E na Mua ra te Evangeria Nei i te Akakiteia Atu

“E na mua ra te evangelia nei i te akakiteia atu i to te pa enua ravarai e tikaʼi.”​—MAREKO 13:10.

1, 2. Eaa te akairo o te Au Kite, e no teaa ra?

EAA ra te Au Kite o Iehova i rave tamou ei i te tutu aere? E tika te kitea ra tatou i te ao katoa nei no ta tatou angaanga orometua i te au ngai tangata, e mei tera are ki tera are, i runga i te au arataa, me kare i etai au tuatau aravei anga. I te au atianga tau ravarai, ka akakite tatou ia tatou uaorai ei Au Kite e ka tamata ma te tu mako kia akakitekite i te tuatua meitaki ta tatou e akaperepere nei. Ko te tika ra, ka rauka ia tatou kia tuatua e ko teia angaanga orometua ko to tatou akairo ia!​—Kolosa 4:6.

² E tamanako ana i te reira​—me kite anake te au tangata i tetai pupu tane, vaine, e te tamariki manea te kakau anga i te pae mai i to ratou kainga ma te au kiri puka, eaa to ratou manako mua te matauia ra? Koia ainei, ‘E, te aere akaou mai nei te au Katorika (me kare Otototi)!’ me kare, ‘Te aere akaou mai nei te au Penetekote (me kare te au Papetito)!’ Kare. Kua kite te au tangata e kare taua au akonoanga ra e rave ana i te aere ki tera are ki tera are ma te pamiri katoa no te angaanga orometua. Penei ka tono etai pupu akonoanga i etai “mitinari” no etai nga mataiti e rua ua ki etai ngai ke ra, inara ko to ratou au taeake no te akonoanga kare e o atu ki taua angaanga orometua ra. Ko te Au Kite o Iehova anake ra te aronga e matauia ra i te ao katoa nei no to ratou maroiroi i te akakitekite aere anga i ta ratou tuatua kia etai ke ra i te au atianga tau ravarai. E te kitea ra ratou no ta ratou au makatini, Te Punanga Tiaki e te Awake!​—Isaia 43:10-12; Angaanga 1:8.

Tuke Anga ma te Au Orometua o Kerititome

3, 4. Akapeea te akatutu anga putuputuia no te au orometua o Kerititome i roto i te nuti?

³ Ei tuke anga takiri, e putuputu te au nuti ripoti i te akakite anga e manganui te au orometua i etai enua i te rave ainga tau kore ra i te au tamariki, te au keia anga, e te au akavare anga. Ko ta ratou au angaanga no te kopapa e to ratou au tu oraanga akapou maata i te moni te kite uaia ra e te katoatoa. Kua akataka meitakiia mai e tetai tangata atu imene rongonui i roto i tana imene tei tapaia ra “Ka Aoao Ainei a Iesu i Tetai Rolex [ko tetai uati auro oko maata ia] i Tana Akaariari Anga Tivi?” Kua ui aia i te uianga: “Ka rave ainei a Iesu i te angaanga poritiki me ka oki mai Aia ki te Enua nei? Ka maani i te rua o Tona kainga ki Palm Springs [ko tetai ngai apinganui ia i California] e ka tauta kia uuna i Tana au apinga maata?” Mei teaa ra te tau o ta Iakobo au tuatua: “Kua noo kotou i te ao nei, ma te navenave, e te kanga; kua akapori kotou ia kotou uaorai, mei te au puaka i angaiia no te rā tainga anga.”​—Iakobo 5:5; Galatia 5:19-21.

⁴ Na te kapiti anga tau kore ua o te au orometua ma te aronga rave poritiki e te o atuanga ki te au votianga ei au mema poritiki te akaari maira ia ratou ei au tata tuatua e te au Pharisea no teia tuatau nei. I taua tuatau katoa ra, i te au enua mei te Unaite Teite e Kanata, te ruti ra te au pupu akonoanga i ta ratou moni no te maata te tutaki o te oroanga ture e te au akavaanga i te au orometua, ko te tupuanga ia no to ratou tu akono tau kore ma te au tamariki e pera katoa ma te aronga kua pakari.​—Mataio 23:1-3.

5. Eaa ra i kore ei te au orometua o Kerititome i akapapu e ko ratou “te tavini akono meitaki e te pakari”?

⁵ E tau tikai, kua tuatua a Iesu ki te au orometua o tona tuatau ra: “Aue kotou, e te au tata tuatua, e te Pharisea e, e aronga pikikaa! te arite nei kotou i te tanumanga akateateaia nei, tei akaieie i vao ake, ko roto ra, kua ki ïa i te ivi turuma e te au mea viivii katoa. Koia katoa kotou na, mei te aronga tuatua-tika kotou i vao ake i ta te tangata nei akara anga, ko roto ra, te ki nei ïa i te pikikaa e te kino.” E no reira, kare te Atua i oronga atu ki te au orometua o Kerititome, me e Katorika, e Porotetani, e Otototi, me kare no etai atu akonoanga ke ra, i te akauenga kia tutu aere i te tuatua meitaki. Kare ratou i akono kia papu e ko ratou tei totouia maira ei “tavini akono meitaki e te pakari.”​—Mataio 23:27, 28; 24:45-47.

Eaa ra i Na Muaʼi te Tutu Anga i te Tuatua Meitaki?

6. Eaa te au mea te ka tupu kare e roa atu ana?

⁶ I tana tataanga tau tikai i ta Iesu akauenga kia tutu aere i te tuatua meitaki ki to te pa enua ravarai, ko Mareko anake ua tei taiku ra i te tuatua “na mua.” (Mareko 13:10; akaaite ia Mataio 24:14.) Te tatau ra te tataanga na J. B. Phillips: “No mua oki i te taenga mai te openga e mea tau kia akakitekiteia te evangeria ki to te pa enua ravarai.” Ko te taiku anga i te tuatua akataka anga e “na mua” te akakite maira e ko etai atu au tupu anga ka aru mai i muri ake i te angaanga tutu aere i te evangeria i te ao katoa nei. Ko taua au tupu anga ra ka kapiti katoa i te mate maata tei taputouia maira e te tutara anga tuatua tika o Karaiti ki rungao i te ao ou ra.​—Mataio 24:21-31; Apokalupo 16:14-16; 21:1-4.

7. Eaa ra te Atua i anoano ei kia na mua te tuatua meitaki i te tutuia?

⁷ No reira eaa ra te Atua i anoano ei kia na mua te tuatua meitaki i te tutu aereia? Ko tetai tumu no te mea e Atua aroa aia, e tuatua tau, e pakari, e te mana. I te akatupu anga i te au tuatua a Iesu tei tataia ia Mataio 24:14 e Mareko 13:10, ka kitea e tatou tetai akakite anga manako meitaki i teia au tu no Iehova ra. E akara matatio tataki tai poto ua tatou i taua au tu ra e kia kite e akapeea to ratou piri anga ki te tutu anga i te tuatua meitaki ra.

Te Tuatua Meitaki e to Iehova Aroa

8. Akapeea ra te tutuanga i te tuatua meitaki i tau ei e e akakiteanga i te aroa o te Atua ra? (1 Ioane 4:7-16)

⁸ Akapeea te akaata anga a te tutuanga i te tuatua meitaki i te aroa o te Atua ra? Te mea mua katoa, no te mea kare ia i tetai tuatua tei akatakaia no tetai iti tangata anake ua me kare no tetai pupu. E tuatua meitaki ia no to “te pa enua ravarai.” Te aroa ra te Atua i te uanga tangata katoa ra no te maata tona aroa e kua tono maira aia i tana Tamaiti anau-tai ki te enua nei kia riro ei atinga oko no te au ara o te au tangata ravarai, kare e no tetai iti tangata okotai ua ra. Kua tata te apotetoro ko Ioane e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore. Kare oki te Atua i tono mai i tana Tamaiti ki te ao nei e akaapa mai i to te ao, kia ora ra to te ao iaia.” (Ioane 3:16, 17) E tika rava ko te tuatua meitaki, e akakite anga taputou no tetai ao ou no te au, te rotai anga, e te tuatua tau oki, e akakite anga papu ia i to te Atua aroa.​—2 Petero 3:13.

Te Tuatua Meitaki e to Iehova Mana

9. Eaa ra a Iehova i kore ei e taangaanga i te au akonoanga ririnui o Kerititome kia tutu i te tuatua meitaki?

⁹ Akapeea te akakite angaia to Iehova ra mana na te tutuanga i te tuatua meitaki? E akamanako ana, koai ma tana i taangaanga ana i te rave anga i teia angaanga? Ko te au akaaerenga akonoanga ririnui ainei o Kerititome, mei te Ekaretia Katorika Roma ra me kare te au akonoanga rongonui o te Porotetani ra? Kare, kua kore ratou i tau no taua angaanga ra no to ratou o atu anga ki te angaanga poritiki ra. (Ioane 15:19; 17:14; Iakobo 4:4) Ta ratou apinganui e to ratou au pirianga e te mana ma te pupu tutara anga maata ra kare ia i te akariro kia manako meitaki atu te Atua ko Iehova ra, kare katoa oki ta ratou au apiianga te akapiriia atura ki te ikuiku anga tangata nei. Kare i anoanoia te mana tangata no te rave anga i to te Atua ra anoano.​—Zekaria 4:6.

10. Koai ma ta te Atua i iki kia rave i te tutuanga?

¹⁰ Te tau rai ki ta te apotetoro ko Paulo i tuatua i roto tana reta ki te putuputuanga i Korinetia ra: “Te kite na oki kotou, e aku au taeake, i to kotou kapiki angaia e, kare e rai te tangata pakari i te akonoanga i te kopapa nei, kare e rai te tangata ngateitei anau i kapikiia: Kua iki ra te Atua i te au mea neneva o te ao nei, ei taakama atu i te aronga pakari; e kua iki oki te Atua i te mea parukaua o teianei ao, ei taakama atu i te aronga maroiroi; E te au mea akaaka o te ao nei, e te au mea akavaavaaia ra, e te au mea kare ra, ko tei ikiia ïa e te Atua, e akakore i te au mea e vai nei: Kia kore rava te tangata kia akatietie ki mua iaia.”​—1 Korinetia 1:26-29.

11. Eaa te au tika no runga i te Au Kite tei akariro ra ia ratou kia takake?

¹¹ E tokoiti ua te Au Kite o Iehova e apinganui i te pae kopapa i roto i to ratou au pupu o te akaaerenga e mea papu oki e kare e aronga mana poritiki i o ratou ra. Ko to ratou tu takake takiri i te au angaanga poritiki te akataka ra e kare ratou e akono i te mana poritiki ra. Ei tuke anga ra, e putuputu ratou i te riro ei aronga takinga kinoia e te au arataki akonoanga e pera katoa oki e to te poritiki i teia 20 anere mataiti nei. Inara, noatu rai te patoi anga ketaketa tei akatupuia mai kia ratou e te au pipi Nati, te Vatiti, te Komuniti, to te au enua ke ke, e to te akonoanga pikikaa, kare e te tutu aere nei te Au Kite i te tuatua meitaki i te ao katoa nei mari ra te tupu umere maata katoa ra to ratou numero.​—Isaia 60:22.

12. Eaa ra i autu ei te Au Kite?

¹² Eaa ta te Au Kite e irinaki ra no to ratou autu anga? Kua taputou a Iesu ki tana au pipi e: “Ka rauka ra to kotou mana i te Vaerua Tapu, kia aere mai aia i rungao ia kotou; e ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.” No reira, eaa tikaʼi te tumu no to ratou autu anga? Kua tuatua a Iesu: “Ka rauka ra to kotou mana i te Vaerua Tapu, kia aere mai aia i rungao ia kotou.” Mei te reira katoa rai i teia tuatau, ko te mana mei ko mai i te Atua ra, kare i te kite tangata, ko te taviri ia ki te autu anga o te Au Kite i ta ratou angaanga orometua i te ao katoa nei. Na te taangaanga i tei akaraia ra e ko te au tangata paruparu ua, te akatupu ra te Atua i te angaanga apii anga maata rava i te tuatua enua katoa.​—Angaanga 1:8; Isaia 54:13.

Te Tuatua Meitaki e to Iehova Pakari

13. (a) Eaa ra te Au Kite ka tavini uaʼi ma te kore ua e tutaki anga moni? (e) Akapeea a Iehova i te pau anga i te akakino anga a Satani ra?

¹³ Te tutu aereia nei te tuatua meitaki e te aronga rave ua. Kua karanga a Iesu: “E mea o mai ua to kotou, e oronga ua atu oki kotou.” (Mataio 10:8) E no reira, kare e orongaia ana tetai tutaki moni no te Au Kite o Iehova no te tavinianga i te Atua ra, e kare katoa oki ratou e kimi ana i tetai tutaki. Ko te tika, kare katoa ratou e koi moni ana i ta ratou au uipaanga. Te mataora ra ratou, na to ratou tavini anga noinoi kore ua, i te oronga anga ki te Atua i tetai pauanga ki tei akakino mai iaia, koia a Satani te Tiaporo ra. I te akara anga kua tuatua teia vaerua patoi i te Atua ra e kare te au tangata e tavini atu i te Atua ma tetai manako noinoi kore ra. Na tona pakari kua rauka ia Iehova i te akatupu i tetai pauanga ki te akakino anga a Satani kare e tau kia akakoreia​—au mirioni ua atu Au Kite Kerititiano i te tutuanga i te tuatua meitaki i tera are i tera are, i te au arataa, e te au ngai katoa oki kare ra i akapapaia.​—Iobu 1:8-11; 2:3-5; Maseli 27:11.

14. Eaa te “pakari uunaia ra” ta Paulo i taiku maira?

¹⁴ Ko tetai atu akakite anga i to te Atua ra pakari i te tutu anga i te tuatua meitaki ko te taputou no te Patireia uaorai ia e akakite anga i to te Atua ra pakari. Kua tata te apotetoro ko Paulo: “E tuatua pakari ra ta matou i te aronga karape: kare ra te tuatua pakari o teianei ao, e no te aronga tutara o teianei ao te ka tukuia ki raro ra: Te tuatua nei ra matou i te tuatua pakari a te Atua i te tuatua ngaro ra, [“ko te pakari uunaia ra,” NW] i akono takereia ra e te Atua ou teianei ao, kia meitaki tatou.” Ko taua “pakari uunaia ra” te tuatua ra i ta te Atua au ravenga no te akaopeanga i te meameaau tei akamataia ra i Edene. Kua akakiteia mai e Iesu Karaiti te pakari o taua tuatua ngaro ra, koia ra te tumu maata o taua tuatua meitaki no te Patireia o te Atua ra.a​—1 Korinetia 2:6, 7; Kolosa 1:26-28.

Te Tuatua Meitaki e to te Atua Tuatua Tau

15. Akapeea tatou i kite ei e Atua no te tuatua tau a Iehova ra? (Deuteronomi 32:4; Salamo 33:5)

¹⁵ E maata oki i te tuanga ma te tuatua tau te kite nei tatou i te puapinga maata o te tuatua “na mua” ia Mareko 13:10. E Atua tuatua tau a Iehova e kua akaketaketaia ma te takinga meitaki. Kua tuatua aia na roto i tana peroveta ko Ieremia: “Ko tei akatietie ra, teia tana e akatietie, koia i kite, e kua kite tikai aia iaku nei e, ko Iehova au, ko tei rave i te takinga-meitaki, te tuatua-tau, e te tuatua-tika, ki runga i te enua nei: ko taku ïa au mea inangaro, te tuatua mairā Iehova.”​—Ieremia 9:24.

16. Akapeea te akatutu anga e te anoanoia ra te tuatua tau i te orongaanga i te akamatakite na mua?

¹⁶ Akapeea te akaari anga mai i te tuatua tau o Iehova no runga i te tutuanga i te tuatua meitaki ra? E akatutu tatou i te reira ma tetai metua vaine tei tunu ra i tetai keke tiokoreti reka e ka kaingaia te reira me tae mai te au manuiri a muri akera i taua ra rai. Me ka akaruke ua aia i te reira ki runga i te kaingakai i te pia kaikai anga e kare e tuatuaanga i tetai tuatua ki tana tamariki e a ea te reira e kaingaiaʼi, eaa te manako matauia no te tamariki ra? E tamariki pouroa tatou i tetai tuatau ra! Ka anoano ra tetai mangamanga rima kia timata i taua keke ra! I reira me kare te metua vaine i oronga i te akamatakiteanga tau, e tumu apikepike ua tana no te papa anga. I tetai tua ra, me kua akataka meitaki atu aia e ka kaingaia taua keke ra a muri ake kia tae mai te au manuiri ra e no reira auraka e arapaki atu i te reira, ei reira ra kua orongaia e ia tetai akamatakiteanga taka meitaki. Me e akarongo kore tetai, te tau ra aia kia rave i te angaanga ngaueue kore e te tau oki.​—Maseli 29:15.

17. Akapeea ta Iehova akakite anga i te tuatua tau na roto i tetai mataara takake mei te 1919 mairai?

¹⁷ Kare a Iehova, i roto i tana tuatua tau, e rave i te angaanga akavaanga i teia akatereanga kino o te au mea nei ma te kore e akamatakiteanga tau na mua. E no reira, mei te 1919 mairai, i muri mai i ta te tamaki mua o te ao apaianga mai i te “au mamae no te mate,” kua akaunga a Iehova i tona Au Kite kia aere na roto i te ao katoa nei ma te akakitekite maroiroianga i te tuatua meitaki. (Mataio 24:7, 8, 14, NW) Kare e tika kia tuatua to te pa enua katoa ra kia karanga e kare ratou i kite i teia akamatakiteanga tau tikai.

Peea te Atea te Tutu Anga i te Ao Nei?

18. (a) Eaa te akakite anga te vaira no te rave angaanga a te Au Kite i te au ngai mamao ke ra? (e) Eaa etai atu akaraanga taau i kite ana?

¹⁸ Ko tetai akakite anga i te maata o teia angaanga apii anga i te ao katoa nei te kiteaia ra i te puka Last Places​—A Journey in the North. Kua akakite mai te tangata nana i tata e i tana akara anga i te au papa anga o te moana no te motu taka ke o Foula, koia tetai o te au Airani Tetirani i te pae tokerau o Tikotirani, kua akakiteia mai i te au papa anga e “takapini i te au motu katoa ra WKS (te au apinga ngaangaa), RKS (te au toka), LDGS (au toka toro atu ki vao), e te OBS (au apinga arairai).” Ko teia “e akamatakite anga i te aronga akatere pai kia kore e aere vaitata atu. E mea mataku maata tikai te moana takapini ia Foula e ngai kanapanapa i te vairanga maina, tei akariro i taua motu ra kia kore e aereia atu i te au tangata iati, te aronga aere atu no tetai ra, e pera katoa te aronga angaanga na te Ariki Vaine o Engarani, kare ra te reira i arai i te Au Kite o Iehova​—taku ia i kite i etai ra tokoiti ua i muri iora.” Kua tuatua ua maira aia: “Mei ta ratou i kimi matatio marie ra i roto i te au ngai kapakapa ua o te au oire mamaata e te Ao Tuanga Toru katoa no etai ei pipi, kua pera katoa ratou i te kimi anga pipi no to ratou akarongo i runga ia Foula mamao ra.” Kua kite aia e ko tetai tangata noo ki reira ko Andrew, e kopi tetai o Te Punanga Tiaki tei vaioia ki runga i tona ngai takainga atu ki te ngutupa i etai marama i mua akera. E kua tuatua katoa mai aia: “I tetai epetoma i muri mai kua kite au i tetai kopi o te [Awake! i roto i te reo Tenemaka] i te Vaeroe [au airani o te Tai Apatokerau] e e rua marama i muri mai ko tetai kopi o [Te Punanga Tiaki i te reo Tenemaka] i Nuuq, i Kerenirani.” Mei teaa ra te akakite anga meitaki i te angaanga maroiroi a te Au Kite o Iehova i taua au ngai o te tokerau ra!

Eaa te Akatamou ra i te Tutuanga a te Au Kite?

19, 20. (a) Eaa te akakeu ra i te Au Kite o Iehova kia rave tamou i te tutuanga? (e) Eaa etai au uianga te ka pauia i muri ake nei?

¹⁹ E tika rai, kare te tutuanga i tera are i tera are ki te au tangata ke i te mea ngoie ua, noatu rai eaa te manganui o te au mataiti o tetai e Kite aia. Inara eaa te tamou ra kia rave ua atu teia au Kerititiano? Ko to ratou akatapu anga ei Kerititiano e tetai tu manako no te apainga. Kua tata a Paulo: “Tuatua ua rai au i te evangelia, kare oku e akatietie anga: kare oki au e tika kia kore: e ae oki toku kia kore au e tutu i te evangelia!” E tuatua akakite ta te au Kerititiano mou te ka oronga i te ora, no reira akapeea e raukaʼi ia ratou i te tapu i te reira kia ratou uaorai? Ko te kaveinga tikai no te apa i te toto no te kore e oronga i te akamatakiteanga i te tuatau o te kino ko tetai tumu ia no te akakeu kia tutu i te tuatua meitaki ra.​—1 Korinetia 9:16; Ezekiela 3:17-21.

²⁰ Akapeea, i reira, te tutu anga i te tuatua meitaki? Eaa te taviri ki te autu anga o te Au Kite ra? Eaa te au tu o ta ratou angaanga orometua e te akaaerenga te ka tauturu kia akataka ia ratou e ko te akonoanga mou ra? Na ta tatou atikara te ka aru mai e pau i taua au uianga ra.

[Au Tataanga Rikiriki i Raro]

Maara Ainei ia Koe?

◻ Eaa te akataka maira i te Au Kite o Iehova mei te au orometua?

◻ Akapeea ta te tutuanga akaata mai anga i te aroa, te mana, e te pakari o te Atua ra?

◻ Akapeea te tutuanga i te tuatua meitaki i te akaata anga i to te Atua ra tuatua tau?

◻ Eaa te akatamou ra i te Au Kite o Iehova kia rave ua atu i ta ratou angaanga orometua?

[Au Tutu i te kapi 15]

Noatu rai akapeea te mamao te takake anga o te au tangata ra, te anoano nei te Au Kite o Iehova kia itae atu kia ratou ra