Au Uianga a te Aronga Tatau

◼ Eaa ra a Isaia 11:6 i te New World Translation of the Holy Scriptures e karanga ra e: “ka vai tikai te ruko no tetai manga taime ki te toa punua mamoe”? Kare ainei te reira au e vai tamou?

Te au rekarekaanga au i roto i te anga mai anga o te animara ta Isaia 11:6-9 e totou ra ka vai tamou ia. Inara te akara anga tau i te akatakaanga ia Isaia 11:6 e akamarama ia ra e kare te au animara e noo kapiti i te au taime katoa.

Te tatau ra ia Isaia 11:6 i roto i te New World Translation of the Holy Scriptures e: “Ka vai tikai te ruko no tetai manga taime ki te toa punua mamoe, e ma te punua puakanio ra ka moe te nemera uaorai ki raro, e te punua puakatoro ra e te riona ou ma te rauru roroa e te au animara angai meitakiia te kapiti katoa anga; e na tetai tamaiti e arataki ia ratou.”

Kua tatauia tetai urianga Puka Tapu e manganui mei teia: “Ka vai [me kore, ka noo] tikai te ruko ma te punua mamoe.” Penei e te oronga maira teia au akataka anga i te akatutu anga manako e ka riro te nemera e te mamoe ei nga tokorua tamou, mei tetai kopu ou me kore tetai nooanga akaaere.

Inara, te uri anga o te tuatua Epera “ka vai” me kore “ka noo” ko te gur. I tau ki ta te tangata kite i te aiteanga tuatua ko William Gesenius e, te aiteanga “ko te noo poto ua, ka vai ei no tetai tuatau, kia noo kare mei to te kainga nei, koia oki mei te tuitarere, te tangata ke, e te manuiri.” (A Hebrew and English Lexicon of the Old Testament, kua uriia e Edward Robinson) Te oronga maira te puka aiteanga na F. Brown, S. Driver, e ko C. Briggs i te aiteanga “ko te noo poto ua, ka vai ei no tetai tuatau (roa me kore poto), ka vai mei tetai aronga ou . . . ma te kore e tika anga mua tikai.”

Kua taangaanga te Atua i te gur i tona tuatuaanga kia Aberahama kia “noo tuitarere” i te enua o Kanaana. Kare no te Pateriareka te enua, inara ka riro aia ei tangata noo ua ma te paruruia i reira. (Genese 26:3; Exodo 6:2-4; Ebera 11:9, 13) E pera katoa, kua karanga a Iakoba e kua ‘noo aia mei tetai tuitarere’ i te ngai o Harana, no te mea kua oki akaou aia ki Kanaana.​—Genese 29:4; 32:4.

I roto i te Parataito ta Iehova ka akanoo te vaitata maira, ka vai au ua te au animara e te au tangata. Kare te ruko e tamanata te punua mamoe me kore te punua puakatoro ma te nemera. Mei te mea atura te akaari anga mai i te tuke ki to teia nei, te akatika katoa ra te reo no te manako e ka riro te ruko ei animara paruruia e te punua mamoe.​—Isaia 35:9; 65:25.a

Tera ra, penei e ngai noo anga anake to teia au animara. Kua tano etai au animara ki te ngai vao rakau, e tetai ki te ngai mataataa, e etai atu ki te ngai o te tua taatai me kore te au maunga. Kua tuatua katoa a Iehova i te tuatau o te Parataito mua ra no ‘te au puaka kainga, e te au puaka taae.’ (Genese 1:24, NW) Ko te au animara maru tikai e ko te animara tei noo i te pae o te tangata me kore te au kainga. Te puaka taae, noatu e kare e kino roa ana, kua inangaroia ratou kia noo e mamao mai i te tangata. E no reira, mei te totou a Isaia e akakite maira, “ka vai tikai te ruko no tetai manga taime ki te toa punua mamoe” inara kare aia e noo tamou ua atu ma te au animara kainga.

[Au Tataanga Rikiriki i Raro]

[Akameitakianga no te Tutu i te kapi 31]

Zoological Research Center, Tel-Aviv Hebrew University