“Koai tei Tau ki to Tatou Atua kia Iehova?”
“Koai tei tau ki to tatou Atua kia Iehova? ko tei noo i te ngai teitei.”—SALAMO 113:5.
1, 2. (a) Eaa te manako o te Au Kite o Iehova no te Atua e te Puka Tapu? (e) Eaa nga uianga te tau ra kia akamanakoia?
KUA akameitakiia te aronga akapaapaa ia Iehova. Mei teaa ra te meitaki kia riro ki roto i teia pupu mataora! Ei Au Kite nona, ka ariki tatou i te ako, te au ture, te au apiianga, te au taputou, e te au totou no ta te Atua ra Tuatua, koia te Puka Tapu. Te mataora nei tatou i te kite no te au Tuatua Tapu e kia riro e “na Iehova e apii.”—Ioane 6:45, NW.
2 No to ratou manako akatapu oonu i te Atua ra, kua rauka i te Au Kite o Iehova i te ui: “Koai tei tau ki to tatou Atua kia Iehova?” (Salamo 113:5) Te akakite maira te reira au tuatua a te tata taramo i te akarongo. Inara eaa i raukai i te Au Kite te reira tu akarongo i te Atua ra? E eaa ta ratou au tumu no te akapaapaaanga ia Iehova?
Te Tau ra te Akarongo e te Akapaapaa
3. Eaa nga Salamo Areru ra, e eaa ra ratou i tapaiaʼi i taua ingoa ra?
3 E mea mana tikai te akarongo ia Iehova no te mea koia anake te Atua mei tona rai te tu. Kua akaketaketaia mai te reira i roto ia Salamo 113, 114, e te Salamo 115 ra, ko tetai tuanga ia o nga Salamo Areru. Kia tau ki ta te Apii rapi a Hillel ra, kua imeneia nga Salamo 113 e te 114 i te tuatau o te oroa Pata ngati Iuda ra i muri ake i te riringi akaki angaia te rua o te kapu uaina e te akataka anga i te puapinga maata o te akono anga i te reira. Kua imeneia nga Salamo 115 aere atu ki te 118 i muri ake i te a o te kapu uaina ra. (Akaaiteia atu kia Mataio 26:30.) Kua tapaia ratou ko “Nga Salamo Areru” no te putuputu ta ratou taiku anga i te tuatua Areru Ia!—“Akapaapaa ia Ia!”
4. Eaa te aiteanga o te tuatua “Alelu Ia,” e eaa te putuputu o te taiku angaia te reira i te Puka Tapu ra?
4 “Alelu Ia” e urianga ia i te tuatua Epera te kiteia ra e 24 taime i roto i te au Salamo ra. I etai atu ngai i roto i te Puka Tapu, ka kiteia te tu i te reo Ereni e a taime no runga i te rekareka anga no te akapou angaia a Babulonia Maata, koia te patireia o te akonoanga pikikaa o teianei ao, ma te rekareka anga kapiti katoaia i te akamataanga te Atua ra ko Iehova i te tutara ei Ariki. (Apokalupo 19:1-6) Ia tatou ka akara matatio i teianei i nga Salamo Areru e toru ra, ka tau katoa tatou kia manako e te imene ra tatou uaorai i eia nga imene akapaapaa ia Iehova ra.
Akapaapaa ia Ia!
5. Eaa te uianga te pauia ra ia Salamo 113, e te tau ra te akauenga ia Salamo 113:1, 2 kiaai ma tikai?
5 Te pau ra a Salamo 113 i te pauanga, Eaa ka akapaapaaʼi ia Iehova? Te akamata maira ia ma te akauenga: “Alelu Ia. Akapaapaa, e te au tavini o Iehova, e akapaapaa i te ingoa o Iehova. Kia akapaapaaia te ingoa o Iehova, i teianei, e e tuatatau ua atu.” (Salamo 113:1, 2) “Alelu Ia.” Ae, “Akapaapaa ia Ia!” Ko tera akauenga no te au tangata tikai o te Atua i teia “tuatau openga” nei. (Daniela 12:4) Mei teianei e e tuatau ua atu, ka akateiteiia te ingoa o Iehova i te enua katoa nei. Te akakitekite nei tona Au Kite i teianei e ko Iehova te Atua, ko Karaiti te Ariki, e kua oti te Patireia i te akanooia i te rangi ra. Kare e rauka ia Satani te Tiaporo e tana akaaerenga i te arai teia akapaapaaanga ia Iehova ra.
6. Akapeea te akapaapaa angaia a Iehova ‘mei te itinga ra ki te opunga ra’?
6 Ka rave uaia atu te imene akapaapaa kia akariroia roa e Iehova kia ki katoa te enua nei. “Mei te itinga mai o te rā e tae ua atu ki tona opunga, kia akapaapaaia te ingoa o Iehova.” (Salamo 113:3) E tere atu te aiteanga o teia i te akamori anga i te au ra tataki tai na tetai papaki ua o te au mea ora i te enua nei. Te iti maira te ra mei te itinga ra e te opu atura i te opunga ra, kua tapoki i te enua katoatoa. Te au ngai katoatoa e itiia e te ra, kare e roa atu ka akapaapaa te au tangata katoatoa i reira i te ingoa o Iehova kua akamataraia mai oki ratou i te tuikaaanga ki te akonoanga pikikaa e ta Satani akaaerenga katoa oki. Ko te tika, ko teia imene te ka kore rava e ope te imeneia nei i teianei e te Au Kite akatainuia o Iehova ma te aronga katoa te ka riro ei tamariki i te enua nei na tana Ariki, koia a Iesu Karaiti. Mei teaa ra te akameitaki anga ta ratou ei aronga imene i te au akapaapaa anga ia Iehova ra!
E Aite Koreia a Iehova
7. Eaa nga tu teitei e rua o Iehova te akakiteia maira ia Salamo 113:4?
7 Kua tuatua kapiti atura te tata taramo: “E teitei to Iehova i to te pa enua ravarai, tona kakā i to te au rangi ra.” (Salamo 113:4) Te akakite maira te reira i nga tu teitei rava e rua o te Atua ra: (1) Kia Iehova, koia ra Tei Teitei Rava, “e teitei to Iehova i to te pa enua ravarai,” e tau ratou mei te topata okotai no roto i te pakete e mei te ungaunga pueu ki runga i te aite ra; (Isaia 40:15; Daniela 7:18) (2) e maata roa atu tona kaka i to te au rangi akaraia ra, no te mea te rave ra te au angera i tona anoano ngateitei.—Salamo 19:1, 2; 103:20, 21.
8. No teaa e akapeea oki a Iehova i te tuku akaaka anga iaia ki raro kia akara i te au apinga i runga i te rangi e ki runga i te enua?
8 I te akakeu angaia e to te Atua ra tu teitei, kua tuatua te tata taramo: “Koai tei tau ki to tatou Atua kia Iehova? ko tei noo i te ngai teitei. Te tuku akaaka nei ra aia iaia uaorai i te akara anga mai ki raro, ki runga i te au rangi, e ki runga i te enua.” (Salamo 113:5, 6) No te teitei roa te Atua kua tau aia kia akara mai ki raro kia kite i te au mea i te rangi ra e i runga i te enua. Noatu rai e kare a Iehova i raro ake i tetai ua atu me kare i kauraro ana ki etai ke ra, te akaari ra aia i te tu akaaka i te akonoanga i te aroa ua e te tu tangi aroa i te aronga rikiriki rave ara ra. Ko te orongaanga i tana Tamaiti, ia Iesu Karaiti, ei “tarangaara” no te au Kerititiano akatainuia ra e no te ao katoa o te tangata nei e akakite anga te reira i to Iehova ra tu akaaka.—1 Ioane 2:1, 2.
E Tu Tangi Aroa to Iehova
9, 10. Akapeea ta te Atua ra ‘akateitei anga i te putaua ra, kia akariro iaia kia noo kapiti ma te aronga mamaata ra’?
9 I te akaketaketaanga i to te Atua ra tu tangi aroa, kia tuatua katoa maira te tata taramo e “te akateitei nei a [Iehova] i te akaaka ra no raro mai i te one ra, kua akateitei i tei putaua no raro i te tiringa teita; I te akanoo anga iaia i rotopu i te aronga mamaata ra, i rotopu i te aronga mamaata ra i tona uaorai iti-tangata. Ko tei akanoo i te vaine pa i te ngutuare ra, ei metua vaine rekareka i tana ra au tamariki. Alelu Ia.” (Salamo 113:7-9) E akarongo to te au tangata o Iehova e ka rauka iaia i te akaora i te aronga tika te ngere ra, kia taui i to ratou tu, e kia akamerengo i tei anoano tikaia e te inangaroia no ratou ra. ‘Te akaora ra Te Teitei e Tei Akateiteiia ra i te vaerua o te aronga akaaka ra e te ngakau o te aronga akaparuparuia ra.’—Isaia 57:15.
10 Akapeea ta Iehova ra ‘akateitei anga i te akaaka ra, kia akanoo iaia ma te aronga mamaata ra’? Me ko te anoano ia o te Atua, ka tuku aia i tona au tavini ki te au turanga kaka kia tau ki to te aronga mamaata ra. Kua rave aia i te reira ia Iosepha ra, tei riro ra koia ei pu tua i te kai i Aiphiti ra. (Genese 41:37-49) I Iseraela, ko te nooanga ma te aronga mamaata, me kare te aronga mana taoonga i roto i te iti tangata o Iehova, e apinga te reira no te akaperepereia. Mei te aronga pakari Kerititiano o teia tuatau nei, kua rauka ia ratou ta te Atua ra tauturu e te akameitakianga.
11. Eaa ra i tau ei kia tuatuaia e ko te aiteanga maata o te Salamo 113:7-9 te piri ra ki te au tangata o Iehova i teia tuatau nei?
11 Akapeea ‘te akariroanga i te vaine pa ei metua vaine rekareka’? Kua oronga te Atua i tetai tamaiti na Hana pa ra—ko Samuela, tana i oronga ra ei tavini atu Iaia. (1 Samuela 1:20-28) Ko tetai mea puapinga maata atu oki, i te akamataanga mai ia Iesu e te riringianga i te vaerua tapu ki runga i tana au pipi ia Penetekote 33 T.N., kua akamata ta te Atua ra vaine akatutuia, koia te Ziona i te rangi ra, i te anau mai i te au tamariki vaerua ra. (Isaia 54:1-10, 13; Angaanga 2:1-4) E mei ta te Atua akaora anga i te ngati Iuda ki to ratou enua kainga i muri ake i te tuikaaanga i Babulonia, i te 1919 kua akamatara maira aia i te toenga o tei akatainuia ra o “te Iseraela o te Atua” mei te tuikaaanga i Babulonia, e kua akameitaki maata atura ia ratou i te pae vaerua e kua tupu te au tuatua ia Salamo 113:7-9 kia ratou ra. (Galatia 6:16) Ei Au Kite tiratiratu no Iehova, te akarongo ra ma to ratou ngakau katoa te toenga o te Iseraela vaerua ma to ratou au oa, e manakonako anga to ratou kia noo ki te enua nei, i nga tuatua openga o te Salamo 113: “Alelu Ia.”
Akapapu Anga i to Iehova Tuke Anga
12. Akapeea ta Salamo 114 akaari anga i to Iehova ra tu tuke anga?
12 Te akaari maira a Salamo 114 i to Iehova tuke anga na te akakiteanga i te au tupuanga tuke tei o atura to Iseraela. Kua imene te tata taramo: “Ia Iseraela i aere maira mei Aiphiti mai; te ngutuare o Iakoba mei roto i te aronga tangata reo ke ra; Riro atura Iuda ei mea tapu nona; Iseraela, tona mana anga.” (Salamo 114:1, 2) Kua akaora te Atua i to Iseraela mei te tuikaaanga ki to Aiphiti, e reo tuke to taua aronga ra ki to ratou taringa. Te akaora anga i to Iehova iti tangata, tei karangaia ra ko Iuda e Iseraela i te tua aiteite ra, te akaari ra e ka rauka i te Atua te akaora i tona au tavini katoatoa i teia tuatau nei.
13. Akapeea ta Salamo 114:3-6 akaari anga i to Iehova ra turanga teitei e akapiriia atu ki te au tupuanga kia Iseraela i taito ra?
13 Te kitea ra te tu ngateitei o Iehova i runga i te au mea katoatoa i angaia ra i te au tuatua e: “Kua kite te tai, e kua rere ke; ko Ioridana, kua oki atura ki muri! Kua rere te au maunga mei te mamoe toa ra, te au tuaivi mei te punua mamoe. Eaa tikai koe, e te tai, i rere ke ei koe? e Ioridana, i oki ei koe ki muri? E te au maunga, i rererere ei mei te mamoe toa ra? te au tuaivi, mei te punua mamoe?” (Salamo 114:3-6) Kua “rere ke” te Tai Muramura ra i ta te Atua ra akatuera anga i te arataa na roto i te reira no tona iti tangata. Kua kite to Iseraela i reira i to Iehova ra rima maro i te tamaki anga i to Aiphiti tei mate ra i te tapokiangaia e te vai. (Exodo 14:21-31) I te akaari anga i tona mana mei te reira te tu, kua ‘akamata te Kauvai o Ioridana i te oki ki muri,’ e kua rauka i to Iseraela te aere atu ki Kanaana. (Iosua 3:14-16) ‘Kua rererere te au maunga mei te mamoe toa ra’ kua tapokiia a Maunga Sinai e te auai e kua ngaueue roa atura i te oronga angaia mai te Ture koreromotu ra. (Exodo 19:7-18) I te vaitata anga ki te take o tana imene, kua tuku maira te tata taramo i te au tumu na roto i te au uianga te tu, penei na te tuatuaanga e ko te tai, te kauvai, te au maunga, e te au tuaivi kua mataku i te akaari atu anga i te reira mana o Iehova ra.
14. Eaa ta te mana o Iehova i rave i Meriba e i Kadesa ra, e eaa te mea tau na te reira kia akatupu ki tona au tavini i teia tuatau nei?
14 I te taiku ua anga i to Iehova ra mana, kua imene te tata taramo: “Kia ngaueue koe, e te enua e, i te aroaro o te Atu ra; i te aroaro o te Atua o Iakoba: Ko tei akariro i te mato ei vai puna, te toka tama ra ei vai mapia.” (Salamo 114:7, 8) Na roto i te akatutuanga, kua akakite maira te tata taramo e ka tau te au tangata kia tu ma te mataku ia Iehova, te Atu e te Tutara e Pini ua ake te enua katoa nei. Koia “te Atua o Iakoba,” me kare o Iseraela, mei iaia oki no te Iseraela vaerua ra e to ratou au oa katoa no te enua nei. I Meriba e Kadesa i te metepara ra, kua akaari atura Iehova i tona mana na te oronga anga i te vai na to Iseraela na te tu temeio, “tei akariro i te mato ei vai puna, te toka tama ra ei vai mapia.” (Exodo 17:1-7; Numero 20:1-11) Na taua akamaaraara anga ra i to Iehova ra mana matakuia e tana utuutu anga te oronga ra i te au tumu tau no tona Au Kite kia ekoko kore te akarongo iaia ra.
Kare i Aite ki te Au Atua Itoro
15. Penei i akapeea te imene anga ia Salamo 115 ra?
15 Te raurau maira te Salamo 115 ia tatou kia akapaapaa e kia irinaki ia Iehova. Te akatika ra ia e ko te akameitaki anga e te tauturu no ko mai iaia ra e te akapapu maira e puapinga kore te au itoro ra. Penei kua imeneia teia taramo na roto i te au tuangaia. Koia oki, ka imene tetai reo: “Ko kotou tei mataku ia Iehova, e irinaki ia Iehova.” Ka pau mai te putuputuanga: “Koia to ratou tauturu e to ratou paruru.”—Salamo 115:11.
16. Eaa te tuke anga te ka rauka kia akatakaia i rotopu ia Iehova ma te au itoro o to te pa enua ra?
16 Kare e tau kia riro ia tatou te kaka mari ra ki te ingoa o Iehova, koia te Atua aroa takinga meitaki, me kare aroa apa kore, e te tika. (Salamo 115:1) Penei ka ui aviri ua te au enemi: “Teiea to ratou Atua?” Inara ka rauka i to Iehova ra au tangata i te pau: ‘Tei te rangi ra to matou Atua, i te rave ra i tana au mea ravarai i anoano ra.’ (Salamo 115 Nga irava 2, 3) Inara kare e apinga e rauka i te au itoro o te au pa enua i te rave, no te mea na te tangata ua ratou i anga e ario e te auro. Noatu rai e vaa to ratou, e mata, e e taringa, e muteki ua ratou, e matapo, e te turi. E iu to ratou inara kare e ongi, e vaevae kare e rauka kia aaere, e karoponga kare ra e reo. Ko te aronga te maani ra i te au itoro rave kore e pera katoa oki te aronga irinaki ia ratou ra ka aite katoa oki kia ratou te ora kore.—Salamo 115 Nga irava 4-8.
17. I te mea kare e rauka i tei mate ra i te akapaapaa ia Iehova, eaa ta tatou ka tau kia rave, e ma teea au manakonako anga?
17 I muri akera kua orongaia mai te akamaroiroi anga kia irinaki ia Iehova ei te Tauturu e te Paruru no Iseraela, no te ngutuare kautaunga o Aarona, e te aronga katoa tei mataku i te Atua ra. (Salamo 115:9-11) Ei aronga mataku ia Iehova ra, tei ia tatou te akatapu anga maata no te Atua e te mataku tau kia kore e akamareka kore atu iaia. E akarongo katoa oki to tatou e ko “Tei Anga i te rangi e te enua” te akameitaki ra i tona aronga akamori tiratiratu iaia. (Salamo 115 Nga irava 12-15) Ko te au rangi ra te ngai o tona terono, inara kua anga te Atua i te enua ei kainga mutu kore no te au tangata apa kore e te akarongo. I te mea kare e rauka i te aronga muteki, e te aronga kite kore tei mate ra, i te akapaapaa ia Iehova, ka tau na tatou na te aronga te ora nei e rave te reira ma te ngakau katoa e te tu tiratiratu. (Koheleta 9:5) Ko te aronga anake te ka akapaapaa ia Iehova ka rekareka i te ora mutu kore e ka rauka ia ratou te “akameitaki ia Iehova” e tuatau ua atu, ka tuatua akameitaki iaia no te “tuatau ua atu.” E no reira e kapiti tiratiratu ua tatou ma te aronga te akarongo ra i te akaue anga “Alelu Ia.”—Salamo 115:16-18.
To Iehova Au Tu Umere
18, 19. Na teea au mataara te akataka anga a to Iehova ra au tu iaia mei te au atua pikikaa katoa ra?
18 Kare mei te au itoro kare ra e oraanga, e Atua ora a Iehova, te akaari maira i te au tu umere. Koia tikai te tumu o te aroa e e “aroa ua e te maru meitaki, kare e riri vave e te ki i te aroa takinga meitaki.” (Exodo 34:6, NW; 1 Ioane 4:8) E tuke maata tona i to te Atua tangi kore o Kanaana ko Moleka, tei tuku atingaia ra te au tamariki kiaia! Kua manakoia e ko te tiki o te reira atua mei to te tangata rai te tu e ko tona upoko mei to te toa puaka toro rai. Kua akakiteia mai e kua akaveraia kia muramura te itoro, e kua titiriia te au tamariki ki roto i tona nga rima, e kua topa atu ki raro ki roto i umu te ka ra te ai vera i reira. Inara no to Iehova ra aroa e te aroa ua kare roa te reira manako no te tuku atinga i te tangata “i o ki [tona] ngakau.”—Ieremia 7:31.
19 Kua kapiti katoa to Iehova ra au tu maata i te tuatua tau, te pakari kotinga koreia, e te mana katoatoa. (Deuteronomi 32:4; Iobu 12:13; Isaia 40:26) Akapeea te au atua manako uaia ra? Kare e akono i te tuatua tau, e rave akautunga ua te au atua e te au atua vaine o Babulonia ra. Ko te au atua o Aiphiti kare i te akatauanga pakari, kua akatutuia mai ma te au tu apikepike o te au tangata nei. Kare te reira i te mea poitirere, no te mea ko te au atua pikikaa e te au atua vaine e au ua anake no te “upoko kare e apinga o roto” te au tangata tei karanga ra e pakari ratou. (Roma 1:21-23, NW) Kua pera katoa te au atua Ereni kua manako kino tetai i tetai. Ei akaraanga, i te au tua manako ua, kua akakino a Dia i tona mana na te rave mai anga i tona metua ia Koronati (Cronus) ki raro i te tereno, koia tei akakore atura i tona uaorai metua, ia Uranati (Uranus). Mei teaa ra te akameitakianga kia tavini atu e kia akapaapaa katoa oki ia Iehova, i te Atua ora e te mou ra, koia tei akaari maira i te aroa apa kore ua, te tuatua tau, te pakari, e te mana oki!
Ko Iehova tei Tau no te Akapaapaa Mutu Kore
20. Eaa ta Davida au tumu i oronga mai no te akapaapaaanga i te ingoa o Iehova ra?
20 Mei ta nga Salamo Areru i akakite maira e, te tau ra te akapaapaa anga mutu kore no Iehova. Pera katoa oki, i te oronga anga a Davida e tona au taeake Iseraela i te apinga ei tauturu i te akatu anga i te iero ra, kua tuatua aia ki mua i te putuputuanga: “Kia akameitakiia koe, e tuatau e tuatau ua atu, e te Atua o to matou metua o Iseraela, e Iehova. Tei ia koe, e Iehova, te maata, e te mana, e te kakā, e te autu, e te tapunui: to runga i te rangi ra, e to runga i te enua, noou anake ïa; tei ia koe te au, e Iehova, e ko koe tei teitei ei upoko i te au mea katoa nei. No ko na mai ia koe na te apinga e te akangateitei, e ko koe tei tutara ki rungao i te au mea katoa; e tei to rima te ririnui e te maroiroi; e tei to rima i te akamaata mai, e te oronga mai i te maroiroi ki te tangata katoa nei. E teianei, e to matou Atua, te akameitaki atu nei matou ia koe, e te akapaapaa nei i toou ingoa kakā.”—1 Paraleipomeno 29:10-13.
21. Eaa te akapapu anga ta Apokalupo 19:1-6 ra i ta te au nuku o te rangi ra akapaapaa anga ia Iehova?
21 Ka akameitaki katoaia a Iehova e ka akapaapaaia i te au rangi ra e tuatau ua atu. Kua akarongo atura te apotetoro ko Ioane i “tetai urupu maata ki runga i te rangi” i te na ko anga: “E Aleluia; ko te ora, e te tapu, e te ngateitei, e te mana, ei te Atu ei to tatou Atua ïa. E mea mou oki e te tika tuku anga utunga: kua akautunga io nei oki aia i taua vaine akaturi maata [koia Babulonia Maata] ra, ko tei akaviivii i to te ao nei i tana akaturi anga, e kua akaoko aia i te toto o tona au tavini ta tona rima i akamaringi.” E kua karanga akaou ratou: “Aleluia.” E kua pera katoa oki: “Kua tipapa iora te aronga taito e rua ngauru ma a, e nga mea ora e a ra.” Kua na ko maira tetai reo no te terono mai: “E akameitaki i to tatou Atua, ko kotou katoa tona au tavini, e ko kotou oki ko tei mataku iaia ra, ko te tangata rikiriki e te aronga mamaata.” E kua tuatua akaou maira Ioane: “Kua akarongo atura au mei to reo o tetai urupu maata, e mei te aruru o te tai maata ra, e mei te kokina mangungu maata ra, i te na ko anga e, Aleluia: tei te Atu ra, tei te Atua mana katoatoa ra te au.”—Apokalupo 19:1-6.
22. Akapeea te akapaapaa anga ia Iehova i roto i tana ao ou i taputou maira?
22 E mea tau tikai te reira kia akapaapaa te nuku o te rangi ra ia Iehova! I roto i tona ao ou te vaitata nei i teianei, ka kapiti katoa te aronga tiratiratu te ka akatuia mai ma te aronga te ka ora atu i te openga o teianei akatereanga, i te akapaapaaanga ia Ia. Ka taaki te au upoko o te au maunga teitei ki runga i te imene akapaapaa anga i te Atua. Ka imene akapaapaa katoa iaia te au tuaivi matie ma te au rakau uua maira. Eaa oki, ka akapaapaa i te ingoa o Iehova te au mea ora katoa te ora ra e te uti ra i te aʼo i taua imene maata ra e Areru Ia! (Salamo 148) Ka rongonaia ainei toou reo i roto i taua urupu rekareka ra? Ka rongonaia ia me ka tavini tiratiratu kapiti atu koe ia Ia ma tona au tangata katoa ra. Ka tau te reira ei akakoro anga naau i toou oraanga, no te mea koai tei tau ki to tatou Atua kia Iehova?
Akapeea Koe me Pau?
◻ Eaa ra ka akapaapaa ei i te Atua ko Iehova ra?
◻ Eaa te au tu te aite koreia ra a Iehova?
◻ Eaa te akapapu anga e e tu tangi aroa to Iehova ra?
◻ Eaa to Iehova ra tuke anga i to te au itoro kare ra e oraanga e pera katoa oki i to te au atua pikikaa ra?
◻ Eaa ka raukai ia tatou kia tuatua e ka akapaapaaia a Iehova e tuatau ua atu i te rangi e i runga i te enua nei?
[Tutu i te kapi 9]
Kua imeneia nga Salamo Areru i te tuatau o te oroa Pata ra