Au Ra Totou a Daniela e to Tatou Akarongo

“E ao ra tona to te tapapa marie, e tae rava atu ki te okotai tausani e toru anere e toru ngauru ma rima i te rā.”​—DANIELA 12:12.

1. Eaa i kore ei e kitea e te aronga e manganui te mataora tika tikai, e eaa te kapitiia atura ki te mataora tika tikai?

POUROA te au tangata te anoano ra i te mataora. Inara, i teia tuatau nei, e tokoiti ua te pera ra. No teaa ra? Ko tetai tuanga no te mea ko te maataanga te kimi ra i te mataora anga i te au ngai tarevake. Te kimiia ra te mataora anga i te au apinga mei te apii anga, te apinganui, tetai karia, me kare te aruaru anga i te mana. Inara, i roto i te akatueraanga o tana Ako i te Maunga, kua kapiti mai a Iesu i te mataora anga ma te manako ngakau o tetai no tei anoanoia i te pae vaerua ra, te aroa, te ngakau ma, e te au tu mei te reira rai. (Mataio 5:3-10) E tika tikai te tu mataora ta Iesu i tuatua ra e e mutu kore oki.

2. Kia tau ki ta te totou, eaa te ka taki atu ki te mataora i te tuatau openga ra, e eaa te au uianga te tu maira no runga i te reira?

² No te toenga o te aronga akatainuia ra i te tuatau openga nei, te kapitiia atura te mataora anga ma tetai atu apinga katoa ra. I te puka a Daniela, ka tatau tatou e: “Ka aere, e Daniela: kua popaniia taua tuatua nei, e kua sigiloia e tae ua atu ki te tuatau openga ra. E ao ra tona to te tapapa marie, e tae rava atu ki te okotai tausani e toru anere e toru ngauru ma rima i te rā.” (Daniela 12:9, 12) Eaa te tuatau tei kapitiia ki roto i teia au ra e 1,335 nei? Eaa ra te aronga tei ora ra i taua tuatau ra i mataoraʼi? E pirianga ainei to te reira ki to tatou akarongo i teia tuatau nei? Ka tauturuia tatou i te pauanga i eia nga uianga me ka akara tatou ki muri ki te tuatau i tataiaʼi e Daniela taua au tuatua ra, i muri ua ake i te tatara angaia mai to Iseraela i te tuikaaanga i Babulonia ra e i roto i te toru mataiti o Kuro te ariki o Peresia.​—Daniela 10:1.

E Akaoraanga Tei Apai Mai i te Mataora

3. Eaa te angaanga na te Ariki ko Kuro tei apai mai i te mataora maata ki te au ngati Iuda tiratiratu i te 537 M.T.N., inara eaa te apinga kare a Kuro i oronga ki te au ngati Iuda ra?

³ No te ngati Iuda, kua riro te matara anga mai mei Babulonia ei atianga no te rekarekaanga tikai. I muri ake i te akakoromaki anga to te ngati Iuda e vaitata i te 70 mataiti i te tuikaaanga, kua pati a Kuro tei Maata ra, ia ratou kia oki ki Ierusalema e patu akaou i te iero o Iehova ra. (Ezera 1:1, 2) Ko te aronga tei akarongo kua tamata ratou ma te manakonako anga maata, e kua tae atu ki to ratou enua kainga i te 537 M.T.N. Inara, kare a Kuro i pati ia ratou kia akaora i tetai patireia i raro ake i tetai uanga no te Ariki ko Davida.

4, 5. (a) I naea te ariki anga o Davida i akakoreiaʼi? E no teaa ra? (e) Eaa te akapapu anga ta Iehova i oronga mai e ka akaora akaouia te ariki anga o Davida?

⁴ E tumu maata te reira. I etai rima anere mataiti i mua akera, kua taputou a Iehova kia Davida: “E toou are e toou basileia, ka mou ïa ki mua ia koe ra e tuatau ua atu: toou terono, ka mou ïa e tuatau ua atu.” (2 Samuela 7:16) E mea reka kore ra, kua meameaau te maataanga o te au uanga ariki o Davida, e no te maata te apa i te toto o taua patireia ra i te 607 M.T.N., kua tukunaia e Iehova te arikianga o Davida kia takoreia atu. No tetai tuatau poto ua i raro ake i te (Maccabees), kua vairai a Ierusalema i raro ake i te tutara anga a te aronga tangata ke mei reira mai e tae roa ki tona akapouangaia no te rua o te taime i te 70 T.N. E no reira, i te 537 M.T.N., te vaira “te au tuatau akatakaia no te au pa enua,” kare e tamaiti na Davida e tutara ei ariki ki reira.​—Luka 21:24, NW.

⁵ Inara, kare i ngaropoina ia Iehova tana taputou kia Davida. Na roto i nga akapapa anga orama e nga moemoea, kua akakite aia na roto i tana peroveta ko Daniela i te au apinga te ka tupu i teianei ao i te tuatau ki mua te ka akaki i te au anere mataiti mei te tuatau o te tutara a Babulonia tae roa mai ki te tuatau e tutara akaou ei tetai ariki no te kopu o Davida i te patireia o te au tangata o Iehova ra. Na teia au totou, tei tataia ki roto ia Daniela nga pene 2, 7, 8, e te Daniela 10-12, i akapapu ki te au ngati Iuda tiratiratu e, i te openga ra ka mou tikai te terono o Davida e, “ka mou ïa e tuatau ua atu.” E mea tika rava, kua apai mai taua tuatua mou i akakiteia ra i te mataora ki te aronga ngati Iuda tei oki akaou ra ki to ratou enua kainga i te 537 M.T.N.!

6. Akapeea tatou i kite ei e ka akatupuia etai o te au totou a Daniela i to tatou tuatau nei?

⁶ Kua manako te maataanga o te aronga tuatua Puka Tapu e vaitata te katoaanga o te au totou a Daniela i te tupu takiri i mua ake ka anauia mai ei a Iesu Karaiti. Inara te taka meitaki ra e kare te reira i te tika. Ia Daniela 12:4, kua tuatua atu tetai angera kia Daniela: “E popani i teianei au tuatau, e topiri atu i te buka e tae ua atu ki te tuatau openga ra: e manganui te ka oro ki runga e ki raro, e tupu atura te kite i te maata anga.” Me ka eeuia te puka a Daniela​—ka kite puia tona aiteanga—​a te tuatua openga anake ia, e mea tika ra e ko etai o tana au totou ka tau rai e te piri ra ki tera tuatau.​—Akara ia Daniela 2:28; 8:17; 10:14.

7. (a) I naea te au tuatau akatakaia no to te pa enua i ope ei, e eaa te uianga rapurapuia tei tau kia pauia i reira? (e) Koai ma kare i “te tavini akono meitaki e te pakari”?

⁷ I te 1914 kua ope te au tuatau akatakaia no te au pa enua, e kua akamata mai i reira te tuatau no te openga o teianei ao. Kua akaoraia mai te Patireia o Davida, kare ki Ierusalema i te enua nei, mari ra ki te ngai akara koreia i “roto i te au tiao rangi ra.” (Daniela 7:13, 14) I taua tuatau ra, i te mea te tupu ruperupe ra “te zizania” o te akonoanga Kerititiano akameamea ua ra, kare i kite puia te turanga o te akonoanga Kerititiano mou ra​—kare i kitea e te mata tangata nei. Inara, e uianga puapinga maata tetai tei tau ra kia pauia: “Koai te tavini akono meitaki e te pakari?” (Mataio 13:24-30; 24:45) Koai ma te ka mono ki runga i te enua nei i te Patireia o Davida tei akaoraia ra? Kare ko te au taeake kopapa o Daniela, koia to te ngati Iuda ra. Kua kopae keia ratou no to ratou ngere i te akarongo e kua turori ratou i te Mesia ra. (Roma 9:31-33) Kare rava te tavini akono meitaki i kitea i roto i te au akaaerenga o Kerititome ra! Na ta ratou au angaanga kikino i akapapu e kare a Iesu i kite ia ratou ra. (Mataio 7:21-23) Koai ra ia, i reira?

8. Koai ma tei akapapu mai e ko ratou “te tavini akono meitaki e te pakari” i te tuatau openga nei? Akapeea tatou i kite ei?

⁸ Kare rava e ekoko anga, ko te pupu meangiti ua o te au taeake akatainuia o Iesu ra tei matauia e ko te Aronga Apiipii Puka Tapu i te 1914 inara kua akatakaia ratou mei te 1931 mairai e ko te Au Kite o Iehova. (Isaia 43:10) Ko ratou anake ua te akakitekite aere nei i te Patireia akaoraia ra o te kopu o Davida. (Mataio 24:14) Ko ratou anake ua tei vai takake i teianei ao e kua akamaata i te ingoa o Iehova ra. (Ioane 17:6, 14) E i runga ia ratou anake ua te tupu anga o te au totou o te Puka Tapu te piri atura ki te au tangata o te Atua i te tuatau openga nei. I roto i teianei au totou te akapapaanga o te au tuatau papaia i roto ia Daniela pene 12 te kapiti katoa ra i te 1,335 ra te ka apai mai i te mataora anga.

Te 1,260 Au Ra

9, 10. Eaa te au tupuanga tei akataka maira i te okotai akera “tuatau, e nga tuatau oki, e te vaenga o tetai tuatau” ia Daniela 7:25 ra, e tei roto i teaa nga tuatua tapu i taikuiaʼi tetai tuatau tei aiteite ra ki te reira?

⁹ Ia Daniela 12:7, ka tatau tatou i te tuatua mua i totouia maira: “E okotai rai tuatau, e nga tuatau oki, e te vaenga o tetai tuatau; e kia ope rava te akapueurikiriki ke anga o te aronga tapu ra, e ope ei teianei au tuatau i te tupu.”a Te taiku katoaia ra teianei tuatau ia Apokalupo 11:3-6, te karanga ra e ka tutu aere te au kite o te Atua ma te kakau paoa no nga mataiti e toru e te apa e ka tamateia atu i reira. E pera katoa oki, ia Daniela 7:25, ka tatau tatou: “E ka tuatua aia i te tuatua akakino ki Tei Teitei ra, e tamanamanata oki aia i te aronga tapu no Tei Teitei ra, e manako oki e taruri ke i te au atianga, e te au ture: e tukuia mai oki ratou kiaia e okotai akera tuatau, e nga tuatau oki, e te vaenga o tetai tuatau.”

¹⁰ I roto i teia totou openga nei, “koia” ko te rima o te mana patireia o te ao me tareia mai mei ia Babulonia ra. Koia te “tara mea ngiti,” i tona tuatau e mana ra i raukaʼi i te Tamaiti a te tangata “te mana, e te kakā, e te basileia nona.” (Daniela 7:8, 14) Ko teia tara akatutuia, i te akamataanga ko te patireia Peritane, i tupu i te tuatau o te tamaki mua o te ao ra kia riro ei mana patireia tokorua no te ao, ko Engarani-Marike, i teianei kua riro ko te Unaite Teite tei maata ia raua. No te toru e te apa tuatau, me kare mataiti, kua tamanamanata teia mana patireia i te aronga tapu e kua tamata i te taruri ke i te au atianga e te au ture. I te openga ra, kua orongaia te aronga tapu ki roto i tona rima.​—Akara katoa ia Apokalupo 13:5, 7.

11, 12. Eaa te au tupuanga tei taki atura ki te akamataanga o te 1,260 au ra totouia ra?

¹¹ Akapeea te akatupu anga i teia au totou aiteite katoa ra? No etai mataiti e manganui i mua ake i te Tamaki I o Teianei Ao ra, kua akamatakite atea mai te au taeake akatainuia o Iesu e ka kiteia i te 1914 te openga o te au tuatau akatakaia no to te pa enua. I te akamata anga te tamaki ra, kua kite puia e kare i manakoia te akamatakite anga. Kua taangaanga a Satani i tana “puaka taae,” koia te akaaerenga poritiki o teianei ao tei riro ra na te Patireia o Peritane e tutara, i te tamata anga kia “taruri ke i te au atianga, e te au ture,” kia takore atu i te tuatau e tutaraʼi te Patireia o te Atua ra. (Apokalupo 13:1, 2) Kare aia i autuia. Kua akamouia te Patireia o te Atua ki te rangi, kia mamao ke atu i te ngai e itaeia e te tangata nei.​—Apokalupo 12:1-3.

¹² No te Aronga Apiipii Puka Tapu ra, kua riro te tamaki ei tuatau timataanga. Mei ia Tianuare 1914 mairai kua rave ratou i te akakitekite anga i te Photo-Drama of Creation, e akakitekite anga no te Puka Tapu tei taki atura i te manako ki te au totou a Daniela. I te tuatau maana o taua mataiti ra i te Tuanga Tokerau, kua akamata te tamaki. Ia Okotopa, kua ope te tuatau akatakaia ra. Kia tae ki te openga o taua mataiti ra, te manako ra te toenga o te aronga akatainuia e ka takinga kinoia ratou, mei tei kiteia i te tika e ko te irava mataiti tei ikiia no te 1915 ko te uianga a Iesu ki tana au pipi e, “Ka tika aina ia korua kia inu i taku kapu?” akatumuia ki runga ia Mataio 20:22, King James Version.

13. Akapeea te tutu anga a te Aronga Apiipii Puka Tapu i roto i te kakau paoa ra i te tuatau o te au ra e 1,260 ra, e eaa tei tupu i te openga o taua tuatau ra?

¹³ E no reira, mei ia Titema 1914 mairai, kua rave teia pupu kite meangiti i ‘te tutu aere ma te kakau paoa,’ i te akakoromakianga taakaaka ia ratou e akakitekite ra i ta Iehova au akavaanga. E mea poitirere i tupu i te 1916, ki te aronga e manganui, koia te matenga o C. T. Russell, te peretiteni mua o te Totaiete Punanga Tiaki Puka Tapu e te Pepa Akonoanga. I te totoa anga te tu veravera o te tamaki ra, kua rokoia ratou ra e te patoi anga maata. Kua tapekaia tetai papaki o ratou ra. Ko etai tataki tai, mei ia Frank Platt i Engarani e Robert Clegg i Kanata ra, kua tamamaeia e te aronga mana takinga kino tau kore ra. I te openga, ia Tiunu 21, 1918, kua akautungaia a J. F. Rutherford, koia te peretiteni ou, ratou katoa ko etai atu aronga akaaere o te Totaiete Punanga Tiaki Puka Tapu e te Pepa Akonoanga na te akaapa anga pikikaa ua no tetai tuatau roa ki roto i te are tapekaanga. E na reira, i te openga o taua tuatau totouia ra, kua tamateia e te “tara mea ngiti” ra te angaanga akapapaia no te tutu aere anga.​—Daniela 7:8, King James Version.

14. Akapeea te taui angaia te au apinga no te toenga o te aronga akatainuia ra i te 1919 e i muri maira?

¹⁴ Kua totou maira te puka Apokalupo i tei tupu i muri akera. I muri io i tetai tuatau poto o te kore e angaanga​—tei totouia maira e e toru e te apa ra i te takotoanga mate i te arataa—​kua ora akaou maira taua toenga o te aronga akatainuia ra e kua rave akaou i ta ratou angaanga. (Apokalupo 11:11-13) Ia Mati 26, 1919, kua matara mai te peretiteni e te au akaaere o te Totaiete Punanga Tiaki Puka Tapu e te Pepa Akonoanga mei te are tapekaanga, e kua akaatea takiriia ratou i muri akera i taua au akaapaanga pikikaaia ra ratou. I muri ua ake i to ratou mataraanga, kua akamata te toenga o te anana iti i te akapapa no te rave akaou anga i te angaanga. I reira, i te akatupu anga i te mate mua o Apokalupo ra, kua aere mai ratou ki vao i te vaarua o te tu angaanga kore, mei te au tapaki vaerua rai kua kapitiia mai e te auai, i te akakiteanga mai i tetai tuatau poiri ki mua no te akonoanga pikikaa ra. (Apokalupo 9:1-11) I nga mataiti tokoiti i muri maira, kua akamatutuia ratou i te pae vaerua e kua akateateamamaoia no te au mea te vai maira ki mua. I te 1921 kua neneiia e ratou tetai puka ou, The Harp of God, tei akapapaia ra ei tauturu i te aronga ou, e te au tamariki kia apii i te au tuatua mou o te Puka Tapu. (Apokalupo 12:6, 14) Pouroa teia au mea kua tupu i tetai atu tuatau tupuanga apinga maata ra.

Te 1,290 Au Ra

15. Na teea mataara e raukai ia tatou te tare anga i te akamataanga o te 1,290 au ra ra? I naea i ope ei te reira tuatau?

¹⁵ Kua tuatua atura te angera kia Daniela: “E mei te tuatau e apai keiaʼi te atinga no te au rā ra [“te atinga tamouia ra,” tataanga i raro ake, NW], e e akatuiaʼi te mea rikarika e taneaʼi ra, e riro okotai ïa tausani e rua anere e iva ngauru i te rā.” (Daniela 12:11) I raro ake i te Ture a Mose ra, kua tutungiia “te atinga tamouia ra” ki runga i te atarau i te iero i Ierusalema. Kare ra te au Kerititiano e oronga i te au atinga tutungiia ra, mari ra te oronga ra ratou i tetai atinga vaerua tamouia ra. Kua taiku a Paulo i te reira i tana tuatua anga: “Na ko tatou iaia ra i te apai i te atinga ra, i te akameitaki i te Atua, eiaa e tivata, koia oki ta te vaa nei, i te akapaatu anga i tona ingoa.” (Ebera 13:15; akaaite Hosea 14:2.) Kua rave keia atu teia atinga tamouia ra i roto ia Tiunu 1918. Eaa i reira “te mea rikarika”​—ko te tuanga rua ia no te akara atu? Ko te Kapitianga Enua ia, tei akatuia maira e te au mana patireia i autu ra i te openga o te Tamaki I o Teianei Ao.b E mea rikarika ia no te mea kua tukunaia te reira e te au arataki o Kerititome ki roto i te ngai no te Patireia o te Atua ra, ma te akatutuanga i te Kapitianga ei te manakonakoanga anake no te au no te tangata nei. Kua akakiteia mai tera manako no te Kapitianga i roto ia Tianuare 1919. Me ka tare tatou e 1,290 au ra (e toru mataiti, e itu marama) mei tera tuatau mai, ka tae mai tatou kia Tepetema 1922.

16. I te openga o taua au ra e 1,290 ra, eaa i papu ei e kua papa te toenga o tei akatainuia no te angaanga?

¹⁶ Eaa tei tupu i reira? Kua maroiroi mai te au Aronga Apiipii Puka Tapu i reira, kua matara ke mai ia Babulonia Maata, e kua papa no te rave i te angaanga. (Apokalupo 18:4) I te uruoaanga tei raveia i Tepetema 1922 i Cedar Point, Ohio, i U.T.M., kua akamata ratou i te akakite anga mataku kore i te au akavaanga a te Atua ki runga ia Kerititome. (Apokalupo 8:7-12) Kua akamata tikai te au patia anga a te au tapaki ra i te tamamae anga! Eaa atu tetai, kua akamata te rua o te mamae anga o Apokalupo ra. E nuku maata no te au Kerititiano ra​—ko te toenga o te aronga akatainuia ra te akamata anga e i muri akera kua akamaataia atu e te urupu maata—​tei aere atura na roto i te enua. (Apokalupo 7:9; 9:13-19) Ae, kua apai mai te openga o te 1,290 au ra i te rekareka ki te au tangata o te Atua ra.c Inara e maata atu te vai maira.

Te 1,335 Au Ra

17. I naea i akamataʼi te 1,335 au ra e i naea i ope ei?

¹⁷ Te tuatua ra ia Daniela 12:12: “E ao ra tona to te tapapa marie, e tae rava atu ki te okotai tausani e toru anere e toru ngauru ma rima i te rā.” Ko teia au ra e 1,335, me kare toru mataiti, e varu e te apa marama, i te akara anga kua akamata mai i te openga o te tuatau o mua akera. I te tareanga mei ia Tepetema 1922, ka tae mai tatou ki te tuanga openga o te tuatau tupuanga rau (Tuanga Tokerau) i te 1926. Eaa tei tupu i taua tuatau e 1,335 ra ra?

18. Eaa te au tika tei akakite maira e i te 1922 te vaira te tupu anga tau no te raveia?

¹⁸ Noatu rai te tu akairo o taua au mea i tupu ra i te 1922, i te akara anga kua vairai te manako o tetai papaki ki to te tuatau kua topa ra. Te vaira te Studies in the Scriptures, na C. T. Russell, ei apinga tumu no te apii. Pera katoa, ko te puka rikiriki atea ra te tua anga, Millions Now Living Will Never Die tei oronga maira i te manako e i te 1925, ka akamata te tupu i ta te Atua akakoro anga no te akaora anga i te enua ei Parataito e te akatuakaouanga i te aronga tiratiratu i taito ra. Kua akara anga vaitata te akaoti te akakoromaki anga o te aronga akatainuia ra. Inara, ko tetai papaki tei kapitiia ra ki te Aronga Apiipii Puka Tapu kare i manako akakeuia kia tua aere i te tuatua meitaki ma etai ke ra.

19, 20. (a) Akapeea te taui anga i te au apinga e manganui no te au tangata o te Atua ra i te tuatau o te au ra e 1,335 ra? (e) Eaa te au tupuanga tei akairo maira i te openga o te au ra e 1,335 ra, e eaa ta ratou i akakite mai no te au tangata o Iehova ra?

¹⁹ I te tupu aere anga te 1,335 ra ra, kua tauiia teia tu katoa. Ei akamaroiroi i te au taeake ra, kua akapapaia te au pupu apii putuputu i The Watch Tower. Kua tuatua akamaroiroiia te rave i te angaanga tutu aere. Akamata mai ia Me 1923, kua patiia te katoatoa kia rave i te tutu aere i te Ruirua mua o te au marama ravarai, e kua akatakaia tetai taime i te uipaanga a te putuputuanga i rotopu i te au epetoma kia akamaroiroi ia ratou i teia angaanga. Ia Aukute 1923, i tetai akaputuanga i Los Angeles, California, U.T.M., kua akakiteia mai e ka tupu te parapore a Iesu no te mamoe e te puakanio ra i mua ake i te Tutara no te Tauatini Mataiti ra. (Mataio 25:31-40) I te mataiti 1924 kua akamataia te ngai tuatua anga ratio WBBR, tei akonoia ra ei tuatua akakitekite anga i te tuatua meitaki ra na roto i te reva. Kua orongaia mai tetai akatikatika anga i te aiteanga o Apokalupo pene 12 i roto i te atikara “Anau Anga o te Enua” o te itiu The Watch Tower i o Mati 1, 1925. I te openga, kua kite meitaki te au Kerititiano tiratiratu ra i te aiteanga o te au tupu anga oripu ua o te 1914-1919.

²⁰ Kua ope te mataiti 1925, inara kare te openga i tupu i reira! Mei te au mataiti mairai o te 1870 ra, kua rave te Aronga Apiipii Puka Tapu i ta ratou angaanga ma te manako anga i tetai tuatau openga​—te mea mua ko te 1914, i muri mai ko te 1925. I teianei kua kite ratou e ka tau ratou kia rave i te angaanga no te tuatau katoa te ka anoanoia e Iehova. The Watch Tower o Tianuare 1, 1926 ko tona atikara “Koai te ka Akangateitei ia Iehova?” ma te akakite maata mai anga mei tei kore i raveia ana i mua ana i te puapinga maata o to te Atua ra ingoa. E i te openga, ia Me 1926 i te uruoaanga i London, i Engarani, kua akapapaia tetai ikianga ko tona tumu “E Akakiteanga ki te Au Tutara o Teianei Ao.” Na teia i akakite papu mai te tuatua mou no te Patireia o te Atua e te akapouanga i te ao o Satani. I taua uruoaanga rai, kua orongaia mai te puka Deliverance ma tana akatakaanga maroiroi, ko te puka mua ia o te au puka ei mono i te Studies in the Scriptures. Kua akara mua atu te au tangata o te Atua i teianei, kare e akara ki muri. Kua akaopeia taua au ra 1,335 ra.

21. Eaa te aiteanga o te akakoromaki no te au tangata o te Atua e oti roa taua au ra e 1,335 ra, e eaa te aiteanga no tatou o te tupu anga o te reira tuatau totouia maira?

²¹ Kare tetai papaki i rekareka kia akatikatika atu i to ratou manako kia tau ki te reira au tupuanga, inara ko te aronga tei akakoromaki kua mataora tikai ratou ra. Pera katoa oki, ia tatou e akara ra ki muri kia kite i te tupu anga o teia au tuatau totouia maira, te mataora katoa ra tatou no te mea te akamaroiroiia ra to tatou irinaki anga e ko te pupu meangiti o te au Kerititiano akatainuia ra tei ora maira na roto i taua au tuatau ra ko ratou tikai te tavini akono meitaki e te pakari. I te au mataiti mei reira mairai, kua maata te totoa anga o ta Iehova ra akaaerenga, inara te vaira te tavini akono meitaki e te pakari ei te rotopu nona, ei aratakianga i te reira. Mei teaa ra te rekareka, kia kite e no te aronga akatainuia ra e te au mamoe ke atu ra, te tapapa maira ia ratou te au mataoraanga e maata! Ka kitea teia ia tatou e uriuri manako ra i tetai atu o ta Daniela au totou ra.

[Au Tataanga Rikiriki i Raro]

Ka Rauka Ainei ia Koe te Akataka?

◻ Akapeea tatou i kite ei e ko etai totou ia Daniela ra ka akatupuia i to tatou tuatau nei?

◻ Eaa i papu ei ia tatou e ko te toenga o te aronga akatainuia ra “te tavini akono meitaki e te pakari”?

◻ I naea i akamataʼi te 1,260 ra e i naea i ope ei?

◻ Eaa te akamaroiroi anga e te akaora anga tei apaiia maira e te 1,290 au ra ki te toenga o tei akatainuia ra?

◻ Eaa ra i mataoraʼi te aronga tei akakoromaki ra e tae roa ki te openga o te 1,335 au ra ra?

[Pia i te kapi 11]

AU TUATAU TOTOUIA E DANIELA RA

1,260 au ra:

Titema 1914 kia Tiunu 1918

1,290 au ra:

Tianuare 1919 kia Tepetema 1922

1,335 au ra:

Tepetema 1922 kia Me 1926

[Tutu i te kapi 8]

Mei te 1919 mairai kua taka meitaki e ko “te tavini akono meitaki e te pakari” ko te toenga ia o te aronga akatainuia ra

[Tutu i te kapi 10]

Te Opati maata o te Kapitianga Enua i Geneva, Tuiterani

[Akameitakianga]

Tutu UN