Te Aite Anga o to te Atua Patireia Kia Koe

KUA apii a Iesu Karaiti i tana au pipi kia pure: “Kia tae mai toou patireia.” (Mataio 6:10, NW) Mei teaa atura te maata o te taime i teia au tuatua i te tuatua angaia ki te Atua e te aronga te akatutu ra ei au pipi na Iesu!

Inara, e maata atu ta Iesu i rave i te apii ua i tana au pipi kia pure no te Patireia o te Atua. Kua maani aia i te Patireia o te Atua ei tumu tuatua maata tikai i tana angaanga tutu aereanga. Te tika ra, kua karanga te Encyclopædia Britannica e ko te Patireia o te Atua “kua tamanako noa uaia te reira e ko te tumu tuatua tikai i ta Iesu apiianga.”

Me pure te au pipi a Karaiti no te Patireia, eaa ta ratou e pure tikai ra? Eaa te aite anga o to te Atua Patireia kia ratou e pera katoa kia koe? E akapeea a Iesu i te akara anga i te reira?

Ta Iesu Akara Anga i te Patireia

E maata te taime e kapiki ana a Iesu iaia uaorai e ko “te Tamaiti a te tangata.” (Mataio 10:23; 11:19; 16:28; 20:18, 28) Te akamaara maira teia ia tatou no runga i te tuatua a te peroveta ko Daniela no runga i tetai “Tamaiti a te tangata.” No runga i tetai rave anga i te rangi i te tuatau ki mua kua karanga a Daniela: “Akara iora au i taua orama i te po ra, e i na, tetai mei te Tamaiti a te tangata ra i te aere anga mai na roto i te au tiao rangi ra; e kua aere maira ki To te au rā taito ra, e kua akavaitata iora aia ki mua iaia. E kua orongaia maira te mana, e te kakā, e te basileia nona, kia tavini atu te au tangata katoa, te pa enua, e te au reo, kiaia.”​—Daniela 7:13, 14.

Te tuatuaanga no runga i te tuatau e raukaʼi iaia te tutara anga, kua akakite a Iesu ki tana au apotetoro e: “Kia noo te Tamaiti a te tangata ki runga i tona terono kakā, e noo katoa kotou, ko tei aru mai iaku, ki runga i te terono raungauru e rua ara.” Kua tuatua katoa a Iesu: “E kia tae maira te Tamaiti a te tangata ma tona kakā, . . . E akaputuputuia to te pa enua ravarai ki mua i tona aroaro: e nana e akataka ia ratou, mei te tiaki mamoe e akataka i te mamoe e te puaka-nio ra: . . . Ko te ka aere ke ïa [aronga tuatua tika kore] i te mate mutu kore, kareka te aronga tuatua-tika ra, ei te ora mutu kore ïa.”​—Mataio 19:28; 25:31, 32, 46.

Teia au tuatua anga a te peroveta no te au terono e te au pupu tangata ravarai te akakite maira e ko te Patireia e kavamani ia e ka riro a Iesu e etai o tana au pipi ei au tutara ki rungao i te tangata nei. E mana to te reira kavamani i te tipu ke i te aronga tuatua tika kore i te mate. Inara i raro ake i te tutara anga a te Patireia, ko te aronga tei inangaro i te tuatua tika ra ka rauka ia ratou te apinga aroa na te Atua koia oki te oraanga mutu kore.

Te papu ra i reira te Patireia o te Atua e ko tetai kavamani atua tei akatupuia i te rangi. Kare te Patireia i te ekaretia, e kare te au Tuatua Tapu e akatika ana i tona tumu e no teianei ao atu. Pera katoa tetai kavamani orongaia mai e te Atua kare te reira e ko tetai mea ua nei i roto i te ngakau o tetai tangata. I te mea e e kavamani te Patireia o te Atua, kare te reira e riro mai ana ei mea ua i roto i to tatou ngakau me ariki tatou i te akonoanga Kerititiano. Inara eaa etai pae i manako ei e ko te Patireia e turanga te reira te o atura te ngakau?

Tei Roto Ainei te Patireia ia Tatou?

Te manako ra etai pae e tei roto te Patireia i to tatou ngakau no te mea no te tu i tataiaʼi a Luka 17:21 e tetai aronga uri Puka Tapu. I tau ki te New International Version, kua karanga a Iesu i reira e: “Tei roto te patireia o te Atua ia [you].”a

No runga i teia kua akakite The Interpreter’s Dictionary of the Bible e: “Noatu e te taiku putuputuia ra ei akaraanga no to Iesu ‘tu muna’ me kare ‘roto takiri,’ te vaira teia uri anga ki rungao tikai i te urianga takere, ‘tei roto . . . ia [you],’ . . . tei maramaia i te tu tau kore o teia tuatau e ko ‘[you]’ ei okotai mea; ko te ‘[you]’ . . . e maata te reira (te tuatua ra a Iesu ki te au Pharisea​—irava 20) . . . Te manako e ko te patireia o te Atua e turanga tei roto takiri te reira o te manako, me kare ei ora noou uaorai, te patoi ra te reira i te aerenga tuatua o teia irava, e pera katoa ki te katoa anga o te oronga anga manako o te K[oreromotu] O[u].”

Te akaari maira tetai putunga tuatua i raro ake no Luka 17:21 i roto i te New International Version e e tau ta Iesu au tuatua kia tuatuaia e: “Tei rotopu te patireia o te Atua ia kotou.” Tetai atu au urianga Puka Tapu te tatau ra: “Tei rotopu te patireia o te Atua ia kotou” me kare “te vaira i rotopu ia kotou.” (The New English Bible; The Jerusalem Bible; Revised Standard Version) I tau ki te New World Translation of the Holy Scriptures, kua karanga a Iesu: “Te patireia o te Atua tei rotopu ia kotou na.” Kare te aite anga i ta Iesu tuatua e tei roto te Patireia i te au ngakau o te au Pharisea ngakau parau tana e tuatua atura. Mari ra, ei Mesia tapapaia ma te roa e te Ariki Akataoongaia, tei rotopu a Iesu ia ratou. Inara ka topa etai tuatau i mua ake ka tae mai ei te Patireia o te Atua.

Te Ra e Tae Mai Ei

Kua ikiia tetai au pipi a Iesu Karaiti ei au tauturu tutara nona i roto i te Patireia na te Mesia i te rangi ra. Mei ia Iesu ra, ka mate ratou i te tu akono meitaki ki te Atua e kua akatuakaouia mai ki te oraanga vaerua i te rangi. (1 Petero 3:18) E manga numero ua, ka riro ratou ei au ariki e te taunga e 144,000 tei okoia mai mei rotopu i te tangata nei. (Apokalupo 14:1-4; 20:6) Te kapiti ra to Iesu au tauturu tutara i tana au apotetoro akono meitaki.​—Luka 12:32.

Te tuatuaanga ki tana au pipi i tetai atianga, kua taputou a Iesu: “Kare tetai papaki o teianei aronga e tu mai nei, e rokoia e te mate, e kite ei ratou i te Tamaiti a te tangata i te aere anga mai i tona basileia.” (Mataio 16:28) Ma te tau, te akakite maira te irava tei aru mai e kua tupu ta Iesu taputou i nga mea ra ua i muri ake. E oti kua apai aia e toru o tana au pipi ki uta i te maunga te ngai i taui ei aia i mua ia ratou, e kua kite i reira ratou i tetai orama nona i tona Patireia kaka. (Mataio 17:1-9) Inara kare te Patireia i akatumuia ake i te reira taime. Aea te reira e tupu ei?

I tetai o ta Iesu au akatutu anga te akakite maira e kare aia e akataoonga vivikiia ei Ariki Mesia. Ia Luka 19:11-15, ka tatau tatou: “Kua tuku katoa atura aia i tetai parabole, no te mea te vaitata atura aia ki Ierusalema, e te manako ra ratou e, e kitea mai te basileia o te Atua i reira ra. No reira aia i na ko atu ei. Kua aere atura tetai tangata mana ki te enua mamao, kia rauka iaia te taoonga ariki, e ka oki mai ei. Kua karanga atura aia ki nga tavini tino ngauru nona ra, e kua tuku atura i nga mina okotai ngauru kia ratou, kua na ko atura kia ratou, E oko ua kotou e kia oki mai au ra. . . . E oki maira aia, ma te taoonga ariki katoa i rungao iaia, kua akaue atura aia i taua au tavini tana i tuku i te moni ra, e aere mai kiaia, kia kite aia i te tu o te apinga i rauka i ta ratou oko anga.”

I te reira au ra e roa te tuatau no tetai tangata te teretere ra ki Roma, te tiaki i roto i te reira oire e tae ua atu ki te taime e akatinamouiaʼi kiaia te mana ariki, e oti ka oki atu ei ki tona enua kainga ei ariki. Ko Iesu oki te “tangata mana.” Ka rauka iaia te mana ei Ariki no ko mai i tona Metua i te rangi inara kare aia e akataoonga vivikiia ei Ariki Mesia. Ka rave angaanga tana au pipi na te apaianga i te angaanga o te akakitekiteanga i te tuatua meitaki o te Patireia no tetai tuatau roa i mua ake ka oki mai ei aia ei Ariki.

Akapeea te Patireia te Tae Anga Mai

Eaa ta te aronga inangaro i te Atua e pati ra me pure ratou no tona Patireia kia tae mai? Te pati tikai ra ratou e kia rave papu te Patireia i te rangi ra na te takoreanga i te au akatereanga kavamani a te tangata nei tei kore i rauka i te akatupu atu i ta ratou taputou o te apaianga mai i te au tikai e te puapinga. Te touanga ki teia tupu anga, kua tata te peroveta a Daniela: “E i te au rā o taua au ariki ra, e akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.” (Daniela 2:44) Aea teia e tupu ei?

Kua akakite a Iesu e ka tupu teia i rotopu i te uki o te aronga te ka kite i tetai tamanamanata anga tuke ua ake rai i roto i te au raverave anga a te tangata nei. No runga i tona “taenga mai,” kua oronga mai a Iesu i tetai “akairo” maata no runga i te au tupuanga mei tei kare i aiteia koia oki ko te tamaki, te ngaruerue enua, te onge, te maki mate​—ae, e pera katoa te tutu aereanga o te tuatua meitaki o te Patireia o te Atua ki te ao katoa.​—Mataio, au pene 24, 25, NW; Mareko, pene 13; Luka, pene 21.

Te o atura ki roto i te totou a Iesu te au rave anga te tupu ra i teianei taime tikai​—i to tatou 20 anere mataiti. No reira, kare e roa atu ana i mua ake ka apai mai ei te Patireia o te Atua i te au akameitakianga maata ki te tangata nei. Ka rauka e ko koe tetai i rotopu i te aronga te ka rekareka i te au puapinga o te tutara anga Patireia. Inara eaa tikai te aite anga o to te Atua Patireia kia koe e taau aronga tei akaperepereia?

Te Au Akameitakianga o te Tutara Anga Patireia

Ka tupu te mataora i te au enua katoa. I raro ake i “tetai rangi ou”​—koia oki te Patireia i te rangi ra—​ko “tetai enua ou,” tetai totaiete o te aronga akarongo o te Patireia. Kua tata te apotetoro ko Paulo e “e ka vai te Atua uaorai kia ratou.” “E ka orei aia i te au roimata ravarai mei to ratou mata.” Kare atu e tumu no tetai ua atu mea mari ra ko te mataora i reira, no te mea “e kore katoa te mii me kore te aue e te mamae oki.”​—Apokalupo 21:1-4, NW.

Kare e mate akaou. Teia mea tei akatupu i te taitaia anga kino kare teia e riro akaou ei keia ia tatou i to tatou au taeake e te aronga tei akaperepereia. “E taua enemi openga ra, ko te mate, e akakoreia ïa.” (1 Korinetia 15:26) Eaa te rekareka te ka vai me komonoia te au tanumanga ki te au tuakaou anga o te aronga i roto i ta te Atua akamaara anga!​—Ioane 5:28, 29.

Ka komonoia te makimaki e te pirikoki ki te turanga kopapa oraora. Kare te au roi are maki e akaki akaouia ki te aronga tei tamanamanataia i te au maki kopapa e te manako. Ka taangaanga te Taote Maata, ko Iesu Karaiti, i te puapinga o tona atinga oko no te ‘rapakau anga ïa i to te pa enua.’ (Apokalupo 22:1, 2; Mataio 20:28; 1 Ioane 2:1, 2) Te au rapakau anga tei raveia iaia i te enua nei e akaraanga anake ua te reira i tana ka rave na roto i te Patireia.​—Akaaiteia atu kia Isaia 33:24; Mataio 14:14.

Ka maata ua atu rai te au putunga kai. Mei ta te tata taramo i tuatua, “ka maata te titona ki runga i te enua; I te take o te au maunga ra ka ki maringiringi.” (Salamo 72:16, NW) Tapiri atu ki teia, te karanga ra te totou a Isaia: “Ei reirā Iehova Sabaota ra e rave ei na te tangata katoa, i teianei maunga, i tetai pokai, e kai memeitaki ra, te kaingakai wina i runga i te ota; e kai matu roa ra, te wina i runga i te ota i akaareare meitakiia ra.” (Isaia 25:6) E tikai, kare te onge e takino i te au tangata o te enua i raro ake i te tutara anga o te Patireia.

Ka riro te katoa anga o te enua ei parataito. I reira e akatupuiaʼi teia taputou a Iesu ki tetai tangata rave kino pakari: “Tei iaku nei koe i te Parataito.” (Luka 23:43, NW) Ka rauka katoa ia koe i te rekareka i te oraanga mutu kore i te enua nei, e enua tamaia i te kino e tei tauiia ki roto i tetai ao aua marekaia.​—Ioane 17:3.

Te orongaia ra teia au manakonakoanga manea ki mua i te au tangata akarongo. Te oronga maira te Tuatua akauruia a te Atua, koia oki te Puka Tapu, i te au akapapu anga. E ko teia katoatoa te aite anga o to te Atua Patireia kia koe.

[Tataanga Rikiriki i Raro]

[Tutu i te kapi 7]

Te irinaki ainei koe i ta Iesu i tuatua no runga i to te Atua Patireia?