Te Akarongo Maira te Au Tangata “no Roto i te Au Reo Katoa” i te Tuatua Meitaki

“Ei nga tangata tino ngauru, no roto i te au reo katoa o te pa enua ra [ka na ko atu ei], Ka aere katoa tatou: kite akenei oki matou e tei ia kotou te Atua.”​—ZEKARIA 8:23.

1. Akapeea a Iehova i te oronga anga mai i te atianga e te turanga meitaki te akamata anga i te tutu aere anga ki te au reo ke ke e ki te au pa enua Akonoanga Kerititiano?

TANO meitaki tikai te atianga e te turanga. Ko Penetekote 33 T.N. te reira ra. I nga epetoma i mua atu ana, kua aere mai te au ngati Iuda e te aronga poroteraita mei tetai au ngai e 15 te mamao no te Patireia o Roma e i te ngai mamao roa atu ki Ierusalema i te akono i te Pasa. I taua ra ra, e tauatini ua atu o ratou tei akarongo mai​—kare ma te manako oripu ua, mei te aronga o Babela taito rai, mari ra ma te kite marama​—te akakitekite aere anga te au tangata noa ua tei ki i te vaerua tapu i te tuatua meitaki i roto i te au reo e manganui e tuatuaia ra i roto i te patireia. (Angaanga 2:1-12) Kua akairo taua atianga ra i te akamata anga o te putuputuanga Kerititiano e te akamata anga i te angaanga apiianga i roto i reo ke ke o te pa enua e tae ua mai ki teia tuatau nei.

2. Akapeea te au pipi a Iesu i te ‘akapoitirere anga’ i te aronga ke ke tei akarongo mai kia ratou i Penetekote 33 T.N.?

² Penei kua rauka i te au pipi a Iesu i te tuatua i te reo Ereni, e reo tei matauia i taua tuatau. Kua taangaanga katoa ratou i te reo Epera, e reo te tuatuaia ra i roto i te iero. Inara, i te ra o Penetekote, kua ‘akapoitirere rava atura’ ratou i te aronga ke ke tei akarongo mai ia ratou na te tuatua anga i te au reo tikai o taua au tangata ra. Eaa tei tupu mai? Kua akakeu te au tuatua mou puapinga tikai i te au ngakau o te aronga te akarongo maira i ta ratou i akarongo ana i roto i to ratou reo tupuna. Tae anga ki te ope o te ra, kua tupu maata tikai te pupu meangiti o te au pipi ra ki te urupu maata tei tere atu ki te 3,000!​—Angaanga 2:37-42.

3, 4. Akapeea te angaanga tutu aere anga te akatotoaia anga te neke aere anga te au pipi mei Ierusalema, Iudea, e i Galilea ra?

³ I muri ua mai i taua tupuanga umere, i akamata mai ei te takinokinoanga i Ierusalema, e ko “taua aronga ra i pueurikiriki ke ra, aere atura e akakite aere i te tuatua e pini rava ake te enua katoa.” (Angaanga 8:1-4) Ei akaraanga, e tatau tatou ia Angaanga pene 8 no runga ia Philipa, i te akara anga e tangata tutu evangeria te tuatua ra i te reo Ereni. Kua tutu aere atura a Philipa ki te au Samaria. Kua tutu aere katoa aia ki tetai opita Etiopia tei akarongo mai ki te karere no runga ia Karaiti.​—Angaanga 6:1-5; 8:5-13, 26-40; 21:8, 9.

⁴ Te neke aere anga e te kimi aere anga te au Kerititiano i te au ngai ei noo anga no ratou i vao ake i te au ngai o Ierusalema, Iudea, e Galilea, kua aro atu ratou i te au arai anga ou i te pae eteniki e te au arai anga i te pae o te reo. Penei kua akakitekite aere ua etai o ratou ki te au ngati Iuda. Inara kua ripoti maira te pipi ko Luka e: “E tetai papaki tangata o ratou, no Kupero ïa, e no Kurene, ko tei tuatua atu ïa ki te Eleni i to ratou tae anga atu ki Anetioka, i te tuatua anga i te Atu ia Iesu.”​—Angaanga 11:19-21.

E Atua Papakitai Kore​—E Karere na te Katoatoa

5. Akapeea e kiteaia ai to Iehova tu papakitai kore tei piri atu ki te tuatua meitaki ra?

⁵ Ko taua au tupuanga ra kua rotai ki ta te Atua au ravenga; kare aia e akono ana i te tu iriiri anga. I muri ake i te tauturuia anga te apotetoro ko Petero e Iehova kia akatikatika i tona manako no te au tangata o te pa enua katoa ra, kua akakite rekareka maira aia: “Kua kite mou atura au e, kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.” (Angaanga 10:34, 35; Salamo 145:9) Te akakite anga te apotetoro ko Paulo, e tangata tei akakino ana i te au Kerititiano i mua ana, e to te Atua ia i “inangaro i te tangata katoatoa kia ora,” kua akapapu akaou mai aia e kare o te Atua tu papakitai. (1 Timoteo 2:4) Te kiteaia nei te tu papakitai kore o Tei Anga mai no te mea te orongaia mai nei te manakonakoanga Patireia ki te au tangata no tetai turanga ke ke, te iti tangata, te pa enua, me kore te reo.

6, 7. Eaa te au totou Pipiria te akakite maira i te akatotoaia anga te tuatua meitaki ki te au reo ke ke e ki te pa enua ra?

⁶ Kua akakiteia mai teia akatotoaanga pa enua i te anere mataiti i mua atu. E tau ei ki te totou a Daniela, “kua orongaia maira [kia Iesu] te mana, e te kakā, e te basileia nona, kia tavini atu te au tangata katoa, te pa enua, e te au reo, kiaia.” (Daniela 7:14) E tika e te neneiia nei teia makatini i roto i te 151 reo e te tuaia nei i te ao katoa, te tauturu anga ia koe i te tatau anga no runga i to Iehova Patireia, te akaata maira i te akatupu anga o taua totou Pipiria.

⁷ Kua akakite mai te Pipiria i tetai tuatau ka akarongo mai ei te au tangata o te au reo ke ke i ta te reira karere oronga ora. Te akataka mai anga e akapeea te akamorianga mou i te akakeu anga i te manganui, kua totou a Zekaria e: “Ei taua au rā ra e opu mai ei nga tangata tino ngauru, no roto i te au reo katoa o te pa enua ra, i te tapa kakau o tetai ngati Iuda [te Kerititiano akatainuia e te vaerua, e tuanga no “te Iseraela o te Atua”] ta ratou e opu, ka na ko atu ei, Ka aere katoa tatou: kite akenei oki matou e tei ia kotou te Atua.” (Zekaria 8:23; Galatia 6:16) E te akakite anga i tana i kite atu i roto i tetai orama, kua tuatua te apotetoro ko Ioane e: “E i na, e aronga maata rava, kare takiri e pou kia tatau, no te pa enua ravarai, e te au kopu ravarai, e te au iti-tangata ravarai, e te au reo katoa oki, i te tu ua anga ki mua i te terono, e ki mua i te Punua-mamoe.” (Apokalupo 7:9) Kua kite ana tatou i taua au totou i te tupu anga mai tikai!

Itae Anga i te Au Tangata no te Au Tu Katoa

8. Eaa te mea tika tikai i teia tuatau te anoanoia ra no te au akatikatika anga i roto i ta tatou angaanga akakitekite anga?

⁸ I teia tuatau, e maata ua atu te au tangata te teretere aere ra. Te kapiti anga o tetai au kamupani no tetai enua ke ki te kamupani o tetai atu enua te akatuera maira i tetai tuatau ou no te teretere aere anga. E maata te au tangata no roto mai i te au ngai tamaki anga e i te au ngai apiapi anga i te pae moni kua neke atu ki te au ngai te tau meitaki ua ra, te kimi anga i tetai oraanga tinamou i te pae kopapa. I te au enua e manganui, no te maata i te aronga tei aere mai e te aronga oro kimi-ora kua tupu mai tetai au pupu tapere te tuatua ra i tetai reo ke. Ei akatauanga, i Vinirani tere atu i te 120 reo te tuatuaia ra; i Autireria tere atu te numero ki te 200. E tai oire i Marike​—ko San Diego​—tere atu i te 100 reo ka rongoia!

9. Akapeea ra tatou i te manako anga i te au tangata i roto i ta tatou ngai angaanga te tuatua ra i tetai reo ke?

⁹ Ei au orometua Kerititiano te manako ra ainei tatou e kua riro te tae anga mai o taua au tangata ra te tuatua ra i tetai au reo ke ei arairai anga i ta tatou angaanga orometua? Kare rava! Kareka ra, te kite nei tatou i teia ei akatotoaanga reka i roto i ta tatou ngai angaanga orometua​—ei ‘au koro kua teatea ïa i teianei kua mou.’ (Ioane 4:35) Te tauta ra tatou i te akono i te au tangata te manako maira i to ratou anoano i te pae vaerua, noatu e noea mai ratou me kore eaa ra te reo. (Mataio 5:3) Tei tupu mai, i te au mataiti tataki tai te maata ua atura te au tangata no te ‘au reo katoa’ tei riro mai ei au pipi na Karaiti. (Apokalupo 14:6) Ei akaraanga, ia Aukute 2004, kua raveia te angaanga tutu anga i Tiamani i roto i tetai 40 reo. I taua taime rai, kua tutu aereia te tuatua meitaki i Autireria vaitata atu e 30 reo, kake atu mei te 18 i te ngauru mataiti i topa ua akenei. I Ereni, te itaeia ra e te Au Kite o Iehova te au tangata vaitata rai e 20 reo ke ke. I te ao katoa, mei te 80 patene o te Au Kite o Iehova te tuatua ra i tetai reo ke kare ko te reo Papaa ua, e reo ia te tuatua maataia ra i te pa enua.

10. Eaa ra ta te papuritia tataki tai tuanga i te akariro anga i te tangata o te “pa enua katoa” ra ei pipi?

¹⁰ E tikai, te raveia nei ta Iesu akaue anga e “e akariro i to te pa enua katoa ei pipi”! (Mataio 28:19) Te ariki rekareka anga i taua akaue anga, te tua maroiroi nei te Au Kite o Iehova i te 235 enua, i te au puka e tere atu i te 400 reo. Te oronga maira te akaaerenga o Iehova i te apinga te anoanoia ra kia itae i te au tangata, e mea tau kia rave te papuritia Patireia tataki tai i te akamata anga mua i te akakite atu i te karere o te Pipiria ki te “tangata katoatoa” i roto i te reo te marama tikai ra ratou. (Ioane 1:7) Te tauturu ra teia tauta anga taokotai i te au tangata e mirioni ua atu no te au reo ke ke kia puapingaia mei te tuatua meitaki. (Roma 10:14, 15) Ae, e tuanga maata ta tatou tataki tai ka rave!

Aro Anga i te Akaaoanga

11, 12. (a) Eaa te au akaaoanga ta tatou ka aro atu, e akapeea te vaerua tapu i te tauturu mai anga? (e) No teaa ra te tutu aere anga ki te au tangata i roto i to ratou reo tupuna ei tauturu anga maata?

¹¹ I teia tuatau, e manganui te au papuritia Patireia te inangaro ra i te apii i tetai reo ke, inara kare ia ratou te au apinga oronga temeio mai no te vaerua o te Atua kia tuatua atu i tetai reo ke. (1 Korinetia 13:8) E ravenga ngata te apiianga i tetai reo ou. O te aronga katoa te tuatua ra e rua reo penei ka rave i te akatikatika anga i to ratou manako e te raveanga kia tano te karere Pipiria ki te au tangata te tuatua ra i taua reo i na e au turanga ke ke e e au peu tuke to ratou. Tera katoa, e maata te taime e akama ana te au tangata ou no tetai enua ke mai; te umuumuia ra te tauta anga pakari kia marama oki i to ratou tu manakoanga.

¹² Noatu rai, te angaanga ra te vaerua tapu i rotopu i te au tavini o Iehova i roto i ta ratou au tauta anga i te tauturu atu anga i te au tangata te tuatua ra i tetai au reo ke. (Luka 11:13) Kare i orongaia mai te au tu temeio no te reo ra, ka rauka i te vaerua i te akamaata mai i to tatou inangaro kia komunikeiti atu ki te au tangata kare i kite i to tatou reo. (Salamo 143:10) Te tutu aere anga me kore te apiianga i te karere o te Pipiria ki te au tangata i roto i te reo kare ratou e marama ana penei ka itaeia to ratou manako. Inara, e rauka ai i te akakeu i te ngakau o te aronga te akarongo maira kia tatou, e meitaki atu i te tuatua i to ratou reo tupuna​—e reo te tuatua ra ki to ratou au manako ngakau oonu, te au akakeuanga, e te au manakonakoanga.​—Luka 24:32.

13, 14. (a) Na teaa ra i akakeu i etai ke kia rave i te angaanga orometua i roto i tetai reo ke? (e) Akapeea te vaerua akaatinga uaorai e kiteaia ra?

¹³ E manganui te au papuritia o te Patireia kua rave i te angaanga orometua i tetai ngai e reo ke te tuatuaia ra i to ratou kite anga i te aronga tei ariu meitaki mai ki te tuatua mou o te Pipiria. Kua akamaroiroiia tetai papaki me riro mai ta ratou angaanga ei akaaoanga maata e te umere. “Te maata anga o te au tangata no te tua Itinga ia Europa te kaki ra i te tuatua mou,” i akakite mai ei tetai opati manga o te Au Kite o Iehova i te tua i tonga ia Europa. Mei teaa ra te mareka anga i te reira te tauturuia anga taua au tangata tataki tai ra tei ariki maira!​—Isaia 55:1, 2.

¹⁴ Inara, kia raveia tetai tuanga tau i roto i teia angaanga nei, ta tatou e anoano ra te tauta anga e te akaatinga uaorai. (Salamo 110:3) Ei akatauanga, e maata te au ngutuare Kite i Tiapani kua akaruke i te au are tau ua i roto i te au oire mamaata e kua neke atu ki tetai au ngai i uta i te tauturu i te urupu tangata Tinito no tetai enua ke mai kia marama i te Pipiria. I te tua i taatai i te opunga ia Marike, e akaoro putuputu ana te au papuritia e tai ki te rua ora i te rave anga i te au apii Pipiria ki te au tangata i te ngai e noo ra te au tangata Piripino. I Norue, e apii ana tetai nga tokorua ki tetai pamiri no Avikanitana mai. Kua tatau te nga tokorua Kite i te tataanga reo Papaa e te reo Norue o te poroutia Eaa ta te Atua e Umuumu Maira ia Tatou?a E tatau ana te pamiri i te au parakarapa i roto i te reo Peresia, e reo te piri vaitata ra ki to ratou reo Dari. E reo Papaa e e reo Norue ta ratou e tuatua ana. Kua tutaki meitakiia mai taua tu no te akaatinga uaorai e te akatanotano anga me ariu mai te au tangata ke ki te tuatua meitaki.b

15. Akapeea tatou pouroa i te o atu anga i te tauta anga i te tutu aere i roto i te au reo ke ke?

¹⁵ Ka rauka ainei kia o atu koe ki roto i teia angaanga no te au reo ke ke ra? Eaa ka kore ei e akamata i te kimi e eaa te au reo ke te tuatuaia ra i toou ngai? Penei e apai atu koe i reira i etai au aenga pepa me kore i te au poroutia no taua au reo. Te puka rikiriki Good News for People of All Nations, tei tukunaia mai i te 2004, kua riro takere ei mea akatotoaanga i te manakonakoanga no te Patireia no tana karere mama ua e te tau i roto i te au reo e manganui.​—E akara i te atikara “E Tuatua Meitaki no te Au Tangata o te Pa Enua Katoa,” i te kapi 32.

“E Aroa Katoa Kotou i te Tangata Ke”

16. Akapeea te au taeake tau i te akaari anga i te manako karapii kore te tauturu anga i te au tangata te tuatua ra i tetai reo ke?

¹⁶ Noatu e kua apii ana tatou i tetai reo ke me kare ra, ka rauka ia tatou katoatoa i te tauturu na te apiianga i te pae vaerua i te aronga ke i to tatou ngai. Kua ikuiku atura a Iehova i tona au tangata kia “aroa katoa kotou i te tangata ke.” (Deuteronomi 10:18, 19) Ei akaraanga, i tetai oire maatamaata i Marike Tokerau, e rima putuputuanga e aravei ana i roto i taua Are Uipaanga Patireia. Mei te au are uipaanga e manganui, i te au mataiti e raveia ana te tauianga o te au ora no te uipaanga i nekeia atu ei te au uipaanga Tinito ki tetai ora i muri roa mai i te Tapati. Inara, te akaari maira teia e ko te maata anga o te au tangata no tetai enua ke mai te angaanga ra i roto i te are tunu anga kai kare e tae mai ana. Kua rave takinga meitaki te aronga pakari i roto i tetai au putuputuanga i te au akatanotanoanga kia rave vaveia te au uipaanga Tinito i te Tapati.

17. Eaa ra to tatou manako me iki etai pae i te neke atu i te tauturu i tetai reo ke mai?

¹⁷ E akameitaki ua ana te au akaaere aroa i te au taeake e te au tuaine ma te tau e te karape te inangaro ra i te neke atu i te tauturu i tetai reo ke. Ko taua aronga tei kite i te apii Pipiria penei ka mii maataia e te putuputuanga i te kainga, inara aiteite ua te manako o te aronga pakari ki to te aronga pakari i Lusetera e Ikonio. Kare taua aronga pakari i tapupu ana ia Timoteo i te aru atu ia Paulo, noatu e e puapinga a Timoteo i roto i to ratou uaorai au putuputuanga. (Angaanga 16:1-4) Kapiti atu, te aronga te rave ra i te arataki anga i roto i te angaanga tutu anga kare i arairaiia no te aerenga o te manako, te au peu, me kore te au tu o te au tangata ke. Kareka ra, te ariki ra ratou i te turanga ke ke e te kimi anga i te au mataara kia tatanu i te au pirianga meitaki no te tuatua meitaki.​—1 Korinetia 9:22, 23.

18. Eaa te ngutupa maata te akatueraia ra ki te katoatoa?

¹⁸ Mei tei totouia mai, te tutu aereia nei te tuatua meitaki i roto i te “au reo katoa o te pa enua ra.” Te manako umere no te akamaata mai te vai nei rai i roto i te au ngai no te au reo ke ke. E tauatini ua atu au papuritia maroiroi tei tomo atu ki roto i teia “ngutupa maata te taki atura ki te angaanga.” (1 Korinetia 16:9, NW) Inara, e maata ua atu te anoanoia ra kia rauka kia angaangaia taua au ngai, mei ta te atikara e aru mai nei ka akaari mai.

[Au Tataanga Rikiriki i Raro]

Ka Rauka Ainei ia Koe te Akataka?

• Akapeea tatou i te aru anga ia Iehova i te akaari anga i te tu papaki tai kore ki te au tangata ravarai?

• Akapeea tatou i te manako anga i te au tangata i roto i te ngai e angaanga ra tatou kare i kite i to tatou reo?

• Eaa ra i riro ei e e tauturu anga te reira i te tutu aere ki te au tangata i roto i to ratou reo tupuna?

• Akapeea tatou i te akaari anga i te manako no te au tangata ke i rotopu ia tatou?

[Tutu i te kapi 23]

Ia Penetekote 33 T.N., kua akarongo mai te au tangata no te au ngai e 15 o te Patireia o Roma e i te ngai mamao roa atu ki te tuatua meitaki i roto i to ratou reo

[Au Tutu i te kapi 24]

E manganui te au tangata ke te ariu meitaki maira ki te tuatua mou o te Pipiria

[Tutu i te kapi 25]

Tetai tataanga i roto i nga reo e rima i ko i te Are Uipaanga Patireia