Tei Konei te Mesia ma Tona Tutara Anga

“Ko Iesu nei rai tei raveia akenei i roto ia kotou ki runga i te rangi, ka oki mai ïa mei te reira katoa, mei ta kotou i kite atu iaia i te aere anga atu ki runga i te rangi ra.”​—ANGAANGA 1:11.

1, 2. (a) Akapeea te akapumaana anga a nga angera e rua i te au apotetoro a Iesu ra i tona kakeanga ki te rangi ra? (e) Eaa nga uianga te akatuia maira e te manakonako anga no to Karaiti oki anga mai?

E TAI ngauru ma tai i tu ana i te tuanga itinga ra o te Maunga o Olive ra, te akara tamou atura ki runga i te rangi. E tuatau poto ua i mua akera to Iesu Karaiti kake atu anga mei roto ia ratou, te kore aere atura te kite anga i tona tu e ngaro atu ei ki roto i te tiao. I to ratou nga mataiti i kapiti ei kiaia, kua kite teia au tangata i ta Iesu oronga anga e maata te akapapu anga e koia te Mesia; kua noo katoa ratou na roto i te tuatau ati ngakau o tona matenga e te tuatau rekareka i tona tuakaouanga. I teianei kua aere ke atu aia.

² Kua mama ua maira nga angera e rua e kua tuatua mai i teia au tuatua akapumaana: “E te au tangata Galilea nei, eaa kotou i tu uaʼi, e i akara tamou ei ki runga i te rangi ra? Ko Iesu nei rai tei raveia akenei i roto ia kotou ki runga i te rangi, ka oki mai ïa mei te reira katoa, mei ta kotou i kite atu iaia i te aere anga atu ki runga i te rangi ra.” (Angaanga 1:11) Mei teaa ra te akapapuanga e​—kare te aiteanga o to Iesu ra kake anga ki te rangi e kua akaoti aia i tona manako anga no te enua nei e te au tangata katoa oki! Kare ra, ka oki akaou mai a Iesu. Kare e ekoko anga e kua akaki teianei au tuatua i te au apotetoro ra i te manakonako anga. E mirioni ua atu te au tangata i teia tuatau nei te akapiri atura i te puapinga maata ki taua taputou ra no to Karaiti oki anga mai. Te tuatua ra tetai papaki i te reira e ko te “Rua o te Aerenga Mai” me kare “Taenga Mai.” Inara, i te akara anga, ko te maataanga te oripu ua ra te manako e eaa tikai te aite anga o to Karaiti ra oki anga mai. Eaa te tu o to Karaiti oki anga mai? Aea? E eaa ta te reira ka akatupu ki to tatou oraanga i teia tuatau nei?

Te Tu o to Karaiti Oki Anga Mai

3. Eaa te irinakianga o te au tangata no runga i to Karaiti oki anga mai?

³ Kia tau ki ta te puka An Evangelical Christology (Tetai Evangeria o te Irinaki Anga Karaiti), “te rua o te aerenga mai me kare, oki anga mai o Karaiti (parousia) ka akanooia te patireia o te Atua, i te openga, ei mea atea ua, e no te tuatau katoa ki mua.” Ko te irinaki anga te mou ateaia ra e ko te oki anga mai o Karaiti ka akara atea uaia ia, ka akara tika tikaia e te katoatoa i runga i te paraneta nei. Ei turu i teia manako, e manganui te tou atura kia Apokalupo 1:7, te tatau ra: “I na, te aere mai na aia i roto i te tiao rangi; e akara te au mata katoa iaia, e te aronga i ko atu iaia ra.” Inara ko te aite anga ainei o teia irava e ko te tika tikai ia?

4, 5. (a) Akapeea tatou e kite ei e kare te aite anga o Apokalupo 1:7 i tona tu tika tikai? (e) Akapeea ta Iesu uaorai au tuatua i te akapapuanga i teia manakoanga?

⁴ Kia maara e, kua akakiteia maira te puka o Apokalupo “na te au akairo.” (Apokalupo 1:1, NW) E no reira ko teia takiota tuatua e akatutu anga ia; e tamanako ana, e akapeea “te aronga i ko atu iaia ra” ka akara atu ei ia Karaiti i tona oki anga mai? Kua vaitata i te 20 anere mataiti to ratou ra mate anga! Pera katoa oki, kua karanga nga angera ra e ka oki mai a Karaiti “mei te reira katoa” te tu mei tona akaruke anga ra. Inara, akapeea tona akaruke anga? E au mirioni ua atu ainei tei akara atura? Kare, e tokoiti ua te aronga tiratiratu ra tei akara atu i te reira tupuanga. E i ta nga angera tuatua anga kia ratou ra, i akara tikai ainei te au apotetoro ra i to Karaiti aere anga e tae roa atu ki te rangi ra? Kare, kua arai keia atura a Iesu e tetai tiao rangi e kua ngaro atu i te akara anga. I muri roa maira, kua tomo atu aia ki te au rangi vaerua ra ei kopapa vaerua, kare e akaraia e te mata tangata nei. (1 Korinetia 15:50) No reira, ko ta te au apotetoro i kite ra ko te akamata anga anake ua o to Iesu aerenga; kare ratou i akara i te openga, o tona oki anga ki mua i te aroaro o tona Metua, o Iehova ra. Ko teia ka kite anake ratou na to ratou mata o te akarongo ra.​—Ioane 20:17.

⁵ Te apii maira te Puka Tapu e ka oki mai a Iesu na roto i taua tu rai. Kua tuatua a Iesu uaorai i mua poto ake i tona matenga: “E kia roaroa ake, kare ua to te ao e kite akaou mai iaku.” (Ioane 14:19) Kua tuatua katoa aia e “kare te aereanga mai o te patireia o te Atua e tupu ma te tu akara anga umereia.” (Luka 17:20, NW) Na roto i teea tu, i reira, e ‘akaraʼi te au mata katoa iaia ra’? E raukai te pau anga, ka anoano tatou na mua i tetai kite taka meitaki i te tuatua a Iesu ratou ko tana au pipi i taiku ra no runga i tona oki anga mai.

6. (a) Eaa ra te au tuatua mei te “oki anga mai,” te “tae anga mai,” te “taenga mai,” e te “aerenga mai” i kore ei e rava no te urianga i te tuatua Ereni pa·rou·siʹa? (e) Eaa te akaari maira e ko te pa·rou·siʹa, me kare “tei konei,” e tuatau roa atu ia i to tetai ua atu tupu anga poto ua ra?

⁶ Ko te tika ra, e maata atu ta Karaiti ka rave i te “oki mai anga” anake. Ko tera tuatua, mei te “aerenga mai” ra, te “tae anga mai,” me kare “taenga mai,” te akakite maira i tetai tupuanga okotai i roto i tetai tuatau poto ua. Inara ko te aiteanga o te tuatua Ereni ta Iesu e tana au pipi i taiku ra e tere atu i te reira. E pa·rou·siʹa taua tuatua ra, ko tona aiteanga tikai “tei te pae ua ia koe” me kare “tei konei.” Te akatika ra te maataanga o te aronga apiiia e ko teia tuatua te kapiti katoa ra, kare i te taeanga mai anake mari ra i te vai anga mai tei konei​—mei tetai tere opita no tetai tangata ariki ra. Kare teia vai mai anga tei konei i te tupuanga poto ua; e tuatau takake ia, e tuatau akairoia. Ia Mataio 24:37-39 (NW), kua karanga a Iesu no taua “tuatau no te Tamaiti a te tangata ra e tei konei [pa·rou·siʹa]” ka aite ki “te tuatau ia Noa ra” tei akaopeia ra i te Vaipuke. Kua patu a Noa i te araka e kua akamatakite i te aronga rave kino no etai rau ngauru mataiti i mua ake i te taenga mai te Vaipuke e takoreia atura taua akatereanga viivii o te ao ra. Mei te reira katoa oki, to Karaiti taenga mai ki konei ma te akara koreia ka vai mai rai ia no tetai tuatau e rau ngauru ua atu mataiti i mua ake ka aka­ope­iaʼi te reira na roto i te akapou anga maata ra.

7. (a) Eaa te akapapu maira e ko te pa·rou·siʹa kare e akaraia e te mata tangata nei? (e) Akapeea e aea oki e tupu ei te au tuatua tapu te akataka maira i to Karaiti oki anga mai e ka akara “te au mata katoa iaia”?

⁷ Kare e ekoko anga, e kare te pa·rou·siʹa e akara tikaia e te mata tangata nei. Me ka akara mataia, eaa a Iesu ka akapou ei kia maata te tuatau, mei ta tatou ka kite, i te orongaanga i tetai akairo ki tana au pipi ei tauturu ia ratou kia kite e tei konei aia?a Inara, kia aere maira Karaiti i te akapou i te akatereanga a Satani no teianei ao, ka kitea puia e te katoatoa te tika e tei konei aia. Ei reira ka “akara te au mata katoa iaia.” Noatu rai ko te au enemi o Iesu ra ka kite ratou, e ka reka kore, no te mea e tika tikai to Iesu tutara anga.​—E akara ia Mataio 24:30; 2 Tesalonia 2:8; Apokalupo 1:5, 6.

Aea te Reira e Akamataʼi?

8. Eaa te tupu anga tei akairo ra i te akamata anga to Karaiti tuatau e tei konei aia, e i tupu teia kiea?

⁸ Ka akamata mai te tuatau no te Mesia ki konei ma tetai tupuanga te ka akatupu i tetai tumu putuputu te taikuanga no te au totou no te Mesia ra. Kua akakoronaia aia ei Ariki i te rangi. (2 Samuela 7:12-16; Isaia 9:5, 6; Ezekiela 21:26, 27) Na Iesu uaorai i akakite mai e ka kapitiia tona tuatau tei konei aia ma tona ariki anga. I etai akatutu anga, kua akaaite aia iaia uaorai ki tetai pu tei akaruke i tona ngutuare e tona au tavini e kua aere atura no te tuatau roa ki tetai “enua mamao” kia rauka iaia te “taoonga ariki.” Kua oronga atu aia i te reira tu akatutu anga ei tuanga no tana pauanga i te uianga a tana au apotetoro no runga i te akamata anga tona tuatau pa·rou·siʹa; ko tetai atu i orongaia mai e ia no te mea “te manako ra ratou e, e kitea mai te basileia o te Atua i reira ra.” (Luka 19:11, 12, 15; Mataio 24:3; 25:14, 19) E no reira i tona tuatau i te enua nei ei tangata, e roa te tuatau ka riro ei aia kia akakoronaia, ki tetai “enua mamao” o te rangi ra. Aea e tupu ei te reira?

9, 10. Eaa te akapapu anga e te tutara nei a Karaiti i teianei i te rangi, e i naea aia i akamataʼi i tana tutara anga?

⁹ I te ui anga ta Iesu au pipi kiaia: “Eaa te akairo e tei konei koe e te openga o te akatereanga o te au mea nei?” Kua pau atura a Iesu na te oronga anga kia ratou i te akataka anga meitaki i te tu o taua tuatau ki mua ra. (E akara ia Mataio, pene 24 (NW); Mareko, pene 13; Luka, pene 21; e akara katoa ia 2 Timoteo 3:1-5; Apokalupo, pene 6.) Te akaari mai nei teia akairo i tetai tutu tei akataka maira i tetai tuatau taitaia. E tuatau ia tei akairoia e te au tamaki o teianei ao, te tupu anga maata te rave kino, te topaanga te oraanga ngutuare tangata, te maata te maki mate, te onge, e te ngaruerue enua​—kare i etai ngai anake ua teia au manamanata, te tupu nei ra i te ao katoa teia au tumatetenga. E mea matauia ainei teia? Te au ra tataki tai katoa te topa aere nei, te akapapu maira e te tau meitaki ra ta Iesu akatakaanga no teia 20 anere mataiti nei.

¹⁰ Te akatika ra te aronga tata tuatua enua e ko te 1914 te tuatau taka­uri anga i te tuatua enua o te tangata nei, ko te tuatau taui anga i tupu ei i muri akera teia au manamanata e manganui e kare e rauka kia akakoreia, te tupu ua atura kia tae ki te au tuanga katoa o teianei ao. Ae, te au tupuanga i te pae kopapa i teianei ao i te akatupu anga i te totou Puka Tapu te tou nei ki te 1914 e ko te mataiti ia i akamataʼi a Iesu i tana tutara ei Ariki i te rangi ra. Pera katoa, te oronga maira tetai totou ia Daniela pene 4 i te akapapaanga akapapu te taki atura ia tatou ki taua mataiti rai​—1914—​koia te tuatau i akamataʼi ta Iehova Ariki i akataoonga ra i tana tutara anga.b

Eaa i Riro ei ei Tuatau Taitaia?

11, 12. (a) Eaa ra i rave anga ngataʼi no tetai papaki kia irinaki e te tutara nei a Karaiti i te rangi i teianei tikai? (e) Akapeea tatou me akatutu mai i tei tupu ra i muri ake i to Iesu ra akakorona angaia ei Ariki?

¹¹ Inara, penei ka manako tetai papaki e ‘Eaa ra i maataʼi te taitaia o teianei ao me kua akamata te Mesia i te tutaraanga i te rangi? E puapinga kore ainei tana tutaraanga?’ Penei ka tau tetai akatutu anga ei tauturu. Te tutaraia ra tetai enua e tetai peretiteni kino. Kua akanoo aia i tetai akatereanga viivii ma te mana akatereanga tei totoa atura ki te au tuanga katoa o taua enua ra. Inara kua raveia te votianga e kua re tetai tangata meitaki. Akapeea i reira? Mei tei tupu ana i etai au enua temokaratiki, kua akapouia etai nga marama no te taui anga i mua ake ka akamata tikai te peretiteni ou ra i te tutara. Eaa ta teia nga tangata e rua ka rave i taua tuatau ra? Ka akamata ainei i reira te tangata meitaki ra i te takore atu i te au kino katoatoa ta te tangata i mua ake iaia ra i akatupu takapini taua enua ra? Kare ainei aia, e na mua i te akamanako ki runga i te oire maata, te akanoo anga i tetai pupu minita no tona kavamani e te akakite anga ki te au mema rave tarevake a taua peretiteni mua ra? Na tera tu, kia akamata aia i tona mana katoa no te tutara, ka rauka iaia kia rave angaanga mei tetai nooanga ma, e te tau oki tona mana. Ko te peretiteni rave ra i te viivii, kare ainei aia e akono i te tuatau poto te toe ra nona kia apai ke atu i te au apinga ravarai tei rauka maira iaia na roto i te tu viivii i mua ake ka kore takiri ei tona mana katoa ra?

¹² Ko te tika ra, kua riro mei te reira tikai to Karaiti tuatau pa·rou·siʹa. Te akaari maira a Apokalupo 12:7-12 e i te akariro angaia a Karaiti ei Ariki i te rangi ra, kua rave aia na mua i te uri mai ia Satani e tana au temoni ki vao i te rangi ra, i reira te tamaanga i te ngai o Tana kavamani. I te mamae anga i te reira ruti anga roa ra te tiaki anga, eaa ta Satani i akono i taua “tuatau poto” ra i mua ake ka rave ei a Karaiti i tona mana tutara katoa i konei i te enua nei? Mei taua pere­titeni rave viivii ra, kua tamata aia kia riro iaia te au apinga ravarai te ka rauka iaia no roto atu i teia akatereanga taito nei. Kare aia e kimi ana i te moni; ko te au oraanga tana e inangaro ra. Te inangaro ra aia i te akatakake kia manganui ua atu te au tangata te ka rauka iaia mei ia Iehova e Tana Ariki te tutara ra.

13. Akapeea ta te Au Tuatua Tapu akaari mai anga e ka riro te akamataanga o to Karaiti tutara ei tuatau taitaia ki runga i te enua nei?

¹³ No reira ra, i riro ei te akamataanga o te tutara a te Mesia ra ei tuatau “mate ra oki to te enua.” (Apokalupo 12:12) Mei te reira katoa oki, te akakite maira a Salamo 110:1, 2, 6 (NW), e ka akamata te Mesia i tana tutara ‘i rotopu i tona au enemi.’ A muri anake i te reira ka akapuerikiriki aia i “to te pa enua katoa ra,” kapiti katoa oki te au tuanga katoatoa o ta Satani akatereanga viivii ra, kia ngaro takiri atu ia!

A te Tutara Anga te Mesia i te Enua Nei

14. Eaa ta te Mesia ka rave i muri ake i tana akapou anga i te akatereanga kino a Satani i te au mea nei?

¹⁴ A muri ake i tana akapou anga i te akatereanga a Satani e te aronga turu katoatoa i te reira, ei reira ka o atu te Ariki Mesia, koia a Iesu Karaiti, ki roto i te turanga tau kia akatupu i te au totou umere o te Puka Tapu te akataka maira i tana Tutara Anga no te Tauatini Mataiti. Te tauturu maira a Isaia 11:1-10 ia tatou kia kite eaa tikai te tu o te Mesia ei tutara. Te akakite maira te Isaia 11 irava 2 kia tatou e ka noo ua mairai “te Vaerua o Iehova ki runga iaia, te Vaerua o te pakari e no te karape; te Vaerua o te ako e no te mana.”

15. Eaa te akatupu anga a te ‘vaerua no te mana’ i te tutara anga Mesia ra?

¹⁵ E akamanako ana i te ka tupu i to Iesu tutara anga ma ‘te vaerua no te mana.’ Iaia i te enua nei, e tuanga mana tona no ko mai ia Iehova ra, i raukai iaia i te rave i te au temeio ra. E kua akaari maira aia i te ngakau inangaro tikai kia tauturu i te au tangata, i te na ko anga: “Kua tika ïa iaku.” (Mataio 8:3) Inara ko tana au temeio o taua tuatau ra e akakite anga momua anake ia no tana ka rave a te tuatau e tutara mai ei aia mei te rangi maira. Ka rave a Iesu i reira i te au temeio i te ao katoa nei! Te maki, te matapo, te taringa turi, te rima motu, e te aronga pirikoki ka rapakau katoaia no te tuatau mutu kore. (Isaia 35:5, 6) Ka akaopeia te pongi e tuatau ua atu, no te maata oki te manga, e te tau te tua angaia. (Salamo 72:16) Ka akapeea i reira te aronga e au mirioni ua atu kare ra e rauka kia tareia i roto i te au tanumanga ta te Atua e mareka ra i te akamaara atu? Na te “mana” o Iesu e akono atu i te mana kia akatuakaou mai ia ratou ra, ma te oronga anga kia ratou tataki tai i te tika kia ora e tuatau ua atu ki Parataito! (Ioane 5:28, 29) Inara, noatu teia mana katoa, ka vairai te tu taakaaka tikai no teia Ariki Mesia nei. Ka rekareka aia i tona kite maata “i te mataku ia Iehova.”​—Isaia 11:3.

16. Eaa to te Ariki Mesia ra tu ei Akava, e akapeea te tuke anga o te reira ki to te au akava tangata nei tei tataia ra?

¹⁶ Ka riro katoa oki teia Ariki ei Akava apa kore ua. “Kare aia e akava ua i ta ona mata i akara ra, kare katoa e akatika ua i ta ona taringa i akarongo ra.” Koai tetai akava tangata, i te tuatau kua topa me kare i teianei, tei tau kia akatakaia na teia tu nei? Noatu rai ko tetai tangata mako tikai tana akavaanga ka rauka anake iaia i te rave i te reira na tana i akara e tana oki i akarongo, ma te akono anga i te pakari e te karape tei iaia ra. E no reira, ka rauka ua te au akava e te pupu akava katoa o teianei ao kia tapae keia me kare kia akaoripu uaia te manako na roto i te au ravenga kikite o te ngai akavaanga, me kare akakitekite anga patoi anga ra. E putuputu te riro ko te aronga moni anake e te mana te ka rauka ia ratou te tutaki i te tauturu tau, i te okoanga i te tika. Kare mei te reira ta te Akava Mesia ra! Te tatau ra aia i te au ngakau. Kare e apinga e ngaro ke i tona manako. Kare e okoia te tuatua tau tei akamaroiroiia ki te aroa e te aroa ua. Ka vai tamou rai te reira.​—Isaia 11:3-5.

Eaa ka Tupu kia Koe no Tana Tutara

17, 18. (a) Eaa te tutu kaka no te tangata a te tuatau ki mua tei peniia maira ia Isaia 11:6-9? (e) Te akapiriia maira kiaai teia totou, e no teaa ra? (i) Akapeea teia totou i te akatupu anga tika tikai?

¹⁷ E mea kitea puia e, e mana oonu to te tutara o te Mesia ki runga i tona au tangata. Te taui ra ia i te au tangata. Te akakite maira a Isaia 11:6-9 i te maata o taua taui anga ra. Te peni maira teia totou anga i tetai tutu akakite i te au manu taae kikino​—te tapa, te ruko, te nemera, te riona, te atepi—​i te kapiti anga ma te manu rarata e pera katoa oki te tamariki. Inara kare te au manu taae e rave i te kino! No teaa ra? Te pau maira te Isaia 11 irava 9 e: “Kare ratou e kanga, kare oki e mea e mate ei, i toku katoa nei maunga tapu: no te mea, ka ki te enua i te kite ia Iehova, mei te vairanga tai e ki i te tai ra.”

¹⁸ Inara, kare e tupu anga o “te kite ia Iehova” ki runga i te au manu tikai; e no reira ka tau teia au irava e te tuatua ra no te au tangata. Te oronga maira te tutara anga a te Mesia i tetai porokarama apiianga, i te apiianga i te au tangata kia kite ia Iehova e tona au mataara katoa, te apiianga i te katoatoa kia akono i to ratou au tangata ma te aroa, te akangateitei e te tu tapunui. I roto i te Parataito te aere mai nei, ka apai te Mesia i te au tangata na te tu temeio ki te tu apa kore ua i te pae kopapa e te manako oki. Ka kore katoa te au tu taae mei to te manu rai te akakino nei i te tu tangata apa ua nei. Na roto i tetai tu tika tikai ka riro mai te au tangata kia au ua ma te au manu ra​—i te openga!​—Akaaiteia atu kia Genese 1:28.

19. Eaa te tupu anga ki te au oraanga o te au tangata i teia tuatau openga nei no te tutara o te Mesia ra?

¹⁹ Inara, kia maara e, te tutara nei te Mesia i teianei. Noatu rai i teianei, te apii nei te au tangata o raro ake i te Patireia kia noo au ua i te kapiti anga, ma te akatupuanga i tetai tu ia Isaia 11:6-9. Pera katoa, e vaitata i te 80 mataiti, to Iesu akatupu anga mai ia Isaia 11:10: “E kia tae ki taua rā ra, ko taua aka o Iese ra tei tu ki runga ei reva no te tangata, te ka kimiia ïa i te pa enua: e kakā marie oki tona akaangaroianga ra.” Te ariu atura te au tangata o te pa enua ravarai ki te Mesia. No teaa ra? No te mea mei tona akamata anga i te tutara, kua “tu [aia] ki runga ei reva.” No te akakite aia i tona vai mai anga tei konei, ki teianei ao katoa na roto i te porokarama apiianga maata tei akatakaia i runga akenei. Ko te tika, kua totouia mai e Iesu e ka raveia tetai angaanga tutuanga i te ao katoa nei ko tetai akairo maata ia no tona vai anga mai tei konei i mua ake i te openga o teia akatereanga taito nei.​—Mataio 24:14.

20. Eaa te tu manako tau na te au tangata katoatoa i raro ake i te tutara a te Mesia ra kia kopae ke, e no teaa ra?

²⁰ No reira kare to Karaiti vai mai anga tei konei i tetai apinga mamao ke atu te manako uaia ra, e tumu taumaro ua anga i rotopu i te aronga apiipii no runga i te atua ra. Te piri maira tona tutara ki te au oraanga i runga i te enua nei e te taui ra i te reira, mei ta Isaia i totou mairai. Kua akavaitataia mai e Iesu e au mirioni ua atu tangata no tona Patireia no roto mai i te akatereanga o teianei ao viivii. Ko koe ainei tetai o teia nei aronga tangata? E tavini i reira ma te maroiroi katoa e te rekareka te tau ra no to tatou Tutara! E tika e, e ngoie ua te akaroiroi anga, te piri anga atu i te kapikianga aviri a teianei ao e: “Teiea ua tona vai mai anga tei konei tei taputouia ra?” (2 Petero 3:4, NW) Inara mei ta Iesu uaorai i tuatua maira, “te tāpu tikai e tae ua atu ki te openga ra, ka ora ïa.”​—Mataio 24:13.

21. Akapeea tatou katoatoa i te akamaata anga i to tatou arikianga no te manakonako anga no te Mesia ra?

²¹ I te au ra tataki tai katoatoa te topa aere nei, te akavaitata atura tatou ki taua ra maata ra e arataki ei a Iehova i Tana Tamaiti kia akakite atea i tona vai mai anga tei konei kia kitea puia e to te ao katoa nei. Auraka roa e tuku i toou manakonako anga no taua ra ra kia tupu ma te popoiri. E akamanako ana no runga i to Iesu taoonga ei Mesia e ki runga katoa oki i tona tu tau ei Ariki tutara. E tamanako oonu katoa, i te Atua ko Iehova, koia te pu e te manako akaaere o taua manakonako anga maata no te Mesia ra tei akapapaia maira i roto i te Puka Tapu. Ia koe e rave ra i te reira, kare e ekoko anga e ka manako rai koe mei to te apotetoro ko Paulo ra i tana tata anga: “Aue te oonu o te apinga nui o te pakari e te kite i te Atua e!”​—Roma 11:33.

[Au Tataanga Rikiriki i Raro]

Akapeea Koe me Pau?

◻ Eaa te tu o to Karaiti oki anga mai?

◻ Akapeea tatou i kite ei e e akara koreia to Karaiti pa·rou·siʹa e ka vairai no tetai tuatau roa?

◻ I naea i akamataʼi to Karaiti tuatau e tei konei aia, e akapeea tatou i kite ei i teia?

◻ Eaa te tu o te Mesia ei Tutara i te rangi ra?

◻ Eaa te au tu ta te tutara o Karaiti ka akatupu i te oraanga o tona au tangata ra?

[Tutu i te kapi 15]

Te manakonako anga e ka oki akaou mai a Iesu kua riro ei mea maata ki tana au apotetoro tiratiratu ra

[Tutu i te kapi 17]

I te tutaraanga mei te rangi maira, ka rave a Iesu i te au temeio ki te au tuanga katoa o teianei ao

[Akameitakianga]

Te enua: Na NASA te tutu