Papetito Anga “ki Roto i te Ingoa o Te”
TETAI apii anga o te tauatini ua atu au papaanga raupo taito noa ra tei kitea i roto i te au one o Aiphiti i te akamataanga o teia anere mataiti, i te maata anga o te taime kua akapapu te reira i te Tuatua Tapu Ereni Kerititiano. Akapeea? Na te uriurianga i te mataara i taangaangaiaʼi tetai au tuatua, te aratakiia atura tatou ki tetai maramaanga papu o te au tuatua i roto i to ratou akanooanga Tuatua Tapu.
Ko tetai akaraanga ko to Iesu taangaanga anga “i te ingoa o te” i tona akaue anga i tana au pipi i mua ake i te aere anga ki te rangi: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu.” Eaa te aite anga o ta Iesu tuatua?—Mataio 28:19.
Kua kiteaia mai e te aronga apiipii e i roto i te au tataanga noa nei ko te tuatua “i te ingoa o te,” me kore “ki roto i te ingoa o te” (Kingdom Interlinear), kua taangaangaia te reira ma te au akakite anga no runga i te au tutaki anga “ki te kaiou a tetai ua atu.” Kua irinaki te poropeta apii akonoanga ko te Taote ko G. Adolf Deissmann e i te tamanako anga i te kite anga mei te au raupo, “te manako i muri ake . . . i te au tuatua te papetito i roto i te ingoa o te Atu, me kore te irinaki ki roto i te ingoa o te Tamaiti a te Atua, koia oki te papetito anga me kore te akarongo te akatupu ra e tei te Atua me kore te Tamaiti a te Atua.”—na Deissmann te au tuatua arara.
Ma te tau tikai, kua taangaanga te au ngati Iuda i tetai tuatua mei teia i to Iesu tuatau, mei tei akamaramaia i roto i te Theological Dictionary of the New Testament: “Kua raveia te peritome anga o tetai tangata tei taui . . . ‘i roto i te ingoa o te tangata tei taui ra,’ no te ariki atu iaia ki roto i te akonoanga Iuda. Kua tupu teia peritome anga . . . ‘i roto i te ingoa o te koreromotu,’ no te ariki atu iaia ki roto i te koreromotu.” Kua akatumuia i reira tetai pirianga e kua riro mai te tangata kare i te ngati Iuda ra ei tangata tei taui i raro ake i te mana o te koreromotu.
No te Kerititiano i reira, ko te papetito anga tei aru mai i te akatapu anga, te akatumu ra te reira i tetai pirianga vaitata ki te Atua ko Iehova, e tana Tamaiti ko Iesu Karaiti, e te vaerua tapu. Te kite ra te tangata tei taui ra i to raua mana ngateitei i roto i tona oraanga ou. Ka tamanako ana e akapeea teia e tika ei no te takitai ingoa e toru ra.
Na te kiteanga i te mana o te Atua, ka piri vaitata tatou kiaia e te tomo atu ki roto i tetai pirianga ma ia ra. (Ebera 12:9; Iakobo 4:7, 8) Kua riro mai tatou ei apinga na te Atua ei au tavini nona, tei tutakiia ki te oko o te atinga oko o Iesu Karaiti. (1 Korinetia 3:23; 6:20) Kua akakite katoa te apotetoro ko Paulo ki te au Kerititiano i te anere mataiti mua e tei ia Iesu Karaiti ratou, kare tei tetai ua atu tangata tei apai ra i te tuatua mou kia ratou. (1 Korinetia 1:12, 13; 7:23; akaaiteia atu kia Mataio 16:24.) Te oronga maira te papetito anga na roto i te ingoa o te Tamaiti i teia kiteanga ma te tika, te arikianga ia Iesu ei “mataara, e te tuatua-mou e te ora.”—Ioane 14:6.
Te puapinga katoa ra te vaerua tapu i to tatou pirianga tika ma Iehova e Iesu Karaiti. Te papetito anga na roto i te ingoa o te vaerua tapu te akaari maira te reira e te kite ra tatou i te tuanga a te vaerua i roto i te au raveanga a te Atua no tatou. E tau tatou kia aru i te arataki anga a te reira, te kore anga e manako kore atu i te reira me kore te angaanga anga ma te patoi i te reira, te tapupuanga i ta te reira angaanga anga na roto ia tatou. (Ephesia 4:30; 1 Tesalonia 5:19) To te vaerua tu peretana kore kare te reira e akatupu i tetai tu ngata ki tona taangaanga angaia me kore aiteanga, i te taangaanga angaia “na roto i te ingoa o te koreromotu” ra i roto i te akonoanga Iuda.
Inara i te taime o te akatapu anga e te papetito anga, te anoanoia ra tatou kia manakonako na roto i te pure ki runga i te ka o mai ki roto i to tatou pirianga ou. Te umuumuia ra te tu kauraro ki te anoano o te Atua, tei akaariia i roto i te akaraanga e te ravenga oko o Iesu Karaiti, kia raveia na roto i te vaerua tapu i te reira e arataki ra i te au tavini katoatoa o te Atua na roto i te tu aroa e te taokotai i te ao katoa.