Akapeea te Mamao te Itaeanga Toou Aroa?

“E aroa atu koe i toou tangata tupu mei te aroa ia koe uaorai.”​—MATAIO 22:39.

1. Me aroa tatou ia Iehova, eaa ka tikai e kia aroa katoa tatou i to tatou tangata tupu?

I TE ui anga kia Iesu ko teea te akauenga i maata o te ture, kua pau atura aia: “E [aroa] atu koe i to Atua ia Iehova ma to ngakau katoa, e ma to vaerua katoa, e ma to manako katoa.” I reira, kua taiku atura aia i te rua o te akauenga aiteite ra ki te mea mua: “E aroa atu koe i toou tangata tupu mei te aroa ia koe uaorai.” (Mataio 22:​37, 39, akaaite ia NW) Ae, ko te aroa i te tangata tupu ko tetai akairo ia no tetai Kerititiano. Ka tika, me aroa tatou ia Iehova, ka tika tatou kia aroa tatou i to tatou tangata tupu. No teaa ra? No te mea ka akaari tatou i to tatou aroa no te Atua na te akonoanga i tana Tuatua, e te akaue maira tana Tuatua ia tatou kia aroa atu i to tatou tangata tupu. No reira, me kare tatou e aroa atu i to tatou au taeake e te au tuaine, kare to tatou aroa no te Atua ra i te tika tikai.​—Roma 13:8; 1 Ioane 2:5; 4:​20, 21.

2. Eaa te tu aroa kia rauka ia tatou no to tatou tangata tupu?

² I ta Iesu tuatua anga e ka tau tatou kia aroa atu i to tatou tangata tupu, te tuatua ra aia no tei tere atu i te oaanga. E te taiku ra aia i tetai aroa tei tuke ra mei tei vaira i roto i te au pamiri me kare i rotopu i tetai tangata e tetai vaine. Te tuatua ra aia no te tu aroa o Iehova no tona au tavini akatapuia ra e to ratou oki nona ra. (Ioane 17:26; Ioane 4:​11, 19) Ko tetai tata tuatua ngati Iuda—ta Iesu i kite, te tuatua kite atura—kua akatika atu ki ta Iesu e ka tau te aroa i te Atua kia riro “ma te ngakau katoa e ma te kite katoa e ma te ririnui katoa.” (Mareko 12:​28-34) Kua tika tana. Ko te aroa ta tetai Kerititiano ka tatanu no te Atua e no te tangata tupu te o atura to tatou au manako ngakau e to tatou kite oki. Te manakoia ra i roto i te ngakau e te aratakiia ra e te manako.

3. (a) Akapeea ta Iesu apiianga i tetai tangata ‘apii i te Ture’ ra e ka tau aia kia akatere atu i tona manakoanga e koai tona tangata tupu? (e) Akapeea te pirianga o ta Iesu akatutu anga ki te au Kerititiano i teia tuatau nei?

³ Mei tei ripotiia maira e Luka, i ta Iesu tuatua anga e ka tau tatou kia aroa i to tatou tangata tupu, “kua tu akera tetai apii ture ki runga,” kua ui atu: “Koai oki toku tangata tupu?” Kua pau atura Iesu ma tetai parapore. E tangata tetai tei papaia, e kua keiaia tana au apinga, e kua akarukeia atu i te pae mataara kua vaitata i te mate. Kua aere maira tetai taunga e i muri ake ko tetai ngati Levi e kua tapae ke atura oki. Kare raua i manako atu kiaia. I te openga, ko tetai tangata Samaria ra, kua aere mai e kua kite atura i taua tangata kua takinoia ra e kua akono aroa atura iaia. Ko teea o ratou toko toru ra tei riro ei tangata tupu no taua tangata i takinga kinoia ra? Kua taka meitaki te pauanga. (Luka 10:​25-37) Kua poitirere taua tangata apii Ture ra kia akarongo atu i ta Iesu tuatuaanga e ko tetai tangata Samaria tei meitaki ei tangata tupu i tetai taunga e tetai ngati Levi oki. Te taka meitaki ra, te tauturu ra Iesu i taua tangata ra kia aroa atu i tona tangata tupu na roto i tetai tu mamao ke atu te itaeanga. Te aroa katoa ra te au Kerititiano na roto i taua tu ra. E akamanako ana i te aronga katoatoa ta to ratou aroa e takave ra.

Aroa i Roto i te Pamiri

4. Teea te ngai mua, ta te Kerititiano ka akono i te aroa?

⁴ Te aroa ra te au Kerititiano i to ratou au mema pamiri—te aroa ra te au vaine i ta ratou tane, e te au tane te aroa ra i ta ratou vaine, te aroa ra te au metua i ta ratou tamariki. (Koheleta 9:9; Ephesia 5:33; Tito 2:4) E tika, te vaira te tatua no te aroa natura i roto i te maataanga o te au pamiri. Inara, te akaari maira te au ripoti no te au pamiri tataka ke, te takinga kinoanga tokorua, te au tamariki akono tau koreia me kare te takinga kinoia ra e ko te pamiri tei raro ake i te tu pekapeka i teia tuatau nei, e ko te au manako ngakau matauia no te au pamiri penei kare i rave kia mou kapiti i te reira. (2 Timoteo 3:​1-3) Kia akariro e kia autu tikai i to ratou oraanga pamiri, ka umuumuia te au Kerititiano kia akono i te tu aroa tei rauka ia Iehova raua ko Iesu.—Ephesia 5:​21-27.

5. Koai ta te au metua e akara atura no te tauturu i te akono anga i ta ratou tamariki, e eaa te au tupu anga no te aronga e manganui?

⁵ Kua manako te au metua Kerititiano i ta ratou au tamariki ei apinga puapinga mei ko mai ia Iehova, e te akara atura ratou kiaia no te tauturu i te akonoanga ia ratou. (Salamo 127:​3-5; Maseli 22:6) I roto i teianei tu kua tatanu ratou i te aroa Kerititiano, tei tauturu ra ia ratou kia paruru i ta ratou tamariki mei te au mana ta viivii penei ka topa atu te aronga ou ra ki roto. Ei tupuanga, e manganui te au metua Kerititiano kua kite i te rekareka aiteite ki to tetai metua vaine i te Netherlands ra. I muri ake i te akaraanga i te papetito anga o tana tamaiti—koia tetai o te 575 aronga tataki tai tei papetitoia i te Netherlands i te mataiti i topa akenei—kua tata aia i tei aru mai nei: “I teianei atianga, kua tutakiia taku oronga anga no te 20 mataiti kua topa. Te tuatau katoa e te ririnui—pera katoa te mamae, te tautaanga, e te mii—kua ngaropoinaia i teianei.” Mei teaa ra tona mataora anga e kua iki tana tamaiti, i tona uaorai manako, kia tavini ia Iehova. Ko te take o te 31,089 papuritia tei ripoti ana i te Netherlands i te mataiti kua topa akenei te kapiti ra i te aronga e manganui tei apiiia maira mei to ratou au metua kia aroa atu ia Iehova.

6. Akapeea te aroa Kerititiano i te tauturu anga kia akamaroiroi i te tatua akaipoipo anga?

⁶ Kua tapa a Paulo i te aroa “ko taua tatua apa kore ua ra,” e ka rauka i te reira te akaora i tetai akaipoipo anga noatu rai ma roto i te au tuatau uriia. (Kolosa 3:​14, 18, 19; 1 Petero 3:​1-7) I te akamata anga tetai tangata i Rurutu, koia tetai enua rikiriki e 700 kiro mita mei Tahiti atura, i te apiianga Pipiria ma te Au Kite o Iehova, kua patoi ketaketa tana vaine. I muri akera, kua apai atu i te tamariki, kua akaruke mai i tana tane, e kua aere atu ki Tahiti noo ei. Inara, kua akaari aia i tona aroa na te tukuanga moni putuputu kiaia e te tuatuaanga na te terepaoni i te uianga me e apinga tana me kare ta te tamariki e umuumu ra. Na reira kua rave aia i tona meitaki kia akatupu i tana apainga Kerititiano. (1 Timoteo 5:8) Kua pure putuputu aia no tana pamiri kia taokotai akaouia e i te openga kua oki mai tana vaine. I tona tae mai anga, kua akono atu aia iaia ma “te [aroa], i te akakoromaki, i te maru.” (1 Timoteo 6:11, akaaite ia NW) I te 1998, kua papetitoia aia e kua rekareka maata i muri iora i te akatika anga tana vaine kia apii i te Pipiria. Ko te reira apii tetai o te 1,351 tei akonoia i te ngai i raro ake i te opati manga o Tahiti i te mataiti kua topa.

7. Kia tau ki ta tetai tangata i Tiamani ra, na teaa i akamaroiroi i tona akaipoipo anga?

⁷ I Tiamani kua patoi tetai tangata i te inangaro anga tana vaine i te tuatua mou Pipiria e kua irinaki e te anoano ra te au Kite o Iehova kia akavare iaia. Inara, i muri akera, kua tata atu aia ki te Kite tei aravei mua ra i tana vaine: “Te akameitaki nei au ia koe no te akaaravei anga i taku vaine ki te au Kite o Iehova. I te akamata anga, kua manamanata au no toku akarongo anga e manganui te au apinga kikino no ratou. Inara i teianei, i toku aereanga ki te au uipaanga ma taku vaine, kua kite au i toku tarevake. Kua kite au e te akarongorongo ra au i te tuatua mou, e kua akariro te reira i to maua akaipoipo anga kia maroiroi roa atu.” Te 162,932 Au Kite o Iehova i Tiamani—e te 1,773 i te au motu i raro ake i te opati manga o Tahiti—te kapiti ra i te au pamiri tei kapitiia i roto i te aroa tau i te Atua ra.

Aroa i to Tatou Au Taeake Kerititiano

8, 9. (a) Koai te apii maira ia tatou kia aroa atu i to tatou au taeake, e eaa ta te aroa ka akakeu ia tatou kia rave? (e) E oronga akatauanga mai e akapeea te aroa i te tauturu anga te au taeake kia tauturu i tetai e tetai.

⁸ Kua tuatua atura Paulo ki te au Kerititiano i Tesalonia ra: “Kua apiiia kotou uaorai e te Atua i te aroa ia kotou uaorai.” (1 Tesalonia 4:9) Ae, ko te aronga tei “apiiia ra e Iehova” ka aroa tetai i tetai. (Isaia 54:13) Te akakiteia ra to ratou aroa e te angaanga, mei ta Paulo i akakite ra i tana tuatua anga: “Ei kauraro aroa ra to kotou tetai ki tetai.” (Galatia 5:13; 1 Ioane 3:18) Ko teianei ta ratou ka rave, ei akatauanga, me aere ratou e atoro i te au taeake e te au tuaine maki, akamaroiroi atu i te aronga maromaroa, e te turu oki i tei paruparu. (1 Tesalonia 5:14) Te rave ra to tatou aroa tika tikai i tetai tuanga puapinga ki te tupu anga o to tatou parataito vaerua.

⁹ I te putuputuanga i Ancón—koia tetai o te 544 putuputuanga i Ecuador—kua akaari te au taeake na roto i te tu tau i to ratou aroa. Na tetai tupuanga kino i te pae moni i akaruke mai ia ratou kare e angaanga e te moni oki, no reira kua iki te au papuritia kia akaputu moni ratou na te okoanga kai ki te aronga tautai i reira me oki mai taua aronga ra ki te kainga i muri ake i te tautai anga i te po. Kua taokotai atura te katoatoa kapiti katoa oki te tamariki. Kua akamata ratou i te ora tai i te popongi, kia papa i te kai i te ora a ra me oki mai te aronga tautai ra. Kua tuaia te moni tei akaputuia e te au taeake ra i roto ia ratou kia tau ki to ratou umuumu anga. Na taua tauturu taokotai ra i akakite i te aroa Kerititiano tika tikai.

10, 11. Akapeea tatou me akaari i te aroa no te au taeake kare ra tatou uaorai i matau?

¹⁰ Inara, kare to tatou aroa i kotingaia ki te au Kerititiano anake ta tatou uaorai i kite ra. Kua tuatua te apotetoro ko Petero: “E aroa atu i te au taeake.” (1 Petero 2:17) Te aroa atura tatou i to tatou au taeake e te au tuaine katoatoa no te mea e au oa akamori ratou katoa i te Atua ko Iehova. Penei ka oronga mai te au tuatau tupu anga kino i tetai tuatau tau kia akakite i teia aroa. Ei akatauanga, i te tuatau o te mataiti tavini anga 2000, kua akakinoia a Mozambique e te au vaipuke maata, e kua akaruke mai tetai tamakianga tamou marieia i roto ia Angola kia manganui tei putaua. E numero maata to te au taeake e 31,725 i Mozambique e te 41,222 i Angola ra tei takinga kino ia na teianei au tupu anga. No reira, kua tuku atu te Au Kite i Aperika Apatonga i te pae maira i te au apinga maatamaata kia akamama atu i te taitaia o to ratou au taeake i taua au enua. Na to ratou ngakau puareinga tei oronga atu i ta ratou apinga “maata” ra ki to ratou au taeake ngere ra kua akakite i to ratou aroa.—2 Korinetia 8:​8, 13-15, 24.

¹¹ Te kite katoaia ra te aroa, me tauturu mai te au taeake i te au enua e manganui i te patuanga i te au are Uipaanga Patireia e te au Are Akaputuputu Anga i te au enua meangiti te apinga. Tetai akatauanga ko te Solomon Islands. Noatu rai te maata o te pekapeka, kua kitea te tupu anga o te au papuritia e 6 patene i te Solomon Islands i te mataiti kua topa akenei, ma tetai take e 1,697. Kua umuumuia tetai Are Akaputuputu Anga no ratou. Noatu ra e manganui to ratou au tangata kua akaruke i taua enua ra, kua aere mai etai aronga tauturu no Autireria kia tauturu i roto i te patu anga. I muri akera, kua anoanoia taua aronga tauturu ra kia akaruke, inara kare i mua ake i ta ratou tereni anga i te au taeake no reira kia akaoti i te pange. Kua apaiia mai te au auri kua oti te akapapa no te are akaputuputu anga mei Autireria mai, e ko te akaoti anga o teianei are meitaki no te akamori anga—i tetai tuatau e manganui te au ngai patuanga kua akarukeia kare i oti—ka riro ia ei kite meitaki i te ingoa o Iehova e i te aroa o te au taeake ra.

Mei te Atua Rai, te Aroa nei Tatou i to te Ao

12. Akapeea tatou i te aru anga ia Iehova i to tatou tu manako ki te aronga kare ra no to tatou akarongo?

¹² Te kotingaia ra ainei to tatou aroa ki to tatou pamiri e to tatou taeake anake? Kare, kare me te ‘aru ra tatou i te Atua.’ Kua tuatua Iesu: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ephesia 5:1; Ioane 3:16) Mei te Atua ko Iehova ra, ka rave aroa atu tatou i te katoatoa—kapiti katoa i te aronga kare no to tatou akarongo. (Luka 6:​35, 36; Galatia 6:10) E maata oki i teianei tu, te tutu nei tatou i te tuatua meitaki no te Patireia e te akakite atura kia etai ke i ta te Atua ra angaanga maata no te aroa ia ratou ra. Ka rauka i teia kia akatupu i te ora ki tetai ua atu te ka akarongo.—Mareko 13:10; 1 Timoteo 4:16.

13, 14. Eaa etai au tupu anga o te au taeake tei akaari i te aroa ki te aronga kare i te Au Kite, noatu rai e maata te au tu ngata kia ratou uaorai?

¹³ E akamanako ana i etai orometua painia taka ke ra i Nepal. Kua ungaia atu teianei aronga ki tetai oire i te apatonga opunga o taua enua ra, e no nga mataiti e rima kua topa akenei, kua akakite ratou i to ratou aroa na te akakitekite marieanga i roto i taua oire ra e i te au vira i vao akera. Kia oti ei ta ratou ngai, e putuputu ratou i te aere no etai ora e manganui na runga i te au patikara takatakai i roto i te vera e tere atu i te 100 tikiri Fahrenheit. Na to ratou aroa e te “tamou marie anga i te tuatua meitaki” kua akatupu i te meitaki i te akanoo anga tetai pupu apii puka i roto i tetai o aua vira ra. (Roma 2:7) Ia Mati 2000, e 32 tangata tei aere mai kia akarongorongo i te tuatuaanga i te ngai tangata na te akaaere tutaka kotinga ra. Kua rauka ia Nepal tetai take e 430 papuritia i te mataiti kua topa akenei—ko tetai tupu anga e 9 patene. Te akameitaki tikai ra Iehova i te maroiroi e te aroa o te au taeake i taua enua ra.

₁⁴ I Colombia kua aere atu etai painia taka ke no te tuatau poto kia tutu aere i roto i te aronga Initia Wayuu. Kia rave i teia, kua anoanoia ratou kia apii i tetai reo ou, inara kua tutakiia to ratou manako anga aroa e noatu te ua anga maata, e 27 tei aere atu ki tetai tuatua ki te katoatoa. Te aroa maroiroi tei akaariia e taua au painia ra kua tauturu atu i te tupuanga ki tetai 5 patene i Colombia e tetai take e 107,613 papuritia. I Denmark kua anoano tetai tuaine ruaine kia o atu aia i te akakite i te tuatua meitaki ma etai atu, inara kare e rauka iaia te aaere. Kare aia i unui ki muri, kua rave aia i te akakite anga ki te au tangata inangaro na te tataanga pepa. I teianei, te tata akakitekite nei aia ma te au tangata e 42 e te akono nei e 11 apii anga Pipiria. Koia tetai o te take e 14,885 papuritia tei ripoti ra i Denmark i te mataiti kua topa.

Aroa Atu i to Kotou Au Enemi

15, 16. (a) Eaa te mamao ta Iesu tuatua anga no to tatou aroa? (e) Akapeea te akono aroa a te au taeake e apainga ta ratou, ma tetai tei akaapa pikikaa ra i te Au Kite o Iehova?

¹⁵ Kua tuatua atu a Iesu ki te tangata apii ra i te Ture e ka rauka kia manakoia tetai tangata Samaria ei tangata tupu. I tana Ako Anga i te Maunga, kua mamao atu te aerenga a Iesu i tana tuatua anga: “Kua akarongo kotou e, i tuatuaia maira, ‘E aroa atu koe i toou tangata tupu,’ e makitakita atu i toou enemi: Te karanga atu nei ra au kia kotou, E aroa atu i to kotou aronga enemi, e akaora atu i tei tao mai; e takinga-meitaki atu i te aronga e makitakita mai ia kotou, e pure oki no te aronga e akakino mai e tei takinga-kino mai ia kotou: kia riro kotou ei tamariki na to kotou Metua i te ao ra.” (Mataio 5:​43-45) Noatu rai me ka patoi mai tetai ia tatou, e tauta tatou “kia mate ra te kino ia koe i te meitaki.” (Roma 12:​19-21) Me ka rauka, e tua atu tatou ma ia katoa i ta tatou apinga okomaata katoa, koia te tuatua mou.

¹⁶ I Ukraine kua taiku tetai atikara i roto i te nuti pepa Kremenchuk Herald i te Au Kite o Iehova ei pupu akonoanga kino oki. E mea kino teia no te mea i Europa te tuatua ra tetai papaki no te Au Kite o Iehova na roto i teianei tu kia akavare i te au tangata kia tureia me kare kia araiia te au angaanga a te Au Kite. No reira, kua araveiia atu te etita e kua patiia kia nenei i tetai pepa akatikatika anga i taua atikara. Kua akatika aia, inara ma taua pepa ra, kua nenei aia i tetai akakite anga e ko taua atikara mua kua akatumuia ki runga i te tika. No reira kua aravei akaou atura te au taeake rave apainga ma etai akakite anga maata atu. I te openga ra, kua kite taua etita ra e ko te atikara mua ra e tarevake, e kua nenei aia i tetai akatikatika anga. Na te akonoanga tika tikai kiaia e te takinga meitaki ko te tu aroa ia no te rave anga i teia turanga, e kua taki atu te reira ki tetai tupu anga meitaki.

Akapeea Tatou me Tatanu i te Aroa?

17. Eaa te akakite ra e penei kare e ngoie ua kia rave i te tu aroa kia etai ke ra?

¹⁷ Me anauia mai tetai pepe, e viviki ua tona nga metua i te aroa atu iaia. Te akonoanga aroa atu ma te aronga kua pakari mai kare e pera te tupu ngoie ua. Penei no reira te Pipiria i tuatua putuputu mai ei kia tatou kia aroa tetai i tetai—ko tetai apinga ia ka tau tatou kia tauta. (1 Petero 1:22; 4:8; 1 Ioane 3:11) Kua kite a Iesu e ka timataia to tatou aroa i tana tuatua anga e ka tau tatou kia akakore i te ara a to tatou taeake e “itu ra ngauru i te taki itu anga” taime. (Mataio 18:​21, 22) Kua raurau katoa a Paulo ia tatou kia “tauturu atu tetai ki tetai.” (Kolosa 3:​12, 13) No reira oki i tuatuaia mai ei kia tatou: “E aruaru i te aroa”! (1 Korinetia 14:1) Akapeea tatou me rave i teia?

18. Eaa te ka tauturu ia tatou kia tatanu i te aroa ki etai ke?

¹⁸ Te mea mua, ka rauka ia tatou kia tamou marie i to tatou aroa i te Atua ko Iehova. Ko teianei inangaro tetai akakeu anga maroiroi kia aroa atu i to tatou tangata tupu. No teaa ra? No te mea me akono akapera tatou, te akaata meitaki ra teia ki runga i to tatou Metua i te rangi e ka apai mai i te kaka e te akapaapaa anga kiaia. (Ioane 15:​8-10; Philipi 1:​9-11) Te rua, ka rauka ia tatou kia tauta i te akara atu i te au apinga mei ta Iehova akara anga ia ratou ra. I te au taime ravarai me rave ara tatou, te ara ra tatou kia Iehova; inara, i tera taime e tera taime ka akakore mai aia i ta tatou ara e ka aroa ua mai ia tatou. (Salamo 86:5 103:​2, 3; 1 Ioane 1:9; 4:18) Me ka tatanu tatou i to Iehova ra manako, ka riro tatou kia aroa atu ia etai ke ra e ka akakore atu i ta ratou au apa kia tatou. (Mataio 6:12) Te toru, ka rauka ia tatou kia akono atu ia etai ke ra kia tau ki ta tatou e anoano ra ia ratou kia akono mai ia tatou. (Mataio 7:12) No to tatou tu apa ua, e putuputu tatou te umuumu i te akakoreanga ara. Ei akatauanga, me tuatua tatou i te au apinga te ka tamamae ia etai ke ra, ka manakonako tatou e kia maara ratou e te ara ra te au tangata ravarai ma te arero mei tetai tuatau ki tetai tuatau. (Iakobo 3:2) Me te anoano ra tatou i tetai ke kia akono aroa mai ia tatou, ka tau tatou kia akono aroa atu ia ratou.

19. Akapeea tatou me kimi i te tauturu a te vaerua tapu kia tatanu i te aroa?

¹⁹ Te a, ka rauka ia tatou kia kimi i te tauturu a te vaerua tapu no te mea e tuanga te aroa no te ua o te vaerua. (Galatia 5:​22, 23) Te au oaanga, te manako ngakau pamiri, e te inangaro tane e te vaine e putuputu te tupu ua mai. Inara ka umuumu tatou i te tauturu na te vaerua o Iehova kia tatanu i te aroa no ko mai ia Iehova ra, te aroa e tatua apa kore ua ra no te taokotai anga. Ka rauka ia tatou te kimi i te tauturu a te vaerua tapu na te tatauanga i te Pipiria akauruia ra. Ei akatauanga, me ka apii tatou i te oraanga o Iesu, ka kite tatou i akapeea tana akono i te au tangata, e ka rauka ia tatou kia apii kia aru iaia. (Ioane 13:​34, 35; 15:12) Pera katoa, ka rauka ia tatou kia pati ia Iehova no te vaerua tapu, e maata oki i te au turanga te ka akariro kia ngata te reira na tatou kia rave na roto i tetai tu aroa. (Luka 11:13) I te openga ra, ka rauka ia tatou te aruaru i te aroa na te vai piri vaitata anga ki te putuputuanga Kerititiano. Te pirianga ki te au taeake e te au tuaine aroa te tauturu ra ia tatou kia tatanu i te aroa.​—Maseli 13:20.

20, 21. Eaa te akakite anga maata o te aroa ta te Au Kite o Iehova i rave i te mataiti tavini anga 2000?

²⁰ I te mataiti kua topa, kua itae te take o te au papuritia ki te 6,035,564 no te tuatua meitaki takapini teianei ao. Kua akapou te Au Kite o Iehova i tetai 1,171,270,425 au ora i te kimi anga i te aronga tataki tai kia akakite atu kia ratou i taua tuatua meitaki ra. Na te aroa i akariro ia ratou kia akakoromaki i te vera, te ua, e te anu oki ia ratou e aaere ra i teianei angaanga. Na te aroa i akakeu ia ratou kia tuatua ki to ratou au oa apii e te au oa rave angaanga e kia aravei atu i te au tangata ke i runga i te au arataa e tetai atu au ngai. E manganui ta te Au Kite i aravei atu kare e manako mai, e tokoiti tei patoi mai. Inara, kua akaari mai tetai papaki i te manako inangaro, no reira e 433,454,049 oki akaouanga tei raveia, e e 4,766,631 apii Pipiria tei akonoia.a

²¹ Mei teaa ra tetai akatutu anga pouroa teia no te aroa o te Au Kite o Iehova no to ratou Atua e no to ratou tangata tupu! Kare rava taua aroa e anuia. Te irinaki ra tatou e ka kite te mataiti tavinianga o te 2001 i tetai akakite anga maata atu te ka orongaia ki te au tangata nei. Kia tamou marieia ta Iehova ra akameitakianga ma tona aronga akamori tiratiratu e te maroiroi oki ia ratou ‘e rave ra i te au mea ravarai i roto ia ratou ra, ma te aroa’!—1 Korinetia 16:14.

[Tataanga Rikiriki i Raro]

Ka Rauka Ainei ia Koe te Akataka?

• Koai ta tatou e aru ra me aroa atu tatou i to tatou tangata tupu?

• Eaa te mamao te itaeanga tau o to tatou aroa?

• Eaa etai au tupu anga te akakite maira i te aroa Kerititiano?

• Akapeea tatou me tatanu i te aroa Kerititiano?

[Tutu i te kapi 18-21]

2000 SERVICE YEAR REPORT OF JEHOVAH’S WITNESSES WORLDWIDE

(See bound volume)

[Au Tutu i te kapi 15]

Ka rauka i te aroa Kerititiano te mou kapiti i tetai pamiri

[Au Tutu i te kapi 17]

Akakeu te aroa ia tatou kia akakite i to tatou manakonakoanga ki tetai ke