Te Taangaangaia nei Kiea te Au Apiianga a Karaiti i Teia Tuatau?
TE MANAKO atea uaia nei a Iesu Karaiti e ko tetai o te au tangata maata rava atu tei ora ana. Manganui te manako ra e koia te tangata maata rava atu. Vaitata rai no te rua tauatini mataiti, tana au apiianga i te akakeu pakari anga i te au oraanga—“te au oraanga akaaka kitea koreia o te au tangata takinga meitaki e te meitaki pera te au angaanga maata no te tauturu tangata,” i tata ai te tangata Papaa tata puka ko Melvyn Bragg.
Akapeea no Runga i te Akonoanga Kerititiano?
Akapeea no runga i te Akonoanga Kerititiano? Kua akatakaia mai te reira e ko “tetai o te au tupuanga maata roa atu o te tangata nei i te pae vaerua.” Tetai manako tei akakiteia mai e David Kelso o te Apii Teitei i Glasgow Caledonia, Tekotia. Kua tata aia: “Kua ki tona tuatua enua o te rua tauatini mataiti i te au angaanga memeitaki i roto i te ao o te ati, te parani akatu apinga, te apiianga kite karape, te apiianga akatangi imene e te tu o te tangata.”
Inara, e tuke rai to tetai aronga manako, no runga i tetai au mea. Ko to ratou manamanata kare no runga i te manako o tetai akonoanga tei akatumuia ki runga i te au apiianga a Iesu Karaiti e te irinakianga e e tamaiti aia na te Atua. (Collins Cobuild) Mari ra, te patoi ra ratou i te tu o te au akaaerenga e karanga ra e te kauono ra ratou i te Akonoanga Kerititiano.
Ei akaraanga, kua akataka mai te tangata Tiamani kite karape o te okotai ngauru ma iva anere mataiti ko Friedrich Nietzsche, i te Akonoanga Kerititiano na roto i te tu manako i muri nei e ko “te kino mutu kore okotai o te tangata nei.” Ko te reira, i tata ai aia, “te tumu maata okotai o te kino, te aka kino maata okotai e te oonu, . . . te reira te au ravenga viivii roa atu, tika kore roa atu, unauna roaia atu e te takinga kino roa atu e taangaangaia nei.” E tika, e pakari roa to Nietzsche au manako, inara mei te reira rai te manako o tetai aronga akarakara tau atu. No teaa ra? No te mea i te au anere mataiti i aereia mai ana kua kitea taka uaia te tu o te aronga tei karanga e e au Kerititano ratou, kare na te au tu o Iesu Karaiti, mari ra na te “au tu kino viivii, e te akakino i te Atua.”
Tei Roto Ainei a Karaiti i te Akonoanga Kerititiano?
Kare i te mea tau kore, i reira, kia ui e, “Tei roto nei ainei rai a Karaiti i te Akonoanga Kerititiano?” Ka karanga vave ua mai tetai aronga e “eaa oki tei roto aia!” “Kare ainei aia i taputou ana ki tana au pipi e ka vaitata ua rai aia ia ratou ‘e tae ua atu ki te openga o teianei ao’?” (Mataio 28:20, King James Version) Ae, kua tuatua rai a Iesu i te reira. Inara te karanga ra ainei aia e ka vaitata ua rai aia i te tangata ravarai e karanga ra e e pipi nana, noatu eaa te tu o taua tangata ra?
E akamaara, e kua manako ana tetai au arataki akonoanga i to Iesu tuatau e tei vaitatao rai te Atua ia ratou noatu eaa to ratou tu. I te mea kua iki te Atua ia Iseraela no tetai angaanga takake, kua manako i reira tetai au arataki akonoanga e kare rava te Atua e akaruke ia ratou—noatu eaa ta ratou i rave. (Mika 3:11) Inara, i te openga, kua maata roa ta ratou kopae i te au ture e te au turanga a te Atua. Tei tupu mai, kua akakite tika atu a Iesu Karaiti kia ratou: “I na, kua vaio taneaia to kotou nei are.” (Mataio 23:38) Kua ngere takiri tetai akatereanga akonoanga katoa i ta te Atua akaperepereanga. Kua kopae aia i te reira e kua tuku ua i te au nuku vaeau o Roma kia akapou i tona oire maata, ia Ierusalema, e tona iero i te 70 T.N.
Ka tupu ainei tetai mea mei te reira rai ki te Akonoanga Kerititiano? Ka akamanako ana tatou eaa te au turanga ta Iesu i kapiti atu ki tana taputou kia vaitatao i tana au pipi e tae ua atu ki “te openga o teianei ao.”
[Au Tutu i te kapi 2, 3]
Kua riro te au apiianga a Iesu Karaiti ei akakeuanga pakari ki runga i te au mirioni ua atu i te ao katoa