Pene 97
Aronga Angaanga i te Kainga Vine
“TO MUA e manganui ra,” koi oti ua ake ia Iesu te tuatua, “e riro no muri; e to muri ra, e riro ïa no mua.” I reira kua akatutu mai aia i te reira na te tuatua anga i tetai tua. “E tau oki te basileia o te au [rangi, NW] ra,” e nana ei, “i tetai tangata kainga, ko tei aere atu ki vao i te popongi metua, e ou i te rave angaanga i tona kainga vine.”
Kua tuatua ua atura Iesu: “E tika akera tana tuatua [te tangata kainga] i tetai pae rave angaanga e kia taki tai denari i te rā okotai, kua tuku atura aia ia ratou ki roto i tona kainga vine. E tae akera ki te toru o te ora ra, aere atura aia ki vao, kite atura i tetai aronga tangata i te tu ua anga i te okoanga apinga: Kua karanga atura aia kia ratou, Ka aere katoa kotou ki roto i taku kainga vine ra, e te tika ra, naku ïa e o atu na kotou. Aere atura ratou. Aere akaou atura aia ki vao i te ora ono, e te iva ra, kua pera akaou atura. E tae akera ki te ngauru ma tai o te ora, aere atura aia ki vao, kite atura i tetai aronga i te tu ua anga, karanga atura aia kia ratou, Eaa kotou i tu uaʼi ma te angaanga kore i ko nei e ope ua atu te rā nei? Kua na ko maira ratou kiaia, No te mea kare e tangata i ou mai ia matou. Kua karanga atura aia kia ratou, Ka aere katoa kotou ki roto i taku kainga vine ra.”
Te tangata kainga ra, me kare te tangata nona te kainga vine, ko te Atua ko Iehova ia, e ko te kainga vine ko te iti tangata o Iseraela. Ko te aronga angaanga i te kainga vine ra ko te aronga ratou tei raveia mai ki roto i te Ture koreromotu ra; ko ratou tikai te au ngati Iuda te ora ra i te tuatau o te au apotetoro ra. Kua akatikaia te tutaki no te aronga anake tei rave i te angaanga no te ra ki katoa. E okotai tenari te tutaki no te angaanga okotai ra. I te mea ko “te toru o te ora” e ora 9 ia i te popongi, ko te aronga tei kapikiia atura i te 3, te 6, te 9, e te 11 o te ora no te angaanga, e 9, e 6, e 3, e 1 ua ora ratou i angaangaʼi.
Ko te aronga rave angaanga no te 12 ora, me kare no te ra ki katoa ra, te akatutu maira i te au arataki ngati Iuda tei rave tamou ra i te angaanga akonoanga. Kare ratou i aite ki te au pipi a Iesu ra, e aronga tautai e etai atu angaanga, i te maata anga o to ratou oraanga. E no te vaitata anga ki te openga o te mataiti 29 T.N. i tono ei te “tangata kainga ra” ia Iesu Mesia kia akaputu mai i teia aronga ei pipi nana. Kua riro mai ratou i reira no te “tuanga openga,” me kare te aronga angaanga i te kainga vine i te 11 o te ora ra.
I te openga ra, kua akaoti te reira ra angaanga akatutuia ra, i te matenga o Iesu, e kua tae te tuatau no te tutaki i te aronga angaanga ra. Kua aruia te akapapa anga tuke i te tutaki anga i te tangata openga na mua, mei tei akatakaia maira: “E aiai iora, kua karanga atura te tangata kainga ra ki te akaaere nona, E karanga atu i te aronga rave angaanga, e apai atu i ta ratou tutaki, na mua te aronga openga ra e tae ua atu ki tei muatangana. E tae maira tei ouia i te ora ngauru ma tai ra, rauka iora ta ratou, taki tai denari i te tangata okotai. Kia tae maira tei muatangana ra, manako iora ratou e maata atu ta ratou e rauka, taki tai katoa ra a ratou denari i rauka i te tangata okotai. E tei te rave anga ra, kua urutoe iora ratou i te tangata kainga ra, Na ko maira, Okotai ua a teianei aronga openga ora i te angaanga anga, e kua akaarite koe ia ratou kia matou nei, tei akakoromaki i te roiroi e te veravera o te rā. Kua karanga atura aia ki tetai o ratou, na ko atura, E tama, kare i ara taku tuatua ia koe; kare aina taua i akataka i te tuatua e kia okotai aau denari? Ka rave i taau, ka aere: ko toku ïa anoano, mei taau katoa na kia apai atu na te akaopenga nei. Auraka au e akono i toku inangaro i taku uaorai nei? Te kino na toou mata i toku nei meitaki?” I te openga kua taiku akaou maira a Iesu i tana tumu i akataka mua maira, i te na ko anga: “Ka riro rai te akaopenga ei muatangana, e tei muatangana ra ei akaopenga ïa.”
Te rauka anga te tenari, kare ia i to Iesu ra matenga, mari ra i te Penetekote 33 T.N., i ta te Mesia, koia te “akaaere nona ra,” riringi anga i te vaerua tapu ki rungao i tana au pipi. Kua aite te reira au pipi a Iesu ki te “tuanga akaopenga” ra, me kare tei angaanga i te ora 11 ra. Kare te tenari i akatutu anake i te apinga orongaia mai koia oki te vaerua tapu uaorai. Ko te tenari e apinga na te au pipi ei taangaanga i te enua nei. Ko tetai apinga ia no to ratou oraanga, te ora mutu kore no ratou. Ko te tika ia no ratou kia riro ei Iseraela vaerua, tei akatainuia kia tutu aere i te Patireia o te Atua ra.
Kare i roa ana kua kite te aronga tei ouia i muatangana ra e kua tutakiia ta Iesu au pipi, e kua kite katoa oki ratou i te reira aronga i te taangaanga anga i te tenari akatutuia ra. Inara kua inangaro ratou kia tere atu i te vaerua tapu e pera katoa te tika tei kapitiia atu ki te Patireia ra. Kua riro te tu o ta ratou urutoe e te akaapa ei takinga kino anga i te au pipi a te Mesia, koia te aronga angaanga “tuanga akaopenga” i te kainga vine ra.
Ko te tupu anga anake ainei i te anere mataiti mua ra te tupu anga o ta Iesu akatutu anga? Kare, ko te au orometua o Kerititome i teia 20 anere mataiti nei tetai, no to ratou au turanga e ta ratou au apainga, e aronga “muatangana” tei ouia no te angaanga i te kainga vine a te Atua tei akatutuia maira. Kua akamanako ratou i te aronga tutu aere tei akatapuia ra e tei piri atura ki te Watch Tower Bible and Tract Society (Totaiete Punanga Tiaki Anga Puka Tapu e te Pepa Akonoanga) e ko “tuanga akaopenga” i akamanaia no te angaanga a te Atua ra. Inara, ko teia aronga tikai, ta te au orometua i akaapa kua rauka ia ratou te tenari—te taoonga kia tavini ei au karere akatainuia no te Patireia o te Atua i te rangi ra. Mataio 19:30–20:16.
▪ Eaa te akatutuia maira e te kainga vine? Koai ma te akatutuia maira e te tangata nona te kainga vine ra e te aronga i angaanga e 12 ora e pera katoa te aronga e 1 ora i angaangaʼi?
▪ I naea i ope ei te ra angaanga tei akatutuia maira, e i naea i tutakiiaʼi?
▪ Eaa te akatutuia maira e te tutaki anga i te tenari?