Arikianga i te Au Akaputuputuanga Kerititiano

“E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga.”​—EBERA 10:24, 25.

1, 2. (a) Eaa ra i riro ei ei meitaki kia aere atu ki tetai akaputuputuanga o te au Kerititiano mou ra? (e) Na roto i teea tu i vai mai ei a Iesu i te au akaputuputuanga o tana au pipi ra?

MEI teaa ra tetai rave anga meitaki kia aere atu ki tetai akaputuputuanga Kerititiano, noatu me e tokoiti ua i te tai ngauru me kare ko etai au tauatini aronga akamori ia Iehova, no te mea kua tuatua a Iesu: “I te ngai e putuputu ei e toko rua e toko toru i toku nei ingoa, tei rotopu katoa au ia ratou i reira”! (Mataio 18:20) E tika, i ta Iesu ra taputou anga, te uriuri manako ra aia i te au tumu no te akava anga tei tau ra kia akono tikaia e te aronga te rave ra i te arataki anga i roto i te putuputuanga. (Mataio 18:15-19) Inara ka rauka katoa ainei ta Iesu au tuatua ra kia akapiriia atu i te kaveinga ki te au akaputuputuanga Kerititiano katoatoa te akatueraia ra e te akaotiia ra ma te pure i roto i tona ingoa? Ae. Kia maara e, i ta Iesu ra akauenga i tana au pipi kia rave i te angaanga akariro au tangata ei pipi, kua taputou aia: “I na, tei vaitata ua ra au ia kotou, e tae ua atu ki te openga o teianei ao.”​—Mataio 28:20.

² Kare e ekoko anga e ko te Upoko o te putuputuanga Kerititiano, koia te Atu ko Iesu Karaiti, te manako maata maira i te au akaputuputuanga katoatoa o tana au pipi tiratiratu ra. Pera katoa oki, ka papu ia tatou e tei reira aia ia ratou ra na roto i te vaerua tapu o te Atua ra. (Angaanga 2:33; Apokalupo 5:6) Te manako katoa maira oki te Atua ko Iehova i ta tatou akaputuputu anga. Ko te akakoro anga maata no taua au uipaanga ra no te akapaapaa anga kia apaiia atu ki te Atua ra “i roto i te au uipa anga ra.” (Salamo 26:12) To tatou aereanga ki te au uipaanga putuputuanga ko tetai akakite anga te reira i to tatou aroa nona ra.

3. No teea au tumu puapinga maata i ariki ei tatou i te au akaputuputuanga Kerititiano ra?

³ Te vaira etai atu tumu meitaki no tatou kia ariki i te au akaputuputuanga Kerititiano ra. I mua ake i tona ra akaruke anga i te enua nei, kua akataoonga a Iesu Karaiti i tana au pipi akatainuia kia akono ei tetai “tavini akono meitaki e te pakari” i te orongaanga i te kai vaerua i te tuatau tau ki te ngutuare o te akarongo ra. (Mataio 24:45) Ko tetai raveanga puapinga maata i taua angaianga i te pae vaerua ra na roto i te au uipaanga putuputuanga e pera katoa oki i te au akaputuputuanga maata atu​—te au akaputuputuanga e te au uruoaanga ra. Na te Atu na Iesu Karaiti e arataki i teianei tavini akono meitaki kia oronga i te akakite anga puapinga maata i taua au akaputuputuanga ra no te katoatoa te anoano ra kia ora atu i te openga o teianei akatereanga kino e kia rauka te ora anga ki roto i to te Atua ra ao ou no te tuatua tika.

4. Eaa te “peu” kino te taikuia ra i te Pipiria, e eaa te ka tauturu ia tatou kia kopae ke i te reira?

⁴ No reira, kare e tau no tetai Kerititiano kia akatupu i tetai peu kino tei akakiteia maira e te apotetoro ko Paulo, tei tata ra: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.” (Ebera 10:24, 25) Na te tamanakoanga i runga i te tu meitaki e te au puapinga no te aereanga ki te au akaputuputuanga Kerititiano ka tauturu mai ia tatou kia turu tiratiratu oki ma te ngakau katoa i taua au akaputuputuanga ra.

Te Au Uipaanga te ka Akamaroiroi Mai

5. (a) Eaa te akatupu anga tau no ta tatou au tuatua i te au uipaanga? (e) Eaa ra i kore ei e tau kia taroaroa tatou i te patianga i te aronga inangaro ra kia aere mai ki te au uipaanga?

⁵ I te mea te pure ra te au Kerititiano no to Iehova vaerua tapu kia akono mai i te au uipaanga Kerititiano ra, ka tau te aronga taki tai i reira kia rave i tona meitaki kia rave angaanga rotai ma taua vaerua ra e “auraka e akariri atu i te Vaerua Tapu o te Atua.” (Ephesia 4:30) I ta te apotetoro ko Paulo ra tataanga i taua au tuatua akauruia ra, te uriuri manako ra aia i te taangaanga tika anga i te tuatua. Ta tatou ka tuatua ka tau kia taangaangaia kia “tupu ei te meitaki tika ra, e meitaki ei te aronga e akarongo ra.” (Ephesia 4:29) E mea puapinga maata teia i te au akaputuputuanga Kerititiano ra. I roto i tana reta ki to Korinetia ra, kua akaketaketa mai a Paulo i te umuumu anga no te au uipaanga kia meitaki, kia apii mai, e kia akamaroiroi oki. (1 Korinetia 14:5, 12, 19, 26, 31) Ka puapingaia te katoatoa i reira i taua au uipaanga ra, kapiti katoa oki te aronga ou i reira, penei ka manako e: “tei rotopu tikai te Atua ia kotou.” (1 Korinetia 14:25) No teia tumu, kare tatou e tau kia taroaroa i te patianga i te aronga ou inangaro ra kia akaputu mai ma tatou katoa, no te mea na te rave anga i te reira ka akaviviki mai i to ratou tupu anga i te pae vaerua.

6. Eaa etai au tumu te ka tauturu kia meitaki tetai uipaanga?

⁶ Te aronga katoatoa tei orongaia ra e tuatua na ratou, e au uiui anga, me kare e au akakitekite anga i tetai uipaanga Kerititiano ka tau kia papu e te meitaki ra ta ratou tuatua e te rotai ra ma te Tuatua tataia a te Atua ra, koia te Pipiria. Kapiti atu ki te tuatua anga tuatua tika, ka tau tatou kia akakite te au manako e te au manako ngakau te rotai ra ma te au tu aroa o te Atua raua ko Karaiti. Me te oronga ra te katoatoa i ta ratou au tuanga no tetai porokarama i te uipaanga ra te manako ra kia akaata mai i ‘te ua o te vaerua o te Atua,’ mei te rekareka, te akakoromaki, e te akarongo, ei reira te katoatoa tei akaputu atura ka papu te manako ngakau meitaki.​—Galatia 5:22, 23.

7. Akapeea e raukaʼi i te aronga tei akaputu katoatoa ra kia tauturu i tetai akaputuputuanga kia meitaki?

⁷ Noatu rai e e tokoiti ua te aronga e tuanga ta ratou i runga i te porokarama i te au uipaanga putuputuanga, ka rauka i te katoatoa te tauturu kia meitaki te akaputuputu anga. E putuputu te va mai ra tetai atianga no te aronga akarongo ra kia pau mai i te au uianga. E au atianga te reira no te akakiteanga i to tatou akarongo. (Roma 10:9) Auraka te reira e taangaangaia ei akatupu i to tatou uaorai au manako, kia akaparau i ta tatou uaorai au ravenga, me kare kia akaapa atu i tetai taeake akarongo ra. Kare ainei te reira e akariri i te vaerua o te Atua? Te au tuke anga ma te au taeake akarongo ra e meitaki atu kia akono poiriia na roto i tetai vaerua no te aroa. Te tuatua ra te Pipiria: “Kia takinga-meitaki kotou ia kotou uaorai, ma te ngakau maru aroa ua ra, ma te akakore oki i te ara tetai e tetai, mei ta te Atua i akakore mai i ta kotou i te Mesia ra.” (Ephesia 4:32) Mei teaa ra tetai tuatau meitaki tikai ta te akaputuputuanga Kerititiano e oronga maira kia tatou kia akono i teianei ako anga meitaki! Kia akatupu i te reira, e manganui te tae vave maira ki te au uipaanga e te noo roa maira i muri akera. Te tauturu katoa ra te reira i te aronga ou te inangaro anga, tei ia ratou ra tetai umuumu anga taka ke kia manako turouia. E no reira e tuanga ta te au Kerititiano akatapuia ra kia rave i te akariroanga i te au uipaanga kia meitaki na ‘te akono marie anga tetai ki tetai e kia akamaroiroi atu kia maata te aroa, e te angaanga memeitaki ra.’

Teateamamao Meitaki

8. (a) Eaa te au atinga meitaki ta etai e rave ra kia akaputu atu ki te au uipaanga? (e) Eaa te akatauanga ta Iehova e akanoo maira ei tetai tiaki mamoe?

⁸ E manga ngoie ua no tetai papaki te aere atu ki te au akaputuputuanga Kerititiano, no etai ra te umuumuia ra tetai atinga rave tamouia. Ei akatauanga, ko tetai metua vaine Kerititiano te angaanga ra ei tauturu i te tutaki i te au apinga anoanoia no tona ngutuare tangata te mea matauia me tae mai aia mei te angaanga mai ki te kainga kua roiroi. I reira ka teateamamao i te kai e ka tauturu oki i tana tamariki kia akapapa no te uipaanga. Ko etai atu Kerititiano penei e mamao te aerenga ki te au uipaanga, me kare te kotingaia ra to ratou maroiroi no te maki me kare no te ruaine. E tika ra, te kite ra te Atua ko Iehova i te turanga o te aronga tataki tai te aere tiratiratu ra ki te uipaanga, mei tetai tiaki mamoe te kite ra i te au mea anoanoia no te au mamoe taki tai i roto i tana anana. ‘Mei te tiaki mamoe ra,’ te tuatua maira te Pipiria, ‘E angai [a Iehova] i tana anana e akaputu aia i te au punua i tona rima, e ei runga ratou i tona umauma kia apai, e e arataki marie aia i te au tinana akangote punua ra.’​—Isaia 40:11.

9, 10. Akapeea ka raukaʼi ia tatou kia maata te puapinga mei te au uipaanga ra?

⁹ Te aronga te tuku atinga maata ra kia raukaʼi te aerenga putuputu ki te au uipaanga penei te kotingaia te taime no ratou no te teateamamao anga i te au tumu apii te ka akamanakoia. Te rave tamouanga i te papaanga epetoma no te tatauanga Pipiria ka akariro i te akaputu anga ki te Apii Orometua Teokaratiki kia tere atu te puapinga. Mei te reira katoa, te teateamamao anga na mua no etai atu uipaanga, mei te Apii Punanga Tiaki ra e te Apii Puka a te Putuputuanga ka akariro i te reira kia maata atu te puapinga. Na te tatauanga i te tumu no te apii i mua akera e na te akamanako anga i etai o te au irava Pipiria tei taikuia ra, ka riro te aronga ma te au turanga maata te taime te akapouia ra no te ngutuare tangata kia papa meitaki atu kia rave i tetai tuanga puapinga i roto i teia au uriuri anga Pipiria meitaki tikai.

¹⁰ Ko etai atu, e meangiti maira te tuatau akapouia no te akono ngutuare, ka rauka ia ratou kia maata atu te taime akapouia no te teateamamao anga no te uipaanga. Ei akatauanga, ka rauka ia ratou te kimikimi anga no runga i te au tuatua tapu tei tataia ra te pene e te irava mari ra kare i tataia te tuatua. E no reira ka rauka i te katoatoa kia teateamamao kia rave maata i te au uipaanga e kia apai i te tuanga ei meitaki no te putuputuanga na ta ratou au tuatua e te au pauanga. Na te teateamamao meitaki, ka rauka i te aronga pakari e te au tavini orometua kia akanoo i tetai akatauanga meitaki i te orongaanga i te au pauanga tano, e te poto ua. No te akangateitei anga i ta Iehova ra au oronga anga, ka kopae ke te aronga tei akaputu maira i etai ua atu ravenga te ka akaaere ke i te manako i te tuatau te raveia ra te au uipaanga.​—1 Petero 5:3.

11. Eaa ra i umuumuiaʼi te ako anga ia koe uaorai kia teateamamao no te au uipaanga?

¹¹ Te au angaanga e te au tamataora anga kare ra e puapinga maata ki to tatou ora anga i te pae vaerua penei ka maata rava te akapou anga i to tatou taime. Me koia ia, ka tau tatou kia akara matatio ia tatou uaorai e “auraka [tatou] ei manako kore” no runga i te taangaanga i to tatou tuatau. (Ephesia 5:17) Ka tau kia akakoro tatou e “taporoporo marie i te tuatau” mei te au angaanga meangiti ua te puapinga kia raukaʼi kia maata atu te taime akapouia i te apii Pipiria e te teateamamao anga no te uipaanga, e pera katoa no te tavini anga Patireia. (Ephesia 5:16) E tika ra, kare teia i te mea ngoie ua e ka umuumuia te ako anga ia koe uaorai. Te aronga ou te akamanako ra i teia te akanoo ra i tetai tango meitaki no te tupu anga i te tuatau ki mua. Kua tata a Paulo ki tona oa ou ra kia Timoteo: “Ka akamanako tikai i teianei au tuatua [ta Paulo i ako atu ia Timoteo]; ko taau ïa e rave auraka e tivata; kia kite te tangata katoa i te tupu anga o toou kite.”​—1 Timoteo 4:15.

Au Akatauanga mei te Tuatua mai a te Atua

12. Eaa te akatauanga meitaki tei akanooia mai na te pamiri o Samuela ra?

¹² E akamanako i te akatauanga meitaki tei akanooia i te ngutuare tangata o Samuela, tei rave putuputu ra i te akanoonoo anga no te akaputuputuanga ma te aronga akamori i te tuatau i vaira te tapenakara o te Atua ra ki Silo. Ko te au tane anake tei umuumuia kia aere atu ki te au akono anga mataiti i te oroa ra. Inara ko te metua o Samuela, ko Elikana, kua rave atu i tana pamiri katoa, “kua aere atura taua tangata ra i te au mataiti katoa ki Silo, mei roto atu i tona oire, e apai i te atinga, e e akamori ia Iehova Sabaota.” (1 Samuela 1:3-5) To Samuela ra oire kainga, ko Ramata-zophima, penei e vaitata ua i te pae tai i Rentis i teianei tuatau i raro ake i “te maunga ra no Epheraima.” (1 Samuela 1:1) E no reira te aerenga ki Silo ka vaitata ia i tetai tere no te 30 kiro mita, ko tetai aerenga akaroiroi ia i taua tuatau ra. Ko teia ta te pamiri a Elikana i rave tiratiratu “i te au mataiti ravarai kia aere [ratou] ki runga i te are o Iehova ra.”​—1 Samuela 1:7.

13. Eaa te akatauanga tei akanooia mai e te au ngati Iuda tiratiratu i te tuatau ia Iesu i te enua nei?

¹³ Kua tupu katoa ake oki a Iesu ei tuanga no tetai ngutuare tangata maata. I te au mataiti ravarai kua aere atu te pamiri mei Nazareta e vaitata i te 100 kiro mita ki te pae tonga kia akaputu atu ki te Oroa Pasa i Ierusalema. E rua nga mataara tei rauka ra ia ratou kia aere. Ko te mataara tika tika atu te aerenga ka eke atu ki roto i te O i Megido e mei reira ka kake atu e vaitata i te 600 mita na roto atu i te tuanga enua Samaria e mei reira atu ki Ierusalema. Ko tetai atu mataara tei matauia ra e meitaki ko ta Iesu ia i aere i tona tere openga ki Ierusalema i te 33 T.N. Kua kapiti teianei i te aereanga ki raro ki te O i Ioridana ki raro ake i te vaito anga o te tai kia itae roa aia “ki te pae i Iudea . . . na tera pae i Ioridana.” (Mareko 10:1) Mei reira mai, “te arataa ki Ierusalema” ko etai 30 kiro mita te mamao, te kapiti ra i tetai kake anga e tere atu i te 1,100 mita. (Mareko 10:32) E putuputu te aere anga te au urupu tiratiratu tei akono i te oroa na taua aerenga ngata ra mei Galilea atu ki Ierusalema. (Luka 2:44) Mei teaa ra tetai akatauanga meitaki no te au tavini o Iehova i te au enua apinganui o teia tuatau nei, e manganui ra to ratou te ka rauka ngoie ua te aere atu ki te au akaputuputu anga Kerititiano ra, e akameitaki atu ki te au tu aere anga no teia tuatau nei!

14, 15. (a) Eaa ta Ana akatauanga i akanoo maira? (e) Eaa ta tatou ka kite mei te au tu manako meitaki akakiteia maira e etai aronga ou te aere maira ki te uipaanga?

¹⁴ Ko tetai atu akatauanga ko Ana vaine takaua e 84 ona mataiti. Te tuatua ra te Pipiria e “kare rava aia i akaruke i te iero.” (Luka 2:37) Pera katoa oki, kua akaari a Ana i te manako aroa no etai ke ra. I tona akaraanga i te pepe ra ia Iesu e te kiteanga e koia te Mesia taputouia ra, eaa tana i rave? Kua akameitaki aia i te Atua e kua “tuatua iora iaia i te aronga katoa i tapapa i te ora i Ierusalema ra.” (Luka 2:38) Mei teaa ra tetai tu manako meitaki, koia tetai akaraanga no te au Kerititiano i teia tuatau nei!

¹⁵ Ae, ko te akaputu anga e te raveanga tuanga i ta tatou au uipaanga ka tau ei mareka anga e, mei ia Ana rai, kare tatou e anoano kia kore tatou i reira. E manganui te aronga ou kare e manako ke atu i te reira. I te aere anga mai mei roto i te poiri ki roto i te marama meitaki a te Atua ra, te anoano ra ratou kia apii i tei rauka katoa ia ratou, e e manganui te akakite ra i te maroiroi maata no te au uipaanga Kerititiano. I tetai pae, ka tika te aronga kua roa ki roto i te tuatua mou kia paruru atu i ‘te vaooanga i to ratou inangaro mua ra.’ (Apokalupo 2:4) Te au manamanata no te maki me kare no etai atu au tu kare ra e rauka i tetai te akatere penei i etai taime ka akakotinga mai i te aere anga ki te au uipaanga. Inara kare tatou e tau kia tuku i te noinoi apinga, te tamataora, me kare te manako kore ua kia akariro ia tatou kia kore e teateamamao, kia paruparu ua, me kare kia kore e aere putuputu ki te uipaanga.​—Luka 8:14.

Te Akatauanga Meitaki Rava

16, 17. (a) Eaa to Iesu ra tu manako i te au akaputuputuanga i te pae vaerua ra? (e) Eaa te peu meitaki te ka tau te au Kerititiano kia tauta i te aru?

¹⁶ Kua akanoo a Iesu i tetai akatauanga meitaki i te akaarianga i tona ariki anga no te au akaputuputuanga i te pae vaerua. I tona ou anga e 12 mataiti, kua akakite aia i tona inangaro no te are o te Atua i Ierusalema ra. Kua ngaro aia i tona nga metua ra inara i te openga kua kitea mai aia te uriuri manako ra i te Tuatua a te Atua ma te aronga orometua i te iero ra. I te pauanga i te manako taitaia o tona nga metua ra, kua ui ngateitei atura Iesu: “Kare korua i kite e, ei roto rai au i te are o taku Metua e tau ei?” (Luka 2:49) Ma te kauraro ua, kua oki atura a Iesu ou ra ma tona nga metua ki Nazareta. I reira kua akaari ua atura aia i tona inangaro no te au uipaanga akamori anga na te aere putuputu anga ki te tunako. No reira i tona akamata anga i tana angaanga orometua, te ripoti ra te Pipiria: “E tae maira aia ki Nazareta i te ngai i pakari ei aia ra; kua tomo maira aia ki roto i te sunago i te rā sabati, tana ïa peu tikai, e kua tu akera ki runga e tatau i te tuatua.” I muri ake i ta Iesu tatau anga e te akataka anga ia Isaia 61:1, 2, kua akamata te aronga akarongo atura kua “umere atura i te tuatua meitaki no roto mai i tona vaa.”​—Luka 4:16, 22.

¹⁷ Te aru ra te au uipaanga Kerititiano i teia akaraanga tumu anga i teia tuatau nei. I muri ake i te akatuera anga i te uipaanga ma tetai imene akapaapaa e tetai pure, ka tatauia te au irava no roto mai i te Pipiria (me kare te au irava tataia i roto i te apii Pipiria ra) e kua akatakaia mai. Tei raro ake te au Kerititiano mou ra i te apai anga kia aru i te peu meitaki a Iesu Karaiti ra. Ko te rave anga te ka akatikaia e to ratou au turanga kia raveia, te kite ra ratou i te mareka anga i te aere putuputu anga ki te au akaputuputuanga Kerititiano ra.

Au Akatauanga i Teia Tuatau Nei

18, 19. Eaa te au akatauanga meitaki ta te au taeake i te au enua meangiti maira te apinga i akanoo no runga i te au uipaanga, te au akaputuputuanga, e te au uruoaanga ra?

¹⁸ I te au tuanga kare i apingaia i te enua nei, e manganui to tatou au taeake e te au tuaine te akanoo ra i te akatauanga meitaki no te ariki anga i te au akaputuputuanga Kerititiano. I Mozambique kua pou i tetai akaaere tapere, ko Orlando, raua ko tana vaine, ko Amélia, e 45 ora te aere anga i etai 90 kiro mita na runga atu i tetai maunga teitei kia tavini atu i tetai akaputuputuanga. I muri ake i reira kua oki akaou mai raua na taua mataara rai kia tavini atu i tetai akaputuputuanga ke ra. Kua ripoti taakaaka ua maira Orlando: “Kua manako ngakau maua e kare a maua apinga i rave i to maua aravei anga ma te au taeake no te Putuputuanga no Bawa maira. Kia uipa mai i te akaputuputuanga e te oki akaou anga ki to ratou au kainga e ono ra te aerenga no etai 400 kiro mita na runga i to ratou vaevae, e i roto ia ratou ra ko tetai taeake e 60 mataiti!”

¹⁹ Peea oki te ariki anga no te au uipaanga putuputuanga no te au epetoma ra? A Kashwashwa Njamba ko tetai tuaine ikoke apikepike ua i roto i tona au 70 mataiti. Te noo ra aia i Kaisososi, ko tetai oire meangiti ua e vaitata i te toru maire mei te Are Uipaanga Patireia i Rundu, i Namibia. E tae ei aia ki te au uipaanga, ka aere aia e takapini e 10 kiro mita na roto i te vao rakau. Kua taia etai no ta ratou au apinga i te reira aerenga, inara te aere ua maira Kashwashwa. Te akonoia ra te maata anga o te au uipaanga i roto i te au reo kare ra aia i kite. No reira akapeea aia e puapingaiaʼi i te akaputu atu anga? “Na te aru anga i te au tuatua tapu,” i na Kashwashwa ei, “Ka tauta au kia kite eaa te tumu o te tuatua ra.” Inara e kite kore aia i te tatau, no reira akapeea aia me aru atu i te au tuatua tapu ra? “Ka akarongo ua atu au i te au tuatua tapu tei mou ngakau ra iaku,” tana i pau. E i roto i te au mataiti, kua akaputu aia e maata te au tuatua tapu ki roto i tona manako. Kia akameitaki mai i tona kite kia taangaanga i te Pipiria, te aere ra aia ki tetai pupu na te putuputuanga i akapapa no te aronga kite kore i te tatau. “Te inangaro ra au kia akaputu atu ki te au uipaanga,” tana i tuatua. “E au apinga ou te vai maira kia apiiia. Te inangaro ra au kia taokotai atu ma te au taeake e te au tuaine. Noatu rai e kare e rauka iaku kia tuatua atu kia ratou katoatoa, te aere maira ratou e aravei mai iaku. E ko te mea puapinga maata katoa oki, te kite ra au e na te aereanga ki te au uipaanga, te akarekareka ra au i te ngakau o Iehova ra.”

20. Eaa ra ka tikai kia kore tatou e akaruke i ta tatou au akaputuputuanga Kerititiano ra?

²⁰ Mei ia Kashwashwa rai, e au mirioni ua atu te aronga akamori ia Iehova takapini te enua nei te akaari ra i te ariki anga meitaki no te au akaputuputuanga Kerititiano. I te aerenga atu to Satani ao ki tona akapouanga, kare e rauka ia tatou kia akaruke i te akaputuputuanga ia tatou uaorai. Kareka ra, kia vai ara ua tatou i te pae vaerua e kia akaari i te ariki anga oonu no te au uipaanga, te au akaputuputuanga, e te au uruoaanga oki. Kare e ka akarekareka anake i to Iehova ra ngakau mari ra ka akapuapinga maata katoa ia tatou e akono ra i te apiianga tu-Atua te ka taki atu ki te ora mutu kore.​—Maseli 27:11; Isaia 48:17, 18; Mareko 13:35-37.

Au Uianga Akamanako Akaou Anga

◻ Eaa ra i riro ei ei rave anga meitaki kia aere ki te au akaputuputuanga Kerititiano ra?

◻ Akapeea e raukaʼi i te aronga katoatoa i te akaputu atu kia tauturu atu i tetai uipaanga kia meitaki mai?

◻ Eaa te akatauanga meitaki roa ta Iesu Karaiti i akanoo ra?

◻ Eaa te apiianga te ka rauka kia kiteia mei te au taeake i te au enua meangiti maira te apinga?

[Pia i te kapi 17]

Te Ariki ra Ratou i te Au Uipaanga Epetoma

E au mirioni ua atu te au tangata te noo ra i te au oire mate ra i te putaua e te rave kino. Noatu ra taua au turanga ra, te akaari ra te au Kerititiano mou i roto ia ratou ra i te ariki anga meitaki no te au aka putuputuanga Kerititiano. Kua ripoti tetai tangata pakari te tavini ra i roto i tetai putuputuanga Soweto i Gauteng, i Aperika Tonga: “I roto i tetai putuputuanga e 60 Au Kite e nga papuritia kare ra i papetitoia, e 70 ki te 80, e tere atu oki i etai taime, te aere maira ki ta matou au uipaanga. Noatu rai e kare e mamao te aerenga o te au taeake e te au tuaine ki te au uipaanga, e kino ra te turanga i teia tuanga o Soweto. Kua ko ia te mokotua o tetai taeake iaia e aere atura ki te uipaanga. E rua nga tuaine tei opukia mai i tetai tauta anga kia keia i ta raua apinga. Inara kare teia i tapu ia ratou i te aere mai anga. I te au Tapati, e tuatau poto ua ta matou no te akamatau i te au imene i muri ake i te akaoti anga te uipaanga na roto i te pure. Kare i raro ake i te 95 patene te noo putuputu mai ana ki muri kia imene i te au imene katoa te ka imeneia i te au uipaanga i te epetoma i muri akera. Na teia e tauturu i te aronga inangaro ou kia matau i te au imene e kia imene katoa oki.”

E au tu ngata ke to te aronga i vao ake i te oire, koia oki te mamao te aerenga ta ratou e aere ana kia tae ki te au uipaanga e toru taime i te epetoma ra. Ko tetai nga tokorua inangaro ra te noo ra e 15 kiro mita mei te Are Uipaanga Patireia i Lobatse, i Botswana. No te mataiti katoa kua topa, kua aere putuputu mai raua ma ta raua nga tamariki e rua ki te au uipaanga. Te ripea tamaka ra te tane ei tauturu i te ngutuare tangata. Te okooko apinga rikiriki ua ra te vaine ei moni tauturu i te pamiri kia raukaʼi ia ratou te tutaki i te aerenga ki te au uipaanga e te oki mai.

I tetai aiai akau kare i roa akenei, i muri ake i te uipaanga ma te akaaere kotinga, kua kite teia pamiri ia ratou uaorai i te ora iva i te po i te ngai tiaki bus kare e mataara no te oki ki te kainga. Kua tapu vave te au bus no te kino o te reva. Kua tapu mai tetai opita akava i roto i tona vani e kua ui atu e teaa ra ratou i reira. I te akarongo anga i to ratou taitaia, kua aroa atura aia ia ratou e kua apai atura ia ratou i taua 15 kiro mita ra te aerenga ki te kainga. Ko te vaine, e papuritia kare ra i papetitoia ake, kua tuatua atu ki tana tane: “E akara ana, me tuku tatou i te au uipaanga na mua, ka tauturu maira Iehova.” I teianei kua akakite te tane i tona inangaro kia riro katoa koia tetai ei tutu aere i te tuatua meitaki ra.

[Tutu i te kapi 18]

Te Au Kite mei teianei aronga i Romania te akanoo maira i tetai akatauanga meitaki i te ariki anga no te au akaputuputuanga Kerititiano ra