Pene 62

E Apiianga i te Taakaaka

I MURI ake i te akaoraanga i te tamaiti tei oia e te temoni i te ngai vaitata ia Kaisarea Philipi ra, kua inangaro a Iesu i te oki ki te kainga i Kaperenauma. Inara, te anoano ra aia kia aere ko ratou anake ua ko tana au pipi i taua tere ra kia raukai iaia i te teateamamao ia ratou no tona matenga e no ta ratou apainga i muri akera. Kua akataka atura aia kia ratou e: “E tukuia te Tamaiti a te tangata nei i te rima tangata, e e ta takiri ratou iaia, e kia oti i te ta, e tu akaou aia ki runga i te po toru.”

Noatu rai e i tuatua ana a Iesu i te reira i mua akera, e i kite tikai e toru o te au apotetoro ra i tona akatuke anga i te tuatau i uriuri manakoia tona “aere anga,” kare tana au pipi i kite meitaki i te reira tumu. Noatu rai kare ratou i akakore e ka tamateia aia, mei ta Petero i tuatua i mua akera, te mataku ra ratou i te ui akaou atu iaia no te reira.

E kua tae atura ratou ki Kaperenauma, e ngai ia mei te kainga rai nona te tu i to Iesu rave anga i te angaanga tutu aere. E ko te oire kainga katoa ia no Petero e etai atu o te au apotetoro ra. I reira, kua aravei atu ia Petero te au tangata koi tero no te iero ra. Penei te timata ra kia o atu a Iesu ki roto i tetai aati anga i te akonoanga arikiia, kua ui maira ratou: “Te oronga nei aina to kotou orometua i te diderama [e rua no te tero (iero), NW]?”

“Ae,” e na Petero ei.

Ko Iesu tei tae ua atura ki te are i muri poto akera, kua kite aia eaa tei tupu i reira. No reira i mua ake ka tuatuaʼi a Petero no te reira tumu, kua ui atura Iesu: “Eaa toou manako, e Simona? ei iaai ra te ui ariki no teianei ao e umuumu atu ei i te apinga uipa e te telo? Ei ta ratou uaorai tamariki aina, e ei te tangata ke aina?”

Kua karanga atura Petero: “Ei te tangata ke.”

Kua tuatua maira Iesu: “Kua ora mari te tamariki.” I te mea ko te Metua o Iesu te Ariki o te ao katoa e pini ua ake, Koia tei akamoriia i te iero ra, kare i te mea umuumuia i te ture no te Tamaiti a te Atua kia tutaki i te tero no te iero ra. Kua tuatua maira Iesu kiaia: “E aere atura koe ki te pae roto, e titiri atu ei i tetai matau, ka uuti mai ei i te ika muatangana i kai ra; e kia aae koe i te vaa ra, e kitea ia koe tetai setatera [e a diderama], ko taau ïa e apai atu ia ratou na taua katoa, ko te kinokino mai aea ratou ia tatou nei.”

I te akaputu anga te au pipi ki te ngai okotai i muri ake i to ratou oki anga ki Kaperenauma, penei i te ngutuare o Petero, kua ui maira ratou kia Iesu: “Koai te ka maata i te basileia o te [au rangi, NW] ra?” Kua kite a Iesu e na teaa i akakeu i ta ratou uianga, i te mea kua kite aia eaa tei tupu i rotopu ia ratou i to ratou aru atu anga i muri mai iaia ra i to ratou oki anga mei Kaisarea Philipi. No reira kua ui atura aia: “I tauetono ana kotou i te aa i te arataa ra?” No te akama, kua muteki ua te au pipi ra, no te mea i tauetono ana ratou ratou uaorai e koai te ka maata ia ratou.

Vaitata e toru mataiti to Iesu apiianga ia ratou, kare ainei i te mea ngata kia irinakiia e ka tauetono te au pipi mei te reira te tu? Te akakite maira i te mana ririnui o te tu apa ua o te tangata nei, e pera katoa oki te akonoanga akamori i mua ana. Kua akaketaketa mai oki te akonoanga ngati Iuda i te turanga me kare taoonga i ta ratou au ravenga katoatoa e no reira mai oki te au pipi i te tupu anga mai. Pera katoa, penei ko Petero, no ta Iesu taputou kiaia no “nga taviri” o te Patireia, kua manako e e maata aia. A Iakobo raua ko Ioane penei e manako akapera katoa to raua no te mea i akaperepereia raua kia kite i to Iesu akatuke angaia.

Noatu rai e eaa te tu, kua akanoo a Iesu i tetai akakite anga pakari i te tauta anga kia akatikatika i to ratou tu manako. Kua kapiki atura aia i tetai tamaiti, akatu atura iaia ki rotopu ia ratou, takave atura iaia, e kua na ko atura: “Kia kore kotou e akatu keia, e kia riro mei te tamariki mea riki ra, kare kotou e o ki te basileia o te [au rangi ra, NW]. E teianei, ko te taakaaka iaia uaorai mei teianei tamaiti iti, koia te ka maata i te basileia o te [au rangi, NW] ra. E ko te kite mai i tetai tamaiti iti mei teianei, no toku nei ingoa, kua kite mai ïa iaku.”

Mei teaa ra te umere o tana akatikatika anga i tana au pipi! Kare a Iesu i riri ana ia ratou e ka karangai e nengonengo ratou, e noinoi, me kare e kimi taoonga. Kare, mari ra kua akatutu atura i tana apiianga akatikatika na te akaraanga o te tamariki mea riki ra, ko tei tau to ratou tu e kare e kimi taoonga e kare o ratou manako no te mana i rotopu ia ratou uaorai. No reira kua akaari a Iesu e ka tau tana au pipi kia akatupu i te reira au tu tei akakite maira i te tamariki taakaaka. Mei ta Iesu i tuatua taopenga maira: “E tei mea ngiti rava i roto ia kotou na, ko te ka maata ia.” Mataio 17:​22-27; 18:​1-5; Mareko 9:​30-37; Luka 9:​43-48.

▪ I te oki anga ki Kaperenauma, eaa te apiianga ta Iesu ra i akono akaou, e akapeea te ariki angaia?

▪ Eaa ra a Iesu i kore ei i umuumuia kia tutaki i te tero iero ra, inara eaa aia i tutaki ei i te reira?

▪ Penei na teaa i turu i te tauetono anga a te au pipi ra, e akapeea ta Iesu akatikatika anga ia ratou ra?