Kua Riro “Te Mea Ngiti Okotai ei Tausani”
“E riro te mea ngiti okotai ei tausani; e ko tei mea ngiti poepoe ra, e riro ïa ei enua maroiroi.”—ISAIA 60:22.
1, 2. (a) Eaa te poiri i tapoki ei i te enua i teia tuatau nei? (e) Akapeea te marama o Iehova i kaka tamou marie ei ki runga i tona au tangata?
“ETAPOKIIA oki te enua nei e te poiri, e te au tangata i te poiri tangotango ra: e iti mairā Iehova ki runga ia koe, e kitea ua ïa mai oki tona kakā ki runga ia koe ra.” (Isaia 60:2) Te akataka meitaki maira teianei au tuatua i te turanga i te enua nei mei te 1919 mairai. Kua kopae ke atu a Kerititome i te akairo o te parutia ariki o Iesu Karaiti, koia “te mārama o teianei ao.” (Ioane 8:12; Mataio 24:3) No te “riri maata” o Satani, koia te “tutara o teianei ao poiri,” ko te 20 anere mataiti te tuatau ta kino roa, e te akapou anga oki o te tuatua enua tangata nei. (Apokalupo 12:12; Ephesia 6:12) Te noo nei te maata anga o te au tangata i roto i te poiri pae vaerua.
2 Inara, te kaka nei te marama i teia tuatau. “Kua iti mai te kaka” o Iehova ki runga i tona au tavini, koia te toenga o tei akatainuia ra, ko ratou oki te au mono i te enua nei o tana “vaine” i te rangi ra. (Isaia 60:1, akaaite ia NW.) E maata oki mei to ratou matara anga mai mei te tuikaaanga kia Babulonia i te 1919 ra, kua akaata mai teianei aronga i te kaka o te Atua e ‘kua akakaka ïa ki mua i te aroaro o te tangata nei.’ (Mataio 5:16) Mei te 1919 tae mai ki te 1931, kua tupu ua atu taua kaka anga Patireia ra i te akaruke angaia te au tapekaanga toenga o te manakoanga Babulonia ra. Kua tupu to ratou numero kia raungauru ua atu au tauatini i ta Iehova ra akatupu anga i tana taputou: “E akaputuputu tika rai au i te toenga o Iseraela; e kave au ia ratou ki te ngai okotai mei te au mamoe i Bozara, mei te anana i roto i ta ratou one kai; e vairakau pu ua ratou i te rai o te tangata.” (Mika 2:12) I te 1931, kua kitea puia to Iehova ra kaka ki runga i tona au tangata i ta ratou ariki anga i te ingoa te Au Kite o Iehova ra.—Isaia 43:10, 12.
3. Akapeea i riro ei kia papu e ka kaka te marama o Iehova ki rungao ia etai ke i te pae atu i tei akatainuia ra?
3 Ka akakaka mai ainei a Iehova ki runga anake i te toenga o te “anana iti” ra? (Luka 12:32) Kare. Kua tou mai te itiu o Tepetema 1, 1931 o The Watch Tower ra o tetai atu pupu. I tetai akataka anga meitaki ia Ezekiela 9:1-11, kua akakite mai ia e ko te tangata ma te ariki inika a te tata tuatua tei taikuia i taua au irava ra te tuatua ra no te toenga o te aronga akatainuia. Koai ma te akairoia ra te rae e taua “tangata” ra? Ko te au “mamoe ke atu,” no ratou ra te manakonako anga kia noo mutu kore ki runga i tetai enua parataito. (Ioane 10:16; Salamo 37:29) I te 1935 kua kitea teianei pupu o te au “mamoe ke atu ra” e no te “aronga maata rava . . . no te pa enua ravarai” tei akaraia i te orama na te apotetoro ko Ioane ra. (Apokalupo 7:9-14) Mei te 1935 maira e nei, e maata te manako anga ki runga i te akaputuanga i taua aronga maata rava ra.
4. Koai ma te “au ariki” e te “pa enua” te taikuia ra ia Isaia 60:3?
4 Kua taikuia teianei angaanga akaputuanga ki roto i te totou a Isaia i tana tuatua anga: “E aere mai oki te pa enua ki toou ra mārama, e te au ariki oki ki te kakā o toou ra kake anga ki runga.” (Isaia 60:3) Koai ma te “au ariki” te taikuia ra i konei? Ko te toenga o te 144,000 e, kapiti katoa ma Iesu Karaiti, te aronga akatuangaia i te Patireia o te rangi ra e kua rave ratou i te arataki anga i te angaanga akakitekite anga. (Roma 8:17; Apokalupo 12:17; 14:1) I teia tuatau, ko nga tauatini tokoiti ua o te toenga o te aronga akatainuia ra e tokoiti ua ratou me akaaiteia atu ki to te au “pa enua,” te aronga e manakonako anga to ratou no te enua nei, tei aere maira kia Iehova kia apiiia ratou e kia pati atu ia etai ke ra kia rave katoa i te reira.—Isaia 2:3
Au Tavini Totomapu o Iehova
5. (a) Eaa te au tika te akaari maira e kare i meangiti mai te totomapu o te au tangata o Iehova ra? (e) Ko teea au enua tei tupu maata ra i te 1999? (Akara i te papaanga i te kapi 17-20.)
5 Mei teaa ra te tu totomapu tei akaariia maira e te Au Kite i teianei 20 anere mataiti katoa! E noatu rai te tupuanga maata te au taomi anga, kare i meangiti mai to ratou totomapu i te vaitata anga te mataiti 2000. Te manako maroiroi rai ratou i ta Iesu akauenga: “E akariro i to te pa enua katoa ei pipi.” (Mataio 28:19, 20) Kua itae te numero o te au papuritia rave i te tutu evangeria i teianei mataiti tavini anga kua topa o te 20 anere mataiti i tetai take ou no te 5,912,492. Kua akapou ratou i tetai numero ora maata e 1,144,566,849 te katoatoa i te tuatuaanga kia etai ke ra no te Atua e tana au akakoroanga. Kua rave ratou e 420,047,796 au oki akaouanga ki te aronga inangaro maira e kua akono e 4,433,884 au apii anga Pipiria tutaki kore i te ngutuare. Mei teaa ra tetai rekoti rave tavini anga meitaki totomapu tikai!
6. Eaa te akanoonooanga ou tei raveia no te au painia, e eaa te tupu anga no te reira?
6 Ia Tianuare i topa akenei, kua akakite te Pupu Akaaere i tetai taui anga i te ora umuumuia no te au painia. E manganui kua rave i te reira e kua tomo atu ki te au pupu no te painia putuputu me kare no te painia tauturu. Ei akatauanga, i te tuatau o nga marama mua e a o te karena 1999, kua rauka i te opati manga o te Netherlands e a taime te maata atu o te au pepa painia tamou i to taua tuatau rai i te mataiti i mua akera. Kua ripoti a Ghana: “Mei te akamata anga mairai te au ora ou no te painia, kua kake tamou marie to matou au painia tamou.” I te mataiti tavini anga o te 1999, kua itae te numero o te au painia i te ao katoa ki te 738,343—ko tetai akakite anga meitaki ia i te “maroiroi i te au angaanga memeitaki ra.”—Tito 2:14.
7. Akapeea ta Iehova akameitaki anga i te angaanga maroiroi a tona au tavini?
7 Kua akameitaki ainei a Iehova i teia angaanga maroiroi? Ae. Kua tuatua aia na roto ia Isaia: “Ka nānā ana i to mata ki runga e akara e pini ua ake; kua putuputu katoatoa mai ratou, e aere mai ratou kia koe ra: e tae mai to au tamariki tamaroa mei te ngai mamao mai, e to au tamaine e apai taokupuia mai ïa.” (Isaia 60:4) Te “au tamariki tamaroa” akatainuia e te “au tamaine” tei akaputuia maira te vai rae maroiroi ra i te tavinianga i te Atua. E i teianei, te akaputuia maira te au mamoe ke atu a Iesu ki te tua o te “au tamariki tamaroa” e te “au tamaine” akatainuia o Iehova i te pa enua e te au motu e 234 o te moana ra.
“Au Angaanga Memeitaki Katoa Ra”
8. Eaa te “au angaanga memeitaki” ta te Au Kite o Iehova e rave nei?
8 Tei te au Kerititiano te apainga kia tutu aere i te evangeria o te Patireia e kia tauturu oki i te aronga inangaro kia riro ei au pipi. Inara kua “tau tikai [ratou] i te au angaanga memeitaki katoa ra.” (2 Timoteo 3:17) No reira, te akono aroa ratou i to ratou au pamiri, ka akaari i te tu maoraora, e te atoro oki i te aronga maki. (1 Timoteo 5:8; Ebera 13:16) E te rave ra te aronga oronga ia ratou uaorai i te au angaanga patuanga te Au Are Uipaanga Patireia—ko tetai angaanga te oronga katoa ra i tetai kite. I Togo, i muri ake i te patu anga i tetai are uipaanga, kua anoano te aronga akaaere o tetai akonoanga pure rapakau maki kia kite ratou e eaa i raukai i te Au Kite o Iehova kia patu i to ratou uaorai au are e ko to ratou akonoanga pure kua tutaki i te au tangata no te reira akakoroanga! Kua ripoti to Togo e no te patu anga i te Au Are Uipaanga Patireia tau e te meitaki kua akatupu i tetai manako papu ki te aronga i te pae mai e kua tauta tetai papaki kia tarau me kare kia patuia te au are i te au ngai te ka patuia te au are uipaanga ra.
9. Eaa ta te Au Kite o Iehova i rave i te rokoia mai anga e te au tumatetenga?
9 I etai tuatau te anoanoia ra tetai atu tu angaanga meitaki. E manganui te au enua i teia mataiti tavini anga i topa akenei tei rokoia e te au tumatetenga, e e putuputu te riro ko te aronga mua i tae atu ki te tauturu ko te Au Kite o Iehova ra. Ei akatauanga, e maata to Honduras tei akataneaia e te Uriia ko Mitch. E viviki ua, te opati manga i te akapapa te au kumiti tauturu ei raverave i te tautaanga tauturu atu. Kua rave te Au Kite i Honduras e etai atu enua e manganui i te oronga te kakau, kai, vairakau e etai atu au apinga oki. Kua rave te Regional Building Committees i te taangaanga i to ratou kite karape i te patu akaou i te au are. Kare i roaia, kua tauturuia to tatou au taeake tei rokoia ra e te tumatetenga kia oki akaou ki ta ratou au angaanga putuputu ra. I Ecuador, kua aere atu te Au Kite o Iehova ki to ratou au taeake i te akapou angaia e te au vaipukeanga mamaata i etai au are. I muri ake i te akaraanga i te tu mako o ta ratou akono anga i taua turanga ra, kua tuatua tetai opita kavamani e: “Naringa ko teianei taku pupu, ka rauka iaku te au rave anga umere! Ka tau te aronga mei ia kotou na rai ki roto i te au tuanga ra ravarai o teianei ao.” Ka apai mai taua angaanga meitaki ra i te akapaapaa anga ki te Atua ko Iehova e e akakite anga oki i to tatou “akono i te Atua ra, e puapinga to te reira i te au mea katoa nei.”—1 Timoteo 4:8.
‘E Tere Nei Ratou mei te Tumurangi’
10. Noatu rai te topa aereanga te numero o tei akatainuia ra, eaa ra i tupu maata atu ei te akakitekite anga i te ingoa o Iehova?
10 Kua ui maira Iehova i teianei: “Koai ra teia e tere nei mei te tumurangi? e mei te aronga kukupa e rere i to ratou au vaarua ra? E tapapa mai te au enua taatai iaku, e te au pai o Taresisa i te apai anga mai i to au tamariki mei te ngai mamao mai; . . . E na te au tamariki a te au tangata ke ra e patu i taau au patu, e e raveraveia mai koe e to ratou au ariki ra.” (Isaia 60:8-10) Ko te aronga mua kia akara mai i te ‘kakaanga mai’ o Iehova ko tana “au tamariki,” koia te au Kerititiano akatainuia ra. I muri mai ko te “au tangata ke,” koia te aronga maata rava, tei rave angaanga tiratiratu atura ki to ratou au taeake akatainuia ra, i te aruanga i ta ratou taki anga i te tutuanga evangeria. No reira, noatu rai te topa aere ra te numero o te aronga akatainuia, te akakitekiteia ra te ingoa o Iehova takapini te enua katoa nei kare e aiteia ana i mua ana.
11. (a) Eaa te tupu ua atura e eaa te maata o te tupuanga i te 1999? (e) Ko teea te au enua i rauka ia ratou te au numero maata tei papetitoia no te 1999? (E akara i te papa anga i te kapi 17-20.)
11 Ei tupu anga, e au mirioni ua atu te tere maira “mei te aronga kukupa e rere i to ratou au vaarua ra,” i te kimianga akapuanga i roto i te putuputuanga Kerititiano. E au anere ua atu tauatini te kapitiia maira i te mataiti, e te tuera ra te aerenga mai no te aronga maata atu. Te tuatua ra Isaia: “E amama ua to au ngutupa kare e tukumoe; i te po e te ao katoa kare e topiriia: kia apai mai ratou i te apinga o te pa enua kia koe.” (Isaia 60:11) I te mataiti kua topa akenei e 323,439 tei papetitoia ei akatutu anga i to ratou akatapuanga kia Iehova, e kare aia i topiri ake i te au ngutupa. “E e tae mai tei inangaroia e te au enua katoa ra,” te au mema o te aronga maata rava, te aere maata maira na roto i reira. (Hagai 2:7) Kare te aronga te anoano ra kia akaruke atu i te poiri e akaariu keia atu. (Ioane 12:46) Kia kore ra taua aronga katoatoa ra e ngere i to ratou ariki anga i te marama ra!
Mataku Kore te Aro Atu i te Patoi Anga
12. I akapeea te aronga tei inangaro ra i te poiri i te tauta anga kia tamate atu i te marama?
12 Te aronga te inangaro ra i te poiri te makitakita ra i te marama o Iehova. (Ioane 3:19) Kua tauta tetai papaki kia tamate i taua marama ra. Kare teia i te mea kare i manakoia atu. Noatu rai ko Iesu, “koia te mārama mou, ko te akamārama mai i te tangata katoa,” kua akaapaia, patoiia, e i te openga kua tamateia e tona au tangata enua. (Ioane 1:9) I te 20 anere mataiti katoa oki, kua aviriia te Au Kite o Iehova, kua tapekaia, kua araiia, e kua tamateia oki, ia ratou e akaata tiratiratu ra i te marama o Iehova. I teianei au mataiti ua ake nei, e aronga patoi etai tei rave i te akatotoaanga te au pikikaa i roto i te nuti no te aronga tei akaata ra i te marama o te Atua. Kua anoano etai kia akariro kia irinaki te au tangata e e kino te Au Kite o Iehova e ka tau kia tureia me kare kia araiia. Kua autu ainei taua aronga patoi ra?
13. Eaa te tupu anga mei te orongaanga pakari i te au tika no runga i ta tatou angaanga ki te akatotoa anga nuti ra?
13 Kare. I te ngai tau, kua aere te Au Kite o Iehova ki te aronga akatotoa anga nuti kia akataka atu i te tika. Ei tupu anga, kua akakite ateaia te ingoa o Iehova i te au nutipepa e te au makatini i te ratio e te tivi oki. Kua riro teianei ei au tupu anga memeitaki i te angaanga tutu aere. Ei akatauanga, i Denmark, ko tetai porokaramu no te tivi o taua enua ra kua uriuri i te tumu “Eaa te akarongo o te au Danes i topai.” Kapiti katoa atu ma etai atura, kua uiuiia te Au Kite o Iehova. I muri akera, kua tuatua tetai vaine tei akara ra i taua porokaramu ra e: “Kua taka meitaki tikai e iaai te vaerua o te Atua ra.” Kua akamataia tetai apii anga ma ia katoa ra.
14. I te pekapeka anga kia ratou, eaa ta te aronga patoi ka kite kare e roaia?
14 Kua kite te Au Kite o Iehova e e manganui to teianei ao te ka patoi ia ratou. (Ioane 17:14) Inara, te akamaroiroiia nei ratou e ta Isaia totou: “E te au tamariki a te aronga i takinga-kino mai ia koe ra, te ka aere mai ma te tupou ki raro ki mua ia koe ra, e te aronga katoa i akaviivii mai ia koe ra, ko te ka tipapa mai ïa ki raro i to tapuae: e tapa oki ratou ia koe, Ko te oire no Iehova; ko te Ziona o Tei Tapu i Iseraela nei.” (Isaia 60:14) I to ratou pekapeka anga, kare e roaia ka kite te aronga patoi e ko te tika, kua tamaki atu ratou i te Atua uaorai. Koai te ka re i taua tamaki anga ra?
15. Akapeea ta te Au Kite o Iehova ra ‘ngote anga i te u o te pe enua ra,’ i akapeea te akaata anga mai i te reira i ta ratou apiianga e te angaanga evangeria oki?
15 Kua taputou katoa oki a Iehova: “E akariro au ia koe ei akateitei anga mutu kore, . . . E ngote rai koe i te u o te pa enua ra, e ngote koe i te u o te au ariki ra; e kite oki koe e ko au nei toou Ora.” (Isaia 60:15, 16) Ae, ko Iehova ra te Ora no tona au tangata. Me ka irinaki ratou iaia, ka vairai ratou “e mutu kore ua atu.” E ‘ka ngote ratou i te u o te pa enua ra,’ i te taangaanga i etai au apinga no te akatere anga i te akamorianga mou. Ei akatauanga, te taangaanga pakari i te komupiuta e te au apinga no te komunikeiti anga te nenei anga i Te Punanga Tiaki i te 121au reo e te Awake! i te 62 reo. Ko tetai apinga porokaramu komupiuta kua akapapaia ei tauturu i te urianga i te New World Translation ki roto i etai au reo ou, e te apai mai nei taua uri anga i te rekareka anga maata. I te oronga anga mai te urianga i roto i te reo Croatia o te au Tuatua Tapu Ereni Kerititiano i te 1999, e au tauatini ua atu tei tae mai te roimata no te rekareka. Kua tuatua tetai taeake ruaine: “Kua roa au i te tiaki anga no teianei Pipiria. I teianei ka rauka iaku kia mate atu ma te au!” Ko te totoa anga i te New World Translation, te katoa anga me kare tetai tuanga, kua tere atu i te 100 mirioni i te 34 au reo.
Au Turanga Akono Teitei
16, 17. (a) Noatu rai e ngata, eaa i puapinga maatai kia tamou marie i ta Iehova au turanga teitei? (e) Eaa te tupuanga tei akatutu mai e ka rauka i te aronga ou kia patoi atu i te tu viivii o teianei ao?
16 Kua tuatua a Iesu: “Ko te rave i te kino ra, kua makitakita anake ïa ki te mārama.” (Ioane 3:20) I tetai pae, ko te aronga tei vaira ki roto i te marama kua inangaro i te au turanga teitei a Iehova. Kua tuatua a Iehova na roto ia Isaia: “E riro oki toou ra au tangata ei aronga tuatua-tika anake.” (Isaia 60:21a) Ka riro ia ei akaaoanga kia tamou marie i te au turanga tuatua-tika i roto i tetai ao te raveia ra te ainga tau kore, te pikikaa, te noinoi, e te akaparau oki. Ei akatauanga, i etai enua, te tupu maata ra te au puapinga e e ngoie ua kia akatapaeia ki roto i tetai manako anga aruaru i te apinganui. Inara, kua akamatakite a Paulo: “Kareka te aronga e māro e kia maata te apinga, e rokoia ïa e te timataanga, e te ereere, e te anoano neneva e manganui, e kino ei ra, e maremo takiri atu ei te tangata ki roto i te pou e te mate.” (1 Timoteo 6:9) Mei teaa ra te tumatetenga me ka topa oonu atu tetai ki roto i te au ravenga pitiniti e kia tuku atinga aia i te au apinga puapinga tikai, mei te taokotai anga Kerititiano ra, te tavini anga tapu, te au kaveinga akono tau, e te au apainga ngutuare tangata!
17 Te tamou marieanga i te au turanga tuatua tika ka rauka kia riro ei mea ngata no te aronga ou, me te o atura e manganui ua atu to ratou au oa aiteite ra te mataiti ki roto i te rave tau kore i te apinga akakona e te akono tau kore oki. I Suriname, kua araveiia tetai tamaine e 14 mataiti e tetai tamaroa manea i te apii ra e kua patiia atu kia rave raua i te pirianga ainga. Kare aia e akatika, ma te akatakaanga e te tureia ra e te Pipiria taua apinga ra i vao ake i te akaipoipo anga. Kua aviriia aia e etai atu au tamaine i te apii ra e kua tauta i te taomi iaia kia taui i tona manako, i te tuatuaanga e te anoano ra etai katoa kia moe kapiti atu ma taua tamaroa ra. Inara, kua tu ngaueue kore taua tamaine ra. I etai epetoma i muri akera, kua kiteia mai e HIV positive taua tamaroa ra e kua kino rava tona maki. Kua mataora taua tamaine ra e i akarongo aia i ta Iehova ra akauenga kia ‘kore e akaturi.’ (Angaanga 15:28, 29) Te ngakau akateitei ra te Au Kite o Iehova i te aronga ou i roto ia ratou tei tu ngaueue kore ra no te tika. To ratou akarongo, e to ratou au metua ra, ‘te akakakā ra’—te apai akangateitei maira ki—te ingoa o te Atua ko Iehova.—Isaia 60:21e.
Kua Oronga Mai a Iehova i te Tupuanga Maata
18. (a) Eaa te apinga maata ta Iehova i rave no tona au tangata? (e) Eaa te akakite anga te vaira e ka aere tamou ua atu te tupu anga, e eaa te au manakonako anga te tatari maira i te aronga tei vai i te marama?
18 Ae, te akakaka marama maira Iehova ki runga i tona au tangata, ma te akameitakianga ia ratou, te arataki anga ia ratou, e te akamaroiroianga oki ia ratou ra. I te tuatau o te 20 anere mataiti ra, kua kite ratou i te tupu anga o ta Isaia au tuatua: “E riro te mea ngiti okotai ei tausani; e ko tei mea ngiti poepoe ra, e riro ïa ei enua maroiroi: naku, na Iehova, e akarapurapu i te reira i tona tuatau.” (Isaia 60:22) Mei te rima ki mai i te 1919 ra, “te mea ngiti” kua riro mai e maata atu i te “okotai ei tausani.” E kare i tae ake ki te openga o taua tupuanga ra! I teia mataiti i topa akenei e 14,088,751 katoa tei akaputu atu ki te oroa Akamaara Anga i to Iesu matenga. E manganui to te reira aronga kare i te Au Kite rave angaanga. Te mataora nei tatou e i akaputu atu ratou ki taua oroa puapinga maata ra, e te pati atu nei tatou ia ratou kia aere ua atu ki taua marama ra. Te kaka marama ra a Iehova ki runga i tona au tangata. Te vai tuera ua ra te ngutupa ki tana akaaerenga. Ei reira, kia tamanako tikai te katoatoa kia vai atu ma te marama o Iehova ra. Mei teaa ra te au akameitakianga tei akatupuia ra e te reira no tatou i teianei! E mei teaa katoa te rekareka anga ta te reira te ka apai mai i te tuatau ki mua me ka akapaapaa te au mea i anga katoaia ra ia Iehova e ka rekareka oki i te manea o tona kaka!—Apokalupo 5:13, 14.
Ka Rauka Ainei ia Koe te Akataka?
• Koai tei akaata mai i te kaka o Iehova i teia tuatau openga?
• Eaa te akakite maira e kare i meangiti mai te maroiroi o te au tangata o Iehova i teianei?
• Eaa etai au angaanga memeitaki te rave maataia ra e te Au Kite o Iehova?
• Noatu rai te patoianga kino, eaa ta tatou e irinaki nei?
[Tutu i te kapi 17-20]
1999 SERVICE YEAR REPORT OF JEHOVAH’S WITNESSES WORLDWIDE
(See bound volume)
[Au Tutu i te kapi 15]
Te tere maira te au tangata ki te akaaerenga a Iehova
[Tutu i te kapi 16]
Te mataora nei tatou e kua akaruke a Iehova kia tuera katoa te ngutupa no te aronga te inangaro ra i te marama