Pene 120

Uuna Anga i te Paepae

I MURI ake i te akarukeiaanga a Iesu i te kainga i Getesemane ra e te oroanga ma te mataku e te toenga o te au apotetoro ra, kua noo mai a Petero raua ko Ioane. Penei kua mou ake ia raua a Iesu i tona rave angaia ki te kainga o Ana. I ta Ana unga atu anga iaia ki te Taunga Maata ko Kaiapha, kua aru atura a Petero raua ko Ioane i muri roa maira, penei no te mataku i to raua uaorai oraanga e to raua manako oonu e eaa te ka tupu ki to raua Pu.

I te taeanga ki te are maata o Kaiapha, ko Ioane tei tomo atu ki te paepae, i te mea kua kite te taunga maata iaia. Inara, kua vai mai a Petero te tu ra i vao i te pa. Kare i roa kua oki akaou maira a Ioane e kua tuatua atu ki te tiaki pa, e e tamaine tavini, kua akatikaia a Petero kia tomo atu ki roto.

Kua anu mai i teianei, e kua tutungi te au tavini o te are e te aronga taoonga o te taunga maata kua tau i tetai ai vaie. Kua kapiti atura a Petero kia ratou kia maanaana iaia e tiaki ra i te tuku anga tika no to Iesu timataanga. I reira, i roto i te marama o te ai kaka ra, kua kite meitaki atu te tiaki pa ia Petero nana ra i tuku mai iaia ki roto. Kua na ko maira: “I reira katoa koe ia Iesu i Galilea ra.”

No te poitirere i tona akataka angaia, kua uuna iora a Petero ki mua ia ratou ravarai e kare roa aia i kite ia Iesu. “Kare au i kite, kare katoa oki au i kite i taau i tuatua mai na,” ko tana ia i karanga.

Ei reira, kua aere atura a Petero ki vao i te aua. I reira, kua kite maira tetai atu vaine iaia e kua na ko atura ki te aronga e tu i reira ra: “Ia Iesu o Nazareta katoa teianei tangata.” Kua uuna akaou iora a Petero ma te taputouanga: “Kare takiri au i kite i tenana tangata.”

Kua vai maira a Petero i te paepae ra, ma te tautaanga kia kore aia e kitea meitakiia. Penei i teia atianga kua poitirere aia i te kakaoaanga te moa i te popongi roa, te poiri ra. I te reira tuatau, te raveia ra to Iesu timataanga, penei te raveia ra te reira i tetai tuanga o te are i runga ake i te paepae ra. Kua kite tikai a Petero ratou ko etai atu te tiaki ra i raro ake i te aerenga mai e te aerenga atu o te au kite ke ke tei takiia mai ki roto ei akakite.

Vaitata okotai ora i topa mei te akataka anga ia Petero e ko tetai oa no Iesu ra. I reira kua aere maira etai o te aronga te tu ua ra i takapini e kua na ko maira kiaia: “No ratou tikai koe; te kitea nei i toou reo.” Tetai o taua pupu ra e kopu tangata no Malako, nona te taringa i tipuia ra e Petero. Kua karanga aia: “Kare aina au i kite ia koe i roto i te koro, ma ia katoa ra?”

Kua tuatua maata maira a Petero: “Kare takiri au i kite i teianei tangata.” E kua tauta pakari ra aia kia irinaki ratou e kua tarevake ratou ravarai na te taoanga e te taputouanga i te reira tumu e kua kapiki aia kia topa mai te kino ki runga iaia uaorai me kare aia e tuatua ra i te tika.

Koi oti akera te toru o ta Petero uuna anga, kua kakaoa maira te moa. E i te reira atianga, tei runga a Iesu i te porotito i runga ake i te paepae, kua ariu atura e kua akara atu kiaia. I reira tikai, kua maara mai ia Petero e eaa ta Iesu i tuatua atu i nga ora tokoiti ua i mua akera i te pia i runga ra: “Kare e tae ki te rua o te kakaoa anga moa, kua tu toru oou uuna anga iaku.” Kua paii i te teimaa o tana ara. Kua aere atura a Petero ki vao e kua aue iora.

Akapeea ra teia i tupu ei? Akapeea oki i muri ake i tona papu anga i tona maroiroi i te pae vaerua, i raukai kia uuna a Petero i tona Pu e toru taime i te tuatau poto ua? Kare e ekoko anga e kua mou a Petero kare i papa no te reira au tu ra. Kua tarurikeia te tuatua mou, e kua akariroia a Iesu ei tangata rave kino. Kua akariroia te tika ei tarevake, kua apa te tangata ara kore ra. No te taomianga maata o taua atianga ra, kua akakoreia to Petero tu tau. Viviki ua i te ngaro tona tu tika no te tiratiratu; ei mii nona kua akangoruia aia no te mataku i te tangata ua nei. Auraka rava te reira kia tupu mai kia tatou nei! Mataio 26:​57, 58, 69-75; Mareko 14:​30, 53, 54, 66-72; Luka 22:​54-62; Ioane 18:​15-18, 25-27.

▪ Akapeea a Petero raua ko Ioane i tomo ei ki roto i te paepae o te taunga maata ra?

▪ Ia Petero raua ko Ioane i te paepae ra, eaa te raveia ra i roto i te are?

▪ Eia taime i kakaoa ei te moa ra, e eia taime i uunaʼi a Petero e kare aia i kite i te Mesia ra?

▪ Eaa te aiteanga e kua tao a Petero e kua taputou oki?

▪ Na teaa a Petero i uunaʼi e te kite ra aia ia Iesu?