E Tatanu i te Pirianga Vaitata ma Iehova

“E AKAVAITATA atu ki te Atua, e nana e akavaitata mai kia kotou na,” i tata ei te pipi ko Iakobo. (Iakobo 4:8) E kua imene te tata taramo ko Davida: “Te tuatua-muna a Iehova ra, tei te aronga ïa i mataku iaia ra.” (Salamo 25:14) Te taka meitaki ra, e te inangaro maira te Atua ko Iehova ia tatou e kia piri vaitata kiaia. Inara, kare te katoatoa te akamori ra i te Atua e te akarongo ra i tana au akauenga e manako ana e te vaitata ra kiaia.

Akapeea koe? E pirianga vaitata ainei toou ki te Atua? Kare e ekoko anga, e te inangaro ra koe i te akapiri vaitata kiaia. Akapeea e raukai ia tatou i te tatanu i te pirianga vaitata ma te Atua? Eaa te aite anga o teia no tatou? Te oronga maira te pene toru o te puka Pipiria o Maseli i te au pau anga.

Akaari i te Takinga Meitaki e te Tuatua Tika Tikai

Kua akamata te Ariki ko Solomona o Iseraela taito i te pene toru o Maseli ma teia au tuatua: “E taku tamaiti, auraka e akangaropoina i taku nei ture; e kia akono marie toou ngakau i taku nei au akauenga: E au rā roa oki, e te au mataiti ora, e te au, ta te reira e kapiti katoa mai kia koe ra.” (Maseli 3:1, 2) I te mea e kua tata a Solomona i raro ake i te akauruanga tu-Atua, te aere tika maira teia ako anga metua mei te Atua ko Iehova e te orongaia maira kia tatou. Te akoia nei tatou kia akono i ta te Atua au akamaara anga​—tana au ture, me kare apiianga, e tana au akauenga​—tei rekotiia i roto i te Pipiria. Me rave tatou i teia, “e au rā roa oki, e te au mataiti ora, e te au, ta te reira e kapiti katoa mai” kia tatou. Ae, noatu i teianei ka rauka ia tatou te rekareka i te oraanga au tikai e ka kopae i te au angaanga te ka akamaeu ia tatou ki te kino e kia mate vave te tupu putuputu ra ki te aronga kino. Pera katoa, ka rauka ia tatou i te akono i te manakonakoanga o te ora anga mutu kore i roto i tetai enua au e te ou.​—Maseli 1:24-31; 2:21, 22.

Te tuatua anga, kua akakite a Solomona: “Auraka rava te aroa e te tuatua-mou e taka ke ia koe ra: e ri piri tikai ki runga i to kaki na; e tata oki i te reira ki runga i te papa o toou ngakau: E kite aroaia mai koe i reira, e te manako meitaki maataia mai, ki mua i te aroaro o te Atua e te tangata katoa nei.”​—Maseli 3:3, 4.

Te tuatua mua o te “aroa” te taikuia ra i tetai taime e ko te “aroa tiratiratu” e te o maira te tu tau tikai, te tu taokotai tikai, e te tiratiratu. Te tauta pakari ra ainei tatou i te kapiti atu kia Iehova noatu e eaa te ka tupu mai? Te akaari ra ainei tatou i te takinga meitaki i roto i to tatou au pirianga ma te au taeake irinaki ra? Te tauta ra ainei tatou e kia piri vaitata tamou ma ratou? I te au ravenga i te au ra ma ratou, te akono ra ainei tatou i ‘te ture takinga-meitaki tei to tatou arero’ noatu i raro ake i te au turanga timata anga?​—Maseli 31:26.

Tei maata i te takinga meitaki, te “akakore mai [ra a Iehova] i te ara.” (Salamo 86:5) Me kua tataraara tatou i ta tatou au ara i te tuatau i topa e i teianei te akono ra i te au ara tika no to tatou vaevae, te akapapuia maira tatou i “te tuatau rekareka” te aere maira mei ia Iehova. (Angaanga 3:19) Kare ainei tatou e aru i to tatou Atua na te akakore anga i te ara a tetai ke?​—Mataio 6:14, 15.

E “Atua tuatua-mou” a Iehova, e te inangaro ra aia i te “tuatua-mou” mei te aronga te kimi ra i te pirianga vaitata ma ia. (Salamo 31:5) Ka rauka ainei ia tatou i te tapapa ia Iehova kia riro mai ei Taeake no tatou me te akono ra tatou e rua oraanga​—te akatutu anga i tetai tu takapini i te au taeake Kerititiano e tetai me kare ratou e kite mai—​mei te “au tangata tarevakaua” tei uuna e mei teaa rai te tu ia ratou? (Salamo 26:4) Mei teaa ra te neneva i te reira, i te mea “te vai ua nei ra te au mea katoa ma te maeu rava ki mua i tona [to Iehova] mata”!​—Ebera 4:13.

Kia akaperepereia te takinga meitaki e te tuatua tika tikai ei apinganui kia “ri piri tikai ki runga i to kaki,” no te mea te tauturu maira te reira ia tatou kia “manako meitaki maataia mai, ki mua i te aroaro o te Atua e te tangata katoa.” Kare anake tatou e tau kia akaari ua i teia au tu inara kia tarai katoa ra i te reira ‘ki runga i te papa o to tatou ngakau,’ te akariroanga i te reira ei tuanga no to tatou tu tangata.

E Tatanu i te Irinaki Ngakau Tae ki Roto ia Iehova

Te tuatua ra te ariki pakari: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.”​—Maseli 3:5, 6.

Te tau ra a Iehova i to tatou tu irinaki anga. E ko Tei Anga, e “mana maata” tona e koia te Tumu o te “ririnui.” (Isaia 40:26, 29) Ka rauka iaia i te rave pouroa i tana i akakoro ra. Eaa ra, ko te aite anga tikai o tona ingoa “Ka Akariro Aia kia Tupu,” e te patu ra te reira i to tatou irinaki papu i roto i tona tu kia akatupu i tana i taputou mai! Te tika anga e “ko tei kore e tika i te Atua kia pikikaa” te akariro ra iaia e ko te akaraanga tau o te tuatua mou. (Ebera 6:18) Ko Tona tu maata ko te aroa. (1 Ioane 4:8) E “tuatua-tika [Aia] i tona katoa ra au aerenga; e te takinga-meitaki i tana katoa ra au angaanga.” (Salamo 145:17) Me kare e rauka ia tatou i te irinaki i te Atua, koai ta tatou ka irinaki? E tika, kia tatanu i te irinaki ki roto iaia, ka tau tatou kia “tongi ana kia kite i te meitaki o Iehova” na te taangaangaanga i ta tatou e apii ra no roto mai i te Pipiria i roto i to tatou uaorai oraanga e na te akaata anga i te meitaki ta teia e akatupu ra.​—Salamo 34:8.

Akapeea e raukai ia tatou e ‘auraka e akangaropoina ia Iehova i to tatou ra au aerenga’? Te na ko maira te tata taramo akauruia e: “Ka akamaaraara rai au i taau ra au angaanga katoa, ka tuatua rai au i taau i rave ra.” (Salamo 77:12) I te mea kare te Atua e kiteia, te akamaaraara anga i tana au angaanga maata e tana au raveanga ma tona iti tangata e mea puapinga ia kia tatanu i te pirianga vaitata ma ia.

E mataara puapinga maata katoa te pure no te akamanako anga ia Iehova. Kua kapiki ua te Ariki ko Davida ia Iehova “kare e rā e tukua.” (Salamo 86:3) E putuputu te taime kua pure a Davida i te po, e iaia e oro ke ra i roto i te metepara. (Salamo 63:6, 7) “Ma te pure tukumoe kore, i te au pure ravarai, i te pati a te Vaerua,” i raurau mai ei te apotetoro ko Paulo. (Ephesia 6:18) Eia oou taime e pure ana? Te rekareka ra ainei tatou i te komunikeiti ngakau tae ma te Atua? Me aro atu i te au turanga timata anga, te pati ra ainei tatou i te tauturu mei iaia? Te kimi ra ainei tatou na roto i te pure i tana arataki anga i mua ake ka tuku ei i te au iki anga puapinga? Ta tatou au pure ngakau tae kia Iehova te akavaitata ra ia tatou kiaia. E ka rauka ia tatou te akapapu anga e ka akarongo mai aia ki ta tatou pure e ka ‘akakite i toou ra au arataa.’

Mei teaa ra te neneva ‘e [kia] irinaki ki toou uaorai kite’ me kare i te aronga rongonui i te ao i te mea e ka rauka ia tatou te tuku i to tatou irinaki papu ki runga ia Iehova! “Auraka koe kia pakari i toou uaorai manako,” i na Solomona ei. Ei akatuke anga, kua raurau mai aia: “Ko Iehova ra taau e mataku, ka akaruke ei i te kino. Ko te ora ïa no toou ra au uaua, ko te matu ïa no toou ra au ivi.” (Maseli 3:7, 8) Ka tau te mataku meitaki i te akamareka kore i te Atua kia akaaere pouroa i ta tatou au angaanga, au manako, e te au manako ngakau. Te arai ra taua tu mataku ngateitei ia tatou mei te raveanga i te kino e te rapakau ra i te pae vaerua e te akaangaroianga.

Oronga Anga kia Iehova i Toou Meitaki

I teea atu mataara e raukai ia tatou i te akavaitata ki te Atua? “E akangateitei atu ia Iehova i taau ra au apinga, e te mataiā o taau katoa ra apinga kia tupu,” i ako mai ei te ariki. (Maseli 3:9) Kia akangateitei ia Iehova te aite anga kia akaari kiaia te manako teitei e kia akateitei iaia i te ngai tangata na te kapiti anga e te turuanga i te akakite anga i te ngai tangata i tona ingoa. Te au apinganui ka rauka ia tatou i te akangateitei ia Iehova koia oki ko to tatou ora, to tatou au tu kite, to tatou maroiroi, e ta tatou au apinga. Kia tau teia e ko te au ua mua​—ta tatou mea meitaki tikai. Kare ainei te mataara e taangaanga ra tatou i ta tatou au apinga te akaata ra i to tatou anoano kia ‘na mua i te kimi i te basileia o te Atua, e te tuatua-tika nana ra’?​—Mataio 6:33.

Kare e kore ka tutakiia mai ta tatou akangateitei anga ia Iehova ma ta tatou au apinganui. “Ka ki rava te au are vairanga apinga oou ra i reira,” i akapapu mai ei a Solomona, “e ki oki taau au āriki i te wina ou e maringi ua atu.” (Maseli 3:10) Koi kore ei te puapinga i te pae vaerua e taki atu ki te puapinga i te pae apinga, te taangaanga ua anga i ta tatou au apinga kia akangateitei ia Iehova te apai maira i te au akameitaki anga nui. Ko te rave anga i te anoano o te Atua ko te “kai” ia tei tauturu ia Iesu. (Ioane 4:34) Pera katoa, te pirianga ki roto i te angaanga tutuanga e te angaanga akariro anga i te tangata ei pipi te akakaka ra ia Iehova te akamatutu maira ia tatou. Me rave ua atu tatou i taua angaanga, ka ki maata to tatou are vairanga. Ko to tatou rekareka​—tei akatutuia e te uaina ou—​ka maringi ua.

Kare ainei e te akara ra tatou kia Iehova e te pure ra kiaia kia maata rava te kai i te ra tataki tai? (Mataio 6:11) E tika, pouroa ta tatou au apinga, te aere maira kia tatou no ko mai i to tatou Metua aroa i te rangi ra. Ka riringi mai a Iehova i te au akameitakianga kia taangaanga ra tatou i ta tatou au apinga kia akapaapaa iaia.​—1 Korinetia 4:7.

Ariki ua i ta Iehova Ako Anga

Te kite anga i te puapinga o te ako anga e raukai te pirianga vaitata ma Iehova, te ako maira te ariki o Iseraela ia tatou: “Auraka koe e akavaavaa, e taku tamaiti, i te ako a Iehova, auraka oki e noongata i tana pāpā anga mai. Ko tei akaperepereia e Iehova ra, ko tana ïa e pāpā mai; mei te metua i te tamaiti, tana i akaperepere ra.”​—Maseli 3:11, 12.

Inara, kare te ako anga e ariki ngoie ia ana. “Kare rava oki e ako e riro ei mea rekareka i reira ra, e mea aue ra,” i tata ei te apotetoro ko Paulo, “kareka i muri ake, ko tei meitaki ra ïa, koia rai te tuatua-tika te tupu i taua ako ra, i te aronga i akamātauia i te reira.” (Ebera 12:11) E tuanga anoanoia te apii anga e te ako anga no te terenianga te akavaitata ra ia tatou ki te Atua. Te akatikatika anga no ko mai ia Iehova​—me no ko mai te reira i te au metua, na roto i te putuputuanga Kerititiano, me kare na te akamaaraara anga i te au Tuatua Tapu i te tuatau o ta tatou apiianga​—e akakiteanga i tona inangaro ia tatou. Ka pakari tatou me ariki i te reira.

E Mou Tamou i te Pakari e te Kite Karape

Aru mai, kua tuatua maata a Solomona i te puapinga o te pakari e te kite karape i te tatanuanga i tetai pirianga vaitata ma te Atua. Kua akakite aia: “E ao to te tangata i kitea iaia te pakari, e te tangata i rauka iaia te kite ra: Ko te apinga oki i oko naʼi aia ra, e meitaki maata ïa i to te ario; e kia maata oki aia ra, e meitaki maata ïa i to te auro meitaki ra. . . . Ko te rakau ora aia i te aronga e opu iaia: e ko tei tāpu iaia, e ao tona.”​—Maseli 3:13-18.

Te akamaaraanga mai ia tatou i te pakari e te kite karape i roto i ta Iehova au angaanga meitaki o te anga anga, kua akakite te ariki: “Kua akamou i Iehova i te tumu o te enua nei i te pakari; kua akatinamou aia i te au rangi i te kite. . . . E taku tamaiti, auraka roa teia kia ngaro ke atu i to mata; e tāpu koe i te pakari meitaki e te akono; Ko te ora ïa no toou ra vaerua, e ko te apinga manea ïa ki runga i toou ra kaki.”​—Maseli 3:19-22.

E au tu Atua te pakari e te kite karape. Kare tatou e tatanu ua i te reira kia mou piri i te reira na te kore anga e akaruke i ta tatou apii putuputu i te au Tuatua Tapu e te taangaanga i ta tatou e apii ra. “Ei reira koe e aere uaʼi na toou ra arataa ma te ora,” i na Solomona ei, “e kare to vaevae e turori.” Kua tuatua mai aia: “Kia moe koe ki raro ra, kare ïa e mataku: koia ïa, ka moe ua koe ki raro, e e rekareka taau moe.”​—Maseli 3:23, 24.

Ae, ka rauka ia tatou i te aaere ma te tinamou e kia moe ma te au ia tatou e tatari ra i te vaitata anga mai o te ra mei te keia te tu o te “mate viviki” ki runga i to Satani ao kino. (1 Tesalonia 5:2, 3; 1 Ioane 5:19) E pera i te tuatau o te mate maata e vaitata maira, ka rauka ia tatou teia akapapu anga: “Me viviki mai te akamataku, auraka e mataku; e te tairipoti anga o te aronga kino kia vaitata mai: Ko Iehova oki toou irinaki anga, e nana e tiaki i to vaevae kia kore e piritia.”​—Maseli 3:25, 26; Mataio 24:21.

Kia Rave i te Meitaki

“Auraka koe e tāpu i te meitaki i te tangata e tau iaia ra,” i ako mai ei a Solomona, “e tei to rima rai taua meitaki ra kia o atu.” (Maseli 3:27) Te rave anga i te meitaki ki tetai atu te o maira te taangaanga anga i ta tatou au apinga no ratou, e e manganui te au tu o teia. Inara kare ainei te tauturuanga i tetai kia rauka te pirianga vaitata ma te Atua mou ko tetai apinga meitaki roa atu ka rauka ia tatou i te rave no ratou i teia “tuatau openga ra”? (Daniela 12:4) Ko teia, i reira, te au ra no te akaarianga i te maroiroi i te roto i te angaanga tutuanga i te Patireia e te akariroanga i te tangata ei pipi.​—Mataio 28:19, 20.

Kua akapapa katoa te ariki pakari i tetai au raveanga kia kopaeia, te na ko anga: “Auraka koe e karanga ki to tangata tupu ra, E aere, e oki akaou mai, apopo au e o atu ei kia koe ra; e te vai ra oki taua mea ra tei ia koe. Auraka koe e kimi i te kino i to tangata tupu ra, te noo meitaki ua ra oki aia ki vaitata ia koe. Auraka koe e māro ua atu ki te tangata kare e ara ra: e kare aia i takinga-kino mai ia koe ra. Auraka koe e vareae i te tangata takinga-kino, e auraka e aere na tona katoa ra au arataa.”​—Maseli 3:28-31.

Te tuatuaanga no runga i te tumu o tana ako anga, kua tuatua a Solomona: “E mea viivii oki na Iehova te aronga māro ra, tei te aronga tuatua-tika ra tana muna. Tei te are o te aronga kino te taumaa a Iehova: te akameitaki ra aia i te nooanga o te aronga tuatua-tika ra. Te akavaavaa nei aia i te aronga e akavaavaa: kareka te aronga akaaka, te kite aroa nei aia ia ratou. E rauka te kakā i te aronga pakari; ko te akateitei anga o te aronga neneva ra, ko te akama ïa.”​—Maseli 3:32-35.

E rekarekai tatou i te pirianga vaitata ma Iehova, auraka tatou e rave i te angaanga kino e te pikikaa. (Maseli 6:16-19) Kia rave ua tatou i te mea tika i to te Atua mata ka raukai ia tatou tona mareka anga e te akameitakianga. Penei ka rauka katoa ia tatou te ngateitei kare i kimiia me kite mai tetai e te rave rotai ra tatou ma te pakari tu-Atua. E kopae i reira tatou i te au tu kino o teia ao ta ua e te kino. Ae, e kimi tatou i te aerenga tuatua tika e e tatanu i te pirianga vaitata ma Iehova!

[Au Tutu i te kapi 25]

“E akangateitei atu ia Iehova i taau ra au apinga”