Au Uianga a te Aronga Tatau

Kua karanga a Iesu e: “Na kotou e akakore i ta ratou ara ra, kua akakoreia ïa; na kotou oki e vaio i ta ratou ara ra, kua vaioia ïa.” Ko te aiteanga ainei o teia au tuatua e ka rauka i te au Kerititiano i te akakore i te au ara?

Kare e tumu Tuatua Tapu no te taopenga i te au Kerititiano ua nei, me kore te aronga pakari akataoongaia i roto i te au putuputuanga, e e mana taoonga tu-Atua to ratou no te akakore i te au ara. Inara, ta Iesu i tuatua ki tana au pipi ia Ioane 20:23, tei taikuia i runga ake nei, te akakite ra e kua oronga te Atua i te au mana taka ke ki te au apotetoro no teia. Penei ta Iesu tuatua anga i reira te akakite ra i tana i tuatua ia Mataio 18:18 no runga i te au tuku anga tuatua i te rangi ra.

Ka rauka i te au Kerititiano i te akakore i tetai au apa, te aru anga i te ako anga a te apotetoro ko Paulo tei tataia i roto ia Ephesia 4:32: “Kia takinga-meitaki kotou ia kotou uaorai, ma te ngakau maru aroa ua ra, ma te akakore oki i te ara tetai e tetai, mei ta te Atua i akakore mai i ta kotou i te Mesia ra.” Te tuatua ra a Paulo i konei no runga i te au manamanata uaorai i rotopu i te au Kerititiano, mei te tuatua puapinga kore ra. E tau kia tauta ratou i te akatikatika i te au mea, te akakore anga i tetai e tetai. Ka akamaara ana i te au tuatua a Iesu: “E teianei, kia apai koe i taau apinga oronga ua ki te atarau, e kua manako iora koe i reira e, e ara ta to taeake ia koe na: Vaio atu i to apinga i mua i te atarau, e akamata i te aere e ongi i to taeake, ka aere ei ka apai i taau apinga.”​—Mataio 5:23, 24; 1 Petero 4:8.

Inara, te akakite maira te aiteanga tuatua a Ioane 20:23 e te tuatua ra a Iesu no runga i te au ara pakari atu, mei tei akakiteia i tana i tuatua maata atu ki teia aronga akarongorongo tikai. Ka akara ana tatou e no teaa ra.

I te ra o tona akatu angaia mai, kua mama a Iesu ki te au pipi i roto i tetai pia rokaia i Ierusalema. Te karanga ra te papaanga e: “Kua tuatua akaou mairā Iesu kia ratou, Kia ora na kotou: mei te Metua oki i tono mai iaku nei, e tono katoa oki au ia kotou. I akapera aia, e kua akapuangi maira i te aʼo ki runga ia ratou, e kua tuatua maira, Ka āriki mai na i te Vaerua Tapu. Na kotou e akakore i ta ratou ara ra, kua akakoreia ïa; na kotou oki e vaio i ta ratou ara ra, kua vaioia ïa.”​—Ioane 20:21-23.

Papu e, te au pipi tei taikuia ko te au apotetoro tikai tei akono meitaki ra. (Akaaite i te Ioa 20 irava 24.) Na te akapuangi anga ki rungao ia ratou i te na ko anga, “Ka āriki mai na i te Vaerua Tapu,” ei akatutu anga kua oronga a Iesu i te akakite anga kia ratou e kare e roa ka riringiia te vaerua tapu ki rungao ia ratou. Kua tuatua a Iesu e ka rauka ia ratou te mana taoonga no te akakore i te au ara. Ma te tau, e piri vaitata tana au aite anga tuatua, tei arataki ra tetai ki tetai.

E rima ngauru au ra mei tona tuakaouanga, i te ra Penetekote, kua riringi a Iesu i te vaerua tapu. Eaa ta te reira i akatupu? Tei tupu, te aronga tei rauka ra te vaerua kua anau akaouia ratou ei au tamariki vaerua na te Atua ma te manakonakoanga ei au tutara tauturu ma Karaiti i te rangi ra. (Ioane 3:3-5; Roma 8:15-17; 2 Korinetia 1:22) Inara e maata atu ta te reira vaerua i rave. Kua rauka ia etai ia ratou te au mana temeio. Mei te reira ra ka rauka i etai ia ratou i te tuatua i te au reo ke ke kare ratou i kite ana. Ka rauka i tetai atu i te totou. Inara ka rauka i tetai atu i te rapakau i te maki me kore te akatu mai i tei mate kia ora.​—1 Korinetia 12:4-11.

Mei te mea kua tou ta Iesu au tuatua ia Ioane 20:22 ki teia riringianga i te vaerua tapu ki rungao i te au pipi, te akara anga ko tana au tuatua piri vaitata no te akakoreanga i te au ara tona aite anga kua oronga tu-Atuaia ki te au apotetoro na roto i te angaanga anga o te vaerua tetai mana taoonga umere no te akakore me kore te vaio i te au ara.​—E akara The Watchtower, Mati 1, 1949, kapi 78.

Kare te Puka Tapu e oronga mai ana i tetai papaanga katoa o te au taime ravarai i taangaanga ei te au apotetoro i teia tu mana taoonga, inara kare katoa te reira e papa ana i te au tupu anga ravarai to ratou taangaanga anga i tetai apinga aroa temeio no te tuatua i te au reo ke, te totou, me kore te rapakau.​—2 Korinetia 12:12; Galatia 3:5; Ebera 2:4.

Tetai atu tu tei akao mai i te mana taoonga apotetoro no te akakore me kore te vaio i te au ara kua o mai a Anania raua ko Saphira, tei pikikaa ra i te vaerua. Ko Petero, tei rongo ia Iesu i te tuatua anga i ta tatou ka tatau ia Ioane 20:22, 23, kua akamaeu aia ia Anania raua ko Saphira. Kua tuatua a Petero na mua kia Anania, tei mate atura i reira rai. I to Saphira aere anga mai ki roto kua tamou rai aia i te pikikaa, kua akakite a Petero i tona akava anga. Kare a Petero i akakore ana i tana ara inara kua karanga aia: “I na, tei te ngutupa mai nei te vaevae o te aronga i tanu i to tane na, e na ratou katoa koe e apai ki vao.” Kua mate katoa aia i reira rai.​—Angaanga 5:1-11.

I teia akaraanga kua taangaanga te apotetoro Petero i te mana taoonga takake no te akakite i tetai vaio anga tikai o te ara, tetai kite anga temeio e kare te Atua e akakore mai i te ara a Anania raua ko Saphira. Kua rauka katoa i te au apotetoro te mana kite anga oonu i te au turanga te ngai i papu ei ia ratou e kua akakoreia te au ara i tau ki te atinga o Karaiti. No reira i raukaʼi i taua au apotetoro akamanaia ma te vaerua kia akakite i te akakore anga me kore te vaio anga i te au ara.a

Kare te aite anga e pouroa te aronga pakari akatainuia i te vaerua i te reira tuatau kua rauka ia ratou te mana taoonga temeio. Te kite nei tatou i te reira mei ta te apotetoro Paulo i tuatua no runga i te tangata tei akaateaia ki vao i te putuputuanga Korinetia. Kare a Paulo i karanga ana, ‘Ka akakore au i ta tera tangata au ara’ me kore ra, ‘Kua kite au e kua akakoreia te ara a tera tangata i te rangi, no reira e ariki akaou iaia.’ Mari ra, kua raurau a Paulo i te putuputuanga katoa kia akakore i te ara a teia Kerititiano tei akaokiia mai e e akaari i te aroa kiaia. Kua tuatua katoa a Paulo: “Ko ta kotou e akakore i te ara ra, e akakore katoa oki au.”​—2 Korinetia 2:5-11.

I te akaoki angaia mai te reira tangata ki roto i te putuputuanga, kua rauka i te au taeake e te au tuaine Kerititiano katoatoa i te akakore i te ara te kore anga e akamoupuku i tana i rave ra. Te mea mua, ka tau aia kia tataraara e akaokiia mai ei. Akapeea te reira i te tupu anga?

Te vaira te au ara pakari tei anoanoia te aronga pakari kia akatikatika, mei te keia, te pikikaa, me kore te ainga tau kore pakari. Ka tauta ratou i te akatikatika e te ako i teia aronga rave tarevake, te akakeuanga ia ratou kia tataraara. Inara me rave tataraara kore ua tetai i te ara kino ra, ka taangaanga teia aronga pakari i te arataki anga tu-Atua no te akaatea i tei rave ra i te tarevake. (1 Korinetia 5:1-5, 11-13) Ko ta Iesu i tuatua ia Ioane 20:23 kare te reira e tau no teia au turanga. Kare o teia aronga pakari apinga aroa temeio o te vaerua, mei te rauka anga i te rapakau i te aronga maki me kore te akatu i tei mate ra; kua akono taua au apinga aroa i to ratou akakoro anga i te anere mataiti mua e kua ope atu rai. (1 Korinetia 13:8-10) Pera katoa, te aronga pakari o teia tuatau kare o ratou mana taoonga tu-Atua no te akakore i te tarevake pakari te akakiteanga e kua ma tei ara pakari ra i roto i te mata o Iehova. Teia tu akakore anga ara me ka tau i te atinga oko, e ko Iehova anake ua te ka akakore i te ara i tau ki te reira tumu.​—Salamo 32:5; Mataio 6:9, 12; 1 Ioane 1:9.

Mei te tu o te tangata i Korinetia taito, me kare tetai tangata ara pakari e tataraara, ka akaateaia aia ki vao. Me ka tataraara ra aia a muri ake e kua akaari i te au angaanga tei tau ra i te tataraara, ka rauka te akakore anga tu-Atua. (Angaanga 26:20) I teia turanga nei, ka riro te au Tuatua Tapu ei tumu na te aronga pakari i te irinaki e kua akakore a Iehova i te ara a te tangata tei rave ra i te tarevake. I reira, me akaokiia mai te tangata ra, ka rauka i te aronga pakari i te tauturu iaia i te pae vaerua kia noo tamou i roto i te akarongo. Ka rauka i tetai pae atu i roto i te putuputuanga i te akakore i te ara na te tu katoa te akakore anga te au Kerititiano Korinetia i te ara a te tangata tei akaateaia ki vao tei akaokiia mai i te reira tuatau ra.

I te akono anga i te au mea na teia tu, kare te aronga pakari e maani ua i ta ratou uaorai au turanga no te akava anga. Ka taangaanga ratou i te au kaveinga Puka Tapu e ka aru vaitata i te au arataki anga Tuatua Tapu ta Iehova i akanoo ra. No reira, ta te aronga pakari akakoreanga me kare te kore anga e akakore i te ara te aite ra ki te au tuatua a Iesu ia Mataio 18:18: “Koia mou taku e karanga atu kia kotou na, Ta kotou e akamou i raro nei, e akamou katoaia ïa i runga i te [“rangi,” NW]; e ta kotou e tuku i raro nei, e tuku katoaia ïa i te [“rangi,” NW].” Ka riro ta ratou au angaanga ei akaata ua i ta Iehova akara anga i te au mea mei tei akakiteia i roto i te Puka Tapu.

No reira, ta Iesu i tuatua, tei papaia ia Ioane 20:23, kare ia i rotai kore ki te katoa anga o te au Tuatua Tapu, inara te akakite maira te reira e kua rauka i te au apotetoro tetai mana taoonga takake no te akakore i te ara, kia tau ki ta ratou tuanga anganga takake i te akamata anga i te putuputuanga Kerititiano.

[Tataanga Rikiriki i Raro]