Oro Anga kia Ora i Mua Ake i te “Mate Maata”

“Kia akara ra kotou ia Ierusalema i te takako angaia e te au nuku, . . . te aronga e noo i Iudea ra, ka oro ratou ki te maunga i reira.”​—LUKA 21:20, 21.

1. Eaa ra ka rapurapu ei te oro anga no te aronga te vaira ei tuanga no teianei ao?

NO TE katoatoa e tuanga ra no te ao o Satani, e mea rapurapu te oro anga. Me kia ora ratou i te takore atu angaia teianei akatereanga o te au mea i te enua nei, ka tika ratou kia akakite papu e kua rave ratou i te turanga ngaueue kore no ratou ki to Iehova tua e kare ratou i te tuanga no te ao ko Satani ra tona tutara.​—Iakobo 4:4; 1 Ioane 2:17.

2, 3. Eaa te au uianga te piri atura ma ta Iesu au tuatua tataia ia Mataio 24:15-22 ta tatou ka uriuri manako?

² I tana totou maata no runga i te openga o te akatereanga o te au mea nei, kua akaketaketa maira Iesu i te umuumu maataia o taua oro anga ra. E putuputu tatou i te uriuri manako i tei tataia ra ia Mataio 24:4-14; inara, kare i meangiti mai te puapinga o tei aru maira i te reira. Te akamaroiroi atu nei matou ia koe kia eeu i taau Pipiria i teianei e ka tatau ei i nga Mat 24 irava 15 ki te 22.

³ Eaa te aite anga o taua totou ra? I te anere mataiti mua ra, eaa “te mea rikarika e taneaʼi ra”? Eaa te akakiteia maira i to te reira tu anga “i te ngai–tapu ra”? Eaa te puapinga te reira tupu anga kia tatou nei?

“Ko tei Tatau ra ka Akono ïa Kia Kite”

4. (a) Eaa ta Daniela 9:27 i tuatua te ka aru mai i te kopae anga te ngati Iuda ra i te Mesia? (e) I te taiku anga i teia, eaa ra, e tikai, a Iesu i tuatuaʼi, “Ko tei tatau ra ka akono ïa kia kite”?

⁴ E akara ia Mataio 24:15 e kua taiku maira Iesu i tei tataia ki roto i te puka a Daniela. I te Dan pene 9 o taua puka ra ko tetai totou tei akakite maira i te aerenga mai o te Mesia e te akavaanga tei akatupuia ra ki te iti tangata ngati Iuda no te kopae keanga iaia. Te tuatua ra te tuanga openga o te Dan 9 irava 27 ra e: “E riro ei roto i te iero taua mea rikarika e akatanea ra.” Kua akapiriia atu taua tuanga o te totou a Daniela ra e te ikuiku anga mua a te ngati Iuda ra ki te akaviiviianga a Antiochus IV i te iero o Iehova i Ierusalema i te rua anere mataiti M.T.N. Inara kua akamatakite a Iesu: “Ko tei tatau ra ka akono ïa kia kite.” Ko te taviivii anga a Antiochus IV i te iero ra, noatu rai e mea rikarika ia, kare ra i tupu te akatanea anga​—o Ierusalema, o te iero, me kare o te iti tangata ngati Iuda ra. No reira i te akara anga te akamatakite ra a Iesu ki te aronga akarongo atura kiaia e kare i topa ake te tupu anga o te reira mari ra te vai maira i te tuatau ki mua.

5. (a) Akapeea ta tetai akaaiteite anga i nga tataanga Evangeria i te tauturu anga ia tatou kia akataka i te “mea rikarika” o te anere mataiti mua ra? (e) Eaa ra a Cestius Gallus i tuku viviki atu ei i te nuku o Roma ki Ierusalema i te 66 T.N.?

⁵ Eaa “te mea rikarika” ta ratou kia akara atu? E mea tau ra kia akamanako ana e te tuatua ra te tataanga a Mataio: “Kia akara atu kotou i te mea rikarika e taneaʼi ra, . . . i te tu anga i te ngai-tapu ra.” Inara, ko te tataanga aiteite atu ia Luka 21:20 te tatau ra: “Kia akara ra kotou ia Ierusalema i te takako angaia e te au nuku, kua vaitata rava tona pou i reira, kia kite mai kotou.” I te 66 T.N., kua kite te au Kerititiano tei noo ra ki Ierusalema i ta Iesu i totou maira. E papaanga au tupu anga tei kapiti ra i te tamaki anga i rotopu i te au tutara ngati Iuda e to Roma au tutara ra kua taki atu ki to Ierusalema ra riroanga ei tetai ngai meameaau anga ia Roma. Ei tupu anga, kua mura te ta ua i roto ia Iudea, ia Samaria, ia Galilea, te Dekapoli, e Phenia, na te tokerau atu ki roto ia Suria, e na te tonga atu ki roto ia Aiphiti. Kia raukaʼi i te akaora i tetai tuanga au ki te reira ngai o te Patireia o Roma, kua tuku viviki atura Cestius Gallus i te nuku vaeau mei Suria atu ki Ierusalema, ta te au ngati Iuda i karanga ra ei to ratou “oire tapu.”​—Nehemia 11:1; Isaia 52:1.

6. Eaa ra i tikai e ko tetai “mea rikarika” te ka rauka kia akariro kia akatanea kua kitea “te tu anga i te ngai-tapu ra”?

⁶ E mea matauia no te au nuku o Roma kia apai aere i te au reva, me kare potonga kakau, ta ratou i manako ei mea tapu mari ra kua manako te au ngati Iuda i te reira ei akamori itoro. E mea puapinga kia kite, ko te tuatua Epera tei uriia “e mea rikarika” i te puka a Daniela te taiku maataia ra no te au itoro e te akamori itoro.a (Deuteronomi 29:17) Noatu rai te araianga a te au ngati Iuda, kua tomo atu te au nuku o Roma ra ma ta ratou au reva akamori itoro ra ki roto ia Ierusalema ia Noema 66 T.N. e kua akamata i te ko atu i raro i te paruru o te iero ra i te pae tokerau. Kare e ekoko anga no te reira​—ko tetai “mea rikarika” te ka rauka kia akariro takiri ia Ierusalema kia akataneaia i reira “te tu anga i te ngai-tapu ra”! Inara akapeea e raukaʼi i tetai ua atu i te oro?

Kua Rapurapu no te Oro Anga!

7. Eaa ta te vaeau Roma i rave ma te tapapa koreia?

⁷ E poitirere ua e no tetai tumu kare i kitenaia e te manako tangata, i te tuatau akara anga ngoie ua kia rauka a Ierusalema, kua akaruke ua maira te nuku o Roma. Kua arumakiia e to te ngati Iuda taua au nuku o Roma tei oki ke atu ra inara kia tae ua atu ki Anetipateri, vaitata i te 50 kiro mita mei Ierusalema ra. Kua oki akaou mai ratou. I te tae anga mai ki Ierusalema, kua akaputu atu ratou ki roto i te iero kia parani i ta ratou ravenga no te tamaki atu. Kua tauru kapiti katoaia te aronga mapu ei akaketaketa i to ratou nuku e kia tavini i roto i te vaeau. Ka o atu ainei te au Kerititiano ki roto i te reira? Noatu rai me ka kopae ke ratou i te reira, ka vai ua ainei ratou ki roto i taua ngai kino ra me ka oki akaou mai te au nuku o Roma ra?

8. Eaa te angaanga rapurapu ta te au Kerititiano i rave no te akarongo anga i ta Iesu au tuatua i totou maira?

⁸ Kare i roa kua rave te au Kerititiano i Ierusalema e i Iudea katoa oki kia tau ki ta Iesu Karaiti i totou akamatakite maira e kua oro ke atu ki vao i taua ngai kino ra. Kua rapurapu no te oro anga! I muri akera kua tae atu ratou ki te au maunga ra, e penei kua noo tetai papaki ki Pela, i te enua i Perea ra. Te aronga tei tuku ra ki to ratou ngakau i ta Iesu akamatakiteanga kare i ariu neneva ua ki muri kia tauta i te apai i ta ratou au apinga. (Akaaite ia Luka 14:33.) I te akarukeanga i raro ake i taua au turanga ra, kua kite tikai te au metua vaine te nui ra e te au metua vaine e pepe ta ratou i te tu ngata taua aerenga ra na runga i te vaevae. Kare to ratou oro anga i tamanataia e te au ture anga ra Tapati, e noatu te vaitata maira te tuatau paroro, kare ra i tae mai ake. Te aronga tei akarongo ra i ta Iesu akamatakiteanga kia oro viviki atu kare i roa kua tae meitaki atu ki vao ia Ierusalema e Iudea oki. I runga tikai to ratou ora anga i te reira.​—Akaaite ia Iakobo 3:17.

9. Akapeea te viviki te oki akaou mai anga o te nuku o Roma ra, e eaa te tupu anga?

⁹ I te mataiti tikai i muri mai, i te 67 T.N., kua rave akaou to Roma i ta ratou ravenga tamaki i te ngati Iuda. Ko Galilea te enua mua i akaviia. I te mataiti aru mai, kua akataneaia a Iudea. Kia tae ki te 70 T.N., kua koropiniia a Ierusalema uaorai e te au nuku o Roma. (Luka 19:43) Kua kino roa te mate pongi. Kua ta ua te aronga mou ereereia ra ia ratou uaorai i roto i te oire ra. Ko tetai ua atu tei tauta ra kia aere ke atu aia kua taiaia ia. Ko tei tupu kia ratou ra, kua tau tikai ki ta Iesu i tuatua ra e “mate maata” ia.​—Mataio 24:21.

10. Me ka tatau tatou ma te kite, eaa tetai atu apinga ta tatou ka manako te vai maira ki mua?

¹⁰ Kua oti takiri ainei ta Iesu i akakite maira i te reira? Kare, e maata atu te aere maira. Mei, ta Iesu i tuatua ra, kia tatau tatou i te au Tuatua Tapu ma te kite, kare tatou e marama kore e eaa te vai maira ki mua. Ka manako papu katoa tatou i tona au aiteanga i to tatou uaorai oraanga.

Te “Mea Rikarika” i Teia Tuatau Nei

11. I roto i teea nga tuatua anga e rua ta Daniela ra taiku anga i te “mea rikarika” ra, e eaa te tuatau te uriuriia ra i reira?

¹¹ E tamanako ana e, kapiti katoa ki ta tatou i kite ia Daniela 9:27, te vaira, ia Daniela 11:31 e i te Dan 12:11, etai atu taiku anga i “te mea rikarika e taneaʼi ra.” Kare i uriuriia i nga irava i muri akenei te akapouanga ia Ierusalema. Ko te tika, ko tei tuatuaia ia Daniela 12:11 te mama maira i nga irava e rua i muri ake i te taiku anga i “te tuatau openga.” (Daniela 12:9) Te noo nei tatou i taua tuatau ra mei te 1914 mairai. No reira ka tau tatou kia matakite i te akataka i “te mea rikarika e taneaʼi ra” e kia papu i reira kia aere ke mai tatou ki vao i taua ngai kino ra.

12, 13. Eaa ra i tau ei kia akataka i te Kapitianga Enua ei te “mea rikarika” ia o teia tuatau nei?

¹² Eaa te reira “mea rikarika” i teia tuatau nei? Te tou atura te au akapapu anga ki te Kapitianga Enua, tei akamata maira i te 1920, i muri poto ake i te tomo anga teianei ao ki tona tuatau openga. Inara akapeea te reira e riro ei ei tetai “mea rikarika e taneaʼi ra”?

¹³ Kia maara, ko te tuatua Epera no te “mea rikarika” te taiku maataia ra i te Pipiria ma te tuatua anga i te au itoro e te au ravenga akamori itoro. I akamoriia ainei te Kapitianga ei itoro? E tika kua peraia ia! Kua akatuia e te au orometua “i te ngai-tapu,” e kua rave to ratou au tangata i te akamori anga inangaro i te reira. Kia akakite te Konitara Taokotaianga o te Au Akonoanga o Karaiti i Marike e ko te Kapitianga “te akakite anga poritiki i te Patireia o te Atua ki runga i te enua nei.” Kua rauka mai i te Akaaere U.T. tetai akaputu anga mere maatamaata mei ko mai i te au pupu akonoanga ra i te raurau anga kia akatikaia te Koreromotu a te Kapitianga Enua. Kua akapaapaa te pupu akaaere o te au akonoanga Papetito, te Ekaretia, e te Perepitero i Peritane e ko te reira “anake te apinga te vai nei no te raukaanga [te au i runga i te enua nei].”​—Akara ia Apokalupo 13:14, 15.

14, 15. Na roto i teea mataara ta te Kapitianga e te Taokotaianga Enua i muri akera i riro ei kia tu i “te ngai-tapu ra”?

¹⁴ Kua akanooia te Patireia Mesia o te Atua ki te au rangi ra i te 1914, inara kua rave to te pa enua i te maro no to ratou uaorai ngateitei anga. (Salamo 2:1-6) I te akamana angaia mai anga te Kapitianga Enua, kua akakite ke ana to te pa enua tei oti ua akera te tamaki anga i te tamaki mua o te ao, e pera katoa te au orometua tei akameitaki ra i to ratou au nuku, e kua akaruke ratou i te ture a te Atua ra. Kare ratou e akara atu ia Karaiti ei Ariki. E no reira kua oronga ratou ki tetai akaaerenga na te tangata i te tuanga a te Patireia o te Atua ra; kua tuku ratou i te Kapitianga Enua “i te ngai-tapu,” ki te ngai kare nona.

¹⁵ Ko te komono i te Kapitianga ra, koia te Taokotaianga Enua kua tupu mai ia Okotopa 24, 1945. I muri akera, kua akapaapaaia e te au pope o Roma te Taokotaianga Enua ei “te manakonako openga no te rotai anga e te au” e “te akapapa anga teitei roa no te au e te tuatua tau.” Ae, ko te Kapitianga Enua, ma tona komono, koia te Taokotaianga Enua, kua riro tikai ei itoro, ei “mea rikarika” i te mata o te Atua e tona au tangata oki.

E Oro Ke Mei Teaa?

16. Ka tau te aronga inangaro i te tuatua tika kia oro ke atu i teaa i teia tuatau nei?

¹⁶ I te “akara anga” i teia, i te kiteanga eaa taua akaaerenga o te pa enua katoa ra e akapeea te reira i te akamori angaia ei itoro, ka tau te aronga inangaro i te tuatua tika kia oro ki te ngai e oraʼi. Kia oro ke ki vao i teaa? Ki vao i te tu tikai i teia tuatau o tei akatutuia maira e Ierusalema tiratiratu kore ra, koia, a Kerititome, e ki vao katoa ia Babulonia Maata, koia te akatereanga akonoanga pikikaa o te ao katoa nei.​—Apokalupo 18:4.

17, 18. Eaa te akatanea anga ta te “mea rikarika” o teia tuatau nei ka akatupu?

¹⁷ Kia maara katoa oki, e i te anere mataiti mua ra, i te aere atu anga te nuku o Roma ma tona reva akamori itoro ki roto i te oire tapu o te au ngati Iuda ra ko tana akakoro anga e kia akatanea ia Ierusalema e tana akatereanga akamori. I to tatou tuatau nei ka aere mai te akatanea anga, kare ki runga i tetai oire anake ua, e kare oki ki runga ia Kerititome anake ua, mari ra ki runga i te akatereanga akonoanga pikikaa o te ao katoatoa.​—Apokalupo 18:5-8.

¹⁸ Ia Apokalupo 17:16, te totouia maira e ko tetai puaka taae kutekute akatutuia ra, kua akapapuia ia ko te Taokotaianga Enua, ka ariu atu ki runga ia Babulonia Maata tei aite ra ki te vaine akaturi e ka akapou vinivini atura iaia. Na roto i te tuatua taka meitaki, te na ko ra ia: “E nga tara okotai ngauru taau i akara ra, e te puaka taae ra, e akaviivii ïa i taua vaine akaturi ra, e e pou oki aia ia ratou i te āru, e e apinga kore ua aia, e e kai i tona kopapa, e e tutungi iaia ki te ai.” Eaa ta teia ka akatupu e mea mataku ia kia tamanakoia. Ka riro ia ei openga no te akonoanga pikikaa no te au tu ravarai i te au tuanga katoatoa o te enua nei. Na teia tikai e akaari e kua akamata te mate maata.

19. Eaa te aronga e tuanga no te Taokotaianga Enua ra mei tona akamata anga maira, e eaa teia i riro ei ei apinga maata kia manakoia?

¹⁹ E mea tau kia akamanakoia e mei te akamata anga mairai o te Taokotaianga Enua i te 1945, ko te aronga Atua kore, kare e akonoanga e maata ratou i roto i tona au mema ra. I etai tuatau takapini te ao katoa nei, kua riro na taua aronga tuke ra te manako i tapupu ketaketa me kare i arai takiri te au ravenga akonoanga. Inara, i nga mataiti tokoiti kua topa akenei, i te au ngai e manganui kua mama mai te taomi anga a te kavamani ki runga i te au pupu akonoanga. Ki etai papaki tangata penei i te akara anga e kua kore atu tetai ua atu kino ki te akonoanga.

20. Eaa te tu manako anga ta te au akonoanga o teianei ao i akatupu no ratou uaorai?

²⁰ Te rave ua atura te au akonoanga o Babulonia Maata ei tetai mana ta ua e te akatupu pekapeka i teianei ao. E putuputu te au tumu tuatua o te nuti i te akataka mai i te aronga tamaki e te au pupu tamataku na te taikuanga i ta ratou akonoanga e piri atura. Kua rave maroiroi te au akava no te meameaau e te au vaeau kia tomo atu ratou ki roto i te au iero kia tapu i te ta ua i rotopu i nga akonoanga tuke ra. Kua oronga moni tauturu te au pupu akonoanga ki te orureau poritiki. Kua tamanata te tu makitakita o te au akonoanga i te tauta anga a te Taokotaianga Enua kia tamou marie i te pirianga tau i rotopu i te au pupu eteniki ra. I te aruaruanga i te akakoro anga no te au e te tinamou, kua anoano etai o roto i te Taokotaianga Enua kia takoreia atu tetai ua atu mana akonoanga te tu maira ki mua i to ratou mataara.

21. (a) Naai e akataka aea a Babulonia Maata e akapouiaʼi? (e) Eaa te tau ra kia rapurapu te raveia i mua ake i reira?

²¹ Te vai katoa ra tetai atu tumu puapinga maata kia akamanakoia. Noatu rai e ka taangaangaia nga tara vaeau no roto mai i te Taokotaianga Enua kia akapou atu ia Babulonia Maata, ko te reira akapouanga e akakite anga tikai i te akavaanga tu-Atua. Ka tupu te raveanga i te akavaanga ra i ta te Atua tuatau akatakaia. (Apokalupo 17:17) Eaa ta tatou ka rave i teianei? “Ka aere ke mai ana [tatou] ki vao”​—ka aere ke mai ana ki vao ia Babulonia Maata—​ta te Pipiria pauanga.​—Apokalupo 18:4.

22, 23. Eaa te o atura ki taua oro anga ra?

²² Kare teia oro anga kia ora i te aere anga ki tetai ngai ke, mei ta te au Kerititiano ngati Iuda i rave ra i te akarukeanga ia Ierusalema. E oro ke anga ia ki vao i te au akonoanga o Kerititome, ae, ki vao i tetai ua atu tuanga o Babulonia Maata ra. Tona aite anga e akataka keanga takiri ia koe uaorai kare i te au akaaerenga akonoanga pikikaa anake ra mari katoa ra ki vao i ta ratou au peu e te vaerua ta ratou e akono ra. E oro anga ia ki te ngai e oraʼi ki roto i te akaaerenga teokaratiki a Iehova ra.​—Ephesia 5:7-11.

²³ I te akataka anga mua a te au tavini akatainuia o Iehova ra i te mea rikarika o teia tuatua nei, koia te Kapitianga Enua, i muri ake i te Tamaki Mua o Teianei Ao ra, eaa ta te Au Kite i rave? Kua oti ke ana ia ratou i te kiriti mai i to ratou mema anga ma te au akonoanga o Kerititome. Inara kua kite marie ratou e te mou ra ratou i etai au peu e te au ravenga a Kerititome, mei te taangaanga i te koroti e te akono i te Kiritimiti e etai atu au orote peikani ra. I to ratou kite anga i te tuatua mou no teia au apinga, kua rave viviki ua ratou. Kua tauru ratou ki to ratou ngakau i te ako anga ia Isaia 52:11: “Ka aere kotou, ka aere kotou, ka aere kotou ki vao; auraka e arapaki ua atu i tetai mea viivii ra; e aere kotou ki vao mei rotopu mai iaia ra; kia mā kotou, e tei apai i te āriki a Iehova ra.”

24. Mei te 1935 mairai, koai ma te kapitiia maira ki roto i te oro anga?

²⁴ E maata oki mei te 1935 maira, e urupu tupuanga maata no etai ke ra, e au tangata tei takave i te manakonako kia ora e tuatau ua atu ki runga i tetai enua parataito, kua akamata katoa i te rave i te reira. Ko ratou katoa oki ‘kua kite i te mea rikarika i te tu anga ki roto i te ngai-tapu ra,’ e kua kite ratou i tona aite anga. I muri ake i te tuku anga i ta ratou tika kia oro ki vao, kua rave ratou kia kiritiia mai to ratou ingoa mei roto mai i te akapapa anga mema o te au akaaerenga e tuanga ra no Babulonia Maata.​—2 Korinetia 6:14-17.

25. Eaa katoa tetai apinga umuumuia i te pae atu i te momotu anga i etai ua atu piri anga penei te mou ra tetai tangata ma te akonoanga pikikaa ra?

²⁵ Inara, e maata atu te o maira ki te oro anga ki vao ia Babulonia Maata e te akarukeanga i te akonoanga pikikaa. E tere atu oki i to te aere anga ki etai au uipaanga tokoiti ua i te Are Uipaanga Patireia me kare te aereanga ki vao i te tutu aere i te tuatua meitaki e tai me kare e rua taime i te marama. Penei tei vao tetai tangata i te pae kopapa ia Babulonia Maata, inara kua akaruke takiri ainei aia i te reira ki muri? Kua akataka ke ainei aia iaia uaorai mei teianei ao ko Babulonia Maata ra tetai tuanga maata nona? Te mou ra ainei aia i taua au apinga te akaata maira i tona vaerua​—e vaerua te aviri ra i ta te Atua au turanga tuatua tika? Te manako meangiti ua ra ainei aia i akonoanga tau no te ainga e te tiratiratu o te akaipoipo anga? Te akaketaketa ra ainei aia i tona uaorai manako no te apinganui kopapa kia maata atu i to te pae vaerua? Kare e tika kia tuku iaia uaorai kia aru i teianei akatereanga o te au mea nei.​—Mataio 6:24; 1 Petero 4:3, 4.

Auraka e Tuku i Tetai Apinga Kia Arairai i Toou Oro Anga!

26. Eaa te ka tauturu ia tatou kare e kia akamata ua i te oro anga mari ra kia akaoti meitaki i te reira?

²⁶ I ta tatou oro anga ki te ora, e mea tau kia kore tatou e akara ki muri ma te manako anoano atu i te apinga. (Luka 9:62) Ka tau tatou kia tamou ngaueue kore i to tatou manako e te ngakau ki runga i te Patireia o te Atua e te tuatua tika nona ra. Te papu ra ainei to tatou manako kia akakite i to tatou akarongo na te kimianga i teia na mua, ma te irinaki anga e ka akameitaki a Iehova i taua aerenga tiratiratu ra? (Mataio 6:31-33) Ka tau to tatou irinaki anga akatumuia ki runga i te Tuatua Tapu kia akakeu ia tatou i taua akakoro anga ra ia tatou e tapapa atura i te eeuanga mai o te au tupu anga puapinga maata ki teianei ao.

27. Eaa ra i puapinga maataʼi kia manako papu no runga i te au uianga te uiia nei i konei?

²⁷ Ka akamata te akatupu anga i te akavaanga tu-Atua ma te akapou anga ia Babulonia Maata. Ka takoreia atu taua patireia akonoanga pikikaa mei te vaine akaturi ra e tuatau ua atu. Te vaitata ra taua tuatau ra! Eaa to tatou turanga ei aronga tatakitai me tae mai taua tuatau manakoia ra? E kia tae ki te take o taua mate maata ra, kia akapouia te katoa o ta Satani akatereanga rave kino ra, ka kiteia tatou ki runga i teea tua? Me ka rave tatou i te angaanga tau i teianei, kua papu to tatou ora i reira. Te akakite maira Iehova kia tatou: “Ko tei akarongo mai iaku ra, ka noo marie ua ïa ma te ora.” (Maseli 1:33) Na te tavini tamou marie anga ia Iehova ma te tiratiratu e te rekareka i te tuatau openga o teianei akatereanga, penei ka tau tatou kia tavini atu ia Iehova e tuatau ua atu.

[Tataanga Rikiriki i Raro]

Maara Ainei ia Koe?

◻ Eaa te “mea rikarika” o teia tuatau nei?

◻ Na roto i teea tu i riro ei te “mea rikarika . . . i te ngai-tapu ra”?

◻ Eaa te o atura i te oro anga ki te ngai e oraʼi i teianei?

◻ Eaa ra i rapurapu ei taua angaanga ra?

[Tutu i te kapi 16]

Kia oraʼi, kua oro te au pipi a Iesu ma te kore e taroaroa