“Kua Tae ki te Ora”

“Kua tae ki tona ora, ka akaruke mai ei i teianei ao, ka aere atu ei ki te Metua ra.”​—IOANE 13:1.

1. I te vaitata anga mai te Pasa o te 33 T.N., kua oraora a Ierusalema ma teea au manako anga, e no teaa ra?

I TONA papetito anga i te 29 T.N., kua akamata atura Iesu ki runga i te aerenga te ka taki atu ki te “ora” o tona matenga, tuakaouanga, e te akakaka anga. I teianei ko te tuatau tupuanga rau o te 33 T.N. E tokoiti ua au epetoma kua topa mei te nooanga te akavaanga teitei o te ngati Iuda, koia te Sunederi, e kua uriuri manako kia tamate ia Iesu. I te kiteanga i ta ratou parani, penei mei ia Nikodemo maira, koia tetai mema no te Sunederi tei akaoaoa maira kiaia, kua akaruke a Iesu ia Ierusalema e kua aere atu ki te enua i tetai pae o te Kauvai i Ioridana ra. I te vaitata anga mai te Oroa o te Pasa ra, e manganui te au tangata tei aere mai mei te enua ra ki Ierusalema, e te ki ra te oire i te au manako anga no Iesu. “Eaa to kotou manako?” ta te au tangata e ui ra tetai ki tetai. “Kare aina aia e tae mai i teianei oroa?” Kua kapiti atu te kau taunga nunui e te au Pharisea ki te tu rapurapu na te orongaanga ikuiku ki tetai ua atu te ka kite atu ia Iesu ka tau kia ripoti i tona ngai kia ratou.​—Ioane 11:​47-57.

2. Na teea angaanga a Maria i akakeu i te patoi anga ra, e na ta Iesu pauanga i te paruru anga iaia i akakite i teaa no tona matakite anga i “tona ora” ra?

² Ia Nisana 8, e ono ra i mua ake i te Pasa, kua tae akaou mai a Iesu i te ngai vaitata ia Ierusalema. Kua aere mai aia ki Betania​—koia te oire kainga o tona nga oa akaperepere ko Mareta, Maria, e Lazaro​—tetai ngai e 3 kiro mita ki vao ake ia Ierusalema. E aiai Varaire teia, e kua akapou a Iesu i te Tapati ki reira. I tetai aiai mai ia Maria e akono ra iaia ma te manongi okomaata, kua akaapa atura te au pipi. Kua pau atura Iesu: “Vaio ua atu ia: kua vaoo marie oki aia i teia no te rā tanumanga iaku ra. Ka noo ua rai oki te putaua ki o kotou nei; ko au ra, kare au e noo tikai ki o kotou.” (Ioane 12:​1-8; Mataio 26:​6-13) Kua kite a Iesu e ‘kua tae tona ora kia akaruke mai i teianei ao e kia aere atu ki te Metua ra.’ (Ioane 13:1) E rima ra toe e “ka oronga atu aia i tona ora ei oko no te tangata e manganui.” (Mareko 10:45) Mei reira mairai, kua tupu te tu rapurapu i te au mea ravarai ta Iesu i rave e i apii oki. Mei teaa ra tetai akatauanga meitaki ta teianei i oronga mai no tatou ia tatou e tapapa marie nei i te openga o teianei akatereanga o te au mea nei! E akamanako eaa tei tupu kia Iesu i te ra tikai i muri akera.

Te Ra o to Iesu Tomo Autu Anga

3. (a) Akapeea to Iesu tomo anga ki Ierusalema i te Tapati, Nisana 9 ra, e akapeea te akono anga o te au tangata takapini iaia? (e) Eaa ta Iesu ra pauanga i te au Pharisea tei akaapa ra i te aronga tini ra?

³ I te Tapati, Nisana 9, kua aere autu maira Iesu ki Ierusalema. I tona vaitata anga mai ki te oire​—te noo ra ki runga i te punua atini i te akatupu anga ia Zekaria 9:9​—kua arikiia te au kakau ki runga i te mataara o te maata anga o te au tangata tei akaputu maira takapini iaia, ko etai atu kua tipu mai i te au manga no te au rakau mai e kua akatotoa katoa ia ratou. “Kia ora te Ariki, ko tei aere mai ma te ingoa o [Iehova] ra”! ta ratou i kapiki. Kua anoano tetai papaki o te au Pharisea ra i roto i taua urupu ra kia ako atu a Iesu i tana au pipi. Inara, kua pau atura Iesu: “E akakite atu au kia kotou, Kia muteki ua ratou nei, kua kapiki ua mai ïa te au toka nei i reira.”​—Luka 19:​38-40; Mataio 21:​6-9.

4. Eaa ra a Ierusalema i keukeu ei i to Iesu ra tomo anga ki te oire ra?

⁴ I tetai epetoma tokoiti i mua akera, e manganui i teianei urupu i kite i ta Iesu akatuakaou anga ia Lazaro. I teianei kua tuatua ua atu ratou kia etai ke ra no tana temeio ra. No reira i to Iesu ra tomo anga ki Ierusalema, kua keukeu iora taua oire katoa ra. “Koai teia?” ta te au tangata i ui. E kua tuatua atu taua aronga ra, “Ko Iesu teia, te peroveta no Nazareta i Galilea ra”! I te kiteanga eaa te tupu ra, kua mii te au Pharisea ra: “Kua ope takiri to te ao katoa i te aru iaia.”​—Mataio 21:​10, 11; Ioane 12:​17-19.

5. Eaa tei tupu i to Iesu ra aereanga ki te iero ra?

⁵ Mei tana i rave ana me aere atu aia ki Ierusalema, kua aere atura Iesu, te Puapii Maata ra, ki te iero kia apii. I reira kua aere maira te aronga matapo e te pirikoki kiaia, e kua rapakau atura aia ia ratou. I te akara anga te kau taunga nunui ra e te au tata tuatua i teia e te rongo anga i te au tamariki i te iero i te kapiki anga, “Hosana i te tamaiti a Davida”! kua riri ratou. “Te kite na koe i ta ratou e tuatua nei?” ta ratou i akaapa atura. ‘Ae,’ ta Iesu i pau atu. “Kare kotou i tatau ra, ‘I rauka ia koe te akameitaki no roto i te vaa o te tamariki meangiti e te kai u’?” I ta Iesu ra apii ua atuanga, kua akara meitaki atura aia i tei raveia ana i roto i te iero ra.​—Mataio 21:15,16; Mareko 11:11.

6. Akapeea i tuke ei ta Iesu aravei anga i teianei mei tana i rave i mua akera, e no teaa ra?

⁶ Mei teaa ra te tuke anga ta Iesu aravei anga i teianei mei tana i te ono marama i mua akera! Kua aere mai aia i reira ki Ierusalema no te Oroa o te Tapenakara “kare ra i aere akakite, i aere poiri ua.” (Ioane 7:10) E kua aere papa mai aia kia rauka te aere ke atu me ka akakoroia mai tona oraanga. Teianei kua tomo atea ua atu aia ki roto i te oire ki te ngai orongaia ra te au ikuiku anga kia opu iaia! Kare katoa oki i te mea matauia na Iesu kia akakite iaia uaorai e ko te Mesia. (Isaia 42:2; Mareko 1:​40-44) Kare aia i anoano i te akakitekite anga maniania me kare au ripoti tau kore nona mei tetai vaa ki tetai vaa. Te akakite atea ua ra te au urupu iaia ei Ariki e te Akaora​—te Mesia​—e kua arai atura aia i ta te au arataki akonoanga patianga kia akamuteki atura ia ratou! Eaa ra te taui anga? No te mea “kua tae ki te ora e akakakāiaʼi te Tamaiti a te tangata nei,” mei ta Iesu i akakite i te ra tikai i muri iora.​—Ioane 12:23.

Rave Mataku Kore​—Au Apii Akaoraanga i Reira

7, 8. Akapeea ta Iesu au angaanga ia Nisana 10, i te 33 T.N., i te akaata anga i tana i rave i te iero i te Pasa o te 30 T.N.?

⁷ I te taenga atu ki te iero i te Monite, Nisana 10, kua rave atura Iesu no runga i tana i kite i te avatea aiai i mua akera. Kua akamata aia “kua tuaru atura ki vao te aronga i oko atura e oko maira i roto i te iero ra, tatipoki atura i te au papa a te aronga oko moni ra, e te au nooanga o te aronga i oko i te kukupa ra; E kare rava i tuku i te tangata, kia apai i te kapu āriki apinga na roto i te iero ra.” I te akaapaanga i taua aronga rave tarevake ra, na ko atura: “Kare aina kua tataia e ‘Toku nei are, e karangaia ïa e are pure no te pa enua ravarai?’ kua akariroia io nei ra e kotou ‘e ana no te aronga keia ra.’”​—Mareko 11:​15-17.

⁸ Te akaata maira te au angaanga a Iesu i tana i rave e toru mataiti i mua akera i tona aere anga ki te iero i te Pasa o te 30 T.N. Inara, kua maata atu te kokoi o tana akaapa anga i teia taime. Kua taikuia te aronga okooko i te iero ra i teianei ei “aronga keia.” (Luka 19:​45, 46; Ioane 2:​13-16) Kua riro ratou mei te reira no to ratou pati anga i te au tutaki maata mei te aronga tei anoano ra kia oko mai te au animara no te atinga. Kua akarongo atu te kau taunga ra, te au tata tuatua, e te aronga taoonga maata o te au tangata ra i ta Iesu ra i rave ana e kua kimi akaou i etai ravenga kia tamate atu iaia. Inara, kare ratou i kite e akapeea te akakore atu ia Iesu, i te mea te au tangata ravarai, kua va ua i tana apiianga, te mou atura iaia kia akarongo akaou atu iaia.​—Mareko 11:18; Luka 19:​47, 48.

9. Eaa te apiianga ta Iesu ra i apii, e eaa te patianga tana i oronga ki te aronga akarongo iaia i te iero ra?

⁹ I ta Iesu ra rave ua atuanga i te apiianga i te iero, kua akakite aia: “Kua tae ki te ora e akakakāiaʼi te Tamaiti a te tangata nei.” Ae, kua kite aia e e tokoiti ua ona ra e orai ei tangata. I muri ake i te akakiteanga e akapeea i tikai kia mate atu tetai ua titona ki raro i te one kua maata atura ia te uua anga​—i te akaaiteite anga ki tona uaorai matenga e te riroanga ei tumu kia oronga i te ora mutu kore kia etai ke ra​—kua oronga maira Iesu i tetai patianga ki te aronga akarongo maira iaia i te na koanga: “Ko tei anoano ei tavini aia noku ra, ka aru mai ïa iaku; e te ngai taku e noo ra, ei reira katoa taku tavini; e kia tavini tetai tangata iaku ra, na toku Metua e o mai i tana tutaki.”​—Ioane 12:​23-26.

10. Akapeea to Iesu ra manako ngakau no te matenga mamae kino tei tapapa maira kiaia?

¹⁰ I te manakoanga i tona matenga mamae ra e a ua ra i muri akera, kua tuatua ua atu Iesu: “Kua taitaia rava toku vaerua i teianei, e ka akapeea ra au? E taku Metua, ka akaora mai koe iaku i teianei ora.” Inara ko teaa tei tapapa maira ia Iesu kare e rauka kia kopaeia. Tera ra, kua tuatua aia, “i aere mai ei ra au no teianei rai ora.” E tika rava, kua akatika a Iesu i taua akanoonoo anga katoa a te Atua ra. Kua tamanako aia kia tuku i te anoano tu-Atua ra kia akatere i tana au angaanga tae roa ki tona matenga ei atinga. (Ioane 12:27) Mei teaa ra tetai akatauanga tana i akanoo no tatou​—ko tetai no te kauraro ki katoa ki te anoano tu-Atua ra!

11. Eaa te au apiianga ta Iesu i oronga atura ki te urupu tei akarongo ua akera i tetai reo no te rangi maira?

¹¹ No te manako oonu anga e akapeea te akatupu anga i te ingoa o tona Metua na tona matenga, kua pure a Iesu: “E taku Metua e akakakā i toou ingoa.” Kua poitirere te aronga tini tei akaputu atura i te iero kua kitea maira tetai reo no runga i te rangi maira, i te na koanga: “Kua akakakā au, e ka akakakā akaou atu rai au.” Kua taangaanga te Puapii Maata ra i teianei tuatau kia akakite ki te aronga tini ra eaa i rongoiai taua reo ra, eaa oki te au tupu anga no tona matenga ra, e eaa ratou i tau ei kia akono i te akarongo. (Ioane 12:​28-36) Nga ra openga e rua kua ki tikai i te angaanga na Iesu. Inara ko tetai ra puapinga maata tei vai maira ki mua.

Te Ra no te Au Akaapa Angaia

12. I te Ruirua, Nisana 11, akapeea ta te au arataki akonoanga tauta anga kia ereere ia Iesu, e eaa te tupu anga ra?

¹² I te Ruirua, Nisana 11, kua aere akaou atura Iesu ki roto i te iero kia apii. E aronga riri to reira. I te taikuanga ki ta Iesu au angaanga i te ra i mua akera, kua ui atura te kau taunga nunui e te aronga pakari o te au tangata ra kiaia: “Koai te tumu i rave ei koe i teianei au mea? e naai i oronga mai i teianei mana ia koe nei?” Kua akaoripu te Puapii Maata ra i to ratou manako na tana pauanga, e kua tuatua atura aia e toru au akatutuanga taka meitaki​—e rua no tetai kainga vine e ko tetai no te oroa akaipoipoanga​—tei akakite atea ra i te tu kino o taua aronga patoi ra iaia. I te riri anga i ta ratou i akarongo atura, kua anoano te au arataki akonoanga ra kia opu iaia. Inara kua mataku ratou i te au urupu ra, tei akamanako ra ia Iesu e e peroveta. No reira kua kimi ratou kia rave kikite atura iaia kia tuatua i tetai apinga e raukai ia ratou kia tapeka atu iaia. Kua muteki ua ratou i ta Iesu ra au pauanga.​—Mataio 21:​23–​22:46.

13. Eaa ta Iesu ra akoanga i oronga atu ki te aronga akarongo maira iaia no te au tata tuatua e te au Pharisea ra oki?

¹³ I te mea te manako ra te aronga tata tuatua e te au Pharisea te apii ra ratou i te Ture a te Atua, kua raurau atura Iesu i teianei i te aronga akarongo maira iaia: “E akono kotou, e e rave i te au mea katoa, ta ratou e tuatua mai; auraka ra kotou e aru i ta ratou akonoanga: ko te tuatua ua oki ta ratou, kare ra e akono.” (Mataio 23:​1-3) Mei teaa ra tetai akaapa anga i te ngai tangata! Inara kare a Iesu i akamutu ake kia ratou. Ko tona ra openga teia ki te iero ra, e kua akakite mataku kore ua aia i etai akakite atea anga​—okotai i muri ake i tetai mei te aruruanga mangungu ra.

14, 15. Eaa te au akaapa anga mamae ta Iesu i tuatua atu no te au tata tuatua ra e te au Pharisea oki?

¹⁴ “Aue kotou, e te au tata tuatua, e te au Pharisea e, e aronga pikikaa!” kua tuatua a Iesu e ono taime. E pera ratou no te mea, mei tana i akataka, te topiri ra ratou i te basileia o te ao i te tangata nei, kare ratou e tuku i te aronga e aere atura ki roto kia tomo atu. Teianei aronga pikikaa te takako nei ratou i te tai e te enua, kia rauka tetai pipi, e kia rauka, e maata ua atu ra tona tau ia kotou ei tamaiti no te mate. I te manako koreanga i “te au mea mamaata o te ture, te tuatua-tau, te aroa, e te akarongo,” kua oronga ratou i te manako maata ki te tutakianga ngauru. Ko te tika, te tama ra ratou “i to vao i te kapu e te mereki, kareka o roto, te ki nei ïa i te noinoi apinga e te kai tuauau e te kaki anga kore,” i te mea ko to ratou tu pe i roto ra e te tu viivii oki te uunaia ra ki muri i tetai akakite anga akameamea ua i vao ra. Pera katoa, te mareka ra ratou kia patu i te au menema no te au peroveta ra e ka akamanea atu ei taki atu i te manako ki ta ratou uaorai angaanga oronga ua, noatu rai ko ratou ‘te tamariki a te aronga i ta i te au peroveta ra.’​—Mataio 23:​13-15; 23-31.

¹⁵ I te akaapaanga i te ngere i te puapinga pae vaerua te tuanga a tona au enemi ra, kua tuatua a Iesu: “Aue kotou, e te au arataki matapo e.” E akono matapo tau kore tikai ratou no te mea te tuku ra ratou i te ketaketa ki runga i te auro o te iero kare ki runga i te puapinga vaerua o taua ngai akamori ra. I te aere ua atuanga, kua tuatua a Iesu i tana au tuatua ketaketa roa no te akaapa anga. “E te au ovi nei, e ta te vipera anaunga!” tana i tuatua, “Ea kotou e oraʼi i te mate i te po?” Ae, te akakite atura Iesu kia ratou e no te aruanga i to ratou aerenga kino, ka mamae ratou i te akapouanga mutu kore ra. (Mataio 23:​16-22, 23) Kia akaari mataku kore katoa oki tatou i te akakiteanga te tuatua Patireia, noatu ra me te o atura te akakite ateaanga i te akonoanga pikikaa.

16. I te nooanga ki runga i te Maunga i Oliveta ra, eaa te totou puapinga maata ta Iesu i oronga ki taua au pipi ra?

¹⁶ Kua akaruke atura Iesu i teianei i te iero. I te topa aereanga te ra i te avatea aiai ra, kua kake atu aia e tana au apotetoro i te Maunga o Oliveta ra. I te nooanga i reira, kua oronga atura Iesu i te totou no te akapouanga i te iero ra e te akairo no tona parutia e no te openga oki o te akatere anga o te au mea nei. Kua itae maira te puapinga maata o teianei au tuatua totou ki to tatou tuatau nei. I taua aiai ra, kua akakite katoa atu a Iesu ki tana au pipi: “Kua kite kotou e, e rua rā toe i te pasa ra, ei reira te Tamaiti a te tangata nei e tukuiaʼi kia akasatauroia.”​—Mataio 24:​1-14; 26:​1, 2.

‘Aroa a Iesu i Tona Tangata e Tae ki te Openga’

17. (a) I te Pasa ia Nisana 14 ra, eaa te apiianga ta Iesu i apii atura ki te 12 ra? (e) Eaa te akamaara anga ta Iesu i akamata i muri ake i te akaateaanga ia Iuda Ikariota ra?

¹⁷ No nga ra e rua i muri akera​—ia Nisana 12 e te 13​—kare a Iesu i akaari ua iaia uaorai i te iero ra. Te kimi ra te au arataki akonoanga kia tamate iaia, e kare aia i anoano i tetai apinga kia tamanata mai i tana akonoanga i te Pasa ma taua au apotetoro ra. Te opunga o te ra i te Paraparau te akamata anga o Nisana 14​—te ra openga o to Iesu oraanga ki runga i te enua nei ei tangata. I taua aiai ra, te akaputu ra a Iesu e tana au apotetoro i roto i tetai are i Ierusalema te ngai i teateamamaoiai no ratou kia akono i te Pasa ra. Ia ratou e rekareka kapiti ra i te Pasa, kua apii atura aia i te 12 ra i tetai apiianga manea i te taakaaka na te tamaanga i to ratou vaevae. I muri ake i te akaateaanga ia Iuda Ikariota, tei akatika ra kia pikikaa i tona Pu no te 30 moni ario​—te tutaki ia no tetai tavini ua nei kia tau ki te Ture a Mose​—kua oronga atura Iesu i te Akamaara Anga no tona matenga.​—Exodo 21: 32; Mataio 26:​14, 15, 26-29; Ioane 13:​2-30.

18. Eaa etai atu au apiianga ta Iesu i oronga aroa atura ki tana au apotetoro tiratiratu e 11 ra, e akapeea taua teateamamao anga ia ratou no tona akaruke anga ra?

¹⁸ I muri ake i te akatapu anga o te Akamaara Anga ra, kua o atura te au apotetoro ki roto i tetai taumaro anga veravera ra e koai o ratou tei maata rava. Kare ra i riri atu ia ratou, kua apii akakoromaki atura Iesu ia ratou no te puapinga o te tavini anga kia etai ra. I te ariki anga e i noo tamou ratou i vaitata iaia ra i tona au timataanga, kua akono atu aia uaorai i tetai koreromotu ma ratou ra no tetai patireia. (Luka 22:​24-30) Kua akaue katoa oki a Iesu kia ratou kia aroa tetai ki tetai mei iaia i aroa ia ratou ra. (Ioane 13:34) Iaia i noo atura ki roto i taua pia ra, kua teateamamao atura Iesu ia ratou no tona takake anga ra. Kua akapapu atu aia kia ratou i tona oaanga, e kua akamaroiroi atura ia ratou kia akono akarongo, e kua taputou kia ratou i te tauturu a te vaerua tapu ra. (Ioane 14:​1-17; 15:15) I mua ake i te akarukeanga i te are, kua pati a Iesu ki tona Metua: “E taku Metua, kua tae ki te ora; ka akakakā i taau Tamaiti, kia akakakā katoa oki taau Tamaiti ia koe.” E tika ra, kua teateamamao a Iesu i tana au apotetoro no tona akaruke anga, e kua tika rava tona ‘aroa i tona tangata e tae ki te openga.’​—Ioane 13:1; 17:1.

19. Eaa ra a Iesu i mamae kino ei i te kainga o Getesemane ra?

¹⁹ Penei no muri roa mai i te turuaipo i itae ei a Iesu e tana 11 apotetoro tiratiratu ra ki te kainga i Getesemane ra. E putuputu oki tona aerenga ki reira ma tana au apotetoro. (Ioane 18:​1, 2) I roto i etai ora, ka mate a Iesu mei te mea rai e e tangata rave kino maata. Te mamae no teianei tupu anga manakoia atura e penei akapeea te apaianga mai i te akakinoanga ki tona Metua e maata roa e ia Iesu e pure ra, e mei te toto ra tona ou i te topa anga ki raro i te one. (Luka 22:​41-44) “Kua tae ki te ora” ta Iesu i tuatua ki te au apotetoro ra. “I na, te vaitata mai nei te pikikaa mai iaku nei.” Iaia e tuatua ra kua akavaitata maira Iuda Ikariota, ma te urupu tangata maata oki i te apaianga te au ramepa e te au koke. Kua aere mai ratou i te tapeka ia Iesu. Kare ra aia i arai atu. “Eaa iora ra,” tana i akataka, akapeea “e tupu ei te tuatua i tataia ra i reira e, kia pera e tikaʼi?”​—Mareko 14:​41-43; Mataio 26:​48-54.

Akakakaia te Tamaiti a te Tangata!

20. (a) Eaa te au ravenga kikino tei tupu kia Iesu i muri ake i tona tapeka angaia ra? (e) I mua ua ake i tona matenga, eaa ra Iesu i kapiki ei e: “Kua oti”?

²⁰ I muri ake i tona tapeka angaia, kua akaapaia a Iesu ma te au kite pikikaa ra, kua tukuia te tika e te au akava akakino ra, kua akautungaia e Ponotio Pilato, kua aviriia e te au taunga e te au pupu, kua akakinoia e kua tamamaeia e te au vaeau. (Mareko 14:​53-65; 15:​1, 15; Ioane 19:​1-3) Kia tae ki te avatea Varaire, kua patitiia a Iesu ki tetai rakau tamamae anga e kua mamae i te mamae kino roa i te aaeanga te paunu o tona kopapa i te ngai o te au naero i tona nga rima e nga vaevae ra. (Ioane 19:​17, 18) I te vaitata anga i te ora toru i te aiai avatea ra, kua kapiki maata a Iesu: “Kua oti”! Ae, kua oti takiri iaia tana i aere mai ki te enua nei kia rave. I te tuku anga i tona vaerua ki te Atua ra, kua tupou atura tona upoko e mate iora. (Ioane 19:​28, 30; Mataio 27:​45, 46; Luka 23:46) I te ra toru i muri akera, kua akatuakaou maira Iehova i tana Tamaiti. (Mareko 16:​1-6) E a ngauru ra i muri ake i tona tuakaouanga, kua kake atura Iesu ki te au rangi e kua akakakaia.​—Ioane 17:5; Angaanga 1:​3, 9-12; Philipi 2:​8-11.

21. Akapeea tatou me aru ia Iesu?

²¹ Akapeea tatou me ‘aru piri vaitata i to Iesu takainga vaevae’? (1 Petero 2:21) Mei iaia rai, e uapou tatou ia tatou uaorai i te tutuanga Patireia e te angaanga akariroanga tangata ei pipi e kia mataku kore oki i te tuatuaanga i te tuatua a te Atua ra. (Mataio 24:14; 28:​19, 20; Angaanga 4:​29-31; Philipi 1:14) Auraka tatou e akara kore i te ngai ta tatou e noo nei i te aerenga tuatau me kare kia kore e akamaroiroi atu tetai i tetai kia aroa e kia rave te angaanga meitaki. (Mareko 13:​28-33; Ebera 10:​24, 25) E tuku tatou i to tatou aerenga katoa no te angaanga kia akatereia ma te anoano o te Atua ra ko Iehova e te matakite anga e te noo nei tatou i “te tuatau openga.”​—Daniela 12:4.

Akapeea Koe me Pau?

• Eaa te tupu anga no to Iesu ra kite anga e te vaitata ra tona matenga, ki runga i tana angaanga orometua i te iero i Ierusalema ra?

• Eaa te akaari ra e ‘kua aroa atura Iesu i tona uaorai tae roa ki te openga’?

• Eaa ta te au tupu anga o nga ora tokoiti o te openga o to Iesu ra oraanga te akakite maira nona?

• Akapeea tatou i te aru anga ia Iesu Karaiti i ta tatou angaanga orometua?

[Tutu i te kapi 18]

‘Aroa a Iesu ia ratou e tae ki te openga’