Pene 10

E Patireia “Kare ïa e Pou”

1, 2. (a) Eaa te au tika te akatakaia maira e te au mea e tupu nei i te ao i te au ra tatakitai, e na ea? (e) Eaa ua ra te rapakau?

TE AKATAKA maira te au mea i tupu ana i te ao nei i te au ra tatakitai i te tika e kare i kitea e te tangata te mataora na te kopae ke anga i to Iehova ra ngateitei e, kua tauta ua atu i te akatere ia ratou uaorai. Kare e akatereanga kavamani a te tangata nei tei apai mai i te au puapinga kia aiteite ki te au tangata ravarai. Noatu rai e kua tupu te kite o te au mea keke anake kia maata roa, kare ra i rauka ana ia ratou te kiriti tumu i te ara, te takore atu i te maki e te akaope takiri i te mate, kare noatu e okotai o to ratou au tangata. I te tua patoi ra, te rave ua atu ra te au patireia i te maani au apinga tamaki ou e tere atu te kino. Te tupu ruperupe ra te ta ua a te aronga rave kino. Te kite i te maani apinga, te noinoi e te kamakura kua kapipiti katoa i te taviivii i te enua, te vai e te reva. Te kakeanga viviki o te moni oko apinga te kore angaanga te akariro ra kia ngata roa e raukaʼi i te aronga e manganui i te oko i te au apinga no te oraanga. Te umuumu nei te au tangata i te mataara e oraʼi.​—Kohe. 8:9.

² Eaa ra te pauanga? Ko te Patireia o te Atua ia, ta Iesu i apii ra i tana au pipi kia pure. (Mata. 6:9, 10) Mei teaa ra te tau no tatou kia akameitaki no te mea kua vaitata rava mai i teianei te mataraanga ta te reira ka akatupu!

3. (a) I te piri anga ki teia Patireia, eaa tei tupu i te rangi i te 1914 T.N.? (e) Eaa ra te reira i puapinga maataʼi kia tatou?

³ Kua akamata ke ana, i te 1914 T.N., te angaanga a te Patireia o te Atua i roto i nga rima o Iesu Karaiti.a Kua tupu tikai i te rangi te au mea ta Daniela i kite ana i roto i te orama totou, i te reira mataiti. Kua orongaia e “To te au rā taito ra,” koia te Atua ko Iehova, ki runga i te Tamaiti a te tangata ra, koia a Iesu Karaiti, “te mana, e te kakā, e te basileia nona, kia tavini atu te au tangata katoa, te pa enua, e te au reo, kiaia.” I te tata anga no te reira orama, kua tata a Daniela e: “Tona mana, e mana mutu kore ïa, kare ïa e kore, e tona basileia, kare ïa e pou.” (Dani. 7:​13, 14) Na roto i teia Patireia ta te Atua akono anga kia rekareka te aronga inangaro i te tuatua tika, i te au mea memeitaki kare e rauka kia tareia, tana i akakoro ra iaia i tuku ra i to tatou nga metua mua ki roto i Parataito.

4. Eaa te au tumu tau no tatou kia akamanako no runga i te Patireia, e no teaa ra?

⁴ Te akamanako meitaki ra te aronga tiratiratu o raro i te reira Patireia i te akapapaanga e te angaanga a te reira kavamani. Te anoano ra ratou kia kite e eaa ta te reira e rave nei i teianei, e eaa tana ka rave a te tuatau ki mua e eaa ta te reira e umuumu mai ra ia ratou. Te akara matatio ra ratou i te reira, e ia ratou e rave ra i te reira, te tupu ua atu ra to ratou manako ariki no te reira e te akapapa ra ia ratou uaorai no te tuatua atu kia etai ke no runga i te reira.​—Sa. 48:​12, 13.

E Akarakara Anga Akakeu Ngakau

5. (a) Akapeea te akaari mai anga a te Tuatua Tapu e noai te ngateitei te akakiteia maira e te Patireia no te Mesia ra? (e) No reira akapeea te tupu anga kia tatou no ta tatou i kite no runga i te Patireia ra?

⁵ Ko tetai mea mua te kitea ra i te reira akara matatio anga e, ko teia Patireia o te Mesia e akakite anga i to Iehova uaorai ngateitei. Ko ia nana ra i oronga i “te mana, e te kakā, e te basileia” ki tana Tamaiti. No reira i muri ake i te akamata anga teia Patireia i te tutara, kua tau i reira te au reo i te rangi ra kia akakite e: “Ko te au basileia o teianei ao, kua riro ïa ei au basileia no to tatou Atu [no te Atua ko Iehova] e no tana Mesia; e e vai rai te au iaia [ia Iehova] e tuatau e tuatau ua atu.” (Apokalupo 11:15) No reira ko te au mea ravarai ta tatou e kite nei no teia Patireia e tana katoa e rave ra te kika atura ia tatou kia vaitata atu kia Iehova uaorai. Te akauru ra ki roto ia tatou i te anoano kia kauraro ki tona ngateitei e tuatau ua atu.

6. Eaa ra i riro ei ei manako anga maata no tatou e ko Iesu Karaiti to Iehova tutara tauturu?

⁶ Mei teaa ra te meitaki i te mea kua akanoo a Iehova ia Iesu Karaiti ki runga i te terono ei tutara tauturu Nona! I te mea ko ia te Pu Rave Angaanga ta te Atua i taangaanga i te anga i te enua nei e te tangata katoa oki, kua kite meitaki atu a Iesu i tetai o tatou nei e eaa te anoanoia ra. Pera katoa oki, kua akakite aia mei te akamataanga mai o te tuatua enua o te tangata nei i tona ra ‘rekareka i te au tamariki a te tangata.’ (Maseli 8:​30, 31; Kolosa 1:​15-17) No te maata o te reira aroa e kua aere mai aia uaorai ki te enua nei e kua oronga i tona oraanga ei oko no ratou. Na te reira tana akapapa anga no tatou kia tataraia mei te ara e te mate, e te tika no te oraanga mutu kore.​—Mata. 20:28.

7. (a) Ei tuke anga ki te tutaraanga a tetai ua atu tangata, eaa ra teia kavamani ka tinamou ei? (e) Eaa te piri anga o te “tavini akono meitaki e te pakari” ma te kavamani o te rangi ra?

⁷ E kavamani ngaueue kore teia, e te tinamou. Te akapapuia ra tona tu tinamou e te tika e kare a Iehova uaorai e mate. (Haba. 1:12; Sa. 146:​3-5, 10) Ei tuke anga ki te au ariki tangata nei, e mate kore a Iesu Karaiti, ko ia ta te Atua i oronga atu i te patireia ra. (Roma 6:9; 1 Timo. 6:​15, 16) E 144,000 katoa etai atu te ka kapitiia atu kia Karaiti ki runga i te au terono i te rangi, e au tavini tiratiratu no te Atua tei raveia mai no roto i “te au kopu ravarai, e te au reo katoa, e te au iti-tangata katoa, e te pa enua katoa.” Ka oronga katoaia te mate kore, ki teia aronga. (Apokalupo 5:9, 10; 1 Kori. 15:​42-44, 53) Kua tae ke ana i teianei te maataanga o ratou ki te rangi, e ko te toenga o ratou i te enua nei ko ratou te pupu “tavini akono meitaki e te pakari,” te rave tiratiratu ra i te akatere atu i te au apinga a te reira Patireia i konei.​—Mata. 24:​45-47.

8, 9. (a) Eaa nga tumu akatatakake e te taviivii te ka takoreia e te Patireia? (e) No reira, me kopae ke tatou kia kore e riro ei au enemi no te Patireia o te Atua ra, ko teea au akaaerenga e teea au angaanga ta tatou ka kore e kapiti atu ki roto?

⁸ Kare e roa atu i teianei, me tae ki ta Iehova tuatau tau, ka akamata tana au nuku tamate i te tama i te enua nei. Ka tamateia e ratou no te tuatau mutu kore te au tangata tei iki kia kore ratou uaorai e kite i te Atua, na te kore anga e akatika i tona ngateitei, e te kopae ke anga i te akapapaanga aroa tei akonoia e ia na roto ia Iesu Karaiti. (2 Tesa. 1:​6-9) Ko te reira ta Iehova ra, te tuatau tei tapapa roaia mai no tana akakore anga i te tuatua akakino anga iaia ei te Ngateitei Rava o te Ao Katoa e Pini ua Ake.

⁹ Te au akonoanga pikikaa, e pera katoa te au kavamani ravarai a te tangata nei ma ta ratou au vaeau, tei akataangaangaia e te tutara kino akara koreia o teianei ao, ka takoreia atu e tuatau ua atu. Pouroa te aronga e akataka ia ratou uaorai ei tuanga no teianei ao na te aruaruanga i te manako no ratou uaorai, te tiratiratu kore, e te tika kore te mataara o te oraanga ka tipu keia i te mate. Ka takoreia atu a Satani e tana au temoni kia kore e piri mai ki te aronga noo i te enua nei, ka akatinamouia to ratou tapekaanga no te tai tauatini mataiti. Mei teaa ra te mataraanga na te reira no te katoatoa tei inangaro i te tuatua tika!​—Apokalupo 18:​21, 24; 19:​11-16, 19-21; 20:1, 2.

Tana au Akakoroanga​—Akapeea e Raukaʼi

10. (a) Ka akapeea ta te Patireia o te Mesia ra rave anga kia tupu ta Iehova akakoroanga no te enua uaorai? (e) Eaa te aite anga o te reira no te aronga te ka noo ki te enua i reira?

¹⁰ Na teia Patireia no te Mesia e akaoti takiri i te akakoroanga mua a te Atua ra no te enua nei. (Ge. 2:​8, 9, 15; 1:28) Tae mai ki teia tuatau, kare i rauka i te tangata i te akatupu i te reira akakoroanga. Inara, ko “taua ao a muri nei” kua tukuia ki raro ake i te Tamaiti a te tangata, koia a Iesu Karaiti. Te aronga pouroa te ka ora i te akapou anga o ta Iehova ra akavaanga no teia akatereanga taito ka rave taokotai i raro ake ia Karaiti ei Ariki, ka rave rekareka i tana ua atu apinga e arataki atu kia riro ei te enua nei ei Parataito te ao katoa. (Ebera 2:​5-9) Ka rekareka te au tangata katoatoa i te angaanga a to ratou au rima e ka puapinga ravaia i te maata o te au ua o te enua nei.​—Sa. 72:​1, 7, 8, 16-19; akaaiteia atu kia Isaia 65:​21, 22.

11. (a) Ka akapeea e raukaʼi te tu apa kore ua no te manako e te kopapa o te au tangata i raro ake i te Patireia? (e) Eaa te ka kapitiia ki teia?

¹¹ E apa kore ua a Adamu raua ko Eva i to raua angaia mai anga, e ko te akakoroanga a te Atua no te enua nei kia akakiia ki to raua uanga, pouroa ratou kia rekareka i te tu apa kore ua te manako e te kopapa. I raro ake i te tutara a te Patireia, ka tae te reira akakoroanga ki tona tu kaka tika tikai. Ka umuumuia kia takore takiriia te au tupuanga o te ara, e no te reira akakoroanga a Karaiti i tavini ei kare ei Ariki anake ua mari ra ei Taunga Maata katoa. Na te tu akakoromaki ka tauturu aia i te aronga akarongo i raro ake iaia kia puapingaia mei te tapokianga ara no te atinga o tona uaorai oraanga tangata ra. Ka akapueraia nga mata o te matapo ra. Ka akapu tataia nga taringa o te turi ra. Ka riro, te kopapa tei karukaruia i te ruau me kare i te maki, kia maata te poria i to te tamariki ra. Ka kore te au tu apikepike kino ra i te tupu anga te ora maroiroi. Te aere maira te ra e kore ei e tumu no tetai kia karanga e “kua maki au,” no te mea ka ora katoa te aronga mataku i te Atua i te apainga a te ara e tana akatupuanga i te mamae ngakau.​—Akaaiteia atu kia Isaia 33:​22, 24; 35:5, 6; Iobu 33:25; Luka 13:​11-13.

12. (a) Eaa atu tetai apinga te umuumuia ra no te tangata kia apa kore uaʼi? (e) Akapeea e raukaʼi te reira, e eaa te ka tupu mei te reira mai?

¹² Inara e tere atu i te rauka anga e kopapa meitaki e te manako meitaki e tae ei ki te tu apa kore ua. Te kapiti katoa ra i te akaata anga tika i te au tu tikai o Iehova ra, no te mea kua angaia te tangata ‘i to te Atua rai tu, mei tona uaorai te tu.’ (Ge. 1:26) No runga i te reira, ka umuumuia kia maata te apiianga. E Akatereanga Ou teia no “te vai tika anga o te tuatua-tika ra,” no reira, mei ta te peroveta ko Isaia i totou maira, “te apii ra to te ao nei i te tuatua-tika i reira.” (2 Pe. 3:13; Isaia 26:9) Na teia tu e taki atu ki te au​—i rotopu i te au tangata o te au enua ravarai, i rotopu i te au piri anga taeake, i roto i to tetai ngutuare tangata e, i runga rava ake i te katoa ra, ma te Atua uaorai. (Isaia 32:17; Sa. 85:​10-13) Te aronga te ka apii i te tuatua tika ra ka apii tamouia i to te Atua anoano no ratou. I te akaaka oonu anga i te inangaro no to Iehova ra au mataara ki roto i to ratou au ngakau, ka aru rai ratou i te reira i te au tu ravarai o to ratou oraanga. I rauka i te tangata apa kore ua ra koia a Iesu i te tuatua e, ‘kare oki au i tukumoe i te rave i te mea e mareka mai ei te Metua.’ (Ioane 8:29) Mei teaa ra te rekareka o te oraanga i reira me ka tika te reira no te au tangata ravarai!

Te au Angaanga Tei Kitea Takereia

13. E uriuri i te au ui anga i runga akenei kia akataka marama i te au angaanga a te Patireia e eaa ta tatou ka tau kia rave.

¹³ Kua kitea marama keia ana te au angaanga umere a te Patireia e te aronga e mata akarongo to ratou. Na te au uianga te aru mai nei e te au Tuatua Tapu tei tataia e akamaaraara ia koe i etai o teia au mea nei, e pera katoa etai au mea te ka rauka e ka tau oki kia raveia e te aronga katoatoa i raro ake i te Patireia i teianei:

Koai ma ta te Ariki i tamaki mua atu ei, e eaa tei tupu? (Apokalupo 12:​7-10, 12)

Ko te akaputuanga i te au mema openga o teea pupu tei akono vaveia i muri ua ake i to Karaiti ra akaterono angaia? (Mata. 24:31; Apokalupo 7:​1-4)

Ia Mataio 25:​31-33, eaa tetai atu angaanga ta Iesu i totou maira e ka rave aia i muri ake i te noo anga ki runga i tona terono e i mua ake i te akapou anga i te aronga kino ra?

Akapeea e oti ei teia angaanga? Koai ma te rave ra i te reira? (Mata. 24:14; Sa. 110:3; Apokalupo 14:6, 7)

Eaa ra i kore ei e rauka i te aronga patoi o te poritiki e te au akonoanga i te tapu i te reira? (Angaanga 5:​38, 39; Zeka. 4:6)

Tei tupu no te angaanga apii tei raveia ra, eaa te au taui anga tei tupu ke ana i te oraanga o te aronga tei kauraro i te tutara a te Patireia? (Isaia 2:4; 1 Kori. 6:​9-11)

Te tu Tamou o te Patireia

14. (a) Eaa te roa o to Karaiti tutara anga? (e) Eaa te ka oti i te rave a te reira tuatau?

¹⁴ A muri ake i te urianga ia atu a Satani e tana au temoni ki roto i te vaarua, ka tutara a Iesu Karaiti ma tana aronga tuanga e 144,000 katoa no te okotai tauatini mataiti. (Apokalupo 20:⁠6) A tera tuatau e akonoiaʼi te au tangata kia tae ki te tu apa kore ua. Ka takoreia atu te au kavamani e te aronga mana taoonga e te au mana patoi ia Iehova. Me oti anake te reira i te raveia, ka akaoki akaou atu a Iesu i te Patireia ki tona Metua, “kia riro ko te Atua i rungao i te au mea katoa i te au ngai ravarai.”​—1 Kori. 15:​24, 28.

15. Akapeea e tikai e ko te reira Patireia “kare ïa e pou”?

¹⁵ Ka tauiia i reira to Iesu uaorai taoonga i te piri anga ki te enua nei. Inara, ko tona mana e “mutu kore ïa” e ko tona Patireia “kare ïa e pou.” (Dani. 7:14) I teea tu? I te mea ko te mana tutara kare e riro ke ki roto i te au rima o etai atu tei tuke te akakoroanga. ‘Kare rava e pou’ te au angaanga te ka oti i te Patireia. Ta te Patireia ka rave ei akangateitei i te ingoa o Iehova e tana akakoroanga no teia enua nei ka mou rai ia e tuatau ua atu.

[Au Tataanga Rikiriki i Raro]

Uriuri Akaou Anga

● Eaa ra i tau ei e ko te Patireia anake o te Atua te rapakau no te au manamanata o te au tangata? I naea te reira i akamataʼi i te tutara?

● Eaa te apinga maata ki toou manako no runga i to te Atua ra Patireia e tana ka akatupu? No teaa ra?

● Eaa te au angaanga kua oti i te Patireia ta tatou e kite nei? Eaa ta tatou tuanga i te akatupu anga i te reira?

[Tutu i te kapi 84, 85]

Ko te tuatua tika ta te tangata ia ka apii