Te Maara Ainei ia Koe?

Kua oronga ainei koe i te manako mako ki te au itiu i ou ake nei o Te Punanga Tiaki? Penei ka kitea e koe te reira ei mea reka no te akamaara i te ka aru mai:

◻ Akapeea tetai i te ‘aere mai anga kia Iesu’ kia rotai atu ki tana patianga ia Mataio 11:28?

Kua karanga a Iesu e: “Ko tei inangaro i te aru mai iaku, e akaruke aia iaia uaorai, e rave i tana satauro, ka aru mai ei iaku.” (Mataio 16:24) No reira, ko te aere mai anga kia Iesu te akataka ra i te tukuanga i to tetai uaorai anoano ki raro ake i to te Atua raua ko Karaiti, te arikianga i tetai apainga e te rave tamouanga i te reira.​—8/15, kapi 17.

◻ Eaa ra i “tokoia” uaʼi tei kite atu i te ‘piri o te ara, e tae atu ei ki te ora’ ta Iesu i taiku ia Mataio 7:13, 14?

Ko te arataa kokota kua kotingaia e te au ture e te au kaveinga a te Atua. No reira, te mareka uaia ra te reira e tetai tangata te anoano tikai ra i te akatano atu i tona oraanga ki ta te Atua au turanga. Noatu e i te akaraanga te kotingaia ra, te tuku ra te ‘piri o te ara’ i tetai tangata kia rangatira na roto i te au tu puapinga ravarai. Kua akanooia tona au kotinga e “te ture tika rava o te rangatira ra.” (Iakobo 1:25)​—9/1, kapi 5.

◻ Akapeea e raukaʼi te tu karape i te tatanuia?

Kare te tu karape e aere ngoie ua mai e te noa ua. Inara ma te tu akakoromaki, te pure, te tauta akatenga, te pirianga pakari, te apiianga i te Puka Tapu e te manakonako anga i te reira, e te irinaki anga ki runga i te vaerua tapu o Iehova, ka rauka te tu karape i te tatanuia.​—9/1, kapi 21.

◻ Akapeea te vareae i te riro anga ei mana no te akakoro anga meitaki?

Ka rauka i te reira i te akakeu i te tangata kia paruru i tetai tei akaperepereia ra mei te au mana o te kino. Pera katoa, ka rauka i te au tangata i te akaari tikai i te vareae no Iehova e tana akamori anga. (1 Ariki 19:10)​—9/15, kapi 8, 9.

◻ Eaa te aiteanga o te takiota tuatua ia Genese 50:23 no runga i te au utaro a Iosepha: “I runga ratou i te ūā o Iosepha i te pakari anga”?

Ko te aiteanga ua nei o teia e kua akatika a Iosepha i te tamariki ei uanga nona. Penei te akakite katoa maira te reira e kua kangakanga aia ki te au tamariki ma te tu inangaro ra, te akatautauanga ia ratou ki runga i tona nga turi. Ka meitaki te au metua tane o teia tuatau kia pera katoa i te akaari anga i te tu inangaro ki ta ratou tamariki.​—9/15, kapi 20, 21.

◻ Eaa te mea puapinga tikai e autu ei i roto i te oraanga akaipoipo e te ngutuare tangata?

E raukaʼi te reira au tupu anga inangaroia, ka tau ua rai te au tokorua akaipoipo kia tuku i to te Atua anoano ki mua. Na te raveanga i te reira, ka tauta te au tokorua akaipoipo i te kapiti tikai e ka rapakau i to ratou au manamanata na te taangaangaanga i te ako a te Tuatua na te Atua. I reira ratou e kopae atu ei i te au tu mamae ngakau ravarai te ka tupu mai mei te kopae anga i to te Atua anoano. (Salamo 19:7-11)​—10/1, kapi 11.

◻ Eaa te puapinga maata o te tu rapurapu tu Atua i teia tuatau?

E tuanga puapinga maata te tu rapurapu tu Atua i te tavini anga kia Iehova ma te meta katoa. Te kopae atura te reira e te tauturu ra i te akakore i te tauta anga a te Tiaporo kia akakeu i te au tavini o te Atua ‘kia akaroiroi e kia taitaia to ratou ngakau.’ (Ebera 12:3) Te paruru ra te reira ia ratou mei te piri anga puapinga kore ki teianei ao e tana au apinga materia, te tamouanga i to ratou au manako ki runga i te au mea o runga​—“te ora mutu kore.” (1 Timoteo 6:19)​—10/1, kapi 28.

◻ I roto i te parapore o te au mamoe e te au puakanio, a naea a Iesu e noo ei ki runga i tona terono e no teaa ra? (Mataio 25:31-33)

Kare te parapore e akaari mai ana iaia e noo ra mei te mea atura e ka riro mai ei Ariki. Mari ra, te noo ra aia ei Akava. Kare te reira akavaanga i te apinga te ka raveia no tetai tuatau roa e manganui ua atu te au mataiti. Mari ra, te tou atura te parapore ki te tuatau ki mua i to Iesu akakite anga i roto i tetai tuatau kotingaia i te rave anga i te akava anga ki rungao i to te au pa enua ra.​—10/15, kapi 22, 23.

◻ Eaa te “uki” tei taiku putuputuia e Iesu?

Kua taangaanga Iesu i te tuatua “teianei uki” no te aronga tini ma to ratou “au arataki matapo ra” tei kapitiia atu ki te iti tangata ngati Iuda ra. (Mataio 11:16; 15:14; 24:34)​—11/1, kapi 14.

◻ I te akatupu anga openga o ta Iesu totou ia Mataio 24:34-39, te tuatua ra te takiota tuatua “teianei uki” no runga i teaa?

I te akaraanga te tuatua ra a Iesu no runga i te au tangata o te enua nei te kite ra i te akairo o to Karaiti parutia mari ra kare i akatikatika i to ratou au aerenga.​—11/1, kapi 19, 31.

◻ Akapeea to Iseraela i taito ra i te puapinga angaia mei te akanoonooanga o te au oire akapuanga ma to ratou au ture ra?

Kua tuku te reira ki roto i to Iseraela auraka ratou e manako kore ua me kore ra e akono kore ua i te oraanga tangata. Kua akakite katoa te reira i te anoano kia akaari i te aroa me te tau ra te rave anga i te reira. (Iakobo 2:13)​—11/15, kapi 14.

◻ Eaa te oire akapuanga tikai?

Ko teia ta te Atua apinga oronga no te paruruanga ia tatou mei te mate no te aatianga i tana akauenga no te tapu o te toto. (Genese 9:6)​—11/15, kapi 17.

◻ Akapeea e raukaʼi i te au taeake Kerititiano te tauturu ia tatou ‘e raukaʼi te maroiroi ou’? (Isaia 40:31)

I roto i to tatou au tungane e te au tuaine Kerititiano, te vaira tetai papaki penei te aro atura i te au taomianga e te au timataanga aiteite ra e penei te kite ra i te au manako ngakau mei to tatou uaorai te tu. (1 Petero 5:9) E mea akapapuanga e te akamaroiroianga ki te akarongo i te kite e ko te tupu nei kia tatou kare ia i te mea matau koreia e ko to tatou au manako ngakau kare ia i te mea kitea koreia.​—12/1, kapi 15, 16.