Tamou Marie e Raukaʼi te Autu

“Kua anoano kotou i te tamou marie, e i muri ake i te oti anga ia kotou i te rave i te anoano o te Atua, penei ka rauka ia kotou te tupu anga o te taputou ra.”​—EBERA 10:36, NW.

1. Eaa ra i tau tikai te tamou marie anga no te aronga katoatoa te tavini nei i te Atua ia Iehova i teia tuatau?

TE VAI ua nei rai to te ao ravarai i raro ake i te mana o tetai atua akavare ra. Ko tona tutara akara koreia, koia a Satani te Tiaporo, te rave ra i tana tauta anga katoa i te patoianga ia Iehova e te tamakianga i te akatikaanga i to Iehova ngateitei e pini ua ake na te Patireia o te Mesia ra. Na te reira i kore ei e rauka kia kopae ke tetai tei akatapu iaia uaorai ki te Atua e tei apai ra i Tona tua o te maroanga no te ngateitei kia patoi tamouia e to teianei ao. (Ioane 15:18-20; 1 Ioane 5:19) E no reira, ka tau tatou tataki tai kia akamaroiroi iaia uaorai kia tamou marie atu e tae roa ki te topa anga teianei ao i te akapou anga ia Aramakito. E riro ei ki roto i te aronga autu a te Atua te ka re i to teianei ao na to ratou akarongo e te tiratiratu, ka tau tatou kia mou maroiroi tikai e tae ua atu ki te openga. (1 Ioane 5:4) Akapeea e raukai te reira ia tatou?

2, 3. Akapeea te Atua ko Iehova raua ko Iesu Karaiti i te akonoanga ei nga akatauanga meitaki rava atu no te tamou marie anga?

² Ko tetai apinga, ka rauka ia tatou i te akara i te tamou marie anga i nga akatauanga meitaki e rua no te akakoromaki anga. Koai ma raua? Ko Iesu Karaiti, tetai, “ko te Tama mua aia o te au mea ravarai i angaia ra,” ko tei rave tamou ma te tiratiratu i ta te Atua angaanga mei tona anga mua mai anga i te tuatau kitea koreia i topa ra. Na tona rave tamou i te tavini atu i te Atua ma te tiratiratu, kua riro a Iesu ei akaraanga na te au mea ora kite katoatoa ra tei angaia maira i muri ake i te rangi e i te enua katoa oki. (Kolosa 1:15, 16) Inara, ko te akaraanga meitaki roa no te tamou marie anga ko te Atua ko Iehova ia, kua roa tona tamou marie anga i te meameaau i tona ngateitei e pini ua ake e ka rave ua atu rai e kia akaoti roa aia i taua maroanga ra kia oti takiri ia.

³ Kua tamou marie a Iehova na te tu meitaki roa i te au tumu tei kapitiia tona tu tapu e tona manako ngakau pakari katoa oki. Kua akakoromaki aia uaorai i te aro atu anga i te akariri anga maata e kua tapu iaia uaorai kia kore e takore atu i te aronga tei akakino mai iaia​—kapiti katoa a Satani te Tiaporo uaorai ra. Te akameitaki nei tatou no to te Atua ra tamou marie anga e tona aroa katoa oki. Naringa kare te reira, kare ua tatou e rekareka noatu e tuatau poto ua nei. E tika, kua akataka te Atua ko Iehova iaia uaorai e kare ona aiteanga na tona tamou marie anga.

4, 5. (a) Akapeea ta Paulo akatutu anga i te potera ra i te akaari anga i te tamou marie anga o te Atua e tona aroa ua? (e) Eaa i kore ei i te kaimoumou ua to te Atua ra aroa?

⁴ Kua tou atu te apotetoro ko Paulo ki te tamou marie anga e te aroa ua o te Atua i tana tuatua anga: “Kare aina e tau i te potera kia anga i tetai āriki no te mea meitaki, e tetai no te mea kino, i te putunga karakaraea okotai nei? Eaa oki te Atua, kia anoano i te akakite i tona riri, e kia kitea tona mana, i te akakoromaki anga roa i te au āriki no te riri i akatauia no te mate ra; E kia anoano oki aia i te akakite i te maata anga o tona meitaki, i te au āriki o te aroa i akatau takereia e ia no te ao; Koia oki tatou nei, ko tei tuatuaia mai e ia, auraka ko to te ngati Iuda anake ra, ko te etene katoa nei ra?”​—Roma 9:21-24.

⁵ Mei tei akaariia maira i teia au tuatua, i teia tuatau nei o tona tamou marie anga, te rave ua atura Iehova i tana akakoroanga kaka i runga i etai au ariki tangata nei. Kua teateamamao aia i te reira au ariki no te kaka mutu kore e na reira ka kore ei te au akakoroanga kikino a tei patoi maata maira iaia, koia a Satani te Tiaporo, e to Satani au nuku katoatoa ra. Kare e kua riro te au tangata ravarai ei ariki no te riri, tei tau no te mate. Te akakite maira te reira i te meitaki no te tapapa marie e te tamou marie anga roa o te Atua Mana Katoatoa ra. Kare e puapinga kore tona aroa ua. Na te reira ka tupu ei te (1) tetai Patireia ngutuare kaka i te au rangi ra i raro ake i ta Iehova Tamaiti akaperepere, koia a Iesu Karaiti, e te (2) tetai kopu tangata ora tei akameitakiia e tei akaoraia ki te enua parataito, pouroa ratou no te ora mutu kore anake.

Tamou Marie Anga Tae Roa ki te Openga

6. (a) Eaa ka kore ei e rauka i te Kerititiano i te kopae ke atu i te timataanga no te tamou marie anga? (e) Eaa te aiteanga matauia no te “tamou marie” anga?

⁶ I te manakonakoanga umere te vai maira ki mua, ka tau kia tangitangi tamou te au tuatua akamaroiroi a Iesu ki roto i o tatou taringa, koia oki: “Ko tei tamou marie e tae roa ki te openga ka ora ia.” (Mataio 24:13, NW) E mea puapinga kia meitaki te akamata anga i te mataara ei pipi Kerititiano. Inara ko te meitaki openga na to tatou tamou marie anga, akapeea te meitaki to tatou akaoti anga i taua mataara ra. Kua akaketaketa mai te apotetoro ko Paulo i te reira i tana tuatua anga e: “Kua anoano kotou i te tamou marie, e i muri ake i te oti anga ia kotou i te rave i te anoano o te Atua, penei ka rauka ia kotou te tupu anga o te taputou ra.” (Ebera 10:36, NW) Ko te tuatua Ereni tei uriia e “tamou marie” i konei e hy·po·mo·neʹ. Ko te aiteanga matauia no teia e maroiroi, ngaueue kore, me kare e tamou marie anga roa kare e akakore i te manakonakoanga noatu ki mua i te arairai anga, te au takinga kino, te au timataanga, e te akavareanga. Me te manakonako ra tatou kia rauka te ora i te openga, ka tau rai tatou kia timataia no te pae i te tamou marie ei tuanga no te teateamamao anga tau no te ora.

7. Eaa te akavare anga te ka tau tatou kia kopae ke, e ko taai akatauanga ka tauturu ia tatou kia tamou marie?

⁷ Kare tatou e tau kia akavare ua ia tatou uaorai kia manako akamareka ua e ka rauka ia tatou kia viviki te akaoti anga i te timataanga. Kia oti papu ei te pauanga i te au maroanga no te ngateitei e pini ua ake e pera katoa to te tangata tu tiratiratu, kare a Iehova i akaatea ke iaia uaorai. Kua tamou marie aia i te au tu mareka kore noatu e ka rauka ua iaia i te takore atu ia ratou ra i reira tikai. Ko Iesu Karaiti tetai akatauanga no te tamou marie. (1 Petero 2:21; akaaiteia atu kia Roma 15:3-5.) Ma teia au akatauanga kaka ki mua ia tatou nei, e mea tika no tatou kia inangaro i te tamou marie e tae roa ki te openga.​—Ebera 12:2, 3.

Tetai Tu Anoanoia

8. Eaa te tu te tau ra no tatou katoatoa tei akaariia mai e te apotetoro ko Paulo?

⁸ Kare e tavini o te Atua, mei mua ana mai, tei kore i anoanoia kia akapapu i tona tu tiratiratu na te tamou marie anga. Te aronga tataki tai tei matauia i te tuatua enua o te Puka Tapu ko ratou ra tei vai tiratiratu ra, e mate roa atu e kua tau no te ora mutu kore i te au rangi ra kua anoano katoaia kia akakite i to ratou tu ngaueue kore. Ei akatauanga, te Pharisea i mua ana, koia a Saula o Tareso, kua karanga aia ki to Korinetia: “Kare au i meangiti ki ta kotou au apotetoro memeitaki rava i tetai ua atu mea, pera katoa kare ua aku nei. E tikai, kua orongaia te au akairo apotetoro ki rotopu ia kotou na roto i te tu tamou marie ravarai, e na roto i te au akairo e te au peu tuke e te au angaanga mana.” (2 Korinetia 12:11, 12, NW) Noatu rai te au apainga no te angaanga, kua akaperepere maata a Paulo i tana angaanga orometua e kua maata tona tamou marie anga e kua tauta pakari kia kore e apai i tetai akakino anga ki runga i te reira.​—2 Korinetia 6:3, 4, 9.

9. (a) Eaa ta te toenga o tei akatainuia ra i akaari mai no te tamou marie anga, e eaa te tupuanga? (e) Eaa te akono maira ei akamaroiroi ia tatou kia rave tiratiratu ua atu i te tavini i te Atua ra?

⁹ I teia tuatau ua nei, kua kite te au Kerititiano akatainuia ra ko ratou tei tavini ra i te Atua i mua ake i te tamaki mua o te ao nei i te 1914 kua kite ratou e ko te openga te reira o te au Tuatau o te au Etene ra, e e manganui i o ratou ra tei manako e ka rauka ia ratou te tutaki no te rangi i taua mataiti maaraaraia ra. Inara kare te reira i tupu. Mei ta te au tika i akaari mai nei, e au raungauru ua atu mataiti tei kapitiia atu kia ratou. I te reira tuatau akatotoaia kare ra i manakoia no to ratou oraanga ki te enua nei, kua o ratou ki roto i te tamaanga i te rima o te Atua ra ko Iehova. (Zekaria 13:9; Malaki 3:2, 3) Na te tamou marie i akatupu i te meitaki no ratou. Ei tavini no Iehova, kua rekareka ratou kia tapaia ei iti tangata no tona ingoa. (Isaia 43:10-12; Angaanga 15:14) I teia tuatau nei, i te apaianga mai na roto i nga tamaki e rua o teianei ao e etai atu tamaki rikiriki katoa oki, te rekareka nei ratou i te tauturu angaia e te urupu maata o te au mamoe ke atu te tupu nei i te akatotoaanga i te tuatua meitaki, tei tere atu to ratou numero i te a mirioni i teianei. Kua totoa te parataito vaerua te rekarekaia nei e ratou i te pa enua ravarai, tae roa ki te au enua mamao o te pae moana. Kua riro teia akono anga akaperepereia, ta tatou e ariki maata nei i te roa anga to tatou oraanga, ei akakeu kia rave tiratiratu ua atu i te angaanga a te Atua e tae roa kia oti takiri to Iehova ra anoano ma tana akakoroanga katoa oki.

10. Kia kore ei tatou e apikepike mai, eaa te apinga tau kia rave putuputuia?

¹⁰ I te mea tei runga to tatou tutaki i to tatou tu ngaueue kore, ka tau tatou kia akamaroiroi tamouia no runga i teia tumu puapinga maata. (1 Korinetia 15:58; Kolosa 1:23) Kia kore e apikepikeanga i rotopu i te au tangata o Iehova ra, ka tau tatou kia putuputu te akamaroiroiia kia mou i te tuatua mou e te angaanga oko maata koia te akatotoaanga i te tuatua mou, mei te au putuputuanga ou o te anere mataiti mua ra na te tutaka akaou angaia e Paulo raua ko Banaba. (Angaanga 14:21, 22) E rave ketaketa tatou ma te manako papu e mei ta te apotetoro ko Ioane i tuatua ra, ka vai rai te tuatua mou ki roto ia tatou nei, “e e vai rai i roto ia tatou e tuatau ua atu.”​—2 Ioane 2.

Tatarianga ma te Tamou Marie Ngaueue Kore

11. Eaa te akara anga ta te Atua ra akono anga no tana au tavini, e akapeea te akatutuanga mai i te reira ia Iosepha ra?

¹¹ E tuatau ra te ka pou e oti ei te timataanga ia tatou. (Iakobo 1:2-4) E tatari! E tatari! E tatari! i te akara anga ko ta te Atua ia akono anga ma tona au tavini taito ra ia ratou i timataia ra to ratou manako kia vai tamou i te akarongo. Inara i te openga kua riro taua tatari anga ra ei mea puapinga no taua aronga tavini tiratiratu ra. E akara ia Iosepha, i tatari aia e 13 mataiti ei tuikaa e ei mou auri, inara na taua tupuanga ra i akameitaki mai i tona tu tangata.​—Salamo 105:17-19.

12, 13. (a) Akapeea ta Aberahama akatauanga no te tamou marie anga tiratiratu ra? (e) Na teea mataara te akamou anga mai i to Aberahama akarongo e tona tamou marie anga ei akaraanga no tatou?

¹² Kua tae to Aberahama mataiti ki te 75 i kapiki ei te Atua iaia kia aere mai ki vao ia Ura o te Kaledea ra e kia aere atu ki te Enua Taputouia ra. E vaitata i te 125 ona mataiti i raukai iaia te tia akapapu anga i ta te Atua ra taputou​—tei orongaia ra i muri ua ake i ta Aberahama akakite anga i te maroiroi o tona akarongo i te akatikaanga kia tuku atinga i tana tamaiti akaperepere ia Isaaka, kua tapu rai aia i ta te angera a Iehova ra arai anga i tona rima kia kore e rave i taua atinga ra. (Genese 22:1-18) E tuatau roa rai te rima ngauru mataiti no Aberahama i te tatari anga ei tuitarere i te enua ke, inara kua mou ua atu aia no tetai 50 atu mataiti katoa kia tae roa ki tona matenga e 175 ona mataiti. I te reira tuatau katoa, e kite tiratiratu e te peroveta oki a Aberahama na te Atua ko Iehova.​—Salamo 105:9-15.

¹³ Te akakiteia maira te akarongo e te tamou marie anga o Aberahama ei akaraanga na te au tavini ravarai a te Atua tei anoano ra kia rauka ia ratou te au akameitakianga taputouia maira na roto ia Iesu Karaiti, koia te Uanga o Aberahama. (Ebera 11:8-10, 17-19) No runga iaia, ka tatau tatou ia Ebera 6:11-15 (NW): “Te anoano nei matou ia kotou tataki tai kia akaari i te tu aiteite o te manako angaanga kia rauka te akapapu anga ki katoa o te manakonakoanga e tae ua atu ki te openga, kia kore kotou e akatau, inara kia riro mai ei aronga aru i te aronga tei akarongo e te tapapa marie kua rauka ia ratou te au taputou. Te maani anga te Atua i tana taputou kia Aberahama, i te mea kare e rauka iaia i te taputou atu i tetai ua atu tei maata ake, kua taputou aia kiaia uaorai, te tuatuaanga: ‘Ma te akapapuia i te akameitakianga ka akameitaki au ia koe, e te akamaataanga ka akamaata au ia koe.’ E no reira i muri ake i to Aberahama akaari anga i te tu tapapa marie, kua rauka iaia teia taputou.”

14. Eaa i kore ei e tau kia manako tatou e e openga kore te timataanga no te tamou marie anga e e akavare ua te tutaki ra?

¹⁴ Kua kite te toenga o tei akatainuia ra e 77 mataiti kua topa mei te openga o te au Tuatau o te Etene ra i te 1914 mairai, i manako tetai papaki o ratou ra e ka akakakaia te putuputuanga mou o te au Kerititiano ki te rangi i reira. Eaa atu te roa e tatari ei te toenga kare ua tatou i kite. Ka tau ainei tatou kia ngaueue ua e kia manako e e openga kore te tatari anga e ko taua tutaki ra e akakoroanga akavare ua? Kare! Kare te reira e akatika i to te Atua ra ngateitei e kare e akangateitei i tona ingoa. Kare aia e akatikaia ki mua i to teianei ao i te oronga anga mai kia tatou i te autu anga e te tutaki no te reira koia te ora mutu kore. Noatu eaa te roa atu te tuatau, kua papu te manako o te toenga, kapiti katoa to ratou au oa tiratiratu mei te mamoe rai te tu e, ka tatari rai ratou kia Iehova kia rave i tana angaanga i tona uaorai tuatau tau. I te akaarianga i te reira tu akakoromaki anga, te aru ra ratou i ta Aberahama mataara.​—Roma 8:23-25.

15. (a) Eaa ta tatou tuatua akamatakite, e na roto i teea au tupuanga ta te Atua akamaroiroi autu anga mai ia tatou nei? (e) Eaa ta Paulo akamaroiroi anga te vaira ei mea tau no to tatou tuatau nei?

¹⁵ Te vaira i reira, te tuatua akamatakite, e tamou marie ngaueue kore i te raveanga i to te Atua ra anoano. (Roma 2:6, 7) I te tuatau kua topa nana i tauturu ia tatou i te takinga kinoanga, kapiti katoa te au tapekaanga e te au puakapa tamamae anga, e nana i apai mai ia tatou kia autu ma te kaka ki tona ingoa e tana akakoroanga katoa.a I te tuatau te toe nei no te akaoti anga i to tatou timata anga, ka rave ua atu rai a Iehova i te reira. Te tau rai ta Paulo akamaroiroi anga no to tatou tuatau nei: “No te mea kua anoano kotou i te tapapa marie ngaueue kore ra e te tamou marie, e raukaʼi ia kotou i te angaanga e te rave ki katoa i te anoano o te Atua, e raukaʼi ma te apai ke atu e te rekareka tikai i tei taputouia maira.”​—Ebera 10:36, The Amplified Bible; Roma 8:37.

16. Eaa i tau kore ei kia manako tatou i to tatou akatapuanga kia Iehova na tetai tu kotinga uaia e ma te kore e rave maroiroiia?

¹⁶ Me te vaira ta Iehova angaanga na tatou kia rave i roto i teianei ao kino, na te aruanga i ta Iesu akatauanga, ka tau rai tatou kia rave ua atu i taua angaanga ra kia oti roa ia. (Ioane 17:4) Kare to tatou akatapuanga kia Iehova na runga i te kite e ka tavini tatou iaia no tetai tuatau poto ua me tae mai a Aramakito i reira. To tatou akatapuanga no te tuatau mutu kore ua atu. Kare ta te Atua angaanga na tatou e akaopeia me tae mai te tamaki o Aramakito. Inara, kia oti anake taua angaanga i akatakaia no mua ake ia Aramakito ei reira anake tatou ka kite ei i te au mea memeitaki te ka tae mai a muri ake i taua tamaki maata ra. Ei reira, kapiti katoa atu ki te tuatau mataora no te rave ua atu anga i tana angaanga, ka tutakiia mai tatou i te au akameitakianga tana i taputou maira kua roa nei te manakonako atu angaia.​—Roma 8:32.

Na te Inangaro i te Atua e Tauturu ia Tatou Kia Tamou Marie

17, 18. (a) I te au tuatau manamanata, eaa te ka tauturu ia tatou kia tamou marie ma te akamareka anga i te Atua? (e) Na teaa e tauturu ia tatou kia autu, e eaa ta tatou ka kore e tuatua no te tuatau te toe mai nei?

¹⁷ Penei, me tupu mai te au tuatau manamanata, ka ui tatou: ‘Akapeea e raukai ia matou te tamou marie kia roa atu?’ Te pauanga? Na te inangaro atu i te Atua ma to tatou ngakau katoa, te manako katoa, te meta katoa, e te ririnui katoa oki. “E akakoromakianga roa te aroa, e te takinga meitaki. Kare te aroa e vareae, kare e akapaapaa, kare e akaparau. Te akakoromaki ra i te au mea ravarai, te irinaki ra i te au mea ravarai, te manakonako ra i te au mea ravarai, te tamou marie ra i te au mea ravarai. Kare rava te aroa e kore.” (1 Korinetia 13:4, 7, 8, NW) Me kare to tatou tamou marie no te aroa i te Atua ra, kare e puapinga i reira to tatou tamou marie. Inara me ka akakoromaki tatou i raro ake i te au apainga no ta tatou akamori ia Iehova, kua riro i reira to tatou tamou marie anga ei akaoonu atu i to tatou inangaro nona. Na te inangaro i te Atua, i tona Metua, i raukai ia Iesu i te tamou marie. (Ioane 14:30, 31; Ebera 12:2) Me to tatou tu akono mou no te aroa tikai i te Atua ra, i to tatou Metua, eaa te apinga i reira te ka kore e rauka ia tatou kia tamou marie?

¹⁸ Na to tatou aroa ngaueue kore no te Atua ko Iehova i raukai ia tatou kia vai tamou i te autu anga ki rungao i to teianei ao i teia tuatau kino maata rava te timataanga. E ka oronga tamou mai a Iehova, i te tauturu tau no tatou na roto ia Iesu Karaiti, noatu eaa te roa atu anga te tuatau e akatikaia kia vai mai teia akatereanga taito o te au mea nei. (1 Petero 5:10) Inara, kare tatou e totou e akapeea atu te roa o te tuatau te toe mai nei, e kare katoa tatou e akanoo i tetai ra. Ka akaruke tatou i te reira na Tei Akono Maata i te tuatau, koia te Atua ra ko Iehova.​—Salamo 31:15.

19, 20. (a) Eaa te manako tau no tatou no te au ra tataki tai ta tatou ka tamou marie? (e) Eaa te tu neneva ta tatou ka anoano kia kopae ke, e no teaa ra?

¹⁹ Inara, kua maata te au mataiti i teianei o te uki tei totouia ra ka kite ratou i te tupuanga “te openga o te akatereanga o te au mea nei.” (Mataio 24:3, 32-35, NW) Auraka e ngaropoina ia tatou e, te au ra tataki tai ta tatou ka tamou marie e ra okotai ia i topa no ta Satani e tana au temoni e taviivii nei i te ao katoa na to ratou vai mai anga e e ra okotai te reira te vaitata atu anga ki te tuatau e kore ei a Iehova e tamou marie i te vai mai anga “te au āriki no te riri i akatauia no te mate ra.” (Roma 9:22) Kare e roa atu, ka akaopeia to Iehova ra akakoromakianga roa, ka tuku mai aia i tona riri ki runga i te au tangata e te au vaine akono kore i te Atua ra. Na reira, tana akakite anga i tona mareka kore i to ratou mataara rave angaanga, noatu rai e i tuku aia ia ratou kia rave ua i teia tuatau katoa nei.

²⁰ E mea neneva roa no tatou kia akamutu ua i ta tatou tauta anga aroa kia rauka te tutaki kaka te mouia maira no tatou na roto ia Iesu Karaiti. Kareka ra, te manako papu nei tatou kia rave tiratiratu ua atu ei Au Kite no Iehova i teia tuatau puapinga maata te vaitata nei a Iehova i te akatika iaia uaorai e tei Ngateitei i te Ao Katoa e Pini Ua Ake.

[Au Tataanga Rikiriki i Raro]

Akapeea Koe me Pau?

◻ Eaa ka kore ei e rauka ia tatou te kopae ke i te timata anga no to tatou tamou marie anga?

◻ Eaa te akavare anga ka tau tatou kia kopae ke atu?

◻ Kia kore ei tatou e apikepike mai, eaa te anoanoia ra?

◻ Eaa ta tatou tuatua akamatakite anga?

◻ I te au tuatau manamanata, eaa te ka tauturu ia tatou kia tamou marie ua atu?

[Tutu i te kapi 11]

Te au tangata o te Atua, mei teia Au Kite i te pae ki Tai i Paniora, i Tirinitata, kua tamouia to ratou tu rekareka i te tatari anga ia Iehova