Au Akaaere e te Au Tavini Orometua Kua Akataoonga Teokaratikiia
“E teianei, e matakite ia kotou uaorai, e te anana katoa i akariroiaʼi kotou e te Vaerua Tapu ei tiaki i rungao ra.”—ANGAANGA 20:28.
1, 2. Akapeea a Isaia 60:22 i te akatupu angaia?
KUA akakite takere mai a Iehova e ka tupu mai tetai apinga umere i te tuatau openga. Na roto i te peroveta ko Isaia, kua tuatuaia: “E riro te mea ngiti okotai ei tausani; e ko tei mea ngiti poepoe ra, e riro ïa ei enua maroiroi: naku, na Iehova, e akarapurapu i te reira i tona tuatau.”—Isaia 60:22.
2 E akakiteanga ainei tetai e te tupu ra teianei totou i teia tuatau? Ae, e tika! I te tuatau o te 1870, kua akanooia tetai putuputuanga okotai no te au tangata o Iehova ki Allegheny, Pennsylvania, U.S.A. Mei taua akamataanga rikiriki ra, e rau ngauru ua atu au tauatini putuputuanga kua tupu mai e te ruperupe ra i te ao katoa. E au mirioni ua atu aronga akakitekite i te Patireia—e iti tangata maroiroi—te taokotai ra i teianei e maata atu i te 91,000 putuputuanga i roto i te 235 enua takapini i te enua. Kare e ekoko anga, te akapapu maira teia e te akarapurapu ra a Iehova i te akaputuanga i te aronga akamori mou i mua ake ka akamata ei te “mate maata,” te vaitata mai nei i teianei.—Mataio 24:21; Apokalupo 7:9-14.
3. Eaa te aiteanga kia papetitoia ‘i te ingoa o te Metua, e no te Tamaiti, e no te Vaerua Tapu’?
3 I muri ake i te akonoanga i tetai akatapuanga ia ratou uaorai kia Iehova, e kia rotai ma ta Iesu au apiianga ra, kua papetitoia teianei aronga e au mirioni ua atu “i te ingoa o te Metua, e no te Tamaiti, e no te Vaerua Tapu.” (Mataio 28:19) Te papetito anga i “te ingoa o te Metua” tona aiteanga e kua kite teia aronga tataki tai ia Iehova e ko to ratou Metua i te rangi ra e te Oronga Ora e te kauraro ra ki tona turanga ngateitei. Te papetito anga ‘i te ingoa o te Tamaiti’ te akataka ra e te aaki ra ratou e ko Iesu Karaiti Tei Oko ia ratou, ei Arataki, e ei Ariki oki. Kua akatika katoa ratou i te tuanga a te vaerua tapu o te Atua, me kare te mana rave angaanga, i te arataki anga i to ratou oraanga. Te akakite maira teia e kua papetitoia ratou ‘i te ingoa o te Vaerua Tapu.’
4. Akapeea te akataoonga angaia te au orometua Kerititiano?
4 I to ratou papetito angaia, kua akataoongaia te au pipi ou ra ei au orometua no te Atua ko Iehova. Naai i akataoonga ia ratou? Ei kaveinga, te au tuatua tei tataia ia 2 Korinetia 3:5 te tau ra kia ratou: “No ko maira i te Atua ra to matou tika [ei au orometua].” Kare e rauka ia ratou kia inangaro i tetai atu akangateitei anga maata atu no te akataoonga angaia e na te Atua ko Iehova uaorai ra! I muri ake i to ratou papetito angaia, ka tupu ua atu ratou i te pae vaerua ei au orometua no te “tuatua meitaki” me ariki tamou marie ratou i te au arataki anga a te vaerua o te Atua e ka rave ua atu ei i te akono anga i tana Tuatua.—Mataio 24:14; Angaanga 9:31.
E Akataoonga Anga—Teokaratiki—Kare i te Temokaratiki
5. Kua iki temokaratiki ia ainei te au akaaere e te au tavini orometua ra? E akataka mai.
5 Te akaaere anga pakari a te au akaaere tau ra e te au tauturu meitaki a te au tavini orometua ra te umuumuia ra ei utuutu no te au apinga pae vaerua o te au orometua angaanga te tupu maata ra te numero. (Philipi 1:1) Akapeea ra te akataoonga angaia taua au tangata pae vaerua ra? Kare na te au ravenga mei ta Kerititome e akono ra. Ei akatauanga, kare te au akaaere Kerititiano e voti temokaratiki ia ana, koia oki na te rauka anga te au voti maata a te au tangata e taokotaiia atura ki tetai putuputuanga. Kareka ra, ko teianei au akataoonga anga e mea rave teokaratikiia. Eaa te aite anga o te reira?
6. (a) Eaa tikai te teokaratiki mou ra? (e) Eaa ra te au akataoonga anga o te au akaaere e te au tavini orometua i teokaratiki ei?
6 Ei akatauanga mama ua, ko tetai teokaratiki mou e tutara anga na te Atua ia. Ka kauraro ua te Au Kite o Iehova ki tana tutara anga e ka taokotai atu kia rave i te anoano tu-Atua ra. (Salamo 143:10; Mataio 6:9, 10) Te akataoonga anga i te au akaaere Kerititiano, me kare aronga pakari, e te au tavini orometua e teokaratiki ia no te mea te raveanga i te akatikaanga e te akataoonga anga i taua au tangata rave apainga ra kua raveia kia tau ki ta te Atua ra akanoonoo anga tei akapapaia i roto i te au Tuatua Tapu ra. E ko te ‘upoko o te katoa,’ tei ia Iehova te tika kia akataka e akapeea te akono i tana akaaerenga akara mataia.—1 Paraleipomeno 29:11; Salamo 97:9.
7. Akapeea te akaaerenga i te Au Kite o Iehova?
7 Ei tukeanga ma te au pupu akonoanga e manganui o Kerititome, kare te Au Kite o Iehova e iki no ratou uaorai i te tu kavamani vaerua ta ratou ka rave angaanga i raro akera. Ka tauta teia au Kerititiano ngakau tae kia mou ki ta Iehova au turanga. Te au akaaere i rotopu ia ratou kare e tukuia ki roto i te opati e tetai putuputuanga, hierachy me kare tu presbyterian o te kavamani ekaretia. Me ka kimi te au akonoanga o teianei ao kia o atu ki teianei au akataoonga anga, kare te au tangata o Iehova e akatika kia kauraro atu. Ma te tu ngaueue kore, ka tamou marie ratou i te turanga tei akataka meitakiia maira e te au apotetoro i te anere mataiti mua ra i ta ratou tuatua anga: “Ko te Atua ta matou e akarongo e tikaʼi auraka te tangata.” (Angaanga 5:29) Na reira, kua kauraro te Au Kite ia ratou uaorai ki te Atua i te au mea ravarai. (Ebera 12:9; Iakobo 4:7) Na te aruanga i te ravenga teokaratiki ka apai mai i te mareka anga tau i te Atua.
8. Eaa te tuke anga o te au ravenga temokaratiki e te teokaratiki?
8 Ei au tavini no te Teokarati Maata, ko Iehova ra, ka meitaki tatou kia mou manako i te tukeanga i rotopu i te au ravenga temokaratiki e te teokaratiki. Te akara i te au ravenga temokaratiki no tetai akatakaanga tau e e putuputu te akakiteia na te taemoemoanga no tetai opita e te ikianga na te voti a te maata anga. Kare taua au ravenga ra e raveia i te au akataoonga anga teokaratiki. Kare teia e no ko mai i te au tangata ra; kare katoa oki ratou e no ko mai i etai ravenga ture ra. I te akara anga i te taikuanga i tona uaorai akataoonga anga na Iesu e na Iehova ei ‘tetai aposetolo a te etene,’ kua tuatua a Paulo ki to Galatia e kua akataoongaia aia “kare ra i ta te tangata, kare oki i ta te tangata akonoanga, i ta Iesu Mesia ra, e te Atua Metua, ko tei akatu mai iaia mei te mate maira.”—Roma 11:13; Galatia 1:1.
Na te Vaerua Tapu i Akataoonga
9. Eaa ta Angaanga 20:28 i tuatua no te akataoonga anga o te au akaaere Kerititiano?
9 Kua akamaara atura Paulo i te au akaaere tei noo ra ki Ephesia e kua akataoongaia ratou e te Atua na roto i te vaerua tapu. Kua tuatua aia: “E matakite ia kotou uaorai, e te anana katoa i akariroiaʼi kotou e te Vaerua Tapu ei tiaki i rungao ra, kia akaangai oki kotou i te ekalesia a te Atua, ko tana i oko [i te toto o tana uaorai Tamaiti].” (Angaanga 20:28, akaaite ia NW.) Kua umuumuia taua au akaaere Kerititiano ra kia akono ua atu i te arataki anga a te vaerua tapu ra ia ratou e rave ra i ta ratou au angaanga ei au tiaki no te anana a te Atua ra. Tetai tangata tei akono ra ei opita akataoongaia kare ra e akono kia tau ki te turanga tau i te Atua, a muri akera ka akono te vaerua tapu kia akaateaia atu aia mei tona turanga.
10. Eaa ra i riro ei e e tuanga puapinga maata ta te vaerua tapu i te au akatoonga anga teokaratiki?
10 Akapeea te vaerua tapu i te akono anga i tetai tuanga puapinga maata? Te mea mua, kua akanooia mai te tataanga o te au umuumu anga no te akaaere pae vaerua ta te vaerua tapu i akauru maira. I tana nga reta kia Timoteo raua ko Tito, kua akapapa mai a Paulo i te au turanga kia akonoia e te au akaaere e te au tavini orometua. Kapiti katoa, kua taiku aia i etai 16 umuumu anga tuke tuke. Ei akatauanga, kia apa kore te au akaaere, eiaa e inu maata i te uaina, kia manako meitaki, kia mako, kia kite i te tangata, kia tau te apii, e kia akaraanga meitaki ei au upoko ngutuare. Kia iti te inu kava, auraka e noinoi i te moni, e kia akono meitaki. Ma te aiteite ra, kua akanooia te turanga teitei no te aronga tei itae atura i te akataoonga anga ei au tavini orometua.—1 Timoteo 3:1-10, 12, 13; Tito 1:5-9.
11. Eaa etai o te au tu tau ka tika kia akonoia e te au tangata te itae atura no te au apainga no te putuputuanga?
11 Tetai akamanako akaouanga i teianei au tu tau te akaari ra e ko te aronga te rave ra i te arataki anga i te akamori anga ia Iehova ka tika kia riro ei akaraanga meitaki i te akonoanga Kerititiano ra. Te au tangata te itae atura no te au apainga i te putuputuanga ka tika kia akakite e te angaanga ra te vaerua tapu ki runga ia ratou. (2 Timoteo 1:14) Ka tika kia kitea e te tupu ra i roto i teianei au tangata te au ua o te vaerua o te Atua “te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, te maru, te akono meitaki.” (Galatia 5:22, 23) Ka kitea taua au ua ra i ta ratou au akono anga ma te au oa akarongo ra e etai atu oki. Inara penei ka meitaki tetai papaki i te akakiteanga i etai o taua au ua o te vaerua ra, ko etai penei ka akono i etai atu tu tau no te au akaaere ra kia meitaki atu. Inara, i to ratou tu akaraanga katoa no te oraanga, te aronga katoatoa te manakonako ra kia akataoongaia ei au akaaere me kare ei au tavini orometua ka tau kia akakite e e au tangata pae vaerua ratou tei tau ra i te au umuumu anga no te Tuatua a te Atua ra.
12. Koai ma te tuatuaia ra e na te vaerua tapu i akataoonga?
12 I ta Paulo akamaroiroi anga ia etai ke kia riro kia aru iaia, kua rauka iaia te rave i te reira ma te kore e akama no te mea kua aru aia uaorai ia Iesu Karaiti, tei ‘akaruke maira i te akaraanga na tatou kia aru i tona takainga vaevae.’ (1 Petero 2:21; 1 Korinetia 11:1) Te aronga tei akono ra i te au umuumu anga Tuatua Tapu i te tuatau o to ratou akataoonga angaia ra ei au akaaere me kare ei au tavini orometua ka tuatuaia e na te vaerua tapu i akataoonga.
13. Akapeea ta te vaerua tapu tauturu i te aronga te rave ra i te au ikianga tangata kia tavini i roto i te putuputuanga?
13 Te vaira tetai atu tumu te akakite ra e akapeea te rave angaanga a te vaerua tapu i te akatika anga i te au akataoonga anga i te au akaaere. Kua tuatua a Iesu e ‘te oronga maira te Metua i te rangi i te Vaerua Tapu ki te aronga te pati atura kiaia.’ (Luka 11:13) No reira me ka akaputu te aronga pakari i te putuputuanga ra kia iki i te au tangata no te au apainga putuputuanga, ka pure ratou no te vaerua o te Atua kia arataki ia ratou ra. Kua akatumu ratou i ta ratou au iki anga ki runga i te au tataanga i roto i te Tuatua akauruia a te Atua ra, e na te vaerua tapu e arataki ia ratou kia kite me te tau ra tetai tangata tei akamanakoia ra no te akataoonga anga i te umuumu anga Tuatua Tapu ra. Kare te aronga e rave ra i te au ikianga e tau kia riro i te mana akara anga i te tu o vao ua ra, te au kite apiianga, me kare au kite natura ua ra. Ka tika ta ratou akara anga mua ki runga i te tu o taua peretana ra ei tangata pae vaerua, tetai kare te au mema o te putuputuanga ra e ekoko kia aravei atu no te akoanga pae vaerua.
14. Eaa ta tatou i kite mei ia Angaanga 6:1-3?
14 Koi rave kapiti ei te au pupu aronga pakari ma te au akaaere tutaka aere i te ikianga o te au taeake kia tavini ei aronga pakari e ei au tavini orometua, ko te au akataoonga anga te raveia ra kia tau ki te akatauanga tei akanooia i te anere mataiti mua ra. I tetai atianga, kua tupu mai tetai umuumu anga no etai tangata tau i te pae vaerua ra kia akono i tetai angaanga puapinga maata. Kua oronga te pupu akaaere i te aratakianga te aru mai nei: “E kimi io na kotou i e toko itu puke tangata rongo meitaki, e te ki i te Vaerua Tapu, e te karape, i roto ia kotou na, ko ta matou ïa e akono no te reira angaanga.” (Angaanga 6:1-3) Na te au tangata i reira tikai i rave i te au iki anga, ko te au akataoonga anga ra na te aronga e apainga ta ratou i reira i Ierusalema ra. Mei te reira katoa te akaraanga te aruia nei i teia tuatau.
15. Akapeea te o anga o te Pupu Akaaere ki roto i te tumu no te akataoonga anga i te au tangata?
15 Na te Pupu Akaaere o te Au Kite o Iehova e arataki tika atu i te akataoonga anga i te au mema katoatoa o te au Kumiti Opati Manga ra. I te ikianga e koai te ka tau kia akono i taua apainga teiaa ra, te tamanako ra te Pupu Akaaere i te tuatua a Iesu: “Ko te tukuia atu te mea maata ra, e mea maata katoa te umuumuia atu; e ta te tangata oki i tuku atu i te mea maata ra, e mea maata katoa ïa te patiia atu iaia ra.” (Luka 12:48) Kapiti atu ki te akataoonga anga i te au mema Kumiti Opati Manga ra, te akataoonga ra te Pupu Akaaere i te aronga pakari no te au Betela e te au akaaere tutaka aere. Inara, te akaue ra ratou i te au taeake tau no te rave apainga kia akono na ratou i etai atu au akataoonga anga. E au tika Tuatua Tapu katoa tetai no teia.
‘Kia Akataoonga Orometua mei Taku i Ikuiku ia Koe’
16. Eaa a Paulo i akaruke ei ia Tito i Kerete, e eaa ta te reira i akakite no te au akataoonga anga teokaratiki i teia tuatau?
16 Kua tuatua a Paulo ki tona oa angaanga kia Tito: “Teia te mea i vaoo ei au ia koe i Kereta na, kia akameitaki koe i tei toe ra, kia akataoonga i te aronga orometua i te au oire katoa ra mei taku i ikuiku ia koe na.” (Tito 1:5) Kua akapapa atura Paulo i te au tu tau ta Tito kia akara i te au tangata te ka tau no taua au akataoonga anga ra. No reira, i teia tuatau, te akataoonga ra te Pupu Akaaere i te au taeake tau i te au opati manga ra kia mono i te raveanga akataoonga anga ei aronga pakari e ei au tavini orometua. Te rave matakiteia ra e ko te aronga akono mono ra i te Pupu Akaaere te kite taka meitaki ra e kia aru i te au kaveinga Tuatua Tapu no te akonoanga i taua au akataoonga anga ra. No reira, tei raro ake i te arataki anga a te Pupu Akaaere te akataoonga anga i te au tangata tau kia tavini i te au putuputuanga o te Au Kite o Iehova i te ao katoa nei.
17. Akapeea te akonoanga i te au ikianga no te au akataoonga anga o te au akaaere e te au tavini orometua a te opati manga?
17 Me tukuia atu te au ikianga no te akataoonga anga i te au akaaere e te au tavini orometua ki tetai opati manga o te Taiate Punanga Tiaki, te irinaki ra te au tangata kite ki runga i te vaerua o te Atua no te arataki anga i te raveanga akataoonga anga. Te manako ngakau ra teianei au tangata i tetai tu manakoanga tau, i te kiteanga e kare ratou e tika kia tuku viviki ua i to ratou au rima ki runga i tetai ua atu tangata, ko te o atu aea ratou ki roto i tana au ara.—1 Timoteo 5:22.
18, 19. (a) Akapeea te tuku anga o etai au akataoonga anga? (e) Akapeea te rave katoa anga i te ikianga e te akataoonga anga?
18 Etai au akataoonga anga penei ka tukuia atu na tetai reta ma te stamp akamanaia no ko mai i tetai mana ture ra. Ko taua reta ra penei ka akonoia kia akataoonga kia tere atu i te okotai taeake i roto i te putuputuanga.
19 Te au akataoonga anga teokaratiki no ko mai ia Iehova na roto i tana Tamaiti e te aerenga akara mataia a te Atua i te enua nei koia, te “tavini akono meitaki e te pakari.” (Mataio 24:45-47) Te raveanga katoa o taua iki anga ra e te akataoonga anga te aratakiia ra, me kare te akonoia ra, e te vaerua tapu. Ko teianei te tika no te mea te au tu tau te akanooia maira i roto i te Tuatua a te Atua, tei akauruia ra e te vaerua tapu, e ko tei akataoongaia ra ka oronga akapapu mai no te akatupu anga i te au ua o taua vaerua ra. No reira, ko taua au akataoonga anga ka tau kia manakoia e na te vaerua tapu i akono. Mei te au akaaere e te au tavini orometua tei akataoonga teokaratikiia i te anere mataiti mua ra, ko taua tu rai te tika ra i teia tuatau nei.
Akameitaki Anga no ta Iehova Arataki Anga
20. Eaa tatou i o atu ei ki to Davida au manako ia Salamo 133:1?
20 I teia tuatau o te puapinga anga pae vaerua e te tupu anga teokaratiki i te angaanga tutu anga Patireia, te akameitaki ra tatou e na Iehova te apainga maata no te akataoonga anga i te au akaaere e te au tavini orometua. Te tauturu maira teianei akanoonoo anga Tuatua Tapu kia tamou marie tatou i ta te Atua au turanga teitei no te tuatua tika i roto ia tatou ei Au Kite o Iehova. Pera katoa, te vaerua Kerititiano e te au tauta anga maata a teianei au tangata te tauturu maata ra i to tatou poniaau meitaki e te taokotai anga ei au tavini no Iehova. Mei te tata taramo ko Davida ra, te akakeuia ra tatou kia tuatua: “I na oki, te meitaki e te mataora, kia noo katoa te au taeake ma te tau tikai!”—Salamo 133:1.
21. Akapeea a Isaia 60:17 i te akatupu angaia i teia tuatau nei?
21 Mei teaa ra to tatou akameitaki anga no ta Iehova aratakianga na tana Tuatua e te vaerua tapu ra! E tau tikai oki, te au tuatua tataia ia Isaia 60:17: “E kauonoia mai e au te veo ki te auro; e kauonoia mai e au te auri ki te ario; e kauonoia mai te rakau ki te veo; e kauonoia mai te toka ki te auri: e akariro au i toou au akara ei au; e taau au rangatira ei tuatua-tika.” I te rave maata atu anga i te au angaanga teokaratiki i roto i te Au Kite o Iehova, kua kite tatou i teianei au turanga akameitakiia i roto katoa i ta te Atua ra akaaerenga i te enua nei.
22. No teaa ta tatou e akameitaki tika ra, e eaa ta tatou ka tau kia tamanako i te rave?
22 Te akameitaki oonu nei tatou no te au akanoonooanga teokaratiki i roto ia tatou nei. E te ariki maata nei tatou i te angaanga pakari e te akamerengo anga oki tei raveia e te au akaaere e te au tavini orometua tei akataoonga teokaratikiia ra. Te akateitei ngakau katoa ra tatou i to tatou Metua i te rangi ra, tei oronga maira kia tatou i te puapinga pae vaerua e tei akameitaki maata maira ia tatou. (Maseli 10:22) No reira, kia tamanako tatou kia aaere tau tikai ma te akaaerenga a Iehova. I runga rava, kia tavini taokotai ua atu tatou kia akangateitei, kia akapaapaa, e kia akakaka i to Iehova ra ingoa tapu e te maata oki.
Akapeea Koe me Pau?
• Eaa ka raukai ia tatou kia tuatua e ko te akataoonga anga o te au akaaere e te au tavini orometua e teokaratiki, kare i te temokaratiki?
• Akapeea te vaerua tapu i te akataoonga anga i te au tangata e au apainga Kerititiano ta ratou?
• Akapeea te Pupu Akaaere i o atu ei ki te akataoonga anga i te au akaaere e te au tavini orometua?
• No runga i te au akataoonga anga teokaratiki, eaa tatou i tau ei kia akameitaki ia Iehova?
[Au Tutu i te kapi 15]
Kua tau te aronga pakari e te au tavini orometua ra kia tavini na te akataoonga anga teokaratiki