Akatakaanga Marama i to Karaiti Tuatau Parutia

“E kia tae maira te Tamaiti a te tangata ma tona kakā, . . . e nana e akataka ia ratou.”​—MATAIO 25:31, 32.

1. Eaa ta te au orometua o Kerititome i akakite mai i te aite anga o te au tuatua ia Mataio 24:3 ra?

E TORU ra i mua ake i to Iesu matenga, kua aere maira tana nga pipi e a kiaia e kua pati akatenga atura: “E akakite mai koe ia matou i te tupu anga o taua au mea nei, e te akairo o toou aerenga mai [Ereni, pa·rou·siʹa], e te openga o teianei ao?” No etai au anere mataiti kua akataka mai te au orometua e te aronga tata o Kerititome i teia au tuatua na Iesu ia Mataio 24:3 (King James Version) i te aite anga e ka kite akaouia aia i te kopapa e ka akaraia e te au tangata ravarai. E no reira, kua apii ratou e ka oki akaou mai a Karaiti ma te akaari anga maata mai e te akara anga kaka. Kua taiku ratou i te reira e ko te rua o to Karaiti aere anga mai. Inara e tika ainei ta ratou manakoanga?

2, 3. (a) Eaa te tuke anga ta te Voriumu 2 o te Studies in the Scriptures i akakite mai i nga tuatua “aerenga mai” e te tuatau “parutia”? (e) Eaa ta te au tangata o Iehova ra i kite no runga i te aite anga o te pa·rou·siʹa o Karaiti ra?

² Kia tae mai ki te 1889, ei aronga akakaka i te marama i taua 19 anere mataiti ra, kua rauka ke ana i tei akatainuia a Iehova ra te akatikatika anga i te tumu no to Karaiti oki anga maira. I te Voriumu 2 o te Studies in the Scriptures, nga kapi 158 ki te 161, kua tataia e te peretiteni mua o te Totaiete Punanga Tiaki Puka Tapu e te Pepa Akonoanga ko Charles T. Russell e: “Ko te parousia . . . te akataka maira e parutia, e kare rava e tau kia uriia e aerenga mai, mei to te Puka Tapu matauia o te reo Engarani ra . . . Ko te ‘Emphatic Diaglott,’ tetai urianga puapinga maata no te Koreromotu Ou ra, kua uri tika ia i te parousia, e parutia . . . , kare e e aerenga mai, mei te mea rai e te aere mai ra, mari ra e parutia, mei muri ake i te taenga maira [a Iesu], kua karanga e, ‘Mei te tuatau ia Noa rai, ka pera katoa te parousia [parutia] te Tamaiti a te tangata i reira.’ E akara, e kare te akaaiteite anga i rotopu i te aerenga mai o Noa e te aerenga mai o to tatou Atu . . . Ko te tuke anga, i reira, ko te tuatau te vaira a Noa i rotopu i tona au tangata ‘i mua ake i te vaipuke,’ e te tuatau parutia o Karaiti i te ao nei, i te rua o tona tae anga mai, ‘i mua ake i te ai’​—koia te taitaia maata roa o taua Rā o te Atu [o Iehova] e akaopeiaʼi teia tuatau nei.”​—Mataio 24:37.

³ E no reira te marama meitaki ra te au tangata o Iehova i te 19 anere mataiti ra e ko te pa·rou·siʹa o Karaiti e akara koreia ia e te mata. Kua rauka katoa oki ia ratou te marama anga e ko te openga o te Tuatau o te Kenetara ra ka tupu ia i te tuatau pururu anga rau o te 1914. I te tupu anga te akamarama anga i te pae vaerua, kua kite ratou i muri akera e kua akateronoia a Iesu Karaiti i te rangi ra ei Ariki no te Patireia i taua mataiti rai, i te 1914.​—Maseli 4:18; Daniela 7:13, 14; Luka 21:24; Apokalupo 11:15.

“Te Tuatau Parutia o to Tatou Atu”

4. “Te tuatau parutia o to tatou Atu ko Iesu Karaiti” te taiku ra i teaa?

⁴ I to tatou tuatau nei, i reira, eaa te aite anga o te tuatua Puka Tapu “te tuatau parutia o to tatou Atu ko Iesu Karaiti”? (1 Tesalonia 5:23, NW) Kua akakite mai tetai tangata mana e ko te tuatua “parutia,” pa·rou·siʹa, “kua riro ei tuatua matauia no tetai tutaka anga na tetai tangata e taoonga teitei tona, e tau meitaki no te au ariki e te au emepera i tetai tuanga enua.” E no reira ko teia tuatua te taiku ra i to te Atu ko Iesu Karaiti vai anga parutia ei Ariki, mei te 1914 mairai, i muri mai i tona akaterono angaia i te rangi ra. Tei konei aia ma te kore e akara mataia, i ‘te akavi anga i rotopu i tona au enemi ra,’ te tutara ra ei Ariki i te akatupu anga i teia totou akaueia maira. (Salamo 110:2) No etai 79 mataiti, kua kite te au tangata i runga i te enua nei i te au tupu anga no to Karaiti vai anga parutia ei ariki ma te akara koreia.

5. Eaa te au tupuanga i te tuatau o te pa·rou·siʹa te ka uriuri manakoia i nga atikara apii e toru o teia makatini nei?

⁵ I roto i teia kapitianga i nga atikara e toru nei, ka akara matariki tatou i te akapapu anga taka meitaki i ta Karaiti au angaanga ka rave no te Patireia i teia tuatau nei. Te mea mua, ka oronga atu matou i etai au totou Puka Tapu tei akakite maira i etai au apinga kua tupu me kare te tupu nei i teianei. Te rua, ka akataka meitaki matou i te angaanga maata te raveia ra e te pupu tavini akono meitaki e te pakari ta Iesu e taangaanga nei i teia tuatau katoa o tona vai anga parutia ei ariki. (Mataio 24:45-47) Te toru o te atikara ka akakite mai kia tatou i te akaope anga maata, koia te tuatau o te “mate maata ra.” Ko te reira te tuatau e aere mai ei a Iesu ei Rima Rave no Iehova i te akapou anga i te aronga tuatua tika kore e kia akaora oki i te aronga tuatua tika. (Mataio 24:21, 29-31) Ko te reira te tuatau no te akapouanga tei akatakaia maira e te apotetoro ko Paulo i te apaianga mai “kia kotou tei mamae ra i te mate, e akaora anga ma matou katoa nei a te akakite anga mai i te Atu ko Iesu mei te rangi maira ma tana au angera mana katoa i roto i te ai mura ra, kia apai mai aia i te akautunga ki runga i te aronga kare i kite i te Atua e tei kore i akarongo i te tuatua meitaki no to tatou Atu ko Iesu ra.”​—2 Tesalonia 1:7, 8, NW.

Te Akairo

6. Eaa te akairo taokotaiia ra te akatakaia maira ia Mataio pene 24 e te 25?

⁶ I te tai ngauru ma iva anere mataiti i topa, kua pati ta Iesu au pipi akamarama aere ra, kiaia i tetai akairo, me kare akapapu anga, i tona tuatau parutia ki mua ra i te mana Patireia oki. Kua tataia tana pau anga i nga pene 24 e te 25 o Mataio 24-25, kua oronga mai i tetai akairo taokotaiia, pouroa te au tupu anga te tupu nei i teianei i te pa enua ravarai. Te akataka maira taua akairo ra i tetai tuatau taitaia e te timata anga maata. Kua akamatakite maira a Iesu: “Kia matakite ia kotou, ko te vare aea kotou i te tangata. E manganui te ka aere mai ma toku nei ingoa, e te na ko anga mai e, Ko au te Mesia, e manganui oki te ka vare. E akarongo oki kotou i te tuatua tamaki, e te rongo tamaki; kia matakite ra, eiaa kotou e taitaia: e na mua oki te reira i te tupu e tikaʼi, kare ra e vaitata te openga i reira.”​—Mataio 24:4-6.

7. Eaa te au tuanga o te akairo ta tatou i kite i te tupu anga mei te 1914 mairai?

⁷ Kua totou katoa maira Iesu e ka tupu te au tamaki na roto i tetai tu aite koreia i mua ana. I te akatupuanga, e rua o te reira kua akatakaia ei nga tamaki no te ao nei, te tai mei te 1914 ki te 1918 e te rua mei te 1939 ki te 1945. Pera katoa oki, kua karanga aia e ka tupu te onge kai e te ngaruerue enua i tera ngai i tera ngai. Ka takinga kino ravaia te au Kerititiano mou ra. Kua tau tikai ki te totou ra, kua tamamaeia te Au Kite o Iehova, ko ratou ra te aronga akakaka i te marama i teia tuatau, kua mamae ratou i te takinga kinoia no te varu rau ngauru mataiti, ia ratou e tutu aere ra i te tuatua meitaki o te Patireia o te Atua “e kako rava ake te ao katoa nei; ei kite no te pa enua ravarai.” (Mataio 24:7-14) Te kapitiia maira te Yearbook of Jehovah’s Witnesses tataki tai ki te akapapu anga e ko teia tuanga o te akairo te tupu nei i teianei.

8, 9. (a) Eaa ra ta te tuatau parutia o Iesu ei ariki e kapiti ana? (e) Eaa te akakiteia maira e ta Iesu totou anga no te au Karaiti pikikaa no te ngai e te tu oki o tona tuatau parutia ra?

⁸ I te mea te kapiti katoa ra to Iesu taoonga ei ariki i te enua katoatoa nei, te akatotoa ra te akamori mou i te au enua mamaata ravarai. Ko tona tuatau parutia (pa·rou·siʹa) e tuatau ia no te tutaka aere anga i teianei ao. (1 Petero 2:12) Inara e oire maata ainei tetai, me kare e ngai akatakaia, e ngai no te aravei anga ia Iesu? Kua pau maira a Iesu i te reira na te totouanga e i te manakonako anga i tona tuatau parutia, ka tu mairai te au Karaiti pikikaa. Kua akamatakite mai aia e: “Me ka tuatua mai te tangata kia kotou, ‘Ina! Tei te metepara aia [a Karaiti],’ auraka e aere atu; ‘Ina! Tei roto aia i te pia i roto roa,’ auraka e irinaki atu. No te mea mei te kanapa anga mai te uira i te tuanga itinga ra maira e ka kaka atu ki te opunga o te ra ka pera katoa oki te tuatau parutia [pa·rou·siʹa] o te Tamaiti a te tangata.”​—Mataio 24:24, 26, 27, NW.

⁹ E meitaki atu i tetai ua atu tangata i te enua nei, kua kite a Iesu, koia “te Tamaiti a te tangata,” e ko ea aia me tae ki tona tuatau parutia e akamataaʼi. Kare aia uaorai e vai mai ki konei me kare ki ko ra e me ki tetai ua atu ngai i runga i te enua nei. Kare katoa oki aia e mana mai ki tetai ngai taka ke mei “roto i te metepara ra,” kia kitea e te aronga tei kimi ra i te Mesia kia aravei e kia tuatua kiaia i te ngai taka ke kia kore e kitenaia e te aronga mana o te kavamani o te enua ra, i tetai ngai e raukai i tana au pipi te apii anga i raro ake i tana arataki anga, i te teateamamao anga kia rave poitirere atu i tetai ravenga poritiki e kia akanoo iaia ei te Tutara Mesia no te ao nei. Pera katoa oki, kare aia e uuna iaia uaorai ki roto i tetai “pia i roto roa,” e ko tetai aronga tokoiti ua tana i iki ka kite i tona ngai e ki reira, kare e kiteia atu e kare e matauia, e kia rave aia e kia maani parani muna ma te aronga rave kino kia kiriti tumu atu i te au kavamani o teianei ao e kia akatainu iaia uaorai ei te Mesia taputouia maira. Kare!

10. Akapeea te kanapa anga mai te au uira no te tuatua mou o te Puka Tapu ki te ao katoa nei?

¹⁰ Ei tuke anga, kare e apinga no te uuna no to Iesu aere anga mai ei Ariki, i te akamataanga o tona tuatau parutia ei ariki. Mei ta Iesu i totou maira na roto i tetai tu no te ao katoa, ka kaka ua mai te au uira no te tuatua mou o te Puka Tapu ra kia akamarama mai i te ngai atea maata mei te tuanga itinga ra e tae ua atu ki te tuanga opunga ra. E tika tikai, ei aronga akamarama no teia tuatau nei, kua akapapu te Au Kite o Iehova ia ratou “ei marama no to te pa enua katoa, e kia tae ua atu [ta Iehova] ora ki te openga mai o te enua nei.”​—Isaia 49:6, NW.

Angaanga a te Au Angera

11. (a) Na teea mataara te taangaanga anga i te au angera i te akakaka anga i te marama Patireia ra? (e) I naea e ki roto i teea pupu te akaputu anga i te au mema o te pupu titona ra?

¹¹ Ko etai atu au irava te piri atura ki te parutia o Iesu te akataka maira iaia, e te kapiti katoa ra, me kare ‘te tono ra,’ i te au nuku angera. (Mataio 16:27; 24:31) I te akatutu anga o te titona e te titania ra, kua tuatua maira Iesu e “te kainga ra, koia teianei ao” e ko “te mou ra, koia te openga o teia nei ao; e te aronga kokoti ra, koia te au angela.” Inara, kare te aite anga o teia e i te tuatau parutia i tona mana Patireia e te kaka, ko te au angera anake ua tana ka taangaanga ei au karere i te akakitekite anga ki to te enua nei. Akamata mai i te 1919 kua rave te au angera i raro ake i ta Iesu ra arataki anga i te akataka i te pupu titona no te aronga akatainuia i te enua nei tei anauia i te vaerua ra, ko ratou tei akatotoaia ra e te au tupuanga o te Tamaki Mua o te Ao ra, e kua papa ratou no te rave angaanga kia tere atu i roto i te ingoa o te Ariki ra. (Mataio 13:38-43) I te au mataiti o te 1920 ra kua tuku etai atu au tauatini tangata i to ratou turanga no te Patireia o te Atua kua oti ra te akanooia e kua akatainuia ratou i te vaerua o te Atua ra. Kua meitaki te kapiti anga o teia aronga akatainuia nei ma te pupu o te toenga mua ra. Kapiti katoaia ratou, kua riro ei pupu no te tavini akono meitaki e te pakari no to tatou tuatau nei.

12. Eaa te tamaanga ta te au angera i rave ra, e eaa te tupu anga ki te enua nei?

¹² Ko tetai atu akatauanga no ta te au angera rave anga angaanga i te tuatau parutia o Iesu i muri ake i tona akaterono angaia i te 1914 kua tataia ia Apokalupo 12:7-9: “Ko Mikaela e tana au angela, tamaki atura i te taae; e kua tamaki maira te taae e tana au angela, Kare ra i riro te re ia ratou, e kare rava atura o ratou e nooanga i runga i te rangi. Uriia atura oki te taae maata ki vao, ko taua ovi taito ra ïa, ko tei karangaia i te diabolo ra, e ko Satani oki, ko tei pikikaa i to te ao katoatoa nei, i uriia aia ki vao ki runga i te enua nei, e tana au angela katoa, kua uri katoaia ki vao.” E no reira, ko te au rangi i runga ra kua tamaia mai i teianei, e kua akaruke mai ko te tuanga anake ua o te Patireia i te enua nei te toe nei kia tama takiriia no te akatapu anga i te ingoa o Iehova ra. I teia mataiti 1993 nei, te vai nei ra te akamatakite anga a te Atua ia tatou: “E mate ra oki to te enua . . . tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.”​—Apokalupo 12:12.

Tuakaouanga no to te Rangi

13, 14. (a) Eaa ta te au Tuatua Tapu i akakite mai e te raveia ra mei te 1918 mairai? (e) Eaa ta Paulo raua ko Ioane i akakite no te toenga o tei akatainuia ra i teia tuatau nei?

¹³ Ko tetai atu tupu anga umere i te tuatau parutia o Karaiti ko te akamata anga ia o te tuakaouanga no to te rangi ra. Kua akakite mai te apotetoro ko Paulo e ko te au Kerititiano tei akatainuia ra e kua roa te moe anga i roto i to ratou vaarua ko ratou te aronga mua te ka akatuia mai e ka noo kapiti ma Iesu Karaiti i te tuanga vaerua ra. Kua orongaia mai te akapapuanga i te au mataiti kua topa ei akaari e i te akara anga kua tupu te reira mei te 1918 mairai. Kua tata a Paulo e: “I roto ia te Karaiti ka akaora katoaia. Inara ka akonoia ratou tataki tai i tona uaorai pupu: ko Karaiti te momua, e i muri akera ko te aronga na te Karaiti ra i tona tuatau parutia [pa·rou·siʹa] ra.” (1 Korinetia 15:22, 23, NW) Te tuakaouanga o tei akatainuia ra i te tuatau parutia a Karaiti te akapapuia maira ia 1 Tesalonia 4:15-17 (NW): “Ko ta matou teia e akakite atu nei ia kotou na te tuatua a Iehova, e ko tatou te ora nei, e ka ora atu ki te tuatau parutia [pa·rou·siʹa] o te Atu kare rava e na mua i te aronga kua topa i te moe anga i te mate . . . Te aronga i mate taokotaiia ma Karaiti ra ka tu mua mai ratou. I muri ake ko tatou ko te aronga ora te toe ra, ka apai kapitiia atu ma ratou katoa ki roto i te tiao rangi kia aravei atu i te Atu ki roto i te reva ra.” E 144,000 katoa te aronga na Karaiti ei aronga akatainuia ra te ka rauka ia ratou i te openga, teia tutaki umere roa.​—Apokalupo 14:1.

¹⁴ Mei ta Paulo i akakite maira, ko te aronga o te toenga o tei akatainuia ra te ora nei i teia tuatau kare ratou e tae ki roto i te Patireia i mua ake i taua aronga pipi i tamateia ra tei akatainuia e kua vai tiratiratu i mua ana. Kua akataka katoa mai oki te apotetoro ko Ioane i te aronga tei akatainuia te mate nei i teia tuatau na teia au tuatua: “E ao to te aronga e mate, ei roto i te Atu ratou ka mate ei, i teianei e a muri ua atu: koia ïa, te tuatua maira te Vaerua, kia akaea ratou i te rave i ta ratou angaanga, e e aru oki ta ratou angaanga ia ratou,” koia oki, i to ratou oraanga i muri ake i te tuakaouanga ra. (Apokalupo 14:13) E kua karanga a Paulo: “I na, e akakite atu au kia kotou i te tuatua ngaro; Kare tatou e ope i te moe, e ope ra tatou i te akatu keia, Kare e mamia, mei te kamo anga mata nei, kia tae ki te pu openga ra: e tangi tikai oki te pu, e e akatuia tei mate ma te pe kore, e e akatu keia tatou.” (1 Korinetia 15:51, 52) Mei teaa ra tetai temeio umere roa!

15, 16. (a) Eaa ta Iesu akatutu anga i oronga mai ia Luka 19:11-15, e no teaa te tumu? (e) Akapeea te tupu anga o teia totou nei?

¹⁵ I tetai tuatau ia Iesu e ako ra i tetai pupu o tana au pipi no runga i te Patireia o te Atua ra, kua taiku atura aia i tetai akatutu anga ei tauturu ia ratou kia akatikatika i to ratou manako tarevake. Te tatau ra te tataanga e: “Te manako ra ratou e, e kitea mai te basileia o te Atua i reira ra. No reira aia i na ko atu ei. Kua aere atura tetai tangata mana i te enua mamao, kia rauka iaia te taoonga ariki, e ka oki mai ei. Kua karanga atura aia ki nga tavini tino ngauru nona ra, e kua tuku atura i nga mina okotai ngauru kia ratou, kua na ko atura kia ratou, E oko ua kotou e kia oki mai au ra. . . . E oki maira aia, ma te taoonga ariki katoa i rungao iaia, kua akaue atura aia i taua au tavini tana i tuku i te moni ra, e aere mai kiaia, kia kite aia i te tu o te apinga i rauka i ta ratou oko anga.”​—Luka 19:11-15.

¹⁶ Ko Iesu taua “tangata” tei aere ra ki te rangi, koia te “enua mamao” ra te ngai e rauka mai ei iaia te patireia. Kua rauka mai iaia taua Patireia ra i te 1914. I muri poto maira, kua uriuri atura a Karaiti ei Ariki ma te aronga manako ra e pipi ratou nana kia kitea e eaa ta ratou i rave i te akonoanga i te au apinga no te Patireia tei orongaia ra kia ratou. E meangiti ua te aronga tiratiratu tei ikiia kia orongaia kia ratou te akameitaki anga a te pu ra: “Kua tika, e tavini meitaki koe: no te mea kua akono meitaki koe i tenana apinga iti poepoe, ei tutara koe e kia okotai ngauru oou oire.” (Luka 19:17) Ko teia tuatau parutia a Karaiti kua kapiti i te rave anga pakari i te tutu ua anga i te Patireia ra, e kapiti katoa oki te akakite anga i ta te Atua ra au akavaanga i te aronga kino ra, e ko te akaaere anga i teia angaanga tei o katoa atu ki te mana tei orongaia ra ki taua “tavini meitaki ra.”

Tutuanga i te Ao Katoa Nei

17. Eaa te rekareka anga te akairo nei i te pa·rou·siʹa?

¹⁷ Eaa atu te ka tupu i te tuatau o teia pa·rou·siʹa? Ka riro ia ei tuatau no te rekareka maata i te angaanga tutu aere e i te tauturu anga i te aronga ou kia teateamamao no te ora atu anga na roto i te mate maata te aere mai nei. Ko teia aronga no te “urupu maata,” tei tauturu atu i te toenga o te aronga akatianuia ra, ka riro “ei reta akameitaki.” (Apokalupo 7:9, NW; 2 Korinetia 3:1-3) Kua taiku maira a Paulo i te rekareka anga i teia angaanga mou i tana tuatua anga: “Eaa oki to matou irinaki anga, e te rekareka anga me kare korona no te autu anga​—eaa, kare aina e ko kotou na?​—i mua i te aroaro o te Atu ko Iesu i tona tuatau parutia [pa·rou·siʹa] ra?”​—1 Tesalonia 2:19, NW.

Kia Ma e Kia Apa Kore

18. (a) Eaa te pure a Paulo te taiku maira i te pa·rou·siʹa? (e) Eaa te vaerua tau na tatou ravarai kia akakite i teia tuatau, e na teea au mataara?

¹⁸ Kua pure katoa oki a Paulo no te akatapu anga o te aronga te ora ra i teia tuatua parutia a Karaiti: “E kia akatapu rava mai te Atua o te au uaorai ia kotou. Kia kino kore i te au tu ravarai e kia akaoraia to kotou vaerua e te meta e te kopapa o to kotou au taeake na i te tu apa kore i te tuatau parutia [pa·rou·siʹa] o to tatou Atu o Iesu Karaiti.” (1 Tesalonia 5:23, NW) Ae, i teia tuatau, noatu rai me no te toenga tatou e tei akatainuia ra e no te aronga maata o te au mamoe ke ra, te tatua maira te vaerua o te taokotai anga ia tatou kia tiratiratu te akaputu anga kia vai tamou tatou i te tu ma e te apa kore i teia tuatau takake nei. Mei te reira katoa oki, ka tau rai tatou kia akakoromaki. Kua tata maira a Iakobo: “E akakoromaki, e te au taeake e, kia tae roa mai te tuatau parutia [pa·rou·siʹa] o te Atu ra. . . . E akatinamou i to kotou ngakau, no te mea kua vaitata te tuatau parutia [pa·rou·siʹa] o te Atu.”​—Iakobo 5:7, 8, NW.

19. Eaa te akamatakite anga ta Petero i oronga mai no te pa·rou·siʹa, e eaa ta tatou te ka tau kia rave?

¹⁹ E apinga katoa oki ta te apotetoro ko Petero kia tuatua mai kia tatou te ora nei i teianei. Kua akamatakite maira aia ia tatou i te aronga taitoito, e manganui oki to ratou i te au tuanga ravarai o te enua nei. Kua karanga a Petero e: “Kua kite oki kotou i teia na mua, e i te tuatau openga ra ka kitea mai te aronga taitoito ra ma ta ratou taitoito anga, ma te rave anga kia tau ki to ratou uaorai anoano i te na ko anga: ‘Teiea teia taputou anga i tona tuatau parutia [pa·rou·siʹa] ra? Eaa oki, mei te tuatau mairai o to tatou ai metua i moe ei i te mate, te vai ua nei rai oki te au mea ravarai mei te akamata anga to ratou angaia mai anga.’” (2 Petero 3:3, 4, NW) Noatu rai te vai mai anga te aronga taitoito ra i te tuatau parutia a Karaiti, te rave ua atura te au tangata o Iehova i te akakaka anga ei marama no te ao nei, ei ora no te aronga e manganui.

Au Uianga Uriuri Akaouia

◻ Akapeea te akamarama marie anga te au tangata o Iehova no runga i te pa·rou·siʹa?

◻ Akapeea te akatupu anga ia Mataio 24:4-8?

◻ Akapeea te au angera i te taokotai anga ma te Karaiti tei akateronoia ra?

◻ Eaa te temeio umere tikai i te akara anga te kapiti ra i te pa·rou·siʹa?

◻ Eaa te rekareka anga te kitea nei i teia tuatau, e koai ma te o atura i te reira?