Te Akakoromaki​—E Puapinga Maata no te Au Kerititiano

“Kapiti katoa to kotou akarongo ki te . . . akakoromaki.”​—2 PETERO 1:5, 6.

1, 2. Eaa i tau ei no tatou katoatoa kia akakoromaki e tae roa ki te openga ra?

KUA aere atu te akaaere tutaka e tana vaine i te aravei i tetai taeake Kerititiano i roto i tona 90 anga mataiti. Kua pou iaia etai raungauru mataiti i te angaanga orometua i te au taime ravarai. I to ratou tuatua anga, kua tuatua ua taua taeake ruaine ra i etai au angaanga i rekarekaia ra e ia i te au mataiti i topa ra. “Inara,” kua tangi aia e kua akamata te au roimata i te tae mai i tona mata, “i teianei kare e rauka iaku i te rave kia maata tetai ua atu apinga.” Kua eeu atura te akaaere tutaka i tana Puka Tapu e kua tatau atu ia Mataio 24:13, te ngai i taikuia maira ta Iesu Karaiti tuatuaanga: “Te tāpu tikai [akakoromaki] e tae ua atu ki te openga ra, ka ora ia.” Kua akara atura taua akaaere ra i te taeake akaperepere ra e kua tuatua atu: “Ko te angaanga openga na tatou katoatoa, noatu eaa te maata me kare te meangiti te ka rauka ia tatou te rave, ko te akakoromaki ia e tae ua atu ki te openga.”

² Ae, ei au Kerititiano pouroa tatou katoatoa ka tau kia akakoromaki e tae ua atu ki te openga o teianei akatere anga o te au mea nei me kare ki te openga o to tatou oraanga. Kare e mataara ke atu e raukai to Iehova ra marekaanga no te ora. Tei roto tatou i tetai oroanga no te oraanga, e ka tau tatou “kia oro ma te akakoromaki” e tae roa kia takai atu tatou i tetai tua o te openga ra. (Ebera 12:1, NW) Kua akaketaketa maira te apotetoro ko Petero i te puapinga maata o teia tu i tana raurau anga i te au taeake Kerititiano ra: “Kapiti katoa to kotou akarongo ki te . . . akakoromaki.” (2 Petero 1:5, 6) Inara eaa tikai te akakoromaki?

Akakoromaki​—Eaa Tona Aite Anga

3, 4. Eaa te aite anga e kia akakoromaki?

³ Eaa te aite anga e kia akakoromaki? Ko te verepa Ereni no te “akakoromaki” (hy·po·meʹno) tona aite anga tikai “kia vai marie me kare kia vai ki raro ake.” E 17 taime i taikuiaʼi te reira i te Puka Tapu. Kia tau ki te nga tangata tata tikitinari ko W. Bauer raua ko F. W. Gingrich, e F. Danker, tona aite anga “kia vai tamou auraka e oro ke . . . , kia vai tamou marie, kia mou.” Ko te nauna Ereni no te “akakoromaki” (hy·po·mo·neʹ) kua taikuia e tere atu i te 30 taime. No runga i te reira, kua tuatua te New Testament Wordbook, na William Barclay e: “Ko te [akakoromaki] ko te tu ia te ka raukai te apai i te au mea, kare ma te kore e tautaanga, mari ra ma te manakonako anga ririnui . . . Ko te tu ia te ka akatinamou i tetai tangata ki runga i tona nga vaevae ma te aro atu anga tona mata i te matangi ra. Ko te tu meitaki tika ia te ka rauka i te reira i te taui i te timataanga ketaketa roa kia riro ei kaka no te mea i mamao atu i te mamae ra te kite atura ia i te akakoroanga.”

⁴ Na te akakoromaki, i reira, e raukaʼi ia tatou te tu tamou marie e kia kore e ngaro te manakonako anga i mua i te aroaro o te au arairai anga me kare te au tu ngata roa. (Roma 5:3-5) Te akara atura te reira kia mamao ke atu i te mamae i teianei kia tae atu ki te akakoroanga​—te tutaki, me kare apinga orongaia mai, no te ora mutu kore, me ki te rangi e me ki runga i te enua nei.​—Iakobo 1:12.

Akakoromaki​—No Teaa Ra?

5. (a) Eaa ra “te akakoromaki anga te tau” ra no tatou katoatoa ei au Kerititiano? (e) Eaa nga tuanga e rua no te akataka anga i to tatou au timataanga ra?

⁵ “Te akakoromaki anga te tau” ra no tatou katoatoa ei au Kerititiano. (Ebera 10:36) No teaa ra? Ko te tumu anga no te mea ka “rokoia [tatou] e te au timataanga e manganui te tu.” Te akataka maira te irava Ereni i konei ia Iakobo 1:2 i tetai tupu anga poitirere ua me kare aravei anga reka koreia, mei tetai tangata i rokoia atura e tetai keia. (Akaaite Luka 10:30.) Ka rokoia tatou i etai timataanga te ka tau kia akatakaia e rua nga tu: ko te au mea matauia e te au tangata no to ratou akatuangaia i te ara, e ko etai te ka tupu mai no to tatou akono i te Atua ra. (1 Korinetia 10:13; 2 Timoteo 3:12) Eaa ra etai o eia au timataanga?

6. I akapeea tetai Kite i te akakoromaki anga i tona aro anga i tetai maki mamae maata?

⁶ Maki kino. Mei ia Timoteo rai, ka tau tetai papaki Kerititiano kia akakoromaki i to ratou “maki putuputu” ra. (1 Timoteo 5:23) E maata atu oki me ka rokoia e tetai maki kino roa, penei e mamae maata, e maki te tau ra tatou kia akakoromaki, kia vai tamou marie tatou, ma te tauturu a te Atua ra e auraka kia ngaro te akara anga i to tatou manakonako anga Kerititiano. E akamanako ana i te akaraanga no tetai Kite i roto i nga mataiti mua o tona 50 mataiti ra kua akakoromaki aia i tetai tuatau roa no te tamaki anga i te tupu anga viviki o te tuma kare e rauka kia rapakauia. Kua vai tamou marie aia i tana tika kia kore e akatika i te pamu toto i nga vai anga e rua. (Angaanga 15:28, 29) Inara kua mama ua mai taua tuma ra i roto i tona kopu e kua tupu atu ki te pae o tona ivi mokotua ra. I te tupu anga te reira, kua kite aia i tetai mamae kino roa kare e rauka kia manakoia e kare ua atu e vairakau e maru mai ei. Inara, kua akara mamao atura aia i teianei mamae, ki te tutaki no te oraanga ki roto i te ao ou ra. Kua rave tamou aia i te akakite anga i tana manakonako anga kaka ma te au taote, te au neti, e te aronga atoro katoa oki. Kua akakoromaki aia e tae roa ki te openga​—koia te openga o tona oraanga ra. Penei kare toou manamanata no te erata i akakoko ana i te oraanga e kare i mamae roa mei tei tupu ra ki taua taeake akaperepere ra, inara penei kua akatupu mai ia i tetai timataanga maata no te akakoromaki anga.

7. Eaa te tu mamae te o atura te akakoromaki anga no tetai papaki o to tatou taeake e te tuaine i te pae vaerua?

⁷ Mamae manako ngakau. Mei tetai tuatau ki tetai tuatau, ka rokoia etai o te au tangata o Iehova ra e “te aue ra te ngakau” te ka “kinokino ei te vaerua.” (Maseli 15:13) Kare te maromaroa i te apinga matau koreia i teia tupu anga “te kino maata i taua tuatau openga” nei. (2 Timoteo 3:1) Kua ripotiia mai te Science News o Titema 5, 1992, e: “Kua tupu kia maata te tu taitaia kino roa, e putuputu te kore e rauka kia rave angaanga, i nga uki tataki tai tei anauia mai mei te 1915 mairai.” Ko te au tumu no te reira taitaia e tuke tuke ia, mei te angaanga a te au mero e tae roa ki te au tupuanga mamae mareka koreia ra. No tetai papaki Kerititiano te kapiti ra te akakoromaki anga i te tauta anga i te au ra tataki tai kia tamou marie ratou i te aro anga i te mamae manako ngakau ra. Inara, kare ratou e tuku ua. Ka vai tiratiratu rai ratou kia Iehova noatu ra te au roimata.​—Akaaite Salamo 126:5, 6.

8. Eaa te timataanga no te pae o te moni penei ka rokoia tatou?

⁸ Penei i etai timataanga tuke tuke ka tupu kia tatou te rave anga ngata i te pae o te moni. I te tupu anga viviki ki tetai taeake i New Jersey, U.T.M., te kite anga e kare ana angaanga, e mea matauia e kua manamanata aia no te angai anga i tona ngutuare tangata e penei ka ngere katoa aia i tona are. Inara, kare i kore tona manakonako anga i te Patireia. Iaia e kimi ra i tetai atu angaanga nana, kua rave aia i te tuatau no te tavini anga ei painia tauturu. I muri akera, kua kitea e ia tetai angaanga.​—Mataio 6:25-34.

9. (a) Eaa ka anoanoiaʼi te akakoromaki anga no te takake anga o tetai tei akaperepereia ra i te mate? (e) Eaa te au irava tuatua tapu te akaari maira e kare i te tarevake kia aue no te mamae ngakau?

⁹ Me kua tupu kia koe te taka keanga o tetai taau i akaperepere ra i te mate, ka umuumu ra koe i te akakoromaki anga kia roa i muri ake i te oki akaou anga te aronga i te pae mai ia koe ra ki ta ratou au ravenga matauia ra. Penei ka kite koe e e mea ngata noou i te au mataiti tataki tai kia tae ki taua tuatau i mate ei taau i akaperepere ra. I te akakoromakianga i te reira ngaro keanga kare te aite anga e e mea tarevake kia tae te roimata no te mamae ngakau. E mea natura ra kia aue i te matenga o tetai ta tatou i akaperepere ra, e kare te reira i te akakite anga ngere i te akarongo i te manakonako o te tuakaouanga. (Genese 23:2; akaaite Ebera 11:19.) Kua “aue iora” Iesu i muri ake i to Lazaro mate anga, noatu rai e kua akakite papu atura Aia kia Mareta: “Ka tu akaou mai ïa to tungane.” E kua tu akaou maira a Lazaro!​—Ioane 11:23, 32-35, 41-44.

10. Eaa ra te au tangata o Iehova ka umuumu takakeiaʼi no te akakoromaki anga?

¹⁰ Kapiti katoa ki te akakoromakianga i te au timataanga te matauia ra e te au tangata ravarai, e umuumu anga takake to te au tangata o Iehova no te akakoromaki anga. Kua akamatakite atura Iesu: “E makitakitaia mai kotou e te pa enua ravarai i toku nei ingoa.” (Mataio 24:9) Kua karanga katoa aia: “I takinga-kino ana ratou iaku ra, e takinga-kino katoa ratou ia kotou.” (Ioane 15:20) No teaa ra te reira makitakita katoa e te takinga kino? No te mea noatu rai e tei ea tatou e noo nei i runga i te enua nei ei tavini no te Atua ra, te tauta ra a Satani kia akamotu i to tatou tu tiratiratu kia Iehova. (1 Petero 5:8; akaaite Apokalupo 12:17.) No teia tumu e putuputu a Satani i te akamura i te takinga kino, ei timataanga ketaketa i to tatou akakoromaki anga.

11, 12. (a) Eaa te timata no te akakoromaki anga i rokoia ki te Au Kite o Iehova e ta ratou tamariki i te au mataiti mei te 1930 ki te tuanga mua o te au mataiti 1940 ra? (e) Eaa i kore ei te Au Kite o Iehova e taki to ratou rima i te apinga akaariari enua?

¹¹ Ei akatauanga, i te au 1930 e te akamataanga o te au 1940, kua riro mai te Au Kite o Iehova e ta ratou tamariki i te Unaite Teite e Kanata e apinga no te takinokino anga, no te mea kare ratou i taki te rima ki te apinga akaariari enua, no te au tumu o te akavangakau. Kua akangateitei te Au Kite i te apinga akariari i te enua ta ratou e noo ra, inara kua akakeu ratou i te kaveinga i akanooia i roto i te Ture a te Atua i Exodo 20:4, 5: “Auraka rava koe e rapa i te idolo akatikitikiia noou, e te tu no tetai mea i runga i te rangi ra, e no tetai mea i raro i te enua nei, e no tetai mea o te moana i raro ake i te enua ra, e Atua vareae oki au ko te Atua noou nei ko Iehova.” I te akaateaia anga etai tamariki apii o te au Kite no to ratou inangaro kia oronga i taua akamori anga kia Iehova te Atua uaorai, kua akanoo te Au Kite i te au Apii Patireia no taua ikuikuanga. Kua oki akaou teia au tamariki apii ki te au apii no te katoatoa i te arikii anga te Akava Teitei Rava o te Unaite Teite taua turanga akonoanga, mei te au pa enua marama e rave i teia tuatau nei. Tera ra, te akakoromaki maroiroi o teia au mapu te oronga ra i tetai akatauanga meitaki rava atu no te au mapu aviri anga tei aro atu i teia akapuengu no tei tauta anga ratou kia mou ki te au turanga o te Puka Tapu.​—1 Ioane 5:21.

¹² Te au timataanga tuke tuke te rokoia ra tatou​—te au mea matauia ra e te au tangata e te au mea te aro atura tatou no to tatou akarongo Kerititiano—​te akakite maira i te tumu no tatou kia akakoromaki. Inara akapeea e raukai ia tatou te akakoromaki?

Akakoromaki Tae Roa ki te Openga​—Akapeea?

13. Akapeea ta Iehova oronga anga mai i te akakoromaki anga?

¹³ E meitaki atu te turanga o te au tangata o te Atua i to te aronga kare ra e akamori ia Iehova. Ka rauka ia tatou te pati i te tauturu “kia akaarite mai te Atua nona te akakoromaki.” (Roma 15:5) Inara, ka akapeea ta Iehova ra oronga anga i te akakoromaki? Ko tetai mataara tana ka rave i te reira na te au akaraanga no te akakoromaki tei tataia ra i roto i tana Tuatua, koia te Puka Tapu. (Roma 15:4) Ia tatou e akamanako ra i teia au mea, kare e ka akamaroiroiia anake ua tatou kia akakoromaki mari ra ka maata atu to tatou kite e akapeea me akakoromaki. E akamanako ana i nga akaraanga meitaki e rua​—te akakoromaki anga maroiroi o Iobu e te akakoromaki anga apa kore o Iesu Karaiti.​—Ebera 12:1-3; Iakobo 5:11.

14, 15. (a) Eaa te au timataanga ta Iobu i akakoromaki ra? (e) Akapeea i raukai ia Iobu i te akakoromaki i te au timataanga tana i aro atura?

¹⁴ Eaa te au turanga tei tuku ra kia timataia to Iobu akakoromaki anga? Kua mamae aia i te tu ngere i te apinga i te kore anga te maataanga o tana au apinga ra. (Iobu 1:14-17; akaaite Iobu 1:3.) Kua kite katoa a Iobu i te mamae o te ngere i tana au tamariki e tai ngauru katoa ra i te mate anga na tetai matangi viviki maira. (Iobu 1:18-21) Kua tupu kiaia tetai maki kino e te mamae roa. (Iobu 2:7, 8; 7:4, 5) Kua taomiia aia e tana uaorai vaine kia ariu ke aia i te Atua ra. (Iobu 2:9) Kua tuatua tona nga oa piri vaitata i etai apinga tei mamae roa, kare i takinga meitaki, e kare katoa oki i te tika. (Akaaite Iobu 16:1-3 e Iobu 42:7.) Inara, i roto i teia katoa, kua akamou a Iobu i tona turanga, na te tamou anga i te tiratiratu. (Iobu 27:5) Te au apinga tana i akakoromaki te aiteite nei ki te au timataanga ta te au tangata o Iehova e aravei nei i teia tuatau.

¹⁵ Akapeea i raukai ia Iobu i te akakoromaki i taua au timataanga katoa ra? Ko tetai apinga tikai tei akamaroiroi ra ia Iobu ko te manakonako anga ia. “E manakonako anga oki tei te rakau ra,” tana i tuatua. “Kia tipuia ra, e kao akaou ïa, e kare e kore te mea tupu ou ra.” (Iobu 14:7) Eaa to Iobu ra manakonako anga? Mei tei akakiteia maira i nga irava i muri akera, kua karanga aia: “Kia mate te tangata nei, ka ora akaou ainei aia? . . . Naau e kapiki mai, e naku e io atu kia koe: e tangi rai koe ki te angaanga a to rima ra.” (Iobu 14:14, 15) Ae, kua akara a Iobu kia mamao ke atu i tona mamae anga i reira ra. Kua kite aia e kare tona au timataanga e vai mai e tuatau ua atu. Ko te maataanga ka tau aia kia akakoromaki e tae roa kia mate aia. Ko tona manakonako e ka rave a Iehova, koia te anoano aroa maira kia akatuakaou i tei mate, nana e akaoki akaou mai iaia ra kia ora.​—Angaanga 24:15.

16. (a) Eaa ta tatou i kite no te akakoromaki anga mei te akaraanga a Iobu ra? (e) Ka tau te manakonako anga no te Patireia kia peea te tu tika tikai kia tatou, e no teaa ra?

¹⁶ Eaa ta tatou i kite mei to Iobu ra akakoromaki anga? E raukai kia akakoromaki e tae roa ki te openga, ka tau tatou kia kore e akangaropoina i to tatou manakonako anga. Kia maara katoa oki, e ko te aite anga papu o te Patireia e ko tetai ua atu mamaeanga te ka rokoia kia tatou e mea “poto ua” ia. (2 Korinetia 4:16-18) Kua akatumuia to tatou manakonako anga oko maata kia ketaketa ki runga i ta Iehova taputou no tetai tuatau i mua ua akenei e “nana e orei i te roi-mata katoatoa [i to tatou mata]; e e kore rava te mate, e te aue, e te mii; e te mamae oki, e kore katoa ïa.” (Apokalupo 21:3, 4) Ka tau te reira manakonako anga, te “ka kore ra e taki atu ki te taitaia,” ei paruru i to tatou manako anga. (Roma 5:4, 5; 1 Tesalonia 5:8) Ka tau te reira ei mea tika tikai kia tatou​—no te tika tikai e na roto i te au mata o te akarongo, ka rauka ia tatou te akatutu ia tatou uaorai i roto i taua ao ou ra—​kare e akono anga i te maki e te tu taitaia ka tu mai ra i te au ra tataki tai ma te erata meitaki e te manako marama; kare e apiapi i te au taomianga no te au apinga mari ra ka noo ma te tinamou; kare e aueanga no te mate o tei akaperepereia ra ka tupu ra ko te rekareka anga i te kiteanga i to ratou tuakaou anga mai. (Ebera 11:1) Naringa kare te reira manakonako anga ka riro tatou kia tapokiia e to tatou au timataanga i teianei e ka akaruke ua tatou i te akarongo. Ma to tatou manakonako anga, mei teaa ra te akakeu anga maata ia kia maro ua atu, kia tamou marie i te akakoromakianga e tae roa ki te openga ra!

17. (a) Eaa te au timataanga ta Iesu i akakoromaki ra? (e) Na teea tika e kiteaʼi te mamae maata ta Iesu i akakoromaki ra? (Akara i te tataanga i raro ake.)

¹⁷ Te raurau maira te Puka Tapu ia tatou kia “akara tamou” ia Iesu e “akamaara marie oki iaia.” Eaa te au timataanga tana i akakoromaki? Ko tetai papaki i tupu mai i te ara e te tu apa ua o etai ke ra. Kua akakoromaki a Iesu kare i te tuatua “akakino [anake] a te aronga rave ara” mari katoa ra i te au manamanata tei tupu mai mei roto i tana au pipi, kapiti katoa i ta ratou taumaro anga putuputu e koai tei maata ia ratou ra. E tere atu oki i te reira, kua rokoia aia e te timataanga aite kore no te akarongo. Kua “akakoromaki [aia] i te rakau tamamae anga.” (Ebera 12:1-3, NW; Luka 9:46; 22:24) E mea ngata kia tamanako i te mamae ngakau e te mamae kopapa i te patiti angaia ra e te akakino angaia i te tamate anga ei tangata tuatua akakino ra.a

18. Kia tau ki ta te apotetoro ko Paulo eaa nga apinga e rua i akamaroiroi atura ia Iesu?

¹⁸ Na teaa ra i raukai ia Iesu te akakoromaki e tae roa ki te openga? Kua taiku maira te apotetoro ko Paulo e rua apinga tei akamaroiroi ra ia Iesu: ‘te au pure akatenga e te au pati anga’ e pera katoa oki “no te rekareka tei tukuia ki mua iaia ra.” Kare a Iesu, koia te Tamaiti apa kore a te Atua ra i akama, i te pati tauturu. Kua pure aia “ma te aue maata e te roi mata.” (Ebera 5:7, NW; Ebera 12:2, NW) E maata atu oki i te vaitata anga tona timataanga maata ra kua kite aia i te anoanoia kia pure putuputu no te maroiroi ma te akatenga. (Luka 22:39-44) I te pauanga i ta Iesu ra au pati akatenga, kare a Iehova i akakore atu i te timataanga, inara kua akamaroiroi atu aia ia Iesu kia akakoromaki i te reira. Kua akakoromaki katoa oki a Iesu no te mea kua akara atu aia kia mamao atu i te rakau tamamae anga ki tona tutaki ra​—te rekareka anga te ka rauka iaia i te tauturuanga i te akatapu anga i te ingoa o Iehova ra e te okoanga i te uanga tangata katoa mei te mate maira.​—Mataio 6:9; 20:28.

19, 20. Akapeea ta Iesu akaraanga i te tauturu anga ia tatou kia kite tika tikai i te mea te o atura ki te akakoromaki anga?

¹⁹ Mei te akaraanga a Iesu, ka kite tatou i etai apinga ei tauturu ia tatou kia kite tikai e eaa te o atura ki te akakoromaki anga. Kare te rave i te akakoromaki anga i tetai mea ngoie ua. Me te kite ra tatou i te tu ngata kia akakoromaki i tetai timataanga, e akapumaana anga tetai i te kiteanga e e tika katoa te reira i tupu kia Iesu ra. E raukai kia akakoromaki e tae roa ki te openga, ka tau katoa tatou kia pure putuputu no te maroiroi. Me te timataia ra penei ka manako tatou e kare tatou i tau kia pure. Te pati maira Iehova ia tatou kia riringi atu i to tatou ngakau kiaia ‘koia oki te tiaki maira ia tatou.’ (1 Petero 5:7) E no te reira tumu a Iehova i taputou maira i tana Tuatua, kua rave aia i te apainga nana uaorai kia oronga i “te mana maata meitaki nei” ki te aronga tei kapiki ra iaia ma te akarongo.​—2 Korinetia 4:7-9.

²⁰ I etai tuatau ka tau ra tatou kia akakoromaki ma te aue. No Iesu ra kare te mamae o te rakau tamamae ra i te tumu no te rekarekaanga. Kareka ra, ko te rekareka no te tutaki ia tei tukuia ra ki mua iaia. Ia tatou katoa oki kare i te mea tika tikai kia manako e ka rekareka ua tatou e ka mataora ia tatou e timataia ra. (Akaaite Ebera 12:11.) Inara, na te akara anga ra ki mua ki te tutaki ra, ka rauka ia tatou “[te manako] e mea rekareka anake ia” noatu e me kua rokoia tatou e etai au turanga timataanga maata katoa. (Iakobo 1:2-4; Angaanga 5:41) Ko te mea maata katoa kia vai tamou marie to tatou tu ngaueue kore​—noatu ra e na roto i te aue. Kare oki a Iesu i tuatua e, ‘Koia tei meangiti ra te aue ka ora ia’ kareka, “Te tāpu tikai [akakoromaki] e tae ua atu ki te openga ra, ka ora ïa.”​—Mataio 24:13.

21. (a) Ia 2 Petero 1:5, 6, te raurauia maira tatou kia kapiti atu i teaa ki to tatou akakoromaki anga? (e) Eaa te au uianga te ka uriuri manakoia i te atikara te aru mai nei?

²¹ No reira e puapinga maata te akakoromaki no te ora. Inara ia 2 Petero 1:5, 6, te raurauia maira tatou kia kapiti atu i te akono ki to tatou akakoromaki anga. Eaa te akono i te Atua ra? Eaa tona pirianga ki te akakoromaki, e akapeea e raukai ia koe te reira? Ka uriuri manakoia eia nga uianga i te atikara i muri akenei.

[Au Tataanga Rikiriki i Raro]

Akapeea Koe Me Pau?

◻ Eaa te aite anga e kia akakoromaki?

◻ Eaa te umuumu anga takake no te au tangata o Iehova i te akakoromaki anga?

◻ Na teaa i raukai ia Iobu kia akakoromaki?

◻ Akapeea ta Iesu akaraanga i te tauturu anga ia tatou kia kite tika tikai i te akakoromaki anga ra?

[Tutu i te kapi 10]

Kua akanooia te au Apii Patireia kia apii te au tamariki Kerititiano tei akaateaia ra mei te apii no te mea te orongaia ra taua akamori anga kia Iehova

[Tutu i te kapi 12]

Ma te akakoroanga kia akangateitei i tona Metua, kua pure a Iesu no te maroiroi kia akakoromaki