Pene 112

Kua Vaitata ta Iesu Pasa Openga

I TE vaitata anga te openga o te Ruirua, ia Nisana 11, kua akaoti atura a Iesu i te apiianga i te au apotetoro i te Maunga i Oliveta ra. E maata tikai te angaanga, e ka roiroi rai! I teianei, penei i te oki anga ki Betania no te reira po, kua karanga atura aia ki tana au apotetoro: “Kua kite kotou e, e rua ra toe i te pasa ra, ei reira te Tamaiti a te tangata nei e tukuiaʼi kia [patitiia, NW].”

I te akara anga kua akapou a Iesu i te ra i muri maira, koia te Ruitoru, ko Nisana 12, i te noonoo ua anga ma tana au apotetoro katoa. I te ra i mua akera, kua akaapa atea aia i te au arataki o te akonoanga i te ngai tangata, e kua kite aia te kimi ra ratou e ta iaia. No reira i te Ruitoru ra kare aia i akaari atea iaia uaorai, no te mea kare aia i anoano kia apiapi mai tetai apinga i tana akonoanga i te Pasa ma tana au apotetoro i te aiai i muri akera.

I te reira tuatau, kua akaputu te kau taunga nunui e te aronga pakari o te au tangata ra ki te paepae o te taunga maata, koia a Kaiapha. No te mamae anga i ta Iesu akaapa anga no te ra i mua akera, te kimi ra ratou i te ravenga kikite e opu iaia kia tamateia. Inara kua karanga ratou: “Auraka i te rā oroa nei, ko te oripu aea te tangata.” Te mataku ra ratou i te au tangata, te rekareka ra a Iesu i ta ratou akaperepere anga.

I te tuatau te uriuri manako kino ra te au arataki o te akonoanga atua kia ta ia Iesu, kua tae atura tetai manuiri na ratou. Kua poitirere ratou no te mea ko tetai ia o ta Iesu ra apotetoro, koia a Iuda Ikariota, ko tei akatupuia ra e Satani te manako ki roto iaia e pikikaa i tona Pu! Mei teaa ra to ratou rekareka i to Iuda ui atu anga: “Eaa ta kotou e o mai naku, e naku e tuku atu iaia kia kotou ra?” Kua akatika ratou ma te mataora kia tutaki iaia e 30 moni ario, ko te tutaki ia no tetai tavini kia tau ki te Ture koreromotu a Mose ra. Mei reira mai, a Iuda i kimi ei i tetai tuatau meitaki kia pikikaa ia Iesu kia ratou ra eiaa e tangata tini i te pae mai.

Kua akamata te Nisana 13 i te opunga o te ra i te Ruitoru. Kua tae atura a Iesu mei Ieriko i te Varaire, no reira ko te po ono ia e ko te po openga nona ki Betania. I tetai ra mai, i te Paraparau, ka raveia te au teateamamao anga openga no te Pasa, te ka akamata i te opunga o te ra. Ko reira te punua mamoe taiaiaʼi e ka tunu paka katoaia. Ki ea ratou akono ei i te oroa, e naai e akateateamamao?

Kare a Iesu i akakitekite mai i te reira, penei kia kore ei e rauka ia Iuda i te akakite atu ki te kau taunga nunui kia kore ratou e tamanata ia Iesu i te tuatau o te oroa Pasa ra. Inara i teianei, i te avatea aiai i te Paraparau, kua unga atura a Iesu ia Petero raua ko Ioane mei Betania atu, kua na ko atura: “Ka aere, ka akonokono i te pasa, kia kai tatou.”

Kua ui maira raua: “Eiea maua akonokono ei?”

Kua karanga atura a Iesu: “Kua o anake korua ki roto i te oire ra, e aravei mai tetai tangata ia korua, te apai ra i te āriki vai; e aru atu korua iaia ki roto i te are tana e tomo ra. Ka karanga atu ei korua ki te pu o te are, Te ui maira te Orometua kia koe, Teiea to te manuiri pia, kia kai au i te pasa e taku au pipi katoa? E nana e akakite mai kia korua i tetai pia maata tei runga, kua manea: ei reira akonokono ei.”

Kare e ekoko anga e ko te pu o taua are ra e pipi ia na Iesu e penei te manakonako ra aia e ka pati atu a Iesu i tona ngutuare no te reira atianga takake ra. I na, i te taenga atu a Petero raua ko Ioane ki Ierusalema, kua kite atura raua i te au mea ravarai mei ta Iesu tikai i totou ra. No reira kua akono raua kia papa te punua mamoe e kia oti katoa etai atu akanoonoo anga no tei anoanoia no te aronga e 13 te ka akono i te Pasa, koia a Iesu ratou ko tana 12 apotetoro ra. Mataio 26:​1-5, 14-19; Mareko 14:​1, 2, 10-16; Luka 22:​1-13; Exodo 21:⁠32.

▪ Eaa ta Iesu i rave i te Ruitoru, e no teaa ra?

▪ Eaa te uipaanga tei akonoia i te ngutuare o te taunga maata, e eaa te akakoroanga i aere ei a Iuda ki te au arataki o te akonoanga atua ra?

▪ Koai ta Iesu i unga atu ki Ierusalema i te Paraparau, e eaa te akakoroanga?

▪ Eaa ta teia nga tangata i tonokia ra i kite e te akakite katoa maira i to Iesu ra mana semeio tikai?