Te Ariki ra Ainei Koe i te Akaaerenga a Iehova?

“Te na ko mairā Iehova; Ko te au rangi toku terono, e te enua nei ko toku takainga vaevae.”​—ISAIA 66:1.

1, 2. (a) Ki teea akapapu anga akara mataia te ka rauka ia koe kia tou atu no te akaaerenga a Iehova? (e) Teiea to Iehova ra ngai noo anga?

TE IRINAKI ra ainei koe e e akaaerenga ta Iehova? Me koia ia, eaa koe i irinaki ei i te reira? Penei ka pau koe: ‘E Are Uipaanga Patireia oki to matou. E putuputuanga papa meitaki oki ta matou ma tetai pupu aronga pakari. E akaaere tutaka kotinga to matou te aere putuputu maira i te akara ia matou. Te aere ra matou ki te au akaputuputuanga e te au uruoaanga. E opati manga to matou no te Taiate Punanga Tiaki i to matou enua. E tika ra, ko teia au mea katoa e te maata atu oki te akapapu mai ra e e akaaerenga ta Iehova te rave angaanga nei.’

² Ko taua au tuanga nei te akakite maira e e akaaerenga tetai. Inara me tei te enua anake nei ta tatou i kite e i ariki ana, kare tei ia tatou te kite takirianga i te akaaerenga a Iehova ra. Kua akakite a Iehova kia Isaia e ko te enua nei Tona takainga vaevae ua, inara ko te au rangi ra Tona terono. (Isaia 66:1) Ko teea “au rangi” ta Iehova e taiku ra? Ki to tatou mareva nei? Ki te tuanga i vao akera? Me kare ki tetai atu tuanga o te ora anga? Kua tuatua a Isaia no to Iehova ra “nooanga tapu e te kakā,” e kua akataka maira te tata taramo i te reira au rangi ei “te ngai i nooia e ia ra.” No reira, ko te “au rangi” ia Isaia 66:1 te taiku ra i te ngai vaerua tei kore e kitea kia akara no Iehova ra te turanga teitei rava, me kore kare tetai i runga atu.​—Isaia 63:15; Salamo 33:13, 14.

3. Akapeea tatou me akakore atu i te au ekoko anga?

³ No reira, me e anoano tika tikai to tatou kia kite e kia ariki oki i te akaaerenga a Iehova, ka tika tatou kia akara i te au rangi ra. I reira e manamanata tetai no tetai papaki. I te mea e kitea kore kia akara i te akaaerenga a Iehova i te rangi ra, akapeea tatou e kite ei e te vai tika maira te reira? Penei ka na roto atu tetai papaki i tetai ekoko anga, ma te kimi manakoanga, ‘Akapeea e papu ei ia tatou?’ Inara, akapeea ka raukaʼi i te akarongo kia akakore atu i te ekoko anga? E rua nga ravenga kia rave pakari koe uaorai i te apii i te Tuatua a te Atua e te aereanga putuputu e te o atu anga ki roto i te au uipaanga Kerititiano ra. Ei reira tatou ka kite ei i te marama no te tuatua mou i te openga o te ana ra. E au tavini etai no te Atua ra tei tu ana i te au ekoko anga. E akara tatou i te tu o te tavini o Elisaia i te tuatau i raro akera to Iseraela i te tamaki anga na te ariki o Arama maira.​—Akaaite ia Ioane 20:24-29; Iakobo 1:5-8.

Tetai Tei Akara i te Au Nuku o te Rangi

4, 5. (a) Eaa te manamanata o te tavini o Elisaia ra? (e) Akapeea ta Iehova ra pauanga ki ta Elisaia pure?

⁴ Kua akaunga atura te ariki o Arama i tetai nuku vaeau maata i te po ki Dotana kia opu mai ia Elisaia. I te ara vave anga mai te tavini o Elisaia i te akirata e kua aere atu ki runga i te tapoki paraaraa o to raua are i te Itinga Rotopu ra, penei kia aere mai te reva matangitangi kiaia, mei teaa ra tona poitirere! E nuku vaeau katoa o Arama ma te au oroenua e te au kariota tamaki te koropini ra i te oire, te tiaki ra kia opu i te peroveta a te Atua ra. Kua kapiki atura taua tavini ra kia Elisaia: “Aue, e taku pu e! akapeea tatou nei?” I te akara anga, e maru ua e ma te irinaki anga, kua tuatua atura Elisaia: “Auraka e mataku: e maata oki to tatou pae, e iti to ratou.” Penei kua manako ekoko te tavini ra, ‘Tei ea ratou? Kare au e kite ana ia ratou!’ I etai tuatau penei ko to tatou manamanata katoa ia​—te kore anga e kite ma te mata o te marama, me kore e kite i te au nuku o te rangi ra.​—2 Ariki 6:8-16; Ephesia 1:18.

⁵ Kua pure a Elisaia kia akapueraia nga mata o tona tavini. Eaa tei tupu i muri iora? “Kua akapuera akerā Iehova i te mata o taua tangata ou ra; kite atura aia: e i na, kua ki te maunga i te oroenua e te kariota ai, i te akapini anga ia Elisaia ra.” (2 Ariki 6:17) Ae, kua kite aia i te au nuku o te rangi ra, te au nuku angera te tapapa atura kia paruru i te tavini o te Atua ra. I teianei kua kite aia i to Elisaia ra irinaki anga.

6. Akapeea ka raukaʼi ia tatou te kite oonu ki roto i te akaerenga a Iehova i te rangi ra?

⁶ Te tupu ra ainei kia tatou tetai manamanata i etai tuatau no te tu akara anga aiteite tei tupu ra ki te tavini o Elisaia? Te kite ua ra ainei tatou i te tu pae kopapa no te au turanga akakokoanga ia tatou me kare te angaanga Kerititiano i etai enua ra? Me koia ia, ka rauka ainei ia tatou kia manakonako atu i tetai orama taka ke kia akamarama mai kia tatou? Kare, no te mea tei ia tatou tetai apinga kare ra ia i te tavini o Elisaia​—ko tetai puka katoa te vaira e manganui te au orama, koia te Pipiria, te ka rauka kia oronga mai kia tatou i te kite oonu ki roto i te akaaerenga i te rangi ra. Te oronga katoa maira taua Tuatua akauruia i te au kaveinga aratakianga ei akatikatika i to tatou manakoanga e to tatou tu ora anga oki. Inara, ka tika tatou kia tauta kia kimikimi no te kite karape e kia tatanu oki i te ariki anga no ta Iehova akanoonoo anga. E ko te reira ka rauka ia tatou na te apii anga tatou uaorai, kapiti atu ma te pure e te tamanako anga oonu.​—Roma 12:12; Philipi 4:6; 2 Timoteo 3:15-17.

Apiianga kia Kite

7. (a) Penei eaa te manamanata o etai ma ta ratou uaorai apii Pipiria? (e) Eaa ra i puapingaʼi te tauta anga i te apii naau uaorai?

⁷ Kare te apii anga naau uaorai i tetai manakonakoanga marekaia na te au tangata e manganui, mei te aronga kare ra i rekareka i te apiianga i te apii me kore kare i rauka te tuatau kia rave i te reira. Inara, me te anoano ra tatou kia kite e kia ariki oki i te akaaerenga a Iehova ma to tatou mata o te ngakau, ka tika tatou kia tatanu i te inangaro kia apii. Ka rauka ainei kia rekareka koe i te kaikai anga kare i teateamamaoia? Mei ta tetai ua atu tangata tunu kai ka akakite kia koe, e maata te angaanga te umuumuia ra no te teateamamaoanga i tetai kaikai reka. Inara, penei ka pou ia i roto i te apa ora me kare e iti mai. I tetai pae, ko te puapinga o te apiianga naau uaorai ka vairai i toou oraanga katoa. Ka rauka kia riro taau uaorai apii ei tetai tongi anga reka me ka kite tatou i to tatou tere anga ki mua. Kua tika ta te apotetoro ko Paulo i tuatua e ka tau tatou kia matakite ia tatou uaorai e ta tatou apiianga e tamou tika ra i te reira. Te umuumuia ra te tauta anga tamou, inara e mutu kore ua atu te au puapinga.​—1 Timoteo 4:13-16.

8. Eaa te tu manako ta Maseli e akamaroiroi maira?

⁸ Kua tuatua tetai tangata i te tuatau taito ra e: “E taku tamaiti [me kare, tamaine], kia āriki mai koe i taku nei tuatua, e kia vaio marie i taku au akauenga ia koe; Kia ariu mai koe i to taringa ki te pakari, e kia kimi marie to ngakau i te kite ra; kia kapiki nui koe i te kite, e kia akateitei i to reo kia rauka te kite ra; Kia kimi pu tikai koe iaia mei te ario ra, e kia makitoro marie koe iaia, mei te apinga uunaia ra: Ei reira koe e kite ei i te mataku ia Iehova, e e rauka ia koe te kite i te Atua.”​—Maseli 2:1-5.

9. (a) Akapeea te puapinga o te auro me akaaiteia atu ki “te kite tikai i te Atua”? (e) Eaa te au apinga ta tatou ka umuumu e raukaʼi te kite tika ra?

⁹ Te kite ra ainei koe e tei iaai te apainga no te rave? “Kia ariki mai koe” ko te takiota tuatua taokiokiia te reira. E akamanako oki i te tuatua, “Kia makitoro marie koe iaia, mei te apinga uunaia ra.” E akamanako ana i te aronga ko enua ra tei ko ra no etai au anere mataiti no te ario e te auro i Bolivia, i Mexico, i Aperika Apatonga, e etai atu au enua. Kua rave angaanga pakari ratou i te taangaanga i te au ko e te au tuapara, kia ko i te toka no reira maira ta ratou au apinga okomaata. No te maata to ratou manako i te auro e i tetai ngai ko anga i California, U.S.A., kua ko ratou e 591 kiro mita o te au ana, kua itae ki tetai 1.5 kiro mita te oonu​—kia kitea uaia te auro. Inara, ka rauka ainei ia koe te kai i te auro? Te inu i te auro? Ka rauka ainei i te reira kia akamaroiroi mai ia koe i roto i tetai metepara i te mate atura koe no te onge me kare te kaki vai? Kare, e tinamou kore tona puapinga e ka rauka ua kia tauiia mei tetai ra ki tetai ra mei tei akakiteia maira i te makete o teianei ao. Inara, kua mate te au tangata no te reira. I teianei eaa te maata te tauta anga te tau ra kia rauka mai te auro vaerua ra, koia “te kite tikai i te Atua”? E tamanako i te reira, te kite tikai i te Atu ngateitei o te ao katoa e pini ua ake, tana akaaerenga, e tana au akakoroanga! I teianei tu, ka rauka ia tatou kia taangaanga i te au ko vaerua e te au tuapara. Ko te au puka akatumuia ki runga i te Pipiria te reira te ka tauturu ia tatou kia ko ki roto i te Tuatua a Iehova e kia kite i tona aiteanga.​—Iobu 28:12-19.

Koanga no te Kite Oonu

10. Eaa ta Daniela i kite i roto i tetai orama ra?

¹⁰ E rave tatou i etai koanga kia akamata kia rauka te kite tikai i te akaaerenga a Iehova i te rangi ra. No tetai taviri kite oonu, e ariu atu tatou ki te orama a Daniela to te Au Ra Taito ra i runga i tona terono. Kua tata a Daniela: “Te akara ra au, e kua akanooia iora te au terono, e kua noo maira to te au rā taito ra, ko tei tau tona kakau ki te kiona i te teatea, e te rauru o tona upoko mei te uru-mamoe meitaki ra ïa: e mura ai tona terono: tona porotata ra, e ai kakā ïa. Puroro ua maira te ai taravai mei mua maiiaia: kua tausani oki te tausani anga i te tavini anga kiaia, e kua ngauru oki te tausani anga i te manotini i te tu anga ki mua iaia; kua noo iora te akava anga, e kua eeuia te au buka.” (Daniela 7:9, 10) Koai ma teianei au tautani ua atu tei tavini atura kia Iehova? Kua taangaanga te au marginal references i roto i te New World Translation, i te “au ko” e te “au tuapara,” kia taki atu ia tatou ki taua au irava mei ia Salamo 68:17 e Ebera 1:14 ra. Ae, ko te aronga tei tavini atura ko te au angera o te rangi ra.

11. Akapeea e raukaʼi i ta Daniela orama te tauturu ia tatou kia marama i te au tuatua a Elisaia ra?

¹¹ Kare te tataanga a Daniela i karanga e i kite aia i te au angera tiratiratu katoatoa ta te Atua e akaue atura. Penei e au mirioni ke atu etai. E mea tika ra e ka rauka ia tatou i teianei kia ariki e eaa i raukaʼi ia Elisaia kia tuatua: “E maata oki to tatou pae, e iti to ratou.” Te nuku vaeau o te ariki o Arama, noatu rai tei turuia e te au angera tiratiratu kore ra, koia te au temoni, e iti rava mai te numero i to te nuku o Iehova i te rangi ra.​—Salamo 34:7; 91:11.

12. Akapeea e raukaʼi ia koe kia maata atu te kite no runga i te au angera ra?

¹² Penei ka anoano koe kia tere atu te kite i te reira au angera ra, mei te tuanga ta ratou e rave ra i te tavinianga ia Iehova. Mei te tuatua Ereni mai no te angera ra, ka kite tatou e e au karere ratou no te mea ko te reira katoa oki te aite anga e “karere.” Inara e maata atu no ta ratou au angaanga. Kia kite ra e eaa te reira, ka tika tatou kia ko. Me e puka Insight on the Scriptures taau, ka rauka ia koe kia apii i te atikara “Angels,” me kare ka rauka ia koe te akara i te au atikara i Te Punanga Tiaki no runga i te au angera ra. Ka umere tikai koe eaa te maata taau ka kite no teia au tavini o te Atua i te rangi ra e ka ariki oki i ta ratou turu anga. (Apokalupo 14:6, 7) Inara, i roto i ta te Atua ra akaaerenga i te rangi ra, te rave ra etai au mea ora vaerua i etai atu au akakoroanga akataka keia ra.

Ta Isaia i Akara

13, 14. Eaa ta Isaia i kite ra i roto i te orama, e eaa te akatupu anga a te reira kiaia ra?

¹³ I teianei ka rave tatou i etai koanga ki roto i te orama a Isaia. Me tatau koe i te pene 6, nga irava 1 ki te 7, ka tau kia akakeuia toou manako. Kua tuatua a Isaia e, “akara atura au i te Atu, i te noo anga ki runga i te terono,” e “te tu ua ra nga seraphi i vaitata iaia.” Te kapikipiki ra ratou i te kaka o Iehova, ma te akapaapaa anga i tona tu tapu. Ka tau koe kia akakeuia noatu na te tatau anga i teia tataanga. Eaa ta Isaia i rave? “Kua tuatua akera oki au, E ae oki au nei! kua mate au e, e tangata vaa viivii oki au, e te noo nei au i rotopu i te tangata vaa viivii; kua akara oki oku mata nei i te ariki, ia Iehova Sabaota ra.” Mei teaa ra tona akakeu anga e taua orama ra! Te pera nei ainei koe?

¹⁴ No reira i akapeea i raukaʼi ia Isaia kia ora mai i teia akara anga kaka? Kua akataka mai aia e kua aere maira tetai seraphi e akaora iaia e kua na ko maira: “Kua akataka keia to kino, e kua akakoreia taau ara.” (Isaia 6:7) Kua rauka ia Isaia te irinaki i to te Atua ra aroa ua e kua tamanako atu ki ta Iehova ra au tuatua. I teianei, kare ainei koe e anoano kia maata atu toou kite no teia au mea ora vaerua mana teitei nei? Eaa taau ka tika kia rave i reira? E kia maata atu te akakite anga. Ko tetai apinga ka taangaanga ko te Watch Tower Publications Index, ma te aruanga i tana au taiku anga i te au tumu e manganui no te akakite akataka anga.

Eaa ta Ezekiela i Kite?

15. Eaa te akakite maira e e tau kia irinakiia te orama a Ezekiela ra?

¹⁵ E ariu atu tatou ki tetai atu tu mea ora vaerua tei angaia ra. Kua akameitakiia a Ezekiela kia akara atu i tetai orama akauruia iaia e vaira ei tetai tuikaa i Babulonia. E eeu i taau Pipiria kia Ezekiela pene 1, ki nga irava mua e toru ra. Akapeea te akamata anga taua tataanga ra? Te tuatua ra ainei ia, ‘I tetai tuatau i topa, i tetai enua mamao . . .’? Kare, kare teia i te tua maani uaia i roto i tetai akanooanga tuatau ngaro. Te tuatua ra te irava 1 e: “E tae akera ki te toru ngauru o te mataiti, i te a o te marama, i te rima o te rā i taua marama ra, tei rotopu au i te au tuikaa i te vai ra i Kebara, kiritiia akera te rangi, e kite atura au i te orama a te Atua.” Eaa taau i kite no teia irava? Te oronga maira te reira i tetai ra tikai e tetai ngai tikai. Te toou maira teia au akakite anga ki te rima o te mataiti o te tuikaaanga o te Ariki ko Iehoiakina, i te mataiti 613 M.T.N.

16. Eaa ta Ezekiela i akara?

¹⁶ Kua tukuia mai te rima o Iehova ki rungao ia Ezekiela, e kua akamata aia i te kite i tetai orama akauruanga mataku no Iehova i runga i tetai terono i roto i tetai kariota maatamaata ma tona nga porotata maata ma te au mata e pini ua ake i to ratou au tatua ra. Te tumu te ka akamanako maata ia tatou i konei e e a nga mea ora, okotai te tu ra i te pae o te porotata taki tai ra. “Teia oki to ratou tu; mei to te tangata nei rai to ratou tu. Taki a anake rai o ratou mata, taki a oki o ratou peau. . . . E te tu o to ratou au mata, e mata tangata to ratou katoa toko a ra, e te mata liona i te pae katau: e to ratou katoa e toko a ra e mata puakatoro ïa i te pae kaui; e te mata aeto to ratou katoa toko a ra.”​—Ezekiela 1:5, 6, 10.

17. Eaa tei akatutuia maira e nga mata e a o nga kerupi ra?

¹⁷ Eaa teia nga mea ora e a ra? Na Ezekiela uaorai i akakite mai kia tatou e e nga kerupi ratou ra. (Ezekiela 10:1-3, 14) Eaa ra i riro ei kia a o ratou mata? Ei akatutu anga i nga tu meitaki e a o te Atu Ngateitei ko Iehova ra. Te mata aeto e akatutu anga i te pakari mamao te akara anga. (Iobu 39:27-29) Eaa te akatutuia maira e te mata puakatoro? Ma te ririnui maata o tona kaki e nga pakuivi, kua matauia tetai puakatoro ra kia taaki i tetai oroenua ma tona akaoro ra ki roto i te reva. E tika tikai, ka tau te puakatoro ei tetai akatutu anga no to Iehova ra mana ririnui kotinga koreia ra. Te taangaangaia ra te riona ei tetai akatutu anga no te tuatua tau mataku kore ra. Te mea openga, ko te mata o tetai tangata te tau ra ei akatutu mai i te aroa o te Atua ra, i te mea ko te tangata anake te mea ora o te enua te ka rauka kia akakite mai i teia tu aroa ma te kite oki.​—Mataio 22:37, 39; 1 Ioane 4:8.

18. Akapeea ta te apotetoro ko Ioane ra kapiti anga mai ki to tatou kite i te akaaerenga i te rangi ra?

¹⁸ Te vaira etai atu au orama te ka tauturu ia tatou kia akaoti i te tutu ra. Te kapiti nei teia i ta Ioane au orama te akakiteia maira i te puka Pipiria o Apokalupo ra. Koia, mei ia Ezekiela rai, kua kite ia Iehova i runga i tetai terono kaka ma nga kerupi. Eaa ta te au kerupi e rave ra? Te karangaranga maira ratou i ta nga seraphi i kapiti ra ia Isaia pene 6, i te na ko anga: “E tapu, e tapu, e tapu, to te Atu ra, to te Atua mana katoatoa ra, ko tei vai ana, e te vai nei, e ko te ka tae mai.” (Apokalupo 4:6-8) Kua kite katoa a Ioane i tetai punua mamoe i te pae i te terono. Koai ta te reira e akatutu maira? Ko te Punua Mamoe tikai a te Atua ra, ko Iesu Karaiti.​—Apokalupo 5:13, 14.

19. Na roto i teianei apii, eaa taau i kite no runga i te akaaerenga a Iehova ra?

¹⁹ No reira na teianei au orama, eaa ta tatou i kite? I runga rava o te akaaerenga i te rangi ra ko te Atua ko Iehova i runga i tona terono ma te Punua Mamoe, ko Iesu Karaiti, koia te Tuatua, me kare te Logo. I reira oki kua kite tatou i tetai nuku angera i te rangi, kapiti katoa te au seraphi e te au kerupi. E tuanga ratou no tetai akaaerenga maata, i te tavinianga i ta Iehova ra au akakoroanga. E ko tetai o taua akakoroanga ra ko te tutuanga i te tuatua meitaki i te ao katoa nei i teia tuatau o te openga.​—Mareko 13:10; Ioane 1:1-3; Apokalupo 14:6, 7.

20. Eaa te uianga te ka pauia i te atikara te ka aru mai?

²⁰ Ei taopenga, teia te Au Kite o Iehova i te enua nei te uipa ra i roto i to ratou au Are Uipaanga Patireia te apii ra e akapeea te rave i te anoano o te Atu Ngateitei ra. Ka tika, i teianei ka ariki tatou e e maata tei to tatou pae i to te aronga ma Satani ra e te au enemi o te tuatua mou. Te vaira te uianga, Eaa ta te akaaerenga i te rangi ra ka rave ma te tutuanga i te tuatua meitaki o te Patireia? Na te atikara te ka aru mai e akara matatio i te reira e etai atu tumu katoa oki.

Au Uianga no te Akamanako Akaou

◻ E ariki ei i ta Iehova ra akaaerenga, eaa ta tatou ka tika kia kite?

◻ Eaa te tupu anga tei rokoia ki te tavini o Elisaia ra, e akapeea ta te peroveta akamaroiroi anga iaia ra?

◻ Eaa te manako tau na tatou no ta tatou uaorai apii anga?

◻ Akapeea ta Daniela, ta Isaia, e ta Ezekiela ra oronga anga i te au tumu no te akaaerenga i te rangi ra?

[Tutu i te kapi 13]

E mamao rava atu te roa te puapinga no taau uaorai apii anga i to tetai kaikai anga tei teateamamao meitakiia ra

[Tutu i te kapi 15]

Ko tetai orama no te au nuku o te rangi ra ta Iehova pauanga i te pure a Elisaia ra