Arataki Anga Meitaki​—Ka Kitea e Tatou te Reira Kiea?

“E AKATU oki to te au are ravarai nei,” i akakite ei te Pipiria, “ko tei akatu ra i te au mea katoa, ko te Atua ïa.” (Ebera 3:4; Apokalupo 4:11) I te mea ko Iehova, te Atua mou, Tei Anga ia tatou, “kua kite oki aia i to tatou tu.” (Salamo 103:14) Kua kite meitaki oki aia i to tatou au kotinga anga e te au umuumu anga. E no te mea e Atua aroa ua aia, te inangaro ra aia i te akamerengo i taua au umuumu anga. (Salamo 145:16; 1 Ioane 4:8) Ta tatou umuumu anga i te arataki anga meitaki kare ia i te mea tuke ra.

Na roto i te peroveta ko Isaia, kua akakite mai a Iehova: “I na, kua oronga au iaia ei Kite no te au tangata nei, ei Arataki, e ei Tutara no te au tangata nei.” (Isaia 55:4) Te pau anga ki te tumatetenga i te pae i te arataki anga te kapiti maira i te akatakaanga i teia Arataki​—tei akataoongaia e te Mana Katoatoa uaorai​—e te arikianga i tana arataki anga. Koai, i reira, teia Arataki e te Tutara tei totouia? Eaa ra tona au tu meitaki ei arataki? Ka taki aia ia tatou kiea? Eaa ta tatou ka rave e puapinga ei mei tana arataki anga?

Tae Mai te Arataki Taputouia

No etai 2,500 mataiti i topa, kua mama atu te angera ko Gaberiela ki te peroveta ko Daniela e kua akakite atu kiaia: “Kia kite koe, e kia taka tikai, mei te riro anga o te tuatua, i te rave akaou e te patu ia Ierusalema e tae rava atu ki te Mesia te Ariki ra, e itu ïa ebedoma, e nga ebedoma oki e ono ngauru ma rua; e patu akaouia oki te arataa e te koro i te tuatau pekapeka ra.”​—Daniela 9:25.

Te taka meitaki ra, te akakite ra te angera kia Daniela i tetai tuatau akatakaia no te aere anga mai o ta Iehova Arataki ikiia. Ka mama mai te “‘Mesia te Ariki ra’ me kare te Arataki,” i te openga o te 69 epetoma, me kare 483 mataiti, te tareanga mai mei te 455 M.T.N., i te akakite angaia te tuatua kia patu akaouia a Ierusalema.a (Nehemia 2:​1-8) Eaa tei tupu i te openga o taua tuatau ra? Te akakite maira te tata Evangeria ko Luka e: “E tae akera ki te ngauru ma rima o te mataiti i te au o Kaisara Tiberio, ko Ponotio Pilato te tutara i Iudea, e ko Heroda te teterareka i Galilea [29 T.N.], . . . i tae mai ei te tuatua a te Atua kia Ioane te tamaiti a Zakaria i te medebara ra. Aere atura aia na te au ngai katoa i Ioridana ra, i te tutu aere anga i te bapetizoanga tataraara kia akakoreia te ara.” I taua taime ra, “te tapapa ua ra te au tangata katoa” i te Mesia te Arataki. (Luka 3:​1-3, 15) Noatu kua aere mai te au urupu kia Ioane, kare koia taua Arataki ra.

I reira i roto ia Okotopa i te 29 T.N., kua aere atu a Iesu o Nazareta kia Ioane e kia papetitoia. E kua kite mata atu a Ioane, te na ko anga: “Akara atura au i te Vaerua i te eke anga mai mei te rangi mai, mei te kukupa ra te tu, e kua noo iora ki runga iaia. Kare ra au i kite iaia, auraka tei tono mai iaku e bapetizo ki te vai nei, i karanga mai kiaku nei e, Ko taau e akara i te Vaerua i te eke anga mai, e te noo anga ki runga iaia, koia ïa, ko te ka bapetizo ïa ki te Vaerua Tapu. Kite atura oki au, e akakite atura oki au e, ko te Tamaiti teia na te Atua.” (Ioane 1:​32-34) I tona papetitoanga, kua riro mai a Iesu ei Arataki akatainuia​—te Mesia, me kare Karaiti.

Ae, ko te “Arataki, e ei Tutara no te au tangata nei” tei taputouia kua riro mai e ko Iesu Karaiti. E me akara tatou i tona au tu ei arataki, ka kite ua tatou e e meitaki roa atu tana tu arataki anga i te au umuumu anga o teia tuatau no tetai arataki tau ua.

Te Mesia​—Tetai Arataki Tau Ua

Te oronga ra tetai arataki meitaki i te akauenga taka meitaki e te tauturu ra i te au tangata i raro ake i tana akono anga kia rauka te maroiroi e te au apinga e raukai ia ratou i te akatikatika ma te manuia i te au manamanata. ‘Te umuumuia nei teia no tetai arataki manuia o te 21 anere mataiti,’ i na te puka ei o te 21st Century Leadership: Dialogues With 100 Top Leaders. Mei teaa te meitaki o ta Iesu akapapa anga i tana aronga akarongo kia akono i te au turanga mei tetai ra ki tetai ra! Ka akamanako ana i tana tuatua rongonui​—te Tuatua i te Maunga. Tei maata i roto i te oronga anga i te manako tau ko te au tuatua tei tataia i roto ia Mataio pene 5 ki te 7.

Ei akaraanga, ka akamanako ana i ta Iesu ako anga no te akatikatika anga i te ke i rotopu i tetai e tetai. Kua tuatua aia: “E teianei, kia apai koe i taau apinga oronga ua ki te atarau, e kua manako iora koe i reira e, e ara ta to taeake ia koe na: Vaio atu i to apinga i mua i te atarau, e akamata i te aere e ongi i to taeake, ka aere ei ka apai i taau apinga.” (Mataio 5:​23, 24) Te akono anga i te manako rave ua no te akatupu i te au ma tetai e mea maata ia​—ki runga i te rave anga i te au angaanga akonoanga, mei te orongaanga i te au apinga aroa ki runga i te atarau i te iero i Ierusalema mei tei umuumuia e te Ture a Mose. Me kore ra, kare te au angaanga akamori anga e arikiia e te Atua. Te tau nei ta Iesu tuatua i teia tuatau mei te anere mataiti i topa ra.

Kua tauturu katoa a Iesu i tana aronga akarongo kia kopae i te ereere o te tu akono tau kore. Kua ako aia ia ratou: “Kua akarongo kotou e, i tuatuaia mai e te aronga taito ra e, ‘Auraka rava koe e akaturi:’ Te karanga atu nei ra au kia kotou, Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” (Mataio 5:​27, 28) Mei teaa te tau i taua akamatakite anga! Eaa ra tatou ka akamata atu ei i te aere ki runga i te mataara rave i te akaturi na te manakonako anga no runga i te reira? Mei roto mai i te ngakau te poneia e te akaturi, i na Iesu ei. (Mataio 15:​18, 19) Ka pakari tatou i te paruru i to tatou ngakau.​—Maseli 4:23.

Te ki katoa ra te Tuatua i te Maunga i te ako anga meitaki no runga i te inangaro i to tetai uaorai enemi, te akaarianga i te tu oronga ua, te raukaanga te manako tau no te au apinga materia e te pae vaerua ra, e te vai atura. (Mataio 5:​43-47; 6:​1-4, 19-21, 24-34) Kua akaari katoa a Iesu ki tana aronga akarongo akapeea me pati i ta te Atua tauturu na te apiianga ia ratou akapeea me pure. (Mataio 6:​9-13) Te akaketaketa ra e te akapapa ra te Mesia te Arataki i tana au pipi kia akono i te au manamanata tei matauia e te au tangata ravarai.

E ono taime i roto i te Tuatua i te Maunga, kua akakite mai a Iesu i tana tuatua ma te takiota tuatua “kua akarongo oki kotou e” me kare “i tuatuaia oki,” inara kua akakite mai aia i tetai manako ke, te na ko anga “te karanga atu nei ra au kia kotou.” (Mataio 5:​21, 22, 27, 28, 31-34, 38, 39, 43, 44) Te akakite maira te reira e kua matau tana aronga akarongo i te akonoanga na roto i tetai mataara matauia, kia tau ki te au peu tuatuaia a te Pharisea. Inara i teianei te akaari ra a Iesu kia ratou i tetai mataara tuke​—tetai te akaata ra i te tu mou oki o te Ture a Mose. No reira te akanoo maira a Iesu i te taui anga, e kua rave aia i teia na roto i tetai mataara tei akariro e kia ngoie i tana au pipi i te ariki ua. Ae, kua akakeu a Iesu i te au tangata kia akono i te au taui anga umere tikai i roto i to ratou au oraanga, i te pae vaerua e te tu akono. E akairo tikai teia o tetai arataki tika tikai.

Kua akakite mai tetai puka no runga i te akaaere anga mei teaa te ngata i te akanoo i taua taui anga. Te na ko ra te reira: “Te anoano ra te rima rave tauiia [te arataki] i te tu aroa ua o te aronga akono, te tu kite pakari o tetai tangata apiipii i te pae manako, te tu akakoromaki o tetai tangata oro, te tu maro o tetai puakaaoa, te tu irinaki ua o tetai tangata takake, e te tu tamou marie o tetai tei teitei atu. Noatu taua au tu ra, kare e akapapu anga o te tu manuia.”

“Kia akono te au arataki na roto i tetai tu te umuumu ra ratou i ta ratou aronga aru i te akono atu,” i akakite ei tetai atikara te ingoa “Arataki Anga: E Puapinga Ainei te Au Tu?” E tikai, te rave ra tetai arataki meitaki i tana e akakite ra. Mei teaa te tika i te reira kia Iesu Karaiti! Ae, kua apii aia i te aronga i kapiti atu kiaia kia akono i te tu akaaka, inara kua oronga katoa aia i tetai apiianga tau no ratou na te tamaanga i to ratou vaevae. (Ioane 13:​5-15) Kare aia i tuku ua i tana au pipi kia tutu aere i te Patireia o te Atua, inara kua tuku maroiroi aia iaia uaorai i roto i taua angaanga. (Mataio 4:​18-25; Luka 8:​1-3; 9:​1-6; 10:​1-24; Ioane 10:​40-42) E no runga i te ariu anga atu ki te arataki anga, kua akanoo a Iesu i te akaraanga. “Kare e tika ta te Tamaiti kia rave aia anake uaorai,” i tuatua ei aia nona uaorai, “ko tana ra i kite i te Metua i te rave anga.”​—Ioane 5:19.

Te akamanako anga i tei taikuia no ta Iesu i tuatua e i rave te akaari taka meitaki maira e koia te Arataki tau. Ko te tika, e meitaki atu aia i te au turanga ravarai a te tangata ra no tetai arataki anga meitaki. E apa kore oki a Iesu. Te raukaanga te turanga mate kore tei aru mai i tona matenga e te tuakaouanga, te ora ra aia e tuatau ua atu. (1 Petero 3:18; Apokalupo 1:​13-18) Koai atu ia arataki tangata te ka aiteite atu ki teia au turanga tau?

Eaa ta Tatou ka Tau kia Rave?

Ei Ariki tutara no te Patireia o te Atua, ka akamaringi mai te Mesia te Arataki i te au akameitakianga ki rungao i te au tangata akarongo. No teia te taputou maira te au Tuatua Tapu: “Ka ki te enua i te kite ia Iehova, mei te vairanga tai e ki i te tai ra.” (Isaia 11:9) “Kareka te aronga maru ra, ka noo ïa i te enua, e ka rekareka ratou i te maata o te au ra.” (Salamo 37:11) “E noo ra ratou ravarai ki raro ake i tana uaorai vine, e ki raro ake i tana uaorai suke, e kare tetai e akamataku mai.” (Mika 4:4) “E noo te Atua ki rotopu ia ratou, ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”​—Apokalupo 21:​3, 4.

Te kite ra te ao i teia tuatau i te tumatetenga o te arataki anga. Inara, te taki nei a Iesu Karaiti i te aronga maru ki roto i tetai ao ou ponuiaau, i reira ka taokotaiia te au tangata akarongo i roto i te akamori anga i te Atua ko Iehova e ka aere atu ki mua ki te turanga apa kore. Mei teaa te puapinga kia akanoo tatou i tetai tuatau e raukai te kite i te Atua mou e tana Arataki akataoongaia e kia rave rotai i taua kite!​—Ioane 17:3.

Ko tetai o te au akameitakianga ka rauka ia tatou i te oronga ki tetai tangata koia oki kia aru iaia. Kare ainei e tau kia tauta tatou i te aru i te Arataki maata roa atu i roto i te tuatua enua o te tangata​—ko Iesu Karaiti? Akapeea tatou i te akapera anga? Eaa te tupu anga maata no te arikianga i tana arataki anga ki runga i to tatou au oraanga? Ka uriuriia teia au ui anga e tetai atu i roto i nga atikara e aru mai nei.

[Tataanga Rikiriki i Raro]

[Tutu i te kapi 4]

Kua totou a Daniela i te taeanga mai o ta te Atua Arataki ikiia

[Tutu i te kapi 7]

Akapapa ta Iesu au apiianga i te tangata kia akono i te au manamanata o te oraanga

[Tutu i te kapi 7]

Ka taki a Iesu i te au tangata akarongo ki roto i tetai ao ou ponuiaau