Akamou Anga i te au e te Turanga mā o te Putuputuanga

I TE AU mataiti ravarai, e manganui ua atu te uipa mai ana ki te akamorianga mou a Iehova, mei tei totouia e te Pipiria. (Mika 4:1, 2) Rekareka tikai tatou i te āriki ia ratou ki roto i “te ekalesia o te Atua”! (Anga. 20:28) Te akaperepere ra ratou i te tikaanga kia tavini kapiti tatou ia Iehova e kia mataora ua i te turanga mā e te au i roto i to tatou parataito pae vaerua. Na te vaerua tapu o te Atua e te apiianga a tana Tuatua e tauturu ia tatou kia akatupu ua rai i te au e te turanga mā i roto i te putuputuanga.—Sala. 119:105; Zeka. 4:6.

² Na te akono anga i te au kaveinga Pipiria, ka rauka ia tatou i te “akatangata ou” ia tatou. (Kolo. 3:10) E vaoʼo atu i to tatou au manamanata puapinga kore ua. Me aru tatou i to Iehova aerenga manako, ka autu tatou i rungao i te tu akatupu pekapeka o teianei ao, e ka taokotai i te angaanga kapiti ki to tatou au taeake i te pa enua.—Anga. 10:34, 35.

³ Inara, i tetai au taime e tupu ana te au tu ngatā te ka takino i te turanga au e te rotai o te putuputuanga. Eaa ra teia i tupu ei? Maataanga o te taime, kare e aruia ana te ako a te Pipiria. Te tauta nei tatou i te akamako i to tatou au tu paruparu e te apa ua. E aronga ara tatou pouroa. (1 Ioa. 1:10) Penei ka rave tetai i te tarevake e ō maira te au peu tau kore te ka takino i te turanga mā o te akamorianga a te putuputuanga. Penei ka riro ta tatou tuatua manako kore e te au peu ei akariri i etai ke, e penei ka akaturoriia tatou uaorai no te tuatua e te peu a etai ke. (Roma 3:23) Me tupu teia, eaa ra ta tatou ka rave i te akatikatika i teia au mea?

⁴ Te akara aroa ua maira a Iehova i teia au mea pouroa. Me tupu te au turanga ngatā, oronga ua mai aia i te aratakianga na roto i Tana Tuatua. Ka rauka te tauturu na roto i Tona au tiaki akaperepere, koia oki te aronga pakari. Na te aru anga i ta ratou aratakianga Tuatua Tapu, ka rauka ia tatou tetai pirianga meitaki ki etai ke e tetai turanga meitaki i mua ia Iehova. Me ako e me akaapaia tatou no tetai angaanga tarevake ta tatou i rave, kia papu ia tatou e no to Iehova inangaro ia tatou i akatikatika mai ei aia ia tatou.—Mase. 3:11, 12; Ebe. 12:6.

AKATIKATIKA I TE AU MANAMANATA RIKIRIKI

⁵ I tetai taime penei ka tupu mai tetai pekapeka me kore au turanga ngatā rikiriki i rotopu i te au taeake i roto i te putuputuanga. Kia akakore vivikiia teia na roto i te tu aroa taeake, tetai e tetai. (Ephe. 4:26; Phili. 2:2-4; Kolo. 3:12-14) Kare e kore ka kite koe e ka rauka ua i te akaau i te au manamanata e ō maira toou pirianga ki tetai taeake Kerititiano me akono koe i te ako a Petero kia ‘maata ïa te aroa ia kotou uaorai: ka ngaro oki te apa e manganui i te aroa.’ (1 Pete. 4:8) Te na ko ra te Pipiria e: “Te apa anake nei tatou i te au mea katoa e manganui.” (Iako. 3:2) Me aru tatou i te kaveinga Pipiria kia akono i etai ke mei ta tatou e inangaro ra ia ratou kia akono mai ia tatou, ka rauka ua ia tatou te akakore e te akangaropoina i te au manamanata rikiriki.—Mata. 6:14, 15; 7:12.

⁶ Me te kite ra koe e kua pakia tetai tangata no tetai mea taau i tuatua me kore i rave, kia viviki koe i te aere e akaau. E akamaara e te ō katoa maira toou pirianga kia Iehova. Kua ako a Iesu i tana au pipi e: “Kia apai koe i taau apinga oronga ua ki te atarau, e kua manako iora koe i reira e, e ara ta to taeake ia koe na: Vaio atu i to apinga i mua i te atarau, e akamata i te aere e ongi i to taeake, ka aere ei ka apai i taau apinga.” (Mata. 5:23, 24) Penei e e tarevake ua. Me koia ïa, eiaa e akamoupuku. Kia maru ra me karangaranga atu ki tetai e tetai, me akapera, ka kopaeia te akakinokino atu i te ngakau o to tatou au taeake, e ka akaauia te manamanata e tupu ana no to tatou tu apa ua.

AKO A TE PIPIRIA TEI ANOANOIA

⁷ Tetai taime, ka anoanoia te ako a te au akaaere ei akatikatika i te aerenga manako o tetai tangata. Kare teia i te mea māmā. Kua tata te apotetoro a Paulo ki to Ephesia: ‘E te au taeake ra, kia rokoia tetai e te apa ra, ka akaora kotou ko tei akono i ta te vaerua ra i te reira, ma te ngakau maru; ma te manako ia koe uaorai, ko te timata katoaia aea koe.’—Gala. 6:1.

⁸ Na te tiaki anga i te anana, ka rauka i te au akaaere i te paruru i te putuputuanga kia kore e takinoia to ratou akarongo, e ka kopae katoaia te au manamanata kino. Ka tauta te aronga pakari i te akono i ta ratou apainga i roto i te putuputuanga kia tau ki ta Iehova i totou na roto ia Isaia e: “E riro oki tetai tangata mei te punanga i te uriia ra, mei te pipinianga i te matangi maata ra; mei te au vai taʼe i te ngai keremarō ra, mei te marumaru o tetai mato maata i te enua papamarō ra.”—Isa. 32:2.

AKAIRO I TE ARONGA AKONO KORE

⁹ Kua akamatakite mai te apotetoro a Paulo no runga i tetai aronga te ka riro ei akakeuanga kino ki runga i te putuputuanga. Akakite a Paulo e: “Te ako atu nei matou ia kotou . . . e akataka ke mai kotou i te taeake aerenga tika kore ra, kare i tau i te tuatua tana i kite ia matou nei.” Kua akamārama mai aia i teia tuatua i te tata anga e: “E te tangata kare i akarongo i ta matou tuatua i teianei leta, akairo atu i te reira tangata, e eiaa e kapiti atu iaia, kia akama aia. Auraka ra e tuatua e enemi, e ako atura ei taeake.”—2 Tesa. 3:6, 14, 15.

¹⁰ Tetai taeake tei kore rava i apa ana i tetai ara kino te ka tau kia akaateaia ki vao i te putuputuanga, tetai taime ka akaari mai aia i te tu akatietie e te akangateitei kore i to Iehova au turanga e aru nei te au Kerititiano. Te kapiti maira teia i te au mea mei te tu kope, akaapaapa, me kore te tu repo. Penei te “koka aere ua ra [aia].” (2 Tesa. 3:11) Me kore ka umuumu aia i te apinga a etai ke, me kare ka akariro aia ei mea matau i te rave i te au tu tamataora kare takiri e tau. Ka riro tera tu akono kore ei akaviivii i te ingoa o te putuputuanga, e ka piri atu te reira tu ki te au taeake.

¹¹ Te mea mua, ka tauturu te aronga pakari i tera tangata akono kore na roto i te Pipiria. Inara me ka kopae rai aia i te au kaveinga Pipiria noatu te ako tei orongaia, penei ka iki te aronga pakari kia oronga i tetai akoanga ei akamatakite i te putuputuanga. Ka akamanako meitaki te aronga pakari me kua kino roa teia turanga, e te riro ra ei akamareka kore i etai ke, e ka anoanoia tetai akoanga ei akamatakite i te katoatoa. Ka oronga te vaa tuatua i tetai aratakianga no runga i te tu akono kore inara kare aia e akakite i te ingoa o te tangata mako kore. Tera i reira, ka matakite te aronga tei kite i te turanga tei akatakaia mai, eiaa e kapiti atu kiaia i te tamataora e te vai atura, inara ka kapiti atu rai tatou kiaia i roto i te akamorianga ei ako atu iaia ei taeake.

¹² Te irinakiia nei e ka riro te turanga ngaueue kore o te au Kerititiano ei tauturu i te tangata akono kore kia kite i te kino o tona aerenga e kia akakeu iaia kia taui. Me te kite papuia ra e kua akaruke aia i tona aerenga kino, kare i reira e anoanoia kia akairoia aia.

AKATIKATIKA I TETAI AU TAREVAKE KINO

¹³ Me inangaro tatou i te akangaropoina e te akakore i te tarevake, kare mei te mea e kare tatou e manata ana i te reira, me kore te āriki ra tatou. Kare e tau kia akaapaia to tatou tu ara no te au tarevake pouroa, e kare katoa i te mea tau kia akangaropoina atu i te tarevake i rave akakoroia. (Levi. 19:17; Sala. 141:5) I roto i te Ture, tuke tuke te tu o te ara, e kino atu tetai i tetai, mei tera katoa rai i roto i te akanoonooanga Kerititiano.—1 Ioa. 5:16, 17.

¹⁴ Kua akataka mai a Iesu i te mataara no te akaau i te au manamanata kino tei tupu i rotopu i tetai nga Kerititiano. Akara ra i te au takainga tana i akanoo: “E kia takinga-kino to taeake ia koe, [1] e aere e akakite atu i tana apa korua anake ua; e kia akarongo mai aia ra, kua rauka ïa to taeake ia koe. Kare ra aia i akarongo ia koe, [2] arataki atu i tetai e kia toko rua ake, kia taka tikai te au tuatua katoa i te vaa o nga kite toko rua e toko toru ra. E kia kore aia e akarongo ia raua, [3] e akakite atu ki te ekalesia: e kia kore aia e akarongo i te ekalesia ra, kia riro atu aia mei te etene ra e te telona.”—Mata. 18:15-17.

¹⁵ No runga i te akatutuanga ta Iesu i oronga i muri mai i roto ia Mataio 18:23-35, te akaraanga, ko te ara e tuatuaia ra i roto ia Mataio 18:15-17, no runga te reira i te au mea e ō maira te moni, te enua e te apinga, mei te kaiou moni kare i tutakiia e te keikeia. E penei e tapepe pikikaa te ara tei raveia, te ka taviivii i te ingoa o tetai tangata.

¹⁶ Me e kite toou i te akapapu e kua rave tetai taeake i tetai ara kia koe, eiaa e rapurapu i te pati ki te aronga pakari kia aravei atu i tera taeake. Mei ta Iesu i apii mai, e na mua i te tuatua ki te tangata tei rave i te apa kia koe. Tauta kia akaau i rotopu ia korua ua, eiaa e akaō mai i tetai ke. E akamaara e kare a Iesu i karanga ana e e ‘aere e tai ua taime i te akakite i tana apa.’ No reira, me kare rai aia e āriki e kua apa aia e kare e pati mai kia akakoreia tana apa, penei e mea meitaki kia tiaki a tetai taime i muri mai ka aravei akaou ei iaia. Me ka rauka i te akaau na roto i teia mataara, ka mareka roa tera tangata me kare koe i puka aere ana i tona apa, me kore i taviivii i tona ingoa i roto i te putuputuanga. Tera i reira “kua rauka ïa to taeake ia koe.”

¹⁷ Me ka āriki te tangata tei ara e kua apa aia, ka umuumu aia kia akakoreia tana ara e ka tauta kia akatikatika i te tarevake, kua rava rai i reira. Noatu e kino te ara tei raveia, ka rauka ua i te akaau i teia tu apa i rotopu i tetai nga tangata.

¹⁸ Me kare rai e rauka ia koe te akaariu mai i to taeake i te akakite atu i tona apa i rotopu ia “korua anake ua,” ka rave koe i ta Iesu i akakite kia “arataki atu i tetai e kia toko rua ake,” kia tuatua akaou ki to taeake. Te aronga taau ka apai, to ratou akakoroanga kia akaariu mai i to taeake. Meitaki atu kia apai i te aronga tei kite mata i te tarevake me kare ra, penei ka pati koe e tai me kore e rua nga taeake ei kite i roto i te uriurianga ka raveia. Penei kua mārama ratou i teia tu manamanata e ka rauka i te akapapu mai e me e tarevake tikai tei raveia. Te au tangata pakari ka ikiia ei kite mata, kare ratou e komono ra i te putuputuanga, no te mea kare na te pupu aronga pakari i iki ia ratou kia rave i te reira.

¹⁹ Me kare i au te manamanata noatu taau tautaanga—kua tuatua koe kiaia anake ua, kua apai tetai nga taeake i te aravei iaia—e te manako ra koe e ka anoanoia rai kia akatikatika i teia manamanata, e akakite ki te au akaaere o te putuputuanga. E akamaara e ko to ratou akakoroanga, kia akatupu i te au e te tu tiamā o te putuputuanga. I te mea kua aravei koe i te aronga pakari, e mea tau kia vaoʼo atu ki roto i to ratou rima, e kia irinaki ki roto ia Iehova. Auraka rava koe e tuku i te tu o tetai ua atu taeake kia akaturori ia koe me kore kia akangere ia koe i toou mataora i te tavini anga ia Iehova.—Sala. 119:165.

²⁰ Na te au tiaki e kimikimi e eaa tikai tei tupu. Me papu mai e kua rave rai tera tangata i tetai ara kino kia koe e kare e inangaro i te tataraara e te akaau, penei e mea tau kia akaatea tetai kumiti o te au akaaere i te tangata ara mei roto i te putuputuanga. Na teia mataara ka paruruia te anana e ka vai rai te tu tiamā o te putuputuanga.—Mata. 18:17.

AKONO I TE AU TAREVAKE KINO

²¹ Tetai au apa kino mei te moeaana, akaturi, peu totoma, akakino i te Atua, akaruke i te tuatua mou, akamori itoro, e te au ara kino ke mei te reira te tu, kare e rava ua te akakore anga ara a te tangata tei raveia te ara kiaia, e maata atu tei anoanoia. (1 Kori. 6:9, 10; Gala. 5:19-21) No te mea kua taviiviiia te tu tiamā o te akamorianga e te turanga mā o te putuputuanga, ka anoanoia kia ripoti i tera tu ara kino ki te aronga pakari, na ratou e akono. (1 Kori. 5:6; Iako. 5:14, 15) Penei ka aravei mai tetai au tangata i te aronga pakari i te aaki i ta ratou uaorai ara me kore i te ripoti mai i ta ratou i kite no runga i te angaanga tarevake a etai ke. (Levi. 5:1; Iako. 5:16) Noatu e eaa te tu i akarongo ei te aronga pakari i te ripoti no te au ara kino a tetai Kerititiano kua papetitoia, ka raveia tetai kimikimianga e na tetai nga tangata pakari e rave i te reira. Me papu mai e e tika rai te ripoti, e e kite tetai i te akapapu e kua raveia tetai ara kino, ka iki te pupu aronga pakari i tetai kumiti tukuanga tika, mei te tokotoru aronga pakari, kia akono i teia manamanata.

²² E tu matakite to te aronga pakari me akono i te anana i te paruru anga ia ratou mei tetai ua atu turanga te ka takino i to ratou akarongo. Tauta katoa ratou i te taangaanga i te Tuatua a te Atua ma te karape, ei ako i tetai ua atu tei tarevake e kia akamatutu akaou i to ratou akarongo. (Iuda 21-23) Te rotai ra teia ki ta te apotetoro ko Paulo i akakite kia Timoteo i te na ko anga e: “Te ako ua atu nei au ia koe ki mua i te aroaro o te Atua, e to te Atu ra ia Iesu Mesia, ko te akava i te ora ra, e i tei mate . . . e akakite ua i te apa, e ako atu, e akamaroiroi atu, ma te akakoromaki maata e te apii marie anga atu.” (2 Timo. 4:1, 2) Penei e maata te taime ka pou i te rave i teia, inara ko teia tetai tuanga o te angaanga a te aronga pakari. Rekareka tikai te putuputuanga i ta ratou angaanga maroiroi, e te manako maira e kua tau rai ratou kia akangateiteiia.—1 Timo. 5:17.

²³ I roto i te au turanga ravarai tei akapapuia mai tetai ara, ko te akakoroanga maata o te au akaaere, kia akamatutu akaou i te turanga akarongo o te tangata tei apa. Me kua tataraara tikai aia e ka rauka ia ratou te tauturu iaia, me ako muna ua ratou iaia me kore i mua i te katoatoa tei kite i tona manamanata, ka riro tera ei apii iaia e ei tuku i te tu mataku akangateitei i te Atua ki roto i te aronga e akara maira. (2 Samu. 12:13; 1 Timo. 5:20) Pouroa te au turanga e ō maira te tu akono kore i te au kaveinga a Iehova, ka tukuia tetai au arairaianga. Ka tauturuia te tangata tei ara kia akatika i tona arataa mei reira e aere ua atu. (Ebe. 12:13) I te tuatau tau, ka akaateaia te arairaianga me matutu akaou te akarongo o te tangata tei ara.

TUATUA AKAKITE NO TEI AKAAPAIA

²⁴ Me papu i te kumiti tukuanga tika e kua tataraara tetai tangata, kare e kore e ka kite te putuputuanga, ka kite te tangata, me kore ka anoanoia kia akamatakite i te putuputuanga no runga i tera tangata tei rave i te ara, ka orongaia tetai tuatua akakite i roto te Uipaanga Oraanga e te Angaanga Orometua. Ko teia te ka tatauia: “Kua akoia a [te ingoa o te tangata].”

TUKUANGA TIKA KIA AKAATEAIA KI VAO

²⁵ I tetai au turanga, kua riro te au peu kino a te tangata tei ara ei mea matau nana i te rave, e kare rai aia e inangaro i te āriki i te ako. Penei kare aia e akaari mai ana i te tu tataraara i te taime e akoia ra aia. (Anga. 26:20) Eaa i reira te ka raveia? No tera turanga, ka anoanoia kia akaateaia tera tangata tataraara kore mei roto i te putuputuanga, kia vai mā ua te iti tangata o Iehova. Ka riro te reira ei paruru i te turanga tiamā, e te ingoa meitaki o te putuputuanga. (Deu. 21:20, 21; 22:23, 24) Tona akarongo anga no runga i te peu viivii a tetai taeake i roto i te putuputuanga i Korinetia, kua ako atu a Paulo i te aronga pakari kia “tuku atu kia Satani taua tangata ra, . . . kia ora te vaerua [o te putuputuanga] i te rā o te Atu ra o Iesu.” (1 Kori. 5:5, 11-13) Kua akakite katoa a Paulo no runga i tetai aronga tei akaateaia, i te anere mataiti mua no te meameaau i te tuatua mou.—1 Timo. 1:20.

²⁶ Me tukuia te tika e ka akaateaia te tangata tataraara kore, kia akakite te kumiti tukuanga tika i ta ratou tika ki tera tangata, ma te akataka meitaki atu mei roto i te Tuatua a te Atua i te tumu ka akaateaia ai aia. Me akakite i ta ratou tukuanga tika, e akamārama kiaia e me te irinaki ra aia e kua tarevake te tukuanga tika a te kumiti, e ka inangaro aia kia akarongo akaouia te reira, kia tata mai aia i tetai reta, ma te akataka tika mai i te tumu i inangaro ei aia kia akara akaouia te reira. Mei te taime mai i akakiteia ai kiaia, ka orongaia atu e itu rā nona kia rave i te reira. Me ka tata aia i tetai reta, ka akakite te pupu aronga pakari ki te akaaere kotinga, ka iki aia i reira i tetai au tangata pakari tukatau ei kumiti ke mai, i te akarongo akaou i tona manamanata. Ka tauta pakari ratou kia akarongo akaouia teia patianga i roto i te okotai epetoma, i muri ake i te tae mai anga tana reta. Tera i reira, a tetai rā ka tukuia atu te tuatua akakite e ka akaateaia tetai tangata. Teia taime ra, kare te tangata tei rave i te ara e tikaia kia paupau e kia rave pure i roto i te au uipaanga, e tetai atu au angaanga i roto i te akamorianga.

²⁷ No te aroa takinga meitaki i te tangata tei ara, kua orongaia te tikaanga kia akarongo akaouia tona manamanata. No reira, me akakoro rai taua tangata eiaa kia tae mai, noatu te au tautaanga kia tuatua atu kiaia, ka akakiteia rai ki te katoatoa e kua akaateaia aia.

²⁸ Me kare te tangata tei ara e inangaro kia akarongo akaouia tona manamanata, ka akamārama te kumiti tukuanga tika kiaia i te puapinga kia tataraara, e eaa tana ka rave kia akaoki akaouia mai aia ki roto i te putuputuanga. E tu takinga meitaki teia te ka tauturu iaia, e kia raveia teia i roto i te irinakianga e ka taui aia i tona au tu, e i tetai tuatau ka tau aia kia oki akaou mai ki te akaaerenga o Iehova.—2 Kori. 2:6, 7.

TUATUA AKAKITE ME AKAATEAIA TETAI

²⁹ Me kua tau kia akaateaia tetai tangata rave ara kare e tataraara, ka orongaia tetai tuatua akakite ei akapapu e: “Kare a [te ingoa o te tangata] e kapiki akaouia e, e Kite no Iehova.” Ka akamatakite teia i te au taeake tiratiratu i roto i te putuputuanga eiaa e kapiti akaou atu ki tera tangata.—1 Kori. 5:11.

AKATAKAKE MAI

³⁰ Ko te tuatua “akatakake mai,” te akataka maira i te ikianga ta tetai taeake papetitoia o te putuputuanga i rave, i te akakore takiri i tona irinakianga Kerititiano, na te akakite anga e kare aia e inangaro kia kapiki akaouia me kore kia karangaia e e Kite no Iehova. Me kore ka akaruke aia i tona turanga i roto i te putuputuanga Kerititiano e ka piri atu ki tetai akaaerenga a te tangata e patoi tika ra i te au apiianga a te Pipiria, e no reira ka akava a Iehova ia ratou.—Isa. 2:4; Apo. 19:17-21.

³¹ No runga i te aronga tei akaruke i te akarongo i tona tuatau, kua tata te apotetoro ko Ioane e: “Aere atura ratou mei roto atu ia tatou nei, kare ra ratou i to tatou; naringa oki ratou no tatou ra, kua noo ra ïa ki o tatou nei: aere atura ra ratou, kia kitea meitakiia ratou e, kare ratou katoa i to tatou.”—1 Ioa. 2:19.

³² Me akatakake tetai tangata iaia uaorai, tera i reira e tuke takiri tona turanga i mua ia Iehova mei to tetai Kerititiano paruparu te akarongo kare e piri akaou ana ki roto i te angaanga orometua. Penei ka paruparu te akarongo o tetai no te mea kare aia e apii putuputu ana i te Tuatua a te Atua. Me kore ra penei te na roto ra aia i tetai au turanga ngatā e penei no te patoianga, kare aia e maroiroi akaou ana i te tavini ia Iehova. Ka oronga ua rai te aronga pakari e etai atu i roto i te putuputuanga i te tauturu tei anoanoia ei akamatutu i te akarongo o tera taeake paruparu.—Roma 15:1; 1 Tesa. 5:14; Ebe. 12:12.

³³ I tetai tua, me ka iki tetai taeake Kerititiano i te akatakake mai iaia, ka orongaia tetai tuatua akakite poto kia kite te putuputuanga e: “Kare a [te ingoa o te tangata] e kapiki akaouia e Kite no Iehova.” Kua aiteite rai aia ki tetai tangata tei akaateaia ki vao, kare tatou e piri kiaia.

ĀRIKI AKAOUIA

³⁴ Tetai tangata tei akaateaia me kore tei akatakake iaia mei roto i te putuputuanga, ka āriki akaouia aia me akaari tika mai aia e kua tataraara aia, e i te au tuatau tei aereia mai, kua akaari mai aia e kua akaruke aia i tona arataa kino. Akaari katoa mai aia i tona inangaro kia akamou i tetai pirianga meitaki kia Iehova. Kia matakite te aronga pakari, kia rava te taime ka orongaia—penei no tetai au marama, e tai mataiti, me kore roa atu, tei runga ua i te turanga—no te tangata kia akapapu mai e kua tataraara tikai aia. Me tukuia mai tetai reta na te pupu aronga pakari i te pati kia āriki akaouia tetai tangata, ka tuatua atu te kumiti āriki mai ki taua tangata ra. Ka akara meitaki te kumiti e me te akaari ra aia i te tu “tataraara” no tana i rave, ka tuku ei ta ratou tika me ka āriki akaou iaia ki roto i te putuputuanga i tera taime, e me kare.—Anga. 26:20

³⁵ Me na tetai putuputuanga ke mai i akaatea i te tangata e pati maira kia āriki akaouia aia, ka aravei te kumiti āriki akaou o tona putuputuanga ou iaia, kia akamanako i tana patianga. Me irinaki te kumiti āriki akaou e kua tau aia ki āriki akaouia mai, ka tukuia ta ratou tamanako anga ki te pupu aronga pakari o te putuputuanga tei akaatea i taua tangata ra. Ka angaanga kapiti nga kumiti e rua i te akapapu e ko te au mea pouroa ta ratou i kite e tei akakiteia kia ratou, e tika anake te reira, kia rauka tetai tukuanga tika tau. Inara ko te tika kia āriki akaouia te tangata tei akaateaia, na te kumiti āriki akaou mei roto i putuputuanga mua te reira e rave.

TUATUA AKAKITE KIA ĀRIKI AKAOUIA

³⁶ Me papu i te kumiti āriki akaou e kua tataraara tikai te tangata tei akaateaia me kore tei akatakakeia mai e kua tau aia kia āriki akaouia, ka orongaia tetai tuatua akakite i roto i te putuputuanga i akaateaia ai aia. Mei tei roto taua tangata ra i tetai putuputuanga ke mai, ka oronga katoaia te tuatua akakite i reira. E karanga ua e: “Kua ariki akaouia a [te ingoa o te tangata] ei Kite no Iehova.”

AU TURANGA E Ō MAIRA TE TAMARIKI KUA PAPETITOIA

³⁷ Kia akakiteia ki te aronga pakari te tarevake a tetai tamaiti tei papetitoia. Me akara te aronga pakari i tetai au ara kino e ō maira tetai tamaiti, e mea meitaki kia aere mai rai te nga metua o te tamaiti. Kia taokotai raua ki te kumiti tukuanga tika, eiaa e paruru i te tamaiti kia kore e akoia. Mei te aronga mamaata rai tei rave i te ara, ka tauta te kumiti tukuanga tika i te ako e i te akaariu mai i te tangata ara. Inara, me kare rai te tamaiti e tataraara, ka akaateaia aia ki vao.

ME ARA TETAI PAPURUTIA KARE I PAPETITOIA

³⁸ Eaa te ka tupu ki tetai papuritia kare i papetitoia me rave aia i tetai angaanga tarevake? I te mea kare ratou i papetitoia ei Au Kite, kare ratou e akaateaia. Penei kare ratou i mārama tikai i te au turanga o te Pipiria, e penei na te ako marie atu e tauturu ia ratou kia ‘akatika i te ara o to ratou vaevae.’—Ebe. 12:13.

³⁹ Me kare tetai papuritia kare i papetitoia e tataraara no tana ara, noatu te tautaanga a te nga tangata pakari i te tauturu iaia, kia akakiteia ki te putuputuanga. Ka raveia tetai tuatua akakite poto e: “Ko [te ingoa o te tangata] kare aia e āriki akaouia ei papuritia kare i papetitoia.” Teianei ka akariro te putuputuanga iaia mei tetai tangata ua o teianei ao. Noatu kare aia i akaateaia, ka matakite rai te au taeake eiaa kia piri atu kiaia. (1 Kori. 15:33) Kare e āriki akaouia tana ripoti.

⁴⁰ Te au taime ka aereia, penei ka inangaro te papuritia kare i papetitoia e tei akaateaia, kia riro akaou ei papuritia. I roto i tera turanga, ka aravei e rua nga tangata pakari iaia i te akapapu e mei teaa te tu o tona turanga i roto i te akarongo. Me ka tau rai aia kia āriki akaouia, ka orongaia tetai tuatua akakite e: “Kua āriki akaouia a [te ingoa o te tangata] ei papuritia kare i papetitoia.”

AKAMEITAKI MAI A IEHOVA I TE AKAMORIANGA AU E TE MĀ

⁴¹ Te rekareka nei te katoatoa tei piri mai ki to Iehova putuputuanga i teia tuatau, i te au akameitakianga maata ta Iehova e oronga ua mai nei no tona iti tangata. Ruperupe te tupu anga o to tatou turanga akarongo no te mea e maata te vai ora o te tuatua mou e rauka nei ia tatou. Te paruru katoa nei a Iehova ia tatou na roto i Tana akanoonooanga Patireia i raro i te akatereanga a Iesu Mesia. (Sala. 23; Isa. 32:1, 2) Ka riro to tatou parataito pae vaerua i teia tuatau kino ei akapuanga tinamou no tatou.

⁴² Me akono marie tatou i te turanga au e te mā o te putuputuanga, ka kakā ua atu rai to tatou mārama no te tuatua mou o te Patireia. (Mata. 5:16; Iako. 3:18) Rekareka tatou i ta Iehova akameitakianga i te mea e te kite nei te manganui no runga Iaia, e te tavini kapiti nei e tatou i te rave anga i Tona anoano.