Akakitekiteanga ki To “Te Pa Enua Ravarai”

“E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; te openga iora ïa i reira ra.”​—MATAIO 24:14.

1. Eaa ra ta Iesu au tuatua ia Mataio 24:14 i riro ei ei mea poitirere ki tana au pipi?

MEI teaa ra te poitirere anga tana au pipi ngati Iuda ra i taua au tuatua a Iesu i runga ake nei! Ko te manako tikai no te au ngati Iuda akatapuia ra kia aere e tuatua atu ki te au Kenitara “viivii” ra, koia “te au tangata o to te pa enua ra,” e mea tau kore ia ki te ngati Iuda, e mea rikarika.a Eaa oki, kare tetai e manako ngati Iuda tikai tona e akatika kia tomo atu ki roto i te kainga o tetai Kenitara ra! Ko taua au pipi ngati Iuda te vaira e e maata ta ratou kia kite no runga ia Iesu, tona aroa, e tana angaanga. E maata katoa oki te vaira no ratou kia kite i to Iehova kore e akono i te tu o te tangata.​—Angaanga 10:28, 34, 35, 45.

2. (a) Akapeea te maata te totoa anga o te angaanga orometua a te Au Kite? (e) Eaa nga tumu anga maata e toru tei tauturu ra i te tupu anga o te Au Kite?

² Kua tutu aere te Au Kite o Iehova i te tuatua meitaki i roto i te au enua, kapiti katoa to Iseraela o teia tuatau nei, e te akakitekite aere ra i te reira i teianei i te au enua e maata atu i to mua ana. I te 1994 e tere atu i te a e te apa mirioni Au Kite te tutu aere ra i etai au enua e vaitata i te 230 katoa. Te akono ra ratou i te apii Puka Tapu i te au ngutuare ma te aronga inangaro e vaitata i te a e te apa mirioni. Te raveia nei teia ki mua i te aroaro o to te ao katoa te akavaavaa ra, e e putuputu te akatumuia te reira ki runga i te tu kite kore i te au apiianga e te au akakeu anga o te Au Kite ra. Mei tei tuatuaia ra no te au Kerititiano mua ra, ka tau katoa te reira kia tuatuaia no ratou: “I tenana pupu, kua akakinoia ïa e kare e ngai toe, kua kite matou.” (Angaanga 28:22) E no reira eaa te ka tau no tatou kia akatika atu i to ratou autu anga i te angaanga orometua ra? Te vaira e toru nga tumu te tauturu ra kia tupu ratou​—te aruanga i te takianga a te vaerua o Iehova ra, te aruanga i ta Karaiti au ravenga tau ra, e te taangaanga i te au apinga tika no te komunikeiti anga.

Te Vaerua o Iehova e te Tuatua Meitaki

3. Eaa ra i kore ei e tau kia akatietie tatou i te au apinga tei oti ra i te rave?

³ Te akatietie ra ainei te Au Kite o Iehova no to ratou autu anga, mei te mea rai e no tetai tu kite takake no ratou i raukaʼi? Kare, no te mea te tau ra ta Iesu au tuatua: “Koia katoa kotou, kia raveia e kotou te au mea katoa i akaueia atu, e na ko atu kotou, E au tavini puapinga kore matou nei: ko tei tau tikai ia matou ra, ko ta matou ïa i rave io nei.” Ei au Kerititiano papetitoia, tei akatapuia ra, kua ariki ua te Au Kite o Iehova i te apainga kia tavini i te Atua, noatu rai eaa to ratou uaorai turanga tataki tai ra. Ko te reira no tetai papaki ko te tavini ia i te au taime ravarai ei au mitinari me kare ei aronga rave angaanga ua i te au opati manga e te au ngai no te neneianga i te au puka Kerititiano. No etai ke ra ko taua inangaro Kerititiano ra ka taki atu ia ratou ki te rave angaanga akatu i te au are akonoanga, ki te tutuanga i te au taime ravarai ei au orometua painia, me kare ei aronga tutu aere i tetai tuanga o te tuatau i te akakitekite i te tuatua meitaki i te au putuputuanga o to ratou ngai ra. Kare tetai io tatou e tika kia akatietie no te rave anga i ta tatou angaanga, “ko ta [tatou] ïa i rave io nei.”​—Luka 17:10; 1 Korinetia 9:16.

4. Akapeea ra te akakore anga i te patoi anga i te ao katoa nei i te angaanga orometua Kerititiano?

⁴ Ko tetai ua atu autu anga no tatou ka tau ia e na te vaerua o Iehova, me kare tona mana rave angaanga ra. E mea tika kia tuatuaia i teia tuatau nei mei to te au ra o te peroveta ko Zekaria ra: “Teia te tuatua a Iehova kia Zerubabela, te na ko maira: Kare i te ririnui, kare rai i te mana, na taku Vaerua ra, te tuatua mairā Iehova Sabaota ra.” E no reira, ko te patoi anga i te angaanga tutuanga a te Au Kite i te ao katoa nei kua kore i puapingaia, kare ra na te tauta anga a te tangata nei, mari ra na ta Iehova ra arataki anga e te paruru anga oki.​—Zekaria 4:6.

5. Eaa ta Iehova tuanga e rave nei i te akatotoa anga i te tuatua no te Patireia?

⁵ E ko te aronga te akarongo maira i te tuatua no te Patireia, kua na ko maira Iesu: “Kua tataia oki i roto i te au peroveta ra e, ‘Ka ope takiri ratou i te apiiia e te Atua.’ E teianei, ko te akarongo e te apiiia e te Metua ra, ko te ka tae mai ïa kiaku nei. . . . Kare rava te tangata e tae mai kiaku nei, kia kore e orongaia mai te tae e taku Metua ra.” (Ioane 6:45, 65) Te rauka ra ia Iehova i te tatau i te au ngakau e te au manako, e te kite ra aia i te aronga e penei ka akarongo mai i tona aroa noatu rai e kare ratou i kite ake iaia. Te taangaanga katoa ra aia i tana au angera ei arataki i teia angaanga orometua takake. No reira a Ioane i kite ei i roto i te orama i ta te angera rave anga e kua tata: “Akara atura au i tetai angela i te rere anga na rotopu i te mareva nei, ma te evangelia mutu kore, e tutu ki te aronga e noo i te ao nei, ki te pa enua katoa, e te au kopu, e te au reo, e te au iti-tangata.”​—Apokalupo 14:6.

Manako i Tei Anoanoia i te Pae Vaerua

6. Eaa te tu manako tumu anga te anoanoia ra no tetai tangata kia akarongo i te tuatua meitaki ra?

⁶ Ko tetai atu tumu i orongaʼi a Iehova i te tuatau no tetai tangata kia ariki i te tuatua meitaki ko ta Iesu ia i tuatua maira: “E mataora to te aronga tei manako i to ratou anoano i te pae vaerua, no ratou oki te patireia o te au rangi ra.” (Mataio 5:3, NW) Ko tetai tangata e merengo ua ra iaia uaorai me kare ko tetai kare ra e kimi ana i te tuatua mou kare aia e manako i tei anoanoia i te pae vaerua. Ka manako ua aia i te apinga kopapa, te au tuatua kopapa. Ka riro te manako kore ua ei arai. E no reira, me kopae ke i te tuatua te aroanga e manganui ta tatou e aravei ra ia tatou e aere ra i tera are i tera are, ka tau tatou kia akamanako i te au tumu tuke tuke katoa no te au tu akono a te au tangata katoa ra.

7. Eaa ra te aronga e manganui i kore ei e akarongo i te tuatua mou?

⁷ E manganui te ka kore e akarongo mai no to ratou mou marokiakia i te akonoanga i akatuangaia ra ratou e kare e anoano kia uriuri manako. Ko tetai papaki kua inangaro atu ki tetai akonoanga tei tau ra ki to ratou tu manako tangata​—te anoano ra tetai papaki i te akonoanga mea papu kore ua, ko etai ka aru i te manako ngakau ua, te vaira etai te kimi ra i te au tamataora anga i ta ratou pure. E manganui i teia tuatau kua iki i tetai tu oraanga te patoi ra i ta te Atua au turanga. Penei te noo ra ratou i tetai oraanga tau kore, e ko to ratou tumu ia no te tuatuaanga e, “Kare au e inangaro.” Inara ko etai, te karanga ra e kua apiiia ratou e e kite taineti to ratou, te kopae ke ra i te Puka Tapu no te tu mama ua.​—1 Korinetia 6:9-11; 2 Korinetia 4:3, 4.

8. Eaa ra i kore ei e tau kia akameangiti mai te kopae anga i to tatou maroiroi? (Ioane 15:18-20)

⁸ Ka tau ainei te kopae anga a te aronga e maata ra kia akameangiti mai i to tatou akarongo e te maroiroi i te angaanga orometua no te akaora anga? Ka rauka ia tatou te akapumaana anga mei te au tuatua a Paulo ki to Roma ra: “Kare tetai papaki i akarongo ra, eaa to reira? na to ratou akarongo kore ainei e akakore i te tuatua-mou a te Atua? Kare rava ïa: kia riro atu te tangata ravarai ei pikikaa, e tuatua-mou rai ta te Atua; koia oki tei tataia ra e, ‘Kia tika taau me tuatua koe, e kia apa kore taau me akavaia koe.’”​—Roma 3:3, 4.

9, 10. Eaa te akapapu anga e kua akakoreia te patoi anga i te au enua e manganui ra?

⁹ Ka rauka ia tatou te akamaroiroi anga mei te au akaraanga e manganui takapini teianei ao no te au enua tei manakoia ra e kare roa e akarongo anga e inara, i muri mai, kua kite papuia e kua tuke ratou. Kua kite a Iehova e te au angera e te vaira te aronga ngakau meitaki no te kimiia​—inara kua tau te Au Kite o Iehova kia rave tamou e kia akakoromaki i ta ratou angaanga orometua. Ei akaraanga, ko etai au enua tei akara anga ngata ra te arai anga a te akonoanga Katorika i te 50 mataiti kua topa​—Airerani, Atenetina, Itale, Koromopia, Meiko, Paniora, Paratiri, e Potukara. E tokoiti ua te Au Kite i te 1943 ra, e 126,000 i te ao katoa nei, e 72,000 io ratou i te Unaite Teite ra. Ko te tu kite kore e te akavaavaa anga tei aro atura i te Au Kite kua akara anga mei tetai paruru piriki rai tei kore i tau kia akangaaia na roto atura. Inara, i teia tuatau ko etai o te au tupu anga maata te autu anga te tutuanga no roto i teia au enua nei. Ko te tika katoa te reira no etai au enua e manganui i raro ake i te Komuniti i mua ana. I te papetito anga o te 7,402 i tetai uruoaanga i Kiev, i Ukarania, i te 1993, te oronga maira i te akapapu anga i teia.

¹⁰ Eaa te au ravenga ta te Au Kite i akono kia akakite atu i te tuatua meitaki ki to ratou au tangata tupu ra? I akono ainei ratou i te au apinga akavare anga kia raukaʼi ia ratou etai au tangata no te akonoanga, ko ta tetai papaki ia i manako ana? Kua aravei ainei ratou te aronga putaua e te aronga kamakura anake ua, mei ta etai ke i tuatua ra?

Au Ravenga Autu no te Akatotoaanga i te Tuatua Meitaki

11. Eaa te akaraanga meitaki ta Iesu i akanoo i tana angaanga orometua? (E akara ia Ioane 4:6-26.)

¹¹ Kua akanoo mai a Iesu ratou ko tana au pipi i te akaraanga ta te Au Kite e aru nei i teia tuatau i ta ratou angaanga akariro tangata ei pipi. Kua aere atu a Iesu ki te au ngai e au tangata to reira, te apinganui me kare putaua​—ki te au kainga, ki te au ngai tangata, te pae i te au roto, te au pae maunga, e pera katoa oki ki te au tunako.​—Mataio 5:1, 2; 8:14; Mareko 1:16; Luka 4:15.

12, 13. (a) Akapeea ta Paulo oronga anga i tetai akaraanga no te au Kerititiano? (e) Akapeea te Au Kite o Iehova i te aru anga i ta Paulo akaraanga?

¹² No runga i tana uaorai angaanga orometua, kua tuatua tika te apotetoro ko Paulo e: “Kua kite kotou i te tu o toku noo anga i o kotou nei, i te au tuatau katoa, mei te ra muatangana mai ka tae mai ei au ki Asia nei, i te akamori anga i te Atu . . . , kare rava akenei e mea e meitaki ei kotou na i vaioia e au, kare akenei au i tivata i te ako atu ia kotou e te apii ia kotou i te ngai tangata, e i tera are i tera are.”​—Angaanga 20:18-20.

¹³ Kua matauia te Au Kite o Iehova i te ao katoa nei no ta ratou aruanga i ta te au apotetoro ra rave anga, i te angaanga orometua i tera are i tera are. Kare e ko te rave na tetai angaanga orometua maata te moni ka pou, e papaku ua, e kare e tuatua e tangata ki te tangata i te tivi, te aere atu nei te Au Kite ki te au tangata, te apinganui e te putaua, e ka aravei atu ia ratou e mata-ki-te-mata. Ka kimi ratou kia tuatua no runga i te Atua e tana Tuatua.b Kare ratou e tauta kia akariro i te au tangata ei au Kerititiano raiti, na te oronga ua anga i te au apinga kopapa nei. Ki te aronga te ka akatika kia uriuri manako, ka tou atu ratou e ko te rapakau mou anake i te au manamanata o te au tangata nei ko te tutara anga ia na te Patireia o te Atua ra, te ka taui i te au tu i runga i to tatou enua nei kia meitaki atu.​—Isaia 65:17, 21-25; 2 Petero 3:13; Apokalupo 21:1-4.

14. (a) Akapeea te au mitinari e te au painia e manganui i te tuku anga i tetai tango ngaueue kore? (e) Eaa ta tatou i kite mei tei tupu ki te Au Kite o Iehova i Tiapani ra?

¹⁴ Ei rave anga kia oti te angaanga i te au enua e manganui, kua akanoo te au mitinari e te au painia i tetai ngai tau no ratou ei akamata i te angaanga i roto i te pa enua e manganui. Kua tuku ratou i te tango, e i muri akera kua riro na te Au Kite o tera ngai e akono i te taki anga. E no reira, kare i umuumuia kia maata te Au Kite no te enua ke ei akono kia rave tamouia te tutuanga e ei rave kia meitaki te akaaere anga. Ko tetai akaraanga meitaki ko Tiapani ia. I te au mataiti openga o te 1940 ra, ko te maata anga tei aere atu ki reira e au mitinari no te au enua takapini ia Otereria e Peritane, kua apii i te reo, e kua aru i te au tu oraanga o taua tuatau i muri ake i te tamaki ra, e kua akamata te akakitekiteanga mei tera are ki tera are. I te tuatau o te Tamaki II o Teianei Ao ra, kua araiia te Au Kite e kua takinga kinoia i Tiapani. No reira i te tae anga atu te au mitinari e tokoiti ua te Au Kite Tiapani tei kitea te rave angaanga ra. Inara i teia tuatau kua tupu ratou kia tere atu i te 187,000 i roto e tere atu i te 3,000 au putuputuanga! Eaa ra te mea muna no to ratou autu anga viviki? Kua akakite tetai mitinari e tere atura i te 25 ona mataiti i tavini ei ki reira: “Ko te mea puapinga maata rava atu kia apii i te tuatua anga ma te au tangata ra. Na te kiteanga i to ratou reo, kua rauka ia matou i te akataka ma ratou katoa, kia kite e kia ariki oki i to ratou tu oraanga. Kua akaari matou e te aroa ra matou i to Tiapani. Kua tauta taakaaka ua matou kia riro ei tuanga no to ratou au tangata i reira, inara auraka kia akaruke i te au mea puapinga o to matou akono anga ei Kerititiano.”

Te Tu Akono Kerititiano ko Tetai Akakitekite Katoa Ia

15. Akapeea te Au Kite i te akaari anga i te tu akono Kerititiano?

¹⁵ Inara, kare te au tangata i akarongo anake ki tetai tuatua Puka Tapu ua. Kua kite katoa ratou i te akonoanga Kerititiano i te akono angaia. Kua akara ratou i te aroa, te tu rotai, e te taokotai o te Au Kite noatu rai i raro ake i te au turanga taitaia, mei te au tamaki anga i rotopu i te iti tangata, te pekapeka kopu tangata, e te tu enemi eteniki. Kua tamou te Au Kite i te tu taka meitaki no te takake o te au Kerititiano i te au tamaki anga katoatoa e kua akatupu ratou i te au tuatua a Iesu e: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai. Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”​—Ioane 13:34, 35.

16. Eaa te tupu anga tei akatutu maira i te aroa tau no te Kerititiano ra?

¹⁶ Kua akatutuia mai te aroa tangata tupu i te oraanga o tetai tangata kua pakari tei tata ra ki tetai nuti pepa i tona ngai no “Mr. e Mrs. Nice Guy.” Kua akataka mai aia e ko tona nga tangata i te pae mai iaia e takinga meitaki tikai kiaia i te tuatau te mate atura tana vaine. “Mei tona taka ke anga . . . kua meitaki rava raua,” kua tata aia. “Mei reira mai ‘kua akono’ raua iaku ei pamiri matou . . . , i te raveanga i te au tu angaanga ravarai e te tauturuanga i te akakore i te au manamanata o tetai tangata e 74 mataiti e kua kore e rave angaanga. Ko tei akariro i teia katoa nei ei mea tuke roa no te mea e kerekere raua, ko au e teatea. Ko raua e Au Kite no Iehova, ko au ra e topa ua ki vao e Katorika.”

17. Eaa te rave anga tau na tatou kia kopae ke?

¹⁷ Te akatutu maira teia tupuanga e ka rauka ua ia tatou te oronga i tetai akakitekite anga na roto i etai tu e manganui, kapiti katoa to tatou tu i te au ra tataki tai. Ko te tika ra, me ka kore to tatou tu akono e aiteite ki to Karaiti, ka aite ta tatou angaanga orometua ki ta te Pharisea ra, kare e puapinga. Kare tatou e anoano kia aite atu ki taua aronga ta Iesu i akataka maira: “E akono kotou, e e rave i te au mea katoa, ta ratou e tuatua mai; auraka ra kotou e aru i ta ratou akonoanga: ko te tuatua ua oki ta ratou, kare ra e akono.”​—Mataio 22:37-39; 23:3.

Na te Pupu Tavini e Oronga Mai i te Au Apinga Tika

18. Akapeea te au puka apii Puka Tapu i te akapapa anga ia tatou kia tauturu i te au tangata ngakau tiratiratu?

¹⁸ Ko tetai atu apinga maata i te tutuanga i te tuatua meitaki ki to te pa enua ravarai ko te rava anga te au puka Puka Tapu tei neneiia ra e te Totaiete Punanga Tiaki Puka Tapu e te Pepa Akonoanga. E au puka ta tatou, e au poroutia, e au aenga pepa, e te au makatini te ka akamerengo e vaitata te katoatoa o te aronga uiui mai ma te ngakau tae. Me ka aravei tatou i te Mutiremi, te Initu, te Buda, te Tao, me kare ngati Iuda, ka rauka ia tatou i te taangaanga i te puka Mankind’s Search for God me kare e tuke tuke te au aenga pepa e te au puka rikiriki no te akamata i tetai tuatua anga e penei katoa oki i tetai apii Puka Tapu. Me ka ui mai tetai tangata irinaki i te apinga tupu ua mai no runga i te anga mai anga, ka rauka ia tatou i te taangaanga i te puka Life​—How Did It Get Here? By Evolution or by Creation? Me e tangata ou ua tetai te ka ui mai, ‘Eaa te akakoro anga no te oraanga?’ ka rauka ia tatou i te akakite atu kiaia i te puka Questions Young People Ask​—Answers That Work. Me te pekapeka oonu ra tetai no tona uaorai au manamanata​—te tu maromaroa, te roiroi, te kukumiia, te kopae​—e au makatini ta tatou tei akakite mai e akapeea te akono tau i taua au tumu ra. E tika tikai, ka oronga mai te pupu tavini akono meitaki ta Iesu i totou maira i “te kai i te tuatau tau” ra i te akatupuanga i tana tuanga.​—Mataio 24:45-47.

19, 20. Akapeea te akaviviki anga i te angaanga Patireia i Arapania?

¹⁹ Inara e itae ei ki to te au pa enua, kua anoanoia kia maani i teia puka i te au reo e manganui. Akapeea i raukaʼi kia uri i te Puka Tapu e te au puka Tuatua Tapu ki roto e tere atu i te 200 au reo ke ke? Te akatutu maira tetai akamanako anga poto ua i tetai akaraanga, ia Arapania, i akapeea i raukaʼi i te tavini akono meitaki e te pakari i te akakite i te tuatua meitaki noatu rai te au tu ngata maata e kare e Penetekote o teia tuatau ei oronga mai i te mataara viviki ki te au reo ke ke.​—Angaanga 2:1-11.

²⁰ E tokoiti ua ake nga mataiti i topa, te vaira Arapania ko tetai enua manakoia e koia anake te enua Komuniti Atua kore tika tikai. Kua tuatua mai te makatini National Geographic i te 1980 e: “Kare a Arapania e akatika i [te akonoanga], ma te akakiteanga iaia uaorai i te 1967 ‘ko te enua Atua kore mua i teianei ao.’ . . . Ko te akonoanga Atua kore anake ta te uki ou o Arapania i kite ana.” I teianei i te topa anga te Komuniti, ko to Arapania tei kite ra i te anoanoia no ratou i te pae vaerua te akarongo ra i te tutuanga te raveia ra e te Au Kite o Iehova. Ko tetai pupu uri reo e Au Kite ou ma te kite ra i te reo Itale e te Engarani kua akanooia ki Tiranë i te 1992. Kua apiiia atu ratou e etai au taeake kite tei aere atura ki reira mei etai atu enua ke kia taangaanga i te au komopiuta laptop kia tuku i te au irava tuatua Arapania ki roto i reira. Kua akamata atu ratou i te urianga i te au aenga pepa e te makatini Punanga Tiaki. I te rauka anga ia ratou te kite, kua rave ratou i te urianga i etai atu au puka Puka Tapu puapinga ra. I teianei e vaitata i te 200 Au Kite te angaanga ra i te reira enua meangiti ua (e 3,262,000 tangata), e 1,984 tei aere atu ki te Akamaaraanga i te 1994.

E Apainga ta Tatou Pouroa

21. Eaa te tu o te tuatau ta tatou e noo nei?

²¹ Te itae atura te au mea e tupu nei i teianei ao ki tetai take. Ma te tupu anga kia maata te rave kino e te ta ua, te tainga e te kukumi anga i te au tamaki i reira, te vaianga o te akono tau kore e tona au ua no te au maki mate no te ainga, te akangateitei kore no te mana taoonga, te riro nei te akara anga i te ao nei e kare e marikonga, kare e rauka kia akatereia. Te noo nei tatou i te tuatau aiteite ki to mua ake i te Vaipuke te akatakaia maira ia Genese: “E kite akera Iehova, e kino maata to te tangata i te enua nei, e kua kino anake te au manako katoa e te akakoroanga katoa o to ratou ngakau i te au rā katoa ra. Kua tataraara iorā Iehova, koia i anga i te tangata ki runga i te enua nei, e ongoongo rava akera tona ngakau.”​—Genese 6:5, 6; Mataio 24:37-39.

22. Eaa te apinga Kerititiano ta te katoatoa o te Au Kite o Iehova e mou nei?

²² Mei te tuatau rai ia Noa ra, ka rave rai a Iehova i te angaanga. Inara no tona tu tuatua tau e te aroa, te anoano ra aia i te tuatua meitaki e te tuatua akamatakiteanga kia tutu aereia na mua ki to te pa enua ravarai. (Mareko 13:10) No teia tu oki e apainga tikai ta te Au Kite o Iehova​—kia kitea te aronga tei tau ra no te au o te Atua e kia apii atu ia ratou i tana au mataara no te au. Kare e roa atu ana, i to te Atua tuatau tau, ka oti autu ua te angaanga tutuanga. “Ko te openga iora ïa i reira ra.”​—Mataio 10:12, 13; 24:14; 28:19, 20.

[Au Tataanga Rikiriki i Raro]

Maara Ainei ia Koe?

◻ Eaa te autu anga i rauka i te Au Kite o teia tuatau nei i ta ratou angaanga orometua?

◻ Eaa ra i kopae ke ei te aronga e manganui i te tuatua akakite a te Kerititiano?

◻ Eaa te ravenga a te au apotetoro no te tutuanga te raveia nei e te Au Kite?

◻ Eaa ta tatou au apinga no te angaanga orometua kia tau meitaki?

◻ Eaa ta tatou ravarai ka tau kia rave kia rotai ki ta Mareko 13:10?

[Pia i te kapi 19]

ENUA AU KITE ANGAANGA I TE 1943 I TE 1993

Airerani 150? 4,224

Atenetina 374 102,043

Itale Tamaki II o Teianei Ao​—kare rekoti 201,440

Koromopia  ?? 60,854

Meiko 1,565 380,201

Paniora Kare e rekoti angaanga 97,595

Paratiri 430 366,297

Peru Kare e rekoti angaanga 45,363

Piripine Tamaki II o Teianei Ao​—kare rekoti 116,576

Porani Tamaki II o Teianei Ao​—kare rekoti 113,551

Potukara Kare e rekoti angaanga 41,842

Tire 72 44,668

Urukuai 22 9,144

Varani Tamaki II o Teianei Ao​—kare rekoti 122,254

Venetuera Kare e rekoti angaanga 64,081

[Tutu i te kapi 17]

Te tupu maata nei te Au Kite o Iehova i te au enua Katorika e manganui, mei ia Paniora rai

[Au Tutu i te kapi 18]

Te rave angaanga nei te Au Kite o Iehova i te au pa enua takapini te ao katoa nei