“Kua Vaitata te Rā Maata o Iehova”
“Kua vaitata te rā maata o Iehova, kua vaitata, e te rapurapu roa maira.”—ZEPHANIA 1:14.
1, 2. (a) Eaa teia ra maata ta te au Kerititiano e tapapa atu nei? (e) Eaa te au uianga ka inangaroia tatou i te ui, e eaa te tumu?
TE TAPAPA marie ra tetai vaine mapu i te tae anga mai o tona ra akaipoipoanga. Te akara takinga meitaki atura tetai vaine nui ki te anauanga o tana pepe. E aka inangaro tikai to te tangata angaanga roiroi i te akamata i te orote kua roa aia i te tiakianga. Eaa te apinga aiteite ia ratou? Te tapapa pouroa ra ratou i tetai ra maata—tetai ra te ka akakeu maata i to ratou au oraanga. E oonu to ratou au manako ngakau inara e aka tuke tikai. Ka tae mai te reira ra e tiaki ra ratou, e me tae mai ia, te irinaki ra ratou e kua papa ratou no te reira.
2 Te tapapa marie katoa ra te au Kerititiano mou i teia tuatau i te tae anga mai o tetai ra maata. Ko te “rā [maata] o Iehova” te reira. (Isaia 13:9; Ioela 2:1; 2 Petero 3:12) Eaa teia “rā o Iehova,” e aere maira e akapeea to te reira tae anga mai i te akakeuanga i te au tangata ravarai? Tei runga ravao, akapeea tatou i te akapapuanga e kua papa tatou no te reira tae anga mai? Ka anoano pakariia tatou kia kimi i te au pauanga ki teia au uianga i teia taime nei no te mea te akakite maira te au akapapuanga i te tikaanga o te au tuatua a te Pipiria te aru mai nei e: “Kua vaitata te rā maata o Iehova, kua vaitata, e te rapurapu roa maira.”—Zephania 1:14.
“Te Rā Maata o Iehova”
3. Eaa “te rā maata o Iehova”?
3 Eaa teia “rā maata o Iehova”? I roto i te au Tuatua Tapu, te tuatua “te rā maata o Iehova” te taiku ra i te au taime takake i rave ei a Iehova i te akavaanga i tona au enemi e kua akakaka i tona ingoa maata. Te au tangata tiratiratu kore o Iuda e Ierusalema e pera katoa te aronga kino pakari o Babulonia e Aiphiti, kua aro pouroa atu i te ‘au ra o Iehova’ i to ratou kite mai anga i ta Iehova akavaanga. (Isaia 2:1, 10-12; 13:1-6; Ieremia 46:7-10) Inara, te “rā maata [rava atu] o Iehova” tei te tuatau ki mua rai te reira. Ko te “rā” te reira e rave ei a Iehova i tana akavaanga i te aronga tei akakino i tona ingoa. Ka akamata te reira ma te akapouanga o “Babulonia Maata,” te patireia akonoanga pikikaa o te ao nei, e ka taopenga atu i te takoreanga o te toenga o te akatereanga kino o te au mea nei i te tamakianga o Aramakito.—Apokalupo 16:14, 16; 17:5, 15-17; 19:11-21.
4. Eaa te manganui o te tangata ka mataku ei i te ra o Iehova e aere viviki maira?
4 Me kua kite ratou me kare, ka tau te manganui o te au tangata kia mataku i teia ra e aere viviki mai nei. Eaa te tumu? Na roto i te peroveta ko Zephania, kua pau a Iehova: “E rā riri otooto taua rā ra, e rā manamanata e te kino, e rā akatanea e te pou, e rā poiri e te po ave, e rā tumurangi e te poiri tangotango.” E mea rikarika tikai! Tei runga ravao, kua karanga te peroveta e: “E e akamanamanata au i te au tangata nei . . . no te mea kua ara ratou ia Iehova.”—Zephania 1:15, 17.
5. Eaa te au manako papu o te au mirioni no runga i to Iehova ra, e eaa te tumu?
5 Inara, e mirioni ua atu te tapapa marie ra i te tae anga mai o te ra o Iehova. Eaa te tumu? Kua kite ratou e tuatau te reira no te ora e te akaoraanga no te aronga tuatua tika, te ra ka akangateitei maataia a Iehova e ka akatapuia tona ingoa kaka. (Ioela 3:16, 17; Zephania 3:12-17) Noatu me ka matakuia me kore ka tapapa marie ia te reira ra, tei runga maata te reira i te tu e akono ra te au tangata i to ratou au oraanga. Eaa toou manako ki te aere anga mai o te reira ra? Kua papa ainei koe no te reira? Kua akakeu ainei te tikaanga e te vaitata maira te ra o Iehova, i toou oraanga i teianei no te au ra tataki tai?
“E Kitea Mai ei e Aronga Taitoito”
6. Eaa te manakoanga o te tangata i te “ra o Iehova,” e eaa te au Kerititiano mou i kore ei e poitirere i teia?
6 Noatu te tu rapurapu o te reira turanga, kare te maataanga o te au tangata i te enua nei e manamanata ana no runga i te aere anga mai o te “rā o Iehova.” E aviri ana e e taitoito ana ratou i te aronga e akamatakite ra ia ratou i to te reira tae anga mai. Kare te au Kerititiano mou e poitirere ana i teia. Kua maara ia ratou te akamatakiteanga tei rekotiia e te apotetoro ko Petero: “Kia kite ra kotou i teia e, kia tae ki te au rā openga ra, e kitea mai ei e aronga taitoito, i te akono anga i ta ratou uaorai anoano. E te tuatua anga mai e, Teiea ua te aerenga mai nona i karangaia ra? te vai ua nei rai oki te au mea katoa nei mei te moe anga mairai o te ai metua ra, mei te maani anga mairai o te enua ra.”—2 Petero 3:3, 4.
7. Eaa te ka tauturu ia tatou i te akono tamou i tetai tu rapurapu?
7 Eaa te ka tauturu ia tatou i te patoi i te reira akamanakoanga ekoko e i te akono tamou anga i reira i tetai tu rapurapu? Te akakite maira a Petero kia tatou: “Ei akaaraara atu i to kotou ngakau pikikaa kore kia manako: Kia maara oki kotou i te tuatua i tuatuaia mai e te au peroveta tapu i muatangana, e te apiiia atu e matou e te au aposetolo a te Atu ra a te Ora.” (2 Petero 3:1, 2) To tatou akarongo anga ki te au akamatakiteanga totou, ka tauturu ia tatou kia ‘akaaraara atu i to tatou ngakau pikikaa kore kia manako.’ Penei kua rongo putuputu ana tatou i teia au akamaaraanga, inara e puapinga maata tikai te reira i teianei, i te taime i mua ana, kia akarongo ua atu rai tatou i teia au akamatakiteanga.—Isaia 34:1-4; Luka 21:34-36.
8. Eaa te manganui e kopae ei i te au akamaaraaraanga a te Pipiria?
8 Eaa ra tetai pae e kopae ei i teia au akamaaraanga? Te karanga ra a Petero: “Kua inangaro oki ratou i te akangaro i teia e, na te tuatua a te Atua tei anga i te rangi i taito ra, e te enua i vai ki raro i te tai e tei aranga ki runga i te tai: I mate ei te reira enua i te tapoki angaia e te tai.” (2 Petero 3:5, 6) Ae, e aronga tetai kare ratou e inangaro ana kia tae mai te ra o Iehova. Kare ratou e inangaro i to ratou oraanga kia tamanamanataia. Kare ratou e inangaro i te akamanako atu e e tutakianga ta ratou kia Iehova no to ratou tu oraanga karapii! Mei ta Petero rai i karanga mai, te noo ra ratou “i te akono anga i ta ratou uaorai anoano.”
9. Eaa te tu o te au tangata i te au tuatau o Noa e to Lota?
9 No to ratou “inangaro,” kua anoano teia aronga taitoito i te kopae e kua tauru mai ana a Iehova iaia ki roto i te au angaanga a te tangata nei i te tuatau i topa. Kua taiku a Iesu Karaiti e te apotetoro ko Petero ki teia nga tupuanga e rua—“te tuatau ia Noa ra” e “te tuatau ia Lota ra.” (Luka 17:26-30; 2 Petero 2:5-9) I mua ake i te Vaipuke, kare te au tangata i akarongo ana i te akamatakiteanga ta Noa i oronga mai. Mei te reira katoa, i mua ake i te akapouanga o Sodoma e Gomora, i roto i te mata o tana unonga tamaroa, “mei [tetai tangata] takatakata ua” rai a Lota.—Genese 19:14.
10. Eaa to Iehova manako i te aronga tei akarongo kore?
10 Kare i tuke i teia tuatau. I na, e akara ana i to Iehova manako i te aronga tei akarongo kore: “E akautunga atu au i te au tangata noo ua ki runga i ta ratou ota, tei karanga i to ratou ngakau e, Kare a Iehova e rave i te meitaki, kare rai oki aia e rave i te kino. E e riro ta ratou au apinga i te āru, e e akataneaia to ratou au are; e patu oki ratou i te au are, kare ra e noo ki roto, e ka tanu ratou i te kainga vine, kare ra e inu i te wina o te reira.” (Zephania 1:12, 13) Penei ka rave ua atu rai te au tangata i ta ratou au angaanga “matauia,” inara kare ratou e kite mai i tetai puapinga mutu kore mei ta ratou angaanga pakari. Eaa te tumu? No te mea ka tae poitirere mai te ra o Iehova, e te au apinga nui i te pae materia ta ratou i akaputu mai ana, kare rava e akaora ia ratou.—Zephania 1:18.
“Ka Tapapa Atu Rai”
11. Eaa te akoanga ka tau tatou i te akamanako?
11 Kare mei te ao kino e takapini nei ia tatou, kia akamanako tatou i te ako tei rekotiia e te peroveta ko Habakuka: “No te tuatau i akonoia ra taua orama nei, ei te openga ra e tuatua mai ei e kare e pikikaa; roa oti, ka tapapa atu rai; e tae tika mai ïa, e kare e tavarevare.” (Habakuka 2:3) Noatu me e akaraanga taroaroa te reira ra mei ta tatou akamanakoanga apa ua, kia akamaara tatou e kare a Iehova e taroaroa ana. Ka tano meitaki tona ra i te tae anga mai, i tetai ora kare te au tangata i manako atu ana.—Mareko 13:33; 2 Petero 3:9, 10.
12. Eaa ta Iesu i akamatakite mai, e akapeea teia i tuke ei mei te au angaanga a to Iesu au tavini tiratiratu?
12 I te akakiteanga i te puapinga i te tapapa atu anga i te ra o Iehova, kua akamatakite a Iesu i tetai au pipi ana, e ka ngaro katoa to ratou tu rapurapu. Kua totou aia no runga ia ratou: “Kareka te tavini kino e tuatua ua i roto i tona uaorai ngakau, Kare taku pu e tae vave mai: Kua timata atura i te pāpā i te aronga taeake tavini nona ra, e kai iora i te kai, inu iora i te kava, koia e te aronga katoa e akakona ra; Kia tae ki te rā manako koreia e ia, e te ora kitea koreia e ia ra, e tae mai ei te pu o taua tavini ra, E akataka ke atu ei iaia.” (Mataio 24:48-51) Ei tukeanga, te akono tiratiratu ra te tavini akono meitaki e te pakari i to te reira tu rapurapu. Kua tamou marie te pupu tavini i te akamatakite anga e kua akapapu mai e kua papa ia. Kua akataoonga a Iesu i te reira pupu i rungao i te “au apinga ravarai nana ra” i runga nei i te enua.—Mataio 24:42-47.
Te Anoano no te Rapurapu
13. Akapeea a Iesu i te akakiteanga i te inangaro no te tu rapurapu?
13 Kua anoano pakariia te au Kerititiano i te anere mataiti mua kia akono tamou i to ratou tu rapurapu. Kua inangaroia ratou kia akono viviki i tetai angaanga kia oro mei Ierusalema me kite atu ratou i te reira oire i te “takako angaia e te au nuku.” (Luka 21:20, 21) Kua tupu te reira i te mataiti 66 T.N. E akara ana e akapeea a Iesu i te akakiteanga i te inangaro no te tu rapurapu i te tua o te au Kerititiano i taua taime ra: “Te tangata i rungao i te are ra, auraka aia e eke ki raro e rave i tana apinga i roto i te are ra: Eiaa tei te kainga ra, e oki mai e tiki i tona kakau.” (Mataio 24:17, 18) I te akamanakoanga i te tikaanga e te akakite maira te tuatua enua e kua vai meitaki ua a Ierusalema e a mataiti, eaa te au Kerititiano i inangaroia ai kia viviki i te akarongo ki te au tuatua a Iesu i te mataiti 66 T.N.?
14, 15. Eaa te au Kerititiano i te anere mataiti mua i anoano pakariia ai kia akaruke viviki i te kite anga ia Ierusalema i te koropiniia anga e te au nuku vaeau?
14 Noatu e kua tika e kare te vaeau Roma i takore ana ia Ierusalema kia tae roa i te mataiti 70 T.N., kare te reira au mataiti i rotopu ra i manamanata kore ana. Kare rava! Kua ki taua au mataiti ra i te kino e te akamaringi anga toto. Kua akamarama mai tetai tangata tuatua enua i te turanga i roto ia Ierusalema i taua tuatau ra ei “tamakianga rikarika, kapiti atu ki te au angaanga takinga kino pakari.” Kua ikiia te au tane mapu kia akaketaketa i te au punanga, kia apai i te au apinga tamaki, e kia angaanga atu ki roto i te vaeau. Kua tereniia ratou i te au ra ravarai no te au angaanga vaeau. Te aronga tei kare i ariki ana i te au raveanga kino pakari kua manakoia ratou ei aronga pikikaa. Naringa kua noonoo ua atu te au Kerititiano i roto i te oire, ka kite mai ratou ia ratou uaorai i roto i tetai turanga kino pakari tikai.—Mataio 26:52; Mareko 12:17.
15 Kia akamanako meitaki e kua karanga a Iesu e kia akamata te “aronga i Iudea,” kare ko Ierusalema anake ua, i te oro. E puapinga tikai teia no te mea i roto i nga mea marama ua i to ratou akaateaanga mei Ierusalema mai, kua akamata akaou te au vaeau Roma i ta ratou au angaanga tamakianga. Te mea mua, kua akaviia a Galilea i te mataiti 67 T.N., e oti kua autu marie ia atu a Iudea i te mataiti tei aru mai. Kua akatupu teia i te taitaia maata i roto i te pa enua katoa. Kua ngata roa atu no tetai ngati Iuda i te oro atu mei Ierusalema uaorai. Kua paruruia te au aua o te oire, e tetai tangata ua atu te tauta ra i te oro, kua manakoia e te oro ra ki te au Roma.
16. Eaa te tu o te au Kerititiano o te anere mataiti mua ka anoanoia kia ora atu i te reira tuatau taitaia?
16 I te akamanakoanga i teia au manako katoatoa, ka marama ua tatou i te tumu i akakite ei a Iesu i te tu rapurapu o te reira turanga. Kua inangaroia te au Kerititiano kia akono i te au atinga, auraka e akatika ia ratou uaorai kia akaariu ke ia e te au apinga materia. Kia inangaro ratou i te “akaruke i [ta ratou] au mea katoa” kia rauka i te akarongo ki ta Iesu akamatakite anga. (Luka 14:33) Te aronga tei akarongo viviki e tei oro atu ki tetai tua mai o Ioridana, kua akaoraia ratou.
Akono Tamou i to Tatou Tu Rapurapu
17. Eaa tatou ka akaketaketa ai i to tatou tu rapurapu?
17 Te akakite meitaki ua maira te au totou a te Pipiria e te noo nei tatou ki roto tikai i te tuatau openga. Kare mei te taime mua rai, ka inangaroia tatou i te akaketaketa i to tatou tu rapurapu. Kare tetai vaeau i te tuatau au e kite ana i te taitaia e te kino o tetai tamakianga. Inara, ei tupuanga, me kare ona manako rapurapu kia vai matakite ua e kua kapiki poitirereia aia ki te tamakianga, penei i te akaraanga kare aia i papa meitaki, ka tupu te au tupuanga tumatetenga. Te tika katoa ra te reira i te pae vaerua. Me akatika tatou i to tatou tu rapurapu kia ngaro marie ua atu rai, penei kare tatou e papa meitaki i te patoi i te au tamakianga te ka tupu mai kia tatou e penei ka poitirere tatou me tae mai tikai te ra o Iehova. (Luka 21:36; 1 Tesalonia 5:4) Me e tangata tetai “tei unui ki muri mei te aruanga ia Iehova,” ko te taime rai teia no ratou kia kimi akaou iaia.—Zephania 1:3-6, NW; 2 Tesalonia 1:8, 9.
18, 19. Eaa te ka tauturu ia tatou kia akamanako meitaki tikai i te “tae anga mai o taua rā o Iehova ra”?
18 No reira rai te apotetoro ko Petero i ako ei ia tatou kia akamanako meitaki i te ‘tae anga mai taua rā o Iehova ra’! Akapeea tatou i te raveanga i teia? Tetai mataara koia oki na te piri atu anga ki roto “i te au angaanga tapu e te au ravenga no te tu akono i te Atua ra.” (2 Petero 3:11, 12, NW) Na te angaanga anga i roto i te reira au angaanga, ka tauturu ia tatou i te tapapa marie atu i te tae anga mai o te ‘rā o Iehova.’ Te tuatua Ereni tei uriia e e “akamanako meitaki tikai” tona aiteanga tumu, kia “tavivikiia.” Kare e rauka tikai ia tatou i te akaviviki i te tuatau e toe nei e tae ua mai to Iehova ra. Inara, ia tatou e tiaki ra i te reira ra, ka akaraanga viviki ua te pouanga i te tuatau me angaanga ua tatou i roto i ta te Atua tavinianga.—1 Korinetia 15:58.
19 Na te akamanako oonuanga ki runga i te Tuatua a te Atua e te tapapa atu anga i te au akamaaraanga tei kiteaia i roto i te reira ka tauturu katoa ia tatou i te rave i teia—“tapapa atu (tatari e kia akaviviki) te aere anga mai” o tera ra, ae, kia “tapapa ua atu rai” i te reira. (2 Petero 3:12, The Amplified Bible; The New Testament, na William Barclay) Kapiti mai i roto i teia au akamaaraanga ko te au totou e manganui te totou ra, kare anake ua i te tae anga mai o to Iehova ra mari katoa te au akameitakianga maata tei orongaia mai ki te aronga te ‘tapapa atu ra i te ra o Iehova.’—Zephania 3:8.
20. Eaa te raurauanga ta tatou ka tau kia akamanako meitaki?
20 Ko te taime tikai teia no tatou katoatoa kia akono meitaki i te raurauanga tei orongaia mai na roto i te peroveta ko Zephania: “Kare kotou i rokoia e te rā riri o Iehova. E kimi ia Iehova, e te aronga akaaka ravarai o te enua nei, ko tei rave i te tuatua-tau nana ra; e kimi i te tuatua-tika, e kimi i te akaaka, peneiake kotou ko te uunaia i te rā e riri ei a Iehova ra.”—Zephania 2:2, 3.
21. Eaa te akakoroanga a te au tangata o te Atua i te mataiti 2007?
21 Kua tau tikai, i reira, te irava mataiti tei ikiia no te mataiti karena 2007: “Kua vaitata te rā maata o Iehova.” Kua papu te au tangata o te Atua e “kua vaitata, e te rapurapu roa maira” te reira. (Zephania 1:14) “Kare e tavarevare.” (Habakuka 2:3) E no reira, ia tatou e tapapa atura i te reira ra, kia matakite ua atu rai tatou i te au tuatau e noo nei tatou, i te kite anga e te akatupuanga openga o teia au totou, te vaitata mai nei!
Ka Rauka Ainei ia Koe te Pau?
• Eaa “te ra maata o Iehova”?
• Eaa te manganui i kopae ei i te tu rapurapu o te au tuatau?
• Eaa te au Kerititiano i te anere mataiti mua i inangaroia ai i te rave ma te tu rapurapu?
• Akapeea tatou i te akamaata atu anga i to tatou tu rapurapu?
[Tataanga i te kapi 19]
Ko te irava mataiti teia no te 2007: “Kua vaitata te rā maata o Iehova.”—Zephania 1:14.
[Au Tutu i te kapi 16, 17]
Mei te tuatau rai o Noa, ka poitirere te aronga taitoito me rave a Iehova i tana angaanga
[Tutu i te kapi 18]
Kare te au Kerititiano i taroaroa ana i te rave i tetai angaanga i to ratou kiteanga ia Ierusalema i “te takako angaia e te au nuku”