E Mea Ora te Tuatua a Iehova

Au Manako Maata mei te Puka Rima o Salamo

PENEI ka karanga te tangata moni e: “Kia riro ta matou au tamariki i to ratou ou anga ra, mei te rakau tupu meitaki ra; ta matou au tamaine, mei te toka i te kapeu tara ra, i akamaneaia mei to te are ariki ra. Kia ki to matou au are vairanga apinga . . . kia riro ta matou au anana ei tausani ua atu.” Tei runga ravao, penei ka karanga te tangata moni: “E ao to te aronga, mei te reira te tu.” Inara, ei akatukeanga, te karanga ra te tata taramo: “E ao to te aronga, ko Iehova to ratou Atua.” (Salamo 144:12-15) Eaa ka tuke ei? E Atua mataora a Iehova, e te tu mataora e tuangaia no te aronga e akamori ra iaia. (1 Timoteo 1:11) Kua akapapuia teia tuatua mou i roto i te akaputuanga openga o te au imene akauruia e te Atua, ko Salamo 107 ki te 150.

Te Puka Rima o Salamo te akaketaketa katoa ra i te au tu teitei rava o Iehova, kapiti mai tona takinga meitaki, tu tika, e te tu meitaki. Te maata atu i to tatou kite pakari i roto i to te Atua tu tikai, te maata atu to tatou akakeuanga i te inangaro e te mataku iaia. Na teia, i reira, e apai mai i te mataora kia tatou. Mei teaa atura tetai karere puapinga maata ka kite mai tatou i roto i te Puka Rima o Salamo!​—Ebera 4:12.

MATAORA NO TO IEHOVA TAKINGA MEITAKI

(Salamo 107:1–​119:176)

“Kia akameitaki oki ratou ia Iehova i tona ra aroa, e te au angaanga taka ke nana i te tamariki a te tangata nei” i imene ei te au ngati Iuda tuaruaia tei oki mai mei te tuikaaanga i Babulonia. (Salamo 107:8, 15, 21, 31) I te akapaapaaanga i te Atua, kua imene a Davida: “E taau tuatua-mou ra [kua] tae ua atu ki te au tumurangi ra.” (Salamo 108:4) I roto i te imene tei aru mai, kua pure aia: “E tauturu mai koe iaku, e taku Atua, e Iehova e: e akaora koe iaku i toou ra aroa.” (Salamo 109:18, 19, 26) Te Salamo 110 e totou te reira o te tutara o te Mesia. “Ko te akamataanga o te pakari ra, koia te mataku ia Iehova ra,” i karanga ai a Salamo 111:10. Kia tau ki te taramo tei aru mai, “e ao to te tangata i mataku ia Iehova.”​—Salamo 112:1.

E kapikiia ana te Salamo 113 ki te 118 e ko te Salamo Alelu Ia, kua tau rai te reira no te mea e taiku putuputu ana te reira i te tuatua “Alelu Ia,” me kore “Akapaapaa kotou ia Iehova!” Kia tau ki ta te Mishnah​—tetai tataanga no te toru anere mataiti e kua tata ratou i tei tuatua vaa uaia i mua atu ana​—kua imeneia teia au imene i te Pasa e te au oroa e toru a te au ngati Iuda i roto i te mataiti. Ko te taramo e te pene roaanga rere rava atu i roto i te Pipiria, te akakaka ra a Salamo 119 i te tuatua, me kore te karere akakiteia a Iehova.

Pauia te Au Uianga Tuatua Tapu:

109:23​—Eaa te aiteanga o ta Davida tuatua i tona karanga anga: “Kua riro au mei te ata e peke ra”? Te akakite ra a Davida na roto i tetai pee e kua manako mai aia e te vaitata tikai maira tona mate.​—Salamo 102:11.

110:1, 2​—Eaa to “[Davida] Atu,” ko Iesu Karaiti, i rave iaia e noo ra ki to te Atua rima katau? Aru mai i tona tuakaouanga, kua aere atu a Iesu ki te rangi e kua tiaki marie ua aia i te rima katau o te Atua e tae rava anga ki te 1914 kia akamata i te tutaraanga ei Ariki. I taua taime ra, kua tutara a Iesu i rungao i tana au pipi akatainuia, aratakianga ia ratou i roto i ta ratou angaanga tutu aere e te akariroanga i te au tangata ei pipi e pera katoa i te akapapaanga ia ratou kia tutara kapiti atu kiaia i roto i tona Patireia.—​Mataio 24:14; 28:18-20; Luka 22:28-30.

110:4​—Ki teaa ta Iehova i ‘taputou, kare e tataraara’? Teia papau ko te koreromotuia ta Iehova i akanoo kia Iesu Karaiti kia tavini aia ei Ariki e ei Taunga Maata.​—Luka 22:29.

113:3​—Na roto i teea mataara e ka akapaapaaia to Iehova ingoa “mei te itinga mai o te rā e tae ua atu ki tona opunga”? E maata atu teia i tetai pupu aronga e akamori ra i te Atua i te au ra ravarai. Mei te iti anga mai o te ra i te itinga ki to te reira opu anga i te opunga, e turama ana te vero o te ra i te enua katoa. Mei te reira rai, kia akapaapaaia a Iehova i te ao katoa. Kare teia e rauka i te akatupuia me kare e raveia tetai tautaanga no tetai akanoonooanga. Ei Au Kite no Iehova, tei ia tatou te arikianga akaperepere kia akapaapaa i te Atua e kia piri maroiroi atu i roto i te angaanga tutu anga i te Patireia.

116:15​—Mei teaa rai te ‘mate ei tona ra aronga tapu ei mea apinga maata i mua i te aroaro o Iehova’? E akaperepere tikai ana a Iehova i tona aronga akamori e e akamanako ana aia i to ratou mate ei pupu tangata, ei mea maata rava roa atu i te akatika uaia. Me ka akatika ua atu a Iehova i te reira kia tupu, mei te mea rai e e ririnui roa atu tona au enemi iaia. Tei runga ravao, kare e tangata e toe mai i reira i runga i te enua nei ei tango no te ao ou.

119:71​—Eaa te meitaki i te rokoia anga e te mamae anga? Ka apii mai te tu ngata ia tatou kia irinaki roa atu ki runga ia Iehova, kia pure akatenga roa atu kiaia, e kia maroiroi roa atu i te apiianga i te Pipiria e te akonoanga i ta te reira e akakite maira. Tei runga ravao, to tatou ariuanga ki te takinga kino anga, ka akakite mai i te au tu paruparu te ka rauka i te akatikatikaia. Kare te mamaeanga e maani ia tatou kia riri me akatika tatou i te reira kia akameitaki atu ia tatou.

119:96​—Eaa te aiteanga o te “openga o te au mea memeitaki katoa”? Te tuatua ra te tata taramo no runga i te tu apa kore mei te akamanakoanga o te tangata nei. Penei ake te manako ra aia e e kotinga ua to te tangata manako no runga i te tu apa kore. Ei tuke anga, kare e kotinga anga ki ta te Atua ture. Te tau ra ta te reira aratakianga ki te au tu ravarai o te oraanga. “Ki te au mea memeitaki katoa te kite nei au i te kotinga anga,” te tatau ra te New International Version, “inara e apinga tikai ua taau au ture.”

119:164​—Eaa te puapinga i te akapaapaaanga i te Atua e ‘taki itu akameitaki anga i te rā okotai’? Maata te taime e akatutu mai ana te numero itu i te tu ki katoa. No reira, te akakite maira te tata taramo e kua tau a Iehova i te akapaapaaanga katoa.

Au Apiianga no Tatou:

107:27-31. Ka “ope rava akera” te kite o te ao me akamata ana a Aramakito. (Apokalupo 16:14, 16) Kare e rauka i te reira i te akaora i tetai ua tangata mei te akapouanga. Ko te aronga anake ua te akara ra kia Iehova no te ora te ka ora atu i te ‘akameitaki oki iaia i tona ra aroa.’

109:30, 31; 110:5. Kua matauia e te rima katau o tetai vaeau te mou ra i te koke, kare te reira e araiia e te paruru, tei mouriaia ana i te tua kaui. Ei akatutuanga, tei “te rima katau” a Iehova i tona au tavini, i te tamakianga no ratou. No reira te oronga ra aia i te paruru e te tauturu​—tetai tumu meitaki kia “akameitaki maata roa [tatou iaia]”!

113:4-9. E teitei rava tikai a Iehova e ka taakaaka mai aia iaia “i te akara anga mai ki raro, ki runga i te au rangi.” I na, te tangi aroa ra aia i te tangata akaaka ra, tei putaua, e te vaine pa. E Atua akaaka te Atu Ngateitei ko Iehova e te inangaro katoa ra aia i tona aronga akamori kia akapera katoa rai.​—Iakobo 4:6.

114:3-7. Te kite mai anga i te au angaanga umere ta Iehova i rave no tona iti tangata i te Tai Muramura, i te Kauvai Ioridana, e te Maunga Sinai, ka kore ei ka akakeu oonu te reira ia tatou. Ka tau te au tangata ravarai, tei akatutuia e te “enua,” kia umere​—ei akatutuanga ma te “ngaueue”​—no te aroaro o te Atua.

119:97-101. Te rauka anga i te pakari, te kite pakari, e te maramaanga mei te Tuatua a te Atua, e paruru ana ia tatou mei te kino pae vaerua.

119:105. E ramepa te Tuatua a te Atua ki to tatou vaevae mei tera e ka tauturu te reira ia tatou i te akono i te au manamanata i teianei. Ei akatutuanga e turama katoa ana te reira i to tatou arataa, mei te mea e e akakite mai ana te reira i ta te Atua akakoroanga no te tuatau ki mua.

MATAORA NOATU TE AU TUMATETENGA

(Salamo 120:1–​145:21)

Akapeea tatou i te aro atu anga i te au turanga e kia ora atu i te au tumatetenga? Te oronga maira te Salamo 120 ki te 134 i tetai pauanga taka meitaki ki teia uianga. E ora mai ana tatou i te tu ngata e e akono tamou ana i to tatou tu rekareka na te akaraanga kia Iehova no te tauturu. Penei kua imeneia teia au taramo, tei kapikiia E Pee Akanukanuka, i te au Iseraela e teretere ra ki Ierusalema no te akamaaraanga i ta ratou au oroa i roto i te mataiti.

Te akatutu maira a Salamo 135 e te 136 ia Iehova e ko tei Rave ua ra i tei mareka ra kiaia, ei tuke maata me akaaiteaia atu ki te au itoro puapinga kore ua. Kua atuia te Salamo 136 ei imene pauanga, te tuanga openga o te irava tataki tai kua imeneia ei pauanga ki te tuanga mua. Te akakite maira te taramo tei aru mai i te turanga ngakau mamae o te au ngati Iuda i Babulonia tei inangaro i te akamori ia Iehova i Ziona. Te Salamo 138 ki te 145 no runga te reira ia Davida. Kua inangaro aia i te ‘akapaapaa ia Iehova ma tona ngakau katoa.’ No teaa ra? “E mea mataku e te taka ke oki toku anga angaia,” i karanga ai aia. (Salamo 138:1; 139:14) I nga taramo e rima tei aru mai, kua pure a Davida no te paruru mei te aronga kino, no te au ako tuatua tika, kia akaoraia mei te aronga takinga kino, e no te aratakianga i roto i te tu akono tau. Kua akaketaketa mai aia i te tu mataora o te iti tangata o Iehova. (Salamo 144:15) I muri ake i te uriurianga i to te Atua tu maata e te tu meitaki, kua akakite a Davida: “Ka tuatua toku vaa ma te akapaapaa ia Iehova; e kia akameitaki te tangata ravarai i tona ra ingoa tapu e tuatatau ua atu.”​—Salamo 145:21.

Pauia te Au Uianga Tuatua Tapu:

122:3​—Akapeea i riro ei a Ierusalema ei oire “topiri akitaia te au are ra”? Mei tei matauia i roto i te au oire maata i te au tuatau taito, kua patu kapipitiia te au are i Ierusalema. Kua akaruruia te oire e no reira e mama ua te reira i te paruruia. Tei runga ravao, no te vaitata ua te au are kua rauka i te aronga e noo ra i roto i te oire i te irinaki ki runga i tetai e tetai no te tauturu e te paruruanga. Te akakite maira te reira i te tu taokotaianga i te pae vaerua o te 12 kopu o Iseraela me akaputu mai ana ratou no te akamorianga.

123:2​—Eaa te manako o te akatutuanga no runga i te mata o te au tavini? E akara atu ana te au tavini tane e te au tavini vaine ki te rima o tetai pu tane me kore pu vaine no nga tumu e rua: kia kite mai i tona au inangaro e kia rauka te paruruanga e te au apinga umuumuia no te oraanga. Mei te reira rai, te akara nei tatou kia Iehova kia rauka i te kite mai i tona anoano e kia rauka i tana akaperepereanga.

131:1-3​—Akapeea a Davida i te ‘tuku akaaka e te akanā iaia uaorai; mei te tamaiti i topa te u o te metua vaine ra’? Mei tetai tamaiti e kare e kai u akaou ana e kite maira i te pumaana e te mataora i roto i te nga rima o tona mama ra, kua kite mai a Davida i te taakaaka e te akana iaia uaorai “mei te tamaiti i topa te u o te metua vaine ra.” Akapeea? Kare e na te ngakau nengonengo e te mata akateitei e kare i te aruaruanga i te au apinga e e maata roa kiaia. Kare oki aia i kimi ana i te turanga teitei, kua kite oki a Davida i tona au kotingaanga e kua akaari aia i te tu akaaka. E mea meitaki no tatou kia aru i tona tu, koia tikai me te itae ra no te au angaanga akaperepere i roto i te putuputuanga.

Au Apiianga no Tatou:

120:1, 2, 6, 7. Te tuatua akakino e te aviri e akatupu ana i te taitaia kino pakari ki tetai ke. Te akono meitaki anga i to tatou arero ko tetai mataaraia i te akaari ra e ko te ‘au ta tatou e inangaro ra.’

120:3, 4. Me te akakoromaki ra tatou i tetai tangata e “arero taeke ua” tona, kia akapumaanaia tatou i te kite anga e ka akatikatika a Iehova i te au apinga i tona tuatau tau. Ka kite mai te aronga akakino i te tumatetenga i roto i nga rima o tetai “aronga ririnui.” Papu ei e ko ratou tikai tetai te ka kite mai i ta Iehova akavaanga kino pakari tei akatutuia e te “ngarau rotema e ka ra.”

127:1, 2. I roto i ta tatou au tautaanga ravarai, kia akara atu tatou kia Iehova no te aratakianga.

133:1-3. Te taokotaianga o to Iehova iti tangata e apinga maru tikai, te rekareka, e te akaoraora. Auraka tatou e tamanamanata atu i te reira na te piri atu anga ki roto i te kimianga apa, te pekapeka anga, me kore te koumuumuanga.

137:1, 5, 6. Kua kite mai te aronga akamori tuikaaia o Iehova i tetai pirianga kia Ziona, tei akatutu i to te Atua akaaerenga. Akapeea tatou? Kua akatupu ake ainei tatou i tetai pirianga tiratiratu ki te akaaerenga ta Iehova e taangaanga nei i teia tuatau?

138:2. Kua ‘akamaata oki [a Iehova] i tana tuatua e kua maata i tona ingoa katoa ra’ i tera e te akatupuanga pouroa i tana i taputou i roto i tona ingoa ra ka maata rava atu te reira i ta tatou au tapapa atu anga. E tikai, tei mua ia tatou te au manakonakoanga mekameka.

139:1-6, 15, 16. Kua kite a Iehova i ta tatou au angaanga, to tatou au manako, e ta tatou au tuatua i mua roa ake ka tuatua ei tatou i te reira. Kua kite aia ia tatou mei te tupu mai anga i roto i te kopu, i mua ake i kite meitaki ia atu ei te au tuanga tataki tai o te kopapa. To te Atua kite ia tatou ei au tangata tatakitai e “mea taka ke ïa” i te akamanako anga. E akapumaana anga tikai i te kiteanga e kare e te kite ua maira a Iehova i tetai turanga timataanga tikai ta tatou paa e aro atura mari ra te marama katoa ra aia i to te reira tupuanga ki runga ia tatou!

139:7-12. Kare e ngai ka aere atu tatou e ka akatakakeia tatou mei te akamaroiroianga a te Atua.

139:17, 18. Kua riro ainei te kite o Iehova ei rekarekaanga kia tatou? (Maseli 2:10) Me ko te reira ia, kua kite mai tatou i tetai vaipuipui puapinga tikai no te rekareka. Te au manako o Iehova e “maata ïa te reira i te one taatai.” E maata ua atu te au apinga i te kite mai no runga iaia.

139:23, 24. Ka tau tatou kia inangaro ia Iehova i te akara matatio mai i to tatou au akakoroanga no te ‘au aerenga kino’​—au manako, au inangaro, e te au akakeuanga tau kore​—e kia tauturu ia tatou i te akakore atu i te reira.

143:4-7. Akapeea tatou i te akakoromakianga noatu te au akaaoanga kino pakari? Te oronga maira te tata taramo kia tatou i te ravenga: Kia akamanako ki runga i te angaanga a Iehova, kia akono tamou ua rai tatou i tana au rave anga, e kia pure kiaia no te tauturu.

“Akapaapaa Anake ïa ia Iehova!”

Te taopenga ra te au putunga mua e a o te taramo tataki tai ma tetai akakiteanga no te akapaapaaanga kia Iehova. (Salamo 41:13; 72:19, 20; 89:52; 106:48) Kare te putunga openga i tuke. Te akakite maira a Salamo 150:6: “Ko tei uti i te aʼo ra, kia akapaapaa anake ïa ia Iehova. Alelu Ia.” Ka kite tikaiia te reira i roto i to te Atua ao ou.

Ia tatou e tapapa atura ki taua tuatau akameitakianga, e maata ta tatou au tumu i te akakaka i te Atua mou e i te akapaapaa i tona ingoa. Me akamanako ana tatou i te tu mataora ka kite mai tatou no te mea kua kite tatou ia Iehova e kua rekareka i tetai pirianga meitaki kiaia, kare ainei e te akakeuia ra tatou i te akapaapaa iaia ma te ngakau rekareka?

[Tutu i te kapi 15]

E mea umere maata rava te au angaanga takake a Iehova

[Tutu i te kapi 16]

Te au manako o Iehova e “maata ïa te reira i te one taatai”