Mataio 10:29-31. I te akatutu anga i te puapinga o tana au pipi, kua tuatua Iesu e: “Kare aina e taki rua mea manu rikiriki e okoia i te asario okotai nei? kare oki tetai o ratou ra e ngaro i to kotou Metua kia topa ki raro i te enua. Te rauru oki o to kotou na upoko, kua ope ïa i te tatauia. Auraka mari kotou e mataku, e maata to kotou meitaki i to te au manu rikiriki e manganui.” Ka akamanako i te aite anga o taua au tuatua ki ta Iesu aronga akarongo o te anere mataiti mua.

¹¹ I to Iesu tuatau ko te au manu rikiriki tetai manu mama roa atu tei okoia ei kai. Ko tetai moni toka iti ua te puapinga, kua rauka i te tangata oko e rua nga manu rikiriki. Inara kua akakite a Iesu i muri mai, tei tau kia Luka 12:6, 7, me kua papa tetai tangata i te akapou e rua moni toka, kua rauka iaia, kare e a manu rikiriki, mari ra e rima. Kua orongaia atu tetai manu mei te mea rai e kare te reira e puapinga roa ana. Penei e mea puapinga kore taua au manu i roto i nga mata tangata, inara eaa oki to Tei Anga manako no te reira? Kua tuatua a Iesu: “Kare rai tetai [kare rai tetai tei kapitiia atu] i ngaro i te Atua.” Teianei penei ka kite atu tatou i to Iesu manako. Mei te mea kua tuku a Iehova i te puapinga ki runga i tetai manu rikiriki okotai, mei teaa atura te puapinga i te tangata! Mei ta Iesu i akamarama ra, kua kite taka meitaki oki a Iehova ia tatou tataki tai. Eaa ra, kua tatauia to tatou au rauru!

12. Eaa i papu ei ia tatou e e tika ta Iesu i te tuatua anga aia no te au rauru o to tatou upoko tei tatauia?

¹² Te manako ra etai e te tuatua akarava ua ra a Iesu. Inara, ka akamanako ana, no runga i te manakonakoanga o te tuakaou anga. Mei teaa te piri vaitata o to Iehova kite anga ia tatou e raukai i te anga akaou mai ia tatou! Te akaperepere maata ra aia ia tatou e kua maara taka meitaki iaia te au tu ravarai, kapiti mai to tatou akapapaanga tu ngata i te kite e to tatou au manako e te au kite anga ravarai. Te tatauanga i to tatou au rauru​—no te reira i te avereti te tupu ra i runga i te upoko vaitata e 100,000​—e angaanga ngoie uaia me akaaiteia atu. Mei teaa ra te manea tikai i ta Iesu au tuatua i te akapapu mai anga kia tatou e te manako tikai maira a Iehova ia tatou ei aronga tataki tai!

13. Akapeea te tupu anga o te Ariki ko Iehosaphata i te akaari anga mai e te akara ra a Iehova i te meitaki i roto ia tatou noatu me ara tatou?

¹³ Te akaari maira te Pipiria i tetai apinga ke atu i te akapapu anga kia tatou i to Iehova aroa. Te akara ra aia i te puapinga e te meitaki i roto ia tatou. Ka akara ana, ei akatauanga, i te ariki meitaki ko Iehosaphata. I te raveanga te ariki i tetai angaanga neneva, kua akakite atu te peroveta a Iehova kiaia: “I tupu ei te riri ia koe no ko mai ia Iehova.” Mei teaa te tau i taua manako! Inara kare i ope ta Iehova tuatua i reira. Te na ko ra: “Te vai nei rai te au mea meitaki i roto ia koe ra.” (2 Paraleipomeno 19:1-3) No reira kare to Iehova tu riri tuatua tika i akamatapo iaia mei te meitaki o Iehosaphata. Kare ainei ei akapapu anga i te kite e te akara ra to tatou Atua i te meitaki i roto ia tatou noatu e e aronga ara tatou?

E Atua Tei ‘Tika i te Akakore i te Ara’

14. Me ara tatou, eaa te au manako ngakau no te apainga teiaa ta tatou ka kite, inara akapeea ra tatou e puapinga ai mei te tu akakore ara o Iehova?

¹⁴ Me ara tatou, te tu mareka kore, te akama, e te manako akaapa e kite ra tatou penei ka akatupu kia manako tatou e kare rava tatou e puapinga i te tavini ia Iehova. Inara, e maara ra, e ‘kua tika [ia Iehova] i te akakore mai i te ara.’ (Salamo 86:5) Ae, me tataraara tatou i ta tatou au ara e te tauta pakari ra e auraka e rave akaou i te reira, penei ka akameitakiia mai tatou i te akakore anga a Iehova i te ara. E akamanako ana e akapeea te Pipiria i te akataka anga mai i teia tu umere no to Iehova ra aroa.

15. Mei teaa te mamao mei ia tatou ta Iehova tuku anga i ta tatou au ara?

¹⁵ Kua taangaanga te tata taramo ko Davida i tetai akakite anga tika kia akataka mai i te tu akakore ara o Iehova: “Mei te mamao i te itinga mei te opunga, mei te reira te mamao Tona akaatea anga i ta tatou au ara mei ia tatou.” (Na matou te tuatua arara; Salamo 103:12, The Amplified Bible) Mei teaa te mamao i te itinga mei te opunga? Tera te tu, te mamao roa atura te itinga mei te opunga; kare rava nga ope e aravei ana. Kua akakite mai tetai tangata kite e ko te aite anga o teia tuatua “i te ngai mamao tika; i te ka rauka ia tatou i te akamanako.” Te akakite maira ta Davida au tuatua akauruia kia tatou me akakore a Iehova i te ara, te tuku mamao ra aia i ta tatou au ara mei ia tatou i ta tatou ka akamanako.

16. Me akakore a Iehova i ta tatou au ara, eaa ra tatou i tau ei kia kore e manako e te apai ra tatou i te kino o taua au ara no te toenga o to tatou oraanga?

¹⁶ Kua tauta ana ainei koe i te tama i te toutou mei tetai kakau maratea? Penei noatu taau tauta anga, te kitea uaia ra te toutou. Ka akara ana e akapeea a Iehova i te akataka anga mai i te maata o tona akakore anga i te ara: “Aite ua rai ta kotou au ara ki te mea kutekute ra, e teatea ïa mei te kiona ra; muramura ua rai mei te mea ekoeko ra, e riro ïa mei te uru-mamoe ra te teatea.” (Isaia 1:18) Te tuatua “kutekute” te akakite maira no runga i tetai kara toto kiore.a Te “muramura tou” ko tetai ia o te au kara tou tei taangaangaia no te akatou i te kakau.” Kare rava e rauka ia tatou i roto i ta tatou tauta anga i te tama i te toutou o te ara. Inara, ka rauka ia Iehova i te apai ke i te au ara mei te kutekute e te muramura tou e kia akariro ia raua kia teatea mei te kiona me kore mei tetai uruuru kare i akatouia. No reira me akakore a Iehova i ta tatou au ara, auraka tatou kia manako e ka apai aere tatou i te teiaa o taua au ara no te toenga o to tatou oraanga.

17. Na roto i teea tu ta Iehova titiri anga i ta tatou au ara ki muri i tona tua?

¹⁷ I roto i tetai imene akameitaki akakeu tei atuia e Hezekia i muri mai i te ora anga aia mei tetai maki kino, kua tuatua aia kia Iehova: “Kua akaruke koe i taku au ara katoa nei ki muri mai i to tua ra.” (Isaia 38:17) Te akatutuia nei a Iehova i konei e te apai ke ra i te au ara a tetai tangata rave ara tei tataraara e kua titiri i te reira ki muri Iaia e kare Aia e kite akaou atu i te reira e kare katoa e manako atu no runga i te reira. Kia tau ki tetai tataanga, te manako tei akakiteia penei ka tuatuaia: “Kua maani koe i [taku au ara] mei te mea rai e kare te reira i tupu ana.” Kare ainei te reira i te mea akapumaana anga?

18. Akapeea te peroveta ko Mika i te akakite anga e me akakore a Iehova i te ara, te akakore tamou ra Aia i ta tatou au ara?

¹⁸ I roto i tetai taputou no te akaoki akaou mai, kua tuatua te peroveta ko Mika no runga i tona tu irinaki e ka akakore a Iehova i te ara a tona iti tangata tataraara: “Koai ïa Atua e tau ia koe ra, . . . e te tutaki kore anga i te ara, a te toenga o tana ra tuanga? . . . Ka riro koe i te titiri i ta ratou au ara ravarai ki raro roa i te au ngai oonu o te moana.” (Mika 7:18, 19) Ka akamanako ana i te aite anga o taua au tuatua no te aronga e noo ra i te au tuatau o te Pipiria. Kua rauka ainei tetai tuatau no te rave akaou mai i tetai apinga tei titiriia “ki raro roa i te au ngai oonu o te moana”? No reira te akaari maira ta Mika au tuatua e me akakore a Iehova i te ara, te akaatea tamou ra aia i ta tatou au ara.

“Te Ngakau Aroa o to Tatou Atua”

19, 20. (a) Eaa te aite anga o te verepa Epera tei uriia “kia akaari i te aroa” me kare “kia tangi ua atu”? (e) Akapeea te Pipiria i te taangaanga anga i te manako ngakau o tetai mama no tana pepe kia apii mai kia tatou no runga i to Iehova tu ngakau aroa?

¹⁹ Ko te tu ngakau aroa tetai ake tu o to Iehova aroa. Eaa oki te tu ngakau aroa? I roto i te Pipiria, te vaira te pirianga vaitata i rotopu i te tu ngakau aroa e te tu akaaroa. Te akakite ra tetai au tuatua Epera e te Ereni i te tu ngakau aroa. Ei akaraanga, ka akamanako ana i te verepa Epera ra·chamʹ, tei taiku putuputuia e “kia akaari i te aroa” me kore “kia tangi ua atu.” Ko teia tuatua Epera, te taiku ra a Iehova kiaia uaorai, te piri atura ki te tuatua no te “kopu” e ka rauka i te akatakaia e ko te tu “ngakau aroa no te mama.”

²⁰ Te taangaanga ra te Pipiria i te manako ngakau o tetai metua vaine no tana pepe kia apii mai kia tatou no runga i te aiteanga o te tu ngakau aroa o Iehova. Ia Isaia 49:15, ka tatau tatou: “Ka akangaropoina ainei tetai vaine i tana tamaiti kai u, e kare atu ona ngakau aroa [ra·chamʹ] i te tamaiti a tona uaorai kopu? Ae, penei ka akangaropoinaia e ratou, kare ra au e akangaropoina ia koe.” (The Amplified Bible) Ka ngata i te akamanako e ka ngaropoina i tetai mama i te angai e te utuutu i tana tamaiti. I te mea ra e, kare e rauka i tetai pepe te tauturu iaia uaorai; i te po e te ao te umuumu ra te pepe i te akono anga a tona mama. Inara, ma te maromaroa, kare i manako koreia ana te kopae anga a te metua vaine, koia tikai i roto i teia “kino maata i taua tuatau.” (2 Timoteo 3:1, 3) “Kare ra au,” i na Iehova ei, “e akangaropoina ia koe.” Te tu ngakau aroa maru o Iehova no tona au tavini e pakari atu te reira i te manako natura ka rauka ia tatou i te akamanako​—te tu ngakau aroa te kite ra tetai metua vaine no tana tamaiti.

21, 22. Eaa ta te au Iseraela i kite i Aiphiti taito, e akapeea a Iehova i te ariu anga atu ki to ratou turanga mamae?

²¹ Akapeea a Iehova, mei tetai metua aroa rai, i te akaari anga i te tu ngakau aroa? Te kitea taka meitakiia ra te tu ngakau aroa o Iehova i roto i tana tu akono anga i te iti tangata o Iseraela. I te openga o te 16 anere mataiti M.T.N., e au mirioni ua atu te au Iseraela tei akatuikaaia i Aiphiti i taito ra, i reira kua takinokino pakariia ratou. (Exodo 1:11, 14) I roto i to ratou tu taitaia, kua aue maata atu to Iseraela kia Iehova. Akapeea to te Atua tu ngakau aroa i te ariu anga mai?

²² Kua akakeuia to Iehova ngakau. Kua tuatua aia: “Kua akara tikai au i te mate o toku iti-tangata i Aiphiti; e kua akarongo au i to ratou aue . . . kua kite oki au i to ratou mamae.” (Exodo 3:7) Kare i ekoko ana kua kite atu a Iehova i te turanga mamae o tona iti tangata me kare kua rongo atu i ta ratou aue anga ma te tangi anga ia ratou. E Atua ngakau tangi a Iehova. E ko te ngakau tangi​—te rauka anga i te kite atu i te mamae o tetai ke​—te piri vaitata atura ki te tu ngakau aroa. Inara, kare a Iehova i tangi ua atu i tona iti tangata; kua akakeuia ra aia kia rave angaanga no ratou. Te karanga ra a Isaia 63:9: “No tona inangaro e tona tangi i oko ei aia ia ratou.” Ma te “rima marōrō,” kua akaora atu a Iehova i to Iseraela mei Aiphiti ra. (Deuteronomi 4:34) Mei reira maira, kua oronga atu aia i te au kai temeio kia ratou e kua akaora atu ia ratou ki roto i tetai enua tupu meitaki no ratou uaorai.

23. (a) Akapeea te au tuatua a te tata taramo i te akapapu anga mai ia tatou e te manako oonu maira a Iehova no runga ia tatou ei au tangata tataki tai? (e) Na roto i teea mataara ta Iehova tauturu anga mai ia tatou?

²³ Kare a Iehova i akaari i te tu ngakau aroa ki tona iti tangata anake ua ei pupu. Te manako oonu maira to tatou Atua aroa ia tatou tataki tai. Te kite maira aia i etai au tu mamae te aere ra tatou na roto. Kua tata te tata taramo e: “Tei te aronga tuatua-tika ra to Iehova mata, e tei ta ratou kapiki tona taringa. Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.” (Salamo 34:15, 18) Akapeea a Iehova i te tauturu anga ia tatou tataki tai? Kare aia e akaatea ana i te tumu tikai o to tatou tu mamae. Inara kua oronga mai aia i te au apinga e manganui no te aronga te aue ra kiaia no te tauturu. Tana Tuatua te oronga maira i te ako anga tau te akono ra i te tuke anga. I roto i te putuputuanga, te oronga maira a Iehova i te au akaaere tau i te pae vaerua, te tauta ra i te akaata i tona tu ngakau aroa i te tauturuanga i te au taeake akamori. (Iakobo 5:14, 15) Ei “akarongo i te pure,” te oronga maira aia i te ‘vaerua tapu i te aronga e pati atu iaia ra.’ (Salamo 65:2; Luka 11:13) No teia au apinga nei e au tutu ratou no “te ngakau aroa o to tatou Atua.”​—Luka 1:78.

24. Akapeea koe me ariu atu ki to Iehova tu aroa?

²⁴ Kare ainei i te mea rekareka i te akamanako anga i te aroa o to tatou Metua i te rangi ra? I te atikara i mua akenei, kua akamaaraia tatou e kua akono a Iehova i tona mana, tona tuatua tau, e tona pakari na roto i tetai au mataara aroa kia akapuapinga ia tatou. E i roto i teia atikara nei, kua kite tatou e kua akakite tika ua mai a Iehova i tona aroa no te au tangata ravarai​—e no tatou tataki tai​—na roto i te au mataara umere tikai. I teianei, e mea tau kia ui tatou tataki tai e, ‘Akapeea au i te ariu anga atu ki to Iehova tu aroa?’ Kia ariu koe na te aroaanga iaia ma toou ngakau katoa, meta, manako, e te maroiroi. (Mareko 12:29, 30) Kia akono koe i toou oraanga i te au ra tataki tai i te akaata anga i toou anoano ngakau tae kia akavaitata atu kia Iehova. E kia akavaitata ua mai a Iehova, te Atua no te aroa, kia koe​—e tuatau ua atu!​—Iakobo 4:8.

[Tataanga Rikiriki i Raro]

Maara Ainei ia Koe?

• Akapeea ra tatou i kite ei e te aroa oki ko to Iehova tu maataia?

• Eaa ra ka rauka ai i te tuatuaia e i to Iehova tuku mai anga i tana Tamaiti kia mamae e kia mate no tatou nei ko te rave anga maata roa atuia no te aroa tei raveia ra?

• Akapeea a Iehova i te akapapu mai anga kia tatou e te aroa maira aia ia tatou tataki tai?

• Eaa te au tu tika ta te Pipiria i akataka mai no te tu akakore ara o Iehova ra?

[Tutu i te kapi 15]

‘Kua oronga mai te Atua i tana Tamaiti anau tai’

[Tutu i te kapi 16]

“E maata to kotou meitaki i to te au manu rikiriki e manganui”

[Akameitakianga]

© J. Heidecker/VIREO

[Tutu i te kapi 18]

Te au manako ngakau o tetai metua vaine no tana pepe ra ka rauka i te apii mai kia tatou no runga i to Iehova tu ngakau aroa