Te Rekareka o Iehova to Tatou Punanga Ketaketa Ia

“E rā tapu oki teia no to tatou Atu: auraka e iriea; ko te rekareka ra no ko ia Iehova ra to kotou ïa [“punanga ketaketa,” NW].”​—NEHEMIA 8:10.

1, 2. (a) Eaa tetai punanga ketaketa? (e) Akapeea a Davida i te akakite anga e kua akariro aia ia Iehova ei punanga ketaketa nona?

E PUNANGA aite koreia a Iehova ra. E eaa ra te punanga ketaketa? Ko tetai ngai paruruia ia, e ngai no te tinamou me kare e ngai e oraʼi. Kua akamanako a Davida o Iseraela i taito ra e ko te Atua tona punanga ketaketa. Ei akatauanga, e akamanako ana i te imene ta Davida i oronga ki tei Teitei Rava “i te ra i akaoraiaʼi aia e Iehova i te rima o tona katoa ra au enemi, e te rima o Saula,” koia te ariki o Iseraela ra.​—Salamo 18, tataanga i runga ake.

² Kua akamataia e Davida taua imene akaoraora ra ma te au tuatua: “Te inangaro atu nei au ia koe e Iehova, e toku maroiroi. Ko Iehova taku mato, e taku punanga, e toku nei ora; toku Atua, toku mato, koia taku ka irinaki atu; taku paruru e te tara o toku ora, toku are teitei.” (Salamo 18:1, 2) Kua akono tika koreia e kua arumakiia e te Ariki ko Saula, kua akariro a Davida tangata tu tika ra ia Iehova ei akapuanga nona, mei tetai tangata i oro ra ki roto i tetai ngai paruruia kia oraʼi aia i etai tumatetenga.

3. Eaa ra te au ngati Iuda o to Ezera tuatau ra i kite ei i te “rekareka maata”?

³ Te rekareka ta Iehova e oronga maira ko tetai punanga ketaketa ia te ka puapinga no te aronga te aaere ra na tona mataara ei aronga tamou marie i te tiratiratu. (Maseli 2:6-8; 10:29) Inara, e raukaʼi te rekareka mei te Atua maira, ka tau te au tangata kia rave i te anoano tu Atua ra. No teia tu, e akamanako ana eaa tei tupu i Ierusalema i te 468 M.T.N. Kua oronga a Ezera te tata tuatua ra e etai atu i te kite na te tatauanga tau i te Ture ra. I reira kua raurauia te au tangata ra: “E aere, e kai i te kai matu, e inu i te vai mangaro, ka akau atu ei i tetai tuanga na te aronga e ngere ra; e rā tapu oki teia no to tatou Atu: auraka e iriea; ko te rekareka ra no ko ia Iehova ra to kotou ïa [“punanga ketaketa,” NW].” E “rekareka maata” tei tupu i te akono anga te au ngati Iuda i te kite i rauka mai ia ratou e kua akono i te oroa patia anga puakapa rekareka ra. (Nehemia 8:1-12) Ko te aronga tei ia ratou ra ‘te rekareka o Iehova ei punanga ketaketa’ kua akaputu i te maroiroi no ta ratou akamori e ta ratou angaanga. I te mea ko te rekareka o Iehova to ratou punanga ketaketa, ka tau katoa tatou kia manako atu i te au tangata o te Atua i teia tuatau kia rekareka katoa oki. Eaa ra, i reira, etai au tumu no ratou no te rekareka anga?

“Ka Rekareka Tika Rai”

4. Eaa tetai tumu maata no te rekareka anga o te au tangata o Iehova ra?

⁴ Ko tetai tumu maata ko te apinga ta Iehova i rave no te akaputuputuanga ra. Te apai maira te au akaputuputu anga e te au uruoaanga o te Au Kite o Iehova i te rekareka no ratou i teia tuatau, mei ta te au oroa mataiti i akonoia ra e to Iseraela i te apai anga mai i te rekareka ki to ratou au ngakau. Kua tuatuaia ki te au tangata o Iseraela e: “Kia po itu koe i te akono anga i te oroa [patia puakapa] a toou Atua ra a Iehova, i te ngai i akonoia e Iehova; e akameitaki mai oki to Atua ra ko Iehova ia koe i taau katoa ra apinga tini, e te au angaanga katoa a to rima na, e ka rekareka tika rai oki koe.” (Deuteronomi 16:13-15) Ae, kua anoano te Atua “kia rekareka tika rai” ratou. Te tika katoa ra te reira no te au Kerititiano mou, no te mea kua raurau maira te apotetoro ko Paulo i tona au taeake akarongo ra: “E rekareka i te Atu ra, aua e tivata, e te tuatua akaou atu nei au, Kia rekareka rai kotou.”​—Philipi 4:4.

5. (a) Eaa te rekareka, e akapeea te reira e rauka mai ei i te au Kerititiano? (e) Akapeea e raukaʼi ia tatou kia rekareka e noatu rai te au timataanga?

⁵ I te mea te anoano ra a Iehova kia rekareka tatou, kua oronga mai aia i te rekareka ei tetai o te au ua o tona vaerua tapu. (Galatia 5:22, 23) E eaa te rekareka? Ko te manako ngakau mareka ia tei tupu mai na te manako tapapa atu me kare no te rauka mai anga te meitaki. E tu mataora tikai to te rekareka, e mareka autu anga. Te akamatutu maira teia ua o te vaerua o te Atua ia tatou i raro ake i te timata anga. “Ko [Iesu] tei akakoromaki i te satauro, kare i akono i te akama, i te [“rekareka,” NW] i tukuia mai ki mua i tona aroaro, e te noo ra i teianei i te pae katau i te terono o te Atua ra.” (Ebera 12:2) Kua tata te pipi ko Iakobo e: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa; Kua kite oki kotou e, na taua timata anga i to kotou akarongo ra e akatupu i te akakoromaki.” Inara ka peea me kare tatou i kite e eaa ta tatou ka rave no tetai tu timata anga? Ei reira ka rauka ia tatou te pure ma te irinaki anga no te pakari kia akono atu i te reira. Na te raveanga kia rotai ma te pakari no te rangi maira ka rauka ia tatou i te akakore i te au manamanata me kare kia akono atu i te au timataanga putuputu ra ma te kore e ngere i te rekareka no Iehova mai.​—Iakobo 1:2-8.

6. Eaa etai atu au tumu no te rekareka te ka akamanako tatou i teianei?

⁶ Na te rekareka no ko mai ia Iehova ra e akamaroiroi ia tatou kia akatupu i te akamori mou ra. Ko te reira tei tupu i te tuatau o Nehemia raua ko Ezera ra. Te au ngati Iuda o te reira taime tei tu ra i te rekareka o Iehova ei punanga ketaketa no ratou kua akamaroiroiia kia akatere atu i te au apinga no te akamori mou ra. E ia ratou i akatupu ra i te akamori anga ia Iehova, kua tupu katoa oki to ratou rekareka. Ko te tika katoa oki te reira i teia tuatau nei. E aronga akamori ia Iehova, tei ia tatou te au tumu anga no te maata te rekarekaanga. E akamanako ana tatou i teianei i etai tumu tokoiti ua o ta tatou au tumu e manganui no te rekareka.

Te Pirianga ma te Atua na Roto ia Karaiti

7. No runga ia Iehova ra, eaa te tumu tau a te au Kerititiano no te rekareka?

⁷ Ko to tatou pirianga vaitata ma Iehova te akariro ra ia tatou ei au tangata mataora rava i te enua nei. I mua ake i te riroanga ei au Kerititiano, e tuanga tatou no te totaiete tangata tuatua tika kore ra te aronga ‘manako akapoiriia, e te taka ke i te ora a te Atua ra.’ (Ephesia 4:18) Mei teaa ra to tatou mataora e kare tatou e taka ke ana ia Iehova i teianei! Inara, e a ka tauta anga kia vai tamou marie ei ki roto i tana akaperepere. Ka tau tatou kia “noo tamou tikai i te akarongo, kua akatumu e kua tinamou tikai, kare i ngaueue i te akinanga i te evangelia nei, ta kotou i akarongo akenei.” (Kolosa 1:21-23) Ka rekareka tatou e kua akatae mai a Iehova ia tatou ki tana Tamaiti kia tau ma ta Iesu uaorai au tuatua: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” (Ioane 6:44) Me ka ariki tika tikai tatou i to tatou pirianga ma te Atua na roto ia Karaiti, ka rauka ia tatou i te paruru atu i tetai ua atu apinga te ka akakino i te reira.

8. Akapeea ta Iesu ra tauturu anga i to tatou tu rekareka anga?

⁸ Te akakore anga i te au ara na te akarongo i te atinga oko o Iesu ko tetai tumu maata ia no te rekareka no te mea ko te reira te akatupu ra kia rauka to tatou pirianga ma te Atua ra. Na tona rave akakoro anga i te ara, kua apai mai to tatou metua koia Adamu i te mate ki runga i te au tangata ravarai. Inara, kua akataka maira te apotetoro ko Paulo e: “Kua akamaata ua maira te Atua i tona aroa ia tatou nei, i te mea te vai tangata ara ua nei rai tatou, i mate ei te Mesia no tatou nei.” Kua tata katoa oki a Paulo e: “Mei te tangata ravarai i taea i te utunga akaapa i te ara a te tangata okotai ra, kua taea katoaia te tangata ravarai i te tika kia ora, i te tuatua-tika a te tangata okotai ra. Mei te tangata katoa e manganui i akariroia ei tangata ara i te akono kore o te tangata okotai ra, manganui oki tei akariroia ei tangata tuatua-tika i te akono a te tangata okotai ra.” (Roma 5:8, 18, 19) Mei teaa ra to tatou rekareka e kua mareka te Atua ko Iehova kia oko i te aronga e uanga no Adamu tei akatika ra kia raveia taua oronga anga aroa ra!

Akonoanga Tu Rangatira e te Akamarama Anga

9. Eaa ra tatou i rekarekaʼi mei te manako anga i te akonoanga?

⁹ Tu rangatira mei Babulonia Maata maira, koia te patireia akonoanga pikikaa o teianei ao, ko tetai atu tumu ia no te rekareka anga. Na te tuatua mou tu Atua i akarangatira ia tatou nei. (Ioane 8:32) E ko te tu rangatira mei teia akonoanga vaine akaturi ko tona aite anga e kare tatou e o atu ki tana au ara, e kite oki i tona au mate, e ka ope ei ki roto i te akapouanga ma ia katoa. (Apokalupo 18:1-8) Kare e apinga no te mii no runga i te ora anga i taua au apinga katoa ra!

10. Eaa te marama anga ta tatou e rekareka nei ei au tangata no Iehova ra?

¹⁰ Te kiteanga e te akonoanga i te Tuatua a te Atua i te oraanga e au tumu ia no te rekarekaanga maata. Matara mai i te mana o te akonoanga pikikaa, ka rekareka tatou i te kite oonu i te pae vaerua kia marama atu tei orongaia mai e to tatou Metua i te rangi ra na roto i “te tavini akono meitaki e te pakari.” (Mataio 24:45-47) To te au tangata ravarai te noo nei ki runga i te enua, ko te aronga anake ua te akono ra ia Iehova tei ia ratou tona vaerua tapu e te kite meitaki i tana Tuatua e tona anoano oki. Mei ta Paulo i tuatua: “Kua akakite maira te Atua ia tatou i taua au mea ra [koia te au mea tana i teateamamao no te aronga tei inangaro iaia] i tona Vaerua: e kimi oki te Vaerua i te au mea katoa nei, e te au mea oonu rai o te Atua ra.” (1 Korinetia 2:9, 10) Ka tau tatou kia akameitaki kia mataora oki e te rekareka nei tatou i te tupu anga te kiteanga marama tei akatakaia maira i te au tuatua ia Maseli 4:18: “Ko te arataa oki o te aronga tuatua-tika ra, e tau ïa ki te mārama kakā ra, ko tei tupu ua kakā anga e tae ua atu ki te avatea tikai ra.”

Manakonako Anga Patireia e te Ora Mutu Kore

11. Akapeea te manakonako anga rekareka no te Patireia i te tua angaia kia etai ke ra?

¹¹ Te akariro katoa nei to tatou manakonako anga Patireia kia rekareka tatou. (Mataio 6:9, 10) Ei Au Kite no Iehova, kua roa tatou i te akakitekite anga e ko te Patireia o te Atua anake te manakonako anga no te au tangata ravarai. Ei akatauanga, e akamanako ana i te mataiti 1931, ia tatou i mou ei i te ingoa Au Kite o Iehova ra na tetai akatika anga rekareka tei akakiteia i te au uruoaanga e 51 katoa takapini te ao nei. (Isaia 43:10-12) Ko taua akatika anga ra e tetai tuatua anga puapinga maata i te uruoaanga na J. F. Rutherford (koia te peretiteni o te Totaiete Punanga Tiaki i reira) kua neneiia ki roto i tetai puka rikiriki The Kingdom, the Hope of the World. Kapiti katoa i roto i te reira ko tetai atu akatika anga tei turuia i taua uruoaanga ra, ko tetai tei akaapa ra ia Kerititome no tona akaruke anga i te akonoanga mou e no te raveanga tau kore i te ako anga a Iehova ra. Kua akakite katoa mai te reira e: “Ko te manakonako anga no te ao ko te Patireia o te Atua ia, e kare e manakonako anga ke atu.” I roto i nga marama tokoiti ua, kua tuaia e te Au Kite o Iehova e tere atu i te rima mirioni o teia puka rikiriki i te au tuanga ravarai o te enua nei. Mei reira mairai e putuputu tatou i te akapapu anga e ko te Patireia anake ua te manakonako anga no te au tangata ravarai.

12. Eaa te au manako anga rekareka no te oraanga te tukuia ra ki mua i te aronga tavini atu ia Iehova ra?

¹² Te rekareka katoa nei tatou, i te tapapa atu anga i te ora mutu kore i raro ake i te tutara Patireia. E “anana iti” o te au Kerititiano akatainuia ra e manakonako anga rekareka to ratou no te rangi. “Kia akameitakiia te Atua te Metua o to tatou Atu ra o Iesu Mesia,” ta te apotetoro ko Petero i tata, “ko te akaanau akaou ia tatou no te maata o tona aroa, kia rauka te manako ora i te tuakaouanga o Iesu Mesia mei te mate maira, Kia rauka te tuanga kino kore, e te viivii kore, e te mae kore, ko tei vaioia ki runga i te rangi na kotou.” (Luka 12:32; 1 Petero 1:3, 4) I teia tuatau te tapapa atu nei te maata anga o te Au Kite o Iehova ki te ora mutu kore i Parataito i roto i te tuanga o te Patireia. (Luka 23:43; Ioane 17:3) Kare e aronga tangata ke atu i te enua nei e apinga tau ta ratou kia akaaiteia ma to tatou au manako anga rekareka. Mei teaa ra te tau no tatou kia akaperepere i te reira!

E Taeake Anga Akameitakiia

13. Akapeea te manako tau no tatou i to tatou taeake anga i te ao katoa nei?

¹³ Ko te riroanga ei tuanga no te taeake anga anake o te ao katoa nei ta te Atua ra i mareka ana e tumu katoa ia no te rekareka maata. E mea mataora ra, tei ia tatou nei te pirianga oa inangaro maataia i runga i te enua nei. Kua tou maira te Atua ko Iehova uaorai ki to tatou tuatau nei e kua tuatua maira: “E naku e akangaueue i te au enua katoa ra, e e tae mai tei inangaroia e te au enua katoa ra: e akaki oki au i teianei are ki te kakā, te tuatua mairā Iehova Sabaota ra.” (Hagai 2:7) E tika, e e apa ua te au Kerititiano katoatoa. Inara, kua akavaitata mai a Iehova i taua aronga tataki tai ra kiaia uaorai na roto ia Iesu Karaiti. (Ioane 14:6) I te mea e te akavaitata maira a Iehova kiaia uaorai i te au tangata tana i akamanako e mea inangaroia, ka maata rai to tatou rekareka me ka akakite tatou i te aroa taeake kia ratou, ka manako teitei ia ratou, ka taokotai atu ma ratou katoa i te au angaanga tu Atua, ka mou ia ratou i to ratou au timataanga, e ka pure oki no ratou ra.

14. Eaa te akamaroiroi anga te ka rauka mai ia tatou mei ia 1 Petero 5:5-11 maira?

¹⁴ Ka tauturu teia katoatoa i to tatou rekareka anga. E tika, ko te rekareka o Iehova te punanga ketaketa ia o to tatou taeake anga i te pae vaerua takapini te ao katoa nei. Ae, te mamae nei tatou katoatoa i te takinga kinoanga e etai atu au tu ngata. Inara ka tau teia kia akapiri vaitata ia tatou kia taokotai e kia oronga mai i te tu taokotai ei tuanga no te akaaerenga tikai okotai a te Atua i te enua nei. Mei ta Petero i tuatua ra, ka tau tatou kia taakaaka ia tatou uaorai i raro ake i te rima mana o te Atua ra, ma te tukuanga i to tatou apiapi katoatoa ki rungao iaia ma te kite e te manako maira aia ia tatou. Ka tau katoa tatou kia matakite no te mea te kimi ra te Tiaporo kia apuku ia tatou, inara i teia kare tatou e vai tataki tai ana, no te mea kua tuatua katoa maira Petero: “Patoi atu ïa ma te akarongo turori kore, kua kite oki kotou e, tei to kotou au taeake katoa i te ao nei taua au mate ra.” E ko teia taeake anga rekareka i te ao katoa nei kare rava ia e pururu, no te mea tei ia tatou nei te akapapu anga e ‘kia roa iti ake to tatou mate, ka tauturu te Atua i to tatou tu e ka akamaroiroi mai, e ka akatinamou ia tatou.’ (1 Petero 5:5-11) E tamanako ana i te reira. Ka vairai to tatou taeake anga rekareka e tuatau ua atu!

E Oraanga ma te Akakoro Anga

15. Eaa i tau ei kia tuatuaia e e oraanga akakoro anga to te Au Kite o Iehova ra?

¹⁵ E rekareka to tatou i roto i teianei ao taitaia no te mea e oraanga akakoroanga to tatou. Kua orongaia mai kia tatou tetai angaanga orometua te akariro nei ia tatou e etai ke ra kia mataora. (Roma 10:10) E angaanga rekareka tikai ia kia riro ei au oa rave angaanga no te Atua ra. I teia tu, kua na ko maira Paulo: “Koai a Paulo, e koai oki a Apolo, mari ra e orometua i akarongo ei kotou, ko ta te Atu ïa i oronga mai ia maua katoa nei? Naku oki i tanu, na Apolo i tamauu ki te vai; na te Atua ra i akatupu. E teianei, kare a te tanu, kare oki a te tamauu ki te vai; ko te Atua ra ko tei akatupu. Te tanu, e te tamauu vai ra, okotai ra ïa: e rave tetai e tetai i tana uaorai tutaki e tau i tana uaorai angaanga. E oa rave angaanga oki matou no te Atua: e koro kotou na te Atua; e are kotou no te Atua.”​—1 Korinetia 3:5-9.

16, 17. Eaa etai akaraanga te ka rauka kia akakiteia mai ei akapapu anga e e au oraanga rekareka to te au tangata o Iehova ra no te akakoro anga?

¹⁶ E manganui te au akaraanga te ka tau kia akakiteia ei akaari e ko te tavinianga tiratiratu ia Iehova ka akatupu i tetai oraanga akakoro anga te ka akaki ia tatou ma te rekareka. Ko teia akakiteanga tetai akatutu anga: “Kua akarakara au takapini i roto i te Are Uipaanga Patireia tei ki ra i te tangata [i te ra o te porokarama akatapu anga i te reira] e kua kite au e varu au mema o toku pamiri i reira, kapiti katoa ia maua ko taku vaine, e e toru a maua tamariki e to ratou nga oa. . . . Kua ki tikai maua ko taku vaine i te mataora, ma te oraanga akakoro anga i te rave angaanga na te Atua ra.”

¹⁷ E mea akapumaana ngakau kia kite e i tetai ua atu mataiti o tetai tangata ka rauka iaia i te akamata ki runga i tetai oraanga rekareka no te akakoro anga tikai i roto i ta Iehova ra angaanga. Ei akatauanga, ko tetai vaine tei apii ra i te tuatua mou o te Puka Tapu i roto i tetai are netianga kua papetitoia aia ei tetai Au Kite o Iehova i te 102 ona mataiti. Kua akaoti atu aia i tona oraanga ma te akakoro anga rekareka, ‘i te matakuanga i te Atua mou ra e te akono anga i tana au akauenga.’​—Koheleta 12:13.

Tetai Punanga Ketaketa Kare ra e Kore

18. Penei eaa te ka rauka kia raveia ei akakore atu i te tu maromaroa e te puapinga kore e kia akatupu i to tatou rekareka anga?

¹⁸ Ko te rekareka o Iehova ko tetai punanga ketaketa ia kare ra e kore no te aronga tiratiratu. Inara, kare tona aite anga e me tu tatou i teia rekareka anga e kare tatou e kite i etai ora poiri mei tei akakeu ra ia Iesu kia tuatua i Getesemane ra: “Kua pini rava toku vaerua i te mamae mate maata.” (Mareko 14:32-34) Me ka tupu mai te tu maromaroa e te puapinga kore no te tuku ua anga ki te au ravenga noinoi. E taui tatou i to tatou tu oraanga i reira. Me kua topa to tatou rekareka no te apaianga noinoi kore i tetai apainga teiaa no te Tuatua Tapu, penei ka tau tatou kia rave i etai akatikatika anga te ka akamama mai i te taomi anga e ka akaora mai i to tatou vaerua rekareka. Pera katoa oki, ka akameitaki a Iehova ia tatou ma te rekareka me ka kimi tatou kia akamareka iaia na te araianga maroiroi i te kopapa ara nei, te ao kino nei, e te Tiaporo oki.​—Galatia 5:24; 6:14; Iakobo 4:7.

19. Akapeea te manako tau no tatou i tetai ua atu angaanga ta tatou e rave ana i roto i te akaaerenga a te Atua ra?

¹⁹ No te au tumu ta tatou i uriuri ana, e no etai atu e manganui, e rekareka maata to tatou nei. Me e au papuritia tatou no te putuputuanga me kare te rave ra i tetai tu o te angaanga i te au tuatau ravarai, ka rauka ia tatou ravarai i te rave kia maata te angaanga i te angaanga a te Atu ra, e ka papu teia i te tauturu i to tatou rekareka. (1 Korinetia 15:58) Noatu rai eaa ta tatou au angaanga i roto i ta Iehova ra akaaerenga, kia akameitaki tatou no te reira e kia rave tamou marie ma te rekareka i te akono i te angaanga tapu ki to tatou Atua aroa, e te mataora ra.​—1 Timoteo 1:11.

20. Eaa ta tatou angaanga maata rava, e eaa ta tatou ka papu?

²⁰ E maata oki ta tatou tumu no te rekareka i ta tatou angaanga no te apainga i te ingoa meitaki o Iehova ra ei Au Kite nona. Ae, e apa ua tatou e te aro atura i te au timataanga e manganui, inara kia tamou tatou ki to tatou manako i to tatou au akameitakianga umere roa ei Au Kite o Iehova. E kia maara, kare rava to tatou Metua akaperepere i te rangi ra e akaruke ia tatou. Ka papu ia tatou e ka akameitaki tamouia tatou me ko te rekareka o Iehova ra to tatou punanga ketaketa.

Akapeea Koe me Pau?

◻ Eaa “te rekareka o Iehova ra”?

◻ Akapeea e rauka mai ei i te au Kerititiano te rekareka anga mou?

◻ Eaa etai au tumu no te rekareka anga o te Au Kite o Iehova ra?

◻ Eaa ra te rekareka o Iehova ra i tau ei ei punanga ketaketa kare ia e kore?