Pene 99

Ta Iesu Apii Anga i Ieriko

KARE i roa kua tae atu a Iesu ki Ieriko ma te urupu katoa tei aere atura ma ratou, ko tetai oire te reira e vaitata i te okotai ra no te aere atu mei Ierusalema. Te akaraanga ko Ieriko e rua nga oire, te oire taito o te ngati Iuda e vaitata i te okotai e te apa kiro mita mei te oire ou mai no to Roma ra. I te aere atu anga te urupu ra ki vao i te oire taito ra e kua vaitata atu ki te mea ou, kua akarongorongo i te taumaro anga maata i teia nga tangata patipati apinga ra e matapo raua. Ko Baratimaio te ingoa o tetai.

I te kite anga e ko Iesu te aere ra, kua akamata a Baratimaio raua ko tona taeake i te kapikipiki: “E te Atu, e te Tamaiti a Davida, e aroa mai ia maua”! I te karanga atu anga te urupu ra kia raua kia akamutu te maniania, kua maata atu ta raua kapiki anga ma nga reo maata atu: “E te Atu, e te Tamaiti a Davida, e aroa mai ia maua nei”!

I te akarongo anga i te maniania, kua tapu a Iesu. Kua akaue atu aia i te aronga iaia ra kia kapiki atu i nga tangata e taumaro anga maata ra. Kua aere atu ratou ki te nga matapo patipati apinga ra e kua tuatua atu ki tetai io raua ra: “Auraka e taitaia, ka tu ki runga; te kapikiia maira korua e ia.” Na te rekareka poitirere ua, kua kopae iora tera tangata matapo i tona pereue, e tu akera ki runga, e kua aere atura kia Iesu.

“Akapeea atu au kia korua i to korua anoano?” ta Iesu ia i ui atu ki nga tangata e rua ra.

“E te Atu, kia puera o maua mata,” ta raua ia pati anga.

I te akakeuia anga e te aroa, kua akatukia atura a Iesu i to raua mata. Kia tau ki ta Mareko i tata ra, kua karanga a Iesu ki tetai o raua ra: “Ka aere, kua ora koe i toou akarongo.” I reira tikai kua kite nga matapo patipati apinga ra, e kare e ekoko anga kua akamata raua i te akakaka anga i te Atua. I te kite anga te au tangata katoa ra i tei tupu, kua akapaapaa katoa oki ratou i te Atua ra. Kare i taroaroa, kua aru a Baratimaio raua ko tona taeake ia Iesu.

I to Iesu aere anga na roto atu ia Ieriko, e maata tikai te au tangata katoa. Kua anoano ratou katoatoa kia akara i te tangata tei akaora ra i nga matapo. Kua aere atu te au tangata kia Iesu no te au tuanga ravarai, e no te reira tu, kare i rauka i tetai papaki i te akara ua atu iaia. I rotopu ia ratou ra ko Zakaio tetai, e tangata maata ia no te au terona i roto ia Ieriko e takapini ake. E poto roa aia no te akara i te au mea e tupu ra.

E no reira kua oro a Zakaio ki mua e kua kake atura ki runga i tetai rakau tukamino i te pae mataara ta Iesu i aere ra. Mei runga mai i reira, kua rauka iaia te kite meitaki i te apinga pouroa. I te vaitata atu anga te urupu ra, kua karanga atura a Iesu i to runga i te rakau ra: “E Zakaio, ka eke mai i tenana; ei to are ra oki au noo ei akonei.” Kua eke maira a Zakaio ki raro ma te rekareka e kua aere viviki atura ki te ngutuare e teateamamao i te au apinga no tana manuiri rongonui ra.

Inara i te kite anga te au tangata eaa te tupu ra, kua akamata ratou katoa i te koumuumu. Te akamanako ra ratou e e mea tau kore no Iesu kia riro ei manuiri na te reira tu tangata. E kite oki koe, kua riro a Zakaio ra ei tangata apinganui no te rave morimori i te moni i tana angaanga terona ra.

E manganui te aronga tei aru atu, inara i te aere atu anga a Iesu ki roto i te are o Zakaio ra, kua akaapa ratou: “Te aere atura aia ei manuiri na te tangata rave ara.” Inara kua kite a Iesu ia Zakaio e te vaira te tu no te tataraara. E kare a Iesu i taitaia, no te mea kua tu a Zakaio ki runga e kua akakite: “E te Atu, i na, e oronga au i te afa i toku nei apinga no te tangata ngere; e i takinga-kino ana au i etai ke i tetai mea ngiti ake, kia taki a ïa taku e akaoki atu nona.”

Kua akakite papu a Zakaio e te tataraara tika ra aia na te oronga anga i te apa o tana au apinga na te putaua e na te akapou anga i tetai atu apa ei akaoki i ta te aronga i keiaia ra e ia. Te akaraanga kua rauka iaia i te tare mei taua tataanga tero e eaa tana kaiou ki teia aronga. No reira kua taputou aia i te tutaki e taki a, kia tau ki te ture a te Atua te na ko ra: ‘Kia keia te tangata i te mamoe, kia a mai oki ana mamoe ei tutaki i te mamoe okotai ra.’

Kua mareka roa a Iesu i te mataara ta Zakaio i taputou ra kia akapou i tana au apinga, no te mea kua karanga Aia: “Kua tae mai te ora ki teianei ngutuare i teianei rā, e tamaiti katoa oki aia na Aberahama. I aere mai nei oki te Tamaiti a te tangata e kimi i tei ngaro ra e akaora.”

I mua ua ake i te reira, kua akatutuia mai e Iesu tetai turanga no ‘tei ngaro ra’ i tana tua no te tamaiti kaimoumou apinga ra. I teianei e akaraanga tangata ora tikai ko tei ngaro e kua kitea. Noatu rai e kua koumuumu e kua akaapa te au arataki o te akonoanga atua e te aronga i aru atu ia ratou ra no Iesu i akamanako i te tangata mei ia Zakaio rai te tu, kua rave ua atu a Iesu i te kimi e te akaora i te reira aronga tei ngaro ra o te au tamariki a Aberahama. Mataio 20:​29-34; Mareko 10:​46-52; Luka 18:​35–​19:10; Exodo 22:1.

▪ I ea, a Iesu i aravei ei i nga matapo patipati apinga ra, e eaa tana i rave no raua ra?

▪ Koai a Zakaio, e eaa aia i kake ei ki runga i te pu rakau?

▪ Akapeea ta Zakaio akakite papu anga i tona tataraara?

▪ Eaa te apiianga te ka rauka ia tatou i te kite no runga mai i te akono anga a Iesu ia Zakaio ra?