Eaa te Tika no Runga i te au Angera?

Inangaro a Iehova kia kite tatou i tona pamiri i te rangi. Ko te au angera, tei kapikiia ko “te au tamariki a te Atua.” (Iobu 38:7) Eaa ta te Pipiria e akakite ra no te au angera? Eaa ta ratou ka rave no te tangata? E pamiri ainei te au angera no te Atua?

1. Koai mā te au angera?

Kua anga a Iehova i te au angera i mua ake i te enua. Mei iaia rai, e au vaerua ratou e noo ra i te rangi. (Ebera 1:14) E mirioni ua atu au angera e tona uaorai tu. (Apokalupo 5:11) Ka ‘akono ratou i ta Iehova akaue anga, te akarongo anga i tona reo.’ (Salamo 103:20) I te tuatau taito, ka tono a Iehova i te au angera kia apai i tana karere no te tauturu e te akaora i tona iti tangata. I teia tuatau, te arataki ra te au angera i te au Kerititiano ki te aronga te inangaro ra i te apii no runga i te Atua.

2. Koai a Satani e tana au temoni?

Kare tetai au angera i vai tiratiratu ana kia Iehova. Te angera mua tei meameaau “tei karangaia i te diabolo ra, e ko Satani oki, ko tei pikikaa i to te ao katoatoa nei.” (Apokalupo 12:9) Kua inangaro a Satani i te tutara i tetai ke, no reira kua akavare aia i te nga tangata mua e kua piri katoa tetai au angera ki tana meameaau anga. Kua kapikiia teia au angera meameaau, ko te au temoni. Kua uriia ratou e Iehova ki vao ki te enua nei e ka takoreia.​—E tatau ia Apokalupo 12:9, 12.

3. Akapeea a Satani e te au temoni me akavare ia tatou?

Ka akavare a Satani e te au temoni i te tangata na roto i te angaanga purepure, koia oki te peu kino kia tuatua ki te au vaerua kino. Ei akaraanga, ka aravei tetai pae i te aronga akara etu, te aronga kimi manuia, te au tauraatua, e te au taunga manamana. Ka kimi tetai pae i te rapakau anga te ō maira te angaanga purepure. Ka akavare katoaia te tangata kia irinaki e ka rauka ia ratou i te tuatua ki te aronga mate. Inara te akamatakite maira a Iehova: “Auraka kotou e akono i te au vaerua kino ra, e auraka e kimi i te purepure.” (Levitiku 19:31) Kua akamatakite mai aia kia paruru ia tatou mei ia Satani e te au temoni. E au enemi ratou no te Atua e ka takinokino ratou ia tatou.

KIMI OONU

4. Tauturu te au angera i te tangata kia apii no runga ia Iehova

Kare te au angera e tutu aere ana ki te tangata. Mari ra, ka arataki ratou i te au tavini o te Atua kia apii ki te tangata te inangaro ra i te kite iaia. E tatau ia Apokalupo 14:6, 7, e oti uriuri i teia au uianga:

• Eaa tatou ka anoano ei i te tauturu a te au angera no te tutu aere?

• Te akamaroiroi ra ainei teia ia koe te kite e ka arataki te au angera ia koe ki te aronga te ka akarongo ki te Pipiria? Eaa te tumu?

5. E kopae i te angaanga purepure

E enemi a Satani e te au temoni no Iehova. E au enemi katoa ratou no tatou. E tatau ia Luka 9:​38-42, e oti uriuri i teia uianga:

• Eaa ta te au temoni ka rave ki te tangata?

Kare tatou e āriki i te au temoni ki roto i to tatou oraanga. E tatau ia Deuteronomi 18:​10-12, e oti uriuri i teia au uianga:

• Eaa ta te au temoni ka rave ei akavare e te tuatua kia tatou? Eaa te au peu tei matauia i toou ngai?

• E mea tau ainei kia koe e te patoi pakari ra a Iehova i te angaanga purepure? Eaa te tumu?

Akatangi i te VITIO, e oti uriuri i te au uianga ka aru mai.

VITIO: “Patoi Atu i te Diabolo” (5:02)

• I toou manako e apinga kino ainei te ei manamana i runga i te tamaine a Palesa? Eaa te tumu?

• Eaa ta Palesa ka rave no te paruru iaia mei te au temoni?

E patoi ua ana te au Kerititiano mou i te au temoni. E tatau ia Angaanga 19:19 e 1 Korinetia 10:21, e oti uriuri i teia uianga:

• Eaa i puapinga ai kia takore takiriia te au apinga purepure?

6. Kia autu ua atu i te tamaki ia Satani e tana au temoni

Te tutara ra a Satani i te au temoni. Inara te aratakiia nei te au angera tiratiratu e te angera maata ko Mikaela, koia a Iesu. Mei teaa rai te ririnui o Mikaela? E tatau ia Apokalupo 12:​7-9, e oti uriuri i teia au uianga:

• Koai tei ririnui atu? Ko Mikaela e tana au angera me ko Satani e tana au temoni?

• I toou manako ka anoanoia ainei te au pipi a Iesu kia mataku ia Satani e tana au temoni?

Ka autu koe i te tamaki kia Satani e tana au temoni. E tatau ia Iakobo 4:7, e oti uriuri i teia uianga:

• Akapeea koe me paruru ia koe uaorai mei ia Satani e te au temoni?

APIIANGA

Ka tauturu te au angera tiratiratu ia tatou. E au enemi a Satani e tana au temoni no Iehova, e te taangaanga ra ratou i te angaanga purepure no te akavare i te tangata.

Uriurianga

• Akapeea te au angera a Iehova te tauturu anga i te tangata kia apii no runga iaia?

• Koai a Satani e tana au temoni?

• Eaa koe ka kopae ei i te angaanga purepure?

KIMI KIMI

Apii kia kite i te tuatua mou e ko Iesu, te angera maata ko Mikaela.

“Koai te Angera Maata ko Mikaela?” (Web atikara)

Akamanako ana i te akapapu anga e te vaira te Tiaporo.

“E Tika Tikai Ainei te Tiaporo?” (Web atikara)

Akara akapeea tetai vaine te matara anga mai mei te akanauru anga a te au temoni.

“Kiteaia e Ia Tetai Akakoro Anga i te Oraanga” (Te Punanga Tiaki, Tiurai 1, 1993)

Apii kia kite akapeea a Satani te akavare anga i te tangata na roto i te angaanga purepure.

“Te Tika no Runga i te Angaanga Manamana e te Purepure” (Te Mataara ki te Ora Mutu Kore, tuanga 5)